السبت، 12 ديسمبر، 2009

مش عايزة وجع قلب


مش عايزه وجع قلب

السلام عليكم

ازيكم يا اصدقائي الاعزاء

الحقيقه شايله فى قلبي كلمتين واجعينى من كام يوم قلت أجي اقولهم جايز ارتاح نفسيا

عايزه اعرف يا جماعه احنا ليه بنستخف ببعض ؟

ما بنقدرش ولا بنهتم ببعض بشكل محترم ليه ؟

من غير ما أرغي كتير وأصدعكم

ليه مثلا الاقي واحد او واحده من أصدقائي يكلمني ويحكيلي مشكله مثلا وأنا كشخصيه هبله (او ده ما اكتشفته )

اقعد مثلا قيمة ساعة اتكلم معاه فى مشكلته وابات الليل أفكرله وجايز يصعب عليا ويقطع فى قلبي .

وبعدين ممكن جدا بكل بساطه يختفي بعدها مثلا اسبوع وانا انشغل بجد (مش قلتلكم هبله ؟) وبعدين بكل بساطه
يجى يقولك اه لا ما المشكله خلصت خلاص

أو بشكل اسخف واسخف يقولي الله ؟ انتي صدقتي ؟ ده انا كنت باهزر ؟؟!!!!

بتهزر ؟؟؟؟

الله ؟؟!!! طب والهبله الى انت صدعت دماغها دي مافيش أي مرعاه لوقتها ودماغها الى مش ناقصك اصلا ؟؟

تخيلوا لما واحد صفيق يخوت دماغي بحواديت طويله عريضه وبعدين بعد ما يخلص الكلام اقلبها فى دماغي

الاقيه بيعملنى كبري يوصله به رساله لشخص اخر ؟؟؟

ودي ابسط الامور

والى يغيظ اكتر واكتر ان ما حدش فيهم عيل ولا حد فيهم ولا عنده تخلف عقلي ولا بله منغولي


ليه كده ؟؟ ليييييييييييييه كده يا بشر ؟؟



لي انا باحترم مشاكل الناس واوجاعهم واسمعهم بكل اهتمام وهما ما بيهتموش يبصوا وراهم بعد ما يصدعوني ؟؟
عشان انا هبله ؟؟
لا ده مش هبل والله ده فى رأي هو الصح والاخلاق الى ما تخلناش ابدا نستخف باوجاع الناس


أنا غلطانه انى بانفعل بمشاكل الناس وأشيل همهم ؟؟

أنا غلطانه لما اعتقد ان اكتر الناس محتاجين حد يسمعهم وقلت اسمعهم ماشي وليا فيهم ثواب بالتفريج عن مؤمن وكمان بالنصيحه الخالصه لوجه الله تعالى ؟؟

أنا غلطانه انى باصدق الناس ؟؟؟

لا انا مش باصدقهم كده اوانطه

لكن مش باكذبهم ما اقدرش

الرسول عليه الصلاة والسلام قال : لا تصدق كاذبا ولا تكذب صادقا

وما دام انا ما عنديش حاجه اثبت بها الصدق والكذب باقف فى النص كده واقول ان صدق فقد نصحته وان كذب فأنا خدت ثوابي
وده الحقيقه كان مبدأي وما كنتش باشغل بالي كتير اوي بتحليل كلام الناس

ولما باحس ان حد كذاب باقنع نفسي انه مش مهم سيبك منه واعمل نفسي مصدقاه واخد على اد عقله لكن بابقى مخنوقه منه طبعا .

لكن برضه مش باكذبه ما اقدرش افرضوا طلع صادق

لكن الحقيقة المبدأ ده برضه رغم انه صح انما سببلي انا وجع علم فيا .

تخيلوا لما تحس انك استغليت من واحد مجنون واهدرت وقت ومشاعر ودموع راحوا كده فى الهوا

تخيلوا احساس انك كنت اشتغاله حلوه ومسليه على الاخر

وتخيلوا لو هو اشتغل حد بسببك كمان تحس بالذنب اد ايه حتى لو كنت حذرتهم انك ما تضمنوش

طبعا اسفه لهم كلهم لو كنت السبب فى اذى نفسي لهم
وسامحوني يا اصدقائي

نفسي اعرف لييييييييييييييييييييييييييييه

ليه ممكن حد ياذي الناس كده

عموما كل من ليا حق عنده واستهان بوقتي ومشاعري وتفكيرى انا مش هاسيب

حقي وهاخده منه هناك فى دار الحق بيد الحق يوم الحق


طبعا كل الى ما يعرفش التفاصيل بيقول صبرني اخده قلم جامد معلم فيها

اه بس ما خدتوش مره واحده لا خدته على مراحل

عشان اتخنق اكتر

دلوقتي ميت حاجه بتلف فى دماغي

ابطل اكلم أي حد على النت ؟

ولا اكلم الى اعرفهم معرفه شخصيه بس ؟

ولا اطلب من كل اصدقائي على النت سي فى وصورة البطاقه ؟
اه اشمعن انا

انا معروفه لكل الناس معرفه تامه

بدأت اندم على كده بس انا ما باعرفش اعمل كده

ما اعرفش استخبى وما اعرفش ابقى ليا اكتر من وجه واكتر من حياه


ميت حاجه بتيجى في بالي لدرجة انى فكرت اقفل حتى المدونات واختفي ولو حبيت اكتب تاني اكتب فى مكان تاني باسم تاني وما اعرفش حد تاني

