الخميس، 11 نوفمبر 2010

انتخابات غير واعية .. فى الفصل


اولا كل سنه وانتم طيبين وربنا يعود عليكم الايام بالخير يارب .. وتاكلوا لحمه كويس بقى فى العيد ده وتعملوا محشي كمان عشان الطماطم رخصت يعنى هيصه بقى

ثانيا موضوع البوست

الانتخابات .. اوعوا حد يفهمنى صح .. انا هاتكلم على انتخابات الفصل عند مريم  بنتى.. من حوالي 3 اسابيع مريم جت قالتلى انهم عملوا انتخابات فى الفصل على رواد الفصل كالعاده

مريم : عملنا يا ماما انتخابات فى الفصل النهارده

انا : كويس مين فاز  ؟

مريم باسف : واحد من الولاد

انا : اممممم وهو مين الى كان داخل من البنات ؟

مريم : نها يا ماما ...( وهنا تتفتح حنفية الرغي ما تتقفلش )

بس هى الاصوات بتاعتها كانت اد الاصوات بتاعة محمد علاء  .. بس المستر عمل بينهم مساباقات عشان حد فهيم يكسب

انا : اممممم.. وانتى ما رشحتيش نفسك يا لولو ..

مريم باسف واحراج : رشحت يا ماما بس ما فزتش ..خدت عشر اصوات بس

أنا : طب كويس يا مريومه برضه ماهو نص البنات اهو هاتنهبي

مريم : بس عارفه يا ماما انا كنت مرشحه نفسي فى الرائده الاجتماعيه ... تعرفي نها خدت اعلى اصوات من البنات .. مع ان يا ماما نها دي اصلا صوتها مش بيطلع .. حتى الاسبوع الى فات مقلمتها ضاعت والداده قالت انها ودتها اوضة الوكيله ... ما رضيتش تروح هناك وحدها وانا الى ورحت جبتهالها .. واحده مش عارفه تعمل حاجه لنفسها هاتعمل ازاي للفصل ؟؟!!

انا : طب ليه يا مريم ما رشحتيش نفس رائده فنيه .. انتى فنانه كبيره يعنى (صحيح بترسم حلو اوي )

مريم :  يا ماما هما اصلا مش فاهمين حاجه .. انتى عارفه مين فازت فى الرائده الفنيه ؟؟ مريهاااان !!!

انا : طب وايه يعنى مالك كده حاقده من جوات قلبك .

مريم  وهى بتضحك : لا يا ماما والله مش حاقده بس مريهان دي ما بتعرفش ترسم اصلااااا ولا تعمل اي حاجه فنيه .. دى بتيجلى انا ومنار نرسم لها فى حصة الرسم .. يبقى  ازاي ترشح نفسها لرائده فنيه وازاي هما ينتخبوها ؟؟؟

انا : بصي يا مريوم انتى عندك حق هما غلطانين بس انتى ما تقدريش تتحكمي فى الناس ورايها ... حتى لو كانوا هما غلطانين عارفه ايه هايحصل ؟؟

هما هايلاقوا ان الرائده الاجتماعيه مش اجتماعيه والفنيه ما بتعرفش ترسم والثقافيه مش عارفه مالها فهيعرفوا  غلطهم .. والمره الجايه لما يجوا يختاروا هايختاروا صح او هيحاولوا يختاروا صح
بس المهم انهم يتعلموا يختاروا .. صح ولا لا
مريم : صح .. بس المفروض كان المستر علمهم بقى يختاروا ازاي قبل ما يبدأوا انتخاب  صح ؟

أنا  وقد افحمتنى : اه فعلا كان المفروض برضه يلفت نظرهم ... بس احتمال هو فكرهم عارفيه

مريم وهى مش عاجبها تبريراتي للمدرس : امممممم .. طيب .. اصلا كله اي كلام  الى مترشحين مش عارفين حاجه والى انتخبوهم كمان مش عارفين حاجه (حصلها زي ما حاصلنا كلنا البنت يا عينى )

ثم استدركت قائله : ماما احنا هانتغدى ايه النهارده ؟؟

انا  وعلى وشي ابتسامه شماته : سمك مشوووووووووي

مريم : اااااااااه طيب ... ماما ينفع انزل اجيب فطير من المخبز ؟؟

انا : نوووووووووووووووووو .. هتاكلي سمك ..

