الخميس، 3 ديسمبر، 2009

لا لتبادل الادوار ... كل واحد يخليه مكانه


السلام عليكم

ازيكم يا حلوين بقالي كتير ما رغيتش وواحشني الرغي موت موت


اه الاول احب انقلكم خبر مهم هو ان ريم صاحبة مدونة رسائل بلا بريد عزلت من مدونتها القديمه وهى الان فى مقرها الجديد الى هو ده


رســـــــــــــــــــــــــــــــــائـــــــل بلا بريـــــــــــــــــــــــد


مبروك يا ريم العتبه الجديده يا اختي يارب خير عليكى ان شاء الله


يلا بقى هيا بنا نرغي

موضوع مهم النهارده عايزين نتكلم فيه

وايه الجديد ما انا كل مواضيعى مهمة يا ناس

المهم خطر على بالي سؤالين فى اطار الصراع الابدى بين الازواج و حتى الرجل والمرأه عموما

صراع الحقوق

اه كل واحد بيحاول ياخد حقه لا حتى ده بيحاول يجور على حق التاني بصرف النظر عن كونه واخد حقه ولا لا

ليه مش عارفه

طيب الطرف الى بيجور على حق التاني ده وياخد اكتر من حقه تفتكروا بيبقى سعيد ؟؟

يعنى الراجل الى بيلغي شخصية مراتة مثلا ويلغي رايها ويخليها كما يحلم اغلب الرجال طوع ايده وتحت امره


تفتكروا هو بيبقى كده سعيد ؟؟

والست الى بتعمل كده مع جوزها برضه
بتبقى سعيده بحياتها ؟؟

بتهيئلي لا طبعا

بلاش ده

تبادل الادوار

بمعنى ان الست تشتغل وتصرف على البيت اكتر يمكن من الراجل وتقضي مشاوير البيت وتشيل اثقال وتربي العيال لواحدها وتسوق وتودي دروس ومدارس ونوادي وتعمل هى كل حاجه فى الدنيا
تفتكروا هو هايبقى سعيد ؟؟؟

والراجل الي برضه ممكن يتحمل اعباء البيت وياخد هو باله من الولاد ويربيهم لواحده ويكون دور الام مهمش لا سبب كان حتى لو كان شغلها
تفتكروا هى كده هاتبقى سعيده ؟؟؟


بتهيئلي لا بررررررضه

طب ايه ؟؟

وليييييييه ؟؟

ليه مش كل واحد يعيش دوره وكل واحد ياخد حقه ونعيش كلنا مبسوطين

صدقيني لو شلتي كل حاجه لوحدك مش هايبقى مبسوط
مش هايلاقيكي معاه
مش هايحس بيكى
وهاتبعدي عنه ويبعد عنك اكتر

هايلومك انتى على البعد ده ويقول انشغلتي عني
ما تريحهوش اوي الراحه احيانا بتكون متعبه


يا عزيز الرجل


صدقني انت كمان والله ما لمصلحتك ابدا انها تشيل عنك كل حاجه وتتحول انت للمول مادي فقط فى البيت

الى انت فى بداية حياتك سعيد له ورتبتله وهو انك تريح دماغك من العيال ومسؤليتهم


هاتصحى فى يوم تلاقيها لها دنيتها والبيت كله قائم عليها وانت البنك بس

وفى حالة برضه انك تلغي شخصية مراتك وفكرها وتبقى انت الواد الفظيع الى ما جبتوش ولاده وراااااااجل جامد موووووت



هاتلاقي نفسك يوما ما مشارك حياتك مع واحده ما لهاش دماغ اصلا جثه يعنى


فى كلا الحالتين


هاتلاقي نفسك اربعينى وحيد ومش هاتكون سعيد ابدا ابدا

يا ستات
خلي دورك دايما انك تكوني اولااااااا ست وبعدين زوجه وام

خلي دورك دايما انك تكون راجل(بكل المعنى الراقي للكلمه دي ) وبعدين ابقى اعمل فيها عم المهم زي ما انت عايز