مش عايزه بجد وجع قلب
تعبت

انا فيا الى مكفينى

اينعم انا ساعدت ناس كتير وافدت ناس كتير وناس كتير اوي باحبهم فعلا زي اخواتي واكتر والله من معارفي على النت
اينعم انا عارفه ومتاكده انى خدت ثواب كبير وكتير فى ناس كتير الحمد لله تعالى
بس برضه مش قادره اتقبل الفكره دي
فكرة وجود ناس بتستخف بمشاعري ووقتي والمي ودمااااااااغي الى بتنشغل معاهم

عموما ومؤقتا
ممنوع منعا باتا أي حد بعد كده يحكيلى أي وجع قلب

مش عاااااااااااااايزه وجع قلب

والناس الى على الاميل انا واخده اجازه من الاميل كام يوم على ما ارتب افكاري

وطبعا صدعتكم بس عادي مافيش جديد

هناك 66 تعليقًا:

فاتيما يقول...

انا راجعة خلصانة من البؤجة أصلاً
و قعدت أكتب ف البوست لما روحى طلعت
و أجيب ف اللينكات
القصد من دا كله عاوزة أقولك إيه؟؟
انى دلوقتى بشتكيلك من الدنيا
(وش مطلع لسانه) و حاجة تانية كمان
كان نفسى قوى تيجى
و حاجة تالتة ماعاش و لا كان اللى يزعلك إنتى اللى بتاخدى الزعل على أعصابك و قلبك و دى خصلة و مينفعش تتغير و بكرة تقولى فاتيما قالت
و بحبك قوى و رووووقى يا ست الستات كلهم

Somaya Kamal El Din يقول...

امممممممممممم

مش كل الناس كده
اكيد فى ناس كتيييييير وقفتى جنبهم
وساعدتيهم وعمرهم ما هينسوكى ولا هينسوا وقفتك معاهم

ليه تمشى خليكى اكيد فى حد محتاجك فى حد محتاج حد يساعده حد يطلعه فى مشكلة مش عارفة يطلع منها وكل شوية بينزل لتحت

ابعدى فترة ورتبى افكارك وسيبى المدونة شوية بس ارجعىىىىىىىىىىىى
متغيبيش خليكى

وسامحى الكل وانسى

يمكن معرفكيش معرفة شخصية بس حسيت انك قررريبة اوى منى

طمنيى دايما عليكى
فى امان الله
السلام عليكم

صبرني يارب يقول...

فاتيما يا حبيبتى سلامتك الف سلامه

انا كمان كنت عندك قريت البوست

والمشكله الكبيره انى مش عارفه اغيرها بجد وده خانقنى من نفسي

ميرسي يا جميله وانا كمان باحبك اوي فعلا

صبرني يارب يقول...

سميه

حبيبتى ربنا يكرمك متشكره ليكى

ايوه ماشي انا هابعد وارتب افكاري بس مش هارجع زي الاول

اه انا ساعدت ناس كتير

بس ليه الناس تاذينى كده

ليه ؟

حد يرد على سؤالي لو كان له اجابه


نورتي يا جميله

الشعب لابد له من حكومه تشكمه يقول...

اممممممممم :(
صفيق؟؟؟ كوبرى؟؟؟

امممممممممممم روستوخ روستوخ يازكى ياروستوخ...
براااااااحه على اعصابك..
بس انتى بتتعاملى بشخصيتك ومش مطلوب منك انك تغيريها...لو اللى ادامك مفهمهاش مش ذمبك انتى:(

تعرفى اليوم اللى كلمتك فيه قبل صلاة الفجر والله والله اليوم كله كنت متفائله وبضحك من قلبى لاننا ضحكنا جامد اوىووكمان قولتيلى ان ليا اخت ولو احتجت اى حاجه هى موجوده(وانتى عارفه ان مليش اخوات بنات ودا مأثر فى نفسويتى)

دلوقتى اعمل ايه باه؟ خلاص اختى راحت منى وقالتلى مش هتتكلم تانى على الميل:(( ومش هتثق فى حد خلاص:((

عاوزه اسمع اللى اتفقنا عليه ممكن اكلمك على الموبايل وتسمعيهالى:)
احم احم احنا اتفقنا وانتتى قولتى اسمعها فى اى وقت:)
اضحك ياجميل انتى والله شخصيه تحفه.. ومش محتاجه انى اتكلم..

ستيته حسب الله الحمش يقول...

كام سؤال دايرين في نفوخي

لو حد ادعى على نفسه نكد او مشكلة
سواء من باب الهزار او من باب اتقاء الحسد او من باب انه مريض نفسي ومحترف ينكد على خلق الله

الا يعلم هذا الشخص ان الله قادر ان يبتليه بما افترضه على نفسه


لو حد عاوز يعملك كوبري ويوصل بروح امه لمزة
طب هو ضمن النفس الجاي؟
ما يمكن ربنا ياخده اخد عزيز مقتدر وهو يظن بنفسه انه المكر كله ويمكرون ويمكر الله والله خير الماكرين

اللي عاوز ينكد على الناس منه لله
واللي عاوز يكيد للناس منه لله
واللي بيخوف الناس ويقلل أمانهم في الدنيا وهم مش ناقصين اصلا واللي فيهم مكفيهم منه لله

ومش ها اقول لك غير اللي تعرفيه ادخلي معاه في الغريق
واللي متعرفهوش خليكي معاه ع الشط
سلامات طيبون وكلمة طيبة وقول معروف ودمتم

ربنا يسترنا فوق الأرض وتحت الأرض ويوم العرض عليه ويقينا المكر السيء وأهله

وربنا يفرجها عليكي واضحكي كده وخليكي أمورة
التكشيرة مش لايقة عليكي

سلمها لله واعمل الطيب

سلاموز يا موز
سلامانجا يا منجا

الشجرة الأم يقول...

