شبح فارس الاحلام

استقيظت صباحا وغسلت وجهها ورفعت وجهها الى المرآه  عارٍ

بلا مساحيق ولا زينه ولا اقنعه ايضا

فتسمرت قليلا  وقالت ما هذا لقد اشتقت الي فعلا 

اشتقت للحقيقه  اشتقت لاصلي

وتأملت صورتها ثم صرخت من انا وكم مضى من عمري  وماذا فعلت فيما مضى

وهل ما تبقى يكفي لتحقيق امالي ؟؟

اغمضت عيناها فى حسره ومرت امامها مشاهد متلاحقه وسريعه من حياتها كل مشهد مر كبرقه سريعه فى سماء عقلها

فهذا زميل الدراسه الذي احبته بقلب غض وهى تفارقه بلا  عوده

وهذا يوم تخرجت فى كليتها بتفوق عازمة على الا تلقي بالا لمعوقات النجاح جميعا ولا سيما امور القلب الخادعه

وهؤلاء وجوه مجتمع المثقفين الذين لا طالما شجعوها على التقدم والنجاح وتايد منطقها فى  الحياه

وهؤلاء وجوه الرجال الذين طالما تقربوا اليها سابقا وخطبوا ودها فى حلال ومعه وجهها الرافض دائما لهذا النوع من المعوقات .

وهذا وجه ابيها رحمه الله وهو يترجاها ان تقبل باخر من تقدم لها فى حياته حتى يطمأن عليها

وهذه وجوه  زميلاتها   والتى قابلتهم على مر السنون وقد زخمت حياتهم بالعمل والمسؤليات والاطفال والمشاكل  والنجاح والفشل ... والسعاده ايضا .

وهذا وجهها فى المرآه ظهرت  عليه خطوط زمن ووحده وجليد

وهذا قلبها قد انسته الخفقان فصار وهناً

وهناك في ركن منزوٍ   هذه شهاداتها وهذا مقعدها الوثير العالي المقام الذى طالما حلمت به ونالتة بالفعل .

وهناك فى مكان بعيد او قريب لا تعلم هى لوحه لوجه تعرفه جيدا

 صوره لفارس احلامها والذى كان يعلو فى المقام عام بعد العام

ولكنها اصبحت لا تراها بوضوح اصبحت مشوشه

اصبح شبح لفارس الاحلام .

افاقت على دقات الساعه وايقنت انها تاخرت على موعد عملها فقررت ان تذهب اليوم بلا مساحيق بلا زينه بلا  اقنعه

قررت ان تكون وحدها اليوم فى هذا العالم  بوجهها الحقيقى بقلبها الوهن وعقلها المثخن بالافكار

فمن يا ترى عساها ان تقابل

بل من سيقبلها ومن سيفهمها ...

وهل ستقابل يوما من يعيد الملامح للوحة فارس الاحلام

انقراض الجين الرجولي

قبل ما ابدأ كلام عايزه اقول لشمس البلوجر الجميله شكرا عشان هى كلمتنى النهارده وادتني كلمتين فى العضم عشان سايبه مدونتي العنكبوت ماليها ونبهتنى لشهر التدوين اليومي وعليه هحاول كل يوم اجي اصدعكم هنا J

يلا نرغي  ومش فى السياسه احسن جالي هس هس من السياسه

برغم من ان العنوان عن الجين الرجولي انما بكل صراحه وحياديه الجين الانوثي كمان بعافيه بس هانبدأ بالرجولي ونوضبوهم الاول لان موقفهم اهمممممم

انا ملاحظه كده والله اعلم ان فى انقراض للجين الرجولي .. ايون بيختفوا .. وبيحل محله جين تاني من الجبن والاستنطاع .. ايوووون استنطاع

طيب كل واحد  وواحده هنا وبجد وبحق وحقيقى يقولي يعرف كان نطع قاعد فى بيتهم مش بيشتغل ومستنى امه ولا اخته ولا مراته تصرف عليه .. بكل امانه عدوهم وقلولي

انا عن نفسي اعرف كتير ....

 بس بس بس عارفه البؤين الحمضانين الى هايتقالوا: مافيش شغل   البلد بايظه البتنجان مخلل .. حافظه هذه الاسطوانه من فضلكم

هاديلكم مثال لطيف

واحد اتخرج بالعافيه بعد ما كفر اهله دروس وسقوط وبلاوي وبعدين لما اتخرج امه وابوه جابوله ميت شغلانه فى قطاع خاص مافيش فايده مش راضي ولما يروح ما يكملش كام يوم ويسيبها وبرنامجه اليومي بين الكافيه والنت والصرمحه فى الشوارع  وسجايره وموبايله ومواصلاته وصياعته مدفوعين مقدما

امه غلبت فيه راحت باعت دهبها واستلفت من طوب الارض وجابتله فيزا السعوديه وسافر قعد هناك ست شهور غير 3 شغلانات وبعدين امه لمتله فلوس تذظرة العوده ورجع

رجع  بالعافيه وبمجهودات الاهل والمعارف اشتغل فى شركه قطاع خاص بس كبيره واستقر فيها اخيراااا واول لما اشتغل راح يعيط لامه عشان عايز يتجووووز البنت الى حبها

واهله جابوله شبكه وشقه و ونص عفش وحماه النص التاني  وهو تقريبا حوش فى الليله دي بتاع الفين جنيه .. واتجوز صلاة النبى الحمد لله بس لواحده بقى

مراته بتشتغل .. سنه اثنين  الشركه استغنت عنه .. اه عادي قطاع خاص زي باقي الناس يعنى .. وبدأت رحلة البحث عن عمل ... اناااا اشتغل بياع فى محل ؟؟ّ اناااا اشتغل مندوب ؟؟؟؟ اناااااااا اشتغل محصل ؟؟؟!!  الحقيقه كان المفروض بقى اناااا اشتغل ؟؟ واسيب الانتخه لمييييين