يا ستى خليكى انثى زي ما انتى مش لازم تبقى دايما عشر رجاله فى بعض

خليكى كده لما يكون جوزك مش موجود انما طول ما المحروس حسه فى الدنيا خليكى ست زي ما انتى

الرجل دايما يحب يحس انه راجل وان مراته محتجاله

حتى لو كان الاحتياج ده افتحلي برطمان الصلصه يا ابو محمد اصل جامد على ايدي

او افتحلي الكانز يا تامر اصل ضفري يتكسر

حسب الظروف بقى

( دلعنى يا معلم عاااااااااادي
)

وانت وحياة ابوك بلاش الاستهبال وتعمل فيها فالح بس وتقولها ما تكلميش ابن خالتك الى كان عايز يخطبك

وبعدين تسيبها تتبهدل يمينا ويسارا فى الدنيا

من فضلكم كل واحد يقف مكانه


كل واحد يادي دوره


كل واحد ييسب التاني يعيش دوره ويقف مكانه

حقي وحقك والحق حبيب الله

خليكى انثى زي ما انتى


خليك رااااااااااجل


حافظوا على المساحه الى بينكم من الخصوصيه واحترام الاخر وفكره وعقله وشخصيته وماله

صدقوووووووووني انا الحق حبيب الله

بس خلاص.




هناك 51 تعليقًا:

همس الاحباب يقول...

كل سنة وانتى طيبة
وعيد سعيد عليكى
تسلم الايادى يا ام مريم
لا فض فوك
تحياتى

ستيته حسب الله الحمش يقول...

استني على ما مودي يبقى فله وارجع اناقش معاكي الكلام ده
انا متفقة معاك
اه
بس مختلفة برضه
عادي

وخليكوا فاكرين الجملة الخالدة بتاعة فيلم النوم في العسل

احنا بينا ايه غير الإيحيتيراااااااااام :)

أم مالك يقول...

الحبيبة صبرنى
جاية اسلم عليكى واقولك
كل سنة وانتى طيبة
معلش متاخرة ولم يؤخرها غير الظروف
ربنا يبارك لك فى زوجك واولادك
تحياتى

reem يقول...

ياتوتة مغرقانى بجمايلك والله

غريبة ومسقعة وكمان دلوقتى المدونة الجديدة

ربنا يخليكى ياقمر ومش يحرمنى ابدا من ذوقك

البوست بئا حلو اوى كل واحد فعلا لازم يحافظ على دوره ولو ان في ناس بترتاح في تبادل الادوار

بس فعلا الشئ الطبيعى واللى ربنا خلقنا عليه هو الصح في الاخر

عجبتنى اوى حكاية الصلصة وابو محمد والكانز وتامر

ههههههههههههههههههههه

عسوله يا صبرنى والله

Wanda يقول...

خير الموضيع الرومانسية قلبت تربوية ليه بس
:-)
صعب انى اعلق هنا ، لانى مجربتش بصراحة
بس برضة اعلق و ماله يعنى حغلب فلسفة :-))

انا اتعلمت فى حياتى انى لو عايزة ابويا او اخويا يعملولى حاجة اديها دلع و دحلبه و ال لا لا لا بتتقلب ماشى بابتسامة (فى المواضيع الى مش خطيرة يعنى) بس لعلمك الاثنين دول علمونى ابقى 5 رجلة (كفاية 5 عشرة كثير :-)) اول ما اخرج من البيت و ده على راى اصحابى جايبنى وراء :-))))

تعرفى والدتى انا فى مرة من غيظيى من حركات ابويا قولتلها زى المفعوصة بتاعت فيلم الحفيد (حسين ايه الى مصبرك على الست ده بقى مطلقها و تريحنا :-) بس بالعكس يعنى نظام انت مستحملة ليه ، سكتة ليه ؟ حاجات بالشكل ده :-)) بهدى النفوس
كبستنى كبسة حلوة قوى : عادى الرجلة كلهم عيال و لازم تكبرى دماغك و انا بستحمل لانى بحبه :-) عادى

واحدة مفروسة يقول...

