الأحد، 7 فبراير، 2010

مروه وأمجد(الجزء التاني)

الى مقراش الجزء الاول يروح يقراه



امجد ومروه ما حابوش بعض من اول مره انما بصراحه اثروا فى بعض هما الاثنين روحوا يفكروا فى بعض

بعد يومين امجد لقي حجه يروح بها الكليه عند مروه وطبعا قابلها صدفه ما سألش ولا حاجه على الدفعه بتاعتها فين
ووقف قدام المدرج صدفه يستنى صاحبه مش مين المهم انها كانت صدفه.

خاف يقول انه جايلها مخصوص اصله خايف ترفضه ما كانش متاكد انه شاغلها زي ما هى شغلاه

المهم شاف مروه وسلموا واتكلموا مش هما بس هما واصحابها كمان و الصدف اتكررت وما بقتش صدف بعد كده عادي
واميلات بقى وشويه وتليفونات كمان وكل ده وامجد ومروه بيقربوا من بعض اكتر وبيتعلقوا ببعض اكتر

والحقيقه هما الاثنين رغم كل شيء ما صرحوش لبعض بحبهم لكن بقت واضحه جواهم

بس خلال الفتره دي اتكلموا كتير اوي وامجد بقى عارف مروه بتفكر ازاي ومروه كمان بقت عارفه امجد بيفكر ازاي
وبصراحه امجد كان مؤثر ومقنع اوي وكانت غالبا مروه بتقتنع برأيه . حتى انها تلقائيا بدأت تغير فى لبسها شويه ماهى كانت محجبه اه بس حجاب من اياه الى مع اقل هدوم ممكنه واكتر عدد ايشاربات ممكنه

يعنى من الاخر امجد اثر فيها جامد ومروه كمان كانت كلها حيويه وامل وطموح عالي واقدام وده برضه اثر فى امجد اوي وعلى طموحه واماله جدا

واخر يوم في امتحانات مروه ومع توقع البعاد (اصل مروه مش مممممكن ابدا تقابله بره الجامعه الحكايه مش سايبه هى) شافوا بعض وقالوا لبعض كل حاجه من اول ما بصوا فى عنين بعض

كان امجد هايتجنن من الفرحه عشان اتاكد ان مروه حاسه بيه فعلا ومروه كانت مانعه دموعها بالعافيه دموع فرحه ولا ايه هى ما تعرفش لكن كانت حاسه ان قلبها بيرتعش والدموع ماليه عنيها

وطول الاجازه برضه استمرينا فى تليفونات واميلات لكن مقابلات بره لا حتى امجد ما طلبش منها اصله عارفها وما يرضاش برضه لها انها تعمل حاجه غلط (برضه نتقابل فى الجامعه حاجه وبره حاجه تانيه )

بس ده ما يمنعش ان مروه راحت كام مره كده الكليه فى الصيف مره تسال على النتيجه ومره تجيب النتيجه بام عينها ومره تسال على كورسات الكمبيوتر الى عاملاها الكليه كده يعنى

المهم مشيت الايام وزاد الحب وبقى تقريبا مروه وامجد مع بعض على طول لو مش مع بعض فى الكليه يبقوا مع بعض على النت او على التليفون

بشكل تلقائي بقى امجد لازم يعرف تحركات مروه كلها ما تروحش فى حته ولا بتخرج من البيت من غير ما تقول لامجد ولو قالها ما تروحيش فى حته بتقوله حاضر بتسمع كلامه طبعا (اصل حلو اوي احساس انه بيغير عليها اصل ده فى رايها زياده حب ) وكمان هى برضه بتكون عارفه هو فين دايما

لكن مش معنى كده ان الحكايه فضلت كده ماشيه على طول حلو

لا كانوا بيتخانقوا لاسباب كتير مروه لبست حاجه مش عاجباه . خرجت من غير ما تقوله . هو هزر مع زميلته فى الكليه بزياده او رنتله وطنشها . وهكذا وممكن يتخاصموا يومين ومروه تعيط لما تشبع وامجد وشه يفضل شبه كانز البيبسي الى العربيات دايساه ....وهكذا وهكذا

