السبت، 7 يونيو، 2008

مستشفى سرطان الاطفال .... الى جايه من الفضاء

سلام عليكم يا اخواني:

عارفه انى اثقلت عليكم فى البوست الى فات بس معلش بقى مافيش قدامي الاكم حظكم كده . والف الف شكر لكل الناس الى بجد حسيت بمشاعرهم الحلوه وعواتهم لمحمد ولينا كلنا واتمنى ربنا يتقبل منا ومنكم .

انا النهارده عايزه احكيلكم على مستشفى 57357 لعلاج سرطان الاطفال احقاقا للحق وتقديرا للمستشفى والقائمين عليها والى بنوها اصلا .
انا لسه ما روحتش هناك بس لما رضا جه طبعا قعدته وشربته شاي تقيل عشان يفوووق ويحكيلى تفاصيل اليوم الفظيع كله من اول ما خرج من هنا الساعه 8 صباحا لحد ما رجع الساعه 12 بالليل من القاهره .

عن مستشفى 57357 بقى حكالي الآتي :
اولا المبنى اساسا من بره شكله رائع وجميل جدا تحس انه كمان طالع لوحده كده مكان مش بتاعه كأنه حته مثلا واقعه من الفضاء .

من الداخل بقى نظافه على حد قوله ما شافهاش فى اي مكان راحه حتى بره مصر ( رضا كان عمل تشيك فى مستشفى فى سويسرا كانت بتتعالج فيها الشيخه فاطمه زوجة الشيخ زايد الله يرحمه وهو كان المحاسب معاها هناك ) قالي انظف من المستشفى الى أنا دخلتها هناك فى سويسرا برضه .

واهم حاجه بقى الى رضا قالها وعاجباني وغايظاني من باقي المستشفيات جدا . العاملين فى المستشفى . ناس فى منتهى االاحترام . تنفيذ تعليمات صارمه جدا وملتزمه جدا مع وجود الانسانيه والرحمه والتعاطف مع المريض واهله .
من اول الحرس الى بره لحد الدكاتره طبعا والممرضات وكل الناس هناك .

نظافه والتزام بتطهير المكان كله فى اول كل ورديه ودكاتره محترمين وكبار وسماهم على وجوههم كده انهم بيفهموا .
بجد كل من راح هناك بيقول فى المستشفى دي كلام جميل اوي يا جماعه الى فى ايده مساعده لهم يساعدهم ويدعي لهم .
احب اقولكم ان احنا عندنا فى المنصوره مركز جديد بشوكه لسه لعلاج الاورام . وراحوه قبل ما يروحوا مصر . وقفوا الواد فى الشارع مش عايزين يجبولوا كرسي حتى عشان مش عارفه عايزين تذكره ولا مش عارف ايه . وقلة ادب وتناحه وصفاقه وقلة رحمه تماما بالمرضى .
خلي بالكم ما عندناش فى المنصوره تقريبا مستشفيات خاصه عندها الامكانيات لعلاج النوع ده . يعنى ده المفروض انه ملجأ الجميع .
والحمد لله ان هما ربنا هداهم وسمعوا الكلام وراحوا المستشفى دي .

السؤال بقى الى هايجننى ........

يا ترى الهيئه الخيريه الى بنت المستشفى دي اقوى واغنى من الدوله ؟؟؟؟

لما احنا محترمين ونقدر اننا نكون محترمين الى بيخلينا فى المؤسسات الحكومه بالمنظر الحقير ده ؟؟؟؟

انا مش باطالب ا بدا بان المؤسسات الحكوميه تكون على نفس مستوى التكاليف
يا سيدى مش مهم التكاااااااااليف فعلا المستشفى دي متكلفه جامد اوي.

خلينا فى المباني المهكعه الحكوميه والبلاط حتى يا سيدى العادي مش مشكلللللللللله . لكن النظام والاداره دي احنا عاجزين عنها ليه ؟؟؟

الكوادر الفنيه زي الزفت ليه ؟؟؟؟ والممرضين والممرضات عاملين شبه الجزارين وابشع ليه ؟؟؟؟؟

الحرس عاملين زي الى واقفين بيحروسوا حظيره مواشي ليه ؟؟؟؟؟

لو حكيت لكم من هنا للصبح الى سمعته هنا من شاهد عيان شغله سمحله يتطلع على الفساد بعين قريبه داخل المستشفيات الحكوميه التابعه للجامعه . مش هاتصدقوا ان الناس دي بنى ادمين . الى هما الدكاتره .
ده فضلا عن الممرضات الى للاسف حالتهم ما تسرش حد ابداااااااا.

