الأربعاء، 5 مارس، 2008

10- قلة أدب .......... ولا قلة حيله !!!!!!!!!

السلام عليكم وحشنى الرغي مووووووووت. بس مش عارفه هاتستحملوني ولا ايه حاسه ان انا هاكتب كلام دمه تقيل وخنيق لان دي حالتى حاليا . مش مضروبه لا . بس ولادي تعبانين شويه وامتحانات الشهر الاسبوع الجاي وكل على كله دعواتكم لاختكم الرغايه الغلبانه الى مش مطحونه .
ايه رايكم انا عايزه اتكلم عن قلة الأدب . اها انا عندي احساس شنيع ان العيال بقوا عندهم قلة ادب متناهيه. ومش عارفه ايه الحل بصراحه . حتى مش قادره اقول هما منظرهم كده وخلاص . لان قلة الأدب دي نتيجه لازم لها أسبابها وعندي رغبه ملحه انى القي بالمسؤليه فعلا على الكبار الاهالي يعنى . الى المفروض يربوا عيالهم .
كمان حاسه بكارثه انا الناس عادت بتكسل تربي العيال ، أه والله بيكسلوا (بيقولك هو احنا لسه هانقول ونعيد . احنا يعنى كان مين علمنا ولا مين قالنا بكره العيال لما تكبر تتعلم وتعرف لواحدها ) مع ان مش دي الحقيقه لان مواقف التوجيه والتربيه اغلبها بتكون غير مباشره وعليه مش لازم الطفل يفتكرها كلها. يعنى هو ما اتعلمش لوحده فعلا وحتى لو كان فيبقى الظروف مثلا علمته فى حال عدم تواجد الظروف نفسها يبقى لازم نكون احنا موجودين بقى نربي .
طبعا كل واحد بيقول فى نفسه ان انا سوداويه وان العيال اهم طالعين ميت فل وسبعتاشر ... ده أنا حتى ولادي بيطلعوا من الأوئل وحافظين قرآن وبيقولوا مامي وبابي وقبل ما يناموا بيشربوا اللبن ويقولوا الورد ويقولوا لمامتهم نايتي نايتى ؟؟؟؟!!! منتهى الأدب والاخلاق الى في الدنيا !!!!!!!!!!
طيب انا هاعرض عليكم مجموعة مواقف وتحكموا هى أدب ولا قلة أدب ومين الى غلطان فيها ::
ــ الولد ( 6 سنين مثلا): مامي أنا عايز جنيه . الام( وهى وسط الناس بقى ومرسومه على ورقة مسطره) : هاتجيب ايه يا حبيبى . الولد : هاجيب شيبسي بالشطه واللمون . الام : خد يا قلبي . بعد ربع ساعه ... مامي (هاتي جنيه). الأم وهى بتجز على سنانها :ليييييه يا حبيبى . الولد بمنتهى التناحه والصفاقه : ايه هاجيب شيكولاته زي كوكو . طبعا احراجا من الناس هاتديله . امال الناس يقولوا عليها بخيله ؟؟؟ ولا الناس يدوه هما ؟؟؟ ولا يقولوا عليها مش معاها ؟؟؟ ولا يقولوا علينا مش أم رؤوم ومفتريه وبتاكل عيالها ؟؟؟ . وتتكرر القصه .
ومافيش مانع ان الام المرسومه على نفس الورقه المسطره دي تكون خدت لها شتمتين ولا ضربتين فى وشها ولا بوكس فى بطنها ( اصله متعلم جودوا في ا لناتي) وتبدأ التعليقات السخيفه من الحاضرين ما تزعلهوووش حرام عليكى ما كل العيال كده ايه يعنى ....... الى اخره الى يخلي الولد يحس انه والدته لو رفضت تبقى امنا الغوله وآكلة لحوم البشر.
( فى رأيي مهما كانت الظروف لازم تلتزمي بقوانينك معاه وتكوني صارمه وما تخافيش منه عشان قدام الناس والا هايستخدم السلاح ضدك ) .
