السبت، 13 فبراير، 2010

مروه وامجد (الجزء الرابع)


مروه حاولت تتهرب من مامتها وتتحجج باي حجج فارغه لكن مامتها بقى شدت عليها وضغطت عليه مره بالحنيه وبالشده شويه

مروه قالت لمامتها قشور كده عن الموضوع ما قالتش كل حاجه وكمان اكدت طبعا لمامتها على براءة العلاقه

وانهم خلاص هانت فاضل سنه وما قالتش طبعا ان العلاقه قديمه ولا حاجه و زوغت من السؤال ده

مامتها الحقيقه تقبلت الموضوع وحاولت تهديها وتعرف كمان ايه المشكله الى بينهم

لكن مروه قالت لها انها مافيش بس قفلت معاه فى الكلام وطلبت من مامتها تسيبها مع نفسها شويه

وكملت مروه عياط مع نفسها وحيره وتعب والم وكل حاجه

بعد كام يوم بدأت تحاول تخرج من الحاله دي عشان الى فى البيت

ولقيت كمان فى البيت كلام عن سفر ومصيف وكانت ناسيه وطبعا كان لازم تسافر معاهم

وكلمت ندى صاحبتها ولقت ندى عارفه المشكله من امجد

وندى زعلانه منها اوي انها ما كانتش بترد عليها وكمان لانها عرفت من امجد مش منها

مروه قالت لها : معلش يا ندى والله ما كنت عارفه اتكلم مع أي حد ولا اقول أي حاجه بس انا عايزه أشوفك ضروري قبل ما اسافر

لما ندى راحتلها مروه اول سؤال سألته لها : أمجد قالك ايه بالظبط .

ندى : قالي انك هبله يا حبيبتى

مروه : انا باتكلم جد يا ندى قوليلى بالظبط قالك ايه

ندى : ولا حاجه والله قالى انكم اتخانقتم كالعاده عشان سبب هايف تافهه مالوش أي لازمه عاااااادي ايه الجديد

مروه : لا يا ندى الحكايه اصلها مش موضوع موقف وبس انا حاسه انه متغير بقاله فتره مش عارفه ايه الى حصل
صدقينى انا مش عارفه اوصفها بس هو عامل زي ما يكون بيكلمنى من غير نفس طب خلاص انا يعنى ما عنديش كرامه هارمي نفسي عليه بقى

ندى : يا بنتى بطلي هبل والله ده كلمنى كان مضايق اوي وهو بيحبك اوي يا مروه بلاش هبل بقى

مروه : مضايق اه يادوب يضايق طبعا اموت انا فى نفسي وهو يضايق .

ندى : بطلي هري فى نفسك يا ماما عايزاه يعمل ايه طيب يقعد يعيط زيك ؟؟ ولا يجى يغنيلك ظلموه تحت الشباك ؟؟؟

مروه : بطلي تريقه بقى انا باتكلم جد . ما اعرفش يعمل أي حاجه .

ندى : يعمل ايه ماهو اتصل عليكى ما ردتيش كلمنى ما ردتيش عليا يعمل اييييييه يجي يسال عليكى ابوكي ؟

مروه : اه اتصل مره واحده ما رديتش خلاص بقى ما صدق الله يرحم زمان .

وفضلت ندى تتكلم معاها كتير وكانت شايفه ان مروه مكبره الموضوع وطبيعى انه مش هايفضل زي زمان كانوا صغيرين والحكايه لسه جديده وطبيعى يركزوا ويعقلوا ومش معقول طول النهار رنات وتليفونات

مع ان هو الى بدأ بالتليفونات والرنات والملاحقه المبالغ فيها والهبل المتقع المعروف فى الاوقات دي الا انه هو اول ما اتخنق به

مروه بدأت تهدى من كلام ندى وحاولت تقنع نفسها انه عادي الا انها ابت على كرامتها انها تروح تكلمه اطلاقا وقالت انا كمان ما عملتلوش حاجه وهو الى ما بيتصلش وانا مش متصله

وبعد يومين سافرت مروه المصيف مع اهلها وهى مصره على نفس الموقف

امجد
رايح جاي مبووووووز ووشه اتفقنا شبه علبة ا لكانز المنداس عليها

وطبعا اخوه هاريه : ماااالك يا فالح عامله فيك ايه المزه شكلها كده مطرقعالك صح ؟ والله يا بيضا مطرقعااااالك . اصل الشراب المقلوب الى فى وشك ده ما بيظهرش الا كده .

