الثلاثاء، 12 أكتوبر 2010

الزوجة المصرية

ازيكم يا اصدقائي

النهارده عايزه افش خلقي الحقيقه فى نقطه معينه لاحظتها فى مجتمعنا الحبيب ما عندكوش فكره انا باحبه ازااااااي

الفكره دي انا باشوفها خاصه اكتر بالمجتمع المصري طبعا مش كل الناس لكن نقول الاغلبيه العظمى والله اعلم

الا وهى ان الست المصريه هى ام  اولا    ثم  زوجه  والباقي مش مهم

يعنى الكلام ده
الاول اقولكم مقوله انا دايما باقولها  لما نتكلم عن اختلاف الشخصيات العربيه اقول يعنى مثلا الزوجه المصريه ام فى المقام الاول  والزوجه السوريه زوجه فى المقام الاول  اما الزوجه اللبنانيه بقى بالصلاة على النبي مزه فى المقام الاول  J

بقيت الزوجات العربيات بلاش بقى الا يزعلوا J  لا الحقيقه ما خالطهومش كفايه عشان احكم

الحقيقه بدأت احس ان المجتمع بقى وحش مفترس وبيفرض نفسه على الجميع وايا من يخالف قواعده الغير سليمه اصلا يبقى معرض للنهش من جميع الاتجاهات ومش مبالغه والله انى اقول نهش دي حقيقه

وده يمكن راجع لان ما حدش فعلا بيسيب حد فى حاله وكل الناس بتدخل فى حياة كل الناس بطريقة تضايق كل الناس

هاتكلم عن الزوجه المصريه  الى بجد ومن غير مجامله  ولا تحيز فعلا مظلومه  حتى لو كانت مقصره فى بعض النواحي  لكن لو فكرت تصلحها  ما بتلاقيش دعم بالعكس بتلاقي مهاجمه

هاقولكم القانون الى بيعتنقه المجتمع فى حال الزوجه المصريه

المجتمع المصري بيقول الست المصريه هى ام وما دام بقت ام فده مقدم على كل شيء فى الحياه بشكل مبالغ فيه
يعنى  اي اجراء تاخديه فى حياتك موجه لكونك تكوني حاجه غير الام مش مسموح لك  حتى لو كان الدور ده هو زوجه ولو لابو ابنائك
كل الى المجتمع عايزه منك تكوني ام متفانيه مضحيه تمحي شخصيتك واحتياجاتك وحياتك كلها فى سبيل امومتك

ومش معنى كده ان الست الى بتعمل كده المجتمع بيديها نيشان الامومه ...اطلاقا مطلقا

ده المجتمع بيوجه لها اصابع الاتهام مباشرة فى حال الزوج عينه زاغت ولا اتجوز عليها ويقولها اخس عليكى كده  تهملي جوزك ؟؟؟ برضه انتى غلطانه ماهو من حقه يعيش

ولو الست بقى مدهوله ومتخلفه عصريا  وفكريا  برضه يوجهوا لها اصابع الاتهام المباشر فى انها اهملت نفسها حتى اصبحت  بلا هويه فكريه

طيب هى تعمل ايه ؟؟؟  ترضى المجتمع ازاي ؟؟

انتم عارفين المجتمع ده مين بالنسبه لها ؟؟

المجتمع ده امها  وابوها واخواتها وجوزها  وصاحباتها  وكل من هم حولها  ... وما تقلوليش  هى غلطانه انها سمعت كلامهم
امال تسمع كلام مين .. ماهو غصب عنها لازم تثق فى الناس الى حواليها او جزء منهم ...

حتى لو حاولت تخرج من النطاق ده  بتلاقي مهاجمه شرسه جدا  لدرجة انها فى وقت من الاوقات بتشك فى نفسها وتقول يعنى مش معقول انا بس الى صح وكل الناس غلط مؤكد انا غلطانه وبتسلم بالامر الواقع حتى لو ما كانتش مقتنعه بده


حد فيكم جرب يقف كده مع نفسه ويحس نفسه واقف فى جزيره قاحله  وحده وسط البحر وامواجه العاليه ؟؟

اهو ده الاحساس الى ممكن يحسه حد افكاره تخالف افكار المجتمع او الناس الى حواليه

عارفين لو الواحد لقى فى الجزيره دي شخص واحد بس يقوله اثببببببت انت صح  وعندك حق

ممكن يقدر يستحمل ويكمل .. بس لو ما لقاش البنى ادم ده فى صورة اخ او صديق او زوج  او ام  مش هايقدر يكمل لواحده
هاينسحب ويدفن افكاره ويحاول يتعايش مع الكون الى حواليه بطرق كتيره غير قناعاته وفطرته

الام فى مصر مش مسموح لها تكون اي حاجه غير ام  حتى لو ابدى بعض الاشخاص مشاعر تانيه غير دي

لكن الحقيقه ان الام  مش مسموح لها تكون غير ام

لو فكرت ام مثلا انها تروح تتعلم كمبيوتر او لغات او سواقه ... تلاقي حد بيقولها ليه انتى عايزه تشتغلي ؟؟؟
(الشغل هنا ممثل فى انها برضه تجيب فلوس تصرفهم على ولادها ) اه لتفكروا حاجه تانيه
لو قالت مش عايزه اشتغل ... تلاقي الامتعاض على وش الى قدامك طب وبتتعلمي ليه ؟؟ ما ولادك اولى بالوقت ده !!!!!

