الأربعاء، 23 سبتمبر 2009

وربنا .. وربنا لأنيمك من المغرب يا مصر ... قصدي يا صين

تحدييييييييييييييييث

عيد ميلاد حنين القلب النهارده وكل سنه وانتى طيبه يا حنين وعقبال ميت سنه سعاده وهنا يارب وربنا يكمنا عليكى
وانا عملتلك يا جميل تورتايه على المدونه التانيه
طابخين ايه النهارده ؟؟
يلا روحي بس ما تلحسيش الكريمه عارفاااااااااكي
***************************************************************************






السلام عليكم

بعد العيد وبعد ما اكلتوا الكحك خلاص وانتختوا كفايه فى العيد

وعيدنا على بعض لما شبعنا

نرجع بقى نرغي وناكل دماغكم تاااااااااني

الحقيقه يا جماعه انا لازم ابلغكم وانتم حبايبى يعنى ما اقدرش اخبي عنكم حاجه

انى ان شاء الله اول حاجه اعملها لما امسك الحكم

فى الصين يعنى ( ما تستهبلوش بقى )

اول حاجه هاعملها انى انيم الشعب ده من بدري



ايوه يصلوا المغرب ويقعدوا ينعسوا على نفسهم لحد ما العشاء تأذن يصلوا ويناااااااموا

قاعدين بتعملوا ايه طول الليل يا ناس

كله ينام بدري ويصحي بدري

وهاصرف منبه مجانا لكل مواطن من نوع جديد مش صييييينى هاجيبه صعيدى ما عندوش تفاهم
بالمرزبه وفى وشك على طول لو ما صحيتش

نيجى للجد بقى

انا عايزه اعرف احنا ليه بقينا كده

البلد كلها نايمه لحد الظهر والعصر كمان

ايه فى ايه اتهبلتوا يا بشر ولا ايه

انا اخرج الصبح ما الاقيش ولا مشوار يوحد ربنا اقضيه ؟
الناس نايمين للظهر كلهم

وطبعا طبعا صاحيين للصبح فى الشوارع

لييييييييييه بقى

كل الدول المحترمه والمدن الكبيره لها مواعيد

الساعه مثلا عشره مساءا تلاقي كل المحلات قفلت

والى فاتح ياخد مخالف اااايوه مش هيصه

مافيش حد بيسهر كده زينا الا باريس
بس هما بيسهروا عشان السياحه بتاعتهم ما بتشتغلش الا بالليل

(ايه الممرضات عندهم كتير بياخدوا نباتشيات بالليل سياحه علاجيه . على طول نيتكم وحشه ؟)

سامعه حد فكيك بيقولك كده احسن


اصل فى حاجات لما بتكون فاتحه على طول يبقى احسن زي الصيدليات وكل حاجه


احنا كده لازم فى اي وقت نشاور نلاقي






لا يا حبيبى الحاجات الاضطراريه دي لها حل



مثلا صيدليات معينه مقيده انها خدمه اربعه وعشرين ساعه




(كان زمان عندنا فى المنصوره صيدليه واحده بس دلوقتي كلهم قاعدين وتوصيل للمنازل كمان )




كانوا فى ابو ظبي لما كنت هناك بيرتبوها تباعها بين الصيدليات الخدمه الليليه دي

ويعلنوا عن الصيدليات الليله يوميا مين عليه الدور النهارده فى الراديو والتلفزيون والجرايد


والسوبر ماركت برضه ما حدش بيسهر للساعه واحده مثلا الا لما يكون واخد ترخيص بكده

ايه بقى الميغه الى احنا فيها دي

انا بامشي فى الشارع الساعه 2 الظهر الاقي كل الشباب

اه الشباااااااب ( الفئه المنتجه فى المجتمع )المفروض يعنى الى هما من سن 16 سنه لحد مثلا 25 سنه

كلهم يادوب صاحيين من النوم والمخده معلمه فى وشهم وعنيهم مغشلقه من دخان السجاير الى طفحوه مساءا

يادوب يعنى لزق شعره وخرج

طب هايشتغل امته.؟؟؟؟؟؟؟؟ هاينتج امتتتتتتتته ؟؟؟؟؟؟؟ ما النهار خلص

يا ناس ربنا قال ايه

وهو الذي جعل لكم الليل لباسا والنوم سباتا وجعل النهار نشورا
الفرقان




وَجَعَلْنَا اللَّيْلَ لِبَاسًا وَجَعَلْنَا النَّهَارَ مَعَاشًا
النبأ


هى كده عايزين تغيروها ليه مش بمزاجكم

لازم تناموا بالليل وتصحوا بالنهار

كانت تيته الله يرحمها تقولي يا بنتى اصحي بدري ساعه واحده بس تلاقيها ابرك من خمس ساعات متاخرين