وامجد كالعاده يقول بس يا خفيف مش رايقلك والله. واحيانا يزقله بالى فى ايده عادي جدا

امجد بيفكر كتير مش عارف يقرر يعمل ايه ؟

امجد بيكلم نفسه : منتظره هى بقى حضرتها انى اروح اكلمها انا . ليه هو انا عملت فيها حاجه ما هى الى كانت بتقول شكل للبيع .
بس بصراحه انا اصلا كنت مخنوق وهى اصلها مش بتبطل خنقه فيا . مش عارف انا حاسس انى زهقت حاسس انى كل يوم باتفرج على مسلسل عربي واحتمال تركي بطيء ورخم وفاكس جدا .

بقينا بنقول نفس الكلام وبنعمل نفس الحاجات وحاسس ان احنا بقينا اثنين دمهم تقيل مش عارف ليه .

يعنى ايه الكلام ده ؟؟ يعنى انت ما بقيتش بتحب مروه ؟؟؟ ( ده ضمير امجد )

لا باحبها بس مش عارف انا حاسس كده ليه ؟؟!! ومش عارف هاقدر اكمل كده ولا لا

يرجع ضميره يجيبه من قفاه تاني : يعنى ايه هاتطلع ندل ولا ايه وبعد الحب ده كله تخلى بيها وتسيبها وانت عارف انها بتحبك اوي . ده انت ندل بقى ؟؟

امجد : لا طبعا مش ندل ومش ها عمل كده لان انا اصلا باحبها برضه بس جايز انا مضغوط عشان .... عشان ايه ؟؟ مش عارف بس انا نفسيتى زي الزفت الايام دي

وبررررررضه مش هاكلمها انا المره دي انا ما عملتش فيها حاجه هى الى غلطانه اتكلمت اتكلمت ما اتكلمتش خلاص هي حره تبقى هى الى مش عايزه بقى .

ندى اتصلت على امجد لما رجعت من عند مروه وقالتله انها حالتها النفسيه وحشه وبتعيط ومبهدله نفسها يا ابنى ليه كده والحب راح فين بس ما كنتوش بتستحملوا على بعض نسمه .

وامجد لا تنازل ولا استسلام وما رضاش يتنازل عن موقفه ابدا بتيتا البته وعرف منها انها مسافره .

وفضل الحال على ما هو عليه لمدة اسبوعين كمان فوق الاسبوع الى فات يعنى 3 اسابيع
ودي اطول فتره خصام حصلت بينهم
لا مروه كانت حاسه بطعم فسحه ولا مصيف ولا عارفه تضحك ولا ضحكه من قلبها
ولا بتبطل عياط كل ما تخلى بنفسها . وكلها حيره بجد ومش عارفه ترجع فى كلامها وتكلمه ولا هو كده ما صدق وخلاص تحاول تطوي الصفحه .


وامجد ما زال على الوش المقلوب اياه . بس كان بيقول لنفسه الحكايه كده خلاص جابت اخرها وواضح انها خدت قرارها ومش هاترجع تاني . وفضل امجد يبحلق فى الفراغ الحلزوني ساعات وساعات ويعانى من حالة من الفراغ العاطفي ولسعة مراره على ما ضاع .

وندى يا عينى حيرانه تتصل على كل واحد شويه مافيش فايده وبعدين سكتت فتره كده وكان يبدو انها يأست منهم

لكن استمرت تكلم مروه عادي وبطلت تجيب لها سيرة امجد بناءا على طلب مروه

ورجعت مروه من المصيف وبعد كام يوم اتصلت عليها ندى

وقالت لها: بيقولوا النتيجه هاتبان بعد يومين سمعتي ؟

مروه : معقوله ما حدش قال حاجه طيب نبقى نتصل نسأل بقى .

