الثلاثاء، 18 مارس، 2008

14-ماليش نفس أرغي ؟؟؟؟؟؟؟؟؟؟!!!!!!!!!

طبعا انتم ملاحظين ان انا ساكته سكوت مالوش اي لازمه وبصراحه بقى انا من امبارح كل ما اجي هنا افتح المدونه واجيب صفحة الرسائل الجديده دي واقعد ابصلها واكتب عنوان واشيله واحد تاني ومش عارفه اكتب خاااالص ... ماليش نفس

طب حد فيكم يسألنى ليه ؟؟
اقولكم ليه ؟؟ لان انا غالبا بارغي فى مواضيع اجتماعيه طب ارغي ازاي فى مواضيع اجتماعيه ولا غيرها والناس مش لاقيه تاكل ؟؟؟؟
حقيقى والله الناس جاعت منظر طابور العيش فى الشوارع بقى يحسر وعيش ا ستغفر الله العظيم لا يتشاف ولا يتاكل والادهي من كده انك كمان بتوصل انك تدي اي عامل من المخبز رشوه عشان تاخد عيش اصلا !!!!!!!!
كل حاجه غلت الاكل وغير الاكل جوزي بيقولي انا باشتري الكرتونه مثلا ب 100 جنيه النهارده وابيعها بكره ب 110 وتاني يوم اشتريها ب 120 ؟!؟!؟!؟!! يبقى هو كسب ايه ؟؟؟ والناس تعمل ايه ؟؟؟؟؟ تشتري القلم الى بنص جنيه بجنيه ازاي ؟؟؟ هما مش لاقيين ياكلوا طيب هايكتبوا ازاي ؟؟؟!!!!!
زمان كانت لما الاسعار ترتفع الناس تقول حوشي يا حكومه . دلوقتي الحكومه تحوش ايه ولا ايه ؟؟؟؟ اصلا ما عادتش الحكومه لها حاجه باعوا كل حاجه الموضوع خارج اديهم.
طب يدوا فلوس للناس ؟؟؟ طب دول الموظفين . طب والباقيين ؟؟؟؟ واصلا لو وزعوا فلوس فى الشوارع هايحصل تضخم اكتر والاسعار تزيد اكتر ؟؟؟!!!!!!!