على فكره مش بس المستشفيات الحكومي . انا اتعاملت مع مستشفيات خاصه ايام ما ولدت خالد لانه كان عنده مشاكل كبيره اتسبب فيها اهمال الممرضات وغفلة الدكاتره واهمالهم برضه .
مستشفى خاص بيقلبنا كل يوم فى حوالي الف جنيه عشان الولد مقيم فقط هناك بعد ا لعمليه فى العنايه المركزه مش الحضانه كمانه .
ومع ذلك كنت كل يوم باروح اعمل هنا مشكله مع الممرضات والدكاتره اصحاب المستشفى الى منهم واحد قريبى كمان .
ولما واجهته باهمال الممرضات واخطائهم قالي اعمل ايه انا جايب اصطف من الجامعه كلهم دارسين وقلت انقيهم محجبات وبيصلوا وعارفين ربنا عشان يبقوا يراعوا ضميرهم مع الاطفال .

ما صعبش عليا لا . كل راع مسؤل عن رعيته . لو بيروح هو يدخل العنايه المركزه بنفسه كل يوم يفتش على الاطفال ويجازي الغلطان كانت كل واحده قبل ما تقعد ترغي مع صاحبتها تقوم تغير للعيال وتأكلهم وما تنامش فى الورديه وتسيب العيال تموت زي الى حصل من كام يوم .

وكان يومها اسود الى قالتلى يا مدام انا بروفيشنال تمريض وعارفه انا باعمل ا يه . اتفحت فيها وقلتلها انا هنا وباتعذب بعذاب ابنى بقالي شهرين ولسه الله اعلم لحد امته بسبب اهمال واحده او اكتر من واحده بروفيشنال زيك . ولولا ربنا هداني كان زماني فى مصيبه اكتر من ال انا فيها . كلمه زياده مش عايزه اسمعها بقى .

واكتر ما يغيظنى فى الدنيا استهانة الدكتور بالخطأ . ولما قالي مره مدير المستشفى كل الناس بتغلط والغلط وارد . قلتله يا دكتور ده لو الميكانيكى بوظلك العربيه هاتضربه يمكن . لو حد بوظلك جسمك ولا جسم ضناك تبقى ساعتها ده شعورك برضه ؟؟؟
ان الخطأ وارد ؟؟؟؟؟؟؟؟ المجال الوحيد الى الغلطان فيه مالوش اي عذر هو مجال الطب عشان مش بتكون الخساير لها تعويض . بتهيئلي الى خبط واحد بالعربيه موته ولا عمل فيه حاجه اهماله وخطؤه يمكن قبوله من باب السهو والخطأ .

انما الى يبقى دكتور والناس تستأمنه على حياتها ويكون مهمل ومخطيء عن نفسي لا اقبل منه ذلك ابداااااا ولا التمس له اي عذر .
ناهيك عن غرور الدكاتره المميت والى انا واجهتهم به اكتر من مره واعترفوا به والله ويقول اصل احنا بشر ؟؟!!!!!!

وبلاش نجيب سيرة الفساد الاخلاقي والمتاجره بالام الناس وامراضهم . دون التفرقه بين القادر والغير قادر . الى بيتعود على طعم دم البشر ما بيفرقش بين فصايل الدم وما بيشبعش .

وبلاش كمان نجيب سيرة شركات الادويه وصفقاتهم المشبوهه مع الدكاتره والهيئات الحكوميه .

وبلاش كمان نقول ان المستشفيات الى المفروض تعالج الغلابه دلوقتي الدكاتره الكبار عاملنها حكر عليهم بيعملوا فيها عمليات لحبايبهم واصحابهم بس . والغلابه يقفوا فى الدور ويستنوا لما يبقى دكتور مبتديء يفضى ويتعلم فيهم .