ندى : لا بصي ايه رايك بكره انا راحه مشوار قريب من الكليه هاعدي عليكى ونروح سوا ونسأل على النتيجه امته برضه لما نروح احسن

مروه : ماشي انا حتى زهقانه وعايزه اخرج .

واتفقوا على المعاد وراحوا الكليه . وسالوا على النتيجه وطلعت لسه عليها عشر ايام على الاقل .
وبعدين فجأه بصت مروه لقت امجد قدامها .

بصت مروه نظره ناريه لندى كلها اتهام للتآمر عليها .

ندى : بصتلها وقالت لها ايه ماليش دعوه انا قلتلك حاجه يا ابنى ؟

امجد : قالهم ايه فى ايه ؟ قلتيلى ايه ؟

ندى : مافيش حاجه عادي احنا كنا جايين نسأل على النتيجه . ازيك يا امجد

امجد : الحمد لله ازيكم اخباركم ايه ؟ النتيجه ما ظهرتش مع ان الواد هاني اخويا قالي انها ظهرت .

ندى : اممممممم طب وانت جاي تسأل على النتيجه ليه انت حولت اداب ولا ايه ها ؟؟ ليه ؟؟ ليييييه يا مجنينى .
وطبعا اطفالي الحلوين

لا لا قرائي الحلوين يعنى اول لما امجد ومروه شافوا بعض راحوا مغنيين لبعض الاغنيه الى شغاله دي فى سرهم وندى طبعا خرجت من الموضوع وراحت تلعب مع الاسد

وهاتك يا عتاب فى بعض وهاتك يا تقطيع وشويه كده ولما الحكايه كانت هاتقلب بعياط مروه وفضايح فى الجامعه قرروا يروحوا ويكملوا كلام على التليفون

ويدفعوا ابو مروه وابو امجد المساكين فاتورة التليفون ويقولوا الخلفه والى خلفوها والى عايزين يخلفوا واحتمال يقولوا هى الجوازه كانت غلط من الاول
اتكلموا كتير اوي واتعاتبوا واختلفوا واتفقوا

على ايه اتفقوا ؟
المره الجايه

ايه القصه الى مش عايزه تخلص دي ؟؟؟

فكروني ابطل اكتب قصص

هناك 46 تعليقًا:

Wanda يقول...

لحقتك
الساعة عندى لسه 11 و نص و المراكب بتتحمل اهو

قصدى:-))

المهم نغلوش
يعنى رجعتيهم بمناسبة المولد ماشى ماشى متشكرين يافندم
و حلوة الى بتلعب مع الاسد

و اتفقوا و الله ديه حركة ايجابيه منهم
نستنى الجزء الخامس
بيتهيئلى خنلص على المنصورة قبل ما ينزل الجزءده
بوبو انت جاهزة ؟؟

ساعة الصفر 25
و كلمة السر سنسن

حلوة امتها بصراحة
بس الاحلى الابهات
رضيوا يدفعوا
تصدقى انا الى دفعت فاتورة التلفون الثلاث اشهر قبل و اثناء و بعد جواز اخويا ، اصل السيد الوالد لما شاف الرقم كان ناوى يرجعنا لقعدة الممستشفيات و الحبيب اول ماراح بيته طنشنا
قولت ادفع انا و الم المسائل و اهى ثمن خلاصنا من الباشا الحبيب
:-)))))))

star in the sky يقول...

وش مذبهل
كل ده لسة ما خلصت

بالنوسبة للقصة مش عارفة بس مدام الاتنين بيحبوا بعض ليه بيعاندوا

سمع هوص (Abo 3li) يقول...

يامسهل...
هي القصة دي هتبقي كام جزء؟؟ زي ليالي الحلمية ولا ايه؟؟
عاوز افرح ب امجد... او فيه..
هههههههههههههههه

اسواء صفات المرأة: العند
ومروة شكلها عنيدة.. ولازم امجد يوريها العين الحمرا شوية... اومال هيعملو ايه لو اتجوزو...


في انتظار الجزء الخامس والاخير...(وش بيطلع لسانه)...


تحياتي... وتصبحي علي خير

bobo يقول...