وده لما كنت باصحى الساعه عشره الصبح يعنى مش بانام للعصر

حقيقى مافيش احسن من النوم بدري والصحيان بدري

انا جربت العكس ايام ما بيكون عندي بيبى لسه بيسهر والافلام دي كنت خلاص قربت اتجنن وبقى شكلي شبه

الاشباح كده ووشي اصفر وتحت عنيه بقى اسود

السؤال بقى

ليييييه ما نطلعش قرار بان المحلات تقفل الساعه عشره مثلا ؟؟

وطبعا الى ما يلتزمش ويتقفش يدفع غرامه دوغري

المحلات والشركات وكل حاجه

خلاص الساعه عشره الناس تروح بقى بيوتها

هايسهروا فى بيوتهم ؟؟؟ ماشي يتفلقوا

بس هايصحوا بدري غصب عنهم يخلصوا مصالحهم لو كان عندهم مصالح
لان المحلات هاتقفل بدري

وكل واحد هاعمل حسابه يروح قبل ما المحلات تقفل عشان يجيب حاجته وهو مروح

ولما يناموا بدري يخفضوا استهلا ك الكهربا الى شركة الكهرباء بتصوت منه ووزير الكهربا قرب يطلع هو كهربا ء ذاتيا من كتر الاستهلاك

ولا تاخير ساعه ماثره فيهم ولا غيره هما صاحيين طول الليل وبس


عارفين لو الحكومه عملت كده ايه الى هايحصل

الناس هاتشتم وتقول ولاد الهوهو دول هايقطعوا رزقنا هو احنا ناقصين ده الشغل ما بيمشيش الا بعد الساعه عشره

لا طبعا يا شعب سطحي هى فتره بس انتقاليه وكل واحد بعد كده هايتربى ويجى يشتري حاجته بدري لما يعرف انك انت وغيرك هاتقفل بدري

ماهو هي هي

الى بيسهر للفجر فى محله ولا شغله لازم لازم هايروح ينام للظهر علىالاقل دايره وبتلف

الشعب ده محتاج يتربي يا جماعه الحكايه بقت اوفر على فكره وانا زهقت

وعليه قررنا نحن صبرني يارب انى اول ما امسك الحكم هاربي الشعب ده

وعلى راي آبي هانم بتنجاني
حكمة الامبراطوره ( ما انا هامسك الحكم بقى )


بس مش عندك يا آبي ما تخافيش انا منشنه على الصين زي ما انتى شايفه

الصباح رباح



والنهار له عنين



والليل ستار



وفوق البيعه

اصحاب العقول فى راااااااااحه

ومن تعبه عقله تعبته رجليه

والعقل زينه فى الباترينه

ولكن لا ننكر ابداااااااااااا

ان المجانين فى نعييييييييييييييم

هناك 65 تعليقًا:

شوكولاتة يقول...

واااااااااوووووو
أوووووووووووول تعليق
وأووووووووووووول زيارة
وكمان قريت

شوكولاتة يقول...

الله البوست ده حلو مووت إحنا بس فالحين نقدم ساعة علشان الناس تنام بس إيه إحنا مابيهمناش حد
أنا مرة واحدة صاحبتي على محل كل يوم أروحله الأقيه قافل وفي الآخر عرفت انو بيفتح الساعة 3 ويقفل الساعة 5 ويفتح بالليل بقى الساعة 11

تحياتي ياقمر

صبرني يارب يقول...

شيكولاته

ايه ده انتى نتى واقفه على الباب ولا ايه
هههههههههههه
ده لسه ما نزلش الموضوع فى الريدر

نورتي يا جميل

وفعلا هو ده الى بيحصل طول النهار نايمين وطول الليل صاحيين ازاي ده بس

مصري جدا يقول...

وجايبة ايات من القران تستشهدي بيها علشان ننكتم

ماشي يا صاصا

أنا الصعيدي أبو مرزبة

هصحى وأنتيمهملك

وبعد ما ينامو اروح باريس

هههههههههههههههههههههههه

على حسابك

سفر وتمريض

أصل حالتي مأندلة عالاخر

صبرني يارب يقول...

مصري جدا

يا لهوي ما تفووووولش على نفسك يا اخويا

احنا نجيبلك باريس لحد هنا

ماهو ثنيه زمانها سافرت باريس بعثه

هع

عمرو جويلى يقول...

السلام عليكم
أنا ليا طلب عندك
أمانة عليكِ لما تبقى رئيسة الصين تخلى بالك من الجماعة بتوع تركستان الشرقية
أحسن مظلومين جامد أوى فى الصين وبعدين الجماعة دوول فيهم ميزة وهى أنهم بيناموا بدرى
وكل سنة وحضرتك طيبة
دمتِ فى خير

واحدة مفروسة يقول...

