الخميس، 20 مارس، 2008

15 - شوية حاجات فرساااااااااني موت

بصوا بقى انا اصلا عشان نبقى على نور شايله المراره من اربع سنين يعنى ما عادش عندي حاجه تتفقع وعليه بقى هاقولكم على شوية حاجات مدعمه بمواقف من الحياه وتقوليلى على حل .اعمل ايه في الفرسه دي فى غير وجود المراره ؟؟؟؟؟؟؟؟؟
* أول حاجه فرساني : زمان فى العصور السحيقه كنت اشوف الرجاله بالصلاة على النبي الى بيرقصوا فى الافراح كده طول وعرض ويرقصوا بعصايه وبعد شويه انحرفوا وبقوا يرقصوا بحركات غريبه كده برجليهم ويفتحوا جاكت البدله ما علينا اهو كانوا بيرقصوا .
دلوقتييييييي الرجاله الحيله او الى اسمهم كده بيرقصوا بوسطهم لييييييييييه ؟؟؟ منظر مقزز جداااااااا حاجه تقرف ( اصل انا كنت فى فرح النهارده )
* تاني حاجه : البناطيل الزفت الى بيلبسوها دي الى واقعه دي اخرتها ا يه طيب ؟؟؟؟
قريت مره مش عارفه فين ان الموضه دي اصلها ابتدعها مصمم شاذ جنسيا وكان فى السجن والمساجين بناطيلهم بتبقى واقعه كده أو باين المز بتاعه فى السجن كان عنده مشكله مع استيك البنطلون ( المز = مذكر مزه)
طب مااااااالنا احنا ومال الناس دي ؟؟؟ فى اي اهبل فى الى لابسين ا لبناطيل دي عارف كده ؟؟؟
*ثالث حاجه : ايه المرض النفسي الى عند البنات الى هو تبقى الجو برد مووووت ولازم تطلع اي منطقه كده زكاه عن صحتها فى الهواء الطلق .( يا اما من فوق عند ياقة القميص - او بين الجيب والبوت - او بقى تكون لابسه بادي لازق فى جسمها لدرجة ان خروم جسمها باينه من تحت القماش) بيحصلهم ايه يعنى لما يطلعوا حته فى الهواء الطلق ؟؟؟
* رابع فارسه : ايه التشيرتات الجاااااااز الى عليها ترتر الى الشباب لابسينها دي ؟؟ ايه الوكسه البني دي؟؟؟؟؟ امال الرقاصه تلبس ايه لما الرجاله (اول الى اسمه كده يعنى)يلبسوا ترتر ؟؟؟
* خامس نقطه : ايه الداء الزفت الى بقى فى الناس ولاد وبنات انهم يبينوا الاندر وير ؟؟؟
مش عارفه ايه مشكلته مع الموضوع ده ؟؟ بس شكلها مشكله عالميه على فكره . لان رضا لما راح الصين (رضا ده جوزي) قالي انهم هناك بيبجلوا الاندر وير جدا جدا وخصوصا القطعه الاندر يعنى وحتى اسعارهم غاليه اوي وماركات وكده يعنى .
قلتله اشمعن ؟؟؟؟ قالي يمكن عشان بيبان دايما ؟؟؟؟ ( لا ما تخافوش لسه عايش بعد ما قالي كده )
* سادسا : كان زمان على ايامنا احنا يعنى في العصور السحيقه برضه كان فى قطعه كده متوفره فى الاسواق اسمها كومبيل !!!!! اه فاكرينه يا شعب ولا ايه ؟؟؟ ما علينا الكومبيل ده كان متوفر بشكلين طويل تحت العبايات والجيبات وقصير تحت البناطيل وكده يعنى .
خير اللهم اجعله خير اختفت القطعه دي . تلاقي الواحده من دول لابسه حلو اوي وميت فل واربعتاشر وهى مش قصدها على فكره بتيجى كده معاها وبعدين ترفع ايدها تظبط الايشارب - اي والله الايشارب موجود وبصحه جيده - تلاقي بطنها بانت . طب ايه ؟؟؟؟
هاحكيلكم حكايه عشان خاطر خيخه حبيبتى عايزه تعرفها .
جوزي كان فى القاهره من اسبوع كده وتحديدا فى جامعة عين شمس ولما رجع قالي انا قررت اعمل دراسات عليا . قلتله طب وده من ايه ؟؟؟ قالي كده عشان اعلي من مستوايا وهاقدم فى عين شمس . طبعا اختكم لمااااااحه وكنت عارفه هو كان فييييين . لا ما حدفتوش بسكينه اخف شويه .
وبعدين قالي انا عايزك تعملي اعلان بالبنط العريض على النت فى اي منطقه زحمه ان البنات الى لابسين محترم دول -مالناش دعوه بالتانين دول قالعين قالعين- يخلوا بالهم لان ظهرهم بيبان وساعات الاندر وير كمان لما يوطوا طالعين او نازلين من الميكروباص مثلا. قلتله يعنى هما مش حاسين ؟؟؟ قالي مش معقول دول بيبقوا لابسين محترم اوي !!!!!
قلتله ليه هى الخلايا ا لعصبيه بتاعتهم نهاياتها مختلفه عننا ؟؟ ما حسيتش بسرسوب هوا كده لطش فى .... قفاااااها . قالي اه صحيح ده الواحد السطوح عنده فاضي بس اي نسمه تعدي فوق باحس بيها .
وبعدين بقى تساءلنا اين ذهب الكومبيل وذهبت ا يامه ؟؟؟؟ وتذكرت صراع مرير مع واحده هبله اقنع فيها انها تشتري فى هدوم فرحها كومبيلات وهى تقولي لا مش بالبسهم وقلت فكروني نبلغ عنه منظمة حقوق الاندر وير عشان يحموه من الانقرااااااض .
مجموعة بقى فرسات مختلفه : ليه الناس بتستهبل ؟؟ ليه الناس حشريين ؟؟؟ ليه الناس قليلة الادب ؟؟؟ ليه الناس بيشتموا بعض اشنع الشتايم على سبيل الهزار ؟؟؟؟ ليه الاهالي شخصيتهم ضعيفه مع اولادهم ؟؟؟ ليه الناس فاكره الاطفال اغبياء ؟؟؟؟
ليه العيال بتقل ادبهم على اهاليهم ومفرغين عنهم منهم ؟؟؟ ليه الاستنطاع بقى موضة العصر؟؟؟؟
اه يا مرااااااااااااارتي ياريتنى كنت خدتها من الدكتور يومها وعملتلها مقااااااااااام
يلا بقى كفايه انتم رغاييين اوي ايه ده