الله يعينك على وجع القلب ده .. بس ما تخافيش مش كل الكباري زي بعضيها.

ahmed3ezzo يقول...

يا ستي انتي ايه اللي مزعلك انك حد يكدب عليكي
ده انا بفرح جدا لما بلاقي حد بيعمل فيا فصل غير متوقع
ساعتها بقيمه وبستريح اني عرفته
لسه مثلا قريب لقيت واحد كدب عليا في حاجه رحت مدلته وقتي
مع انها حاجه مافيهاش اييييييي ضرر ليا
بس مبدأ الكدب بيتعبني اوي
وبعدين يا ستي انتي احسن من سيدنا يوسف
لما جاله الاتنين اللي قصو عليه الرؤيا؟
قال للتاني ايه (اما الأخر فتأكل الطير من رأسه قضي الأمر اللذي فيه تستفتيان)
بالرغم من انه كان بيكدب ومخترع رؤيا من دماغه لكن تأويل سيدنا يوسف وقع خلاص
يعني اللي عايزاقوله
انك زي ماقلتي هتثابي ان شاء الله على نصيحتك
وكل واحد كدب على نفسه
أو اختلق على نفسه أكاذيب
ربنا بيبتليه بنفس الللي بيقوله
بديليل تاني لا تمارضو فتمرضو فتموتو هو تخريجه منكر الحديث .. في الضعيف للألباني
لكنه يؤخذ بيه كحكمة تعضد الأيه او كشرح
واستشهادا بمعناه مع الأيه
وذلك من وخامة الكذب
وبعدين يا صبرني فيه حاجه
انا قابلت ناس كده ع النت مش انتي لوحدك
واللي ماكانش يعجبني كنت بعلم عليه
والشخصيه المحترمه بتتعرف والنص نص بتتعرف
يمكن الهام من عند الله
في نفس الوقت مش معنى ان كل الل اكلمهم ع النت حبايبي موز يعني
بس بالرغم من طول الفتره اللي كلمت فيها ناس ع النت ما اتعلقتش غير بشخصين تلاته بالكتير
اقصى مايكون خمسه
بس كل الناس معارف عارضه
ويسرى عليهم حق الزماله برضه مش معنى كده انهم مالهمش حرمه طبعا
لأه حرمتهم زي أي حد اعرفه شخصيا
لكن الفرق بس في قوة العلاقة مش اكتر
لأن ربنا قال (وجعلناكم شعوبا وقبائل لتعارفوا)
مش علشان اقابل واحد يعمل فيا موقف ارمي حكم اني ما اكلمش اي حد
بصرف النظر عن واحد يكلم واحده ولا العكس ,حرام ولا حلال .. مش بتكلم من النقطه دي
بتكلم عن المبدأ كمبدأ عام
وعلى رأي واحده جارتي ربنا يخبزلك العيش يا صبرني:D:D
وأسف ع الإطالة لكنها كانت من رأيي ضرورية
على فكره بقالي حوالي تلات ساعات مش عارف افتكر الباس وورد بتاعتي
منه الله اللي كان السبب

قلم رصاص يقول...


السلام عليكم ورحمة الله وبركاته

انا فعلا زعلت جدا والله من البوست ده
معقوله فيه ناس كده ؟
انا معاكي انه النت حياه افتراضية كامله بكل ماتحمل الكلمة من معانِ . لكن مهما كان فهو في الاول والاخر مجرد وسيلة للتوصيل والتواصل بين أشخاص طبيعيين واحياء يرزقون .. بيحسوا وبتحسوا..!

هنا بقى نرجع للمصداقية والموثوقية .. مبقولش كل اللي نتكلم معاه على النت نطلب منه صورة البطاقة لكن على الاقل فيه مساحه بيكون فيها الاحساس بالصدق موجود فيها وبقوة ..

انا بأيد كلام الدكتورة ستيته جدا

وعاوز أشد علي ايدك واقولك :

ولايهمك .. خليكي بشخصيتك الحقيقية ولا تعبري أي حاجة .. طالما حضرتك ماشيه صح وتعملي كل الصح وبما يرضي الله ورسوله .. يبقى توكلي على الله .. واعتبري الموقف اللي حصل ده حصل لك في الحقيقة بعيدا عن النت .. طب ماهو كان مثلا ممكن يحصل في التليفون هل العيب هنا في التليفون بقى ..معتقدش .. اللي احسن انه اقرب للصحة ان ده مجرد موقف وممكن يحصل لأي حد فينا ومش هو القاعدة ..

روقي وادخلي على الحياه بقلب جامد زي ماحنا متعودين من حضرتك على جنبات وطرقات ونواصي المدونة .. وربنا يكرمك يارب

وخدي الحتة دي :

لاتدع الصدر الضيق يهدم ميايبنيه العقل الواسع

هههههههههههههههههه
ربنا هيفرجها من عنده علىالجميع

في امان الله

الطائر الحزين يقول...