انا جيت
اولا كل سنة و انتى طيبة و بخير و سعادة انتى و الاولاد و ابوهم
ثانيا يا صبرني
الاهي يا رب تقابلى حد يفرسك زي ما انتى فرستيني بالبوست بتاعك ده
ايه يا بنتى؟
انتى الكحك خلاكي مش تاخدى بالك ولا ايه؟؟؟
و لا انتى اكلتي غريبة؟؟هههههههههههه
يا بنتى احنا شعب منقسم الى شقين
واحد فرعون و التاني كسلاااااااااااان
الفرعون يبقى حافى و مش معاه الابتدائية و بيتأمر عاوز يشتغل مدير و بمرتب فولاذي
و التاني الكسلان عنده شغلانه مش يحمد ربنا عليها و يديها حقها لأ ينام للظهر و كسلان ولا على باله
ده طبعا داخل فى الفئتين دول اصحاب المهن اللى كسلو عن مهنهم كلها و استسهلوا انهم يستوردوا من الصين
ديه الموبيليا يا امى بقت من الصين
و انتى جاية تفرسيني و تقولى حتنيمي الصين من المغرب؟؟؟؟؟
امال مين اللى حيشتغل و يوردلنا الحاجات و المحتاجات
هههههههههه
اختك امبارح دخلت السوبر ماركت تروش لزوم العيد
لبان على شيكولاته على ايس كريم
ههههههه و بما انى حريفة لبان
و اسألى عليا حيقولولك ....خصوصا انه ساعات بيمتص الفرسة
قوم ايه لاقيت لبان شكله حلو و شكله برضه جديد عليا
شهقت قلت ازااااااي لبان ينزل و انا مش اعرف عنه
قوم قلبته علشان اعرف جاي منين
قوم بقا المفاجعة لاقينه
انتاخ الصين الشقيقة
ههههههههههههه
ربنا يخليهالنا
سبت اللبان الصراحة خوفت
بس تصدقى طالع من عيني كان نفسي اجربه
شكله كان حلو
شوفتى يا صبرني بقا؟
احنا ما صدقنا حد يشتغل بدلنا يا امي
بكرة الحكومة حتستعين بالصينين للوظائف الحكومية
و يجعله عامر

adel يقول...

الفكرة مش فكرة نوم و صحيان او ناس تقفل بدري
انا ضد ده
برة في محلات كتير قوي 24 ساعة و من غير تصرايح !!!!!

الفكرة فينا احنا
اتعلمنا الانتخة و الراحة و السلبية

انا مثلا 23 سنة بحاول اتخرج من تعليم مضفليش اي شئ جديد ... كل اللي عرفته اتعلمته لوحدي من النت و الكتب الخارجية

نفسي اعمل شغل لبلدي لاني اساسا بموت فيها

بس فين ؟؟؟؟
اتخرج و جيش ... بعد الجيش ؟؟؟

هشتغل بشهادة اساسا مش معترف بيها ؟؟؟
مع اني المفروض شغلي هنا اكتر ... بس كوسة و وسطة و بوظان تعليم
خلاوني منفعش ببصلة في بلدي

اروح اشتغل ايه انا بقي بعد اكتر من 19 سنة دراسة ؟؟

اه في كتير شباب مقضينها استنطاع
بس الحل مش انك تقفلي البلد بدري و تنيمهم من الضهر و يصحوا بدري

انا بصحي بدري قوي و مبعملش اي شئ
هههههههههههه

مسدس صغير يقول...

انتى لها وانا معاكى
بس وانتو بتصحو الناس بلاش تفوتو على بيتنا
هههههههههه
شدى حيلك
ربنا يعينك علينا
ههههههههه
انتى بتساوينا بالامارات وبفرنسا
احنا بعد غينيا وموزمبيق ومدغشقر

يــوم جــديد يقول...

الموضوع دا فعلا أنا ملاحظاه من فترة
كل ما أنزل 10 ولا 11 الصبح كل حاجة قافلة وفي رمضان كانوا بيقفلوا طول اليوم تقريبا ويفتحوا بعد التراويح
والكل بيقول السوق نايم ومفيش بيع ولا شرا هنفتح ليه
فعلا الناس بقى خلقها ضيق جدا وعصبيين لأنهم مش بيناموا
الواحد مهما نام بالنهار مش بيحس إنه نام
أنا من الناس اللي مش ممكن تعرف تقفل عنيها لو النهار طلع ولولا تعب بابا الفترة اللي فاتت ومكناش بنام خالص كان عمري ما تلاقيني صاحية في الوقت ده

بس مش الحل قفل المحلات وفتحها
الحل إنك تجيبي لهم حاجة يعملوها لما يصحو بدري

عاشقه وغلبانه يقول...