هههههههههه
موضوع رائع يا اوختشي
حجيب المحروس جوزي يقراه
بس لو اطلقت بعد اكده هههههههههههه احجزيلي عندك غرفة بمنافعها
يا حبيبة قلبي فيه رجالة متدلعة من مهمهاتها اصلا
و لما بيتجوز بيبقى مستنى نفس الدلع و اكتر من مراته
و بعد كده بيبقى حق مكتسب
الست بقا عيانة...مالوش دعوة
طلعان عينها فى شغل البيت
و انا مالى ما هو بيتها برضه
كده يعنى
اما است اللى بتبقى معتمده على نفسها قبل الجواز و تيجي تحب تستعبط بعد الجواز
و تقوله معرفشي
فيه رجالة بتاكل من الكلام ده و تعمل و تساعد الست
و فيه رجالة تقول..الله اومال كنتى بتعملى الحاجات ديه ازاي قبل الجواز؟؟

بصي يا ستى انا من رأي المفروس دائما
ان العلاقة لازمن ولابد تقوم على الصداقة
الصداقة يا حبيبتى
و بعدين الحب
و العشرة حتزود الصداقة بينهم
لأن الحب بعد الجواز مش بينط من الشباك
لأ بيتغسل مع المواعين اللى فى المطبخ و الغسيل اللى فى الغسالة اللى مش بيخلص
و البوتاجاز اللى على طول متولع علشان الطبخ
اللى بيفضل الصداقة المتبادلة و الاحترام المتبادل
و ساعتها حتلاقى ان الست ست و الراجل راجل
لأنها عاوزة تعجبه بأنوثتها..و هو يجذبها برجولته
فاهماني يا فارساني ولا اكتبلك بوست تاني
ياخراااااااااابي فارساني كده على طول

قلم رصاص يقول...


السلام عليكم

انا قايلك كل سنة وانتي طيبة قبل كده
هههههههههههههههه

البوست رائع جدا والله تسلم يمينك
ووجهة نظر حضرتك وصلت خلاص

وانا مستعد من النهاردة انفذ التعليمات وافضل دايما راااااااجل

بس الأول جوزوني ياجدعان متسيبونيش كده ههههههههههههه

عجبتني اوي حتة وتشيل أثقال دي
ضحكتني جدا هههههههههه

وبالفعل يجب على كل طرف التزام مكانه ودوره المخلوق ليه عشان ده القالب الصحيح للحياه الأسرية الناجحه

طب ماهي لو قامت بكل حاجة .. اولا هتنشغل عنه وهيلومها .. وبالتالي هيبعد عنها .. بالاضافة لبعده عن بقية التزاماته اللي هي كانت بتقوم بيها بالنيابه عن سيادته .. يعني البيت هيخرب بعد الشر!

بجد والله حضرتك نبهتي لمسألة اجتماعية فاصله ومهمة جداااااااا

والله أسأل التوفيق للعباد والبلاد

عدوني بقى ورايا مشوار لمدونة جنبكم هنا هههههههه

في امان الله

واحدة مفروسة يقول...

اه صحيح نست اقولك بالنوسبة للشخصيات و الآراء يعنى
فيه رجالة كتيرة تحب ان مراتها تقول آمين على كلامهم حتى لو كان غلط
و يا داهية دقى و طبلى بقا لو الست قالت رايها فى حاجة و طلع رايها صااااائب
يبقى يوم نكد يا عدلات
بصي نصيحة ..الست الشاطرة اللى تدىى جوزها برستيجة بره البيت و تاخده منه اول لما يدخل البيت
سلام....
ربنا على المفتري قلبتى عليا المواجع

Anonymous يقول...

تألق كالمعتاد فالموضوع في الهدف والمعالجة في العمق واري فية تحليل راقي فكل ميسر لما خلق له فليس خليق بالمرأة ان تقوم مقام الرجل والعكس كذلك فدورا المراة الرجل متوازيان ولا يتقاطعان وكذلك احييكم على القفشات الظريفة التي اثرت الموضوع
مزيدا من التألق
قارئ مستج
عبد الجليل

Anonymous يقول...