هناك 20 تعليقًا:

Anonymous يقول...

السلام عليكم يا صبرني

أي نعم هأرغي شوية بس استحمليني لأن الموضوع ده بحبه جدا الرجالة اللي ما بقوش رجالة

هأرد على كل نقطة لوحدهااااااااااا:


أولا ::رقص العيال اللي في الأفراح بقى مصيبة سودة تخلي الواحد راسه في الأرض مش عارف يبص لفوق بس أنتي يا صبرني طلعتي صبورةكان أقلها تخلصي على كام واحد منهم

المهم أحمدربنا أني حاليا معظم الأفراح اللي بحضرها أفراح صعااااااااااااايدة

يعني الرجالة بتقبى رجالة ولما بأحضر فرح في مصر بتبقى ليلة مطينة

ثانيا::كويس جد أنك تطرقتي لموضوع البناطيل

شوفي يا ستي هما بيعملوا كده عشان موضه
موضه معناها إيه الله أعلم شكلها كده موضه زي ما قلتي بتاعة واحد منحرف

المهم أنهم بيعملوها عشان موضة،،،

مرة كلمت واحد صحبي كان منهم مدلدل بنطلونه برضك

الحوار تم كالآتي ::
أنا :: إنت مش مكسوف على نفسك بالشكل ده
هو:: لا طبعا دي موضة يا عم أنت جااااهل ولا إيه
أنا :: طيب تقدر تمشي جمب والدتك في المول كده
هو:: وحياة أبوك مش ناقصة فلسفة ومش طالبة تنكيد
أنا :: طيب أبوك بيشوفك كده يا ابني
هو :: أبويا أصلا مالوش يتدخل في هدومي كل اللي عليه يديني فلوس أجيب بيها اللي أنا عايزه
أنا:: طيب استر نفسك يا حبيبي ويلا من هنا
هو :: يا أخويامسيرك تلبس زي في يوم وساعتها قول لنفسك الكلام ده