يا لهوي على القصة اللي عاملة زي الحياة دي.. ما هي الحياة كدة.. خيوط شابكة ف بعضها وخيط يجر التاني لحد ما العمر يخلص.. اوعي تكوني ناوية تقعدينا قدام المدونة بتاعتك باقي عمرنا
بس انا حاسة انهم هيسيبوا بعض.. اصل الحب اللي بجد مبيكونش فيه زهق ولا ملل.. بيكون فيه رغبة ف تغيير الاماكن والوشوش الا وش الحبيب.. انما هما شكلهم كدة حبهم كان تعود مش حب
يلا خلينا نشوف النهاية هتبقى ايه
تحياتي على صبرك ووصف الحلو

خواطر شابة يقول...

المرة اللي فاتت كان نفسي يكملوا وطلبت منك ده لكن هذه الرة عندي احساس انهم حتى لو اتجوزوا حيفشلوا حبهم مش قايم على أسس متينة باين كأنه فقط تعود وألفة خصوصا من جانب أمجد بس يالله ياخبر بفلوس بعد ماربنا يهديكي وتكملي القصة حيبقى ببلاش
تحياتي لك

اللى موش عارف يتغير يقول...

طبعا اول مرة اجى هنا
يعنى معرفش موضوع مروة وامجد ده
هشوف وابقى اقول
بس الاول تحياتى وتقلى مرورى

محمد فؤاد (صاحب عمود النور) يقول...

ااااااااااااه
فكرتينى بالذى مضى ..ليه بتقلبى عليا المواجع هههههههههههههههه
احدثها حلوة قوووى وخلصينى بقى من الاتنين دول يا يتجوزوا يا يمشوا كل واحد فى حاله

احسنتى يا صبرنى

صبرني يارب يقول...

واندا

مراكب ايه ؟؟؟ مش مغلوشه ماليش دعوه

وحلو اوي رجعتيهم بمناسبة المولد دي
هههههههههههه

ماشي ماشي

الام لسه بقى دورها ما جاش صبرا يا باشا

والابهات هما يعنى عارفين انه ثمن الحب
هههههههههههههه

مش عارفين اكيد حضرتك

انا ابويا يا عينى ياما دفع تمن الحب لما كان اخواتي مخطوبين
اما انا يا اختي ما كنتش باعرف احب فى التليفون اصل كان دولي اغلب ا لوقت
ههههههههههههه

مش عارفه القصه دي مش عايزه تخلص ليه

صبرني يارب يقول...

ستار

والله يا اختي ما كان قصدي بجد
انا كنت ناويه على جزئين بس

يلا بقى بالشفا

صبرني يارب يقول...

ابو علي

لا ليالي الحلميه ايه

ليالي الحلميه كانت احداثنا سريعه يا راجل

دى مسلسل تركي تقريبا

صبرني يارب يقول...

بوبو

تسلمى يا جميل انتى الى خلتينى اكتب امبارح والله

بس برضه ما لحقتش اخلصها

ابقى طمنينا على عمرو بقى

صبرني يارب يقول...

خواطر شابه

هى مش زهقانه هو الى زهقان

وبعدين منين يجيبو الاسس المتينه وهو كان عمره 20 سنه

عموما لما نشوف اخرتهم ايه معايا

صبرني يارب يقول...

محمد فؤاد

نقلب المواجع ونقلب البطاطس يا باشا

اي خدمه

والله انا نفسي اخلص منهم زهقت منهم الاثنين
او الثلاثه (وش مطلع لسانه )
هههههههههههههههههه

نورت

صبرني يارب يقول...

الى موش عارف يتغير

نورت يا فندم ودايما تنورنا ان شاء الله

ستيته حسب الله الحمش يقول...

اما انا بتغاظ غيظ من ندى وتوفيق راسين ده
وتحسي كده ان شغلتها في القصة على المدفع برررررررررررررررررم


يعني هو بيحبها؟
والا مش بيحبها بس عاوز يستجدع؟
والا عاوز يستندل بس خايف من ربنا؟
والا ها ياخدها تخليص حق؟

ويظل السؤال عالق حتى الحلقة القادمة

صبرنا ياااااااااارب

مصري جدا يقول...