ــ ندخل على الاكبر شويه . البنت ( 12 سنه مثلا ) : بابي فى رحله المدرسه عاملاها وهانطلع اسكندريه 3 أيام . الأب ( الى مش فاضي وخارج او بيتفرج على الماتش ) : نعم 3 أيام ودي فين . البنت(بمسكنه زياده شويه) : أليكس يا بابا . الأب باقتضاب حاد : لا طبعا مافيش رحلات وبيات بره . البنت والدموع هاتفط من عينها : ليه يا بابي بس ما كلا صاحباتي راحيين يعنى اشمعن انا وبعدين ما المشرفين معانا وسوسو بنت انتى لولو رايحه . الأب بثوره: اها قولي كده بقى بتقلدي البنت التلفانه بنت خالتك دي . وينده على الأم : انتى يا هانم تعالى شوفى بنتك ............... الأم : جرى ايه يا محسن وايه يعنى انت عايز تعقد البنت ما كل البنات على كده الايام دي . وبعدين ما لها سوسو دى بنت أخلاق ومتربيه وبنت ناس وابوها وكيل وزاره ولا انت هاتعيب فى لولو وجوزها كمان . وبعد الخناقه والتعارض والتضارب ينتهي الأمر لحاجه من اثنين لا ثالث لهما .
يا اما الأب يصر على موقفه والبنت ما تروحش الرحله بدون ابداء اسباب حقيقه بدل سبب سوسو بنت لولو .(وساعتها يتحول الاب فى نظر البنت ـ بايحاء من تعليقات الام وحكايتها للقصه فى التليفون للولو وخلق ا لله كلهم ـ الى وحش كاسر ومعقد نفسيا واجتماعيا)
او انه اول ما يسمع صوت الشوط التاني بدأ يقولها : باقولك ايه اتفلقوا بنتك اهي وانت حره فيها قطعيها وارميها فى الشارع ما تقرفونيش لكن خليكى فكره انك انتى الى هاتبوظي البنت وبتكسري كلامي عليها .( وفي الحاله دي يظهر الاب بسلبيه بشعه ولا مبالاه بالبنت اصلا وبعد عاطفي واجتماعي عنها ) . ده غير انها هاتروح الرحله كمااااااان .
وطبعا البانوراما كلها بتشتغل قدام البنت ويمكن قدام العيال كلهم ..................
نكبر شويه ؟؟ الولد 18 سنه : مين يا ماما الى جه بره ؟ الام وهي مدخلاله الشاي : لا ده عمك فلان . الولد بمنتهى الصفاقه : يوووووه دلوقتي بابا ينده عليا عشان اسلم عليه . الأم : باقولك ايه ما تبقاش ترد هابقى اقوله انك نمت هو يعنى ما هو كان هنا اول امبارح . ( مع ان لما اخوها بيجى كل يوم بتبقى عايزه تصحي الجيران يجوا يسلموا عليه )
وطبعا تقدروا تعكسوا الادوار تماماااااااا .
البنت 16 سنه وانت طالع : ماما تعالى شوفي اللبس الجديد الى انا جبته . الام : ورينى يا اختي ..... اه حلو اوي بكام ؟؟ شوفي هو كان التايير معروض اول السيزون ب 700 جنيه بس انا جبته فى التخفيضات ب500 جنيه . الام : نعم؟؟ يعنى صرفتى الفلوس كلها ؟؟ وترجعي لسه عايزه سابو وشنطه وعشر ايشربات يتلفوا مع بعض ؟؟؟ البنت : اعمل ايه يا ماما ده طلع عينى وصوابعي فأفأت انا ونها صاحبتى ودي ارخص حاجه لقيناها . الأم : طب ادخلي يا اختي قيسيه . (طبعا فى واحد قاعد على بعيد يقرا الجرنان هايتنقط من الفرسه ) . البنت وهى منفرجة الاسارير : ها ايه رايكم ؟؟ الام : حلو اوي تصدقي هياكل منك حته . بس الجيبه دي مش ضيقه شويه ما كانش فى مقاس اكبر ؟؟ البنت : ضيقه ؟؟؟!!!!! ضيقه ايه يا ماما؟؟؟ دى على مقاسي بالظبط اكبر من كده تبقى مهروله!!! وبعدين البنت هناك قالتلى ان القماش ده بيوسع . الأم : طب والبلوزه دي مش مفتوحه ؟؟ لازم تلبسي تحتها حاجه . البنت باستهبال : أه طبعا يا ماما هابقى البس عليها بادي او انزل الطرحه عليها امال هامشي كده ؟؟؟!!! ....ها ايه رايك يا بابا ؟؟ الأب وهو يتفحص ال 500 جنيه بحسره : لا ضيق روحي هاتي المقاس الاكبر زي ما ماما قالت . البنت ببجاحه وهى ماشيه : يوه بقى انتم مش عاجبكم حاجه ابدا كل ما اجيب لبس تقولولي وحش ؟!!!!!!!!!!!! خلاص ابقوا انزلوا معايا بقى حاجه تزهههههههههق. وطاخ .... ده باب اوضتها .