الازمه عالميه؟؟؟؟!!! ماشي بس اشمعن احنا الى متنيلين اوي كده ؟؟؟؟
عارفين ليه ؟؟؟ لاننا احنا بقينا ولا حاجه .
بقينا زي الحال الى اتكلم عنه الرسول صلى الله عليه وسلم :( يُوشِكُ الأمم أَنْ تَدَاعَى عَلَيْكُمْ ، كَمَا تَدَاعَى اَلأََكَلَةُ إِلَى قَصْعَتِهَا فَقَالَ قَائِلٌ: مِنْ قِلَّةٍ نَحْنُ يَوْمَئِذٍ قَالَ: بَلْ أَنْتُمْ كَثِيرٌ، وَلَكِنَّكُمْ غُثَاءٌ كَغُثَاءِ اَلسَّيْلِ، وَلَيَنْزِعَنَّ اَللَّهُ مِنْ صُدُورِ عَدُوِّكُمْ اَلْمَهَابَةَ مِنْكُمْ، وَلَيَقْذِفَنَّ اَللَّهُ فِي قُلُوبِكُمْ اَلْوَهْنَ، فَقَالَ قَائِلٌ: يَا رَسُولَ اَللَّهِ، وَمَا اَلْوَهْنُ؟ قَالَ: حُبُّ اَلدُّنْيَا وَكَرَاهِيَةُ اَلْمَوْتِ)
عارفين يعنى ايه غثاء السيل ؟؟ السيل وهو نازل معاه مخلفات قش وتبن وما الى ذلك بيكون كتير وهايش لكن ضعيف لو دست عليه كده يبقى ولا حاجه .
اهو ده حالنا . احنا بقينا ضعفاء .مافيش موارد اقتصاديه طبيعيه بكفايه نصدرها يعنى مثلا او حتى تكفينا احنا . مافيش انتاج صناعي يذكر مافيش انتاج زراعي حتى مكفينا احنا . مافيش تبادل تجاري بالوضع الصحيح الناجح وبالحجم الكبير الى يدي قوه اقتصاديه . مافيش حتى قوه بشريه اغلب المجتمع دلوقتي طالع مش فاهم حاجه اصلا شهادات متعلقه على الحيطان و خلاص . الى معاه دبلوم دلوقتي بيقولك انا مؤهلات ما اشتغلش حرفه يدويه. والى معاه مؤهل عالي بيقولك انا ما اشتغلش انا اي حاجه بعد ما صرفت دم قلب اهلي على التعليم سنين طويله وتعبت فيه انا لازم اشتغل بيه .
وفى النهايه مافيش ناتج قومي فعلي . او على الاقل مافيش ناتج يضاهي الاستهلاك القومي حتى ............ بقينا بناكل اكتر ما بنشتغل بنصرف اكتر ما بنكسب بقينا فى وهن وضعف من كل النواحي
حتى الوضع السياسي بقى ضعيف جدا جدا وفاشل . اي عيلين دلوقتي يعملوا اعتصام بينفذوا لهم طلباتهم عشان يخرسوا ما يعملوش دوشه .
حتى الديييييين الناس بعدت عنه والى قرب منه خد قشوره ومسك فيها والى توغل فى الدين يمكن فاهمه وفاهم قواعده ومبادئه غلط وواخده دراسه ولا سياسه ولا واجهه مش واخده معامله وحياه وايمان فى القلب وبين العبد وربه . طبعا الحمد لله فى ناس لسه كويسه لكن للاسف البيض الفاسد يطفوا على وجه الماء .
ما حدش يقولي سودتيها فى وشنا وما قلتيش الحل عشان انا اصلا مش لاقيه حل
او على الاقل مش لاقيه حل سريع يسد جوع الناس الغلابه .
لكن هى دي صورة المجتمع الى احنا فى من وجهة نظري جاي انا غلطانه لكن مش على طول الخط.
جايز فى ناس منتجه وناس محترمه لكن برضه مش على طول الخط ومش بالكم الكفايه .
جايز حكامنا غلطانين وفيه فساد وفيه كل حاجه لكن كمان احنا مش صح احنا اصلا نستاهل كده فكيفما كنتم ولي عليكم .
بالله عليكم زي ما رفعتم اديكم يوم كاس الامم المتنيله على عينها وبقيتوا كلكم على قلب رجل واحد تقولوا يا رب مصر تكسب وتجيب لنا الكاس .
يااااااااارب اعيش واشوف المصريين كلهم ولا العرب كلهم ولا اطمع واقول المسلمين كلهم على قلب رجل واحد فى الحق والعدل وبلاش يمسكوا سلاح ويبذلوا انفسهم واموالهم وانما بس يرفعوا ايدهم ويدعوا من قلوبهم وهما على قلب رجل واحد
ان يرفع الله عنا الكرب وان يرفع الغمه عن المسلمين اجمع وان يكف عنا ايدى الظالمين وندعوه ونرجوه ونتوسل اليه برحمته وغفرانه أن يستعملنا ولا يستبدلنا .
قولوا امييييييييييييين وكفايه عشان قربت اعيط واسفه على النكد بس ما اقدرش اتنكد لوحدي من غير ما انكد عليكم .
نشوفكم عن قريب يارب

هناك 18 تعليقًا:

خايف من الحقيقة يقول...

اول تعليق في اول زيارة
اتحسد مش كده
المدونه جميله جدا
واحساسك عالي بالناس التعبانه
بس الحل مش الدعاء يس
فيه حلوووووووووول كتير اولها الدعاء
واخرها برضه الدعاء
اللي في الوسط
احنا عارفينه بس مبنعملهوش!!!!

صبرني يارب يقول...

انت نورت المدونه وصاحبتها يا خايف من الحقيقه

وانا ما قلتش ان الحل هو الدعاء انا بس جبت اسهل حاجه على الناس ولاحظ انى قلت انى عرضت المشكله وما عرضتش لها حلول لانى مش لاقيه لها حلول مباشره وسريعه تسد جوع الناس .
لكن زي ما انت بتقول كده الى فى الوسط الى لازم نعمله ما بنعملوش بس اشك حتى اننا عارفينه احنا كمان عدينا مرحلة الاستهبال بحيث ان الاحساس السائد ان احنا مظلومين بس لكن مش غلطانين وحقيقة انت لو جبت كل واحد لوحده يمكن يطلع مش غلطان بيشتغل وبيطلع عينه ومش قادر يسد لكن على المستوى العام لحياته وعلى المستوى العام للمجتمع ككل احنا ما بنعملش حاجه اصلاااااااااااااا.
انا اخترت ابسط حاجه يمكن لو اتجمعنا على قلب رجل واحد ندعي نقدر كمان نتجمع على قلب رجل واحد ونعمل حاجه .
وأتمنى يكون رايك فى المدونه دي بكل صراحه مش مجامله
شكرا للك فى الحالتين طبعاخايف ونورت

Anonymous يقول...