وتمر الشهور والسنه الاولى والتانيه والثالثه ومش عارفين هايكمل لحد امته ... وهو ما بين مانتخ فى البيت او حد يجيبله شغل يكون شيك كده وحلو ويشتغل فيه شهرين  بالكتير ويقعد تاااااااااااني

واكل نايم شارب هو وعياله من عرق مراته او من ادين اهله مثلا ... وهو يعيش فى عالم الانتخه ويبرر لنفسه

البلد واقفه ... البطاله ... الحكومه بنت كلب.... الثوار خربوا البلد... العيشه زفت ....  ما حدش مقدر مهارااااااتي

القطاع الخاص مستغل...البتنجاااان مخلل

انا عن نفسي اعرف من العينه دي بتاع ثلاثه اربعه ... اه والله العظيم على اختلاف ظروفهم واعمارهم  ومراحل الانتخه الى وصلوا لها

• ما حدش يقولي مافيش شغل ... انزل يا حبيبى دور على شغل ما تنامش زي خيبتها فى البيت ومستنى الشغل يجيلك لحد عندك
• ما تتأمرش على الشغل وتتعالى عليه اتوكس على خيبتك انت حمار اصلا لو كان فيك خير ما كان رماك الطير .. اشتغل اي حاجه وخد اي مرتب احسن ما تقعد فى البيت عاله على المجتمع
• ما تقولش انا عايزه اشتغل بشهادتي ... شهادتك دي ياعم الامور تبلها وتشرب ميتها.. احنا عندنا ولله الحمد تسعين فى الميه من الكليات ومرتاديها مطلعين ما شاء الله شوية تحف ما بيعرفوش يقروا  اصلا

بياخدوا درس يدوبلهم شوية كلام فى الكوبايه يشربوه ويروحوا الامتحان يرجعوه على الورقه ويطلعوا حمير كما دخلوا

قوم اشتغل يا نطع منك له ما تعيش عاله على المجتمع لو ما لقيتش خاااالص حاجه تشتغلها ولو ان ده مش ممكن روح اتطوع فى اي حاجه خيريه بشكل رسمي

اولا تذكي عن صحتك..... ثانيا تعمل خدمه للمجتمع بدل ما تعيش عاله عليه .....ثالثا هاتتعلم اي حاجه تنفعك بعد كده ....رابعا هاتحطها فى السيره الذاتيه بتاعتك الى فاضيه يكاد يكون مافيش فيها غير شهادة الميلاد بتاعتك يا فالح

على فكره الكلام ده موجه ايضا لطلبة الثانوي والجامعه الى بيقضوا فترة الاجازه يتلطعوا من كافيه لكافيه ومن نادي للتاني .. لا يا بابا اشغل انت طول الباب وعفيتك ما شاء الله مفروض فى سنك ده تشد عربيه نقل ..اشتغل بدل ما تقعد تتفرج على المزز وتظبط مزز وتعاكس مزز وتتمحور حياتك كلها حول عدد المزز الى فى الكون

والبنااااااات ... ما تستهبلووووش ما تعشيش عاله على المجتمع.. اشتغلي فى البيت بدل مامتك ... اخدمي نفسك واتعلمي تبقى ست بيت محترمه وريحى مامتك وخدي ثواب.. واتطوعي فى الجمعيات الخيريه ... وعلى فكره حتى لو كنتى بتشتغلي اصلاااا لازم برضه تساعدي مامتك ما تبقيش عايشه فى البيت طيشه عايزه حد يخدمك شاركي فى البيت الى انتى عايشه فيه

اشتغلواااااااااااا... العمل عبااااده ... الشغل هايعمل منك بنى ادم ... مش لاقي شغل دووووووووووور ما تقعدش فى البيت لف على كعوبك لحد ما تلاقي شغل مش تنام وتانتخ وعايز الشغل يجى يدور عليك وتتأمر عليه

اعزائي الاهالي .. طلعوا ولادكم بنى ادمين  طلعوهم رجاله وستات تفتح بيوت مش تخرب بيوت

طلعوهم افراد منتجين مفيدين لنفسهم ولاسرهم ومجتمعهم

الشغل مش بيتعب  الشغل بيطلع رجااااااااااااااله

الدلع والراحه بتفسد اكتر ما تعالج

الحزم والشد احيانا هم منتهى الحب ... مش قسوه ابدااااا

اتقوا الله فيما حملتم من امانات

الدستور واللجنه التاسيسية..كيف السبيل

اللجنه التاسيسيه للدستور كيف يمكن اختيار اللجنه التاسيسيه للدستور لنعرف ذلك علينا ان نعرف ماهو الدستور

الدستور هو

وهو مجموعة القواعد القانونية التى تحكم علاقة الحاكم بالمحكوم وتحدد نظام الحكم وسلطات الدولة وشكل مؤسسات الدولة وعلاقة تلك المؤسسات ببعضها البعض  وبالافراد

فاذا كان الدستور كذلك فمن عليه تحديد هذه القواعد ؟؟ هل الذي يحددها هو الشعب ؟ ام يحددها الحاكم مثلا او القائمين على السلطه فى الدوله ؟؟

هذا يتوقف على نظام الدوله

كلمة دستور هى كلمه لها اصل فارسي من كلمتين  تعنى كتاب الملك .. وكان كتاب تحفظ فيها قرارات وتعليمات الملك .. فكان هو نظام صياغة الدستور اوامر الملك

  .. فلو كنا نزعم اننا دوله تقوم على النظام الديموقراطي فمن المنطقي والطبيعى ان من يضع قواعد الدستور هو الشعب

ولما كان هو دستور يحدد العلاقات جميعا بصرف النظر عن اقلية واكثرية كل فئه فى المجتمع او فى السلطه  فانه بلا شك ان الدستور يجب ان يكون توافقي وليس براي الاكثريه يجب ان يوافق عليه الجميع او لنقل المعظم