مريم وهى منصرفه : يوووووووه بقى .. طب يلا بسرعه عشان جعانه

.............................................

مرشحين ما بيعملوش حاجه  .. ومش داخلين عشان يقضوا مصالح الفصل

منتخبين اساسا ما يعرفوش يختاروا

بس الفرق بين انتخابات الفصل وانتخابات الى مش فصل ان فى ايد فوق بتلعب الشطرنج

امبارح وانا ماشيه فى الشوارع اشوف المهازل القائمه بدعوى  دعايا انتخابيه .. بجد كنت عايزه اعيط .. ايوه على الى وصلنا له

تعالوا اتفضلوا عيطوا معايا الكلينكس كتير ولله الحمد

هناك 36 تعليقًا:

كلمات من نور يقول...

البنت تقول فطير تقولي سمك مشوي .قيسي بقى الدكتاتورية المنزلية والفصلية والعبثية الكبيرة ..........بس بجد حاجه تغيظ لما الانتخابات المدرسية تبقى كده يعني حتى البنات رشحت بنات متصلحش للقيادة في المجالات ...وعجبي

غير معرف يقول...

كل سنه وانتى طيبه واسرتك كلها بخير
عيد سعيد عليكم
عملت المحشى يا اوختى اول انبارح وجاب ظهرى نصفين
ههههههههههههه
هحاول مفهمكيش صح
ههههههههههه

بس ولله مريومه عندها حق
كلها نظر
ما شاء الله عليها
ربنا يخليهالك يارب
انا بنتى بقا تقولى كان عندنا انتخابات اليوم
اقولها عملتى ايه يا حبيبتى
تقولى حطيت راسى على الدسك ونمت
يا مامااااااااا
من الاخر بتكبر
بوسيلى مريومه
صباحك فل يا قمر

richardCatheart يقول...

ههههههههههههههههههههههههه

ااااااه يا دردر ياختى

الانتخبات عندنا زى الفصل هما مابينتبوش علشان حد يشوف مصالح حد هما بينتخبو علشان يسدو الخنات الفاضيه

للاسف احنا مش واقعين فى اجاباتنا وان ماكنتيش واضحه مع مريم ليه بقى هالبت

خايفين نكسر فيهم الامل اللى اتكسر فينا يا ضنايا ونيأسهم بدرى بدرى

انما الحقيقه مريم قالتها ماحدش عارف حاجه

صباحك فل
وكل سنه وانت طيبه انت وباباكم الصغير والكبير والولاد وماما كل الاهل

adel يقول...

كلينيكس ؟؟؟
لا انا بعيط من غير مناديل
:)

خواطر شابة يقول...

انا حأحكيلك حاجة بعيد عن السياسة لكن تصب في نفس الخانة خانة الناس اللي مبتعرفش تختار
انا متابعة لبرنامج نجم الخليج وهي مسابقة غنائية فيها اصوات في المستوى وفيها بالمقابل ايضا اصوات ضعيفة ودخيلة على الفن والبقاء في البرنامج يعتمد على تصويت الجمهور الحلقة الماضية لجنة الحكم كان حيجيلها انهيار لجنة الحكم مكونة من انغام والملحن فايز السعيد والمطرب عبد الله الرويشد صدمتهم كانت من ان من يختارهم الجمهور هم اضعف الاصوات وأقبحها ومن يستحقون البقاء يغادرون واحدا بعد الاخر
عزيزتي استوقفني الامر فعلا لانه اكيد احنا فينا حاجة غلط
دمت بود

حنعيش يعنى حنعيش يقول...