وكانوا بيتصالحوا هما الاثنين ما يقدروش يبعدوا عن بعض وساعات ما كانوش يكملوا اليوم خصام وامجد لما يحس انه زعلها كان بيلوم نفسه اوي ويتصل عليها ويصالحها وهى كمان كانت بتعمل كده

امجد ما كانش بيتكلم كتير عن الجواز ولا بيدى وعود وقالها انا مش عايز ادي وعود كتير عشان انا لسه ما خلصتش الكليه وما اقدرش اديلك وعود لكن انتى عارفه انى هاعمل كل حاجه فى وسعي عشان نفضل سوا انا باحبك وما اقدرش اتخيل حياتي من غيرك.

مروه فرحت قوي وقالت راااااجل بيحترم الوعود وكفايه انه وعدني نفضل سوا وانا متاكده وواثقه انه ان شاء الله هايكون اد المسؤليه ونبدأ حياتنا سوا

وطبعا مروه كانت رافضه أي عريس يتقدم لها وتقنع اهلها انها مش عايزه تعطل نفسها عن المذاكره ومستقبلها وكليتها . وكانوا بيقتنعوا

امجد ومروه كانوا طايرين ببعض وامجد كان يقعد بعد كل مره يتقابلوا او حتى يتكلموا فى التليفون ويسنسنوا لبعض يجى ساعتين كده يغمض عنيه ويحلم بيها ويبقى مش مصدق نفسه انه لقى الحب ده وان عايش الاحساس ده فعلا

ومروه كمان كانت حاسه ان ربنا بيحبها عشان لقت انسان زي امجد وبرضه ما كانتش مصدقه نفسها وكانت بتسأل نفسها هو صحيح نغمة دقة قلبي كده فعلا ولا انا باحلم ؟؟!!!
وتحلم هى كمان باليوم الى هايجمعهم بيت واحد وتحلم وتحلم وتحلم وتنام وهى بتحلم وعلى وشها ابتسامه هادية وناعمه ورائعة

حلو اوي الحب ده
تلقى القلوب الخضرا ترتعش من كلمه
وفى العيون فرحه بترقص شايله دمعه
من شبّاكه بس.. نحس الشمس جايه تدفي حلمنا
ومع دقاته بس... نشوف النجوم تلمع لنا

ونكمل المره الجايه ان شاء الله

هناك 42 تعليقًا:

reem يقول...

ازيك ياتوتة

انتى فييييييييييين ؟

هو كل مره كدا تشوقينا وبعدين تقولى نكمل المرة الجاية ؟

بصي مهما كانت نهاية القصة المهم انهم حسو بايام حلوة وشعرو بالحب وحلاوته مع انى دايما بتمنى ان اللى بيحيو بعض يتجوزو

بس عجبتنى اوى يسنسنو دى

هههههههههههههههه

مش تتأخرى علينا بئا

خواطر شابة يقول...

بانتظار التتمة بس امانة عليك ماتحرميهم من بعض المرة دي ههههه خلي السيناريوا زي ماهو ماشي كده والامير يتزوج الاميرة وتوتة توته خلصت الحدوتة بلاش شيطان يطلع في النص يبوز الحكاية خلينا نسمع حكاية حلوة من نفسنا بدل البكائيات اللي محاوطانا من كل جانب
تحياتي لك عزيزتي

قلم رصاص يقول...