وطبعا العبد لله خاف فعلا يعمل كده في يوم من الأيام روحت لوالدي يا بابا تعمل إيه لو لقتني بلبس زي فلان

قاللي يا ابني أريحك وارتاح بطلجقتين في الراس طبعا بعد ما أجلدك وأسلخك وأشفيك وأخلي اللي ما يشتري يتفرج عليك

أنا كده اطمنت أني مش ممكن أبقى زيهم أبداااااااااااااااا

ثالثا :: دي بتبقى مصيبة سودة نبقى في عز البرد والشباب الرجالة ميتين من البرد وتلاقي واحدة لابسه كات ربنا هو اللي بياخد يا صبرني
مش هأعرف أعلق بس ده غلط أساسي من التربية

رابعا :: الحمد لله لسه ماشفتش حكاية الهدوم اللي بترتر دي بس لو شفتها هتبقى على بنت حتى لو شكلها شكل راجل

خامسا:: لا تعلــــيق عشان مش عايز اتنقط أكتر من كده وبرضك ربنا هو اللي بياخد


سادسا:: ربنا يعين جوزك يا اختي ويسهلهبس برضك كلامك صح البنت بتبقى عارفة ويا اما مكسوفة يا اما مبسوطة


أخيرا :: بصي يا صبرني برضك بصي للجابن الممتلأ من الكوب لسه في ناس محترمة وناس كويسة

ولسه في أهالي بتربي ولادها على النضيف
ومتهيالي لازم الأسر دلوقتي يتعمل لها توعية
عشان التربية بتاعت الواد دخلت على اربية البنت فالنتيجة الطبيعية تلاقي واد شكلا وداخلا أنثى

وتلاقي بنت مسترجلة المفروض يبقى في توعية ونجيب كتب التربية الأجنبية طبعا مع اقتتطاع أجزاء تتخالف مع ديننا وواقعنا

المهم يا صبرني نجحتي وعرفتي تخليني على آخر الموضوع مش شايف أدامي من النقطة


تحياتي ليكي يا صبرني

التوقيع \\\\ THE WHITE KNIGHT

خمسة فضفضة يقول...

السلام عليكم ورحمة الله وبركاته

معلش يا صبرني اصبري يا بنتي هانعمل ايه
كل حاجه حالها بقي مايل ومش لاقيه اللي يعدلها

اقولك لما الاستاذ رضا يروح الصين المره الجايه خليه يحيبلك معاه مراره كاوتش تنفع في المواقف اللي زي دي وعمرها ما تنفجر

ياريت تلغي الوورد فاريفكش حفاظا علي مرارات الشعب من الانفجار


تحياتي

صبرني يارب يقول...

وايت نايت

انا مش متشائمه والله ولا باصه لنص الكوب الفارغ ابدا بالعكس فى حديث للرسول عليه الصلاة والسلام بيقول ( الخير فى امتي الى يوم الدين )
صدق رسول الله صلى الله عليه وسلم
وانا دايما فعلا حاسه ان فى خير وفى حاجات كويسه بس زي ما دايما اقولكم البيض الفاسد يطفو على سطح الماء
لكن انا مفروسه من الناس عادي يعنى



خمسه فضفضه
بجد حلوه حلوه حلوه حكاية المراره الكاوتش دي بس ده انا عايزالي يجى خمسه سته كده عشان يكفوا اه ما خدي عندك واحده للعيال وواحده لابوهم وواحده للعيله الكبيره وواحده بقى لباقي الشعب ولو دخلنا الحكومه فى الموضوع يبقى عايزين شادر مرارات

بس انا ما فهمتش يعنى ايه الوورد فاريفكش ابقى قوليلى بليز

Liberal Muslim يقول...

الحمد لله الذي جعلني صعيدياً حيث ان الناس ترقص بالعصا ولا شئ غير العصا
هههههههههههههههه
لا بجد انا بستغرب قوي لما اشوف راجل كامل الرجوله ولما اشوفه بيهزر بفتكر المرحومة سامية جمال علي طول .... مع فرق ان ساميه جمال كان رقصها محترم شوية عن الأخ اللي بيرقص .