السلام عليكم يا صبرني

إيه الكلام ده يا ستي

شوفي يا صبرني الناس جعانة عشان تعبانةوالناس تعبانة عشان مش شغالة

كل واحد يقولك ما فيش شغل وما فيش نيلة

وهو لا يكون دور ولا عمل مفيش حد بيشتغل صح إلا وربنا بيديله مكافأة

بقينا ضعفاء أيوة

هنفضل ضعفاء على طول 000 ما أظنش

لأن فعلا الناس بدأت تاخد بالها من حاجات كتير بدأوا يشغلوا الجمجمة اللي كانت مربية عناكب وغيره

وعلى رأيك اللي بيعملوا فيها متدينين يأما علمهم ديني سطحي أو واخد الدين وسيلة لغرض ما

بس برضك أنتي قلتي أن في ناس حلوة والدين معاهم معاملة وفي القلب

طيب احنا نعمل إيه ؟؟؟؟

أولا لو كل واحد راقب ربنا في شغله وابتعد عن معصيته كل حاجة هتمشي

أي نعم في حاجات على الشعب وحاجات على الحكومة بس خلينا في الشعب دلوقتي

يا ناس شغلوا الجمجمة ربنا مديهالكم تشغلوها مش تركنوها

على كل يا صبرني

كل عقدة وليها حلال والحلال دلوقتي هو الشباب الحلوين يشتغلوا ويبسطونا يارب


مش لاقي حاجة أقولها والله كل اللي بنعمله كلام بس ما علينا

أشكرك على الكلام اللي طالع من دماغ صاحية

ربنا يخليلك دماغك يا اختي ويبارك لك فيها


وسلامي ليكي وتحياتي


التوقيع \\\\\\ THE WHITE KNIGHT

mayada يقول...

امين رشوه ايه ياريتها تيجي علي الرشوه
ده بقي في شهداء العيش وشهداء بطايق التموين
الناس بتموت عشان قوت يومها
وبعدين لو مشكله ارتفاع الاسعار في العالم كله موجوده
اللي احنا ده مش ارتفاع ده هبش وافتري
لما الحاجه يضاعف تمنها في شهر ده مش موجود في اي دوله ولا اي اقتصاد الي جانب المعادله عندنا مضروبه علي قلبها خالص
متوسط دخل الفرض مفيش (كلام فارغ )
اما الاسعار بقي مقولكيش (كلام يودي السجن )
ربنا يصبرنا ويصبرك

صبرني يارب يقول...

وايت
الشكر لك يا اخي الفاضل ربنا يكرمك وحقيقى انا مش متشائمه بالعكس عندي امل ان الناس تصحى وربنا يحقق املي يارب .

صبرني يارب يقول...

مادي
ما انا باقولك هى صحيح ازمه عالميه بس ما حدش متنيل النيله الى احنا فيها دي
والمشكله ان ما حدش عارف مين بيهبش مين بالظبط هو فى الاخر احنا بنتهبش كلنا يا عزيزي

ونورتي مادي فى اول مره تشرفينا

فضفضة يقول...

اية الكلام الكبير ده

انا اول مرة ازورك يا صبرنى

بس حقيقي

اثلجتى صدري

قلتى كلام نفسي اقوله

وربنا يعلم ان مفيش في ايدينا غير الدعاء

وربنا يصلح حال البلد

ويرزق الناس ويرحمهم

يااااااارب

بوست رائع جدا

تحيااااااااتى

صبرني يارب يقول...

فضفضه حبيبتى
نورتينى يا جميله والله وربنا يكرمك بتهيئلي الناس كلها نفسها تقول ومش عارفين يقولوا ايه حتى يا فضفضه ربنا يلطف بينا

دكتور حر يقول...