مليون حد قالي الكلام ده بخصوص تواجدي على الكمبيوتر والانترنت . واخدي كورسات فى اي حاجه وتعليم السواقه وزياره اصدقائي   واي حاجه باعملها مش على مزاج المجتمع الكريم ... مش ولادك اولى بالوقت ده ؟؟؟

الله هم العيال لما بيجوا الدنيا بيشتروا اهاليهم ؟؟ ولا سيما الام طبعا الاب لا ده بيجري فى الدنيا ومن حقه يرفه عن نفسه ويقعد مع اصحابه وينام ويانتخ ويتعلم ويسافر وكل حاجه

اما الام لازم تكون مضحيه بكل ما هو عزيز وغير عزيز كمان وبشكل مبالغ فيه

مع العلم ان ده مش صح ومش كويس عشان الابناء على المدى البعيد بس الى يفهم

الامومه شيء جميل وشيء مقدس ومقدم على كل شي ... ده حقيقى

بس بنقول مقدم على كل شيء يعنى فى حاجات بعده مش الجدول لكله يتمسح من بعدها

الامومه مش معناها  الغاء كل النشاطات الحياتيه الاخرى  فى سبيل الامومه فقط

الامومه غريزه طبيعيه فى البشر خلوها تمشي زي ما هى  وتاخد حجمها الطبيعى

تبقى الست ام  وزوجه وابنه واخت وصديقه ومتعلمه ومثقفه  ولها هوايات ولها حياه شخصيه متميزه مش ممسوخه
ايه يضير الامومه فى ذلك ؟؟

احنا ليه بنبالغ فى كل حاجه لحد لما نمسخها ونخليها فاشله

تسعه وتسعين فى الميه من المجتمع لو عرف ان الام سابت عيالها مع اي حد ولو كان جوزها ولا امها وخرجت مع اصحابها مثلا يوم  .. تفك   عن نفسها تغير جو تحس انها شخص تاني غير ماما وبس

هايمتعضوا ويقولوا وهان عليها تسيب عيالها ؟؟؟ او يقولوا شوف الهيافه والنبى ...  او يبادر بالسؤال  : وده فايدته ايه المشوار ده ؟؟؟   صدقونى حتى لو اظهروا عكس ذلك ده بيبقى جواهم

والمشكله ان المجتمع بيغير فطرتنا وافكارنا بياثر علينا
بيدخل قناعات جوانا
قناعات ضد الفطره .. قناعات قد تكون فى بعض الاوقات هدامه
تلاقي الست نفسها اوقات هى الى حاسه انها لو فكرت تكون اي حاجه غير الام فهي كده بتعمل جريمه
المجتمع بتاعنا توحش فى الظلم

بقت الى بتتجوز بعد موت جوزها او طلاقها وهى عندها عيال متهمه
وتلاقي الف من بيمصمص شفايفه ويقول ولازمته ايه ما كانت قعدت  تربي عيالها
وهو نفسه المجتمع الى طول ما هى قاعده من غير جواز متهمه واوقات متهمه فى شرفها بدون داعي


المشكله ان فى النهايه بتلاقي المجتمع عامل مع  بعضه زي ما كانوا عاملين فى جحا
عارفين حكاية  جحا وابنه والحمار ؟؟ بالظبط  كده صدقوني فى النهايه مش هاتقدروا ترضوا الكل

                                                   وبناءا على ما سبق ذكره

 انا قررت من زمان اكون نفسي اولا
ارضي ربنا
ارضي نفسي
ارضى الى يهموني  على اد ما اقدر مش اموت نفسي يعنى
وطزززززززز ومليون طززززز فى اي حاجه تانيه

بس اوقات وغصب عني ومن كتر الضغط
باجي على نفسي لحساب الى يهموني

بس برضه لازم اكون نفسي مش مسخ على هوا المجتمع

هناك 40 تعليقًا:

Tamer Moghazy يقول...

