الاثنين، 23 يونيو، 2008

ياولاد يا ولاد ...ايه يه ؟؟ ... تعالوا تعالوا ...(ستر الله)

تحديث مهم : شوفوا البوست بتاعي عند فرنسا والرايق والضاحكون
بعنوان
==============================================================
السلام عليكم


شوفوا يا ساده يا كرام تأكيدا لمبدأ الرغي العام في المدونه انا قررت انى احكيلكم حواديت .
ابله فضيله ؟؟!!! مالها ابله فضيله.
بس لا احنا هانبقى حواديت كبار شويه بس حواديت برضه .

والموضوع ده جه على بالي لان انا عندي حواديت كتيره جدا جدا يا جماعه
امال يعنى انا رغايه ببلاش؟؟؟
عندي مخزون رغي مش بطال وحواديت وقصص زي الفل ومن ارض الواقع لسه ما بدأتش الف قصص .

ندخل على الرغي بقى :
اولا القصه الى انا هاقولهالكهم دي من بريد الجمعه عشان انا متابعه الباب ده من قديم الازل من ايام عبد الوهاب مطاوع الله يرحمه .
هى تقريبا كانت نازله باسم( ستر الله) بس انا مش عارفه اجيبها من الموقع فاحكيهالكم باسلوبي انا .

القصه عن لسان صاحبها :
يقول انه رجل فى الخامسه والاربعين من عمره . وانه بيقدم قصته دي مش عشان حاجه الا انه بيحاول انه ينصح الناس الى يمكن يكونوا زيه ايام زمان .
هو نشأ فى أسره متوسطه الحال كافحوا عشان يربوه هو واخواته وعلموهم تعليم عالي . متدينين كلهم ماعادا هو .
حتى الصلاه ما كانش بيصلي الا صلاة الجمعه بس ولان ابوه كان بيصر على انه ينزل معاهم يصلي .
واتخرج من الجامعه وكان عنده دايما تطلعات ماديه كبيره . واشتغل فى شركه يملكها رجل اعمال كبير . وكان ناجح فى شغله جدا .
وانخرط فى فساد متقع . (متقع واخدين بالكم ) المهم الاخ بيقول انه كان بيروح كباريهات وسهرات مش تمام وعلاقات نسائيه وشرب خمور وكل حاجه وحشه ما خلاش حضرته . بيقول ما كنتش بافرق بين صديقه وقريبه وجاره ولا اي حد (حاجه زباله يعنى ) وبالنسبه للخمور كان شايف انه سلوك يتصل بالحضاره .
ويلغي الفوارق بينه وبين من يجالسهم من علية القوم .

وبالفعل بقى صديق مقرب من مدير الشركه الى كان فيها وقعد فى القعدات الزباله دي مع ناس ما كانش يحلم ابدا انه يشوفهم اصلا .

وكان عايش حياته بالطول والعرض ما كانش في حاجه بتنغص عليه حياته المقرفه دي الا رجوعه كل يوم البيت فجرا يلاقى والدته قاعده بتصلي الفجر فيروح يقبلها وهى تدعيله بالهدايه
وتسأله:مش هاتصلي الفجر يا ابنى .
يرد عليها وهو نص فايق: ايوه طبعا .
ويدخل اوضته يترمي زي ا لقله على السرير ويتخمد ينام .

وفضل كده سنين لحد لما والده توفاه الله . وحضر دفن ابوه ونزل القبر . بعدها وقف مع نفسه وقال انا ممكن اموت وانا كده ؟؟؟؟؟!!!!!!

وتاب واستقام سبحانه مسبب الاسباب . واخد والدته وراحوا عملوا عمره . وكانت ولدته رغم حزنها والمها على والده فرحانه بتوبته جدا .
ولما رجعوا من العمره فاتحته فى انها تجوزه ورشحتله بنت قريبتهم ذات خلق وجمال .
وهو فرح بها ووافق وتم الزواج سريعا جدا . وكان فى الوقت ده ساب الشركه وعمل لنفسه مكتب خاص .
وسبحان الله فتحت له ابواب الرزق واشتغل كويس جدا وبعد الجواز ربنا كرمه ببنت زي القمر واغدق عليه من خيراته . وانتقلوا لشقه تانيه اكبر وربنا رزقهم بطفل كمان .
ومرت خمس سنين من الزواج السعيد والحياه النظيفه الهادئه الهانئه .
وفى يوم اسود ما طلعلوش شمس : دخلت عليه واحده المكتب عميله فى شغل يعنى .
على حد قوله وتعبيره القوي جدا والصادق جدا : ما أن رأيتها اشتيهيتها . (تعبير فى رايي يعبر عن حيوانية المشاعر ودنوها مش عشان كلمة شهوه ولكن عشان الرابط الوحيد هو الشهوه ) . ودخل معها فى علاقه محرمه وبعد كام شهر زهق منها وسابها ولكن على حد قوله برضه : كان قد فتح باب الخطيئه .