فيه ناس عندها فن الشكوى
وفيه ناس مش بتعرف تشكى حتى لنفسها

فكل واحد واستعدادة

انا أظن ان حضرتك بتستمتعى بسماع الشكوى ومحاولة ايجاد لها حل وتخفيف ألم من يشكو والانشغال له وهذه سعة صدر تحدسى عليها هذه الايام

لكن لابد أن تتأكدى ان هناك عيب ايضا فيك حتى لا تتعبى أكثر وان هناك خطأ ما ولو بسيط فى تقدير الامور فعلى قد استطاعتك حاولىتقدرى الامر صح ومن وجهة نظرك أنت وعلى اساسة تقررى جدية الموضوعات المعروضة عليك وبعدها تأخذى قرارك واكيد هذا القرار سيريحك حتى لو كان تقديرك فى الأخر خطأ لكن نيتك الصادقة فى المساعدة تشفع لك هذا التقدير الخطأ

كثير بنكون فى شخصك الذى تحدثتى عنه وانصحك ونفسى فى التوسط

عاشقة القمر يقول...

بصي مش تنظريمن احد حاجه عملي لي ربنا فقط
بابا معلمني لو احد غلط فيكم مش تبقوازي ابقوا احسن منهم
تركي اي شب لله عملي لل

blackshwak يقول...

السلام عليكم

أول تعليق ليا علي ما أعتقد ؟

مش فاكر إذا كنت جيت علقت هنا قبل كده ولا لأ ..، بس متابع من زمان

لو ده أول تعليق .. شكله كده جاء في وقت غير مناسب

عموما يشرفني معرفة مدون من المدونين
زي حضرتك
ويشرفني أن تزوري مدونتي

بالتوفيق دائما

تقبلي مروري

ঔღঔ نـــوارة ঔღঔ يقول...

ناس فاضية ياختي

بس غريبة انه في ناس بالشكل دا ربنا يهدي

متحرقيش دمك ياقلبي شكلك مضايقة قووي

ربنا يسامحهم لكن متقدريش تقسي قلبك مهما عملوا فيكي لانك طيوووبة اوووي

ماتيجي ارغي معك عن مشاعيري هههههههههه

ربنا يريح بالك ويخفف عنك

وحشاني اموووووووووووواه

احاسيس آيوشه يقول...

اقولك حاجة انتى مش هتقدرى تتغيرى لكن من الواضح انك انسانة بتحب تساعد غيرها بجد علشان كده من الصعب فى يوم وليلة تتغيرى وصدقينى الشخص اللى عمل موقف زى ده لو وقع فى ضيقة تانى هتسعديه
انتى بتعملى ده لوجه الله يبقى سيبها على ربنا وهو اللى يجازى كل انسان على اد نيته

صبرني يارب يقول...

شيما

طب قوليلى انتى اعمل ايه يا شيما والله انا تعبت بجد

انا اصلي عديت كتير للناس ما علينا يسويها خير

وبعدين يا بت هو احنا بينا اميل بس

وبالنسبه للضحكه الى انتى عايزه تسمعيها لا ما ينفعش دي عايزه روقان وبعدين قلتلك انا باضحكها امته وفري انتى الظروف بقى

ميرسي يا شيما

صبرني يارب يقول...

ستيته

والله ما انا عارفه ازاي بيعملوا كده

انا يا ستيته وربنا العالم ما بادخلش فى الغميق اصلا مع حد

لكن اعمل ايه وانا قاعده لا بيا ولا عليا والاقي كل واحد جاي يقولي مصيبه شكل

ومش عارفه يا خالتي انا شكلي يدي على نكد ولا ايه

وعلى فكره ده مش على النت بس ده عموما الاقي واحده بتتصل عليا وانا صلتي بها تعتبر سطحيه يعنى

وتقولي اصل وقعت فى مشكله وحبيت افضفض ومش عارفه ليه انتى جيتى فى بالي
يادي الوكسه هو انا شكلي مشاكل يا ولاد

وعموما ربنا يسترها فعلا علينا

ومتشكره يا جميل وبكره اضحك ما تقلقيش

بس ما اعتقدش هارجع تاني زي ما كنت مع الناس

اصل انا قلبي اسود:)

صبرني يارب يقول...

الشجره الام
شكرا ليكى لا فى كباري تحرق الدم

صبرني يارب يقول...

قلم رصاص

والله انا صدري واسع وتقريبا هى دي المشكله

وعلى فكره انا كمان مش شايفه ان النت حياه افتراضيه لاننا زي ما انت قلت ناس حقيقين فعلا

وهانتحاسب على كل حاجه بنعملها على النت الكذب كذب والصدق صدق والخيانه خيانه والصفاقه صفاقه

كله هانتحاسب عليه تبقى مش حياه افتراضيه ابدا

انا طول عمري مكبره دماغي اوي فى الموضوع ده وباقول الى يكذب يتفلق بس عارف لما تقف كده فجأه وتقول خلاص

نوت انى مور

اهو انا عامله كده دلوقتي خلاص جبت اخري مع الناس

متشكره اوي بجد ربنا يكرمك

صبرني يارب يقول...

