الأربعاء، 18 نوفمبر، 2009

الاسره الحاكمه ؟؟!!


الاسره الحاكمه


فاكرين الاسره الحاكمه

ايوه بتاعة زمان والبشوات الشريرين الى كانوا واكلين عرق الفلاحين

والى علموا على ظهور الشعب بالكرابيك

فاكرينهم ؟؟؟؟؟؟؟؟؟؟؟؟؟؟؟؟؟؟

انا بقى مش فاكراهم


هاحكيلكم على حاجه فرستنى اوي يا جماعه

من فتره كده البنك الى بنتعامل معاه بعتلنا تعالوا عايزينكم لاستكمال بيانات

وروحتلهم انا ورضا

لقيناهم بيدولنا استمارات كده وبيقولوا املوها

بصيت فيها وقلت للموظفه ايه ده كله عشان ايه

اسأله كتيره بقى


قالتلى ده بيانات مطلوبه لمكتب مكافحة غسيل الاموال وتمويل الارهاب (مكتب ا و حاجه زي كده مش فاكره والله )

قلتلها اوك

وقعدت اجاوب على اسأله تفرس الحقيقه لواحده زيي اصلا الحساب بتاعها يكاد يكون فاضي

حتى ايام ما كان فيه مبلغ ما فيش أي عبيط فى الدنيا يقول انه له علاقه بغسيل الاموال وهذا البتنجان

المهم قعدت اجاوب

خد عندك بقى السؤال الى جابنى لمس اكتاف

السؤال بيقول

هل لك صلة قرابه او أي صله بالاسره الحاكمه ؟؟؟

( الاسره الحاكمه العائله الحاكمه والله ما انا فاكره النص بس يعنى هى كانت كده )


حد يقولي ده ايييييييييييييييييييييه

اسره حاكمه ؟؟؟

بصيت للموظفه وقلتلها اسرة حاااااااااكمه ليه احنا فين

فين الديموكراتيه يا طنط

بصتلي بوش مش فاهم حاجه وقالتلي احنا ما لناش دعوه الورق ده جاي لنا من البنك المركزي

الحقيقه فاتت عليا اخد صوره من الاستمارات دي اوريهالكم بس لو روحت البنك هاسألهم عليها بجد


كلوا بقى فى نفسكم قولوا توريث ما توريثاااااااااش قولوا الى انتم عايزينه

باختصار هووووووووووواااااااا براحتكم

بابا ساعات يدينى الجرنال ويقولي اقرى كده النعي ده

طبعا فى الغالب بيكون النعي ده من الى بياخد صفحه كامله ده وحركات

النعي ده بقى تلاقيه لحد من البهوات ( اوعى تقول بشوات عيب مش اقطاعيين هما )

المهم

تلاقي بقى عم كل من واخو كل من وابو كل من ونسيب كل من

اقرا الاسامي يا معلم تلاقي الشله الحاكمه كلها موجوده واكتشفت من خلال الموضوع ده بجد صلات قرابه كتييييييير بين مسؤلين هذا البلد

وفجأه تلاقي نفسك عارف ليه الاخ ده مبلط فى الوزاره بقاله سبعة الاف سنه على التوالي

وتلاقي نفسك كمان فجأه وسط النعي اسامي بتاعة ناس بتقول ونسبنا الحكوووووووومه وبقينا قرايب

وتعرف برضه ساعتها نجمهم فى السما لييييييييه

كنت دايما اقراها واقول لبابا بتريقه الاسره الحاكمه

لحد ما قالوها هما وجابوا من الاخر وريحوا نفسهم

طيب مش كانوا يقولوا من الصبح بدل تعب القلب ؟؟؟؟؟؟

حد يرد علينا يا جماعه

حد يقولنا البنك المركزي ده بتاع بلد تانيه عندهم اسره حاكمه

حد يقولنا لااااااا مش بلد تانيه وانتم هنا عندكم اسره حاكمه وما تتعبوش نفسكم وتفكروا احنا مخلصين العمليه

حد يقولنا احنا مين وفين وليه وعايزين ايه وهانعمل ايه وهاتعملوا فينا ايه ؟؟؟؟؟؟؟؟؟؟؟؟؟؟؟؟

على فكره انا واخده علاج بينيم ومهيسة
حد يجهزلي شهاده بكده يا جدعان جايز احتاجها هناك


وطبعا مش محتاجين اقولكم من الصوره الى فووووووق دي انا باتكلم عن الاسره الحاكمه مييييييين
ايوووووووه برافوا عليكم
فى احد بلاد الاكواويين دول
كفايه كده بقى بلاش رغي على فكره




هناك 42 تعليقًا:

مصري جدا يقول...