موضوع البنطلونات الساقطه دي .... بدأ في السجون الأمريكية عشان المساجين بيحتفظوا بالأحزمة عشان الخناقات وفي رواية أخري ان المثليين من المساجين بيلبسوا كده عشان الناس تميز انهم مثليين .
بيسوقوا بضاعتهم يعني :$
وطبعاً زي مانتوا عارفين ان مطربين الراب اغلبهم رد سجون فخرجوا بالموضوع دي من السجن لبره السجن وانتشر الموضوع من هنا
عايز احكيلكم علي موقف ...
طبعاً قبل ما اسيب مصر ماكنش موضوع البنطلون الساقط ده وصل مصر لسه ... واول ماوصلت هنا كان في ميامي فلوريدا ... خرجت من المطار واخدت تاكسي وروحت علي مطعم وأول ما دخلت لقيت اللي واقف قدامي بنطلونه ساقط لغاية ركبه .... حلفت ما اكل في المطعم ده وكان هاين عليا اركب نفس الطياره وارجع مصر تاني ...كان منظر غريب عليا جداً .
المهم انهم في فلوريدا عملوا قانون يمنعوا البنطلونات الساقطه في المدارس والجامعات حفاظاً علي الذوق العام
ودلوقتي القانون ده اكيد هيتعمم في باقي الولايات قولوا آمين .

أما موضوع لبس البنات فده مش هحكي عليه .... الصيف داخل وربنا يسترها بقي ... الناس هنا بتلبس من غير هدوم خالص
وعلي فكره الكومبيل ده لسه موجود في الصعيد بكثره ...


علي فكره انا مستغرب انك لسه ماخلصتيش علي بعلك ... وربنا مراتي مره شافتني ببص علي واحده نظره عابره يعني ... فضلت 6 شهور تعيد وتزيد في الموضوع ده

صبرني يارب يقول...

ماشي يا عم الصعيدى الحمد لله على صعيديتك

عقبال ما عندنا يحافظوا على الذوق العام والمال العام والراي العام والشارع العام

أما مراتك فده عادي انها تقول وتعيد اتس ايزي امال انا رغايه يعنى بارغي في ايه
مسيرى احكيلكم عن رحله جوزي للصين وقبلها فرنسا وسويسرا والى حصل هناك والى حصله لما رجععععععععععععع
ومع ذلك بيحكيلى برضه تقريبا انا عديته رغي
شكرااااااااا وائل على ردك ونورت

ahmed_k يقول...

السلام عليكم أهنئك يا ام مريم علي موضوعك القيم ونسأل الله العفو والعافيه والا ينطبق علينا وعد الله تعالي حينما قال (واذااردنا ان نهلك قرية امرنا مترفيها ففسقوا فيها فحق عليها القول فدمرناها تدميرا )صدق الله العظيم والسلام ختام

صبرني يارب يقول...

احمد
امين يارب وربنا يرفع عننا غصبه يارب
وشكرا لك ونورت

المـــفـــــــقــــــــوعـــــة مــرارتـهــا يقول...

هو انتي شايلة المرارة من زماااان ؟
وبتوجع ؟
ليكي حق تشيليها
علي فكرة جوزك لمااااااااااااح أوي
خلي بالك منه ... بياخد باله من كله
بيروح الصين ومابياخدش باله غير من الأندر
لأ وايه عاوز يعمل دراسات عليا في عين شمس مالقاش غير عين شمس دي
انا بحذرك اهوه ... انا كنت فيها والبنات هناك موزز موزز
انا جايةأوعيكي يابطة وانتي حرة بقي

صبرني يارب يقول...

مفقوعه اها بياخد باله خاااالص بس ما تخافيش عليا .
وهابقى احكيلكم يوما على ما حدث فى الصين وتبعاته .
والى حصل فى فرنسا وويلاته اقصد تبعاته

وطبعا هو يوم ما قالي انه عايز يعمل دراسات فى عين شمس كان هو هناك اصلاااااا وشاف المزز امال عايز يعمل دراسات ليييييييييه؟؟؟؟؟؟

بس خلاص هو بعد تبعات الموقف برضه بتهيئلي غير رايه .
وما اتحرمش منك يا اختي ومن نصايحك الغاااااااليه يا غاليه

الشموع البيضاء يقول...