وبلاش نجيب سيرة الاداره الى هى اصلا من الدكاتره برضه وبتتحكم فى الاجهزه والامكانيات المتاحه للمستشفى وممكن تقفل مثلا جهاز الاشعه يومين على ما يشغل عيادته شويه ولا يعنى ما ياكلش عيش عشان فى جهاز جديد فى المستشفى ؟؟؟؟؟؟؟؟

سؤال : فى بعد الااام الناس يا ناس ؟؟؟؟ لازم كل واحد فينا يتقرص فى قلبه وعينه عشان يحس بالناس ؟؟؟؟؟


لازم يكون فى حل لازم يكون فى وقفه لازم يكون لها اخر . انا على فكره موضوع الطب فى مصر ده مش فجره عندي بس مشكلة محمد لا انا عشان تكونوا عارفين بقالي كام سنه مش باروح الا لدكاتره معينين غير الى الناس كلها بتروح لهم .دكاتره محترمين وباثق فى علمهم وفى اخلاقهم . عندي مبدأ ثابت دلوقتي ان لو كان حتى دكتور مش هو اعلى حاجه فى العلم لكن عنده ضمير ويتقى الله افضل ميت مره من الى يكون هو قمة العلم وقاع الاخلاق والدين .

اغلب الدكاتره المشهورين للاسف انا باشك فيهم وفى نواياهم واخلاصهم لربنا وللمهنه وشرف المهنه الى ما عادش موجود اساسا .

حقيقى منه لله الى خلى كلية طب بالمجموع فقط والكليات كلها اصلا مش المفروض تكون بالمجموع فقط
المفروض يكون فى مقايس تانيه كتير . كل دول العالم المحترمه بتعمل كده . لكن واضح ان احنا لسه مش محترمين .

مع احترامي لكل الدكاتره المحترمين طبعا الى مازالوا موجودين وانا عارفاهم
ومتأسفه على الاطاله شكرا لسعة صدركم

شوفوا المنجيات من عذاب القبر فى الرؤيه الاسلاميه

هناك 22 تعليقًا:

Unique يقول...

للاسف احنا فعلا مش محترمين

بس المفروض ان لما الالم يزيد الرحمة تزيد

ونلاقي اللي يقدر قيمة الانسان

تحياتي

صبرني يارب يقول...

يونيكو

الله يكرمك نفسنا نبقى محترمين يظهر انه حلم بعيد

ليلـــــــــــــــــــــــــــــى يقول...

مع احترامى ليكي و لرأيك:
طبعا مستشفى السرطان الجديدة تحفة و كل حاجة بس الفكرة ان كل حاجة فى مصر بتبتدى على أعلى مستوى و بعدين تخرب بداية من سيتى ستارز و ده المفروض مول لمستوى معين من الناس (يعنى كمان مش مجانى زى المستشفى) و انتهاء بالمستشفى الجديدة
المشكلة عندنا ان مفيش صيانة لأى حاجة...
اتفرجى على المستشفى لمل الرجل تزيد عليها كمان سنة و مش حقولك كمان سنتين أو تلاتة...و ساعتها حيقولولك هى مش مجانى طب حنجيب فلوس الصيانة منين؟؟ مش مجانى طب حنجيب دكاترة درجة أولى منين؟؟مين اللى حيدفع لهم مرتباتهم؟؟

وتيتدى سلسلة جديدة من الإهمال و الفضائح اللى مالهاش أول من آخر وده شىء متوقع جدا...
ده غير يرضه موضوع الوسائط و الإتاوات اللى ذكرتيه...

هى بس مشكلتنا فى مصر لما بنيجى نخطط اننا مابنبصش أبعد من تحت رجلنا للأسف.

موضوع هايل و تحليل هايل للموضوع و عجبتنى أكتر جملة بتاعت ان الدكتور اللى عنده ضمير أحسن مليون مرة من دكتور عنده العلم و مفيش ضمير.

شكرا لكِ و آسفة للإطالة

ahmed_k يقول...

في البدايه عايز اعبرلك عن مدي امنياتي لمحمد باشفاء العاجل وعليكم ان لا تيأسو من روح الله ففي غمضة عين وانتباهتها يغير الله من حال الي حال واحنا عندنا فعلا مراكز متطوره جدا في جميع المجالات كمستشفي سرطان الأطفال ولكنها تظل حالات لا تتعدي نمازج للدعايه فقط وليس هناك تعميم ولكن الحمد لله انها موجوده احسن من مفيش خالص وكما اشرتي نحن ينقصنا الأمانه في اداء اعمالنا فلو كل مواطن وضع وطنه امام عينه لما اهمل في عمله وليس للأهمال والجشع اي مبرر مهما كانت الظروف اسأل الله ان يصلح حال البلاد والعباد حتي يمكننا ان نلحق بركب العالم المتحضر المتقدم والسلام ختام

صبرني يارب يقول...