ل سنة وانتي طيبة

بمناسبة ذي الحجة

والسنة الجاية تكوني في الحج

وانا طبعا

في شرم الشيخ

اقرب اصلها

اية يا صاصا

مفروسة لية بس

هفهمك

احنا يا صاصا محتلين

من غير جيوش

لان من يحكمون

وبضمير مرتاح

أنطاع

هتقولي محتلين من مين

هقولك

كل مصلحة حكومية في مصر مش البنوك بس

تلاقي على لسان الموظفين كلمة واحدة

الامريكان بيقولوا نعمل كذا

هتقولي يعني امريكا محتلانا
هقول لك بضمير مرتاح

النبي تتلهي

امريكا نفسها محتلة يا صاصا

ايوة

من الصهاينة

ألف مبروك

للاسرة الحاكمة

نار جهنم

وذنب تمانين مليون

الا بالمناسبة

حلوة اوي الكزرولات اللي لابسينها في الصورة لايقة عليهم موت

حنعيش يعنى حنعيش يقول...

الاسرة الحاكمة يعنى بابا وجيمى وربنا يطول فى عمر الجميع ومن بعدهم محمد جيمى ويوسف محمد جيمى وتامر يوسف محمد جيمى
المهم الورقة دى مابتجيش عير للستات على اساس انهم ليهم فى الغسيل والشطف وكدة ...اما العلاقة بالاسرة الحاكمة بتبقى علاقة خدامتك آمنة .والحمد لله على كل شىء
وطويل العمر يطول عمرة وينصرة على مين يعادية قادر ياكريم وصدقينى اللى يقول يارب عمرة ما ينضام

blackshwak يقول...

لذيذ البوست ده
وأول مره بجد أعرف
إن الواحد بيطلبوا منه حاجه زي دي لما يقدم أوراق رسميه
ما يمكن ياستي عندنا أسره حاكمه وإحنا مش واخدين بالنا
ما هو في حاجات كتيير في البلد مش واخدين بالنا منها
إشمعنا دي اللي مزعلاكي أوي
فوووتي
متشغليش بالك
ضايعين ضايعين

بالتوفيق دائما

تقبلي مروري

حنين القلب يقول...

يا نهار حقد
ايه يا ستى الحقد ده على الاسرة الحاكمه وكل اللى يقربوا ليها
وبعدين كنت جاوبتى فى الاستمارة
ايووووووووووة ليه صله بالاسرة الحاكمه وكنتى شوفتى هيحصل ايه يمكن كانوا زودوا رصيدك مليون ولا اتنين
هههههههههههههههههههههههههه

سيبك انتى
كل سنه وانتى طيبه بمناسبه اول ذى الحجة

صبرني يارب يقول...

مصري جدا

وانت طيب وبخير يارب

وياااااارب جماعه فى الحج

شرم الشيخ ايه يا راجل طب اسأل د اسلام كده الى تحتيك ده يا حبة عينى جراله ايه هناك
ههههههههههههههههههههههه


انا عارفه اننا محتلين من غير جيوش

لا ده احنا حتى عقولنا نفسها بقت محتله
وبطواعيه مننا

بس برضه يرضيك صبرني يجيلها استماره رسميه مكتوب فيها الاسره الحاكمه وتعدي كده وتقول وايه يعنى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ايه رايك فى الكزرولات والنبى ؟؟
مش كده لايقه مووووووت

تحب اوصيلك على واحده على مقاسك ؟

نورت يا متر

صبرني يارب يقول...

حنعيش يعنى حنعيش

والله يا باشا بنقول يارب هو احنا لينا غيره ؟

بس يعنى السؤال هى البجاحه وصلت للدرجه دي ؟؟؟؟؟؟؟؟؟؟؟

وبعدين خلي بالك من نفسك بقى وبطل تغيب على التدوين وعلى البلوج كده

بعدين نعمل مظاهره ونقول انك انت السبب

نورت يا فندم

صبرني يارب يقول...

حنين القلب

وانتى طيبه وبخير يا جميل وحشاااااااني موت

تفتكري كانوا هياعملوا كده

ولو يا اختي مش عايزه يبقالي صله ولا عايزه حاجه من خلقتهم الله الغني يا اختي


نورتي يا جميل

صبرني يارب يقول...