هي صيدليات الطرشوبي بتقفل ياختي ....!!!!!
وعموما انا من الفئه المنتجه اهو وبصحي الساعه 7 وبروح شغلي 8 ونص
ولا هم الدكاتره دول مش بني ادمين وعايزين يناموا

انتي عارفه بقي الدش والفضائيات والنت كل دي حاجات بتخلي الشباب يسهر
لدرجه انه ممكن يقلل سعات نومه بس يسهر

الفضا يعمل اكتر من كده
انا لما كنت بدرس وباخد اجازه كان ليلي نهار ونهاري ليل في الاجازات
مانتش بشوف الشمس دي
دلوقتي بنام بعد العشا وبكون بنعس قبلها من المغرب زي ماقولتي

لو الشباب ده لاقيله شغله الصبح هايصحلها

ستيته حسب الله الحمش يقول...

مش ها انام بدري
ويمكن اخلعك من الحكم ومش ها استنى 30 سنة صدقيني يا ذكي رستم يا اخويا
قال تنيمني بدري
هو انا بعرف ابدع غير قبل الفجر زي الخفافيش :)

تامر علي يقول...

انا لما روحت البلد آخر مرة فوجئت ان الناس اللي كنت بعيب عليهم علشان بيناموا من المغرب بقوا بيسهروا لحد الفجر على الفضائيات ةالفيديو جيم والسيبرات اللي ملت البلد .... وكمان لقين فرن .... فرن في البلد والناس بتشتري عيش ؟؟؟ قالوا لي الناس مش بتاكله دول بيأكلوه للفراخ والبط علشان ارخص من العلف :)

خلاص بدل الحال اتقلب كده يبقى عليه العوض

فين العيديه؟

صبرني يارب يقول...

اللؤلؤه

حاضر اي خدمه يااستاذنا

بس الصين الى انااقصدها كلهم مظلومين اصلا
ههههههههه

نورت يا فندم

صبرني يارب يقول...

مفروسه

ازيك يا جميل كل سنه وانتى طيبه وبخير

والله ياجميله انا قلت الصين يعنى بلاش ننيم بلد تانيه بما انى هامسك الحكم يعنى
وده بيعمل حسحسيه وكده عند ناس فقلنا نبيت فى بيوتنا يعنى


بس برضه لما امسك الحكم هانيمكم من المغرب

صبرني يارب يقول...

عادل

لا مش احنا اتفقنا ان الشعب عايز يتربى ؟

من ضمن التربيه بقى اننا ننيمهم بدري

ما نبقاش شعب جعان ونفضل سهرانين طول الليل ونايمين طول النهار

انااتعلمت فى نفس التعليم الي انت بتقول عليه
واتعلمت مش ما اتعلمتش خالص يعنى

وده الفرق بين حد بيتعلم عشان يتعلم او يتعلم عشان ياخد شهاده ما لهاش لازمه

جايز يكون التعليم بتاعنا قاصر انما احنا كمان قاصرين

وانت نام بدري واصحى بدري وقوم اشتغل

حتى لو كنت طالب اتعلم

عشان التعليم مش بس كتب وقرايه

نورت يا باشا

صبرني يارب يقول...

مسدس صغير

والله ياصلاح احنا باين ما ما عادش حد بعدنا

احنا بقينا بعد كل الناس

حسبنا الله ونعم الوكيل

بس هاصحييييييك بالمنبه الصعيدى برضه

طهر فؤادك يقول...

السلام عليكم ورحمة الله وبركاتة
كل سنة وانتى طيبة ..وعيدك مبارك
ياريت تساعدينى فى حملتى "مدونتك هتنقذ طفللك"وهى فكرة بسيطة بس ان شاء الله خيرها كبير وانا عارف ان الى بيحترموكى

ويقدروكى كتير فياريت تشاركينى وكل الى يحب فى الحملة دى وعن فكرتها وكل حاجة عنها فى اللينك دة ورجاء تدخلى وتشفيها امانة

وجزاكى الله خيرا والمسلمين .
http://rasoulallah1.blogspot.com/

صبرني يارب يقول...

يوم جديد

اولا الف سلامه على بابا يا جميل

واناقصدي كده

ماهو مين اصلااصحاب المحلات والناس الىشغالين فيها

ماهو احنا

ماهو الناس

ماهو لما يقفل بدري هايفتح بدري والناس الى شغالين عنده تباعا

والزباين كمان

شويه شويه تظبط العمليه كلها

لازم ايد نظاميه تدخل فى الموضوع
احنا متسابين كده لنفسنا لما الدنيا باظت
نورتي يا جميل

صبرني يارب يقول...

