الجمعة، 23 يوليو 2010

ملخص لقاء المنصوره

كان  ياما كان كان فى ناس عملوا تبرع بالدم ولقاء وبعدين ندور علىالدم يا اخوانا لا ممكن مش لاقيين دم يا جدعان طب شوية دم
يا جمعه طب كل واحد نص كوبايه  بلاش نص لتر لا ممكن ابدا ابدا

هههههههههههههههههههه

ايوه والله هو ده الى حصل النهارده

الاول حقيقى اليوم كان هادي وجميل فعلا وميرسي يا ساره على التجميعه الحلوه دي بجد

نحكي بقى  على الى حصل

طبعا احنا اتقابلنا عن المستشفى الساعه عشره
انا روحت لقيت هناك ابراهيم  ودعاء سلطان  قلتلهم اه يا خوفي منك يا بدران شكلنا هانبقى احنا بس
هههههههههههه

شويه بدأنا فى الاتصال بالناس وبدأوا يجوا

جت ساره طوبار وامجد القهوجي وتوالي باقي الحشد الى هاقوله لكم دلوقتي

ساره طوبار محاولات للبحث عني
امجد القهوجي  (مش فاكره اسم المدونه  :)
اسماء   مدونة حفلة تنكريه
محمد الغرباوي  رحلة بحث
ابراهيم العدوي  كأنى اتكلم
دعاء سلطان مجرد حلم صغنتوت
سما  ليساندرا
ايناس  نهر الحب
نسمه  (برضه نسيت  اسم المدونه :)
 داليا   قوس قزح
استاذ شرين الكردي
ألاء   ستيل سيرشنج
وهيثم المغنى الجميل وعازف العود الى ساره دعته والى ظبطنا الحقيقه

المهم يا جماعه هذا الجمع الغفير لما روحنا المستشفى والى انا روحت عملت هنا مولد وقلتلهم احنا كنا المره الي فاتت 30 واتبرع مننا 25 وده حقيقى طبعا

قوم كاااااااام واحد نفع يتبرع مننا

والنبى قولوا انتوا ........

واااااااااااااااااحد  اه والله وااااااحد

امجد القهوجي  ودى صورته بعد الانتصار العظيم واحنا خارجين المستشفى

وانا صورته وقلتله لازم نصور الضحيه الوحيده والى خدنا منه الدم الوحيد النهارده
واظاهر يا جماعه انه قرر يتبرع  مجاملة لساره  وجايز تحت ضغط وتهديد بقى ما نعرفش خطيبها بقى ومالناش دعوه

المهم طلعنا بره المستشفى كانت وصلت داليا واستاذ شرين خدناهم ولان الجو كان ربيع وبديع وكان بيتساقط علينا عرق الشعوب  يا كامليا
قلتلهم لو ما شوفتوليش حالا بالا مكان مكيف نقعد فيه هاتضربوا لان فاضل ساعه على الصلاه

المهم مشينا ندور على اي كافيه يلمنا

والحمد لله لقينا وطلع كافيه لطيف والله  وقعدنا نرغي  بقى كلنا مع بعض  وبعد شويه راحوا الرجاله يصلوا واحنا كحريمات والجو لطيف بره صلينا فى الكافيه

البنت الى شغاله فى الكافيه عطفت عليا وخلتنا صلينا فى اوضه كده تقريبا مخزن والحقيقه كانت فرصه لطيفه انى اعرف ان بقى فيه شيشه بطعم الكابتشينو  .. ايوه قعدنا  انا وسما ودعاء نلعب بقى وكده وكان فى علب قعدت اتفرج على نكهات الشيشه الحقيقه العلم اتقدم ما كنتش اعرف ان كل دي نكهات شيشه فى الدنيا

وبعد الصلاه كان جه هيثم  والى سجلتله اكتر من اغنيه وللاسف الشديد المريع مش لاقياهم معقوله اكون انا هبله وما حفظتهمش ولاايه مش عارفه والله