عزو

الى واخد عقلك يا سيدى

يا عزو بصرف النظر عن البؤ الى رميته بتاع راجل وست

باقي الكلام الى انت قولته انا معاك فيه لكن المشكله معايا ما كانتش عابره

وطبيعى انت لو استريحت لشخص واعتبرته صديقك وهو اعتبرك كذلك هاتعرف عنه كل حاجه لو الامور طبيعيه

لكن ان واحد يتعمد انه يخدعك رغم انك وقفت معاه بجد وعشت مشكلته بجد مقرفه اوي يا عزو مقرفه بجد


انا مش زعلانه ان حد بيكذب عليا

انا زعلانه عشان الناس بتستهين بمشاعري ووقتي ودماغي الى بتشتغل على الهوا

انت طول براحتك يا باشا

ونورت

صبرني يارب يقول...

الطائر الحزين

طب انا عايزه ذمتك فى حد بيستمتع بسماع الشكوى

انا ممكن اكون باحب فعلا احل مشكلة حد باحس بسعاده انى اقدر اساعد حد فعلا

انما استمتع بشكاوى الاخرين

اطلاقا

لانى انا بجد باحمل همهم وافكر فيهم وازعل عشانهم والواحد مش ناااااااااقص والله ما ناقصه كفايه عليا الى عندي

بس تقول ايه ناس مش بترحم نفسها

شكرا لك يا طائر وفينك من زمان

صبرني يارب يقول...

عاشقة القمر

ربنا عالم انا مش بانتظر من اي حد اي حاجه والله ولا حتى كلمة

انما ما يبقاش فى النهايه جزائي انى صدقتهم وانشغلت بيهم انهم يخدعوني ويلعبوا بيا كده

متشكره ليكى

صبرني يارب يقول...

بلاك شواك

ايوه افتكر انت جيت هنا قبل كده يا فندم

وانا كمان زورت مدونتك قبل كده وزورتها دلوقتي كمان

متشكره لك ونورت

يــوم جــديد يقول...

صبصوبتي الحلوة
لسه كنت بسأل نفسي نفس السؤال امبارح
وطول الليل صدعت من كتر التفكير
قلت لنفسي في الآخر ما توجعيش قلبك اللي يحكي لك على حاجة ماتشغليش نفسك بيها زي ما بتعملي
كل ما تيجي على دماغك قولي أعوذ بالله من الشيطان الرجيم انصرفي يا مشكلة انصرفي وماتخلنيش أفكر فيكي
دا أنا بفكر في المشكلة أكتر من صاحبها
حاجة وجع قلب فعلا
إلا قولي لي هو انتي على طول قافلة موبايلك ولا الشبكة عندك مش حلوة
أصلي اتصلت بيكي كتير أوي في العيد وقبله وبعده كنت عايزة أقولك كل سنة وانتي طيبة ومكنش عندي كمبيوتر

صبرني يارب يقول...

نواره

يا حياتي انتى تيجى تقولي كل الى انتى عايزاه

بس لما الاجازه تخلص

ميرسي يا جميل على ذوقك ونورتي

صبرني يارب يقول...

احاسيس ايوشه

ونعم بالله

تعرفي انك قلتي كلمه خطيره

ان لو حد من دول وقع فى مشكله تاني هساعده

فكرت فيها تخيلى لقيت انه بصحيح ده ممكن يحصل

يادي النيله طب اعمل ايه نفسي ده انا ا بقى عايزه الضرب بجد

زهقت من نفسي بجد

ما علينا
نورتي يا حبيبتى ربنا يكرمك

صبرني يارب يقول...

يوم جديد

يا حبيتى انتى تلاقي معاكي تليفون اللقاء

مش تليفونى الشخصي

وطبعا تليفون التجمع ده انا قافلاه ده كان عاملي هسهس يوم التجمع

لو عايزه تليفونى خديه من اي حد من البنات شيما ايمان سول اي حد


وبعدين احنا هانفضل هبل كده لحد امته يخربيت الهبل يا شيخه زهقت انا والله

ميرسي على اتصالك يا قمر كانه وصل بالظبط

طهر فؤادك يقول...

السلام عليكم ورحمة الله وبركاتةة

اولا بارك الله فيكى .. ومتزعليش ياستى وحسابك مش فى الدنيا ان شاء الله ربنا يجزيكى خير على كل الى بتعملية علشان قلبك ابيض وبتحبى تساعدى الناس ودى مش هبل او عبط لا بالعكس دة حسابة كبير عند ربنا بالخير والحسنات طبعا ...
قال رسول الله صلى الله عليه وسلم : من ستر أخاه المسلم في الدنيا ستره الله في الدنيا والآخرة ، ومن نفس عن أخيه كربة من كرب الدنيا نفس الله عنه كربة من كرب يوم القيامة ، والله في عون العبد ما كان العبد في عون أخيه .

- عاوزة جمال اكتر من كدة حسابك عند ربنا ياحجة صبرنى فمتزعليش خالص الى عند ربنا عمرة مايضيععععععععععع .

صبرني يارب يقول...

والله يا زقازيقى انا بافكر كده

والحديث الى انت قولته ده نصب عينى دايما

ربنا العالم ان كل الى باعمله لوجه الله تعالى وانت عارفنى من زمان

لكن مقابلة الناس دي بتحبطتني وبتضايقنى

ونعم بالله تعالى طبعا وعارفه انه مش بيروح بس الخداع مؤلم

شكرا لك يا زقازيقى ومنورني على طول يارب

blackshwak يقول...