هل الاكثريه البرلمانيه تمثل اكثريه عدديه للشعب ؟؟ قد تكون كذلك .. لكن الوضع الحالي فى مصر هى ليس كذلك

فالاغلبيه البرلمانيه لا تمثل ابدا اغلبيه عدديه فى الشعب فليس السواد الاعظم من المصريين الاخوان المسلمين

ولكن انا ازعم ان السواد الاعظم فى المصريين بلا اتجاهات سياسيه او فكريه محدده فهو مصري مسلم او مسيحى فقط ولا يدري غير ذلك ولقمة العيش الذي يبحث عنها ومنشغل بها

فهل من حق الاغلبيه البرلمانيه ان تحتكر وضع الدستور ؟؟

اذن من نريد ليضع الدستور

اولا : الفقهاء الدستوريين  الذين يتمتعون بالقدر الكافي من العلم والتمكن من صياعة الدستور بشكل متقن وعندهم ايضا الضمير الوطني للعمل لصالح الوطن

امثال د ابراهيم درويش .. استعانت به تركيا فى صياغة دستورها

 د محمد نور فرحات

د نها الزينى

والاسماء كثيره  وذلك لضمان الصياغه المحكمه للدستور

و ثانيا :بعد ذلك يتم اختيار اشخاص معبرين عن كل فئات المجتمع  ويجب ان يكون ذلك وفقا لمعايير مثلا ان يكون غير متطرف فكريا او يكون له مشاركه اجتماعيه وتاثير مجتمعي يناسب المهمه الموكله له بالمشاركه فى وضع الدستور

ويتم ذلك بالمخاطبات للجهات والنقابات  

مثلا بالطلب من النقابات بتقديم ممثل عنهم ومطالبة الازهر بارسال عدد معين ككمثلين عن الازهر والكنيسه كذلك

ولو حد ان احد الشخصيات المقدمه من اي جه من الجهات لم يوافق عليها مجلسي الشعب والشورى المنوطين باختيار اللجنه التاسيسه فيتم مراجعه الجهه مره اخرى والتاكيد على معايير الاختيار التى يجب وضعها مسبقا وتقوم الجهه مره اخرى باختيار شخصيات اخرى ولكن لا يحق لنا ان نفرض على جه الممثلين عنها

كما حدث فى اختيار اللجنه التاسيسيه التى ابطلتها المحكمه الاداريه العليا ان ارسل الازهر والكنيسيه ممثلين رفضتها اللجنه واختارت هى من يحلو لها .. فحتى المسيحين كانوا من الاعضاء فى حزب الحريه والعداله مثلا

كما يجب ان نحرص على ان يكون الدستور يضم المرأه بنسبه معقوله وعلى شباب بل واطفال ايضا فدستور 23 كان يضم طفل عمره حوالي 15 عام ويظهر هذا فى الصوره التى جمعت اللجنه التاسيسيه

وهي من يجب ان تضم العمال والفلاحين وليس مجلس الشعب وبشكل صوري

اما وضع الدستور نفسه

وما تقدم عن الكلام عن الوثائق الدستوريه فلماذا دايما نجنح الى ما هو مختلف عليه ؟؟ حتى فى الدين نفعل ذلك !!

هناك وثيقه متوافق عليها بشكل كامل من كل التيارات وكل القوى السياسيه وهى فعلا وثيقه لا يختلف عليها احد .. وثيقة الازهر ,,, فلماذا نتركها ونكتب ما يسمى بوثيقة السلمي التى تسببت فى معارك ضاريه .. وهى تحمل وضع خاص للمجلس العسكري  وهل هذا ما نريده ؟؟ وهل من يريد ذلك فى مصر غير المجلس العسكري نفسه؟

تلخيصا :

ماذا نريد من الدستور

• التوافقيه: الدستور الذي يجب ان يكون توافقي
  
  
• مصر جمهوريه

• مصر جزء من الامه العربيه

• مباديء الشريعه الاسلاميه هى المصدر الرئيسي للتشريح وعلى غير المسلمين الاحتكام لشريعتهم فيما يخص الاحوال الشخصيه

• الحريات كما جاءت فى وثيقة الازهر
  حرية التعبير
  حرية العقيده
  حرية تكوين الاحزاب
  حرية البحث العلمي
  حرية الابداع الفكري

• تامين تداول السلطه سلميا 

• حقوق المواطنه.. المرأه..المسيحى المسلم .. العرايشى .. المنوفي.. الجميع على مسافه واحده من القانون

فهل يا ساده يا كرام ما زالت هناك فرصه لنتحد يدا واحده كل من يتفق حول هذه المباديئ السابقه لصياغة الدستور حتى نتمكن من صياغته كذلك وبعد ان نحقق الهدف المشترك فلنفترق كما شئنا

لو لم تتحدوا فانتم ليس اكثر من راغبي سلطه يا مرشحينا الاعزاء وسنبحث عن غيركم من راغبي مصالح الوطن فعلا وليس قولا فقطى

مصطلحات سياسيه

 نظرا لاننا كشعب بيحب يفتي فى كل حاجه فى الدنيا والفتاوي دلوقتي الي على الموضه هى الفتاوي السياسيه فحبيت اعملكم شويه تعريفات كده مهمه عشان نبقى فاهمين احنا بنقول ايه عن مين وكده وياريت لو حد عنده مقترحات لتعريفات اكتر يكتبهالي فى التعليق عشان اعمل بوست تاني بيها

هيا بنا نتعرف 

 

ليبراليه : كمعنى لغوي مشتقه من من كلمة liber   والتى تعنى باللاتينيه حر ... من هنا جائت تسميتها بليبراليه او حريه

هي مذهب يرى حرية الأفراد والجماعات في اعتناق ما يشاؤون من أفكار والتعبير عنها بشكل مطلق وبالطبع احترام حرية الاخرين

شيوعيه (ماركسيه ):