ليلى

انا اتفق معاكي تماما فى كلامك ده حاجه واحده الى يمكن ما تكونش بالظبط الحقيقه كده .

انك علقتي فشل وانهيار الصرح بتاع مستشفى سرطان الاطفال واي حاجه تانيه زيها ( وده شيء جايزجدا طبعا ) على قلة الموارد الماليه وزيادة عدد الناس فيها بس .

وقلتي منين هانعمل صيانه ومنين ومنين .

اختلف معاكي كليا فى النقطه دي لان مش هو ده سبب انهيار اي منشأه من المنشآت محل النقاش.

انا شايفه ان سبب الانهيار والفشل بيكون الاداااااره .

لان اصلا من مهمة الاداره انها كمان ترتب الموارد بتاعتها وتوفرها بما يضمن استمرار العمل .


والدليل على كده مركز الكلى عندنا فى المنصوره .
وكان بادارة الدكتور غنيم سنين وسنين ماشي زي الساعه وعليه ضغط فظيع لانه كان المركز الاول على مستوى الوطن العربي كله تقريبا

لكن احب انوه ان الي اعلى من الدكتور غنيم رضخوا لمافيا الاطباء وخلعوه من ادارة المستشفى التنفيذيه .

ببساطه لانه جاب جهاز رنين مغناطيسى فى ا لمستشفى وفتحه للجمهور بستين جنيه بس

دكاترة الاشعه اتجننوا وقالك هانودي فين جهاز الرنين الى عندنا الى بنعمل الحاله فيه بالف جنيه بالراحه ؟؟؟؟

وقامت حرب شنعاء على الدكتور غنيم خلعوه من الاداره التنفيذيه للمركز

والمركز بالفعل فى النازل .

وربنا يسترها علينا عشان الى بيمرض ما عادش له ديه

نورتي يا ليلى وشكرا لك وربنا يكرمك يارب

صبرني يارب يقول...

استاذنا الفاضل احمد

متشكره لحضرتك اوي

لكن احيانا مافيش يبقى افضل .

وشكرا لك ونورت

أليس في بلاد العجائب يقول...

انا طبعا مع ليلي ف رايها جدا هو فعلا اصبري عليها شوية وقت مع العادات الهباب اللي الناس متعودة عليها مش هيعرفوا يحافظوا عليها زي ما هي وهي يادوب اول ما الاجهزة دي الضغط يزيد عليها وتخرب يلا السلامة محدش هيقولها انتي فين

مش يأس ولا حاجة
المستشفي دي اتبنت بتبرعات ناس كتير اوي و الناس تعبوا فيها علشان تتبني بس للاسف طالما مفيش حد حاسس انها بتاعته وانه بعد الشر يعني ممكن يحتاجلها ف يوم مش هيحافظوا عليها
اللي هيحافظ عليها اللي عارف قيمتها و شاف و عرف الفرق بينها وبين غيرها
دا اللي ممكن يفكر الف مرة قبل ما يخرب فيها حاجة او حتي يتصرف جواها باهمال

اما عن الدكاترة بس هرجع واقولك المسئولية ..منهم اللي عارف ان المهنة دي مسئولية هيتحاسب عليها و منهم اللي معندوش دم ومش فارق معاه لا الم ولا مرض ومنهم اللي فاكر روحه موظف من موظفين الحكومة يجي الشغل يمضي حضورة وانصراف وان جيتي للحق هما كمان اجورهم في الحكومة متاكلهمش عيش حاف اساليني انا

اللي متخرج اهو بقاله يجي 10 سنين و متجوز و مخلف 2 ابوة بيصرف علي بيته لحد النهاردة علشان مرتبه كله علي بعضه واسمه من ستاف الجامعه مش بيكمل ال700 جنية اللي انتي عارفة طبعا يعملوا ايه يعني ال700 دول ف الزمن دا

يلا اهي خربانة من كل ناحية بس لما بنلاقي بارقة امل بنقول الحمد لله ان لسه عندنا حد بيحلم وبينفذ حلمه

ربنا يديم علينا ستره و يشفي مرضانا ومرضي المسلمين

mony يقول...