بجد يا هيثم انت صوتك حلو اوي وبتغني كلمات جميله وسمعنا كذا اغنيه كلمات امجد وبجد حلوين اوي

وفى اغنيه منهم عيطتنى وداليا قالتله بسسسسسسسس شهصينا شويه اصل خلاص عيط الناس 

كان وقت بجد جميل

ومريم بنتى كانت معايا ولزقت لسما لازقه ميه ميه وعاشوا حياتهم فى التصوير بقى والرغي لما قالوا بس 

بعد كده نزلنا اتغدينا  فى مطعم اول مره اسمع عنه الحقيقه تقريبا انا مش من البلد دي  اسمه بهجت وسمير يعنى برضه تيك اواي وكده

واستمرارا لبرنامج الرغي عااااادي برضه  خصوصا ان داليا كانت قاعده جمبي

والمطعم الحقيقه كان له فيو جميل اوي على النيل  بس الماساه بقى حاجتين
الشمس الى كانت لافه المكان فاضطرينا نقفل الستاير

والمصيبه بقى فى الستاير انها حمراااااا والحيطان برضه اغلبها حمراااا  والترابيزات حمرااااااااا

حتى استاذ شرين كان بيقول حاسس ان اللون الاحمر ده محرر الدنيا  هييييييييه ما علينا بس كلنا يعنى ما سبناش

وانا خلصت بقى قبلهم وقعدت اصور فيهم اتسلى عليهم

ده ابراهيم وهو واقع جوه ازازة الكاتشب



وده الغرباوي  وهو بياكل بيتزا


اي خدمه يا شباب  احب التصييح موووووووووووت

وطبعا انا باعمل الواجب ده مع الشوباب بس

البنات بقى هاتفرج على الصور لوحدي ( وش مطلع لسانه )

وبعد الغدا على طول نزلنا وقالوا هايركبوا مركب
الحقيقه انا كان عندي ظروف قلتلهم يا جودعان انا هاروح بقى
وداليا كانت هاتقتلنى الحقيقه بس غصب عني
الى عرفته انه بعد ما انا مشيت ما عرفوش يركبوا مركب
وداليا واستاذ شرين لقوا الوقت اتاخر وروحوا

وباقي الناس كمان بعد شويه روحوا

لكن الحقيقه هما لما لقوني مشيت قالوا الحياه مالهاش طعم من غيري وروحوا

نيهاهاهاهاهاهاها

الحقيقه وبكل فخر
على مستوى التبرع كان تبرع فاشل وجميل
ههههههههههههههههههههه
معلش يا ساره دي الحقيقه ماليش دعوه

اما كلقاء وصحبه حلوه بجد حقيقى كان جميل  اوي اوي

فاتيما وخالد زعلانه اوي اوي انكم ما جيتوش تحسوا اركان اللقاء متغيبه
وخيخه الندله ما ردتش  على اميلى حتى هاموتها ان شاء الله

وكل  الناس الى قالوا جايين وما عرفوش يجوا خيرها فى غيرها

والبت ريم مش هانساله الموقف ده وهاحرمه من المسقعه والغريبه واشياء اخرى طول العمر

بس خلاص كفايه كددددده انتم رغايين بشكل لا يطاق

كان معكم مراسلكم من المنصورة

هناك 41 تعليقًا:

كيــــــــــــارا يقول...

كان نفسي ابقي معاكو بس دا مستحيل انا عارفه عااااااااا

ربنا يسعدكم يارب :)

MR.PRESIDENT يقول...

بعد السلام والتحية
أما بعد
من رئيس الجمهورية

أنا علي فكرة اتصلت بيكو وقلت للأستاذ محمد يبلغكوا سلامي مش عارف وصل ولا لاء
وانا لولا دور البرد الصيفي اللي كان مدغدغني كنت اتعرفت عليكو .. أينعم الميزانية كانت هتتخرب أصل انا بعيد عنك لسه باخد مصروف يعني كدا حاجة علي ما قسم .