ياخوفى توكلينا فى الليالى سمك مشوى غصب عننا ...
احلى واجمل واروع تعبير سمعتة عن الانتخابات اللى مش بتاعة الفصل:
وبما اننا ابناء الجالية المصرية فى مصر .. فلا يحق لنا التحدث عن هذه الانتخابات ...

momken يقول...

والله انا اتفق مع بنتك جدا

اساساً الى بينتخبوا مش فهمين والى مرشحين نفسهم مش فهمين
والفرق بين الفصل والى مش فصل
حوالى مليون كيلو متر بس (مساحه بلدنا)

فرق مش جامد

تحياتى

sony2000 يقول...

من غير ماتقولي
عرفه كل حاجه
لانو بيحصل ادام عيني بردو
هاتي كلينس تاااااني
ويلا
عاااااااااااا

رحاب صالح يقول...

لعلمك بقي السمك المشوي افيد جداااا اساليني انا ما احنا بلدنا مشهورة بالسمك وطول الوقت ناكل سمك ...
بصراحة مريومة صعبت عليا ومعاها حق اووي
طالبنت دي ذكية جدا علي فكرة وده عيب خطييييييييير في الزمن ده

أحمد عبد الحميد يقول...

فعلا إحنا بقينا عايشين ماحدش عارف حاجة... والأنيل إن ماحدش عايز يعرف حاجة... لأ والأنيل من كده الديكتاتورية اللى حضرتك عملاها دى, حرام عليكى يا شيخة البنت مش عايزة سمك وعايزة فطير (ألا صحيح السمك المشوى ده كان معاه رز أبيض وطحينة؟ )

صوت من مصر يقول...

بنتك فكرتنى بنفسى
وانا فى اولى اعدادى كان فى انتخابات فى الفصل وانا برضه كنت برسم وحلو بس بطلت بس معرفش ليه اترشحت انى اكون مجال العلوم وكده مع انى كنت فاشل فى كده
وخدت اصوات قليله بس نجحت لان ساعتها الاصوات كانت بنسبة 99 % وانا كنت 1% ضد ولد اسمه قوسطنطين فاكر اسمه بس هو عشان كان لعيب كوره وموز وشعره اصفر وامور نجح
اصل الواد ده كان ابن ناس قوى

تامر علي يقول...

على الاقل الانتخابات عند مريم نزيهه ومافيهاش تزوير فممكن حالها يتصلح بقليل من الوعي اما اللي في الناحية التانيه .... مفيش فايزه :)

راجل صعيدى يقول...

