الأربعاء، 3 مارس 2010

اهلا بكم فى البيت الجديد

سلام عليكم

ازيكم يا اصدقائي الاعزاء

طبع انا لسه باقولكم اسفه على القلق الى سببته لكم  والله غصب عني

وعشان انا ما باحبش اكون مثار غموض وقلق ومين وفين ازاي

وناس كتير سألوني مين ضايقك لان الواضح الجلي طبعا انى بامثل فيلم الهروب الكبير وكده يعنى

الحقيقه هي كده برضه وانا فعلا هربانه وفعلا فى ناس ضايقتنى بس مش من المدونين اطلاقا

الحقيقه انى غلطت غلطة عمري وكنت دايما باحب ادي  مدونتي لكل الناس الى اعرفهم من عيلتى وكنت بافرح انهم متابعينى

وده لانى تقريبا متخلفه عقليا او هبله او مجنونه رسمي

الحكايه دي عملتلى مشاكل كتير  كتير كتير فى العيله الكبيره الطويله العريضه الكتيره الخنيقه 
وبقيت حاسه ان كل واحد متبرع انه يحط ايده على بؤي وانا باتكلم وباكتب
وكل واحد شايف انه مافيش مشكله انه يوجهلي نقد بشكل سخيف جدا
وكل واحد شايف ان من حقه بل من صميم اختصاصه التعديل فى حياتي

 وخلاص بقى زهقت من الموضوع ده جدا جدا ومش قادره استحمل القرف ده

واساسا اساسا القلب مش ناقص والحكايه مش مستحمله بقى 

فانا قلت ااثر السلامه واهرب من هناك واغير اسمي واسم المدونه ومكاني

وهى دي الجريمه الكامله

وقد كان  ومن فضلكم بعد كده تكلموني باسمي الجديد وتحفظوا المدونه عندكم بالاسم الجديد  عشان مش عايزه لخبطه ما تبوظوش الخطه بقى

مش عايزه كلام من نوع استسلمتى و كنتى كبري دماغك والكلام ده

عشان كل ده حصل وانا استنفدت كل الطرق والمحاولات الى اقدر عليها وخلصت خلاص

انا عارفه انى جايز هاخسر قراء ومتابعين باعتز بهم لكن عسى ان تكرهوا شيئا وهو خير لكم

بس والله العظيم يا ناس انا كنت بارد على اميلاتكم وانا حنفيات الدموع شغاله على اخرها

طبعا اصحابي وحبايبى والى اميلاتهم عندي اصلا انا بعتلهم وصله من المدونه على طول

وعليه اكتر الرسايل الى جاتلي على الميل من حبايب ما اعرفهمش منهم مدونين ومنهم غير مدونين او حتى اعرفهم بس ما كنتش اعرف انهم متابعينى ولا ان يهمهم يعرفوا مدونتى الجديده عشان لسه يتابعوني

حقيقى ما كنتش متوقعه  يا جماعه والله  وانا متشكره اوي اوي اوي  بجد انكم هنا ومعايا

شكرا يا اصدقائي
وشكرا لكل الناس الى قلقت عليا وكلموني على الميل او بعتوا اميلات او اتصلوا  متشكره اوي اوي بجد

ويارب دايما منورين حياتي

وطبعا البوستات ا لقديمه انا هانقلها ان شاء الله هنا كلها
وكنت نقلتها بس كانت فى مشكله فيها مش فاهماها فشلتها وهاعيد الشغل من الاول

طبعا محتاجه يجى شهر على  ما اظبت التمبلت واللوجوهات واللينكات

برضه يا ولاد النقله مش سهله
الواحد نقل 3 مدونات بسلطاتهم وبابا غنوجاتهم

وللمره مش عارفه الكام
شكرااااااااااااااااا

هناك 41 تعليقًا:

ستيتة يقول...

مودمواذيل ندى الياسمين

من النهاردة ده اسمك الرسمي عندي :)

على العموم انا جايبة لك سجادة شيرازي اصلي لزوم الفرش الجديد

يارب بس ترتاحي واحنا يهمنا ايه غير راحتك يا قمرة

اهو يا مودموازيل حتى العتبة الجديدة ليها بهجة وشرحة كده وبرحة وريحها حلو

والمدونات يا اوختشي اعتاب
عتبة الهنا ان شاء الله

ستيتة يقول...

ايوووووووووووووون احب كده اكون اول تعليق واول زائر واول سجادة واول زيرو تسعمية في الشوقة الجديدة :)

غير معرف يقول...

جيييييييييت ووووووووووووسع

ازيك يا ندى
مشيها ندى عشان بيفكرنى باسم بنت عمى

الحمد لله انك تمام

وتصدقى موضوع ان حد من العيلة او كده يبقى عارف المدونة احيانا مش بيساعد الواحد يكتب بحرية

ربنا معاكى فى ترتيب المدونة بقى وفرشها ولو احتاجتى اى مساعدة اوعى تطلبيها منى هههههههههههههههه

sony2000 يقول...