بس يلا تتعوض . وشكرا إني عرفتني اللي حصل بدون محضر .. كأني حضرت معاكوا .. وبالتوفيق .

يلا باي
قصدي السلام عليكم

still-searching يقول...

ولو اني جاية متأخرة
وملحقتش اقعد معاكي انتي بالذات :)

وكنت خايفة وانا جاية عشان محدش يعرفني ولا اعرف حد ( غير دعاء طبعا )
بس كان يوم حلو
وناس حلوين برده :)

وزي ما اتفقنا عايزين لقاء حريمي بقى :)

أحمد عاطف يقول...

يارتني كنت معاهم

فاتيما يقول...

لأ والنبى يا صبصوبتى

انا مقدرشى على زعلك خالص


و الله غصب عنى
اصلا عاوزة اقولك ان
معييش ف شنطتى غير خمأشر جنيه
رايحة و جاية بيهم
م الشغل بقالى اسبوع

و مبيخلصوش و الحمدلله

متسألنيش ازاى

بس معايا تذاكر المترو
و مبصرفش حاجة تانى
و الحمدلله شغالة يعنى


قولت هيخلوا عندهم دم ف الشغل
و يقبضونى اى مكافأة و لا حاجة
محصلشى


و طبعا مش هينفع
استلف م الحاجة
عشان استلفت بالفعل
اومال الخمأشر دى جت منين ؟!


و لا ينفع اخد من اخويا ماجد
عشان هوه روخر
عاوز اللى يسلفه

فما الآخر
مكنش ينفع آجى

متزعلييييييش منى


و تتعوض ان شاء الله
المرة الجاية


ربنا يوفق ف التبرع الجاى
و كفاية انكم اتجمعتوا
دى مش شوية

خالص حبى
و بقدم التماس بالعفو عن كلا من :-
---------------------------------
1- خالد
2- ريم
3- خيخة
4- فاتيما


بحبك قووووووى و الله

واسفة قووووووى و الله

خواطر شابة يقول...

ههه فكرتيني بهنيدي في جاءنا البيان التاي لما بيقول "كان معكم نادر سيف الدين من أهدأ مكان على وجه الارض ...حسبي الله ونعم الوكيل فيك يافخري".
بالنسبة للتبرع زي ما انت قلت خيرها في غيرها والمهم النية كانت خير وبالنسبة لليوم الجميل فيا بختكم وربي يديم عليكم هذه النعمة
دمت بود عزيزتي

richardCatheart يقول...

ههههههههههههه والله انت مشكله يا دردر

بصى بقى المهم انكم اتجمعتم وقضتو وقت وجميل واخدتو الثواب بالنيه والفعل

انت اييييييييييييييييييه هاتنهبي يا دردر

والله ان شاء الله ربنا يسهل مره كده نتجمع عندكم فى المنصوره ومره ان شاء الله عندنا فى اسكندريه

والحمد لله انك اتبسطتى ويارب ديما

بوسيلى العيال حبايب هارتى وبوسه ليكى يا دردر

غير معرف يقول...

امتى الكلام ده يا ص ياختى
مش تقولى طيب
كيلو , اتنين دم
لالا الواحد زعلان جدا

واحد بس اللى اتبرع
و انتى رحتى فين ف التبرع ده
عموما اقرب تبرع لازم تعلنى كده بأعلى صوتك
و ماتعمليش حسابى
لان العمر مش بعزقه

ماشى

بيبو

هتشوفوا يقول...