قبل اى حاجه كل سنة وانتم كلكم طيبين وبصحه وسعادة وخير وهنا يارب ... المثل بيقول هذا الشبل من ذاك الاسد .. لكن فى حالة مرمر بنقول هذه البنوته مامتها صبرنى يعنى هتجيب ده كله من فين غير منك انتى .. ربنا يحفظها ويحميها ويبارك لك فيها .
طبعا بتقولى الراجل ده يغيب وكل كام شهر يعلق مرة أعتقد انك تعرفين سبب بعدى عن النت بصفة عامه اولها شغلى اللى عامل زى شغل كسينجر وزير خارجية امريكا فى السبعينات (طبعا انتى ماتوعيش عليه ) وده كان له رحلات مكوكيه بين مصر وأسرائيل من أجل أن يصل الى السلام .... انا بقى رحلات مكوكيه مابين السويس / أسكندريه رايح جاى كل اسبوع وطبعا فعلا مش بلاقى وقت أقعد على الكمبيوتر او بمعنى اصح اللى بحبهم وأحترمهم كلهم أختفوا .
النهارده بقى وانا فى البلكونه اشرب قهوة الصباح زى ما بيقولوا لقيتنى بسمع أغانى شعبية لجزار قريب من الشارع بس هيه هيه نفس الاغانى اللى كنت بسمعها من 3 سنوات وجدتنى لا أرادى أفتكر ( ايجى / اليس / حلمبوحه /قوت القلوب / ساره / ندى / زقازيقى /على بالى /تيتو ......الخ أسماء لاشخاص كانوا مثل ابنائى وفعلا زى ما كان بيقولى محمد يا بابا ماتخدش فى بالك ولاتهتم ده كلام شات وكلهم ولا حتى بيفتكروك بعد ما يقفلوا ..... بعدها بزمن طويل اكتشفت صدق كلام أبنى .
تعرفى فى هذا اليوم الكريم لم أجد منهم من سأقول له كل سنه وانتى بخير وهيرد عليه غيرك يا أم خالد ومتنسيش نصيب عمو من لحمة الخروف بشرط تكون مستويه والمنصوره مش بعيده عن اسكندريه وانا هكون هناك من 21 حتى 27 نوفمبر هتكسبى ثواب فى عمو .
كل سنه وانتم كلكم طيبين وبخير وابقى قوليلى عيد ميلادك ال 30 أمتى عشان أقولك كل سنه وانتى طيبه ... انا عيد ميلادى ال 25 كان 28 أكتوبر (ماتخديش فى بالك ال 30 سنه التانيين دى غلطه فى شهادة الميلاد ) ربنا يبارك لكم انتى والمهندس رضا ويفرحكم بأولادكم واذا صادفتى حد من اللى قلتلك عليه سلميلى عليه وقوليلهم عمو مدحت عمره ما بينسى انسان . مع خالص تحياتى وأمنياتى .
عمك مدحت

shimaa elkholy يقول...

كلمات من نور

ايوه انا ديكتاتوريه طبعا فى البيت او ده الى بينتهي له الامر مهما طال النقاش ههههههههههههه

shimaa elkholy يقول...

الحب الجميل

وانتى طيبه يا جميله

ما شاء الله بنتك مكبره دماغها على الاخر ههههههههههههههه
مصريه اصيله
منوره يا جميل

shimaa elkholy يقول...

قطتي الجميله

وحشاني

لا خانات فاضيه ايه دول خانات مليانه وحياتك مليانه متخصصين فى تقليب الشعب المسكين صباحا مساءا

وكل سنه وانت طيبه يا جميل

shimaa elkholy يقول...

عادل

طب كويس ان الشتا جه عشان تلبس بكم
نيهاهاهاها

shimaa elkholy يقول...

خواطر

ايووووووووه عليكى نور كلها زي بعضها بعيد عنك بنطبش بنطجن بنهبل الى يعجبك نقيه
منوره يا قمر

shimaa elkholy يقول...

حنعيش يعنى حنعيش

الجاليه المصريه فى مصر دي عاجباااااااااااني جدا برضه جايبه منين اعترف ههههههههههههههه

والسمك المشوي جاااااااااااهز لليالي كلها هههههههههه

shimaa elkholy يقول...

ممكن

اه مليون كيلو متر فعلا مش كتير هياها

تحياتي يا فندم

shimaa elkholy يقول...

سوني

اوك هاجيبلك علبتين 750 منديل ويلا قصاد بعض منوووووووووووره

shimaa elkholy يقول...

رحاب صلاح
انتى هاتقووووولي ده السمك بتاعكم حبيبى سمك البرلس

على رايك عبيط خطيييييييير فعلا

shimaa elkholy يقول...

ابو احميد

سمك وطحينه ورز وسلطه خضرا ومخلل لفت
اقطع نفسي بقى هههههههههههههههه

فطير ايه الي راحه تاكله مش فاهمه

shimaa elkholy يقول...

صوت من مصر

شكلك انك انت الى انتخبت الواد قسطنتين ههههههههههههههههه

اصل احنا بنطبق قوانين من غير ما نفهم المفروض ان الانتخابات دي معموله عشان تبىق محاكاه للديموقراضيه ما حدش علم العيال ولا فهمهم ولا وعاهم

يبقى لزمتها ايه ؟؟؟؟؟؟؟؟؟؟

shimaa elkholy يقول...