السلام عليكم

نورتي المدونه حضرتك وآسف إن في كود بيمنع النسخ
بس و الله أنا وضعت الكود ومش عارف هو فين عشان أمسحه
بس هدور عليه النهارده لحد ما أجيبه
عشان اللي عاوز ياخد صور يبقي براحته

المطرب هو : ( علاء عبد الخالق ) أكيد حضرتك تعرفيه

وده لينك مباشر لعرض الفيديو

مـن هـنـا

أو ممكن صوت بس

من هنا

يارب تكوني حضرتك من المتابعين دائما

تحياتي

KHALED يقول...

إنتى صح و هما إللى غلط ...
كل المطلوب منك إنك تعيدى التفكير فى إختيارك للناس ...

reem يقول...

لما صبرنى تتخنق وتبطل تحل مشاكل الناس

وتقفل ايميلها يبئا مين اللى هايعمل كدا ؟

والجمايل بتاعتك علينا ومسقعتك وغريبتك وسلطاتك وبابا غنوجك مين يعلمها لنا

ياتوتة دى ناس مريضة ادعى لهم بالشفا

انا عارفه انه صعب تتعاملى من قلبك وتلاقي استخفاف

بس ازعلى من اللى يهمك من اللى تعرفيه اوى هو دا اللى يستاهل الزعل منه
غير كدا بئا مش يستاهل انك حتى تفكر والله

انتى الصح ودا لوحده كفيل انك مش تفكرى في قفل مدونة ولا ايميل

ولا تغيري اسلوبك هو بس زى ما ستوتة قالت اللى تعرفيه اوى هو اللى تدخلى معاه في الغريق

مش تزعل نفسك ياقمر احنا مش لينا غيرك

الطائر الحزين يقول...

ايوة فيه حد بيستمتع بسماع الشكوى والتخفيف عن الناس مش مجرد السماع

صبرني يارب يقول...

محمد الجريدى

الله يكرمك انت نورتنا

الصور الحقيقه ما حاولتش اخدهم قلت هماهنا اهو ابقى اجي اتفرج عليهم وامشي
ههههههههههه

والاغنيه ميرسي اوي انك اهتميت

وطبعا عارفه علاء عبد الخالق اصل انا قديمه موت يا ابنى

متشكره اوي لك
ونورت

صبرني يارب يقول...

خالد

معيار الاختيار عندي الاوحد انه يكون حد محترم او على الاقل محترم معايا لانى ما اقدرش اعرف هو بقيته ايه طبعا

وما عنديش معايير تانيه تنفع احطها عشان اي حاجه تانيه مش هاقدر اتاكد منها ببساطه

شكرا ونورت

صبرني يارب يقول...

ريم

لا يا جميل ما تقلقيش الجمايل بتاعتك انتى ماشيه زي ما هى ده انا هاجيلك اديكى كورس عملي فى البيت ولا يهمك

وانا اصلا يا ريم وانتى عارفاني مش باتعمق ولا باتنيل مع اي حد

لكن مواقف مش بتديكى فرصه تفكري

يلا الحمد لله

نورتي يا جميل

صبرني يارب يقول...

الطائر الحزين

ماشي التخفيف عن الناس

لكن انا فى ناس بيكون عندها حاجه زي فضول كده يحبوا يسمعوا قصص عن الناس ومشاكلهم

دول موضوع تاني

غاويين لوك لوك لوك وبس


تحياتي لك ونورت

Wanda يقول...

عندى اجابة ممكن ؟؟؟

بصى هو تقريبا شوشو متغاظ منك
قاعدة تعملى خير و تساعدىالناس و مش مرياحها
يبقى يعمل هو شغله الازلى الى ربنا ممهلة ليوم القيامة ازى :-؟؟؟؟
بعتلك حد صغير من طرفه
تزعلى ماشى ده حقك
بس بعدين تنبسطى انك حليتى فى المتحان الى عديتى بيه صح (و تغشيشة كد عن جنب الحل هو انك تفضلى على الخير ، مش بيقولوا المؤمن دائما مصاب تفتكرى متصاب من مين من شوشو طبعا)
روق يا جميل
خذيلك اجازة شهر عسل بحاله :-)) عارفة حبايبك حيقطعونى :-))))
بس ترجعى و ترجعى بشوية وصفات كمان و تجليات دينية كده
ايه المطبخ موحشكيش تعملى لجوزك حبيبك و ولادك نور عنيكى حاجة حلوة او طبخة معتبرة
ياله بقى مستنية وصفاتك ، اصلى نفسى اكل حاجة مختلفة بقى :-))))))

Cute Kitty **sookra يقول...

صبرنى يارب
الجميله الحلوه اللسان وحلوه الاكل كمان
الناس دى ماتستحقش انك تزعلى عشانها
معاك حق انهم بيوجعوا قلبك
بس معلش انتى ادها وقدود
مساكى شيكولاته
انا متاكده انك برده هتسمع لوجع قلب اللى يطلب مساعدتك ودمتى سالمه

أحمد شريف يقول...

كل له ما له وعليه ما عليه

يعني سأقول باختصار هكذا حال الدنيا لا نعمم ولا نخص في أمور هلامية مثل تلك

فكون هناك شخص سلك سلوط مرضي مثل هذا فهو لا يجعلنا نعمم السلوك ، هكذا أرى

على كل حال بالتوفيق لك وتعلمي من المواقف

اقصوصه يقول...