على فكره انا فيا شئ لله, طول الليل امبارح قاعد انكت في نفسي واقول يا بختهم هيروح يتبرعوا بدمهم وياخدوا ثواب وأنا لأ, طب ليييييييه, ومن كتر غيظي كتبت بوست عن لقاء التبرع

جهزي بقى من دلوقتي للقاء الجاي كمان شهر يا ندى بس التبرع هيكون في بنك الدم في الشيخ حسانين

بتحطوا نفسكوا في مواقف بايخههههههه

لو كنتي استأذنتي وطلبتي بركتي كنت هبارك اللقاء عشان ينجح بس شكلك نسيتي
أهو درس ومحدش بيتعلم ببلاش

مجرد حلم صغنتوت يقول...

يوم كان جاي في معاده بصراحة
كنت محتاجاه جدااا
وكانت واحشاني الكيكة بتاعتك يا شوشو :)
مريم ما شاء الله كانت زي العسل
كفاية اني بقولها تديني سنة كام لقيتها بتقولي تانية كلية وبعدين رجعت في كلامها وخلتها تانية ثانوي
هههههههههههههههههههه
ربنا يجبر بخاطرها يا رب :D

تسلمو كلكم على اليوم ده
وزي ما الاء قالت.. مستنين اليوم الحريمي اللي بحلم بيه بقالي سنة اهو :)

كاتب مصري يقول...

كان يوم زي الفل
ميت فل وعشرة
بس بردك مش زي يوم راس البر
راحت عليكي ومتحاوليش تعوضيها
حلوة صورتي دي جدا
ههههههههههههههههههههه

reem يقول...

والله انتى عسوله وسكر خالص

حتى وانتى زعلانة منى بردو بحبك

بجد كان نفسي اكون موجودة اوى اوى

بس انتى عارفه الظروف

والمهم انكو كنتو مبسوطين واليوم كان حلو

وبجد ضحكيتنى جدا جدا وانتى بتحكى على العدد الكبييييييييييير اللى اتبرع بالدم

ههههههههههههههه

ممكن تسامحينى المرة دى ومش تحرمينى من المسقعة والغريبة ولا الاشياء الاخرى ؟؟؟؟؟؟

بلييييييييييز ياتوتة

هههههههههه

وبعدين فاتيما حبيبة قلبي كمان طلبت لنا السماح

اعتقد كدا احنا براءة

بحبك ياتوتة جدااااااااااااا

أسماء أحمد فى حفلة تنكرية يقول...

هلا يا هلا يا هلا
والله كان يوم جمييل اوى
واتبسطت فعلا
وبشكرك انك افتكرتى اسمى فى البوست
كان نفسى اوى اتبرع بالدم بس انتم قعدتوا تقولولى ماينفعش انتى لسه صغيره
يلا شوية كده وابقى اتبرع
حقيقي فرحت اوى انى اتعرفت ع ناس كويسين عقولهم متفتحه وناضجين بالشكل اللى احنا مفتقدينه فى العصر ده
كلكم قمرات بجد
ياريت يتقرر تانى اليوم ده

مصري جدا يقول...

يعني ما فيش دم

وكمان تهديد ووعيد

ايه الجبروت دا

ندى الياسمين يقول...

كيارا

ليه مستحيل ولا تزعلي هاشوفلك عريس من المنصوره ونجوزك هنا وبكده تيجى هنا عادي
هههههههههههههههههه

وحشاني يا بطه

ندى الياسمين يقول...

برزدنت

الف سلامه عليك والله احنا كمان كنا عايزين نشوفك
ولسه بتاخد مصروفك ليه احنا فى الصيف ما بتشتغلش ليييييه
مش انا قلت قبل كده كله يشتغل وبلاش انتخه ولا ايه

ندى الياسمين يقول...

ستيل سيرشنج

والله يا جميل انا مش عارفه اقولك ايه

امبارح وانا باكتب البوست طبعا مش عايزه اقولك كنت مش شايفه قدامي

وافتكر يا بنتى فى اسم مدونتك واسمك لا يمكن راضي يجى

الله يا جدعان ده انا كلمتهاااااااا
برضه لا ممكن قلت طب لما اخلص البوست اكلم دعاء اسالها

خلصت البوست ونشرته ونسيت اكلم دعاء

يعنى زهايمر اخر حاجه

انتى نورتينى يا جميل ومتشكره ليكى على الكلام الجميل ده

ندى الياسمين يقول...