وعادت ريما لعادتها القديمه . نساء وخمور وعبث بلا نهايه . واخد شقه فى مدينه جديده بعيد عن العين اسماها هو وكر الشيطان .
وطبعا مراته حست بتغيراته دي لكن كانت كاتمه فى نفسها لحد لما شرب خمر فى البيت رفضت وعملت ثوره
وقالتله انها مش هاتعيش فى بيت لا تدخله الملائكه هى وولادها . وانصاع لها وما بقاش يشرب خمر فى البيت .
وكان كل خوفه ان امه تعرف لانه كان حاسس ان وجوده فى الدنيا وستر ربنا عليه كله بسبب دعائها له .

وانه كان عشان يشيل الاحساس بالذنب الى عنده كان بيعمل خير كتير وصدقات ويساعد ناس كتير
( فى رايي انا اسمه تخدير الضمير )

وفى مره من ذات المرات قابل فتاه فى حفله كانت جميله ومثقفه ملفته جدا ......... الخ .

اتعرف عليها وحاول معاها كتير وبيقولك الشهاده لله كانت عصيه وقعد يتحايل عليها يجى اسبووووووووعين بحالهم . لحد ما وافقت تروحله الشقه بتاعته .
(عصيه واسبوعين ؟؟؟ امال لو ما كانتش عصيه كانت راحت امته ... قرررررررررف)

المهم راح يستناها فى الشقه واتصلت عليه وقالتله قدامي ربع ساعه واوصل واهو انشكح اخر انشكحاح بقى ومرت الربع ساعه ونص ساعه وساعتين .
اتصل عليها ما ردتش اتصل تاني واحد رد عليه .
وسأله: انت تعرف صاحبة التليفون ده .
قاله: ايوه في ايه ؟
قاله :هى عملت حادثه دلوقتي ونقلناها المستشفى .
اخد منه عنوان المستشفى ونزل يجري راح لها .
لقى جو قلق فى المستشفى ونظرات غريبه من الممرضات والدكاتره .
فقلق وسأل الدكتور هو في ايه ؟؟؟هى اصابتها ايه بالظبط .
الدكتور انفرد به وقاله : هى عندها كسور متعدده واصابات كتير وفى الحقيقه هى نزفت دم كتير .
واحنا جينا ننقل لها دم فلازم نحلل لها الاول عشان ما يكونش عندها حاجه وبعد كده تقاضينا وتقول احنا نقلنلها المرض .
وفى الحقيقه احنا حللنا لها وطلع عندها ايييييييييييييدز
قاله : ايدز ؟؟؟؟ايدز ايه انت بتهرج ؟؟؟؟؟؟؟؟؟؟؟؟؟!!!!!!!!!

بيقول : ما عرفتش دفعت فلوس المستشفى ازاي وكلمت اهلها جولها وروحت الشقه تاني (وكر الشيطان ) . وقعدت ابكي مش عارف مده اد ايه .
ودار فى دماغي حاجات كتير اهمها انى كان فاضلي ربع ساعه ويبقى عندي ا يدز ؟؟
البنت دي ما كانتش تعرف ان عندها ايدز!!!! وانا ما كنتش هاعرف وكن هانقله لزوجتي . ونموت انا والمسكينه مراتي بفضيحه نسيبها لولادنا يآسوا منها .

وبعدين راح لزوجته واترمى فى حضنها يبكي ويعتذر لها . وهى كمان كانت بتبكي ومش عارفه الحكايه ايه . واتوضا وصلى هو مراته وولاده .
وخدهم وراح لامه بكي فى حضنها واستسمحها .