صباحك ورد..وياسمين..
لو رضيتي ربنا واتقيتي الله في الناس اللي بتحبيهم..
هتلاقي انك في النهاية بتعملي اللي انت عايزاه وفي نفس الوقت بترضي اللي حواليكي وربنا هيديكي رضا داخلي جميييل..بغض النظر عن انك تكوني (زي اي حد) :)
تحياتي على البوست المفيد جداا :)

حنعيش يعنى حنعيش يقول...

طزززززززززززز فى اللى مابفهمش ومش عايز يفهم .... الانسان يعيش مره واحدة ...

ستيتة يقول...

صباحو فل يا معلمي
تناقشت في هذأ الأمر حديثا مع ثلة من الهنود الحمر
ها أروح احضر اجتماعين ليهم
اه والله
مش اجتماع
لأ
جرعة مكثفة
واجي اقول لك رأيي على طول
اللي انتي اساسي عارفاه

الحياة مراحل
فليستمتع كل بني ادم بمرحلته لأن مفيش ثبات تكتيكي في الجواز
استمتعي يا ماما استمتعي
بكل مرحلة عمرية لأن لها التزامات ومتع غير المرحلة اللي قبلها او التي تليها

صباحك ثكر

shimaa elkholy يقول...

تيمو

ما قلناش حاجه ريس ما قلنا ما يمنعش ان الواحد يجى على نفسه عشان الى بيحبهم برضه
عااااادي

نورت يا باشا

shimaa elkholy يقول...

حنعيش يعنى حنعيش

استااااااااااااذ

مش بالذمه مليون طز

بس هانعمل ايه يعنى

shimaa elkholy يقول...

ستيته حياتي

اوف كورس عارفه رايك

بس طبعا مستنيه اسمعه واسمعه لشعب مصر كله جايز يفهم

ده كمان فى بؤين واقفين فى زوري فى الموضوع ده هابقى اقولهوملك بقى فى اي اجتماع هنود خضر انا وانتى يعنى
هههههههههههههههه

راجل صعيدى يقول...

صباح الورد والخير والامل وقبل ده كل صباح الايمان بالله ويارب كلكم تكونوا بخير طبعا بتمنى من قلبى ان كل اللى يقروا البوست ده يكونوا رجاله وبس ,,, بس انتى مش شايفه يا ندى انك جايه على الرجاله شويه وشديده عليهم بجد ..طيب عاوز اقولك على حاجه انا يا ست الكل ليه فى شغلى الجديد أكثر من 8 شهور وده طبعا بيبعد عن بلدى اكتر من 600 ك وبقعد هناك حوالى 25 يوم و احيانا شهر وبعدين بنزل لاولادى اربعة او خمسة ايام ولى صديق فاضل ويعرف الله حق المعرفه وقال لى يا ...... كده ما ينفعش شغلك ده مستمر ولازم تتجوز ولو مسيار وده حلال ومش حرام ... قلتله يا راجل بعد العمر ده كله و مراتى شايله البيت والاولاد واروح اتجوز ما علينا كان نقاش طويل واستمر فترة طويله ولا زال هو على رائيه وانا متمسك بكلامى تعرفى استقريت عليه على الاتى عشان مافكرش فى كلامه على الاطلاق:-
= اسبوع او اثنين فى مقر شغلى مع الاخذ فى الحسبان ان استمر حتى الساعه السادسه او السابعه مساءا مساءا ودى ميزه لانهم بيجيبوا وجبه بجد فاخره بمعنى الكلمه وعلى بال ما ما اوصل شقتى فى المندره احط دماغى انام من التعب واصحى على آذن الفجر .
=الاسبوع التالت اشراف على شغل فى احدى مدن القناة وده بيستمر اسبوع وبرجع على الفندق الغدا وبعدين صلاة المغرب واتمشى لغاية العشاء على خليج السويس .
واعتقد اللى بعمله ده مش هروب من نفسى ولا حاجه بل بالعكس هو متعة نفسيه و بدنيه انتى ما تعرفيش ان لو كنتى شوفتينى قبل الشغل وبعده هتقولى عمو صغر سنه 10 سنوات والحمد لله رب العالمين .
اللى بعمله ده وفاء للانسانه اللى بتحافظ عليه وعلى بيتى واولادى وزى ما قلتى ام مصريه بمعنى الكلمه ومريت بأزمات نفسيه قبل كده كتير اووى واعتقد انك تذكرينها عندما كنتى تشاهديننى على شات مصراوى اكتر من 16 ساعه فى اليوم وكانت بتستحملنى ... تفتكرى بعد كده ممكن أفكر اعملها و اتجوز ورغم ان ده شئ عادى فى الصعيدى صدقينى يا ابنتى سأفقد كل احترامى لنفسى لو عملتها مره تانيه ربنا يحميها ويحميكم من غدر الزمان .. زى بعضه (مش هوقع بأسمى المره دى ),
مع خالص تحياتى لحضرتك وللاسرة الكريمه .