أم مريم
هو النكد موجود موجود من غير ما تكتبي
كان احمد الصباغ كاتب موضوع مشابه
اسمحيلي اجط التعليق بتاعي عنده احسن النقطة بتاع الناس دي هي أخنق حاجه عندي

*********************************

انا والله بكره الحكومة والريس
لكن بقيت أكره الناس أكتر

الناس تعودت عالخنوع بصوره لا مثيل لها على الاطلاق

الناس مبتحاولش تساعد اللي بياخد بإيديها او يقف قدامها في المناداه بالاصلاح ولو على المدى البسيط

من اسبوع تقريبا على سبيل المثال
عندنا عربيه أجره رايحه بلدنا
الراجل سواق غريب نزلنا بدري عن الموقف وبيلف يرجع
قعدت ازعق معاه انه واخد اجرته كامله
يبقى يخلص المشوار كامل
والناس سايباني ازعق لوحدي
وأصريت على موقفي
فوجئت وانا بتكلم ان الناس اتسرسبت واحد واحد ونزلوا من العربيه
قلت والله
انتو عالم ما تستاهلوا
وتستاهلوا كل اللي يجرالكم

احنا ناس مش بنحس بالمصيبه الا لم تكون صايبانا شخصيا
اهالي ضحايا العباره هم اللي حسوا بالكارثه والباقي كان في الدوره الافريقيه

أهالى حريق بنى سويف هم اللي حسوا واحنا لا

للأسف مش هنفوق الا بانفجار بس هيكون متأخر قوي

وربنا لمصر
وتاني الله يسامحك

صبرني يارب يقول...

يا دكتور انا عندي حالة اكتئاب حقيقيه بسبب الناس وعليه مش قادره اتعامل مع اي حد ومش طايقه اكلم اي حد ولا ابص فى وشهم

والمصيبه السوده انى عندنا فرح النهارده وبكره المولد النبوي وبعد بكره عيد الام وكل دي تجمعات عائليه وهاشوف ناس كتير وشكلي هاولع فيهم كلهم
اللهم افرغ علينا صبراااااااااااااا

بت خيخة وأي كلام يقول...

لو كل اتنين هيعملو اعتصام مطالبهم هتتنفذ
كان البلد حالها اتعدل من زمان
المشكلة ان حتى لو الف واحد عمل اضراب واعتصام
مطالبهم بتروح فى الزبالة

بالنسبة للناس اللى مؤهلهم عالى مش عايزين يشتغلوا اى حاجة
طب معاهم حق
ماهو لازم يكون فيه نسبة وتناسب
يعنى واحد متخرج من كلية هندسة عايزاه يشتغل جرسون
ماهو اكيد برضه الناس دى كرامتها بتنأح عليها
ولا واحدة تانية متخرجة من اعلام وتروح تشتغل سكرتيرة

اقولك على حاجة يا ام مريم
واحدة اعرفها متخرجة من اعلام
حالتها المادية وظروفها العائلية حاجة تصعب على الكافر
عارفة اشتغلت ايه
راحت صيدلية بقت بتنضف الصيدلية وتوضب علب الادوية
وبتاخد مية جنيه فى الشهر
الحمد الله ان ربنا كرمها واتجوزت
وسابت الشغلانة دى
انا مابقولش ان دى شغلانة عيب
بس فعلا يصعب عليكى انك تلاقى واحدة مؤهل عالى وادفع فيها دم اهلها
وفى الاخر تروح تشتغل تقريبا فراشة

بصى حاجات كتير فى البلد دى عايزة تتصلح
وانتى البوست بتاعك ده
خلانى احس ان احنا مسجونين جوة احوالنا اللى زى الزفت
وحاسة ان السجن يوم بعد يوم بيضيق علينا
انا مش مطمنة للى جاى
ربنا يستر
تحياتى
اختك خيخة

فرنسا هانم يقول...

لا متخافيش انتى منكديش علينا
احنا متنكدين جاهزين واربعه وعشرين قراط
تحياتى لكى

صبرني يارب يقول...

فرنسا هانم

حبيبتى انا عندي اكتئاب حاد اصلا وكنت فى فرح النهارد والاحتكاك بالناس فى الحاله دي بيخلينى عايزه اولع فيهم اصلا قمة النكد والاكتئاب .

صبرني يارب يقول...

خوخه حبيبتى
لا خيخه مش صح ابدا ان كل اثنين لهم مطلب يتحقق
لان قد يكون المطلب ده يتعارض مع المصلحه العامه .
يعنى مثلا انصياع الحكومه ببساطه للمعتصمين فى مجمع التحرير المعترضين على نقله والمتضررين من نقله لاي سبب
ده كان هبل وتخريف لان اذا كانت المصلحه العام تؤثر نقله يبقى يتنقل والقله بقى عليها الاختيار يا تتنقل معاه يا اما يسيب الشغل ده ويروح شغل تاني اتس ايزي .
انما احنا عندنا سلطه ضعيفه ما ينفعش كل عيلين يعملوا اعتصام واحنا نوافق على مطالبهم .
لازم يكون المطلب ده شرعي ويكون لا يتعارض مع المصلحه العامه .