السلام عليكم
كل سنة وانتي طيبة
هههه
اشمعني تامر هو اللي يفتح الكانز
اولا
مافيش ادوار علشان تتوزع
الزوج ممكن يلعب دور الزوجة ازاي تيجي ازاي
راي هي قضية مش موجودة اصلا
في مثل بيقول كده
ان الراجل مالوش لازمة بس احسن من من من ايه

انا راي
الراجل والمراة حاجة واحدة تخليهم ينجحوا
اسمها التوافق المزاجي مزاجيا يكونوا منسجمين


تامر

Cute Kitty **sookra يقول...

صبرنى يارب

ايوه والله عندك الف حق
وعشان كدا انا هاقوله
زق العربيه ياابوشادن
هههههههههه
والله كلامك كله حق
تسلمى

صبرني يارب يقول...

همس الاحباب

وانت طيب وبخير يا ابو همس ربنا يكرمك

متشكره اوي ونورت

صبرني يارب يقول...

ام مالك

الله يخليكى يا جميل انتى عامله ايه دلوقتي يارب تكوني كويسه

ربنا يكرمك ويسلم قلبك يارب

صبرني يارب يقول...

سوتيته يا حياتي ماله موووووودك

طب هاتي بوسه وحشااااااااني

وايه حكاية الاحترام دي هاقلق منك كده ههههههههههههههههه

صبرني يارب يقول...

ريم

لا لا بصي الجمايل الى فاتت كلها دي كانت لجوزك هههههههههههههههه

انما دي تبعك عدي بقى من دلوقتي
ههههههههههههههه

نورتي يا جميل

صبرني يارب يقول...

واندا

لا لا انت قلبي فى المواضيع القديمه يا لولو هاتلاقي الاساسي هو ده

ده الرومانسيه دي كده نفحات كنت بارفه عنكم
ههههههههههههههههههه

حلوه اوي الدلع والدحلبه دي يا بت يا واندا
نفسي البت بنتى تتعلم يا اختي تعالى اديها دروس والنبى
احسن انا حاسه انها هاتقفش جامد مع ابوها لما تكبر شويه


مامتك عسوله يا واندا

صبرني يارب يقول...

مفروسه
هههههههههههههههههه
يا بت مواجع ايه

يا لهوي عليكى

وبعدين انا ما قلتش انهم ما يبقوش اصحاب وتامن على كلامه وكل حاجه

بس ما يلغيهاش

ما تشيلش هى على قلها الواد وتطلع وهو طالع باشا

يحترم انوثتها وضعفها
وفى نفس الوقت هى تحسسه انه رااااااجل وهى محتجاه حتى فى حاجات صغيره

حلوه اوي هو نفسه بيحسها حلوه

بس الى يفهم يعنى

نورتي يا لولو

صبرني يارب يقول...

قلم رصاص

طيب اكتبه عندك يمكن ينفعك

وانت عايز عروسه ياعم وانا اجوزك الصبح والى يرجع فى كلامه

بس ما تقعدش تنقي سنتين بقى اصل انا باتخنق
ههههههههههههه


نورت يا باشا خد رابع ورا وانت طالع بقى للمدونه الى جارنا

صبرني يارب يقول...

استاذ عبد الجليل

متشكره اوي ربنا يكرمك حضرتك نورت

صبرني يارب يقول...

تامر

ما قلناش حاجه فى التوافق وكمان يشيلوا بعض

يعنى انا اشيل دور جوزي شويه

بس جزئيا وشووووويه مش على طول

والعكس

لازم تكون الادوار صح والا الميزان يختل

وبعدين مش كويس اهو خليناك تفتح الكانز مش الصلصله ههههههههههههههههههه

نورت

صبرني يارب يقول...

سكره


زق العربيه يا ابوشادن اه
هههههههههههههههه
سكره انتى فعلا

نورتي يا جميل

عاشقه الرومانسيه يقول...

