الأربعاء، 29 سبتمبر 2010

هو احنا ليه ما بنربيش ولادنا ؟؟


ايوه مش بنربيهم 
اذا كان احنا نفسنا ناقصين تربيه 

اوعى حد يقولي لاااا انا باربي ابنى احسن تربيه بادخله احسن مدارس وباجيبله احسن مدرسين احسن لبس احسن اكل وعمري فى حياتي ما شتمت ولا قلت قدامه كلمه مش مظبوطه  والولد اخلااااق  بس هو شقي شويه ما كل العيال اشقيه

طيب معلش عندي لكم سؤال جميعا :

هل علمت ابنك ان ليس منا من لم يوقر كبيرنا ويرحم صغيرنا ؟؟
علمته دي مش كلمه
لا دى حياه
بتتكلم ازاي قدامه عن اخوك الكبير وعن ابوك وبتعامل  ابوك ازاي قدامه وبتعامل اخوك وعمك وخالك ازاي

علمت ابنك انه لما يكون ماشي مع حد اكبر منه ما يسبقوش وهو ماشي وما يقاطعوش فى الكلام وما يزعقش فى وشه
علمته لما يقعد على السفره مع الكبار ينتظر لحد لما الكبار يقعدوا ويبدأوا اكل  اولا

طيب علمته يبقى صادق ؟
مع نفسه اولا ما يخدعش نفسه ويقول انا شاطر وما حصلتش وهو اصلا مش كده
وما ينكرش نفسه من الضيف وما يطنش جرس الباب ولا جرس التليفون ويحترم الناس ويكون ذوق ولسانه حلو مع الناس

كمان علمته ما يرميش ولا ورقه فى الشارع وهو ماشي حتى لو كانت الدنيا كلها بترمي هو ما يرميش

طب  علمته يحترم القواعد والقوانين حتى لو كانت صعبه او هو مش مقتنع بها او لو الناس كلها مش بتعملها ؟؟

ولما يقدر يقول القوانين دي غلط وانا مش مقتنع بها يقول انما ما يبلطجش فى الحياه بقى

علمته يعتمد على نفسه ويخدم نفسه ويساعد ماماته ويساعد ابوه

علمته قيمة العمل الى اهم من قيمة الفلوس ....احنا بنشتغل عشان يكون لنا فايده عشان ننتج مش  عشان نجيب فلوس بس والا لو الواحد معاه فلوس يبقى ينام ويأنتخ بقى طول حياته

علمتوا ولادكم الدين ؟؟
علمتوهم ايه ؟؟
ياكل بايده اليمين ويحفظ قرأن ويصلي ويصوم
مش كفايه
لازم يفهم روح الدين
لازم يعرف ان الدين قبل أي شي تعامل واخلاق وصفات حسنه فى المجمل
مش  دقن وجلابيه وحرام حرام حرام

لازم يفضل عارف ان اول مرجعيه له طول عمره هى الدين واول قانون يحترم هو الشرع واول من يخافه ويرجو رضاه هو ربنا سبحانه وتعالى

مش بالكلام بالفعل

ارجوكم الى فيكم مضايقه من حماتها ما تخليش ولادك يكرهوا جدتهم  مش عشان جدتهم لا عشان الصحه النفسيه لولادك
ارجوك لو كنت مش طايق  مراتك طلقها .. بس ما تضربهاش ولا تهينها ولا تكلمها وحش قدام ولادك برضه مش عشانها يا سيدى هى كلبه ولا تسوى  برضه عشان الصحه النفسيه لولادك

يا ناس الى فيكم مضايقه من اخوه ولا ابوه  ما يقولش لابنه ولا بنته ما تكلميش عمو فلان ولا حتى تتكلم قدام ولادك وحش عنه ما تتكلمش خااااالص  فلتقل خيرا او لتصمت

يا نااااس العيال مالهاش أي ذنب باي مشاكل بينكم وبين أي حد تاني

يرضي مين واحده تتخانق مع سلفتها تقولها طنط فلانه دي لا تكلميها ولا تسلمى عليها ولا تخليها تبوسك ؟؟!!! وتروح عند امها وتقعد تقول يجيلها ويتحط عليها فلانه عملت فيا وعملت وقدام ولادها

