الاثنين، 10 مايو، 2010

نظارة شمس


سما
طول عمرها ما بتحبش تلبس نظاره شمس بتحس انها بتخنقها وما بتخليهاش تشوف الدنيا كويس بالاضافه انها بتكتم على نفسها فى الحر وتحررها

فقالت طب حل وسط انا اجيب نضاره جراي  فتبقى فاتحه وتشيل شويه الشمس وفى نفس ذات الوقت تكون شايفه الدنيا كويس
بس لقت ان النظاره الجراي مش بتشيل عنها برضه ضوء الشمس الشديد خصوصا فى ظهر يوم صيفي حار
وبرضه كاتمه على نفسها هياها بقى  فبطلت برضه تلبسها

بس هى اصلا كانت طول عمرها ما بتخرجش كتير من بعد ما خلصت الكليه بقت تخرج قليل وبالليل ايه هايخرجها فى عز الحر ولا فى الشمس الحارقه  مافيش حاجه ضروريه للدرجه دي كله ممكن يتعمل بالليل

اه قصدكم زمان وهى لسه فى الجامعه مش فاكره ما كانش ضوء الشمس بيضايقها للدرجه  جايز عشان قلبها كان اخضر كانت حابه نور الشمس وعوده طري كان ما يهموش الرياح    احتمال برضه

المهم تروح الايام وتيجى وتضطر سما انها تخرج كتير وفى الشمس الحارقه

وفى مره كانت عنيها تعبانه جدا من مشوار فظيع عملته امبارح وحاسه جلد جفونها تعبان مش قادره وكانت لازم تخرج تاني وتواجه نور الشمس تاني

فاشتكت حالها لاختها  اختها قالت لها انتى عبيطه ولا ايه ما تلبسي نظاره شمس هاتريحك
وبعد مناقشات وشرح من سما لاختها انها ما بتحبهاش وليه...  اقتنعت سما برأي اختها على مضد بشكل مؤقت  وخدت منها نظاره تجربها النهارده بس وهى بتقول لنفسها انا عارفه انى مش هاطيقها  غير كام دقيقه

وفعلا كل شويه سما تزهق من النضاره وتشيلها بس تاني ترجع الشمس تلسعها فترجع تلبسها

بعد كام يوم سما اشترت نظاره شمس من اول محل نضارات قابلها وجابتها المره دي غامقه

واتعودت عليها بقى ساعات بتزهق منها وتشيلها دقايق لكن بترجعها تاني

اكتشفت سما ان الدنيا مختلفه بالنظاره الشمس
احساس غريب انك تكون شايف الناس وهما مش شايفينك

كأنك بتتفرج على الناس الى حواليها من كاميرا تجسس وبتشوف هما بيبصولك ازاي او حتى بيبصوا لشخص تاني  ماشي جمبك ازاي

ايوه ماهو الناس مش بيبقوا شايفين عنيك بتبص فين

هو صحيح الدنيا بالنظاره بتبقى قاتمه والنظاره بتمنع الضوء الشديد والتراب  اه بس  كمان بتمنع الهوا

بس تخيلوا بعد فتره سما بقت تحب اوي تلبس النظاره  لدرجة انها لما بتخرج بالليل بقت نفسها تلبس برضه نظاره شمس

اصلها كانت بتستخبى فيها

يعنى مثلا طبيعى لما تركب  تاكسي  ساعات  تشيل النظاره عشان الضوء بيكون اقل وفرصه عنيها تشم شوية هوا

تلاقي سواق التكسي السخيف حاطط خمستاشر مرايه  وعامل زي الى بيشتغل فى المخابرات وبيراقبها

تقوم تآثر السلامه وتنزل النضاره على عنيها وتلزق وشها فى الشباك  هروبا من السخافات  واملا فى ان شوية هوا يدخلوا من الشباك ويعدوا من تحت النظاره

تفتكروا النظاره دي افادت سما ولا كتمتها

تفتكروا سما احلى بالنظاره ولا من غير النظاره

تفتكروا  ممكن فى يوم سما تدمن النضاره وتفضل لبساها ليل ونهار وحتى جوه بيتها ؟
طب تفتكروا لو ده حصل هى هاتستحمل

تفتكروا سما لو حبت تستغنى عن النظاره هاتعرف ؟؟ هاتقدر ترجع زي زمان ؟؟
ولا خلاص القلب الاخضر ما بقاش اخضر  وبقى يهرب من الشمس خايف تحرقه  وعوده الطري شد ونشف وبقى يهرب من الريح لتكسره ؟




هناك 25 تعليقًا:

صيدلانيه طالعه نازله يقول...