انا اخدت النهاردة دفعة معنوية عاليه اوي من البوست دا...........!
طبعا انا مش أمجد هههههههههههه

بس بجد قصة حلوة جداااااااا بأمانه
وأسلوبك ررررررررررائع جدا ياام مريم

ــــــــ
"حلو اوي الحب ده
تلقى القلوب الخضرا ترتعش من كلمه
وفى العيون فرحه بترقص شايله دمعه
من شبّاكه بس.. نحس الشمس جايه تدفي حلمنا
ومع دقاته بس... نشوف النجوم تلمع لنا"

ياسلام على الكلام الحلو

بس أبووووووووس إيدي تكملي القصة على نهج الأفلام العربي والهندي ، ويكونوا لبعض
كفايانا وجع قلب بقى .. عاوزين نفرح شوية هههههههههههههه

تقبلي مروري وتقديري واحترامي

سمع هوص (Abo 3li) يقول...

"امجد ومروه كانوا طايرين ببعض وامجد كان يقعد بعد كل مره يتقابلوا او حتى يتكلموا فى التليفون ويسنسنوا لبعض يجى ساعتين كده يغمض عنيه ويحلم بيها ويبقى مش مصدق نفسه انه لقى الحب ده وان عايش الاحساس ده فعلا

ومروه كمان كانت حاسه ان ربنا بيحبها عشان لقت انسان زي امجد وبرضه ما كانتش مصدقه نفسها وكانت بتسأل نفسها هو صحيح نغمة دقة قلبي كده فعلا ولا انا باحلم ؟؟!!!"



يحلاوة... الكلام علي الورق حلو اوي... بس للاسف في الواقع مش كده..

انا مش بنقل ليكي اكتئابي ولا حاجة... بالعكس... دنا متفائل جدااااا..
وبتمني مروه وامجد يطلعو من ال 5 % ال قصص حبهم بتنجح...
عموما حتي الان انا بحقد علي عم امجد.. وبقر عليه.. هههههههههههههه

اسلوبك جميل.. وتوصيفاتك اجمل..
مستنيين الباقي

تحياتي

احساس طفلة محبة للرومانسية بس واقعية يقول...

الله الله يارب تكملى كدا خليهم يتخانقوا ويزعلوا وتفارقهم الايام بس بنفس الحب اللى جواهم ويزيد كمان وفى الاخر يتجمعوا
هاهاهاهاهاهاها
خلينا نفصل سناريو حب على مزاجنا بقى :)
لا بجد يا صبصب كملى بس ياريت متغبيش زى المرة دى
وزى ما تكون اكيد هتعجبنا لانك حطة شوية رومانسية وورود واحلام فى وسط الواقع بطريقة بسيطة انا شخصيا بحب اقراها جدا

دمتى بكل خير
تقبلى مرورى

صبرني يارب يقول...

رييييييم

انتى فين يا انتى يا بنتى

كل شويه تغطسي كده

عيبك ان فهمنى يا جميل
ههههههههههههههه

وحشاني اتصرفي بقى

صبرني يارب يقول...

خواطر شابه

لعلمك انا نفسي بس مش ضامناني بصراحه كفايه عليكم القصه الى فاتت بتاعة قلب ايمان عملتلكم نهايه سعيده ما تاخدوش عليها
هههههههههههههههههههه
نورتي يا جميل

صبرني يارب يقول...

قلم رصاص

اهلا يا باشا اي خدمه دفعه ببلاش اهو

شكرا اوي على الكلام الجميل

تفرحوا شويه ايه هى هيصه انا وراكم والزمن طويل
ههههههههههههههههههه

صبرني يارب يقول...

سمع هوص ابو علي

طب انا عايزه ذمتك مش لو الكلام ده فى الحقيقه يبقى حلو برضه ؟؟

والله يا ابو علي مش عارفه لسه عموما هاكمل وتشوفوا معايا

صبرني يارب يقول...

احساس طفله

والله نفسي احقق لكم احلامكم بس مش عارفه لسه هافكر بقى
هههههههههههههههههه

تسلمى يا جميل

سمع هوص (Abo 3li) يقول...

ذمتي.. حلفتيني بالغالية....

اه اكيد هيبقي حلو... بس زي مقلتلك... قصص الحب الناجحة(البتنتهي بجواز مبينتهيش بطلاق) اقل من 5 % ....