بلاكشواك

لا باذن الله مش ضايعيين

لكن افوووووووووت ايه ولا ايه

طيب يقولوا يعترفوا رسميا واحنا نرتااااااح

التمثليات تعبتنا وتوهتنا اكتر ما احنا


مش بافوت انا

شكرا ونورت

Cute Kitty **sookra يقول...

المهم طلعتى فى النهايه قريبه العيله الحاكمه ولا لا؟
هههههههه
بس اسمعى لو انتى منهم ابقى كدا موش اخاف لانى عارفه ان ورايا دهر بقى وافترى براحتى
هههههههههههه

حلم بيعافر يقول...

ههههههههههههه
والنبى تشوفيلى واسطة تغلنى طالما انت واصلة كده وبتملى الاستمارات دى
بصى
فيه فى بلدنا حاجات وقوانين كده وكده
اى كلام يعنى
موضوعة كده بس عشان تبقى اسمها موجودة
يعنى الحكايات اللى بتتكلمى عنها دى معمولة لكبار المستثمرين والعالم اللى هما اللهم اكفينا شرهم دول
بس انتوا بقى اللى رصيدكم شبه فاضى اللى بتمضوا عليها هههههههههههههه
يعنى ماهو احنا بلد واحد واخوات ف الاخر
وبعدين انلا اول مرة جيت المدونة دى كنت اديتك كده شوية حقد طبقى فشكلك دللوقتى بتردى ده ع البشوات
ايوه بشوات واقطاعيين
حد له شوق ف حاجة؟

Wanda يقول...

يا خسارة راحت الاغنية نرجعلها تانى

بصراحة انا فاكرة انى مليت الاستمارة ديه مرتين قبل كده لفيزا كارت و لا تجديد بيانات مش فاكرة بالظبط، حاجة كده 8 صفحات و تفاصيل كثيرة بس البند ده فهمته كده بالانجليزى : هل ليا علاقة مباشرة بالحكومة يعنى الوزراء و الرياسة ، بصراحة انا فهمتها كده Goverment طبعا لانى من عامة الشعب :-) قولت لا و كبرت
بس بصحيح انت ماليتيها بالعربى و الانجليزى جايز فى الترجمة اتقلبت لاسرة حاكمة :-) مالحكومة كلها عيلة واحدة
و بعدين بره مصر بصراحة البند ده معداش عليا خالص و لا كمية الاسئلة الى ملهاش لزمة
و بعدين مش موضوع مين اين لك هذا بطله علشان كده الحرمية بقوا بيفتخروا بثرواتهم و لا لسه فيه ليه ذيول؟؟
المهم الاستمارة ده الحكومة بتاخذ عليها 35 جنية خبط لازق منغير مناسبة :-)

اسيبكوم و ارجع للاغنية ، صحيح مين بيغنيها؟؟

صبرني يارب يقول...

حلم بيعافر

مش فاكره حكاية الحقد دي تصور

بس لعلمك بقى انا جدودي كان عمد يعنى انا من الاقطاعيين برضه والاسره الحاكمه
هههههههههههههههههههه

مش العمد تبع الحكومه برضه

صبرني يارب يقول...

سكره

اقولك على حاجه افتري برااااااااااحتك


وانا بقى

ولااعرفك
هههههههههههههههه

صبرني يارب يقول...

اه يا واندا

ايه رايك فى الاغنيه اكتشفتها من كام يوم كده اصل انا مش متابعه الاخبار الفنيه اوي

والمغنيه اسمها جنات

اي خدمه افتكري الجمايل

صبرني يارب يقول...

واندا

طب يعنى ان كانت بالانجلش حكومه ليه اترجمت عندنا الاسره الحاكمه حضرتك ؟؟

ايه بقى

وحكاية ال 35 جنيه دي مش عارفه والله ما راجعتش كشوف الحساب يمكن خصموها من حسابي

او يمكن رضا دفعها اصل انا مش بادفع حاجه انا
نيهاهاهاها

نورتي يا جميل

صبرني يارب يقول...

واندا

انا روحت ازورك فى مدونتك ما عرفتش اعلق عندك مش عارفه ليه

البلوج هنا ساعات بيعمل كده فى بعض المدونات
ما بحبش انا الحركه دي ما باحبش حد يحط ايده على بؤي الصراحه
هههههههههههههه

Wanda يقول...