احمد عاطف

ما قلنا كدددددده تقولي مش عارف مين هايتجوز ومين مش عارفه ايه

اعمل فيكوا ايه يا مدوووونين اعمل فيكم ايه

ندى الياسمين يقول...

فاتيما

والله العظيم يا فاتيما كان نفسي اشوفك جداااااااا وقعدت متعشمه جامد انك جايه

وبعدين مالهم الخماشر جنيه بس كنتى تعالى مع داليا واستاذ شرين واصرفي ما فى الجيب ياتيك ما في الغيب

والله كان نفسي اشوفك فعلا

وبعدين زي بعضه يعنى هنسامح الناس دي عشانك يا جميل بس

بس برضه كان نفسي اشوفهم

ندى الياسمين يقول...

خواطر شابه

ايووووووه حسبى الله ونعم الوكيل فيك يا فخري
هى دي
ههههههههههههههه

ايوه طبعا المهم النيه وربنا يخليكى يا جميل ويكرمك

ندى الياسمين يقول...

قلب القطه

يا بنتى واحشااااااااني موووووت

اتجمعوا يا اختي اتجمعوا انا شكلي كده اللقاءات دي هاتبقى حلم بالنوسبالي

وعلى فكره البت دعاء امبارح كانت بتقول ما تعملولنا لقاء فى اسكندريه يا جماعه
ههههههههههههه
يلا اعملي بقى

ندى الياسمين يقول...

بيبو

نقولك فين بس احنا عارفين انت فين حتى

انت رجعت ولا لسه

وبعدين دم ايه حضرتك انت بالذات خليلك دم ياعم مش عارفين بالادغال الى انت بتروحها دي ايه ظروفك زمان دمك نشف
ههههههههههه

ندى الياسمين يقول...

هاتشوفوا

يا خراااااابي يا ابنى حرام عليك يعنى انت السبب

ليه كده طيب يا سااااااتر على الناس الى قلبها اسود موت من جوه
ههههههههههههههههه

ما شوفتش البوست بتاعك هابقى اشوفه

ومش عامله لقاءات انا يا اخويا عايز تعمل انت اعممممممممل
ومش عارفه هاحضر كمان ولا لا


وابقى اطلب انت السماح بقى هههههههههههههه

ندى الياسمين يقول...

مجرد حلم صغنتوت

الف هنا يا جميل والله انتى كنتى واحشاني فعلا عموما انا خدتلك صورتين حلوين مووووووت عشان لما توحشينى هههههههه

ومريم قالتلك 2 ثانوي ماهو انتى يادوب كده يا دودو ههههههههههههه

واللقاء الحريمى ماشي رتبوا كده وانا معاكم ان شاء الله

ندى الياسمين يقول...

كاتب مصري

ماشي ياعم احنا قلنا حاجه مش كنت فى راس البر وعلى البحر لازم يبقى احلى ده احنا لولا المكيفات امبارح كنا انصهرنا فى الشوارع

وايه رايك فى الصوره
جنااااااان ههههههههههههه

ندى الياسمين يقول...

ريم

لا ممكن ابدااااا اصل مش انتى الى هاتتحرمي ده علاء ههههههههههههههههه

ولا اقولك زي بعضه اهو كله عشان خاطرك برضه

وخلاص عفونا عنكم جميعا

وحشااااااني يا بطه

ندى الياسمين يقول...

اسماء

تسلمى يا جميل والله انا الى مبسوطه ان فى حد صغنون كده وبيكتب حلو زيك كده

ان شاء الله انتى هايطلع منك حاجات حلوه اوي بس استمري

ندى الياسمين يقول...