وربنا يسهل كده ويكرم عم امجد... وميغيرش مروه من ناحيته...
فكرتيني بحاجة كنت كتبتها زمان... هبقي ادور عليها وانشرها في البلوج عندي... وساعتها يبقي اقريها وقوليلي راءيك..

صبرني يارب يقول...

ابو علي

يعنى اشمعن مروه الى تتغير من ناحيته

ما جايز هو الى يتغير

وجايز ا لاثنين يتغيروا

ههههههههههههههه

خلاص هاستنى قصتك ان شاء الله

نورت

سمع هوص (Abo 3li) يقول...

لاااااااااااااااااااا
بصي امجد مش هيتغير.. لأن غالبا الولد او الرجل.. مشاعره مبتتفيرش...
ممكن يكون بيشتغلها... وهيجي وقت وهيزهق من اللعبة .. او ممكن يكون بيشتغل نفسه كمان...
لكن لما المذكر بيلاقي مؤنثه ويحبه بجد.. مبيتغيرش... نوهائي..


ومدونتك منورة باصحابها

صبرني يارب يقول...

ابو علي انت عارف انا هاعمل فيك ايه

مش هارد عليك خالص بتيتا

انما هاسيب اعضاء الجمعيه

جمعية المرأه المتوحشه طبعا

يردوا عليك
ههههههههههههههههههه


اما ردي انا فعموما ما باحبش اقول الست والراجل

عموما البنى ادمين فيهم كل الانواع

Wanda يقول...

اخييييييييييييييييييييييرا

ياه دا انا كنت قربت انسى مين امجد و مروة دول
مش هو برضه صيدلى :-))
و الدراسة سايباه يتسوح فى الكليات الثانية :-))) امال السكاشن الى بالثمن ساعات ديه بيعمل فيها ايه :-)))))

طبعا انت مش مستنيه منى جميل لانى قيلاها من قبل ما اكتبها
بس
قولتى ننقاشك فيها كل مرة
ممكن

ادخل برجلى اليمين و بسم الله
صبرنى
1- المقابلات الى فى الكلية تفرق عن خارج الكلية فى ايه ؟؟؟؟؟
هى لو حاسة ان غلط تقعد معاه لوحدهم يبقى فى كل الاماكن ، تفتكرى رأى الزملاء الى ميعرفهومش كويس حيفرق عن الناس الاغراب؟؟
2- مكلمات هاتفية يوماتى ، اشمعنى انا ودان اهلى معايا و انا بكلم صحباتى ، ولو اتوشوشت يبقى بعد ماقفل كنت بتوشويشى تقولى ايه :-)))
بس اقول ايه الموبيل مجاش الا بعد التخرج و من مرتبى :-))) كنت حاخد رحتى لو ظهر رخيص كده من بدرى ؟؟ معرفش
بس حلو الاهل الى مطنشينه و مطنشنها :-))))
3- هى مقالتش لمامتها ليه ؟؟ عنه؟؟ عندها شك الموضوع ميكملش؟؟ عادة البنت سر امها او العكس؟؟ المهم ياريت الام كانت تشجعها تتكلم و توضح
اصل اكيد ماما خذت بالها من التلفونات :-)))
4- قصة حب بتنمو و بتتعرض لظروف طبيعية من غيرة و زعل و فرحة حلوة عجبتنى ديه ، انه مش نظام ازرار الحب on off
5- ياعينى على الشعر
مقدرش اقول فيه ثلث الثلاثة كام
انا اروح افتح الشباك جايز الاقى شمس
رايحة فين ياوندا يامجنونة الدنيا ليل و -10 ثلج و كل الى حتاخذيه التهاب رئوى يافلحة
6- قلبى حاسسه بحركة غادرة حاقة ماحقة :-))والنبى بلاش رأفة بينا
بصى انا لسه مادوبتش حب فى اى منهما بس برضه نشجع زميل المهنة امجد بلاش كسر القلوب دواها عندنا مر حنظل :-((

ياه كل ده تعليق :-)))
انا مليش دعوة
انت الى غبتى :-))))
لما ماتغبيش كده كثير :-))التعليقات حاتقصر بعد كده :-)))))))))))))))))))))))))))))))))))))))

شمس النهار يقول...