جنات جميل
ماشى يافندم تعرفى انا رجعت اسمعها تانى
و الله حتة ال35 جنية ده لو كان الورق لكارت فيزا و كده كده حيخصموها :-) حتروحى منهم فين مش حيتعبوا اكمنهم حيبعتوا شيخ الحارة يسال عن شجرة العيلة :-))))))))))

المهم حتة التعليقات و الله فتحتها
و انا مابكتمش حد بس اكمنى لسه جديدة فى الكار ياختى معلش

بس اقولك ايه برااحة عليا النهاردة
النفسية مش تمام ، و قولت اعليها بالاغنية بتاعتك

فتاه من الصعيد يقول...

ايووووووون

بقيت رسمي فهمي نظمي .... وحسني لو تحبي :))

تحياتي

Ahmed يقول...

كل سنه وانتي طيبه
الاستفزاز وصل لغاية الاسئله الروتينيه انها تكون غبيه وغير مفهومه ويمكن جارحه كمان في احيان كتيره

صبرني يارب يقول...

واندا

برضه التعليقات مش شغاله

انى خايفه ليه يا امي ده انا كنت هاناقشك فى موضوع الامراض النفسيه المنتشره بره وكده

دونت وري اطلاقا

اول زياره مافيش عض
ههههههههههههه

مالها نفسيتك يا بطه قولي بس من قبل ما نتوكس وهى وحشه

امال بعد الوكسه البنى اخبارها ايه

صبرني يارب يقول...

احمد ابو العلا

زي ما تقول ما عادناش نفرق معاهم

نوووووورت

صبرني يارب يقول...

فتاه من الصعيد

طيب ما يقلوهاش كده فى وشنا يا اختي خبط لزق عيب عيب عيب

ستيته حسب الله الحمش يقول...

لااااااا مش بلد تانيه وانتم هنا عندكم اسره حاكمه وما تتعبوش نفسكم وتفكروا احنا مخلصين العمليه
ارتاحتي؟
قال يعني هي مش عارفة
وبكرة ان شاء الله تلاقيها رسمي ع الورق
جمهورية مصر الملكية
ومهيسة ليه وواخدة بلابيع ليه سلامتك؟

شاب فقرى يقول...

اول حاجة

ربنا يصبرنا عالاسرة الحاكمة والشلة الحلوة والعالم بنت التيت

:)

مفيش حاجة تانى تتقال

مش عايز أرغى عشان هبقى رخم اوى

شاب فقرى

شوكولاتة يقول...

إزيك ياصبصب ياعسل ؟؟
بصي أنا شايفة إنك تقومي تنامي علشان ماتروحيش في شربة مية اتكلي على الله يابنتي وروحي استغفري ربنا إنتي غلطتي غلطة كبيرة قوي احتمال تبقى غلطة عمرك
طبعا لو سألوكي عن شوكولاتة اعملي روحك نايمة ماشي أنا لسه بدري عليا
هههههههههههههههههههههههههههه

بس والنعمة عثل عثل

صبرني يارب يقول...

ستيييييييييته

انتى فين يا جميل كده انا هاعترض واشجب واندد

وهاجي اتخانق مع البت مانوسه واخوها واقولهم سبوهالنا شويه يا جماعه مش كدددددددددددده

وحشتينى خالص

عارفه وعامله نفسي مش عارفه ونفسي اعرف
ههههههههههههههه

طب يا خالتي يقولوها صريحه بقى ويريحونا

صبرني يارب يقول...

شيكولاته

لعلمك انا خدت الحبايه تانيه وقربت اهيس اهو

وهاتشتغل معايا دلوقتي
هههههههههههههههههههههههه

وهاقول بقى على كل حاجه هناك
فحاولي تحفظينى اغنية الشيكولاته سااااااااحت

صبرني يارب يقول...

شاب فقري

فعلا فعلا بنت التيييييت


وبعدين ايه مش عايزه ارغي دي

ده انت فى موطن الرغي الاصلي يا ابنى

بعد كده ارغي يا عم الامور براحتك خااااااالص

Anonymous يقول...

سبب بلاء الشعب المصري هي الاسرة الحاكمة
ولكن الشعب المصري استمرأالعبودية تصوري لو ان المائة الف الذين خرجوا لتشجيع المنتخب لو انهم خرجو من اجل حريتهم لاسقطوا الاسرة الحاكمةمن زمان ولك يبدو اننا نايمين في العسل

عبد الجليل

صبرني يارب يقول...

استاذ عبد الجليل

خرجوا فين خرجوا من اجل حريتهم فين

اوباااااااا

ماليش دعوه يا جماعه هو الى بيقول

انا باتكلم على الصيييييين

انت ما شوفتش الصوره ولا ايه
ههههههههههههه

نورت يا فندم

قلم رصاص يقول...