و الله مش سما بس اللى عودها الاخضر شد و نشف
كلنا بقينا كده
كلنا بقينا بنخاف نواجه و بنستخبى خلف ميت نضاره شمس
كلنا بقينا بنهرب من حقيقتنا و عايزين ميت حيطه تبعدنا عن الناس
مش سما لوحده و الله يا ندى

ندى الياسمين يقول...

اه يا صيدلانيه بجد

حقيقى ما عدناش زي الاول

تفتكري يا بت احنا عجزنا

فشر يا خووووووووونه هما 18 سنه برضه


نورتي يا جميل

ستيتة حسب الله الحمش يقول...

اللي زي سما متعرفش تستخبى ورا نضارة شمس
مهما اجتهدت
مهما اعتقدت ان عودها شد ونشف
نضارة الشمس ليها ناسها
الناس التي تعشق احادية التعامل
افهمك ومتفهمنيش
اعرفك ومتعرفنيش
فكرتيني بإحسان عبد القدوس وروايته العبقرية

جنّي يقول...

السلام عليكم

سما كانت تتخذ رفض النظارة تكأة لعدم خروجها نهارا خوفا من المواجهة وان كانت لا تقر ذلك صراحة ولكنه في العقل الباطن لها .. وحينما خرجت مجبرة ارتدت النظارة لعدم المواجهة .. سواء وجدت النظارة او لم توجد فستظل سما تخشى المواجهة وجها لوجه ..

هذه رؤيتي قد تخطئ وقد تصيب ..

تحيتي

:) QŁp 7āZēŋ يقول...

بصى انتى تبعتيلى سما وانا هتصرف
هههههههههههههه

لو بتخاف من المواجه هتفضل ورا النضاره المظلمه
انما لو كوول ع طوول وبنت فريش ووشها مبيكرمش
هتشيل النضاره من ع عنيها وتبص للحياه بنظره جديده
يارب تكون فهمانى

محمد عبد الغفار يقول...

أى شئ غير اصيل فى الأنسان يمكن تغييره واعاده تغييره مره اخرى كمان
سواء النظاره او نفسها

غير معرف يقول...

متهيقلي لا خلاص القلب الاخضر ما بقاش اخضر وبقى يهرب من الشمس خايف تحرقه وعودها الطري شد ونشف وبقى يهرب من الريح لتكسره
اعتقد كده
وياما الدنيا بتعلم

فاتيما يقول...

صباح الخير علي الجميع

يا جماااااااعة
أنا بعتذرلكم بشدة
لأن حد ابن حلال
دخل مدونتى
و بعت لينكات
و نشر بوست بشع عليها
و أذى مشاعركم
و عيونكم


انا شيلت الحاجات
دى خلاص

و حطيت بوست جديد
عشان اشرح فيه اللى حصل
بس مش راضى يطلع ف الريدر


معرفش ليه؟؟


المدونة شكلها
فيها مشاكل فنية


انا غيرت الباس ورد القديمة
لأنها كانت سهلة
و غالبا ابن الحلال خمنها
و تخمينها نجح
أخويا عملى باسورد
جديدة معقدة
و عالله اللى دخل دا
ميعرفهاش هيا روخرا


و أختكم بخير
متقلقوش
ماما بس جالها حالة هلع
و عشان كدا
مش هفتح المدونة تانى
الا لما أعرف اصلح اللخبطات دى


الناس اللى إتبعتلها لينكات منى فيها سخافات
معلش .. بجد معلش


و عاوزة أشكر خيخة جدااااا
و علا صيدلانية طالعة نازلة
و بطوط حبوب و خالد همس
و د.ستيتة و وندا
و كل حد نبهنى و كلف خاطره يتصل
من الساعة اربعة الفجر
لحد كتابة التعليق دا

منحرمشى منكو

وأسفة للمرة التانية

ندى الياسمين يقول...

ستيته

انا كمان افتكرت الروايه

عشان كده باقولك سما ما بتحبش النضاره بتخنقها وبتضايقها وبتفضل كل شويه تقلعها وترجع تتعب وتلبسها

نورت يا جميل يا قارينى انت

ندى الياسمين يقول...

جني

انا قلت يا استاذنا انها ما كانتش اصلا عندها حاجه تخليها تضطر تخرج كتير لفتره من الزمن

انما هى كانت زمان بتخرج وبتواجه وبتقدر

بس لما اضطرت خرجت ورجعت تواجه بس ما قدرتش تستمر
وما زالت بتعافر وبتشيل النظاره كل شويه

انا شايفه انك ظالمها بالخوف من المواجهه لانها مشكلتها اصلا المواجهه زياده عن اللزوم

وطبعا قد اخطيء انا وقد اصيب
:)

تحياتي يا استاذ سعيد ونورت

ندى الياسمين يقول...