ستيته

يا باشا انت تنام فى اي وقت وتصحى فى اي وقت ولا يهمك
هههههههههههههههههه

الكبير كبير برضه

تخلعينى ايه بس الرجاله بس الى بيتخلعوا دلوقتي

ضكـــــتور جدا يقول...

وَجَعَلْنَا اللَّيْلَ لِبَاسًا وَجَعَلْنَا النَّهَارَ مَعَاشًا
........................
صح هو ده القانون اللي مفروض نمشي عليه
بس لازم عشان نطبقة جزء كبير منه يكون على الحكومة زي ما قولتي
ما لا ينزجر بالقرآن ينزجر بالسلطان
تحياتي

صبرني يارب يقول...

عاشقه وغلبانه

ماهو كام فى الميه بيشتغل فى الحكومه ؟

ماهو المحلات دي هى الشغل

لو المحلات تفتح بدري وتقفل بدري هما كمان لما يشتغلوا هايشتغلوا بدري

هو عاد في صيدليات بتقفل ؟

صبرني يارب يقول...

طهر فؤادك

انا متشكره اوي على ثقتك

وحاضر هاروح اشوف ايه الموضوع ونشوف ممكن هانعمل ايه

نورت

صبرني يارب يقول...

تامر علي

ايوووووه ماهو الفلاحين كمان سابوا اراضيهم ومصالحهم ونايمين للظهر

نعمل ايه بقى

ماهو السيبرات والكلام ده كله يقفل بدري

نوعا ماالدنيا هاتظبط وشويه شويه كمان

نورت يا فندم

kochia يقول...

بجد بوست في الجون
انا كنت فاكرة دي مش ظاهرة وشوية الناس اللي انا اعرفهم هم بس اللي كدة
فعلا البلد كلها نايمة
يمكن عشان البطالة ؟؟
مهو اكيد الشباب دول مش لاقيين حاجة يعملوها
او يمكن التفكك الاسري
مهو زمان كان الفطار والغدا والعشا مواعيد مقدسة مع الاسرة دلوقتي كل واحد بيسحب طبقه من المطبخ وقت ما يصحي والاب والام بياكلوا لوحدهم

مش عارفة بس فعلا حاجة وحشة جدا وسمة من سمات التخلف .. عشان علي رايك فين وامتي الانتاج هيكون ؟؟

موضوع رائع
تحياتي

صبرني يارب يقول...

كوشيا

لا مش الناس الى تعرفيهم بس

البلد كلها بقت كده نايمين للظهر لما حاجه تخنق

نورتي يا جميل وشكرا ليكى

همس الاحباب يقول...

كل سنة وانتى طيبة
وعيد سعيد عليكى
ومبروك عليكى الحكم الصينى
وتعالى قابلينى لو نفذتى حاجة من ده كله
ههههههههه

صبرني يارب يقول...

ضكتور جدا

حلوه ايوه اوي دي

ما لا يزجر بالقرآن يزجر بالسلطان

بس ما تمشيش فى كل حاجه برضه يعنى

المفروض ان السلطان ده يشوف ايه الصالح يعمله ولما حاجه توصل لظاهره محتاجه اصلاح يتدخل

ويتدخل بس بشكل غير جائر على الحقوق

زي ما حصل من عمر بن الخطاب لما حدد المهور
وقالتله الست مش من حقك تحرم الست مما احله الله لها

وصدق هو على كلامها ورجع في قراره

يعنى التدخل برضه له اصول

لكن للازم منه

نورت

صبرني يارب يقول...

همس الاحباب

طب بس مسكوني الحكم وشوفوا هاعمل فيكم ايه
هههههههههههههههه

mahasen saber يقول...

اروح اكل التورته بتاعة حنيين
سمعت ان فيه كريمه

ده انا هطلع من عندك بعشره كيلو زياده

mahasen saber يقول...

حلوه قوى المخدات معلمهم فى وشهم دى ههههههههههه

عارفه مفيش احسن من اليى قلتيه بس يتعمل يا صبرنى يتعمل بيه



قوليلى ايه حكاية الفراخ اليى اتكلموا عن الراديو دى
قريت ماسيج اوفلاين منك عن كدا

طمنينى اتريقوا ولاا حاجه
اخدهم من ريشهم على الفرارخى علطول

Ahmed يقول...