راجل صعيدى يقول...

شوفتى عمو عمل ايه البوست اتبعت كام مره مش عارف دى بقى خيابه منى ولا من الكمبيوتر ؟؟؟؟

Unknown يقول...

اللي بيسمع لكلام الناس عمره ما هيرتاح ، لإن الناس مبيعجبهاش العجب...

shimaa elkholy يقول...

راجل صعيدى

هو الوفاء جميل جدا طبعا بس يعنى انا لو مكانها احب ان جوزي يتمسك بيا عشانى انا مش عشان الوفاء والعشره بس

ولعلمك المجتمع ظالم للكل مش الست بس

انا بس اتكلمت عن الست

وانا قلت المجتمع ككل بيظلم الست مش الراجل هو الى بيظلمها

والظلم ده الى واقع على الست هو الى خلاها فى وضعها الحالي الام المصريه عندها قصور فى نواحي معينه ماهو لازم يحصل خلل بقى

وده الي انا باقوله الظلم مش عليها لواحدها بيقع توابعه

نورتنا يا فندم ولا يهمك من التكرار ده اوقات من الاكسبلورر وانا مسحتهم

shimaa elkholy يقول...

المستفز

اينعم هو كده فعلا

نورت يا فندم

فاتيما يقول...

يعنى الواحد يختصر ازاى ف الموضوعات الكبيرة دى ؟؟

يا خراى عليكى يا صباصيبو

بصى يا ستى

الزوجة المصرية
ما هى الا نتاج لأسرة مصرية صميمة
قوامها أب و اخاوت رجالة ليهم حقوق و مكانة مختلفة و درجة اولى تقريباً
و ام و اخوات بنات فى الدرجة التانية
معلوم سلفاً ان الراجل مستقبله و طموحاته و اى حاجة ف هذا السياق رقم واحد عشان يعرف يفتح البيت و يصرف ع اللى فيه و يجوز العيال ...الخ
بينما دور الست اساسى انها تاخد بالها م العيال و الراجل دا مش موجود و بيجرى على اكلهم و ..الخ
خلاص الدورين دول بقوا كدا
حتى بعد التغير الأقتصادى
و بقت الست بتشتغل
كان يفترض يحصل بعض التبديلات ف الخريطة ...لكن للأسف دا محصلش
لأن المرأة المصرية بطبعها عاطفية
صعب عليها تتخلى عن مسئولياتها العاطفية حتى و تديها لحد تانى ..لأنها حاسة ان محدش هيحب عيالها اكتر منها
حتى الأب كمان
... انتى معاكى حق ف مطالبك
لأن الراجل المصرى للأسف بيتربى يكون انانى ..ميفكرش غير فى مستقبله و مصلحته بس ...مش الكل طبعا
بس لو ابوه كدا ..بيطلع كدا
المسألة عاوزة شوية تنازل م الطرفين
او ثورة حريمى
نيران صديقة يعنى
و غالبا الست لما تقوم الدنيا ..بتعرف بشفافيتها اتجاه الرياح و الخسارات المتوقعة فبتلم الدور تانى ..و قد تعيد الكرة من جديد لما ااجواء تسمح ...متهيألى كدا

ارجع و اقولك
الجيل الحالى مفيهوش بارقة تغيير لأنهم مضغوطين بما يكفى و ضاغطينا معاهم
و عيالنا هما اللى هيكون فيهم الخير
ان شاء الله
لأننا امهات مختلفات
و بنربيهم بشكل مختلف
و يا رب يكونوا احسن مننا الف مرة
مين عارف ؟!!


بوسات و حضونات
و انا معاكى انتى و الريسة
ف اى ثلة و اى اجتماع الله يكرمك

غير معرف يقول...

المشكله موش في دور الام أو الاخت ... الفكره في تعريف الام عندنا في مصر

الأم بتعمل حاجات كتير أوي وانا شايفه إن الام المصريه بتدلع ولادها زياده عن اللزوم ..

ممكن الواحده تبقى زوجه وام زي الفل بس نعرف الموضوع كويس وكفايه دلع في العييال :)

تحياتي

غير معرف يقول...

ايه الرعب دا بئااااااااااااااا


بئا تجيبي سيرة اللهم أحفظنا ويجعل كلامنا خفيف عليها

أشتاتا شلوت ياختي

حديد وبعيد

دنا من العنوان والخضه هيغمن عليا

momken يقول...