 فى حين ممكن جدا تكون الام نفسها بتقابل سلفتها بعد نص ساعه تبوسها وتكلمها عاااااادي من ورا قلبها اه
بس الطفل يجيله انفصام كده هايشوف الام كدابه ومنافقه

يا جماعه احنا بنخلف العيال  عشان نربيهم صح مش عشان نستعملهم لمعاقبة الاخرين
ولا عشان نطلع فيهم عقدنا وكلاكيعنا
ونخليه يكره من نكرهم فى حين بننسى ساعات نخليه يحب الى بنحبهم كمان
ونستعملهم كسلاح
واحده عايزه تضغط على جوزها عشان يطلقها او  عشان ما يطلقهاش تحرمه من ولاده عشان عارفه انه بيحبهم مثلا
واحد عايز يادب طليقته ويطلع عليها القديم والجديد ياخد منها عيالها ويحرم عياله من وجود الام فى حياتهم حتى لو كانت تليفون ولا زياره كل اسبوع
واحده تمنع العيال عن ابوها اصل زعلانه منه   أي كلام واي هبل
ولا ايه بقى العقد والكلاكيع المركزه الاتيه
ونخليه يدخل الكليه الى احنا دخلناها او الى احنا ما عرفناش ندخلها
حتى التعليم بنخليهم يتعلموا مش عشان يتعلموا عشان يجيبوا درجات مش  تحصيل علم تحصيل درجات وكليات قمه وهبل بنسقيه للعيال قتل جواهم كل ميول واتجاه وهوايه

ونجوزهم جوازه تكون عجبانا احنا ومقتنعين احنا بيها مش مهم هما
الله هو انتم جايبين العيال دي  من الملجأ ولا ايه ؟؟
هما لعبه ؟؟
ارجوكم كل واحد يحتفظ بكلاكيعه الخاصه بحيث ان كل طفل يعمل لنفسه كلاكيعه براحته
مش معقول ياخد كلاكيع اهله ويحط  عليها كلاكيعه هو كمان تبقى كارثه بقى

ارجوكم بلاش  ازدواجية الفعل والتعبير  خليكم واضحين مع نفسكم شويه
خلوا المقام الاول لو سمحتم لتربية  الولاد ومصلحتهم وتوازنهم النفسي

مش تخليص عقد ولا تخليص حقوق ما تدخلوش الولاد ضمن دايرة صراعاتكم

وحد يجبلى انا بنادول لان انا الى صدعت على ما كتبت على فكره ايه ده انتم هاتقروا كل ده ازاي ؟؟!!

هناك 40 تعليقًا:

حنعيش يعنى حنعيش يقول...

تسلم ايدك ياندى ... يارب يارب يارب يسمعوا ... ويعرفوا ان تربية الولاد مسئوليه حنتحاسب عليها يوم القيامه ..
بسيطة خالص مبتعرفش تربى ... ياتتعلم ... يا متخلفش ... سهله دى ...

فاتيما يقول...

و الله يا صياصيبو
انا مش فاهمة ليه ؟!!
كنت لسه بحكى ف الحكاية دى من كام يوم تقريباً مع صديقة ف الشغل لسه بتبتدى حياتها و بقولها غريبة قوى
اهالينا مثلاً
اتعملوا بقسوة شويتين من الجدود
كانت التربية صارمة و فيها عنف
لما كبروا الأبناء و اتجوزوا و خلفونا
ليه بعضهم اتعامل مع جيلنا بعنف برضو مع انه شرب من نفس الكاس قبل سابق؟!!
لو سألتى ..ينجاوب عليكى
احنا اتربينا كدا و فلحنا
طيب
المفروض احنا بقى
نعمل ايه؟
نربى عيالنا كدا برضو
و لا نتلافى عيوب الجيل السابق