هههههههه

حلوه اوي سياحه الممرضات في فرنسا
صحيح نيتنا مش ولابد


طيب وتقولي ايه لما النوم بدري يبقى سبه في اي شاب

تقولي ايه لما النوم بدري يبقى مشكله ووسيله الناس تتريق بيها عليكي لما تعرف الموضوع ده

تقولي ايه لما واحد يروح يرتبط بواحده ولما اهلها يعرفوا انه بينام بدري يقلقوا ويقولوا هوا الواد ده ماله كده مش حرك وبيروح ويجي زي الشباب؟ هوا الواد ده ابن امه ولا ايه

بيحصل صدقيني بيحصل

الحمد لله على نعم النوم بدري والصحيان بدري

الساعه 7 الصبح الدنيا بتكون اجمل, الساعه 7 الصبح اليوم بيبدأ احلى بكتير
اسأليني انا

حنعيش يعنى حنعيش يقول...

حرد بكلمة واحدة بس انت اللى قايلاها الشعب دة عايز يتربى ياجماعة

بسنت صلاح الدين يقول...

عندك حق والله يا جميل مع ان النوم بليل فوايده كتير سبالله لا يفرض علينا شىء الا و كان له منفعه لينا ،انا جربت كل انواع النوم و عاوزه اقولك ان النوم متأخر ده متعب جدا و فعلا سبب الصداع اللى مبيسيبناش ،حتى اللى بيسهروا يذاكروا العلماء اثبتوا ان النوم بدرى بليل بيخلى المخ يفرز ماده تنشط الذاكره و الماده دى لا يفرزها المخ لما ننام متأخر ،عشان كده العيال بيروحوا لامتحان متنحين

صبرني يارب يقول...

محاسن

شوف يا ستى موضوع الفراخ ده

فى قناه كانت شغاله فى رمضان بس اسمها القاهره والناس

بتاعة طارق نور باين

المهم يعنى فى فقره كده بتيجى زي اسكتش لفراخ كارتون بتقول الاخبار

انتى كنت احد الاخبار دي

بالعكس اتكلموا كويس عن اول اذاعه للمطلقات عبر الانترنت

وعن مدونة عايزه اطلق وصاحبتها محاسن

وقالوا فى الاخر ادخلوا مدونه عايزه اطلق

بث خلاث

هما لو كانوا قالوا حاجه وحشه كنت سبتهم يا باشا كنت حشيتهم فريك

صبرني يارب يقول...

احمد ابو العلا

طز فى المجتمع كله كليله لو كان اهبل وسطحي ومتخلف كده

شيوع الخطا مش معناه انه بقى صح مهما يقولوا ومهما يعملوا

يا باشا انت عروستك عندي قول انت بس
ههههههههههههههه

قال مش عاجبهم الى بينام بدري قال

نامي يا ابنى وقوم شوف شغلك

عالم فاضيه

صبرني يارب يقول...

حنعيش يعنى حنعيش

مش بالذمه كده يااستاذنا

بس مين بقى يربيهم ابوهم مش فاااااااضي

صبرني يارب يقول...

بسنت صلاح

اه طبعا كل حاجه ولها حكمه يا بنت وهل خلقنا عبثا

mahasen saber يقول...

شكرا على الخبر يا جميل

بس مكنوش قالوا كلام وحش كان زمانى دلوقتى باكل فراخ من ايدك بالفريك

يله نخليها النشره الجايه

صبرنى انا هتطوع واقص الريش

اقصوصه يقول...

انا عيد ميلادي كان من 4 ايام

محد قالي كل عام وانتي بخير :(

حنين القلب يقول...

كل سنه وانتى طيبه يا سكرة

ويا رب مش يحرمنى منك ابداااااااا

وتفرحى دايما بمريم ورحمه وخالود

انا هاكل التوته كلها مش هلحس الكريمه بس
المهم عملتيها ليه تلات انصاص زى ما قولت ليكى
هههههههههههههههههههههه
بموووووووووووت فيكى

صبرني يارب يقول...

محاسن

خلاص نحشيهم برضه ولا يهمك يا جميل

صبرني يارب يقول...

حنين

ايه ثلاث انصاص الىا نتى ماسكه فيهم دي

ايه البت دي ياولاد
ههههههههههههه

كل سنه وانتى طيبه يا قمر وعقبال ميت سنه هنا يارب

صبرني يارب يقول...

اقصووووووصه

يا حبيبتى كل سنه وانتى طيبه وعقبال ميت سنه سعاده وهنا يارب

والله ما عرفت انا يعنى يادوب بافتكر عيد ميلادي

ههههههههههههههههه

كل سنه وانتى طيبه يا جميل

طهر فؤادك يقول...

السلام عليكم ورحمة الله وبركاتة ,,

ربنا يكرمك يارب والمسلمين على دعمك للحملة وان شاء الله يجعلة فى ميزان حسناتك ان شاء الله وهنبدأ النشر الجماعى لموضوع الحملة يوم 29 / 9/ 2009 لو تحبى تشتركى معانا بأذن الله تعالى وكل من يحب ان شاء الله الباب مفتوح .

شمس النهار يقول...