حلو الكلام ده
بس لما يجى وقته واجربه
هابقى اجى احكى لك تجربتى
(:

حنعيش يعنى حنعيش يقول...

حمدالله على السلامة.... كدة موافق وباصم بالعشرة ...ايوة كدة الموضوعية وحق الله مش يابخت الشغالة ...وياهنا الخدامة
الله ينور على حضرتك وبوست حضرتك

صبرني يارب يقول...

عاشقه الرومانسيه

لا بقى انتى هاتصدعينى ولا ايه
هههههههههههههههههه

ماشي زي بعضه صدعي عشان خاطرك بس

صبرني يارب يقول...

حنعيش يعنى حنعيش

ههههههههههههههه

انت موضوع الشغاله ده ماثر فيك جامد

على فكره والله انا كنت هاكتب يومها الموضوع كنوع من الهزار يعنى

بعدين مش عارفه وانا باكتب لقيتها قلبت معايا جد

بس انا ما كنتش باقول يا بخت الشغاله

كنت بقول يا تعب الزوجه الى مش متقدر صح

هناك فرق

حضرتك نورتنا

الشعب لابد له من حكومه تشكمه يقول...

شوفى باه انا دماغى فى الامور دى رجعيه اوى,اه متبصليش كده هتتخانقى انتى كمان معايا...
من الاخر انا احب الراااااااااااجل يكون راااااااااجل والست تكون ست...

بس كده ده من الاخر.

وبحب الراجل اللى شخصيته تطغى على البيت ,اصل شخصيتى قويه شويه فلازم حد يشكمنى:)
يشكمنى باحترامه لكيانى ولشخصيتى ودماغى ده الراجل اللى اقصده, يكون فى تفاهم وموده,
يكون عارف ان كلمه راجل تشمل حجات كتيره اوى مش مجرد مصروف بيت وبس,

ولما يكون هو راجل بجد اكيد هتكون هى ست بجد.

ومن هنا نرجع تانى لمقولة الشيح محمد حسين يعقوب:
يارااااااجل خليك رااااجل.

Ahmed يقول...

انا بشوف المثالين في حياتي

شفت الراجل اللي جرد الست من كل معنى للانسانيه وعمل سبع رجاله وحكم قراقروش عشان يبقى راجل, ولما بقت زي ماهوا عايز فقدت ناحيته كل شء جميل واتحول لبنك فلوس ولما فقد احساسه ببيته راح اتجوز تاني وطبعا هوا راجل يعتي لازم يخلي البيتين. بس البيت ده للعيال والبيت التاني مش عايز فيه عيال (يعني عايزه كده وبس) ومع ذلك عمرك ماتشوفي السعاده في عينيه

وشفت الست اللي لغت شخصيه جوزها ومشته على العجين ميهببوش. ولما فقد رايه وصلاحياته كرجل اتحول في ايديها لآله بتتحرك زي ماهيا عايزه. ملوش رأي ولا شخصيه. وفي كل مجلس تشوف المراره في كلام الست ديه وهيا بتقول, جوزي ملوش شخصيه وضغيف ولا بيحل ولا بيربط. وفي نفس الوقت بترجع تمارس عليه نفس الضغوط

ليه بأه الناس مش بتدرك الحقيقه ديه غير لما يوصولوا لنتيجه من الاتنين؟
مهمها قروا وسمعوا برضه بيمشوا على نفس الاخطاء ويفضلوا في نفس الحياه لغايه ميهدموا كل حاجه في حياتهم. وفي الاخر يااما طلاق يااما الاسوأ من الطلاق وهوا انهم يعيشوا حياه غلط ويطلعوا جيل متنيل بستين نيله

محمد عبدالرحمن شحاته يقول...

كل سنه وانتي طيبه
وعيد سعيد اولاً
ثانياً
العلاقه ليست علاقه ماديه او ماشابه فقط
اذا خرجنا من هذه الدائره
هنا
يكون العيش السعيد
تقبلي مروري

فتاه من الصعيد يقول...