ما تجيبي مالاخر

هيتنيلوا يروحوا الأسم امتا

عاوزين نسترزأ بئا

صبرني يارب يقول...

مصري جدا

تصدق بالله

فكرت فعلا ؟؟

بس قلت بلاش شحططه بقى فى الاقسام وكده

ههههههههههههههههههه

صبرني يارب يقول...

ستوتي حبيبتى

هو كل دول مع بعض فى ان واحد هو نفسه مش عارف يحدد موقفه

ويصبرني والنبى اصل انا بجد ما كنتش متوقعه الاجزاء دي كلها

Anonymous يقول...

السلام عليكم
و الله القصة راااااائعة و واقعية فعلاً
و يبقى الصراع ما بين آدم و حواء قائماً للأبد :)
بس انتي في الأجزاء دي بصراحة بتفكريني في مُخرج مسلسل باب الحارة مش عارفة لو تعرفيه المهم لما جابوا معاه مقابلة و قالولوا : عايزين نعرف لو فيه جزء خامس أو سادس بعد الخامس اللي لسة مش جاهز ده؟؟ طبعاً الناس كلها متغاظة و عايزة المسلسل ده يخلص خلاص...
فهو بكل بروووود أعصاب و ضحك كدة ضحكة ساااااحرة قالهم: و الله ما بعرف أنا أصلاً ما كنت متوقع يكون في جزء تااالت بس الجمهور حب القصة و شكلوا مستمتع بالأجزاء دي و التقطيع فأنا من باب الحماس حسيت انو لازم يكون في أجزاء أخرى...
يعني في الآخر السبب من الجمهور و حبه للقصة!
و انتي أهو هتعملي زيو و هتعلقينا معاكي في الأجزاء دي بس خلاص بصراحة لازم القصة تنتهي بقى!
بس أنا أتوقع ان النهاية هتكون فُرااااق!
كل النهايات في الحب الحقيقي بتكون فراق _سبحان الله_ !!!

عموماً القصة حلوة و بهنيكي بجد عالتسلسل الجميل اللي فيها..


:) أنا رنا ...

الشعب لابد له من حكومه تشكمه يقول...

متخلصينا يا امى,,
انا خلقى ضيق,انا قلت مش بحب الاجزاء مفيش فايده قريت,

اما نشوف اخرتها مع الاتنين دول ايه دنا جالى ننح فى العقل.

صبرني يارب يقول...

شيما

يا بنتى بطلي تخشي عليا بمطوتك كده يادي الوكسه البنى

حاضر هاخلص يا سااااااتر ايه ده

صبرني يارب يقول...

رنا

هههههههههههههههههههههههه

لا والله يا جميل مش كده خالص بس هى بجد طولت مني حسيت انى دخلت فى تفاصيل كده ما كنتش ناويه عليها

انا ما شوفتش باب الحاره بس عارفه انا حركة المؤلفين بتاعة الجمهور عايز كده
هههههههههههههه

عشان انا الناس كلها هنا بيشدوا فى شعرهم عايزنى اخلص
هههههههههههههههههههههه

امال لو كنتى حضرتي معانا قلب ايمان الى كان تقريبا عشر اجزاء او حاجه

نهر الحب يقول...

شدتنى رغم انى لما اقرائها من الاول
شكلك كاتبة كبيرة وانا معرفيش

تحياتى واحبى
بقولك انا فى المنصورة لو فى فرصة نتقابل قوليلى

صبرني يارب يقول...

نهر الحب

منوره يا جميل المنصوره والى فيها

اوك اكيد فى فرصه نتقابل ولو ما فيش نوجدها يا باشا

بصي انا بكره عندي كورس فمش ممكن بكره

عموما بصي كلمينى بكره على تليفون اللقاءات انا هافتحه بكره عشانك يا جميل

الى هو ده 0126379796

لما تقري الرد ده قوليلى عشان اشيله بليز

انا عندي كورس بكره من 3 الى 8 فكلمينى فى اي وقت قبل او بعد يا جميل
ونتفق ان شاء الله

فتاه من الصعيد يقول...