معلش بأذن الله هتكون الجديده وشها حلو عليكي بأذن الله
اصبري وربنا بأذن الله هو اللي هيحلها من عنده
تقبلي مروري وتحياتي

adel يقول...

سيبك انت ياندي ياخوتشي ولا يهمك
وعليا اديكي نسخة من المطوة اللي معلقها عندي علي باب المدونة
اللي يكلمك افلقيه نصين
عالم تخاف و تجيب ورا :):)

جنّي يقول...

السلام عليكم

اهلا بيكي في بيتك الجديد ..

وان شاء الله تكون عتبة خير ..

منتظرين بوست جديد..

تحيتي وسلامي

shimaa elkholy يقول...

ستييييته حياتي

مودمواذييل يا ستيته هاو كام

واودي العيال فين الملجأ
ههههههههههههه

ميرسي على السجاده يا ستيته ربنا يخليكى يا جميل

ونوووووووووورتي اول تعليق واول بوست فى الموطرح الجديد

shimaa elkholy يقول...

ستار

والله يعنى لو حد ياخدها كده يوضبها ويجيبها تبقى تمام اوي
ههههههههههه
نورتي يا جميل
ندى ندى ماااااااشي

ما كانش قصدي وربنا رضا هو الى اختار الاسم

نورتي يا جميل

shimaa elkholy يقول...

سوني

كله على الله طبعا

متشكره اوي وان شاء الله يكون وشها حلو

shimaa elkholy يقول...

دووووووله

هات بسرعه النسخه هاتي ياعم اثنين تلاته

والله ما يستاهلوا الا كده

نورتي يا باشا متشكره اوي

shimaa elkholy يقول...

جني

استاذ سعيد ربنا يخليك متشكره اوي ومنور والله

هتشوفوا يقول...

انا اتفكرت انك استعريتي من اسمك( رغي امرأة غير مطحونة) وحبيتي تغيريه, عادي كل الناس من حقها تغير اسمها خصوصا لما يبقى يعر, ده كان عصيدة شعر يلا في داهية الاسم, المهم انتي

طب مكنتيش عارفة تموهي الجماعة يعني بدل, رغي امراة غير مطحونة, يبقى لت امراة غير مطحونة برده او في طريقها للطحين أو يفضل هو هو بس يبقى رغي مودمواذيل غير مطحونة وبكدة عمرهم ما هيعتروا عليكي لأنك بعتيهم في حتة تانية خالص بس لازم زي ما قولتي تودي العيال الملجأ

ندى الياسمين شاعري قوي

الازهرى يقول...

يعنى بالعقل كده من بين كل الأسماء اللى ربنا خلقها مفيش غير ندى
يعنى مغلبانى هنا فى البيت وفى التدوين كمان
ما انا عندى أختى الأصغر منى اسمها ندى برضه بس مشكلة
دماغها شغال 24 ساعة
وأنا بأحب أريح دماغى لما أكون فى البيت حبتين
بس على مين

ما علينا الحمد لله
نمشيها ندى وربنا يستر

الازهرى يقول...

بالمناسبة أسهل طريق يوصل بيه أى حد غير مرغوب فيه
إنك تنقلى القديم هنا
كده وببحث بسيط يقدر يوصل

إنما ممكن تخليه هناك وتعملى رابط بسيط هنا يوصل له

shimaa elkholy يقول...

هتشوفوا

لا ما انا قلت بقى ابعد كل البعد عن الاسم مش عايزه خالص اسمع عنهم حتى

شاعري اه

ما كانش قصدي اسعدكم بصراحه

بس هى جت كده

نورتنا

shimaa elkholy يقول...

الازهري

والله ما كان قصدي يا اخويا
هههههههههههههههههه

عموما انا ما نزلتش وصلة المدون على السيرش

وكمان المشكله يا سيدى اصلا فى البوستات القديمه

تخيل قاعدين يقلبولي فى البوستات ويطلعولي حاجات قديييييييمه من سنتين مثلا
فلازم الغي كل الى هناك اصلا

وانا جربت بالسيرش بالاسم وكده
ما جابش حاجه

منور يا ازهري وسلملي علىندى

سمع هوص (Abo 3li) يقول...

اولا مبروك علي العتبة الجديدة يا... يا... يا... الواحد مش عارف يقولك ندي ولا ياسمين؟؟

ثانيا.. انتي متأكدة ان النا ال انتي هربتي منهم مش هيقدرو يوصلو للبلوج الجديد؟؟؟؟ وخصوصا بعد اعلانات الهجرة ال في البلوج القديم...
عموما متقلقيش.. احنا ستر وغطا ... وانا عن نفسي لا مومكن لامومكن ابدا اعترف ...
ولا حتي بعد القلم التالت... لو انضربت الرابع.. هقر... م انا مش هستحمل... هعهعهعهعهعه...