وفى الغالب مافيش حاجه بتتغير وبيفضل التايير زي ما هو حتى لوتخنت عشره كيلوا فى الاجازه وبقت بتدخله بصبونه .
بتهيئلي لو قعدت من هنا للصبح اقول مواقف مش هابطل . كتيييييييير اوي، والام اوالأب فى حالة استسلام من اول كيس الشبسي لحد التايير ونوع العربيه الى ابوه هايجبها له كمان والعروسه كمان وحياتك.
بصراحه بقيت اشوف قلة ادب من العيال حتى الصغيرين جدا فى السن والى انت يصبحوا فى الثلاثين من عمرهم وقاعدين لسه لاهاليهم تصرف عليهم وهما على نفس العجرفه وقلة الادب وقلة المسؤليه .
ما عادش الاب والام بيحرصوا على الاصول الى اتعلموها ويعرفوها لاولادهم ويربوهم ويعودوهم عليه الاصول والاخلاق وكل الحاجات الحلوه الىكانت فينا زمان .
تخيلوا ؟؟؟ ما عدتش باسمع حد بيقول لابنه عيب ما تشتمش اخوك الكبير !!!! وما عدتش باسمع ام بتقول لبنتها ما تعمليش زي الناس ولا زي البنات التانيين انتى حاجه تانيه!!! وما عدتش باسمع ام بتتكلم باحترم عن جوزها واهله قدام اولادها على الاقل الا نادرا .
وما عدتش باشوف ام واب بيتفاهموا فى الامور الخاص بتربية الابناء لواحدهم من غير اشراك الابناء فى ذلك الا قليلا
ما عدتش باشوف يوم العيد الصبح اسر متجمعه من كبيرها لصغيرها يعيدوا على اهاليهم .
ما بقاش في حاجه اسمها التزام ومسؤليه واحترام وصلة رحم واصول اجتماعيه .
بقينا بنقيس نجاحنا فى تربية الاولاد بمقاييس تانيه خالص .
بيجيبوا كام فى الثانويه العامه ؟؟؟ حافظين كام جزء فى القرآن(يعنى كدبوس كده منظر) ؟؟؟ دخل كليه من كليات القمه ولا لا ؟؟؟ بيتدرب فى احسن نادي فى البلد ومعاه عضويه ؟؟ مأمنين له مستقبله وعنده شقه وعربيه ؟؟؟ بياكل احسن اكل ويلبس احسن لبس وكل طلباته مجابه ؟؟؟؟
كل دي حاجات حلوه أوي أوي تواجدها ،لكن مش دي المقياس . فى استفاد ايه واتعلم ايه فى المدارس مش جاب كام بس؟؟؟ . فى بيعمل بالقرأن ويتدبره ويقيم الفروض ولا لا . فى دخل الكليه الى بيحبها وهاينجح فيها ولا لا . عملت انا الى عليا وهيأت له مناخ كويس يقدر يكون فيه انسان محترم ومنتج ومؤمن قبل كل شيء ولا لا ؟؟؟ وعلمته يصنع رغيف ولا اديته انا رغيف كل يوم ياكل وما بيعرفش يعمل حاجه تانيه ؟؟؟؟
المقاييس اختلفت ولا العيال اتهبلت . ولا الاهالي بتستعبط ؟؟؟ مش عارفه
واكثر ما يثير حنقى على الناس انهم يبرروا الخطأ بانتشاره . ما كل العيال كده وكل الناس كده ؟؟؟؟؟؟؟!!!!!!!!!!
سيظل مبدأي انتشار الخطأ لا يبرره ابدااااااا ولا يجعله يوما صحيحا .
وكفايه كده عشان انا خلاص هنجت وكمان دمي تقيل موت النهارده وعارفه انكم اتخنقتوا مني تماما .
واشوفكم على خير