هههههههههههههه

القصه فعلا موش عايزه تخلص ؟

بس جميل سردك على فكره :)

متابعين

تحياتي

لولا وزهراء يقول...

اول زياره لنا تقريبا
عجبنى الاسلوب اوى
ان شاء الله تتكر الزياره
عاوزه حد يعزمنى على الفرح ممكن

صبرني يارب يقول...

فتاه من الصعيد

شكرا يا جميل ومنوره دايما

صبرني يارب يقول...

لولا وزهراء

لا مش اول زياره بتهيئلي

وانا كمان زورتكم فاكره

وان شاء الله تنوروني دايما يا جميل

والفرح من عنيه حاضر بس نحدد العرسان مين الاول
ههههههههههههههه

reem يقول...

جزء رابع والتالت لسا اقراه دلوقتى

الاجزاء دى نزلت امتى

كدا امال لو مش كنا اصحاب كنت جيت في الجزء الكام
مش تعرفينى ياتوتة ان الاجزاء دى نزلت

عارفه انا كنت قلقانة اوى من تدخل ندى اصل في الحالات دى مرات كتير الصديقة تتدخل وكلها كم يوم وتلاقي الصديقة دى خدت الراجل
بس الحمد لله طلعت انا اللى شريرة وندى طلعت صديقة كويسة

في انتظار الاجزاء القادمة ياقمر

نهر الحب يقول...

انا فعلا رنيت عليكى يا قمر
ميرسى جدا لكى

Wanda يقول...

يوسفنى
ان اعلمك بفشل خروج الحملة الوندلية البحرية على شواطئ المنصورة
لاختطاف صبرنى و الاستلاء على منابع الفطير
و ذلك لسؤء الاحوال الجوية و اغلاق مصر لموانيها الساحلية الهجومية
:-((((((((((((((((((((((((((

لذا نهيب بسيادتكم مرعاة ظروف المقيمين خارج المنصورة
و التشهيل فى الجزء الخامس
قبل ان تشل المرارة الوندلية

ان لم يكن نابع من قلبكم الى عمل عمرة جديدة عند ميكانيكا الحب من يومين فليكن نابع من تهديدات و الحاحات المشاهدين اقصد القراء :-))

تحذير شوهد دخول بعد المعلقين للمدونة حاملين معهم كراتين بيض و اقفاص طماطم

و سمع همسة انه اذا لم تتواجد بعد من الرومانسية الناعمة فسوف يحطون السيخ المحمى فى ودن امجد :-((((

و قد اذعر من انذر

رحله البحث يقول...

صبرنى يارب انا عليكى
انا لسه لى 8 ايام فى الصحرا المنيله اللى انا قاعد فيها دى وشعرى طويل ومنعكش وعنيا حمرا ومش بانام ولا باكل ايه رايك بقى تعمليها مليون جزء اهوا كل يوم ادخل اقرى لى جزء
اعملى لك قافله
قصص الحب والسنسنه دى هتطول ما انتى عارفه انه مبيأكلش عيش
لا باهرج حلوه بس الجزء دا فى تمطيط زى مسلسلات رمضان خلى الاحداث اسرع شويه وفيها تشويق اكتر اصلى عرفت انهم هيرجعوا لبعض م الجزء اللى فات
هههههههه

صبرني يارب يقول...

ريم

يا بنتى ده انا غلبت انده عليكى على ياهو اقطع نفسي ولا ايه
ههههههههههههههه

بصي انا هاجي انا بنفسي احكيلك القصه ولا يهمك
ههههههههههههههههههههه

صبرني يارب يقول...

واندا

هههههههههههههههههههههه
حاضر والله اخلص الطبيخ واشد معاكم

صبرني يارب يقول...

ايناس

ايوه يا جميل معلش كنت ناسيه الموبايل ده فى الشنطه ما سمعتكيش

ولما صحيت اتصلت وانتى يظهر نايمه

هانلف حوالين بعض شكلنا
هههههههههههههه

صبرني يارب يقول...

رحلة بحث

طب بذمتك امجد ومروه ولا المسلسلات التركي

ايه ده ربنا ما يرضاش بالظلم
ههههههههههههه

فاضل 8 ايام فى الصحرا ما تقلقش ادينا بنسليك على ما ترجع بالسلامه
ههههههههههههه

أحمد عاطف يقول...