وتاب وأناب وبطل كل حاجه غلط واستقام اخر استقامه واعتذر لكل حد اذاه وطلب منه السماح وحاول يرجع كل حق لصاحبه ويتصدق كتير ويستغفر كتير .
وبقاله على كده سنتين لكن عذاب ضميره شغال لسه على ما اذنب فى حق ربه ونفسه واهله .

وبالنسبه للبنت العصيه دي – قال عصيه قاااال- بيقول انها لما عرفت حقيقى مرضها جالها شلل واهلها اشفقوا عليها وخدوها فى مستشفى بره بعيد عن الاجواء .
وهو باعت قصته حتى يعتبر من هم على حاله قبل التوبه او اقل او اكثر . ويذكرهم انه قد لا يكون هناك وقت للتوبه .

توته توته خلصت الحدوته .حلوه ولا ملتوته ؟؟؟؟
يلا عايزه رأيكم فى القصه ورأيكم فى حكاية الحواديت دي نكمل ولا ايه ؟؟
شوفوا الجزء التاني من شارب الخمر على الرؤيه الاسلاميه

هناك 32 تعليقًا:

أليس في بلاد العجائب يقول...

انا فاكرة القصة دي كانت منشورة قريب ودي بالذات فكرتني بحال شوية من الشباب اليومين دول

اللي يقول انا شاب و عايز اعيش حياتي

ربنا يعافينا ويعفو عنا

كملي يا خالتي كملي اهي كلها آلام جوانا وان اختلف شكل الالم

واحدة مفروسة يقول...

استغفر الله العظيم اللذي لا إله إلا هو الحي القيوم واتوب إليه

ربك ببيبلي البلوه و يحاجيها باللطف...إنه هو اللطيف بعباده

ربك احن علينا من أهلنا...ربنا نجاه علشان خاطر مراته و ولاده

ربنا يسترها على عبيده كلهم

ربنا يقوينا على انفسنا...إن النفس لأمارة بالسوء

بت خيخة وأي كلام يقول...

اه قريتها انا القصة دى
اصل انا زى حالاتك
متابعة بريد الجمعة من ايام عبدالوهاب برضه
الله يرحمه

بس لو عايزة تتابعى قصص اشد وطاة واقوى تأثيرا
اقرى اريد حلا بتاعة حسن شاه يوم الجمعة برضه بس فى جرنال الاخبار


معنديش تعليق طبعا على القصة ان الحمد الله ان ربنا سترها مع الشخص ده
وياريت كل الشباب والفتيات يبعدوا عن الحراااااااااااااام
علشان ربنا يسترها معاهم دنيا واخرة
ويسترها معانا احنا كمان

سلام
اختك خيخة

صبرني يارب يقول...

مفروسه حبيبتى

لا فض فوك يا قمر وتسلمى ونورتي

صبرني يارب يقول...

اليس

نورتي يا جميل وانا نشرتها عشان انا قابلت الشخصيات دي على الشات بالفعل بجميع مراحلها .

صبرني يارب يقول...

خوخه الجميله

ايه يا خوخه الشعب كله طلع بيقراه ولا ايه يلا مش مهم .

وانا كنت احيانا اقرا حسن شاه برضه حتى كنت وانا صغيره فاكراها راجل اسمه حسن بفتح الحاء

بس بابا كان بيجيب الاهرام غالبا لحد الان. وحياتك يا خوخه انا عشان اقرا بريد الجمعه ده يفضل الجرنال ده فى ايدى يومين كده ويبقى زهزهت معايا لو كملت باقي الجرنال كده تصفح .

ومش باعرف اجيب اعداد سابقه فى ا لموقع بتاعهم عشان انا دي اس ال .

هييييييييييييه ياما سايع فى ملكه
الدنيا فيها بلاوي يا بنتى

نورتي يا خوخه

mony يقول...

سبحان الله


بس الشخص ده لو بص علي حياته من بره هيعرف اد ايه ربنا بيحبه

سخرله حاجات كتير علشان تفكره بحق ربنا عليه

و امه و ابوه


و بعدين حادثة البنت العصية ديه بالذات تبين اد ايه ربنا بيحبه


بس نقول ايه؟؟


الا قول الله تعالي:(فأعتبروا يا اولي الالباب)

Darsh يقول...