مصري جدا

اااااايوه خليكوا بقى ذلوا فينا عشان ما لقيناش دم

عادي بتحصل ياجدعان بتحصل ايه ده
ههههههههه

still-searching يقول...

انا عارفة الألزهايمر بيعمل اكتر من كده يا شوشو :)

بس انا اللي كنت جاية متأخر ,محدش لحق يعرفني :D

بس متعوضة في اللقاء القادم وان شاء الله يكون قريبا...اتفقنا

فتاه من الصعيد يقول...

ههههههههههه

الصور تحفه :)

كل لقاء وانتم بخير

تحياتي

رحــــيـل يقول...

هههههههههه اى نعم كان تبرع فاشل والوحيد اللى اتبرع امجد وكمان مصحياااااه من بدرى :)
بس هو كان مبسوط وانا كمان بصراحة
كان يوم وقعدة حلوييين جدا
والكيك كااااااان جامد كالعادة تسلم ايديكى
:)
سلمى بقى على مريم كتير

ندى الياسمين يقول...

الاء

والله شوفي دعاء وكده ونظموا نفسكم بس قبل رمضان عشان فى رمضان انسوووووني

ومعلش على الزهايمر بس خلاص عدلت بقىوكتبت اسمك
هههههههه

ندى الياسمين يقول...

فتاه من الصعيد

تسلمى يا جميل وتبقى معانا مش عارفه ازاي بس الله اعلم

ندى الياسمين يقول...

رحيل

الف هنا يا جميل وفعلا كان يوم حلو والله وحقيقى كنت مبسوطه بكم اوي

والله يسلمك حاضر هاوصلها

mostafa rayan يقول...
أزال المؤلف هذا التعليق.
mostafa rayan يقول...

دي اول مرة اعلق في المدونةالجديدة
مبروك البيت الجديد ولو انها متاخرة شوية
بس انا عارف انك مش هنزعلى مني
بخصوص البوست دة يارب متجمعين دايمما في الخير وبجد انا ماكنتش اعرف تفاصيل اللقاء بس حتى لو كنت جيت مكانش ينفع اتبرع لاني كنت لسة قبلها في تبرع خيخة القريب بتاع بنك الدم دة .. بس كانت هتبقي فرصة حلوة علشان اشوفكو كلكم
ان شاء الله تتعوض قريب
كل تحياتى لكم جميعا وربنا يتقبل منكم هذا العمل الصالح

غير معرف يقول...

كان نفسي ياعسل اكون معاكم
لكن انتي عارفه الظروف بقي
بلاش عارفه ديه
نخليها احسن حسه بالظروف
هههههههههههههههههههههههه
يلا خيرها في غيرها ياعسل

ندى الياسمين يقول...

مصطفى ريان

ربنا يخليك انت نورت وطبعا مش هازعل منك

وكنت هاتنورنا والله احنا عملنا كل حاجه ممكنه عشان الناس تعرف

المره الجايه ان شاء الله تشرفنا

ندى الياسمين يقول...

الغير معرفه

ربنا يخليكى يا جميل

اه طبعا حاسه بيكى ربنا معاكي يارب

وان شاء الله متعوضه ونشوف برضه

سـولــو - QŁρ 7žēŋ يقول...

انتى غلطانه طبعا
المفروض كنتى تسمى الحمله
-----------
لو عندكـ دم اتبرع :D
بس بجد خطوه كويسه وبالتوفيق فى اللى جاى بعد كده
اما الناس اللى كان عندها انيميا هههه
هااارد لكـ

نهر الحب يقول...

والله انا مش عرفت اقهد ارعى معاكى
ولا حتى سملت عليكى وانتى ماشية بس بجد لقاء نحفة يارب يتكرر تانى
ان شاء الله
واشوفك انتى وبنوتك على خير
وتسلم ايدك على الكيكة كانت تجنن

يوم جميل بيكم بجد