اما حكاية الشهادات الى بتتكلمي عليها دي فأنا من اشد المعارضين اساسا لكل نظام التعليم فى مصر .
هما بيتخرجوا اصلا من الكليات ما يعرفوش الالف من كوز الدره والله العظيم .
تقوليل تخصص وصرفوا عليهم ومش عارف ايه ده كله بتنجان وهبل وتخريف
والى عايز يشغل بقى يشتغل اي حاجه لان الشغل مش بس وسيله لكسب المال ولكن كمان هدف فى حد ذاته لتحقيق وتقدير الذات .

ahmed_k يقول...

اهلا ازيك يا ام مريم لو علقت علي موضوع البوست ده حعلق غلي سبب ظاهرة الغلاء من وجهة نظري لللأسف حكومتنا ساعات بحس انها حكومة العدو مش حكومتنا احنا بحس انها بتحارب الناس في اقواتها حتي يظل المواطن المصري يلهث وراء لقمة عيشه لا يفكر في ديموقراطيه او حريه او عداله اوحتي كرامه يدوب يعرف ياكل عياله والا ما سمحوا لبعض الخاصه باحتكار بعض السلع الرئيسيه او لما حددوا مساحة الأراضي التي تزرع بالقمح حتي نظل محتاجين للمعونه الأمريكيه ولا حول ولاقوة الا بالله ويحضرني هنا ابيات شعرلحافظ ابراهيم : وكم ذا بمصر من المضحكات---كما قال فيها ابو الطيب===تضيع الحقيقة فيها بيننا---ويصلي البريئ مع الذنب===ويهضم فينا الأمام الحكيم---ويكرم فينا الجهول الغبي

صبرني يارب يقول...

نورت يا استاذنا الغالي اولا

وطبعا بما ان هما اولي الامر فانا باحملهم كامل المسؤليه زيك تمام .
وعارفه كمان ومتأكده انهم فعلا يهمهم الشعب ينشغل بلقمة العيش .
ودايما اقول فى مثل قديم بيقول اشغل الست لا تاكل وتتشاكل .
والحكومه بتاعتنا بتعمل كده معانا برضه بتشغلنا لاخر نفس عشان ما نفكرش وما نلحقش .
لقمة العيش والحياه الصعبه . نص الشعب عنده عيال فى ثانويه عامه .
الكوره الهبل اي حاجه فى اي حاجه خلي الشعب يتلهي ونشغل
ونسأل الله العون
وبرررررررررضه هاقول كيفما كنتم ولي عليكم احنا نستاهل الى يجرى لنا
وشكرا لك استاذنا

ahmed_k يقول...

انا موافقك 100% علي انه كيفما كنتم ولي عليكم. الرشوه انتشرت بشكل مرعب من القمه للقاع لدرجة ان عامل النظافه لو لم يأخذ المعلوم يترك امام منزلك غير نظيف مع ان هذه وظيفته التي يتقاضي عليها راتبه ونقيس علي ذلك كافة المستويات (خالف وادفع تصبح مواطن صالح ملتزم)ولكني برررررررررضه اقولك ان الناس علي دين ملوكهم والله المعين وهو حسبنا ونعم الوكيل والسلام ختام

صبرني يارب يقول...

يا اخي الفاضل احنا الى عودنا عامل النظافه على كده انا عن نفسي مش بانخرط فى الفساد ده ومش باعمل كده ولو حد قابلنى مش عمل واجبه باطلب منه يعمل واجبه ولو اعطيته حاجه اكتر من حقه على سبيل الصدقه موضوع تاني ولو لقيته تنح على اساس انى باديه اجرة شغله باقوله دي مش اجرتك دي مني انا لله تعالى انما شغلك انت بتاخد عليه اجر تاني .
وانا عموما بقدر الامكان باحاول مش انخرط فى الفساد ا لحالي والله المستعان

كمان انا معاك فىكلامك انه لو صلح الحاكم صلح المحكوم . لكن هى متواليه زي ما حضرتك شايف كلها مرتبطه ببعضها لو كنا نستاهل حاكم كويس كان جالنا الحاكم الكويس وكان صلح حالنا معاه
انما احنا لسه ما نستاهلش
وشكراااااااا استاذنا