: وتعرف بعلم تحرير الطبقه العامله (بروليتاريا) اي الذين يعتمدون فى دخولهم على حصيلة اعمالهم فقط.. واطلق عليها الماركسيه نسبة الى كارل ماركس منظر الشيوعيه الاول  وهى اكثر شموليه من الاشتراكيه  وقد ظهر الفكر الشيوعى بعد الثوره الصناعيه فى اوربا ووجود شريحه عماليه كبيره يتحكم فيها مجموعه صغيره من اصحاب رؤس الاموال ( حيث لا ملكية فرديه وشيوعية الملكيه فكل وسائل الانتاج مملوكه لكل الناس)

اشتراكيه:  الاشتراكيه هى نظام اقتصادي اجتماعي يقضى بان يمتلك  الشعب او الطبقه العامله وسائل الانتاج بمعنى التشارك فى الملكيه ..ويفترض ان الهدف منها هى القضاء على الفروق بين الطبقات والمساواه وهو شيء نظري الى حد كبير ..ويعد النظام الاشتراكي اكثر حرية وديموقارطيه من النظام الشيوعي وان كان منبثق ومتحد مع الفكر الشيوعي نسبيا(تكون الدوله شريكه للفرد فى امواله لصالح باقي افراد الشعب )

اناركيه (لا سلطاويه):

بروليتاريا: هى الطبقه العامله التى يقتصر دخلها على ما تكسبه من العمل فقط

علمانيه : هى فصل الدين عن الدوله وعدم السماح بوجود اي تميز دينى او طائفي فى نظام الدوله .. وكسر لهيمنة اي سلطه دينيه على سياسة الدوله (مدنية الدوله)

:

الراسماليه : هى ملكية الافراد والقطاع الخاص للرؤس الاموال ( تعترف بملكية الفرد) وهى فكر الاقتصاد الحر وحيث يكون التوزيع، والإنتاج وتحديد الأسعار محكوم بالسوق الحر والعرض والطلب، ويحق للملاك آن يحتفظوا بالأرباح أو يعيدو استثمارها.( الاموال او وسائل الانتاج عموما ملك لاصحابها من الافراد)

العولمه :

هى التدويل او فتح مجالات التعاون والشراكه والدمج بين الدول بشكل يجعل من العالم كله كيان واحد وقد اشار الى الفكره كثير من المفكرين فاسماها فوكوياما العولمه ووصفها بحالة فتح الاسواق العالميه ...واسماها كارل ماركس الكوسموبلتى وهى كلمه منشقه عن كلمه يونانيه تعني الارض والسياسه .. ووصفها بالاقوميه ... وتحدث عنها ايضا  لينين بفكره مشابهه واسمها الامبرياليه ... وتعتبر الشركات العابره للقرات هى اوضح مثال على الفكره

البيرو قراطيه: يأتي أصل كلمه بيروقراطيه من الفرنسية من كلمه بيرو (Bureau ) وتعنى مكتب ، ومن اليونانية من كلمه (Kratos ) ، أي القوه ، (السلطة ، والسيادة) ، وقد استخدمت كلمه البيروقراطيه للدلالة على الرجال الذين يجلسون خلف المكاتب الحكومية ويمسكون بأيديهم بالسلطة ، ولكن توسع هذا المفهوم ليشمل المؤسسات غير الحكومية ، كالمدارس والمستشفيات والمصانع والشركات وغيرها وهوتنظيم نموذجي 

كده وكده

الصوره دي من تويتر طبعا وكلمه ليا كتبتها من فتره

ايوه هى دي الحقيقه

المجلس العسكري عايز يسلم السلطه كده وكده

وده مش اختراعات ولا انا بافتري عليه وانما هى تصريحات لما تجمعها على بعض تطلع كده فى الاخر

الاخوان بعد عقدوا الصفقه اتمام كالعاده مع المجلس العسكري .. مش عايزه تنصل من الصفقات هى شيم السياسيين ولا انتم مش بتلعبوا سياسه يا اخوان ؟

المهم بعد اتمام الصفقه راح الاخوان ساقوا فيها وقالك هانشيل وزاره ونحط وزراه وهانعمل ونسوي قام المجلس العسكري قالك عنددددددك مين ده ؟

وكالعاده نفس القلم بعد كل صفقه ... مجلس الشعب القادم هو مجلس تشريعى شكل لمهمه واحده هى اختيار اللجنه التاسيسيه وسن القوانين وليس من حقه حل الوزاره ... شكرااااا ادي مجلس شعب غير كامل الصلاحيات

طب اللجنه التاسيسيه : قالك لا ماهو احنا لازم نحط وثيقه اللجنه الدستوريه تمشي فى حزاها كده عشان برضه مش معقول نسيب دستور البلد يكتبه عدة اشخاص  على اساس ان العدة اشخاص دول عيال حافيه بتلعب فى الشارع الى ورانا مش لجنه تاسيسيه منتخبه او مختاره من برلمان منتخب من الشعب ولا ايتها حاجه

يبقى كمان اللجنه التاسيسيه غير كاملة الصلاحيات شكراااااااا برضه

طب رئيس الجمهوريه ... ااااه لا ده بقى احنا لازم نحد من سلطاته بموجب الدستور والقانون الجديد ايوووون امااااااااال حتى لا نخلق ديكتاتورا جديدا امااااااااااال ديموقراطيه يا جدعان

يلا بالشفا وكماااان رئيس جمهوريه بلا صلاحيات كامله  نفس الشكراااااااا

وطبعا طبعا الوزاره  اونكل جنزوري ملك الصلاحيات فى الارض الواقع بيقول ان هو كمان بلا صلاحيات كامله

حتى وزير بتروله خرج يقول مافيش ازمة بترول ..واتضح ان كل محطات البنزين عمو الى هناك بيقول للشعب ان ما عندوش بنزين وهو عنده جوه

يبقى نخرج من ده كله بايه ؟؟ ان احنا اصلا عملنا ثوره كده وكده تقريبا ... او ثوره فوتو شوب