شوفى ياستى

كلام الناس مره ما هيتوقف

عارفه كمه عيب هى الى مضيعانا مافيش حاجه اسمهاعيب

فى حلال وفى حرام

ونقيس كل تصرفتنا على ده

بالنسبه للاولاد ايام الصحابه كانا بيجيبوا مربيه للاولاد
ومرضعه للاولاد
وخادمه لربه البيت (الزوجه)
ده من الف ووربعميت سنه

مكنتش الزوجه شغلتها تغسل وتنضف وتغسل
لاء
ومكنش شغلتها تربى العيال
لاء هى زوجه وامرأه بل هى امرأه فى المقام الاول
ثم زوجه

يبقى الست
تعم اى حاجه عاوزاها وتقيسها بالحلال والحرام
اما المجتمع يولع فى نفسه
المجتمع ده مجرد شويه ناس عماله تطلع البلاوى كلها فى ناس تانيه

انا متفق معاكى جدا جدا
وعلى كل رجل تغسل له زوجته ثيابه ان يشكرها فى كل مره والا يعتبره حق مكتسب

وعلى الابناء ان يقدموا حق امهاتهم حتى اخمص قدميها
ولم نسمع ان على الام اى واجب تجاه الابناء ابدا فى اى شريعه
يكفى انه ببسااطه كانت سبب فى وجودهم فقد اهددتهم الحياه وهذا كافى جدا

دمتى دائما رائعه


تحياتى

كلمات من نور يقول...

جيتي عالجرح يا ندى الياسمين

بس شوفي المجتمع مش بيكتم ولو كنتي رابعه العدوية .وعليه أنا بارفض هذا المجتمع ويتكلم براحته أنا درست لنفسي حاجات كتير أفادتني و افادت أولادي وانعكست عليهم إيجابيا ...و بجد لو كنت صحتي زي زمان كنت ناوية أروح كندا أدرس الطب البديل ودي فكرة وارده جايز نهج قريب ونروح كندا و أدرس من تاني و أدخل الجامعه ...بجد مجتمعنا مجتمع عجيب سيبك منه طالما بتراعي ربنا في كل اعمالك وبتراعي زوجك و أبنائك يبقى خلاص...مساء وردي

شمس النهار يقول...

يانهااااااار ابيض

ده لو اتكلمت في الموضوع ده عايزة بلوجر ملاكي كده لوحدي

ماعلينا الطيب احسن
:))

بتدني في مالطه ياماما

بس علي فكرة المجتمع بيتغير اوي دلوقتي
والعيال من كتر ماشافوا امهم او ابوهم(اه ماهو في اباء برضه بيتحطوا في مواقف انيل علشان بيكون في ايده يجري ومابيجريش علشان البيت والاسرة والاولاد)
المهم العيال دي من كتر ماشافوا ماما او بابا دفنوا نفسهم بالحيا علشانهم بتيجي معاهم بالعكس
وراجعي نسب الطلاق اللي في ارتفاع
لا البنت بتستحمل جوزها يقول لها بم
ولا الولد بيستحمل مراته تقول له بم
وكله علي امأذون عدل
:))
هدي اللعب اعملي اللي يرضي ربك ونفسك واتكلي علي الله
:))

sony2000 يقول...

والله عندك حق
رضا ربنا اولا
ثم نفسي
بعدها كل حاجه تيجي

بنت الغربة يقول...

حبيبتى الغاليه صبرنى
موضوعك رااائع وحقيقى ميه فى الميه
وانا من زمااان قوى اتربيت على ان الست ست..حتى لو عندها 10 عيال..
ماما حبيبتى كانت دايما بتقول كده..
وعودتنا دايما اننا نهتم بنفسنا حتى بعد اجواز والخلفه...دايما تقولى مش معنى انك اتجوزت يبقى خلاص تبهدلى فى نفسك..لازم تحسى بنفسك كست علشان تعرفى تبقى ام...ومش معنى انك بقيتى ام ..انك تبطلى تبقى انثى...
ودايما امى ( ربنا يخليها)بتحب تتعلم كل جديد لدرجة انها اخدت كورسات اوفيس علشان تطور شغلها..وعودتنى ان اللى يحاول يرضى الناس بيخسر نفسه..
علشان كده هى الحمد لله ناجحه فى شغلها
وكمان ربتنا كويس...
انا باحاول ابقى كده مع ولادى..
ومش شرط علشان مش باشتغل ..اعزل مخى عن العالم الخارجى...
وكل الكلام اللى سمعتيه من الناس انا سمعته ..وسمعت اضعافه..لدرجة انى لما كنت فى السعوديه ودبى كانوا مش مصدقين انى مصريه...علشان مهتمه بنفسى وشغلى..
من الاخر ياصبرنى...طزززززززززززز فى كلام الناااس ..اهم حاجه رضا الله...
وزى ماقال الدكتور اسلام..
الانسان بيعيش مرة واحده..
واللى مش عاجبه .....يشرب من البحر
تحياتى

د. ياسر عمر عبد الفتاح يقول...