تامر علي

اااااااااااااه فايزه مين دي مااااااااتت يا ريس مااااااااتت

shimaa elkholy يقول...

راجل صعيدى

يا فندم حضرتك تيجى وتنور فى اي وقت

وعلى فكره انا لسه باكلم بعض الناس الى كانوا معانا فى شات مصراوي قبل ما يتقفل اولهم احمد 30

وقوت كمان اوقات باكلمها

وكلام ابنك مش صح اوي يعنى نص نص
ههههههههههههه

ربنا يقويك يارب ويصلح حالك وخروف العيد كله تحت امرك يا فندم ولا يهمك

نورتنا وداما تنورنا يارب وكل سنه وانت طيب وبخير وسلام انت واسرتك كلها

الطائر الحزين يقول...

ليس بالضرورة من يعرف يرسم ان يعرف مصلحة الرسامين

ممكن جدا من له وعى فى الادراة ان يقود قافلة من الرسامين وهى حتى لا يجيد مسك القلم

هنا الكاريزما لها عامل ودور كبير

والبنت التى لا يخرج لها صوت فى الفصل ممكن ان يكون لها دور فى التخطيط ومسك القلم


المهم ان يختار الناس الشخص ولهم قناعتهم بهذالاختيار وعندهم مي يبرر ذلك

بارك الله لكم فيها

shimaa elkholy يقول...

الطائر الحزين

شوف يا فندم انت معاك حق تماما فى الى بتقوله ده بس فى حاجه اسمها الحد الادنى من العلم بالشيء

يعنى ما اجيبش واحد دكتور اطفال واعمله وزير تعليم


يعنى ما اشغلش واحد معاه اداب انجليزى فى معمل تحاليل

يعنى ما اخليش رائد الفصل للمجالات الفنيه ما عندوش حس فنى

ما اخليش رائد الفضل الاجتماعي اصلا مش اجتماعي ما ينفعش فى حد ادنى

مش لازم يكون اشطر دكتور فى البلد عشان يبقىوزير ا لصحه

بس لازم يبقى طبيب ولا ايه رايك يا فندم ؟؟؟

Soul.o0o.Whisper يقول...

اهئ اهئ

كل

اهئ

سنة

اهئ

و انتى

اهئ

طيبة

اهئ

اهئ

و عيد

اهئ

سعيد

اهئ

عالجميع

اهئ

اهئ


فين الكلينكس بئا

اهئ اهئ اهئ

هههههههههههههههه

كل سنة و انتى طيب يا صبصب

richardCatheart يقول...

كل سنه وانت طيبه يادردر يارب بخير وسعاده انت والولاد وابوهم

يعود عليكم بالخير وكل سنه وكل الاهل والحبايب بخير يارب

ستيتة يقول...

كل سنة وانتي طيبة يا ابلتي
ويارب السنة الجاية نكون جماعة في مزدلفة نايمين بالبطاطين متكتكين وفرحانين ومستنين طواف الإفاضة :)

romansy يقول...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين

shimaa elkholy يقول...

سوووووووووووووول

حبيبتى وحشاني انتى فين يا بنتى ومختفيه ليه

كل سنه وانتى طيبه يا جميل ودايما بخير وسلام يارب

shimaa elkholy يقول...

قلب القطه وانتى طيبه وبخير يارب مرسي يا جميل

shimaa elkholy يقول...

ستيته

ااااااااااااامين يارب

بس ما عادش حد بيبات فى مزدلفه بقى من الزحام

بس احنا نروح هناك ونبات فى ايتها مكان

ربنا يخليكى يا جميل ووحشاني

shimaa elkholy يقول...

رومانسي

يعود بالخير عليك يارب ويكرمك ويسعدك