انا اعتقد

مش كل الناس تستاهل نفس المعامله

احنا نعامل الناس بما يستحقون

اكيد لو اكترثنا للجميع بنتعب

وفي ناس بطبعها ما تكترث لانفسها

فكيف احنا بنكترث لها؟

Anonymous يقول...

السلام عليكم
يعني يا استاذة صبرني يا رب انتي بتحلي مشاكل يعني طيب كويس
انتي زعلانة اوي ليه كده عادي يعني
ربنا يكرمك كده ويبقئ ليكي بريد قراء علشان لما يكون لي مشكلة تحليها لي

انتي جاية تعتزلي الوقتي


تامر

مسدس صغير يقول...

اصبرى وليكى الجنة
بس يا خوفى يا بدران لأكون أنا واحد منهم؟
ههههههههه
ربنا يسعدك دنيا واخره والمسامح كريم

Anonymous يقول...

وبعدين حد بياخد رأيك في حاجة انتي مش ملزمة
انو يكون الموضوع صح ولا غلط
ولا انو يقتنع بكلامك ولا لأ
ولا انو يطبق كلامك ولا لأ
وبعدين فيه حد قالك علي حاجة علشان يوصل لحد تاني
كويس اوي الحد الأولاني دا شخص تحفة اوي يعني ما كان راح للحد التاني علطول ليه لف اللفة دي يعني
بردوا هو ليه جالك انتي ايه
transet
طب بدل ما عمل مرحلتين كانت تبقئ مرحلة واحدة وخلاص


تامر

MaNoO يقول...

والله كانت حصلت فترة وعن نفسى اقولك على اللح اللىل قيته مناسب اننا نتعامل صح مع بعض يعنى انتى متجيش على نفسك اولا وتقعدى تسمعى زى الهبلة سوورى يعنى لا ازم تحسسى الناس انك ممكن تضايقى وتزهقى زى اى بشر لان النوع اللى بيسمع الناس بتفتكره جبل ممكن يتحمل اى حاجة
وحاجة كمان نبطل نركز تركيز كامل مع بعض يعنى حد قال مشكلة انتى فكرى فيها فى وقتها اوك ماهوا برده عادى ممكن متقدريش تحليها لان انتى بشر بلاش ترهقى نفسك ولا تتعبى نفسك عشان متوصليش للمرحلة دى
روقى روقى محدش واخد منها حاجة فكى كدا والله الدنيا احلى من شوية مواقف كدا يعكروها

صبرني يارب يقول...

واندا

ما تقلقيش بس شويه بالي يروق وهارجع اطبخ تاني فى المدونه

بس انا باحب المطبخ ما اعرفش اشتغل بمزاج وانا مودي وحش كده

لعلمك تفسيرك منطقي

بس برضه مش متاكده انى ممكن ارجع زي الاول تاني

صبرني يارب يقول...

سكره

اهو انتى قولتي تقريبا نفس فكرة ايوشه

والى خلتنى بجد افكر واقول اه تصوروا انا ممكن اعمل كده

عايزه اخد نفسي قلمين انا كده

نورتي يا جميل وميرسي على ذوقك وكلامك الحلو

صبرني يارب يقول...

احمد الشريف

ده اصلا مبدأي عامة

مش باعمم ومش باخد الناس بذنب واحد

لكن كل الحكايه انى باتسائل ليه

ليه بعملوا معايا كده

وكمان تعبت ماهو كل واحد له طاقه برضه

نورت يا فندم

صبرني يارب يقول...

اقصوصه

تصوري اه

تصوري فى ناس انا باحس انى مهتمه اكتر منهم

بس ساعات ارجع ده لانهم مش فاهمين خطورة الموقف مثلا

هو عامة انا شايفه انى قلبي عاملي مشاكل وبافكر استبدله من سوق المستعمل

صبرني يارب يقول...

تامر

ايوه هاعتزل قبل ما تحصلني انت كمان
هههههههههه

بالنسبه لموضوع الترانزيت

لا عقله قضاه على كده ومااحترمش ذكائي

اهو ناس عجيبه وخلاص

صبرني يارب يقول...

مسدس صغير

هههههههههههههههههه
لا انت لا

انت هانروج نجيبك من بيتكم عادي

صبرني يارب يقول...

مانو

اهو انت قلت نقطتين مهمين اوي

ان الواحد يحسس الى قدامه انه ممكن يزهق

اهو انا تقريبا فى النقطه دي عندي مشكله
ساعات باحس انى ذوق بزياده
ودي تقريبا حاجه ما تنفعش مع الناس

بس برضه ما اعرفش اعمل العكس

وبالنسبه لانى ما اتاثرش برضه على راي ستيته نعمل ايه فى قلب النسوان بقى

مجرد حلم صغنتوت يقول...

وايه يزعلك بس
لما الناس بتبان على حقيقتها بنحس بقيمتنا احنا اوي.. بنحس اد ايه احنا حاجة كويسة ويمكن حاجة نادرة.. نفتخر بنفسنا شوية ومش بعيد نتغر في نفسنا... ايه المشكلة يعني ندلع نفسنا شوية :D
متزعليش نفسك بس والله اللي كده بقوا كتير اوي مش بس على النت مع الناس اللي مش تعرفيهم لكن حتى مع الناس اللي تعرفيهم من سنين
بتقبلها واقول سنة الحياة.. زي اي حاجة مش عاجباني في الحياة

خواطر شابة يقول...