أنا شفت الأم المصرية ,, وكانت أم عظيمة على فكرة

ودي أمي

لكن لسه مشفتش الزوجة المصرية
أول ما أجربها هاجي أرد على طول
أصل أنا مبحبش أتكلم عن حاجة معرفهاش


(موضوع جميل وقيم على فكرة)

صوت من مصر يقول...

مش عاوز اتجوز بسبب كده

فاروق سحير ( فاروق بن النيل ) يقول...

ندى الياسمين .....
مسستى موضوعا هاما جدا فعلا المرأة المصرية عادة مظلومة والسبب هوه المجتمع موش زوجها وأقصد المجتمع كله يعنى الحكومة موش إخواتها وأخوها وصاحبتها وبنت عمها وبنت خالها وبنت عمتها وبنت خالتها وإبن خاله وإبن خالتها وخالها وعمها وعمتها دول أهلها
المشكله هيه :
هل تعرف المرأة تنسق بين العمل والبيت؟
إذا كانت الإجابة بنعم بجد فأهلا بعمل المرأة وإذا كانت لاتعرف ومقصرة فى ذلك فلا للعمل مهما كان .
أنا شخصيا كان فى بداية زواجى هذا شرطا أساسيا لإستمرار زوجتى بالعمل وفعلا تم حتى الآن ونتعاون على قد مانستطيع حتى إنى الآن على التقاعد منذ ثلاث سنوات ونصف ومازالت زوجتى بالعمل وأمامها سنتان للتقاعد وأقوم أحيانا بإعداد الطعام لهم إذا تأخرت أو حدث ظروف بالعودة من العمل ولم يتأثر أولادنا حتى الآن بشيئ سلبى( مهندس يعمل منذ أربع سنوات+ دكتور بالسنة النهائية بطب عين شمس أمامه ثلاثة شهور للتخرج إن شاء الله تعالى)
هل فهمتى قصدى عزيزتى ....

غير معرف يقول...

كل ده جواكى من الناس وعمايلها

ع فكرة حكاية الناس دى بروبلم كبيرة عندى اينعم انا لسة حتى مش اتجوزت لسة فى كلية بس وصلت لنفس النتيجة اللى وصلتى لها واللى اعتقد ان اى حد عنده عقل هيوصل لها بعد شوية تفكير

ان الناس عمرها ما هترضى حتى لو عملتى اللى عاوزينه هيخلقوا حاجة مش عجباهم
والناس عمرها ما بتسكت على طول لوك لوك لوك ومش الستات بس لا كله

و ع فكرة الناس اللى بتنتقد بعضها لما بيكونوا فى مواقف الناس اللى انتقدوهم بيعذروهم او بيلاقوا انهم كانوا صح

وع فكرة كمان مش كل الناس بتتكلم على بعض الناس الفاضية اللى مورهاش حاجة اللى مخها فاضى اللى مش بتراعى لا مشاعر ولا ظروف غيرها هى بس اللى بتتكلم واعتقد ان الناس دى مش تستاهل اى مساحة من تفكيرنا او وقت حتى اننا نفكر فيهم او نعمل لهم حساب


لو بخصوص الام فكونها تتعلم ده هيفيد ولادها و ولادها نفسهم هيبقوا فخورين بيها انها متعلمة و هتقدر تبقى فاهمة هما عايشين ازاى من اختلاظها بالناس وحتى مع جوزها اعتقد اما مخها وتعليمها يكون راقى ده فى حد ذاته بيحسن التواصل والعلاقة بينهم كتير والناس اللى حواليها نفسهم وقت اما يحتاجوا حد فاهم هيدور عليها

كل اللى فات ده وجهة نظر ممكن تتغير بعد اما اتجوز وممكن تبقى اقوى مع الوقت الله اعلم

المهم انتى بس متزعليش نفسك واعملى اللى نفسك فيه طالما يرضى ربنا وانتى مقتنعة بيه ومش بيجى على حساب لا ولادك ولا جوزك ولا اولوياتك


معلش بقى دوشتك :D

سلاموز

غير معرف يقول...

يا نهار الوان انا كتبت كل ده

معلش بقى :D


مش عارفة ليه حاسة ان التعليق ملوش علاقة بالموضوع او له علاقة من حيث المبدا وهو كلام الناس مش بالحتة اللى بتتكلمى عليها وهى حتة الام والست المصرية

برده برغى كتير

كفاية كده :D

shimaa elkholy يقول...

فاتيما

الحكايه اصلها مش حكاية ظلم رجل او تفضيل الرجل عن الست

انما هى الست نفسها تبخس حقهاجتمع

المجتمع ككل مش الراجل بس

shimaa elkholy يقول...