معلش يا صبرني بقالي فترة مش بقعد علي الكمبيوتر

زعلت جدا علي اللي حصل ده

ربنا يطمنكوا علي محمد ياااا رب

و يعجل بشفاه

و فكري اهلة ان الرسول صلي الله عليه وسلم قال داوو مرضاكم بالصدقات

ففكريهم بالصدقة علشان ربنا يعجل بالشفاء

بس انا برضه حصل لاختي نفس الاعراض اللي قلتي عليها ديه في السنة اللي فاتت كان عندها امتحانات الثانوية العامة و كل الدكاترة ماعرفوش عندها ايه برضة و دخلت الامتحان و هي تقريبا بتموت

و بعد الامتحانات سبحان الله كأن شيئا لم يكن

فأرجوا من الله ان يطمنكم عليه و يصبره و يصبركم و ربنا يجعل كل اللي حصل في ميزان حسناتكم

اما موضوع الدكاترة فعلا بشوف اغلبية كاسحة منهم مغرورين جداااا بنفسهم مع ان منهم قلة اللي بيفهموا


ربنا معاكم

صبرني يارب يقول...

اليس

للاسف هو ده الحال لكن نتمنى من الله انه ده ما يحصلش وزي ما قلتلك مش شايفه انها مشكلةموارد ابدااااااا

وياريت احنا نحترم نفسنا بقى ونتعلم النظام والاحترام .

صبرني يارب يقول...

موني

ربنا يكرمك يارب فكرتهم والله فعلا وعملت الى قدرت عليه من عندي

وربنا يشفيه يارب ويشفى كل مريض ويعفينا كلنا

عاشقة الحب يقول...

احنا لازم نكون محترمين
و لازم كمان نحس بالميض
وياريت نعمل مستشفيات محترمة
و يكون اللي فيها عندهم ضمير


مع تحياتي
عاشقة الحب

صبرني يارب يقول...

عاشقة الحب

ياريت وياريت ويا ريت معك لكن نفسي نعمل حاجه بقى

نورتي ربنا يكرمك

جنّي يقول...

والله بلادنا كلها خير ..
ولكن أزمتنا أزمة ضمير لا غير ..

صبرني يارب يقول...

جني

عندك حق حقيقىانا رايي كده والله

وبعدين انت فين بقى والله لسه جاي على بالي النهارده باقول ما جاش ليييييه ه ابقى اروح اشوفه فين

نورت

mohamed يقول...

fatmaandmostafaاللهم ارزقها خير ماتحب هيا وأولادها وجنبها ما لاتحب وأوسع لها فى رزقها.
محمد

صبرني يارب يقول...

الاخ محمد

الله يكرمك يارب ويباركلك ونورت

ahmed_k يقول...

يا ام خالد ازي محمد انهارده واخبار صحته ايه ؟ وهل في جديد؟ نسأل الله ان يديم علينا جميعا نعمة الصحه ويشفي مرضانا وجميع مرضي المسلمين ....آمين وتقبلي تحياتي والسلام ختام

المـــفـــــــقــــــــوعـــــة مــرارتـهــا يقول...

ايه الأخبار دلوقتي طمنينا
ياريت عشان الموضوع ده منكد عليا اوي

صبرني يارب يقول...

استاذنا الفاضل احمد :

الحمد لله والله على كلام الدكاتره هناك ان الولد بيتحسن والعلاج جايب نتايج كويسه الحمد لله وبالفعل الحمد لله هو بدأ يتحرك ويتمشى شويه .

ودعواتكم معانا ومتشكره اوي على السؤال

صبرني يارب يقول...

مفقوعه يا حبيبتى

بعد الشر عليكى من النكد الحمد لله زي ما قلت كده بيقولوا فى تحسن وكلنا بنقول يارب دعواتك معانا يا جميل

ويارب الى يتكند الى ينكد عليكى يا سوسو انشاله تكون فيفى مش مشكه

mayada يقول...

بجد والله ياام مريم انا اسفه
اني اتاخرت بس انا كنت في حاله مايعلم
بيها الا ربنا والف سلامه عليه
وان شاء الله خير انا اعرف حد كان كده
وكان صغير ي السن برضه بس الحمد لله
ربنا شفاه وباذن الله خير
اما بالنسبه للمستشفي فهي حدث ولاحرج فعلا حلوه قوي معموله صح لانها بفلوس الناس مش الحكومه اللي عملاها

صبرني يارب يقول...

مياده يا حبيبتى خير مالك يارب يكون خير

وانت تيجى فى اي وقت يا جميل وربنا يكرمك كفايه ان احنا على بالك .

وعلى فكره فلوس الحكومه اصلا هى فلوس الناس
نفسي الناس تعرف كده ان احنا اصلا بفلوسنا ومواردنا مأجرين الحكومه دي عشان تدير البلد مش العكس