وان المجلس العسكري بياخدنا على اد عقلنا ويقولنا ماشي اعملوا برلمان وانتخابات ومثلوا كده مع بعض يا ولاد والعبوا لعبة الديموقراطيه زي ما كنتم بتلعبوا بابا وماما زمان بس فى الاخر الحكم بتاعي

يكونش المجلس العسكري فاكر اننا خرجنا فى ثوره وولادنا دمهم ساح فى الميادين على يدك كلابهم عشان نشيله جمال مبارك من سكته ونديهاله على طبق من دهب ؟؟

طيب يسقط يسقط حكم العسكر ... مش هانسيبكم تركبونا تاني .. لازم تفهموا ان العهد ده ولى ومضى

لاقتناعي الشديد فى اننا بنعمل ديموقراطيه كده وكده انا ما صدمتش ولا اتفاجئت بانسحاب البرادعي وانا صورتلكم التويته عشان فى ناس عجيبة الدماغ قالتلى انتم قلتم كده بعد تنحي البرادعي التويته الى فوق دي عليها التاريخ ياريت نفهم ان انا وناس كتير لسنا اتباع البرادعي وانما احنا انصاره فى الحق ان شاء الله وما زلت اكن للرجل كل احترام وتقدير وتاييد لمواقفه

انا شاركت فى الانتخابات  سواء بالتصويت او بالمشاركه فى حملة الثوره مستمره

رغم انى عارفه انه هايبقى مجلس شعب كده وكده لكن شاركت لان المقاطعه لن تزيد الامر الا سوءا .. احنا قاطعنا سنين طويله وما عملناش حاجه برضه والمره دي مضطرين نخلينا مع الكداب لحد باب الدار ومش ضامنين ايه الى ممكن يحصل بكره كمان

فى النهايه احب اقول للجميع مش للمجلس العسكري بس .. احترسوا

الثوار راجعين يوم 25

صوتك لمين ؟

صوتك  لمين ؟

طبعا الموضوع ده متاخر كان مفروض اتكلم فيه من زمان بس الحقيقه انا نفسي ما كنتش لسه خدت قرار انا هادي صوتي لمين ولا على اساس ايه لانى مرحله ثالثه

انا عارفه ان فى ناس مقاطعه الانتخابات .. الحقيقه انا لقيته مش حل ابدا من وجهة نظري ان كان فى ناس بتحاول تستولى علينا فعزوفي عن حقي فى مجرد انى انتخب مش هايخليهم يستزوقوا معانا يعنى

للاسف احنا فعلا شعب بلا وعي سياسي تماما .. منه لله حسبى الله ونعم الوكيل فيه مبارك وزبانيته ومش بس مبارك الحقيقه احنا بنعاني طمس للهويه من ستين سنه ومحاوله لمسح الفكر الحر من عقولنا عشان يقدروا يسوقوا بسهوله

عموم الناس بيسألوني احنا مش عارفين نختار مين ومحتارين طبعا فيما عادا الاخوان والسلفيين والى غالبا حاسمين امرهم الا قليلا لاسباب مكانيه او فكريه خاصه وفرديه

لاحظت حاجه سخيفه اوي اوي ان كل الناس بتسالنى هاااا هاتصوتي للاخوان ولا للكتله ؟؟ على اساس ان احنا خلاص عدمنا كل الناس ما عادش في الا هما الاثنين

غلط طبعا  لان فى احزاب تانيه مستقله عن الكتلتين وباقول كتلتين لان الحريه والعداله عامل هو كمان تكتل مع مجموعة احزاب برضه

فى احزاب منفرده ومحترمه ومنها الاسلامي زي الوسط ومنها الليبرالي الوسطي زي العدل ومنهم الاشتراكي  ومنهم ومنهم  وفى منهم احزاب محترمه فعلا

وفى كمان تحالف مهم اوي للاسف ما حدش يعرف عنه حاجه كتير وهو تحالف الثوره مستمره والى بيضم ابطال ميادين مصر اثناء الثوره وبعض الشرفاء فعلا وكلهم وجوه جديده وشباب وده الى احنا محتاجينه فعلا يا جماعه

والحقيقه انا حسمت موقفي لهم لانى شايفاهم فعلا فيهم امل كبير  والله اعلم

فى كمان فزلكه زياده بيتفزلكها بعض البشر وهو انه مش بيختار الى هو عايزه من التيارات وانما بيختار الناجح او الى فيه امل ينجح

يعني مثلا انا مش عايز الاخوان ومش عايز الكتله والله عايز انتخب مثلا حزب العدل بس هو مالوش شعبيه فى منطقتنا فى الغالب هايخسر طيب الوسط له شعبيه اكتر خلاص خليني فى حزب الوسط

الحقيقه انا شايفه ده غلط من ناحية الاخلاص للمبدأ على الاقل .. مفروض تعتبر دايما صوتك هو الصوت المرجح وتختار على اساس مبداك وفكرك مش على اساس مين هاينجح خصوصا اننا فى عهد المفاجأت ما حدش عارف ايه ممكن يحصل

عشان تعبت من الاجابه على نفس الاساله دايما

رايي فى الاخوان طبعا كتيار سياسي : قد يكونوا منظمين وعندهم خبره سياسيه معقوله الا اني شايفه انهم ولائهم الاول للجماعه وليس للشعب او للوطن والحقيقه انا مش اخوانيه وما يهمنيش مصلحة الجماعه يهمنى مصلحة بلدي اولا طبعا

هذا بالاضافه لموقف شخصي منهم لموقفهم السياسي من الميدان وخصوصا فى احداث نوفبر

السلفيين : دماغهم تعبانه ويخيل لهم انهم هايعملوا مننا سعوديه تانيه لكن هيهات والحمد لله انا اعلم دينى جيدا ولا احتاج لاحد يجبرني على اتباع تعاليم دينى بالكرباج ..ولا اقبل ان يحدث ذلك ابداااا ولو فيها حياتي