حكاية اننا متربيناش دى
انا شايفة انها المفروض تيجى بالعكس
يعنى مثلاً
انا عمر بابا الله يرحمه ما قالى يا حبيبتى و انا صغيرة ..
و انا كبيرة الصراحة كمان
و ماما ناااااادرا ما كانت تقولها
الموضوع دا كان بيضايقنى جدا خصوصا لما اسمع مامت واحدة صاحبتى بتنده لصاحبتى كدا ..كنت بشيل ف نفسى
قوم لما خلفت يوسف بقى
مش عاوزة اقولك
بين كل يا حبيبى و يا حبيبى
يا حبيبى
و صحيح يبان دلع و مرىء
بس جنبه حزم و حسم وقت اللزوم
كان بيخاف يزعلنى
مش بيخاف منى
و كان بيقتنع بكلامى لأنى كنت بناقشه كراجل مش عيل صغير ساذج
كنت بعمل حساب بكرة لما يكبر و يفتكر كل حاجة و هيحاسبنى ان مكانش علنا هيبقى سراً بينه و بين نفسه و دا اهم عندى الف مرة
حكاية الاحترام
اللى لو انوجد
يفضل العمر كله حتى بعد انا ما اموت و اروح من حياته
معرفش ليه الناس بستصعب الحنية و حب ولادها و بتحسه مجهود خارق مع ان العيل لو اتقسى عليه بيبقاله مشاكل و هتستدعى مجهود عشان تنحل برضو
فليه محطش مجهودى م البداية
فى مكانه الصح احسن
اكون ايجابية بدل ما اكون سلبية

عندى مبرر
اعتقد انه منطقى
ان التربية مش مطلقة ليكى
فيه اهل و ناس و مجتمع بيشارك معاكى
و احيانا كتيرة بيبوظ اللى عملتيه
و يمكن اللى يحرمك من حقك دا بالمرة
يكون الطرف التانى الأساسى
ف التربية اللى هوه الأب
فيبقى تعملى ايه ؟ّ!


المسألة معقدة جدا
لأننا فعلا كأشخاص محتاجين
نتربى و نهذب روحنا الاول

و الموضوع مش طويل و لا حاجة
دنتى مختصرة المرة دى
واصلا الحكاية كبيييييرة قوى

فيه امل نشوفك ف اسكنكرية
ياااااااارب

بوسات و حضونات
يا ست الستات الصبصوبات

غير معرف يقول...

عندك حق ...
تسلم ايدك
موضوع فعلا فى غاية الاهميه
واحده بنادول معاكى بقا

Kiara يقول...

الله هو دا الكلام

انتي يابنتي بتردي علي كلام فى الموضوع دا

التربيه مش علم ولبس واكل

التربيه خلق حسن

sony2000 يقول...

جيتي علي الجرح:(
قوللهم والنبي
قوووووووووووووللهم

adel يقول...

انا عليا البندول
ولا تعليق
اصله هصقف و بعدين
مش هيحصل في الاغلب جتي لو حرصتي
لان مش كل مرة هحدي بالك
ومن شب علي شئ شاخ عليه
يعني الام و الاب حتي لو متفاقين هتلاقي وقت مش مركزين غير في الخناق و في سبرة الناس ظظظ=...الخ
واصلا التربية الكويسة مش معناه نطلع ملايكة
انك تطلع حد محترم بس في نفس الوقت يقدر يحافظ علي حقه هو ده الحل الوحيد
يعني هيحترم القانون ماشي
بس لما يلاقي حقه مهدور مثلا واستعوض ربنا مرة و اتنين
طيب و التلاتة و الرابعة ؟؟

قلم رصاص يقول...

مفيش بعد كلامك كلام تاني
اصبتي كبد الحقيقه

رغم البرد والكونجيستال الا اني قررت اقرا الموضوع للاخر

وبالتالي اعملي حسابك بقى على بنادول كمان...... ^_^

تسلم الدماغ اللي كتبت البوست الرائع دا

في امان الله

ادم المصرى يقول...