حاااااااااضر

هو اصلا جابنا ورا غير تبادل الادوار ده

تحياتي

مهندس مصري يقول...

فعلاً لما كل واحد يؤدي دوره على أكمل وجه مش بيلاقي من الطرف التاني غير كل حب و تفهم و إحترام
لو كان الإختيار من الاول صح

سوبيا يقول...

بس اللي يفهم ياختي

بوست جميل ومعبر قوي

ننتظر تشريفك في مدونتنا "شيش وإزاز" قريباً

تحياتي

مصري جدا يقول...

كلام معقول جدا

بس تعتقدي اننا في اوان عقل

ولا الجنان اللي على اصولة

ابتسامة حزن يقول...

الكلام جمبل جدا ومقنع اوى
بس فين بقى اللى ينفذ
انا بشوف الراجل من دول يبقى جاى هوا ومراته من الشغل مع بعض
ويدخل ينام بقى على ما هيا تحضرله الاكل دا غير العيال والغسيل والتنظيف
وف الاخر هوا الراجل اللى بيتأمر ولازم كلمته تمشى زى السيف على رقبيهم

وف نوع تانى بقى اللى هوا عايز يلغى شخصية مراته وبرضه بيكون رافع شعار الرجوله والقوامه وبيتدخل فى تفاصيل ملوش فيها

فين وفين على ما تلاقى واحد عدل مراته بتشكر فيه


بلا خيبه

صبرني يارب يقول...

الشعب لابد له من حكومه

شيمو يا بت هو انا قلت غير كده

خليه راجل طبعا

بس الرجوله ادب مش هز اكتاف

على راي الرفيق اللمبى

صبرني يارب يقول...

احمد ابو العلا

تصفيق حاد للشاب ده يا جودعان

تمام مافيش فى عنيهم السعاده

حتى لما بينفذوا الى هما عايزينه ما بيكونش سعدا

ليييييييه عشان هما غلط


ويطلعوا جيل متنيل بستين نيله

هى دي

لا فض فوك يا معلم بجد برافوا عليك

صبرني يارب يقول...

محمد شحاته

وانت طيب وبخير


ايه رايك خلينا نقول انها مش ماديه بالمقام الاول

بمعنى ان لها جانب مادي لكن مش هو الاساسي ولا هو رقم واحد فى العلاقه

لكن لا نغفل وجوده ونحترمه ونتعامل معاه برضه بدون لخبطة ادوار

عشان انا ما باحبش ناخد صوره حالمه للدنيا

تحياتي لك ونووووووورت

صبرني يارب يقول...

فتاه من الصعيد

طيب ايدك معانا زقه لقدام

تحياتي يا فندم ونورتي

صبرني يارب يقول...

سوبيا

تسلمى يارب

عنيه انا الى هاتشرف بالشيش والازار

صبرني يارب يقول...

مهندس مصري

الاختيار الصح لازم يكون طالع من دماغ صح

ادمغتنا محتاجه عمره كامله
عليك انت بقى يا باشمهندس ههههههههههههههههه

تحياتي لحضرتك ونورتنا

صبرني يارب يقول...

مصري جدا

والله انا شايفه ان الجنان بس مش على اصوله

اصل ما عادش فى حاجه بتتعمل على اصولها خاااااااالص

ولا حتى الجنان بعيد عنك

الاصول ضاعت منننا

صبرني يارب يقول...

ابتسامة حزن

الحقيقه بقت من النوادر يا بنتى ان زوجين يشكروا فى بعض

للاسف الشديد والمريع

لكن تفتكري ده ليه ؟؟

بصراحه الازواج كلهم ما عادوش يستاهلوا التقدير ولا حتى من نفسهم
ودي المشكله

قصدي وهى دي الخيبه الى بالويبه

نورتي يا جميل

خواطر شابة يقول...

عين العقل
كلامك ده المفروض يبقى التزام الطرفين يوقعوا عليه قبل عقد الزواج
لو طبق ما في هذا البوست فعلا في الحياة اكيد ستغيب التعاسة عن البيوت لكن المشكلة ان الناس أذن من طين و أذن من عجين
تحياتي وبوست في الجون والله تسلم ايديك يا حبيب والديك على رأي عصام الشوالي

قلم رصاص يقول...