هناك 4 تعليقات:

ahmed_k يقول...

بصراحه تنفعي سيناريست تمام بتحكي الموقف كأنه على شاشة تليفزيون بنتفرج على مسلسل أنصحك تكتبي سيناريوهات بس متنسيش حلاوتي لما تنجحي وتتشهري آه امال مش انا صاحب الفكره وتحياتي مخلوطه مع احتراماتي

صبرني يارب يقول...

الله يخليك يا استاذ احمد حلاوتك موجوده ما تقلقش بس ايدك على المنتج بس عشان ننهض بالفكر الاجتماعي بقى بدل افلام السبعينات والثمانينات الى بوظت دماغ الشعب .

بس على فكره مع كل تحياتي على الفكره الى شكلها بعيد اوي الا ان فى اخ سبقك وقالي كده. بس زي ما حضرتك عارف كلهم بيعلقوا من بعيد لبعيد مش على صفحات المدونه مش عااااارفه ليه بس مسيرهم يجوا برجليهم .
لما اتشهر بقى ويحجزوا عشان يدخلوا المدونه بعد اول سيناريو وكده
هههههههههههههههههههههههههههههه
شكرا استاذنا

Anonymous يقول...

السلام عليكم يا سيدتي الفاضلة

شوفي يا ستي الدنيا باظت من كلا الطرفين

الأهل مش عارفين يتعاملوا مع الولاد لأن أولاد اليومين دول غير
في ثقافات كتير داخلة على أدمغتهم

يعني الواد من دول يطلع يلاقي الدش أبو خمسين ألف قناة وأوربي ومش أوروبي

غير النت اللي ما فيش حاجة أقولها ممكن تكفيه
طبعا ولادزمان كانت ثقافتهم وخبرتهم بتيجي من الوالد والمجتمع اللي كان في العادةمجتمع نضيف وراقي

طيب الولاد بقى للأسف مش بيعرفوا يقدروا كلام أهاليهم أو بمعنى أدق مش بيفهموه صح

على كل ربنا يشفي الاتنين العيال والأهل

وفي نظري أن أول حاجة غلط يعملها الأب أنه يتجاهل ويفوت وينفض

ما ينفعش الأب ينفض لازم تكون إيده في كل حاجة ومهماكان الست بتمشي ورا عواطفها

بس الراجل بيشغل دماغه لازم يشغل دماغه دي
في مصلحة عياله حتى لو ده أغضبهم وخلاه يبقى الراجل الوحش اللي حرمني من المصروف واللي منعني أبات مع صاحبي

المهم أنه يكون واثق في نفسه
والذكاء يجي بأنك تمشيهم على كلامك
من غير ما تزعلهم

بمعنى مثال البت دي اللي عايزة تروح اسكندرية هو ما أدبهاش من الاول

لازم يقولها خلينا في حالنا ومفيش خروج لاسكندرية وبيات برة البيت

طيب بس في نفس الوقت يقول لهم أنا عازمكم مثلا اليومبن الجايين دول
في راس البر مثلا يبقى خلى البت تمشي ورا كلامه
وفي نفس الوقت ما خلقش الصورة بتاعت الشيطان أبو قرون

على كل تحياتي ليك يا صبرني

تسلمي يا غالية ومانتحرمش من إبداعك


التوقيع \\\\\ THE WHITE KNIGHT

صبرني يارب يقول...

وايت منور

التربيه لازم تكون بين الاب والام يا وايت مافيش حاجه اسمها هو يشغل دماغه هى كمان عندها دماغ ولازم تشغلهاالمنظومه لازت كون مشتركه

والدش والنت مش هما سبب الفساد بس تقدر تقول واجهه او مكان لخروج الفساد ده على السطح

والا كان يبقى كل من عنده دش وانترنت يبقى فاسد

وشكرا لك يا وااااايت نورت