الله بوست هائل ومن اهم اشياء الحياه هيا تربيه الاولاد لأن بسبب التربيه لئما هيطلع صايع او مجرم او عالم دين او عالم فى اى شيئ اخر الله المستعان الهما احفظ اولادنا وبناتنا امين

ثانكس بوست هائل

غير معرف يقول...

أنا لسه ما جبتش عيال

بس أكيد هيطلعوا ناقصين تربيه في الزمن العجيب ده :)))

عموما أحنا في زمن فوضى ... والإنسان لازم يحاول يربي ولاده كويس علشان فعلا ده زمن صعب

تحياتي على البوست القيم

richardCatheart يقول...

اعتقد ان اهالينا حاول تربيتنا صح بس الحياه بوظتنا او على الاقل كتير منا

الحقيقه بحاول اربى قدر المستطاع بتكلم كتير اوى معاهم بحاول فى حاجات كتير من اللى قولتيها بعملها طبعا والا يبقى لازمتى ايه كام مسؤله عليهم اؤدام ربنا

البوست جميل ومهم وخصوصا جزء الطلاق والولاد ياريت اكبر عدد يشوفه

تسلمى يا دردر

خواطر شابة يقول...

كلامك صح وياريت يتطبق عشره كان الحال يبقى غير الحال لكن فيه مشكلة عويصة موجودة اننا لسنا وحدنا من يربي في العلاقة الزوجية هناك طرفان واحيانا لو كانت العائلة ممتدة تكون اطراف اخرى متدخلة الحمى والحماة ايضا المجتمع يربي معنا لذا الموضوع متداخل جدا جدا
دمت بكل الود وتحية على طرح هذا الموضوع

سندباد يقول...

احسنتي
مدونة تستحق الاحترام والتقدير
بوست هادف ربنا يجزيكي عنه خير
الكلام كتير والافعال اكتر ولكن من يفم ومن يعي
تحياتي لبنات افكارك

مجرد حلم صغنتوت يقول...

تحسي فعلاً ان مستوى الاطفال في النازل كل شوية
من كام يوم كنت مع ماما في العربية وكام طفل معديين قدام العربية بيجروا ورا بعض قالو شوية ألفاظ اول مرة في حياتي اسمعها
اتصدمت بصراحة
هم غير انهم يربوا في البيت.. مش بياخدوا بالهم ولادهم دول بيخرجوا يروحوا فين ولا بيلعبوا مع مين

والمدرسة فين والمدرسين اللي بقوا بيشوفوا الاطفال اكتر من اهاليهم علشان الدروس الخصوصية
فيه حاجة غلط في النص

shimaa elkholy يقول...

حنعيش يعنى حنعيش
تسلم يا دوك ربنا يخليك

shimaa elkholy يقول...

فاتيما
بصي يا جميل التربيه الصارمه حاجه والعنف حاجه تانيه

بصي احنا بنى ادمين وانا عن نفسي مش باحاسب اهلي على حاجه خالص او مافيش فى نفسي منهم اي لوم لان كل حد وله ظروفه

ومهما انا او انتي عملنا مش هانبقى ملايكه لا لنا اخطائنا والى جايز يلومنا عليها اطفالنا يوم من الايام

والقسوه طبعا غلط
عدم التعبير عن المشاعر الايجابيه كمان وحشه اوي

لكن الشده احيانا من الام والاب هى منتهى الرحمه

انا عندي اطفال ابنى مثلا بقاله فتره مصر جدا انه يحط ايده في المروحه دماغه مقضيه علىكده وغلبت اقول وانصح مافيش فايده

لحد لما فى الاخر حط فعلا صباعه فى المروحه وهو عند الجيران انا ما عنديش مروحه يطولها اصلا

واتجرح ومشكله

طيب ايه رايك انى ندمت انى ما ضربتوش فعلا لما كان مصر يحط ايده

ايوه ضربي انا اهون عليه

ما انا مش هاخدهمفك جمب عينه

لا طبعا الضرب فى نظري معنوي الى هو بيعيط عشان اتضرب مش عشان الضربه وجعته

الحقيقه انا مش باحب الدلع المريء انا شيديده شويه
بس ما يمنعش انى باقول يا حبيبى وابوس واحضن وادلع

وفوق البيعه اتجنن واصرخ واصوت ههههههههه

انا مش باطلب من الامهات والابهات يبقوا ملايكه بس على الاقل يحاولوا يربوا مش تبقى الاوي الحكايه

واسكندريه والله كنت ناويه صدقينى ورضا على غير العاده كان عايز يروح

بس تقولي ايه على الحظ السخيف الصحه بعافيه شويه انا ورضا مش هاينفع والله يا جميل
بوسات وحضونات من هنا لحد المرسي ابو العباس

shimaa elkholy يقول...