فعلا والله صبرني يارب

هههههههههههههههههه

امال لو ليكي 200 ولا 300 مليون لحلوح كانوا عملوا معاكي ايه بس

كانوا ودوكي النيابة وهما يحققوا معاكم
هههههههههههههههه

احنا اكتر ناس في العالم مطلوب منهم يملوا بيانات .. بتاااااااااعة ايه .. معرفش !

بلد ورق بصحيح هههههههههههه

ربنا يصبرنا بقى

دمتي في امان الله

الشعب لابد له من حكومه تشكمه يقول...

من هو رئيس مصر القادم؟؟؟؟؟؟؟

تباه العيله المالكه ولا لا؟؟؟؟؟
اعترضى باه,لا اعترضى..

انتو افراد الشعب كده.عندكو حقد دفين..

فاكره مسلسل الوسيه؟؟؟؟؟؟؟
مش عارفه ليه جيه فى بالى دلوقتى ههههههههههه.

صبرني يارب يقول...

شيماء

الله يخرب عقلك

بجد بجد وانا باكتب البوست وباتكلم عن البشوات المفتريين وكده

افتكرت مسلسل الوسيه ده مش عارفه ليه

ايه ده انتى ماشيه معايا على الخط ولا ايه وسعي يا بت بلاش زحمه
ههههههههههههههههههه

صبرني يارب يقول...

قلم رصاص

لو كان عندي 200 او 300 مليون الحقيقه ما كانش زماني عبرتكم

هههههههههههههه

لا يعنى اقصد ما كنتش ابقى فاضيالكم بقى
ههههههههههههههههههه

نورت

Me7'o يقول...

مش ملاحظة حاجة فى الصورة اللى إنتى لزقاها دى

راجل ومراته
ووراهم اتنين رجالة كل واحد ومراته
وجنبهم أحفادهم

بس ليه كل أحفادهم بنات

بصى من الآخر كده

ربنا لا تجلعنا من المغضوب عليهم ولا الحاكمييييييييييييييين

آآآآآآآآآآآمين

صبرني يارب يقول...

ميخو

لا يا سيدى انت مش واخد بالك
هما الولاد بيربوا شعرهم هناك برضه

هو فى تقريبا 3 احفاد

منهم بنت واحده وولدين
الى لابسين زعابيط دول ولاد صدق صدق

بس برضه مش كل الحكام من المغضوب عليهم

ربنا يكرمنا كده بحد من الى ربنا راضي عليهم
قول اااااااااااامين

rony يقول...

كل ده عملوه فيكى وانتى مش عندك رصيد
طيب لو كان معاكى كانوا عملوا ايه؟؟
المره اللى جايه زودى رصيدك شويه
شوفى هيطلعولك بايه المره دى
ربنا يزودلك رصيدك ويزودلنا كلنا قادر يا كريم
زى ما هى حصالات البلد كده مليانه دايما
تحياتى

mahasen saber يقول...

صبرنى بتغسل اموال هههههههههه يعنى خرجتى من نطاق غسيل الاطباق والهدوم للاموال انا بقول عليكى من يومك رأسماليه متسلطه ههههههههههههه بس يغفرلك غسيل اموال الدنيا يا صبصب واجيبلك مسحوق وملطف كمان فوقهم
موضوع الاسره المالكه ده
بجد شئ يدعو للازبهلال با ولااد الحلال


سيبك بئا الاهم انك وحشششششششششششششششششششششششششششانى جدا

والتانى انك تعبانه من ايه ودوا ايه الف مليون لا بأس عليكى
ممعيش تليفونك بس هاخده من دودو واكلمك

ربنا يعافيكى يا حبيبتى

صبرني يارب يقول...

روني

لا بلاش فضايح بقى معايا

بس حاجه ما تستهلش الغسيل والمكوى يعنى
ههههههههههههههههه


نورتي

صبرني يارب يقول...

محاسن يا حياتي

طبعا خديه يا جميل

ورقمك مش معايا برضه

وانا كويسه الحمد لله بس واخده برد تقريبا فى كتفي واجعني شويه

تسلمى يا جميل وما اتحرمش منك ابدا

تامر علي يقول...

الاسرة الحاكمة ؟

طيب

خليها حاكمة :)....

مايحكمش :)

صبرني يارب يقول...

تامر علي

طب اهو حكم

وهايحكم كمان هو وعياله

ورونى هاتعملوا ايه