اول مره ازورك وبجد مواضيعك عجبتنى.. عاوزه اقولك ان الحاجات دى كمان بتفرسنى وبتغيظنى انا كمان لدرجة انى بقيت بتخنق جدا من حضور الافراح ومش عاوزه اعمل فرح فجوازى تخيلى بقى من فقعة مرارتى؟؟ والله انا مش عارفه البنات والولاد بقوا مغيبين تقليد اعمى للغرب وخلاص مفيش اى حياء مفيش مخ مفيش اى حاجه..ربنا يهدينا ويهديهم..تحياتى اسلوبك حلو ومنتظرين المزيد

صبرني يارب يقول...

الشموع السوداء نورتي يا حبيبتى المدونه
ومش تتعقدى ولا حاجه اعملي فرح كما يحلو لك انتى وخليها نقطى بدايه للافراح المحترمه

انا حضرت فرح قبل كده وكان في اغانيه ودي جيه وكل حاجه بس اهل العريس كانوا عاجبنى فى حاجه ان كل ما بنت تقوم ترقص يقعدوها بأدب

ولما الناس لاموا على اخوات العريس قالوا والله هو كل واحد حر عايزه ترقص ترقص بس مش فى فرحنا الى احنا عملينه ودافعين تمنه تشيلنا ذنبها ليه
والله كان فرح اخر احترام ودمه خفيفه وهادي ولطيف
عقبال فرحك يا حبيبتى ان شاء الله
ونورتي

خايف من الحقيقة يقول...

طيب ليه تغلطي وتقولي عليهم رجاله
عموما.........
كلامك صح والمشكله كبيره
ابني 10 سنين ومطلع عيني
ايه يابابا كل حاجه عيب كل حاجة غلط
طيب شوف الناس لابسه ايه شوف عاملين ايه
ودايما يناقشني في كل حاجة؟؟؟
بس الاب لازم يربي ويكون صارم والا الولاد يضيعوا

صبرني يارب يقول...

خايف نورتنا
وفعلا انا قلت هما بيقولوا عليهم رجاله مش عارفه الوضع ايه بقى

وبالنسبه لتربية العيال بقى فعلا هي مشكله كبير انا باعاني منها برضه والنقاش ده بقى سمة العصر

فى أخر مناقشه لبنتى مع ابوها وهى عندها سبع سنين ونص قالتله ماما لما تيجى هاتحسم الموقف ده .

طبعا رجعت لقيت باباها عنده حالة زهول وبيقولي طبعا بعين الريبه تعالي يا هااانم احسمي الموقف .

لكن بالنسبه لكلمة الناس بتعمل كده انا بنتى حفظت كلمه دايما اقولها لها .
الناس كلها لوعملوا الغلط انا ما اعملوش .
وولما تقول للطفل انت مش زي الناس انت لازم تكون حاجه تانيه وتقولها بفخر قوم الولد بقى يتنفخ على الاخر ويرفع راسه ويسمع كلامك
وربنا معانا كلنا
ونورت

M.a.r.y.o.o.o.m يقول...

السلام عليكم ورحمة الله وبركاته
بصي انا اولا هاموت من الضحك بس بحيكيي علي صراحتك المهم ياسيدتي انا كنت في فرح اول امبار والله الواد رقص رقص انا مش برقصه وبيهز وسطه بطريقه فظيعه انا اتخضيت لدرجه عندنا فرح كمان كام يوم والولد ده هايجيي يرقص يلا مش مشكل خلي الواحد يتعلم شوية أما بقي مواضيع البناطيل والأندر دي انزل الجامعه واتفرجي الشغل علي أصوله ربنا يعفينا
موضوع طلقه بجد ههههههههههههههههههه

صبرني يارب يقول...

مريومه نورتي

واسمك على اسم بنتى
وابقى خدي دروس بقى لتتجوزي واحد بيرقص احسن منك تبقى بايخه

وبعدين تنامى الى معلوماتي امبارح كمان ان فى موضه بنت هوهو على راي خيخه حبيبتى ان الولاد ماشين حاطين كحل

مش عايزه اقول عاملين ايه كمان عشان انا مؤدبه
بس هو وصلني الكلام ده الصراحه لو شوفته يمكن الفرسه تبقى زياده وابقى قليلة ا لادب بقى واقولكم الحقيقه كامله .
شكرا لك يا مريومه

بت خيخة وأي كلام يقول...