صبورتييييييييي

طيب كويس انك هتحكمي الصين علشان مش هتتعبي كتير علشان همه اصلا بيناموا بدري

كل سنه وانت طيبه
عايزه المصريين يناموا بدري؟؟؟

اه طيب

اذا كان الفلاح اللي المفروض في الف باء الزراعه اغلب تعامله مع الارض لازم يكون بعد الفجر قبل ماالشمس تحمي

بيسهر للدش وبيصحي الضهر

خلااااااااص هي باظت

قول لي اخبار الكحك ايه طلع حلو والا ايه الموضوع

بس ياريت ماتحطيش عليه سكر علشان انا بحبه من غير سكر:)

من غير عنـــوان يقول...

كل سنه وانت طيبه

طبعا موافق وأول واحد ممكن يقوم بتنفيذ الحكم.. هو أنا

وياريت نقفل الساعة 7

وبالأمر

كمان طبيعي كده...إن ربنا مدينا ادرنالين الصبح بيساعدنا على الصحيان والفوقان
ومدينا ميلاتونين بالليل بيساعدنا على الراحه والنوم

أفادكم الله بهذا البوست الجميل

أمنياتي

حلم بيعافر يقول...

كل سنة وانت طيبة

Che يقول...

كل سنه و انتى طيبه الاول
بس انا عندى سؤال واحد بس
.... واحد حياته زى الخفافيش مش بيعرف يعيش غير بليل ... يعمل ايه

صبرني يارب يقول...

شموستى

الكحك طلع تمام الحمد لله

والله عندي من غير سكر امري بس يا قمر

كل سنه وانتى طيبه يا جميل

وبرضه هانيمهم بدري

صبرني يارب يقول...

طهر فؤادك

العفو يا فندم ده انا الى متشكره على الدعوه

ومعلش هاتعبك تبقى تفكرني يوم 28 اصل انا مسطوله يعنى ممكن اتوه وانسى

جزاكم الله خيرا

صبرني يارب يقول...

حلم بيعافر

وانتى طيبه وبخير

صبرني يارب يقول...

من غير عنوان

اه والله يا استاذنا دي تبقى فله سبعه يا سلااااام

طب ماشيها عشره جايز يتكسفوا ويوافقوا

انت عارف ان في الصين الساعه سته ما تلاقيش خلاص كله روح فيما عدا اسواق بتفتح فى ايام معينه واوقات معينه

الصين الى هما بياكلونا دلوقتي مما صنعت ايديهم ما بيسهروش الليالي ولا حاجه

اااااه يا بلد

صبرني يارب يقول...

che

وانت طيب وبخير

الى بيعمل كده هانعلقه من رجليه على حبل الغسيل

ايه مش خفاش ؟؟

كملها خفافيش للاخر بقى

هع

تعرف حد خفاش ؟؟ لو تعرف شاورلي عليه عشان احطه فى دماغي لما امسك الحكم
هههههههههههههه

أبو العريف يقول...

مش عارف ليه محسساني

ان مصر كلها عواطليه

( وش بيستهبل )

م الفاضي ينام براحته

واللي عنده شغل يقوم م النجمه

بس بيني وبينك

النظام حلو قوي

والمحلات هنا بتقفل الساعه حداشر

من اصغر محل لأتخن موووول

الازهرى يقول...

والله كنت باتكلم انا وواحد من زمايلى فى الموضوع ده من ساعتين تقريبا
يعنى المفروض انه داخل اختبار كاراتيه بعد اسبوعين ومش مستعد واتفق معايا ادربه كل يوم الساعه عشره الصبح وطبعا رحت انا وادربت مع نفسى امبارح والنهارده وجالى صلينا المغرب مع بعض وباسأله خير ؟
قال كنت نايم
طيب وصحيت امتى ؟
قال الساعه تلاته لما والدى دخل يزعق لى

تخيلى اعمل فيه ايه ؟
يعنى مصلحته وهو محتاج ده حقيقي فى امور معينه فى حياته ومع ذلك لا يبذل اى مجهود للنجاح
وعلى فكره هو نايم بدرى بس بيحب ينام 12 ساعه على الاقل وكمان رياضى محترف
بذمتك اعمل فى لاشكال دى ايييه ؟
وبعدها اتكلمى عنن الناس العاديين
ملح الارض زى ما بيقولوا
الموضوع مش بقرار رسمى
عندنا فى قريتنا كل المحلات بتقفل بعد صلاة العشاء بوقت قصير
بس المشكله ان القهاوى بتفضل فاتحه للفجر ومش بس كده دخلت القنوات الفضائيه وبقى اللى مش موجود على القهوه موجود برضه وصاحى للفجر قدامها
الحل اننا نعلمهم من تانى يعنى ايه البركه فى البكور
وان الصحيان بدرى له فوايده وحكمته

تحياتى دوما

طهر فؤادك يقول...