مبروك كمان مرة وربنا يجعلها قدم السعد ان شاء الله...

تحياتي ياندي
تحياتي يا ياسمين

غير معرف يقول...

بقالى ساعه بحاول ابعت تعليق

يا ترى ده هايوصل و الا زي اللى قبله

مبروك يا ندى

و ان شاء الله تكون قدم السعد عليكي يا ياسمين

و تبقي فله عليكي

يلا جنينه بحالها اهو

Remas يقول...

صباح الخير يا ندى ياقمر

ولا تزعلى نفسك ياتوتة

اكيد خير ياقمر والتغيير في حد ذاته حلو والله

وان شاء الله المدونات الجديدة يكون وشها حلو عليكى

المهم تكون مبسوطة ومرتاحة

وانتى اصلا منورة وعسوله في اى مكان وبأي اسم ياتوتة

بسنت صلاح الدين يقول...

ازيك يا قمر و كمان ندى و ياسمين ياستى حصلتلنا الرقه و الدلع ،،، عاوزه اقولك ان ندى اسم غالى عليا عشان اسم اختى صحيح هى مطلعه عينى بس زى بعضه ،،، مبروك على المكنه الجديده يا معلم " جياباها من الباطنيه " ههههه ، اى مساعده احنا فى الخدمه فرش ،،، تلميع ،،، نرص معاكى حاجه كده ولا كده انتى بس شاورى

mrmr يقول...

ازيك حبيبى
بصراحه انتى فتحتى عنيا على شى كان بعيد كل البعد عن تفكيرى وهو انتشار المدونه وسط العيله وانا كنت اخذت خطوه فى انتشارها وسطهم لكن انا ح اعمل زيك مش ح اغير اسم المدونه لا مش حقول لحد من العيله عليها اصلا وده علشان اوفر على نفسى النقد والكلام الكتير
ان شاء الله تكون عتبه جديده سعيده عليكى وذى ما بيقولوا على شراء العقارات ربنا يجعلها عتبه خير وسعاده
واقبلى تحياتى

shimaa elkholy يقول...

ابو علي

قول الاثنين ندى الياسمين
هههههههههههه

وبعدين يا جدع انا لو منك هاقول من اول قلم اصلا
ههههههههههههههههههه

ماهو اناعارفه امكانيات الناس الى انا هاربانه منهم ما تقلقش

وربنا يستر بررررررضه

shimaa elkholy يقول...

بيبو

انت ياعم الى النت عندك بايظ فى بلاد الواء الواء بتاعتك دي

الف شكر يا بيبو على الجناين بتاعتك

ونورت

shimaa elkholy يقول...

ريم

يا ولاد موش معقول الست دي بتدلعنى بزياده

مرسي يا جميل وحشاني يا بنتى جدااااااا

shimaa elkholy يقول...

بسنت صلاح

الرقه والدلع

والله ما كان قصدي يا اختي اسعدكم
ههههههههههههههه

هى جت كده يلا بقى الناس هاتتخم فيا باين
ههههههههههههههه

والله الواحد محتار يرص ويلمع فين ولا فين

اصلى باوضب فى الشقه اليومين دول يعنى نقل من كله يا اختي
هههههههههههههههههه

يلا هاتي المدونين كلهم وتعالوا حبه على المدونه وحبه فى الشقه عشان نخلص يا اخونا والنبى

shimaa elkholy يقول...

مرمر

ااااااااااه اوعي يا امي

غلطة عمري والله ما كنتش اعرف الى هايجرالي

ده مجتمع يجيب الضغط والسكر وكل امراض العصر والمغرب والله

خليكى فى حالك كده احسن

نورتي يا جميل

غير معرف يقول...

مبروك الاسم الجديد
على فكرة التغيير مطلوب
التغيير دلالة على الحيوية والنشاط
عبد الجليل

shimaa elkholy يقول...

شكرا يا استاذ عبد الجليل ربنا يخليك

طيب ادينا بنتنشط اهو

نورت يا فندم

سواحة يقول...

يعنى مندهليكيش بدردر :-((
طيب ممكن نفرتت :-))) او كليبوترر؟؟؟ اختارى

انا قولت اجى اغلس و اطلب من نوتى تطلعنى من الثلاجة شوية
و تقطعنى حتت و تقلينى فى الزيت
بس ايه الاقى بوست نزل و انا مادراش
طيب يانوتى
انا حوريكى عفاريتك

:-)))))))

غير معرف يقول...