كنتي فيييييييييين؟؟؟
كنت هبعت لك محضر علي يد محضر

بسرعة الضبط والاحضار للمدونة


جميلة القصة
::))


سلامي

صبرني يارب يقول...

شموسه

والله اليومين دول مشغوله شويه يا جميل

انتى وحشاني خالص هابقى اختلس الوقت وارغي معاكي حبه فى التليفون

وميرسي يا جميل نورتي

صبرني يارب يقول...

وانده

مستنياكي وربنا

يا قمر انت ترغي براحتك انت تعالى هنا جنبى

انا كمان عايزه اسأل نفس السؤال وحياااااااتك عندي

تفرق ايه ؟؟ ها ها تفرق ايييييه ؟؟

السنسنه فى الجامعه صح وبره الجامعه غلط ولا ايه

وتفرق ايه برضه بين السنسنه فى التليفون او مش فى التليفون

اما بقى يا سيدتى الفاضله فى عصر الموبايل فممكن استغفال الاهل عااااااادي جدا هما يعنى مش بيناموا مش بيخرجوا

بس برضه دي فى راي غفله من الاهل

أنا ابويا كان حاطط التليفون فى الصاله على قارعة الطريق واصر الحاحا يكون سلك التليفون طوله متر ما يوصلش لاي مكان فى الدنيا اكتر من كرسي الانتريه الى جنب التليفون يااااادوب
وعليه لا يمكن لاحد اطلاقا الوشوشه ولا السنسنه عبر التليفون

وبعدين كان ايامنا مافيش موبايلات لسه

وما قالتش لماما ليه ؟؟

الحقيقه من وجهة نظري ما تفرقش كتير

عشان للاسف تسعين فى الميه من الامهات ما عندهمش الخط الصح

يا اما هاتكسر عضمها وتمنعها من الكليه
يا اما هاتقولها ومالوا يا روح ماما اتس اوك هاتي وتعالي يشرب معانا التي فى التراس

الى بتتصرف صح قليلين اوي

وعموما هاتشوف دور مامتها فى الجزء الجاي ان شاء الله

ادينى رغيت اكتر منك يا معلم

بـــــسمة انـــــــــور يقول...

مشاعرى زغزتنى
اهئ اهئ اهئ

البوست ده ادانى بور فظيع
بجد قصه حلوة اوووووووى

تسلمى يا احلى خالتو
مستنيا الباقى

صبرني يارب يقول...

بسمه انور

الحقيقه ما كانش قصدي اسعدكم
ههههههههههههههههه

اي خدمه يا قمر

star in the sky يقول...

حلو اووى الحب ده

بس الحب بعد الجواز بيكون احلى وله طعم تانى

فتاه من الصعيد يقول...

موش متفائله :(

حاسه ان في مصيبه هتحصلهم

ربنا يستر

تحياتي

محمد فؤاد (صاحب عمود النور) يقول...

يا عينى على الرومانسيه

تسلم اديكى يا صبرنى
واللهى كنت حاسس انك قاعده قدامى وبتحكيلى القصة

وكمان الشعر الاخير دا حلوووووو قوووووى وفالحة بس عماله تقوليلى انا مش بعرف اكتب شعر امال اللى كاتباه دا ايه؟؟

اختيار موفق جدااااااااا للفترة السنية للابطال عشان الكلام دا كله مش بيحصل الا فى السن دا
وتسلم الايادى

صبرني يارب يقول...

ستار

لا فض فوك اينعم موافقه على كلامك ميه الميه

القصه ما بتعرضش وجهة نظري انما بتعرض قصه شائعه من منظوري لها

ونشوف الاول القصه هاتنتهي على ايه

نورتي المدونه

صبرني يارب يقول...

