الأحد، 4 يوليو 2010

بنك دم المدونين

السلام عليكم

ازيكم يا اصدقائي يا واحشني

طبعا انا واحشني الرغي قلتلكم والنهارده هارغي معاكم فى موضوع مهم اوي اوي اوي

بنك الدم

اي بنك دم فى الدنيا محتاجنا كلنا ودى حقيقه
الدنيا كلها ما تقدرش تعوض بنى ادم عن كيس دم

جايز بعضنا او اغلبنا مر بلحظات ان حد عزيز عليه مريض ومحتاج كيس دم وبنجري ندور على فصيلته

انا عن نفسي عشت الموقف ده وعشان كده انا حساه اوي
وحاسه قيمة كيس الدم اوي اوي

أول لقاء تدوينى انا حضرته واول مدونين شوفتهم كانوا فى حملة خيخه للتبرع بالدم

وحقيقى بيبقى نفسي اروح لها كل مره بس الظروف بتمنعنى

السنه الي فاتت ربنا اكرمنى وعملت هنا لقاء فى المنصوره وكان يوم تبرع خيخه واتبرعنا هنا

لا تتخيلوا فرحتى بيكم كانت ازاي

ولا تتخيلوا كمان فرحة الناس بينا فى المستشفى كانت ازاي
والحاحهم فى الطلب انى استمر فى الحملات دي وان فعلا المستشفيات كلها محتاجه لده

بتهيئلي عيب اوي نبقى كتير كده فى الدنيا وعندنا ازمه فى اكياس الدم

عيب  عليكم والله

نيجى بقى للفكره الاساسيه الى هى بنك دم  المدونين

ودى فكرة محمد الغرباوي صاحب مدونة رحلة بحث
 بلدياتي J

والفكره بتقول اننا هانعمل بنك دم من خلال النت

ازاي

هى ان الموقع بتاع بنك الدم (الى لسه هانعمله يعنى )

احنا حاليا عملنا مدونه بس لحد ما نشتغل بقى

المهم الموقع ده هايتولى ادارته مجموعه مننا كمدونين

وكل حد ربنا مقدره على فعل الخير يسجل بياناته فى الموقع ده
طبعا الاسم ووسيلة اتصال والفصيله

واحنا بنعمل قاعدة بيانات
بحيث ان اي حد يحتاج دم نقوم نتصل احنا على المتبرع ونقوله روح فى المكان الفلاني عايزين منك دم

واحنا بنقول اي حد

اي حد عايز يسجل بياناته كمتبرع اوك
اي حد عايز يطلب دم برضه اوك
مش للمدونين فقط

انما هو بنك دم المدونين عشان المدونين هايتولوا ادارته

طبعا سرية البيانات عشان البنات الى هايحطوا بيانتهم

ومن عندي انا اميلى اهو عندكم الى عايزه تبعت بياناتها عليا انا وتفضل معايا انا بشكل شخصي  وتسجل فى الموقع اسمها وفصيلتها بس وانا الى هاتولى الاتصال بها
مافيش مشكله

المهم اننا نؤمن بالفكره وننفذها

انا شوفت موقع تاني اسمه بنك الدم الخيري وعامل نفس الفكره

لكن طبعا تكرار الامر مافيش فيه اي عيب بالعكس

انا اقترحت على محمد الغرباوي اننا لما نقف على رجلينا بالبنك بتاعنا نعرض عليهم التعاون عادي جدا وهايبقى شيء جميل

محمد عمل مدونه بالاسم ده


عليها تفاصيل عن الفكره

انا مع محمد ومع الفكره بشده

يعنى مش قادره التزم معاه باشراف كامل على الموضوع عشان انا وقتي مش ملكي

لكن انا مع محمد ومع بنك الدم الالكتروني

ومعانا ربنا كلنا

حد تاني معانا ؟؟


اي حد يقولي مطلوب مني ايه

اقولك مطلوب تروح على مدونة بنك الدم

وتسجل بياناتك  هناك كمتبرع

فقط لا غير


اوعوا تقصروا رقابتي يا اصدقائي الاعزاء

هناك 7 تعليقات:

فتاه من الصعيد يقول...

انا شاركت وهنشر بوست كمان النهارده علشان الموضوع ده

تحياتي

مصري جدا يقول...

لأ نقصر رقبتك بئا دا كلام

بس تفتكري بئا فينا دم لسا؟

richardCatheart يقول...

طبعااااااااااااااا رائعه الفكره

وانا عملت اعلان دائم عندى فى المدونه

ربنا يكرم يارب

ندى الياسمين يقول...

انا قلت من الاول انكم هاتقصروا رقابتي

فين ا لناس

يا ساتر عليكم مقصرين رقابتي على طول

تعالى يا محمد اتفرج اصل بتقولي اكتبي انتى واتكلمي انتى وكده

يا وحشييييييييييين

ندى الياسمين يقول...

فتاه من الصعيد اينعم يا جميل انا عارفه
محمد قالي انك من اول المشاركين والله

ندى الياسمين يقول...

مصري جدا

والله مش لازم دم اي حاجه نلاقيها هناخدها انشاله لو كانت عرقسوس ساقع

نيهاهاهاها

ندى الياسمين يقول...

قلب القطه

تمام يا جميل ربنا يكرمك


هاااااااااااا على الله الباقي يتكسفوا بقى