بالاضافه الى انهم غير منظمين وعديمى الخبره ومخترقين بقوه من النظام السابق

الكتله المصريه: الراعي الرسمي لهم  "ساويرس "انا ما باحبوش لله فى لله  غير انى عندي قناعه انه لابد ان يكون له يد ملوثه مع النظام السابق حيث انهم لا يمكن انهم كانوا يتركوه يكسب المليارات وهو ليس من فريقهم  بالاضافه لانهم ككتله سياسيه بيضموا فلول كتير فى احزابهم وقوائهم وانا عايزه احرق الفلول اساسا

بالاضافه لان الثلاثه السابقين دول كل واحد فيهم له كتله خاصه هاتضمن له وجود قوي فى البرلمان

الحريه والعداله ... الاخوان ومن والاهم

حزب النور..... السلفيين ومن والاهم

بالاضافه للناس الغلابه الى بيستقطبوهم وهما مش عارفين اصلا يعنى انتخابات وبيخوفوهم يا اما بالغرامه او بالنار والعذاب الاليم فى الاخر

الكتله... وطبعا وراهم الاقباط وكتله اخرى من الشعب لا يستهان بها لا يريدون التيارات الاسلاميه لسبب او لاخر ولا يرون بديلا الا الكتله بالتالي بينتخبوا الكتله

انا بقى نفضت لكل دول لانى اولا مش مقتنعه بيهم زي ما قلت

وثانيا وده سبب مهم اوي اوي ياريت تحطوه حلقه فى ودنكم لو كنتم لسه ما حسمتوش اختياركم  هو ان البرلمان ده مش لازم ابدا ابدا اي كتله فيه تستاثر باغلبيه وتسيطر على البرلمان مطلوب التنوع الكبير عشان ما يحصلش انفراد بالحكم

ولا احنا هانخلع مخلوع ونجيب مصيبه تانيه يقرفنا ؟؟

فى كمان حاجه عايزه اقولها

ياريت كانت نسبة المشاركه كانت 40% فقط  لكن جايين من بيوتهم عشان عايزين حقهم مش عشان الغرامه

انا شايفه ان الغرامه دي هى مسخره وقلة ادب واهانه حقيقيه لنا باعتبار اننا محتاجين حد يكرتنا على قفانا عشان ننزل ندور على حقنا

بالاضافه لان فى ناس بتستغلها فى تخويف ناس ما يعرفوش اصلا اي حاجه تماما عن الانتخابات ولا التيارات السياسيه وبيكون سهل استقطابهم واللعب باصواتهم باي شكل من اي اتجاه

وطبعا الي اساتذه فى ذلك هما التيارات الاسلاميه وفى اكتر من واقعه مش بافتري عليهم لكن هى دي الحقيقه

واحد اثق فى كلامه قالي ان الشغاله بتاعة صاحبه المسيحيه انتخبت حزب النور عشان ناس طيبين ودولها زيت  وقالولها ان ده حزب ام النور "السيده مريم "

وتتوالي مساخر الضحك على عقول الناس

وما حدش يقولي انتى بتتهمى الشعب بالجهل ... ماهو الشعب اصلا جاهل انت هاتسعبطوا ؟؟ ده احنا اربعين فى الميه اميه ومن عندي انا بقى تسعين فى الميه زيرو وعي سيااسي

الحاجه الى احب كمان اؤكد عليها

ان الشعب المصري الحقيقى مالوش دعوه خالص بالبتنجان المخلل الى احنا بنهرس فيه وربنا انتم مش متخيلين النوعيات الى انا قابلتها فى الفتره الى فاتت لما قررت اتكلم مع اي حد اقابله فى موضوع الانتخابات ..ماساه بجد

قد يكون البعض عنده وعي فطري وانما العموما ابيض يا ورد والله

عموم الشعب المصري كمان بلا اتجاه سياسي ولافكري ولا يعرفوا البتنجان ده اصلا

وبالتالي هاقول تاني الكلمه الى بتزعل مني بعض الناس

اعزائي كل من:

المجلس العسكري ... التيارات الاسلاميه...الليبراليين ... القوى الخارجيه.. الفلول ... الاشتراكيين ... اي بتنجان تاني ... كل الطامعين فى السلطه والكراسي .... حلوا عن سمانا يا ولاد الكلب حرام عليكم الضرب فى الميت حرام ..خلونا ناخد نفسنا بعدين ابقوا اتخانقوا علينا

ملحوظه: اسفه على الشتيمه بس عشان انا قلتها كده اول مره وكنت متعصبه فمش عايزه ارجع فى كلامي تاني ... اه وزودت على الاتجاهات المذكوره ليبراليين واشتراكيين حيث انهم كانوا سقطوا سهوا

وملحوظه تانيه كل الناس الى قولتهم فى الجمله الى فاتت دي  هم اقليه فى الشعب المصري ...الاغلبيه العظمى ما يعرفش غير انه مصري ..يا مسلم يا مسيحى .. وممكن يكون عارف اسمه رباعي وامه طابخه ايه النهارده والماتش او المسلسل الساعه كام

اوصيكم بقائمة الثوره مستمره 

وشكرا

الحل الواقعي

احنا فى مشكله

اه طبعا ده احنا فى مصيبه مش مشكله بس  ..طيب عايزين حلول

طب عشان نلاقي حلول لازم نعمل حاجتين

اولا :نحدد المشكله الحقيقيه ..المشكله الام .. نجردها من كل النتائج ومن كل الديول الى طالعه لها عشان نشوفها كويس

ثانيا : نحدد معطياتنا ..امكانياتنا .. مهما كانت محدوده هاتنفع .. بس المهم نعرف ايه هي ونستخدمها

نحدد الاثنين الى فاتوا دول وبناءا عليهم بقى نبدأ نقترح الحلول ..ليست هى افضل الحلول على الاطلاق وانما هى افضل الحلول الممكنه الآن