محمد فؤاد

شعر ؟؟ مين قال شعر ؟؟

مش عارفه هو كلام كده جه على بالي كتبته

احسبوه زي ما تحسبوه بقى ماليش دعوه
هههههههههههههه

نورت يا محمد وشكرااا على الكلام الجميل

صبرني يارب يقول...

فتاه من الصعيد

وحياتك وانا
ههههههههههههههههههه

ستيته حسب الله الحمش يقول...

يا خوفي يا بدراااااااااااااان

اصل حب الجامعات ده وهو لسه طالب كاورك عبيط وحتة متخرجيش الا لما تستئذني واعدلي لي القصة اللي خارجة من الطرحة والحاجات دي بتخوفني

ماهو لو مكنش وارث يا صبصب ها يهبب ايه
واهلها ها يصبروا
طب هي كمان ها تترك طبع العملية اللي يميز بنات اليومين دولاااااااااااا

وهكذا يا سادة نحن في انتظار الحدوتة ها تعمل ايه
ما هو اصل صبصب واقعية ومش ممكن ها تقول واحتضنها وغابا في قبلة طوووووووووووووووووووويلة :)

كملي يا معلمة صبصب ومتعلقينيش الله يرظى عليكي :)

صبرني يارب يقول...

ستيته
هههههههههههههههههههههه
كاورك دي ايه يا خالتي


وعموما انتى فاقسااااااني يا جميل

والله هحاول بكره انزل البوست الجديد عونيه

نورتي يا جميل

الازهرى يقول...

ياخوفى يا بدران

بعد مراجعة الجزئين فى انتظار لباقى
عل أحر من الثلج


بس فى سؤال صغنون بشغلنى من سنين
عن حب الجامعات والفترة الطويلة بتاعته دى
فين كل ده من اهلها ؟ والدتها ؟ أختها ؟ والدها ؟ أى نيلة ؟

لو خبت عن دول خدى نصيحتى أكيد النهاية مهببة

MaNoOoSh يقول...

مش هقول احساسي ايه بأخرتها معاهم
خليني متفائلة أحسن

مستنيين الجزء القادم يا قمر

حنعيش يعنى حنعيش يقول...

اللى بنعملوه فى الناس بيطلع علينا ولا اية ....عايز اعرف النهاية ....ماليش دعوة ... ياريت ماتتاخريش فى الجزء التالت ...ماشى

Wanda يقول...

يعنى مسموحلى برد ثانى ؟؟؟؟
بصى يا صبرنى
احساس الحاجة الغلط بيجى بالتربية
و هى و هو حاسين ان السنسنة غلط بس حقهم (اتفرج دول حيعملوا ايه فى ولادهم :-))))

و ساعات ممكن يتمادوا و يدوا حقوق اكثر لنفسهم و ساعات ممكن يرتجعوا و يحطوا الحق و المستحق فى حدوده الطبيعية و عموما كل واحد بياخذ نصيبه

المهم الانسان يحط فى باله اولا و اخيرا ان ربنا شايفه فين مايكون و لو خاف من ربنا يبقى الباقين مش مؤثرين
و مادم الاهل مربين فيهم الاحساس بالخوف من ربنا يبقى مش لازم يخفوامن الاهل و مصارحتهم بالحقيقة

المهم
عجبتنى حتة انه ميقدرش يوعدها و هى شايفه راجل و قد وعوده (الى موعدهاش :-))) شكلك حدربكى الدنيا و حتحطلنا اغنية صباح النهاردة عند فطوم
:-)))))

صبرني يارب يقول...

مانوش

نورتي يا جميل وخليكى دايما متفائله

صبرني يارب يقول...

الازهري

والله مش عارفه هما بيبقوا عارفين وبيستهبلوا

ولا الى هذه الدرجه غفلانين ؟؟

وعجبنى اوي انك ما حصرتش الدور فى الام والاب بس

لان ده حقيقى مش لازم ابدا نكون عندنا تركيز مسؤليه وسلطه

صبرني يارب يقول...