السلام عليكم ورحمة الله وبركاتة
جزاكم الله خيرا على مشاركتى فى حملة (مدونتك هتنقذ طفلك)وان شاء هنبدأ من غدا 29 / 9 / 2009 النشر الجماعى .. لموضوع الحملة الموجود
بمدونتى عن طريق كوبى وبست (نقل ) للموضوع بأكملة بمدونتك الجميلة مع اى تعديل تجدوة مناسب مع الاحتفاظ بصلب موضوع الحملة المتمثل فى الاسم و طرق
التبرع الجديدة حتى يتسنى لنا مشاركة عدد اكبر فى الحملة . .
وربنا يكرمك يارب على التعاون ويجعلة ان شاء الله فى ميزان حسناتكم والمسلمين اللهم امين .
ملحوظة :- النشر مستمر ان شاء الله بس البداية من غدا ومن دواعى سرورنا ان تشتركوا من غدا (ساعدونا ليعم الخير بأذن الله )1

صبرني يارب يقول...

ابو العريف

اه عواطليه والله وهى دي الحقيقه

والى فاضي يقعد فاضي ليه ؟؟
ما يشتغل ؟؟

هو انتوا شايفين يعنى احنا نانقصين فقر

ما الى ما بيشتغلوش دول كلهم وما بينتجوش
(مش قصدي الشغل كموظفين ومكاتب ولا حتى صنايعيه)
لان الست تقدر تبقى منتجه مثلا وهو جوه بيتها

ويقدر اي واحد بيشتغل موظف ولا اي شغلانه تانيه بكسله واهماله برضه يبقى مش منتج

كل الى مش منتجين دول يمثلوا عبء بشكل مباشر او غير مباشر على المجتمع كله وخصوصا الجزء العامل المنتج من المجتمع

بمعنى اخر الاشخاص القله المنتجين فى المجتمع ده يعولوا الكسالى المانتخين دول

النظام طبعا حلوووووو

انت عايش فين عشان اجي عيش هناك

صبرني يارب يقول...

الازهري

لا لا الحل اننا نديهم علقه محترمه كلهم فى التمام

طيب تقول ايه بقى في واحد جاي يقول لجوزي انا عندي ابنك عايزه يشتغل انشاله من غير فلوس بس يخرج من البيت ويتعلم اي حاجه

قاله ماشي ابعتهولي بكره الساعه 12 الظهر ومافيش حاجه اسمها من غير فلوس هايشتغل وياخد مرتب عادي زيه زي غيره

قاله الساعه 12 لا مش هاينفع اصله بيبقى لسه نايم

(وش بيشد فى شعره وهاتنقط)

قولي اعمل ايه انا فى ابوووووووه الى مش عايز يقلقه ويصحيه ده ؟؟؟

شعب عايز يتربى فعلا

صبرني يارب يقول...

نور الدين

شكرا على الدعوه

صبرني يارب يقول...

طهر فؤادك

تمام يا فندم ان شاء الله

فى ميزان حسناتك ان شاء الله

Zianour يقول...

هههههه

كل سنة وانتي طيبة

على فكرة انا من مشجعي النوم للضهر وفتح المخل للصبح رغم انني نهارية تماما ولا اسهر الا مضطرة وامرض واكتئب لو سهرت كام يوم كده ورا بعض

بس اصلك لو هنا بقة وكله بيقفل 5 وايام الانفراج 9 بالكتير اكيد هتحسي بالخنقة من النظام ومن سنينه

تحيا الانتخة المصروصينية ويحيا الكسل

سيبك يا شيخة ابو النكد وسنينه...

صباحك ياسمين

MeGltNa يقول...

البنت دى بتقووووووووووووول كلام زى الفل

و اللهي اسلوبك ف الكلام حلو اوى و فية روح حلوة و بجد كلامك عجبني بس نعمل اية الحر بقى هههههههههه

صبرني يارب يقول...

زيا نور

شوفي انا معاكي لما كنت بره كنت ساعات باتخنق من النظام

لكن عرفت قيمته لما شوفت قمة الهرجله الى فى الدنيا

صدقينى الواحد بيوصل لكل حاجه بشق الانفس والله حاجه بقت تخنق

وهاجيبلك المنبه الصعيدى عشان ما تناميش للظهر ابداااااااا

صبرني يارب يقول...

عمر وائل

ايه ده قعدت ادور على بنات يا اخويا فى الكلام ما لقيتش هنا بنت خالص

اوعدك انت بالذات هاجبيلك 3 منبهات صعيدى احدهم مسلح بكلاشنكوف
هههههههههه