منورة مكانك الجديد ياقمر

ربنا يجعلها عتبة سعد عليكي يارب

ندى الياسمين

ندى الياسمين

سووري بجرب بالاسم وبحفظه ههههههههه

اسم جميل جدا

والصراحة معك حق تعزلي طبعا انا حاسة فيكي وفاهمة خنقة العيلة انا محدش خالص يعرف مدونتي من العيلة بس جوزي ومش بيدخلها خالص الحمد لله هههههه

وخصوصا عيلة جوزي لانهم حاسين باني شاذة عنهم لاني بفهم للكمبيوتر والنت :]

عالعموم ياحبيبتي متزعلش ولا تحرقي دمك

وان شاء الله هتكون عتبة الهنا

واحنا بنحبك هنا وهناك ولا في افريقيا حتى :)

غير معرف يقول...

ندى الياسمين :)
حلو أوي الإسم زي حلاوة روح صاحبته و التغيير حلو :)

ألف مبروووووووووووووووك و يجعلو عامر في اصحابه :))

آسفة والله انا بعرف اني مقصرة كتيييير معك و بصراحة تقصيري نسبة كبيرة منه كسل ما الو معنى (وش مكسووووف ) :))

بس خلاص أوعدك اني مش هغيب تاااني و كمان مدونة الطبيخ بتاعتك بتفيدني أوي بصراااحة :)

سلااام يا عسل :)

رنا :))

shimaa elkholy يقول...

واندا

ايه ده ان شاء الله انتى مش حاطه المدونه عندك فى الريدر ولا ايه

نو نو نو اعترررررض انا

وبعدين نوتي مستحلفالك اصلا
ههههههههههههه

منوره يا جميل

shimaa elkholy يقول...

نواره

تسلمى يا جميل ربنا يخليكى

تصدقى بقى ان مش عيلة جوزي هى الى عامله المشاكل ده عيلتى انا

اااااه يا نفوخي يلا حسبنا الله ونعم الوكيل

نورتي يا جميل

shimaa elkholy يقول...

رنا

حبيبتى منوره يا جميل

عامله ايه والله واحشاني انا مش عارفه اركز اميلك ايهم الى عندي اصل انا عندي كذا اميل اسمه رنا

منوره دايما يا جميل ربنا يخليكى

أحمد عاطف يقول...

مبروك عليكي ياست ندى الياسمين الشوقة الجديدة

اجيش ابيض لك الحيطان

لا ومحبة وجدعنه مش هاخد منك فلوس

طيب والعفش ايه نظامه

ياختي سباكة الشوقه كلها عايزة تتغير

ربنا معاكي

shimaa elkholy يقول...

احمد عاطف

المشكله الحقيقه ان انا فعلا باوضف فى الشقه الحقيقيه

وعشان التجديدات لا تاتى فرادى

الوندوز ضرب كمان

بتهيئلي افجر المنطقه اسهل

نورت يا احمد

Humman being يقول...

أنا قاعدة أقول ياربى مين ندى الياسمين دى.... بس ساعة ما شوفت نوتى الفتانة عرفت علطول
مبرووووووك النقلة الجديدة.... ويارب يكون قدمها قدم الخير... وبعدين مبعتليش أساعدك ليه؟؟؟ احنا مش ولاد بلد واحدة

المهم الموقع الجديد على المشاية ولا لأ زى ما طلبت... وشرحة وبرحة كدة زى ما قلتلك؟؟!!ههههههههههه

ما تضيقيش نفسك من حد ولا من حاجة...وخدى بالك من نفسك ومبرووووك البيت الجديد يا ندنودة

shimaa elkholy يقول...

ياسيدى على الاسامي بقى
ندنوده

شوف ازاي

اظاهر انا هاحب اسمي الجديد الى مش قادره احبه
وباقف البص على تعلقات واقول مين دي
انا مش عااااارفنى


مرسي يا جميل ونورتي

عمرو جويلى يقول...

السلام عليكم
تشرفت بزيارة حضرتك لمدونتى
أما عن المجاملة فهى مطلوبة ولكن المغالاه فى المجاملة فهذا هو المرفوض وأنا قصدت المغالاه فى المجاملة
ومبروك البيت الجديد ومتابع جديداً بمشيئة الله تعالى
خالص تقديرى

shimaa elkholy يقول...

عمرو جويلى

يا فندم ربنا يخليك متشكره اوي

حضرتك نورت

انا بس حبيت اوضع حكاية المجامله دي عشان بقيت الاقي ناس تتكلم بقلة ذوق ووقاحه بدعوى الوضوح والصراحه وده مش صح طبعا

متشكره لحضرتك ودايما تنورنا

غير معرف يقول...

العيلة وصلت هنا ..ايه رأيك؟؟
منين ما تروحي وراكي
مفيش جريمة كاملة
تدفعي كام وما أعرفش حد؟؟؟؟؟؟