حنعيش يعنى حنعيش

من نفسنا شويه يا دوك
هههههههههههههههه

نورتنا

صبرني يارب يقول...

واندا يا حياتي انتى ليكى عشر ردود لوحدك جو اون

ويا فاهمنى انت

الوعود الى ما وعدهاش

اخدلي بالك انت ؟؟؟

ده من وجهةنظري انا تنصل من المسؤليه اصلا

بمعنى حبايب اه ومالو

نحب ونتشحتف ونترعش مافيش مشكله

انما مسؤليات والتزماااااات

ابسلوتلي عند امه يا ادهم

انا احب ابقى براحتي حر طليق كده اما ازهق واخلص ازقزه اقلبك واشوف غيرك

ما زهقتش ولقيت الازقزه حلوه خلاص نشيل بقى

عرفتي المبدأ الى هو بيفكر فيه ؟؟؟

سمع هوص (Abo 3li) يقول...

"خلاص هاستنى قصتك ان شاء الله "

هيا مش قصة هيا خاطرة.. وللاسف ملقيتهاش..
بس اعدت كتابتها تاني... بشوية تغيرات..
مستنيكي تقريها .. وتقوليلي رأيك ...
http://sm3hos.blogspot.com/2010/02/blog-post_08.html

الشعب لابد له من حكومه تشكمه يقول...

مممممممممممممممم يادى الاجزاء وسنينها

صبرني يارب يقول...

ابو علي سمع هوص

انا روحت فعلا امبارح بس قريت نصها وما لحقتش اكمل هاروح النهارده اكمل بقى واقولك رايي عونيه

شكرا ونووووووورت

صبرني يارب يقول...

شيما

عاجبك ولا مش عاجبك يا اختي ؟؟؟

مش قلتلك هاجيبك كل جزء تقريه وانتى صاغره ؟؟
هههههههههههههههه

Wanda يقول...

رجعت ثانى :-)))
بصى يا صبرنى
قبل ما تعلقى الكلوب و تحطى الكرسى تحته و تعزمى البلطجى :-)))

كلمة صغننة
ساعات فيه ناس حابة تعيش حالة حب
بدون ما تفكر او يجى تفكيرها فى ماذابعد
و بتبقى مخلصة فى الحب ده قوى
و المشاعر صادقة
بس الدنيا للاسف مش مشاعر و بس لا و افعال و اقوال و نوايا وووو
و لما ماتكمل الحالة بيتنكدوا نكد عليهم و على الى خلفوهم :-))))))

يعنى اغلب الولاد و البنات فى السن ده لو محبوش حد حيحبوا ممثل حيحبوا لاعيب كرة و هكذا
فالتلاقى فى المشاعر بيخليهم واقعين شويه بدل ما يعيشوا فى الاحلام غير واقعية

المهم الواد حيشتغل فى صيدلية و لا شركة ادوية ؟؟ بلاش يكمل فى سكة العلم مش حيتجوز فى سنته ده :-))))
خليه صيدليتن منها واحدة ليلية و يحبها فى تليفون الصيدلية:-))))
اهى ده هو انا حاغششك الحدوتة
مليش دعوة انا استنى زى الباقيين احسن
و ارجع انطف افط اعلق :-)))))))))

صبرني يارب يقول...

واندا

لا يا اختي تعالى

والنبى تعالي كملي كملي

ده عجيبه يا جدع
هههههههههههههههههههه

اصبري على رزقك

سبينى عليهم

يا بنت ده انا اصلااااا جايباهم هنا عشان ابهدلهم

عارفه الناس الى يعرفوني كويس اول ما بدأت القصه

قالولي هااااااااااا هاتعملي فيهم ايه يا مفتريه
ههههههههههههههه

الجزء الجديد كتبته بس افضى اقعد انسقه وينزل دوغري يا باشا