فتاه من الصعيد

لا فض فوك فعلااااااااااااااا دي مشكله بجد مهمه اوي وانا اتكلمت فيها قبل كده ولسه هاتكلم فيها تاني

احنا بندي للعيال دلع زياده ولعلمك ده مش فى مصلحتهم اولا ومش فى مصلحتنا كمان على حسابنا

بجد لا فض فوك او بالبلدي يسلم فمك يا شربات
ههههههههههههههه

نورتي

shimaa elkholy يقول...

مصري جدا

هههههههههههههههه لا انت هانشوفلك زوجه لبناني مزه فى المقام الاول وتطلع عليك بقى القديم والجديد

shimaa elkholy يقول...

ممكن

يا سلام يا سلام يا سلام

ومما تقدم نتاكد ان ممكن لسه ما اتجوزش

ولما تتجوز يا ممكن وبعد الجواز بعشر سنين اوعدني يا راجل لو عشنا وكان فى عمر
او مش مهم يعنى اكون انا عايشه بس يعنى افتكرني كده وافكر البؤين الحلوين الى انت قولتهم فى المدونه هنا اهون وشوف انت طبقت منهم كام في الميه

على فكره كلامك صح ميه فى الميه ولما باقوله الناس بتزعل مني ويقولوا بتقيمى علينا الستات

نورت

shimaa elkholy يقول...

كلمات من النور

امانه عليكى لو روحتى كندا تاخدينى معاكي عشان فى دبلومه عايزه اخدها من هناك والله وفكرت جديا الاقي حل انى ادرس عبر الانترنت عشان صعب عليا التنقل

المهم ربنا يوفقك واتمنالك تحققى كل الي نفسك فيه

وعندك حق مش بيتكتم والله

shimaa elkholy يقول...

شموسه حياتي

ياريت يا جميل يكون المجتمع بيتغير فعلا للاحسن ياريت بس مش باين


والمشكله مش فى ظلم الاولاد ولا ظلم الراجل للست لا
المشكله فى ان الظلم سلوك جماعي من المجتمع ككل

تحياتي ومنوراني يا جميل يا وحشاني

shimaa elkholy يقول...

سوني

نورتي يا قمر

shimaa elkholy يقول...

بنت الغربه

ممكن تسلفيني ماماتك شويه ؟؟؟

ههههههههههههههه
ربنا يخليهالك يا جميل
ومتفقه معاكي فى كل كلامك

shimaa elkholy يقول...

د ياسر

بتهيئلي كده احنا نجوزك بقى عشان تدبس ترد على طول هههههههههههههههههههههه
نورت يا فندم

shimaa elkholy يقول...

صوت من مصر

احنا هانتلكك بقى هههههههههههه

بسبب ايه ؟؟ المشكله مش فىالست ولافى الجواز

وعموما لو انت فكرك غير هاتكون حياتك برضه غير

نورت

shimaa elkholy يقول...

استاذ فاروق

عاش من شافك يا فندم

اولا ربنا يباركلك فى ولادك ويخليهم لك
ويديم عليك التفاهم والسعاده ان شاء الله

ثانيا: انا هنا مش باتكلم عن حرية المرأه ولا عمل المرأه

انا اساسا مش باشتغل ومش عايزه اشتغل

وشيافه ان الشغل بتاع الست على الوضع الاجتماعي الحالي ماهو الى ظلومه وانهاك لقواها فى تسعين فىالميهمن الحالات

انا باتكلم هنا مش عن حرية المراه

انا باتكلم عن شخصية المرأه عن الانوثه المتهمه دايما
عن قصر النظر الاجتماعي وتسرعه فى اصدار الاحكام وتحويل النساء الى جثث تاكل وتشرب وتنام

تحياتي لحضرتك ونورت

shimaa elkholy يقول...

ستار

لا كلامك فى صميم الموضوع


انا بس قلت الست المصريه لانى شايفه انها اكتر حد بيحصله كده فعلا

وشكرا ليك يا جميل وتنوري ارغي براحتك تماماااااااااا

eng_semsem يقول...

هو عشان الراجل بيخاف على مراته يبقى بيحبسها افرضي بيخاف عليها من عيون الناس ومش عايزها تعيش وسط رجاله في شغلها وفي الشارع يبقى كده كاتم على نفسها على فكره انا بتكلم من خلال تجربه شخصيه مراتي كانت بتشتغل وفجاه قالت هسيب الشغل من غير كلام مني لما سكت قال ده عايز يحبسني زهقت منها ومن والدتها وقلتلها انزلي قالت ده عايز يشغلني عشان ياخد مرتبي لا كده ارتاحت ولا كده ارتاحت لانها مش ناويه تستريح هي عايزه تقرفني رتبي اولوياتك وشوفي مين في حياتك اهم جوزك ابنك بنتك ابوكي امك قرايبك شغلك حياتك الشخصيه نزواتك الغبيه والفسح والخروجات مع اصحابك شوفي مين اهم من مين واللي مش مهم ضحي بيه وانا اسف لو كلامي يزعل

shimaa elkholy يقول...