عزيزتي لست مخطئة وليس انت من يجب أن يتغير أنت الصح
الحياة ومحيطنا فيه الصالح والطالح فان أوقعنا حظنا مرة في الطلح هذا لايعني ان نكفر بالجميع فانه لاتزر وازرة وزر أخرى
ايضا الشيطان لايمكن ان يدعك مستمرة في عمل الخير فهو له جنوده على الارض اللي يخلوك تحلفي انكمتعمليش خير تاني وبكده يكون حقق هدفه وسد قدامك بوابة كان خير وأجر كثير بيجيلك منها
تحياتي لك

صبرني يارب يقول...

خواطر شابه

انتى عندك حق وده كان دايما رايي

بس مش عارفه هاقدر استمر ولا لا ماهو برضه كل انسان له قوة احتمال

صبرني يارب يقول...

مجرد حلم

هحاول اتقبلهم حاضر هابلعهم ووراهم شويه مايه

هههههههههههه

ماشي كلامك هاتغر فى نفسيه شويه

نورتي يا جميل

بسنت صلاح الدين يقول...

حبيبتى معلش متزعليش انتى قلبك كبير و روحك طيبه ، و متخليش الناس المستهتره تبعدك عن اصدقائك و الناس اللى بيعزوكى بجد و محتاجين لكلامك و نصايحك ، انتى بتعملى خير و بتقفى جمب الناس و ان شاء الله ربنا يجازيكى خير ، مش عارفه ليه الناس بقت معلش يعنى فى الكلمه بارده و مفيش احساس ولا زوق و لامراعاه لمشاعر حد ، سيبك منهم و كملى فى طريقك و رتبى حياتك براحتك بس متغيبيش علينا يا قمر المدونات

أحمد عاطف يقول...

اقولك ببساطة

لان في كتير بيعتبروا ان دا عالم افتراضي مش عالم حقيقي

وحتى من نعرفهم من خلاله مجرد اشخاص افتراضيين

ودا لاننا معندناش وعي اننا بنتعامل مع بشر

لا احنا متخيلين اننا بنتعامل مع اجهزة كمبيوتر

وفاكرين ان الاجهزة هي اللي بتتحاور معانا

لكن انتي حساسة اكتر يا صبرني

ربنا يعينك

قلـــ "بــلال" ــب فارس يقول...

ده كله كلام وتقولى مش عايزة اصدع راسكوا طيب لو هتصدعى هتعملى ايه
...........
فى الحقيقة المشكلة دى بتحصل معى بس على مااظن كدة ان المشكلة دى ببتكون كتر وفاء اليك لاصدقائك

طهر فؤادك يقول...

السلام عليكم ورحمة الله وبركااااتة

صبرنى اذيك

فية حملة جديدة ابقى بصى عليها الله يكرمك وكل من يحب طبعاااا الدعوة مفتوحة ان شاء الله فياريت تشاركينا فيها وكل من يحب ... وجزاكم الله خيرا والمسلمين وثبتكم الله

صبرني يارب يقول...

بسنت صلاح

متشكره اوي يا جميل ولا مش هاسيب المدونات طبعا ما اقدرش

نورتي يا جميل

صبرني يارب يقول...

احمد عاطف

اهو انا مش باحب فعلا الكلمه دي واعتبار الاشخاص الى على النت ورق مش بنى ادمين بصحيح

باكره التصور ده وباعتبر فعلا تخلف

شكرا لك يا احمد ونورت

صبرني يارب يقول...

طهر فؤادك

ماشي عنيه حاضر

انت ايه حكايتك واخد توكيل الحملات فى البلوج ولا ايه
هههههههههه

نورت يا زقازيقى وشكرا لك

صبرني يارب يقول...

قلب فارس

ايه ياعم هاجيبلكم بنادول مش تزعلوا

وماشي بحاول اتعالج من زياده الوفا

نورت يا فندم

rashida يقول...

مساءالخير .. دي زيارتي الاولى
أولا اختيار بشرى كصوت لصفحتك اختيار رائع
بخصوص البوست .. الغلطة غلطتك .. سوء تقدير منك
كل ما عليكي هو أنك تكوني بخيلة شوية انسانيا
حاولي..

د. إيمان مكاوي.. أم البنين يقول...

عام هجري سعيد عليكم وعلى الأمة الإسلامية جميعها
عام يحدوه أمل جديد
ونسال الله عز وجل أن يكون عام نصرة للإسلام
تحياتي

moory-mero يقول...

السلام عليكم و رحمة الله و بركاته
حاسة نفسي اقولك حاجات كتير عشان حاسة بيكي والله
بس هقولك كله عند ربنا
والمظلوم حقه موش بيروح وانتي والله العظيم كسبانه وكتير اوي
موش يجرى حاجه لما تاخدي ضريبة مكسب ثوابك عند ربنا
قلق وحرقة اعصاب شويه
ما كلنا بيتحرق دمنا في مواقف مختلفه ما بالك انتي في الصح والحق وثواب ربنا ليكي :)

روقي يا قمر بقى وربنا يبعد عنك الوحثين يارب
قولي يارب :)

في رعاية الله