كنت سامعاكى يا ام مريم
ماكونتش بقرا كلامك كنت متخيلاكى قاعدة قدامى وانتى نرفوزة كدة وشوية شوية هتحدفى اى حاجة قدامك من الفرسة اللى انتى فيها
طب بلاش الكومبيل
فيه دلوقتى باديهات قطن شبه المايوهات بتتلبس تحت الهدوم وبتتقفل بكباسين من تحت زى سالوبيتات العيال الصغيرة
وممكن جدا البت تلبسها علشان وهى بترفع ايديها تعدل الايشارب بطنها متبنش
وكمان مش لازم المحجبات بس يلبسوها ممكن كمان البنات اللى مش محجبات
لو لابسين تىشيرت شفاف ولا حاجة يبقوا يلبسوا البتاعة دى تحت هدومها علشان البرا بتاعهم مايبانش
الا صحيح هو الكومبيل انقرض
انا بقالى زمن ماشفتهوش
تحياتى ليكى والحمد لله انك شايلة المرارة
غيرك مش شايلها وعلى وش انفجار
سلام
اختك خيخة

صبرني يارب يقول...

خيخه يا حبيبتى منوره

تصدقي ان انا يا خيخه كنت قاعده وربنا مكسوفه ؟؟
مع انا مش وش كسوف اصلا خالص ده انا متشرده قديمه ولا يمكن ده يا اختي الي بيقولوا عليه وضع يندى له الجبين ؟؟!!

اما بالنسبه لموضوع الباديهات هو حل كويس نسبيا خصوصا لانه يبقى تحت الهدوم

انما المشكله انه يبقى هو ده الهدوم . اي والله كده .
اصل البادي المايوه ده يا خيخه عاملي انا شخصيا عقده نفسيه .
عشان تلاقي البنت من دول لابسه بادي مايوه وعليه بنطلون جينز من غير وسط زي ماانتى عارفه الى يضحك بقى ان الباديهات دي لو كانت البنت طويله وماليه مركزها شويه بيبقى مقور من الجنب !!! اااااااه والله وبيبقى برررررررضه الاندر وير باين من الجنب ومعاه حته من السيكو سيكو أه وربنا .

مافيش حل هما حالفين على الاندر وير ده يفضحوه كده يااختي
وبالنسبه للمراره انا شايلاهاااااا من بدري من اربع سنين .
انا يا اختي الى خايفه منه الا حاجه تانيه عندي تتفقع مش عارفه ايه الى ممكن يتفقع تاني
نورتيييييييي خيخه

mayada يقول...

اه يامفروسه يامادي
حضرتك مفروسه لنفس الاسباب اللي
انا مفروسه عشانه
بسط عسللللللللللللل
البنطلون السقط ده مش
عارفه ايه الموضه في بنطلون
عاوز حد يرفعه علي وسطك
واللي بقي لما البنات بتلبسه
اسكتي يااختي مقولكيش
تلاقي شحوم ولحوم ركنه يمين
وراكنه شمال
ورا بعض كده علي طول زي عربيه
جوزك واخوكي بالظبط
لاينكن يكون ده منظر
وكمان تسقيط البنطلون ده اقدم شويه
من صفات قوم لوط التاريخ بيعيد نفسه
اما موضوع الشبابيك ده
بقت بلكونات يااختي بلكونات
واما بيقفلوها بتبقي الموتايل بس من النوع الردئ
اللي هو لايخبي ولايستر

اما موضوع الترتر
مش بيهزوا وسطهم
هيعملوا لهم برنامج هز ياناعم
علي غرار هزي يانواعم البرنامج الفظيع
البشع
المنيع
اوعي تخلي جوزك يتفرج عليه

اه مزكر مزه =سكموزه
الاالمصطلاحات والقواميس ياام مريم
مش عازين بوظ اللغه

صبرني يارب يقول...

هههههههههههههههههه
عسل يا مادي ربنا يخليكى لنا يا اختي تظبطي المصطلحات دايما كده

نورتي يا جميل

نهر الحب يقول...

البركة فى الاعلام اللى اغلب ان لم يكن كل اللى فيه عريانين والاسرة اللى مكبرة دماغهاا من اولادها ولا تنبهم
يعنى اعلام
وتقليد اعمى
جهل الدين والعادات
لامبالاة من الاسرة
وفى الاخر تلاقى حاجات كتير اوى تفقع المرارة


بوست حلوة
ومدونة جميلة بالتوفيق يارب