سمسم


انت كلامك يزعل برضه ؟؟ ليه ده انت بلسم وكلك ذوق ....

سؤال بس يعنى هو نزواتك الغبيه دي موجهه لمين ؟؟؟

ما علينا مش مهم اصلا

انا ماليش علاقه بمراتك اذا كنت زهقان منها ولا عايز تاخد مرتبها مش مشكلتي خالص

كمان لك ولكل الى ما فهموش الموضوع
انا ما جبتش سيرة الراجل ولا الزوج اصلا
بالعكس
انا شا يفه انه مظلوم هو كمان فى النقطه دي

لانه لما يحرموا الست تكون زوجه بيحرموه هو من حقه
انت اساسا ما فهمتش الموضوع وجايز ما قريتوش اساسا
وبتهاجم فقط

ثانيا
مين خلاكم تعملوا اسقاط شخصي على الموضوع
انا لو اتكلمت بصفتي ست فى المجتمع ده
وبشكل شخصي الوحيد الى موافقنى فيه ومش بيعمل زي المجتمع ده هو جوزي اصلا

انا هنا باتكلم عن وضع اجتماعي عام

اما احب اعيطلكم بشكل شخصي هاقول عادي

يارب نختلف من غير ما نغلط فى بعض
ويارب نتكلم عن شركاء الحياه بشكل ارقى من كده

Kiara يقول...
أزال المؤلف هذا التعليق.
Kiara يقول...

يسلم لسانك ياقمريتي

والله كلامك في الجون مش في حد يقدر يرضي الناس المهم يكون راضي عن نفسه ودا من اهتمامه برضا ربنا عليه اولا

ودور الام مش وحش لكن مش ينفع الغي خاصية التفكير وابقي مجرد اله تعمل سندوتشات وتودي مدرسه وتنيم العيال وتقعد معاهم وبس

انا عندي نموذجين بغض النظر عن هما مين لكن كرموز هقول أ , ب

أ : ام بتشتغل وبتودي اطفالها المدرسه وتجيبهم
ولما بيرحو البيت ينامو ويصحو يلاقو الاكل جاهز وتبدا مرحله مذاكرتهم ويجي الاب يكونو خلصو مذاكرة ويقعدو قعده عائليه ويدخلو ينامو وتسهر هي مع الاب
والاطفال كبرت شويه بشوية وبقوا يذاكرو هما
وفي الفتره دي الام بدات تدرس وتضيف لنفسها وبقت قاعده معاهم تذاكر هي كمان لحد اما الاب يجي من شغله واصبح قدام الاولاد مثل ان المذاكرة مش عقاب بالعكس لان مامتهم بتذاكر هي كمان
وفي بريك بيتاخد لما بيتعبو من المذاكرة
المدرسه خلصت ودخلو الجامعه الام كل اما بتوصل لهدف بتحط هدف تاني ومش مقصره مع اولادها ولا زوجها ولا بيتها ليها اصحاب
بتترقي في شغلها
تتكلم معاها تلاقيها حد واعي كل اللي حواليها بيحبها وبيثق فيها
اكبر منها واصغر منها بيستشيرها وبيثق في رايها

نموذج ب

ام خريجه جامعه اتجوزت ومش اشتغلت عشان تتفرغ للاطفال كان اول مشكله سابت عيالها بدون ماتكلمهم لحد اما بقو في سن دخول مدرسه ولسه مش بيعرفو يتكلمو !!
جسمهم ضعيف جداااا
ممكن يقعدو من غير اكل لحد بليل
وياكلو مثلا اول وجبه 12 بليل ومش بتكون وجبه متكامله ممكن يبقي ربع سندوتش وبالعافيه

يومها تصحي الصبح بالعافيه تودي العيال المدرسه ترجع البيت تنام لحد اما العيال يجو تحط الاكل كلو كلو مش كلو هتعمل ايه يعني
الاطفال مش بيعرفو يكتبو الواجب
ومش عارفه تذ اكرلهم
عقلها كل يوم بيضعف عن اليوم اللي قبله
ولا اكنها دخلت تعليم اساسا
ودا حال البيت هم الاب والام الاكل والشرب والفرجه علي التليفزيون وبس !!!

انا مش بلوم علي الشغل او بحط العبء علي انها مش بتشتغل ممكن تعمل اللي عملته الام في النموذج الاول بدون عمل وكان هيبقي اريح كتير ولا ايه ؟؟

اللي هيهمه كلام الناس يبقي عمره ما هيوصل لحاجه

يالهوي انا رغيت كتير اوي وبقالي قرن مش كتبت تعليق بالطول دا بس واحشاني اعمل ايه