قصة فعلا مؤثرة و إن كنت مش عارف هل القصص دي بتبقى حقيقية و لا الجرايد بتحطها علشان التشويق

هو مفيش حاجة المفروض تأجل التوبة

مش بقول إن حاجة زي الأيدز بتموت

لكن مين قال أن ممكن عربية كانت تفعصه تحتيها و يروح في سيس بيص و إنا لله و إنا إليه راجعون

ممكن الإنسان يموووووووت في أي لحظة ... يعني تيم آب مش يصاب بالأيدز بس

صبرني يارب يقول...

موني حبيبتى واحشاني

حقيقى انا برضه قلت كده يا موني وشايفه ان سبحان الله لولا ان اهله ناس متدينين وحاولوا يصلحوه اكيد وهو صغير وده بيخلي عنده مهما عمل مرجعيه دينيه وواعز دينى حتى لو كان الواعز ده نايم الا انه بيصحى في يوما ما .

ده غير كرم ربنا لوالدته المؤمنه .

وصدقينى فى ناس كتير بتقابل الفرص دي وما تعرفش قيمتها .

صبرني يارب يقول...

دارش

طبعا اكيد مافيش حاجه تأجل التوبه لكن ربنا بيسبب الاسباب

ومش محتاجه كلام ان الموت مش مستني ايدز ولا عربيه عشان يموت .

لكن الناس دي بتبقى السكينه سارقاهم فعلا زي ما بيقولوا والشيطان مخدرهم .


والله يا دارس حكاية لو كانت بصحيح القصص ولا لا دي انا حاسه انها بصحيح اصلا كلها من الواقع فعلا لو كانت مؤلفه فعلا كانت بقى حاجه تانيه .

غير انى اثق فى ضمير عب الوهاب مطاوع الله يرحمه .
وخيري رمضان برضه راجل كويس بس لسه ما نعرفوش اوي .
ولما ادخل فى الحكايات كمان هاتلاقي حكايات عجيبه تقف قدامها وتقول ايه ده هو في كده ؟؟؟

كتير اقول ايه ده كنت فاكره الكلام ده بيجى فى الافلام العربي بس
هههههههههههههههههههههه

نورت يا درش جدا ودايما منور يارب

اه وحلوه اوي تايم اب دي هههههههه

alqassam يقول...

مبارك فى مصلحتك دائما ......جديد على مدونة القسام

alqassam يقول...

مبارك فى مصلحتك دائما ......جديد على مدونة القسام

صبرني يارب يقول...

القصام

مافيش سلام عليكم يا اهل الدار اي حاجه كده
عموما يا سيدى نورت وتشكر

الباحث عن الحقيقة يقول...

سلام عليكم يا اهل الدار
لا حول ولا قوة إلا بالله
سبحان الله فعلا الملذات مهلكه
يعني الواحد يقول هي المره دي وخلاص
وجايز تكون نهايته في المره دي
سبحان الله
اللى عاجبني في القصة برضه رضا امه واميته
وان الانسان لازم يرضي والديه علشان ربنا يسترها معاه

ahmed_k يقول...

فعلا قصه تحمل العظه والعبره , كام واحد عنده الأيدز وهو ميعرفش وطبعا لما يتهبب في الحرام حينقل المرض والتاني ينقله لشخص ثالث وهكذا الحلقه تتسع فلا حل لذلك سوي العفه وطلب الرحمه من رب العالمين ودائما كما أخبرنا رسول الله صلي الله عليه وسلم انه ما أنتشرت الفاحشه في قوم الا وظهر فيهم الأمراض والأوبئه التي لم تكن فيمن قبلهم ونسأل الله العفو والعافيه , أكملي حواديتك يا أم مريم ففيها من الفائده الكثير, والسلام عليكم

كاتب مصري يقول...

تحيتي
يشرفني أن أدعوكي لزيارة مدونت المتواضعة ووضع لمساتك عليها
أنتظرك سيدتي ولي عودة للتعليق على البوست
مدونتي هنا
http://kanyatklam.blogspot.com/

صبرني يارب يقول...

بااااااااااحث

كده ياعم لازم نيجى نهددك تهديدات شرسه ولا ايه رضيت علينا اخيرا .

نورت يا باحث وتسلم يارب

صبرني يارب يقول...

استاذنا احمد :

تمام كلامك يا استاذي الفاضل ويمكن لحد دلوقتي نسبة الايدز عندنا فى العالم العربي اقل منها فى الغرب للسبب ده ما زلنا احنا عندنا ناس محترمين الحمد لله ومتمسكين بدينهم .