يلا بقى نحاول نعمل الكلام ده

ايه هى المشكله ؟ فكروا

الامن ؟

الاقتصاد ؟

الفلول؟

الانتخابات ؟

الدستور ؟

المحاكمات العسكريه ؟

الفلوس الى اتنهبت وما رجعتش ؟

حقوق الشهدا ؟

اممممم ايه تاااااااني

كل دي نتائج كل دي ديول

المشكله الحقيقيه فوووووووق ... المجلس العسكري

لو كان المجلس العسكري عايز يصلح الى فوق ده كله كان صلحه .. بس الحقيقه هو مش عايز

طيب المجلس العسكري مش عايز ليه ؟؟

عشان المجلس العسكري زي ما قلتلكم قبل كده من زمااااان فى البوست دهون  زيه زي كل النظام السابق ملطوط معاهم ... وزي ما قلتلكم اشرفهم واخد فلل وشقق واراضي بالتخصيص من الدوله وبالعبيط  وفى منهم طبعا فساد مالي وعمولات وصفقات السلاح .. ومؤكد فى منهم العميل ... والا تبقى اسرائيل هبله ومسكوها طبله

وانتهز الفرصه السعيده دي واسأل المجلس العسكري فيما تردد فى شهر مارس الى فااااات عن القبض على قائد الحرس الوطني وسجنه ..كان ليه وعشان ايه وراح فيييييييييين

ويا ترى مين الى لسه ما اكتشفتهوووووش

طيب هذا هو المجلس  فماذا يريد ؟

عايز ضمانات طبعاااااا

اه  مجلس عامل كده يبقى من الطبيعى يرفض تسليم السلطه الا بضمانات .. ايوه طبعاااا .. ماهو على الوضع ده لو الصبح جت حكومه جديده  ورئيس جديد من اختيار الشعب ..وبرلمان جديد يمثل الشعب .. المجلس كله هايشرف فى ليمان طره بس على ايه ولا ايه ولا ايه ؟؟ ده الاسباب بتزيد .. بعد ما كان فساد مالي واداري بقى كمان فى محاكمات عسكريه وتعذيب فى السجون وشهداء واستفتاء  وبلاااااوي سووووده

اممممم تفتكروا طمعانين فى الحكم ؟ تؤ لا ما اعتقدش هما دلوقتي بيدوروا على ورقة توت يستروا بيها سوئتهم

وكالعاده السخيفه بتاعتهم لجس النبض نزلوا الفيديو بتاع طنطاوي بالبدله المدنى وبعدها ملصقات انتشرت فجأه لقوا الناس قامت عليهم .. قالوا لا كده وسعت مننا مش هاينفع الشعب برضه اتغير ما عادش شعب بتاع سنة 54 الى هلل لعبد الناصر

راحوا طالعين بوثيقة السلمي وقالك احنا نصدر السلمي وشرف ويحرق يلعن ... واهو بلاش الحكم بس نظبط نفسنا بدستور  نازل عليه ورقة توت هديه

برررررررضه فشلت  ولقوا الناس اوشكت تاكلهم احياء وحتى حليفهم من التيارات الاسلاميه الصديقه كشروا عن انيابهم وقالوا اوعى يغرك جسمك

اعتقد ان الحل الى هما دلوقتي بيسعوا له حاجتين

افتعال ازمات لتاجيل الانتخابات

ولو حصل والانتخابات اتعملت وتمت قضيه صغنووووونه كدهون بجوز محاميين من اتباعهم تتظبط وتتشك للقضاء النزيه ويتهد المجلس على الى فيه ونقطه ومن اول السطر ونرجع تااااااااااني  نلف حوالين نفسنا

ايه رايكم ؟

خلاص سودتها فى وشكم ومخنوقين مني عارفه

كده وصلنا للمشكله الحقيقيه حاليا ... المجلس العسكري

طيب المعطيات بقى ..عندنا ايه ؟

عندنا شعب غلبان تعبان جتته اتهرت مرض وفقر وظلم وكل حاجه ومش طايق نفسه وعايز يخلص من الفيلم كله ويناااااااام بقى

وفوق كل ده مبارك ابصمله بالعشره انه نجح فى جعل نص الشعب ده دماغه بيضا بلاطه ما بيعرفوش اي حاجه فى اي حاجه ولا حتى يعرفوا ياكلوا نفسهم ... اه والله للاسف دي الحقيقه الموجعه شئتم ام ابيتم

توعيه ؟ هاتوعي مين ولا مين وامته .. ما ينفعش خده على علاته بقى دلوقتي ... اذن الاعتماد على الوعي الشعبي زي ما حصل فى الاستفتاء هايضيعنا

عندنا مجلس عسكري لاااااااا يمكن هايسيب السلطه اذن المناداه بتسليم السلطه لمجلس رئاسي حاليا درب من الخيال

عندنا شرطه مواليه للنظام السابق وماسكه ذله على ناس كتييييييير والمجلس العسكري بيخطب ودهم عشان يسندوه وهما مش طايقين الجيش وعايزين يخلصوا منه ويعوثوا فى الارض فسادا مطلقين الايدى زي زمان

عندنا فلووووول .. عالم ما يعرفوش اكتر من فرعون يحكمهم ويدوروا فى فلكه ..ومالهومش اي شغلانه تانيه غير كده وهايقاتلوا من اجل ذلك  ... ومش هانقدر نمنعهم كمان لان ببساطه الي بيسن القوانين ويفعلها من حكومه او مجلس هو اصلا اصلا فلول بدرجة ما ..هايعزل نفسه ؟؟!!!

عندنا  تيارات اسلاميه  حاليا عباره عن كتلتين ..يتخانقوا ساعات ويتصالحوا ساعات J

الاخوان ككتله ... والسلفيين وباقي التيار الاسلامي ككتله اخرى ...