الحب الجميل
والله انا لسه عندي صداع مش عارفه ايه ده
ههههههههه
مرسي يا جميل ونورتينى

shimaa elkholy يقول...

كيارا
تسلمى يا كوكي ربنا يخليكى

shimaa elkholy يقول...

سوني
ادينى باقووووووول بس هما يسمعوا

shimaa elkholy يقول...

عادل

برافو عليك هو ده الى انا اقصده على فكره

ايوه انا باقول مثاليات بس ماهو مش هايعملها كلها

لما انا اعلمه الف ياخد نصهم يبقى انسان

لما اقولها ما تخالفيش قانون المدرسه فى اليوني فور لمجرد ان ما حدش بيزعق انتى مش حماره يا ماما تمشي بالضرب انتى بنى ادمه ومحترمه
مش لازم نتعود ننفذ الصح عشان فى حد ايده على قفايا
وكمان الزي ده الالتزام بيه مفيد ليكى انتى شخصيا

وهكذا
انا هاعلمها الصح ومش لازم تعمله كله ميه الميه بس على الاقل لو غلط يبقى عارف انه ده غلط

بالظبط زي فكرة انه لا يا ابنى ما تشربش سجاير بره تعالى اشربها قدامي احسن لا ده هبل ده انا كده باحول الخطا الىصح باعتراف ضمني مني

فاهمنى ؟
محتاجه بس الولد يبقى عنده مرجعيه

عارف الصح من الغلط وعليه يختار هو بعدين


تحياتي يا فندم ونورت

shimaa elkholy يقول...

قلم رصاص

شكرا يا سيد والف سلامه عليك

نوووووورت يا باشا

shimaa elkholy يقول...

ادم المصري

شكرا لك ونورتنا يا فندم

shimaa elkholy يقول...

فتاه من الصعيد

ليه اكيد الصعايده الستات جامدين اجمدي كده يا جميل

نورتي يا قمر

shimaa elkholy يقول...

قطتي

هما عملوا الى عليهم برضه فى حدود علمهم

وياريت يفهموا يا جميل

تسلمى يارب ونورتينى

shimaa elkholy يقول...

خواطر شابه

تسلمى يا جميل

وفعلا مش الام وحدها فى مجتمعنا بس انا رايي ان الام برضه تظل عندها المقدره انها تكون المرجع دايما بس المهم تقدر تسيطر على الموقف
نورتي يا جميل

shimaa elkholy يقول...

سندباد

ربنا يخليك يارب متشكره اوي على كلامك الجميل ونورتنا

shimaa elkholy يقول...

مجردحلم صغنتوت
لا الاالشتيمه بقت زفت كبار وصغير تحسي الشعب كله لسانه بقى زفر

بصي هو دور المدرسه مهم لكن ما زلت شايفه الدور الاساسي فى التربيه للام والاسره طبعا

تحياتي يا جميل

زينب علي حبيب يقول...

لازم يفهم روح الدين
لازم يعرف ان الدين قبل أي شي تعامل واخلاق وصفات حسنه فى المجمل
مش دقن وجلابيه وحرام حرام حرام

كلام جمييل


عجبني البوست جدااا


بس مين يطبق ؟

المتبهدلون في الأرض يقول...

ما شاء الله حضرتك أوجزتي فأنجزتي
فعلن ناقص الناس تتعامل مع نفسها بصراحة الأول وتربي نفسها
وكمان يجب الأولاد ما يورثوش أخطاء أبائهم
بدون مبرر إلا (إنا وجدنا آباءنا على أمة وإنا على آثارهم مقتدون)

The Queen يقول...