صبرني يارب يقول...

كاتب مصري

يعنى كفايه ذوقك علينا يا استاذنا وحضرتك نورت ومستنيه تعليقك الى هايضيف لنا ان شاء الله واكيد هاجي مدونتك اتشرف بك

بس وحياة والدك تبقى تروح تزور القسام تقوله ازاي يدعوا الناس لمدونته .

نورت

Appy يقول...

وبالنسبه للخمور كان شايف انه سلوك يتصل بالحضاره


انتى عارفه ان الجمله دى صح فيه ناس كتير قوى رابطين التحضر والتمدن والرقى بده والله اعرف ناس كده بجد وبستغرب قوى عليهم
ربنا يهدى الجميع يا رب

شفـقــة و إحســــان يقول...

البوست حلو اوى والقصة هادفة
تسلمى

mohamed يقول...

صبرنى يارب
نعم الانسان ضعيف
لكن أحساسة بالمسؤلية عن زوجة وأولاد المفترض أنة يكون حاجز أو وجاء من النار
لان الذنب والخطيئة لا تعد فقط على مرتكبها بل على كل من هو مسؤل عنهم
المهم الرجوع عن الخطأ
الامر مفوض لسبحانة
نورتينى بالزيارة
كلمة حق
الحشرى
شوية كلام

mayada يقول...

ماما بتحب بريد الجمعه ده قد ما بتحبني
بالضبط
وحكه ليه القصه دي قبل كده
وانا قلت لها ربنا يرحمناربنا يرحمنا يام مريم

صبرني يارب يقول...

شفقه هانم واحسان بيه

نورتي وربنا يكرمك

صبرني يارب يقول...

أبي

ربنا يعافينا كلنا ويشفي كل واحد عقله تعبان

صبرني يارب يقول...

اخي الفاضل محمد

تفتكر الى ما يخافش ولا يهاب ربنا ويتجرأ عل ربنا بالمعصيه يهمه اسرته ؟؟؟

تسلم يارب وحضرتك الى نورت فعلا

صبرني يارب يقول...

مياده خليفتى فى الملاعب

ايوه على فكره ماما برضه كده هههههههههههههههه

رامى اشرف يقول...

حاجه زى الفل والله
هيا شدتنى برضو كلمه كانت عاصيه عاليه ضحكت اول مسمعتها
ربنا يهدنيا ويعافينا من الدوامه الى احنا فيها دى

سبهللة يقول...

طبعا حلوة
قريتى قصة الجمعة دى
اسمها بنات ابليس
ابئى اقريها وفنديها بإسلوبك الجميل دة للبنات لعلهم يتعظوا

صبرني يارب يقول...

رامي اشرف

نورت المدونه وامين يارب يرحمنا جميعا ويعافينا

صبرني يارب يقول...

سبهلله على الاخر

نورتنا يا اخي الفاضل

وفعلا انا قريت القصه من شويه مش عايزه اقولك تعليقى كان ايه بصراحه على القصه وصاحبتها عشان الرقابه.

ولا اقولك اول لما جوزي سألنى على القصه قلتله دى بنت بنت هوهو ومقرفه .

مش عارفه يمكن يوما اعرضها هنا بس البنات تتعظ ايه هى دي بنات اصلا دى هى اصلا اول بنات ابليس

اعوذ بالله . دى باعته الرساله عايزه الناس تتعاطف معاها يعنى وتقولهاعيشي مع الزفت ده فى الحرام

ما علينا فكرتني ليه يا سبهلله هههههههههههههه

نوووووووورت بجد

انت تسال والكمبيوتر يجيب يقول...

الأخت العزيزه صاحبة المدونه
تحيه طيبه وبعد
اعتذر عن نسيان ذكر تعليقك فى موضوع الدردشه مع روبوت بمدونة برنامجنا الأذاعى
انت تسال والكمبيوتر يجيب ولا اعرف كيف حدث ذلك لأننا نهتم بكل رد او تعليق ...المهم نرجو منك دوام التواصل وبالمدونه سؤال جديد
والعناوين هى
المدونه
http://netonradio.blogspot.com
الموقع
http://dear.to/cairo
اسرة اول برنامج اذاعى عن النت والمدونات فى الشرق الأوسط ويذاع من الفاهره