الاخوان: دائما وابدا يلهثون وراء البرلمان بغباوه سياسيه معهوده ..ومفاوضات مشينه مع السلطه ..وياخدوا وعود مالهاش اي قيمه ..ويكون الوضع فى المفاوضات والاتفاقيات الخفيه دي كمن لا يملك اعطى لمن لا يستحق

السلفيين : مخترقين من جهاز امن الدوله بغباوه .. ومواقفهم السياسيه الدينيه حقيقى مخجله .. مشايخهم الى مش مبطلين ترجيع فى ودان الناس يبعثوا على القرررررف

عشان البؤين الحمضانين الى هاسمعهم هنا ( عارفه ان فى اخوان وسلفيين كويسين انما انا باتكلم على رؤسهم وسياستهم العامه  مش اشخاصهم )

عندنا تيارات سياسه اخرى : نصها احزاب  كرتونيه متعفنه قد تكون اشد وطأة من الفلول على الحياه السياسيه فى مصر لكنه موجودين وما نقدرش نعزلهم  سياسيا

والنص التاني التيارات بقى المستحدثه والى منهم الناشطين و6 ابريل وكفايه و و و ... ودول بقى مشكلتهم السوده انهم مش على قلب رجل واحد  ومش منظمين وما عندهمش خبره وفى منهم فنجريين بؤ ومحبي للظهور وفوق كل ده مستهدفين من كل الناس الى فوق دول ..لانهم بذرة الثوره ..سواء اعترفتم بذلك ام لا لكن هى دي الحقيقه  والى على اساسها بيتحاربوا اصلا

وبعد ما حددنا الكلام الى فوق ده طبعا لازم نقول طريقك يا ولدي مسدودون مسدودون مسدود... ايون مسدودون بالبون

لا طبعا امال انا بارغي كل الرغي ده ليه  حاضر هاقول  حل

مع الاخذ فى الاعتبار الكلام الى فات ده

اقولكم الحل المقترح ..

القوى السياسه تتجمع كلها ..بما فيهم الفلول .. اه اه بما فيهم الفلول .. فلول  سلفيين اخوان شباب الثوره احزاب كرتونيه  احنا مش قلنا الى مش هانقدر نغيره دلوقتي ناخده على علاته ؟... ويختاروا من مرشحي الرئاسه البارزين خمسه ..اه خمسه  فى عين العدو عشان الحسد وكدهوك

الخمسه دول هايبقوا مجلس وطنى يتفاوضوا مع الجميع باسم الثوره ... يتفاوضوا مع المجلس العسكري  ويتفاوضوا مع التيارات السياسيه الداخليه ومع الشعب كمان لو لزم الامر

ممكن بقى الخمسه دول ما بينهم وبين بعض ينتخبوا ليهم ريس برضه عشان ما يقطعوش هدوم بعض والمركب ما تغرقش

هانتفاوض على ايه بقى ؟

نتفاوض مع المجلس بقى بشخصه وصفته .. نقوله بص احنا هانسيبك تعدي ياعم بالكام فيلا وكام فدان بجملة الى راح يعنى بس انت بقى يا حلو كفايه عليك كده اوي  ومالكش دعوه بالقوات المسلحه بعد ما تسيبها وبعد المرحله الانتقاليه تروح تقعد بقى فى الفدادين الى سايبنهالك وتزرعهم فلفل وشطيطه ومالكش دعوه بالسياسه

او ايا يكن شكل التفاوض بقى الى هايكون بينهم قد يكون المشهد الى انا قلته ده هزلي خيالي لكن المهم انهم هايتفاوضوا معاه على المكشوف ونخلص بقى من الفيلم المحروق بتاع المجلس حمى الثوره ونشفها وغطاها ونيمها ده بقى

المهم نوصل لوجود من يتفاوض باسمنا ولو لقينا المجلس الوطني ده بدأ يخرف هو كمان عن الهدف الاساسي الى هو دستور محترم ..نوصله بقى بعد الانتخابات البرلمانيه لا قبلها...بعد الرئاسيه لا قبلها مش مهمممممم كل ده ومش مهم مين الى هينجح اصلا اهم حاجه على الاطلاق كتابة دستور محترررررررم

لو خرف بقى المجلس واستهبل يبقى نطلع حلوين كدهون طعمين متوحدين على التحرير بيافطه واحده بس بتقول المجلس الوطني روح بيتكم فقططططططط

واكيد المجلس الوطني ده مش ملزم بتحقيق اي مطالب زي زيادة مرتبات زيد وتعين عبيد  وتوصيل نت للشارع الى ورانا

وانما هو شغلته يتفاوض على المهم بقى عشان ما عادش فى وقت لكل الفرعيات دي ارجوكم

خلونا نتنيل نعمل الدستور ونخلص بقى

ارجوكم اتفقوا...

 يا اخوااااااااان ارجوكم غيروا خطتهم وافهموا مين الى يستحق ان تعقدوا معه الصفقات

( الاخوان عايزين بوست لوحدهم ان شاء الله)

يا اصحاب الاحزاب الكرتونيه احترموا نفسكم وانضفوا ودي فرصه قدامكم تنضفوا

يا فرسان الثوره جمعوا الناس حواليكم ..وان كنت فظا غليظ القلب لانفضوا من حولك .

باقي رساله  مهمه اوووووي

يا شعب مصر العظيم ابوس اديكم اطلعوا فى مليونيه مافيش مخلوق يرفع فيها  اي يافظه غير لا للمحاكمات العسكريه  للمدنين

المهزله دي لازم تنتهي ال 12 الف مصري الى مرمين فى سجون العسكر لازم يطلعوا منه ويتحاكموا قدام معاكم طبيعيه

ما نفرحش ان المشير خرج لنا 400 واحد كاننا بنشحت منه دي مسخرررره

استرجعواااااااا ثورتكم ... استرجعواااااااا ثورتكم  ... ابوس اديكم