واللي يرجع في كلامه يبقى واد وقلم رصاص كمان ههههههههههههههههههههههه

مش هنقي سنتين .. يلا هوافق على واحده

من خمسين حضرتك هترشيهحوملي

ههههههههههههههههههههه

في امان الله

صبرني يارب يقول...

خواطر شابه

ادينا بنقووووووول على الله يفهموا

نورتي يا جميل

صبرني يارب يقول...

قلم رصاص

هههههههههههههههه

خمسين يا مفتري

خلاص ياعم خليك كده

طهر فؤادك يقول...

السلام عليكم ورحمة الله وبركاتة

ربنا يكرمك يارب والمسلمين

وكل سنة وانتى طيبة ومعلش متاخرة علشان كنت فى الحج وربنا يتقبل منا ومنك والمسلمين وان شاء الله السنة الجاية تكونى هناك بأذن الله وكل المسلمين الهم امين ....

اخوكى فى الله

صبرني يارب يقول...

طهر فؤادك

يا اهلا وسهلا كل سنه وانت بخير وسلام

وياااااااااارب يسمع منك اصل الحرم وحشني اوووووووووووي

وحجه مقبوله ان شاء الله يا زقازيقى ربنا يكرمك

ذو الوجه المبتسم يقول...

كل سنة وانتى طيبة يا ام مريم

عيد سعيد عليكي

على فكرة دعيت لك فى الحرم

تحياتى لك

صبرني يارب يقول...

ذو الوجه المبتسم

ربنا يخليك يا استاذ ناجي

ما اتحرمش منك يارب

ميرسي اوي بجد انك افتكرتني

انا الحرم وحشني اووووووووووي

ربنا يتقبل منك يارب ان شاء الله وفى ميزان حسناتك

أحمد عاطف يقول...

كعادتك بتتكلمي في موضوع الرجل والمرأه

افتكر ليكي جملة قولتي فيها ان حتى الانثى من حقها ان يكون لها ذمة مالية منفصلة وان دا كان حاصل في عهد الرسول صلوات الله عليه مع زوجته ام المؤمنين خديجة رضي الله عنها

يومها حسيت ان انتي شغلك الشاغل مش المرأه

لا العلاقة بين الرجل والمرأه والمصداقية والتفاهم فيها

وكلامك فيها حلو جدا

ولكن يا اختي العزيزة انتي بتمثلي نوع من النساء نحن معشر الرجال نظن انه انقرض

فستات النهاردة بيتكلموا من باب انها الند للرجل

الامر اللي حول العلاقة الى علاقة غير صحيحة بين الطرفين فالرجل بدأ يحس بان هناك تعدي على حقوقه والست بتحس بنفس الشيء

واصبح كل منهم يلقي تهمه على الاخر

واصبح من حق الست تعمل اللي هي عيزاه عشان دا حقها

غياب المفهوم الصحيح للحقوق راح وبالتالي اصبحت الادوار ممسوخة

صبرني يارب يقول...

احمد عاطف

متشكره اولا على الاطراء يا باشا الى كتير عليا

بالنسبه للبوست والعلاقه بين الرجل والمرأه فعلا انا شايفه انها محتاجه تصليح
بايظه

حقيقى احنا عندنا حاليا شخصيات ممسوخه على الطرفين

رجاله بالاسم فاهمين الرجوله غلط
وستات كمان فاهمين حقوق المرأه غلط

عشان كده انا باحب العباره الى جت على لسان بطل رواية عماره يعقوبيان

احنا فى زمن المسخ


وفى النهايه فعلا وصلنا للموقف ده

كل واحد فيهم حاسس انه مش واخد حقه كفايه من التاني

والاثنين حاسين بالظلم والاثنين فعلا مظلومين

لكن هم لانفسهم يظلمون

تحياتي لك يا احمد ونورت

وشكرا اوي