هو انا من رايي ان امجد يتجوز ندى باين عليها فرفوشة

انما البت مروة دي نكدية وبتعز النكد زي عنيها

وكمان ندى بتجيد اللعب مع الاسد ودا هيعمل حالة تغيير عند امجد ومش هايحس بالملل من تكرار الحياة

انا ابويا سنة 98 لما شاف فاتورة التليفون 960 جنية قال والله ما انا دافع يا ولاد الكلب

عشان تبطلوا حب في التليفون

اما ابوها فكان أذكى من ابويا لانه جاب الارقام اللي بيتصلوا بيها

وكانت النتيجة قطع العلاقات بين التليفونين

Wanda يقول...

الحقوا يا جماعة
صبرنى قال ايه
مش حتنزل القصة
قال ايه مش فاضيلنا
وراها عيد ميلاد
صبرنى :-))))

عيد ميلاد مين
عيد ميلاد صبرنى بذاتها
شخصيا
ايوه

وش بيغمز ايه رايك فى الحملة الهجومية ديه :-)))))))))))))))))

كل سنة و انت و الصبر كله بخير :-))
و عقبال الف رومانسية دائما
الى الامام يا روميل :-)))

كيكى عوووووو يقول...

ربنا يصلح حال امجد ومروة ياااارب
وكل سنه وانتى طيبة ياجميل
يلا بقى فين التورته والحركات

صبرني يارب يقول...

احمد عاطف

هههههههههههههههههه طيب بابا عنده حق والله

انا بقى ابويا الغلبان كان بيدفع وامره لله

ومره وانا متجوزه قعدت عندهم 7 شهور دفعته 500 جنيه نت وحياتك
هههههههههههههههههههه

اصل احنا كنا بنحب رسمي ايام الخطوبه يعنى

بس مش انا اخواتي انا ماليش فى التليفونات

وبعدين احنا كلنا بنات هايقولنا مش دافع طب وبعدين
ههههههههههههههههههه

اما ندى فلا مش هاجوزها لامجد وعليه تبقى ندى فاضيه
اكلمهالك ؟؟؟
هههههههههههههههههههه

صبرني يارب يقول...

واندا

فضيحه اجتماعيه

جائزة احسن تصييح فى البلوج

هههههههههههههههههههه

وانتى طيبه يا قمر ربنا يخليكى ليا

صبرني يارب يقول...

كيكي عوعو

يارب يصلح حالهم يارب

ميرسي يا جميل وانتى طيبه وبخير يارب

لاااااا انا السنه دي اول مره اقول مش عامله تورته لنفسي احترموا نفسكم حد يعملى او يجيبلي ماليش دعوه

ههههههههههههههههههههه

عليكم بقى التورتات

Cute Kitty **sookra يقول...

كل سنه وانتى بخير ياجميله وعقبال مليون سنه
انا عاوزه كب كيك
ماليش دعوه

فاتيما يقول...

الأجزاء دى عاوزة روقان يا صبصب
و هقرهم على مهلى
معلش

انما لكن اساسى دلوقتى
انا عاوزة اقولك

كل سنة و انتى منورة قلوبنا
يا ست الكل انتى

و عيد ميلاد سعيد
و مش عاوزة اعرف الكاااااااااااام ...بس على قده و زيادة
خدى بوسااااات و حضونات يا حبيبتى

كل سنة و انتى طيبة يا صبصوبتى

لولا وزهراء يقول...

كل سنه وانتى طيبه
يارب عيد ميلاد سعيد
ومية سنه فى سعاده وهنا ياااااااااارب

زهراء

ستيته حسب الله الحمش يقول...

كل سنة وانتي طيبة يا جميلة
هابي بيرثداي تو يووووووووووووووووووو

اوعي تعملي تورتة النهاردة
اياني واياكي
النهاردة انتي ملكة وهم يتصرفوا من بره
هم فاهمين بقى
كل اللي انت عارفه يا عم تهامي باشا :)

ربنا يسعد قلبك دايما يارب