قلب حزين

ابعتهالك فين ؟؟ عندك نضارات طيب ؟


الموضوع مش خوف من المواجهه

الموضوع زي ما وصفته قلبها ما عادش مستحمل الناس

ومافيش حد بيقدر يفضل فريش وكول طول الوقت

والحياه اصلها دمها تقيل اصلا مهما تبصلها شمال ولا يمين هى كده :)

تحياتي ونورت

ندى الياسمين يقول...

محمد عبد الغفار

هى ما عرفتش تغير نفسها فقالت طب اخبيها وخلاص ولو جزئيا ولو شويه

صدقنى كتير بتحتار هى الى صح ولا هما بس كده ولا كده هى مش عايزه تغير نفسها ولو حاولت مش هاتقدر

نورتنا يا فندم

ندى الياسمين يقول...

غير معرف

الدنيا بتعلم فينا ولا بتعلم علينا ؟؟

وانا شايفه ان بجد القلب ما عادش قادر يشيل

منوره يا جميل

ندى الياسمين يقول...

فاتيما

حبيبتى معلش المؤمن مصاب

وانت يا بطوط برضه الناس بتحب مفلفل الشعب كله

والله لو نزل ايه على مدونتك مش هانصدق انه انتى يعنى اكيد

وابن التيت ده حسبى الله ونعم الوكيل فيه

بس عندي نصحيه بالنسبه للكمبيوتر هاجي اقولهم ليكى هناك بقى عشان تقريهم اكيد

sony2000 يقول...

ممكن ان الدنيا تعجبها من ورا النضاره
بس اللي متعود يكون من غير نضاره شمس
هيرجع لدنيته تاني
فلا تقلقي

لـــولا وزهراء يقول...

يمكن الدنيا من ورا النظاره يقدر الواحد يشوفها على حقيقتها وماحدش قلبه اخضر اطمنى كل الناس كبرت اوى حتى الاطفال طفولتهم تم اغتيالها

العيسوى الصغير يقول...

لو هربت من الشمس شوبة شويه هتهرب من الميه والهواء

ندى الياسمين يقول...

سوني

تفتكري هى قلقانه احسن ترجع ولا قلقانه احسن ما ترجعش

حليها انتى بقى
هههههههههههههههههه

ازيك يا جميل عامله ايه

ندى الياسمين يقول...

لولا وزهرا

كده يا زهرا خليتى الدنيا كلها سودا
ههههههههههههههه

بس عندك حق اوقات بتحب تشوف الناس وهما مش سايفينها

ندى الياسمين يقول...

العسوي

المشكله النظاره تشيل عنها كله مايه وهوا بشكل مؤقت

بتشيل الضوء الشديد الى بيتعبها بس بيشيل الهوا الى بتتنفسه

تحيات يا عسوي ونورتنا

جنّي يقول...

السلام عليكم

انت سألتي وانا اجتهدت .. واظنك اجبت ان مشكلتها اصلا المواجهة زيادة عن اللزوم .. وهذا ما فهمته من البوست وانتي اكدتيه في ردك على التعليق ..

وبعدين انا عايز اعرف لحد امتى مش ناوية تنورينا في المدونة .. انا ساكت بس بمزاجي وبعدين ها اشتكيكي ومش ها الاقي الا الاستاذ ابو رياض اقوله .. ولا فيه حاجة في المدونة مزعلاكي قولي والله وانا امسحها حالا ..
معلش كلامي دا من العشم ..

مع السلامة

ندى الياسمين يقول...

جني

يا خبر والله العظيم بيبقى غصب عني

يعنى انا بيقع مني بوستات كتير والله للناس

ما باخدش بالي منها فى الريدر

انت عارف السن وكده
هههههههههههههههه

حالا هاكون هناك

Wanda يقول...

متخفيه بنظارة
هى فكرة نفسها الولد الثقيل :-))

الحاجز الاسود ده بيبعد البنى ادم فى ظلام نفسه و بيبعده عن شمس الاخرين

خليها تقلع النظارة احسن و تكشف عيون صح

او تلبس عدسات ملونة :-)))))))))))))

دردر انت لسه بتذاكرى ؟؟

ندى الياسمين يقول...

وندتي


والى تعب من الناس وشمسهم وترابهم يعمل ايه

وحشاني اوي يا جميل

خلصت امتحانات يوم الخميس يا اختي عقبالك

بس لسه باحاول استعيد حياتي باعمل ريفريش

re7ab.sale7 يقول...

اها انا مش بحب البس نضارة خااالص برغم اني الدكتور نصحني بيها عشان الشمس بس لاء مش بحبها
برغم اني كتير بتعب من اني حد يشوفني يقولي الله عنيك حلوين شباب وبنات
بس بردو ا لاء
بحس اني بعمل لنفسي دنيا تانية
مختلفة , لكن مش حقيقية
حلو اووي الموضوع