الصدق مع النفس أولا هو إجابة سؤالك

قليل اوي دلوقتي لما تلاقي حد صادق مع نفسه بجد وبيحاسبها بشدة وباستمرار
ولسه متمسك بمبادئ الزمن اللي فات
فازاي نطلب من واحد او واحدة بيكدبوا على نفسهم انهم يعلموا ولادهم الصدق او اي حاجة تانيه صعب اوي
فاقد الشئ لا يعطيه
ولو حاولوا هيكونوا برضه كدابين قدام نفسهم وقدام ولادهم ودي كارثة اكبر
الحل اننا نلاقي نفسنا ونعرف احنا مين
وقتها هنعرف نربي نفسناوولادنا وهيبقى لنا اسم ومعنى احنا وولادنا
تحياتي لفكرك المتميز

د. ياسر عمر عبد الفتاح يقول...

فعلاً أنا معلمتش ابني أي حاجة من دي
أنا حاسس إني مقصر أوي أوي أوي





مع إني معنديش أولاد ولا متجوز أصلاً
بس برضه ده ميمنعش إني مقصر برضه :)

________

لا بجد نصائح غالية
ده بسبب إن الأهل أصلاً ومعلش في الكلمة مش متربيين صح
أبائهم مربهومش صح
وده لأن أباء أبائهم برضه مربهومش صح
يبقى هنا فيه سلسلة جهنمية محتاجة تتقطع بإن واحد بس يربي نفسه بنفسه وبعدين يبدأ يربي أولاده صح

موضوه قيم بجد

رحــــيـل يقول...

انا قولتها فى تدوينة امبارح طالما مش هنعرف نربى يبقى منخلفش احسن العيال مالهاش ذنب فى فعلا فى العقد دى كلها حراااااااااام والله فعلا هيكرهوا حياتهم ويكرهوا اهاليهم وبعد كده نطلب منهم انهم يبروا بأبوهم وامهم

الازهرى يقول...

اممممممممم
مش هاقدر أقول لك غير حاجة واحد فى الموضوه ده كله

البنادول مش كويس للصداع
الليمون أحسن

كلمات من نور يقول...

كلام صح والله ومحدش يقدر ينكر أي كلمة منه و لازم نعترف إننا بنخطيء كتير فيحق اولادنا ......الفكرة لو كل واحد فينا اتعلم من اخطاء والدبه وقرر انه ميكونش زيهم الا في الكويس والقدوة ولو نراعي ربنا في العيال دي نكسب جنة تحت أقدام الأمهات ......بجد أول زيارة في المدونة بس مش حتكون الأخيرة إن شاء الله ..يعني حكون ضيفه دايمه وكويس البنادول مع القهوة واجيب انا معايا الشيكولاته....

shimaa elkholy يقول...

قطرة وفا

متشكره ليكى يا جميل ونورتي

shimaa elkholy يقول...

المتبهدلون فى الارض

متشكره اوي ربنا يخليك ونورتنا

shimaa elkholy يقول...

الملكه

تمام ربنا يخليكى يارب وكلامك صح احنا نفسنا محتاجين تربيه عشان نعرف نربي عيالنا
نورتينى

shimaa elkholy يقول...

د ياسر

طيب انا هاعلق الابهات والامهات هنا على باب المدونه لحد ما يتربوا :)

حتى الاباء والامهات المستقبليين :))))

طبعا انت عندك حق

نورت

shimaa elkholy يقول...

رحيل

مش هانعرف نربي نتعلم نربي سهله والله

انما انتى كده هاتخلي العيال كلهم يتعقموا يا امي ههههههههههههه

نورتي يا قمر ووحشاني

shimaa elkholy يقول...

ازهري

لمون ايه بس ما ياثرش معانا


نووووووووووووورت

shimaa elkholy يقول...

كلمات من نور

حبيبتى ربنا يخليكى ده انتى تنورينى

وكلامك تمام التمام يا فندم ودايما منوراني والله