الاثنين، 30 يونيو 2008

الاخ تقليدى ولا شواريعي ؟؟؟

السلام عليكم يا حلوين :
وحشتوني وحشتوني لحد اخر اغنية ورده . نأسف على تأخير البوست الجديد نظرا لانشغالنا بتجبيس يد المدعو خالد وتوابع ذلك من زن ورخامه وما الى ذلك مستمرين الى وقتنا هذا .
ندخل فى الرغي . فاكرين لما انا كنت عامله استطلاع راي على المدونه هنا على الجواز التقليدى والجواز الى مش تقليدى ؟؟ أه بتاع الصالونات والانتريهات ده .
طبعا ما حدش ا ساسا شارك فيه غير عدد صغنن يلا مش مهم الا ان النتايج الى حد ما واقعيه .
فاكرين الكتاكيت ؟؟ كتاكيت فى مخ الشعب البوست القديم بتاعي . كان فى منهم كتكوت كبييييير عن الزواج التقليدى وقلنا ده عايز بوست لوحده .
انا بقى دايما اتسأل سؤال لطيف جدا لما اقول اني متجوزه على الشات يعنى او حتى عموما فى الحياه العامه .
الا وهو :
انتى متجوزه جواز صالونات(باكره الكلمه دي اوي ) ولا عن حب ؟؟؟
قوم اجاوب انا وانا هاطق من السؤال وصاحبه : الاثنين يا فندم .
يقولي: ازاي يعنى الاثنين
اقوله: حضرتك انا اتخطبت 3 سنين حبينا قبل الجواز لما قلنا بس ولا تفتكر لازم نحب فى الشوارع والطرقات العامه عشان يبقى الجواز عن حب .
وهاتك يا رشاش كلام فى وش السائل . من فرستي بقى .
لان انا مش عارفه ايه وجه التعارض بين الزواج الى بيقولوا عليه تقليدى وبين الحب ؟؟؟
يعنى ايه الى يمنع ان اثنين يتجوزوا بعض بالطريقه التقليديه ويحبوا بعض فى نفس ذات الوقت ؟؟؟
وايه خلى الحب قاصر على الصرمحه فى الشوارع ؟؟؟
ومين الى قال ان مافيش حب بيجى بعد الجواز ؟؟؟
اه وكمالة العباره الهبله دي :
تلاقي البت ولا الواد بيبربشوا كده ويقولك : هو ما بيبقاش حب ده بيبقى تعود عشره انما الحب مش ممكن يجى بعد الجواز ؟؟؟
السؤال هو ليييييييييييييييييييييه ؟؟؟ حد يدينى مبرر واحد للكلام ده غير انها مجرد كتاكيت فى مخ الشعب غذاها الاعلام المريض بتاعنا .
سؤال تاني بقى عشان علامات الاستفهام عندي بوفره النهارده .
هو ايه الفرق بين الحالتين الآتيتين :
الاولى : واحد شاف واحده او العكس فى اي مكان فى الدنيا الكليه الشغل الشارع بلكونة الجيران المهم انه انطس فى نواضره وشافها . وعجبته وقعد يسبلها اسبوع على ما شافته عشان نظرها ضعيف .وهووووب نظره وكلمه وابتسامه ..... وبقى في لااااااااموووووووووغ (اي حب ولكن بالفرنسيه ) .
ويمكن بعد كده بقى بسنتين تلاته نحنحه وسنسه بفكروا يتخطبوا وجايز تكمل ويتجوزوا .
وساعتها برضه فى احتمالين يا ينجحوا فى الجوازه ويستمر الحب . يا تنكشف الاقنعه ويبقى الجواز فاشل سواء انتهى ولا استمر لكن طبعا احتمال فشله وارد . لا وارد جدا .
الثانيه : ان واحد ربنا نفخ فى صورته كده وكبر وبقى راجل ا لحمد لله وبيعتمد على نفسه ويقدر يتجوز (مش عيل لسه فى الكليه اول امبارح كان بيقول على السكر اوكر وبياخد مصروفه من اهله ) وبعدين لما وصل لهذه المرحله قوم الست والدته رشحتله بنت الجيران
قالها: لا يا ماما دي حوله . غيره
مامته :طب بنت خالتك ؟
قال المحروس : لا يا ماما دى شبه خالتي بس على اسمر زي ا بوها
مامته: مالها خالتك يا واد دي زي القمر انت الخسران ......بس خلاص لقيتها فاكر بنت خالة ابوك الى كانت ساكنه فى مدغشقر ؟؟؟
محروس : ايوه مالها يا ماما دى متجوزه من زمان .
مامته : يا ابنى مش هى بنتها سميحه .
محروس : يا ماما بنتها ايه دي من دور اولادي ده انا كنت باشيلها وهى مولوده .
مامته : يا ابنى لا دي بقى عروسه . ده اصغر منك بسبع سنين بس .
محروس : معقووووووله طب انا ما شوفتهاش وهى لسه فى الحضانه . بس هى كانت حلوه مش عارف بقى الخراط وصل لحد فين معاها احسن يطلع خراط احول يا ماما .
مامته : لا يا محروس عيب عليك . انا شوفتها قريب فى فرح فواكه بنت عمتك حلوه وطويله وبيضا وزي الفل .وبعدين يا سيدى هاخلي اختك تبقى تاخدها وتخرج وتبقى انت تشوفها مالكش دعوه .
محروس : ماشي ياماما جوووووو اون .
وهوب المباحثات اشتغلت وشافها وعجبته وشافته وعجبها كل ده مبدأيا وبعدين العيلتين اتفقوا وهما منشكحين والخطوبه تمت والحياه وردي
وقربوا من بعض اكتر فى هدوء ومباركة الجميع ورضا ربهم عليهم . وحبوا بعض (وجايز لا برضه عادي ) ويمكن يكملوا ويمكن لا برررررررضه عادي .
ولو ربنا سهل واتجوزوا خلاص . برضه قدامهم حاجه من اثنين يا نجاح وحب اكتر واكبر يا فشل ومافيش حب بح خلاص .
الضامن هو الله بقى .
ايه بقى الفرق بين الحب فى الحالتين ؟؟؟ وايه يمنع ان محروس يحب سميحه ؟؟؟؟ ماهما برضه اتقابلوا يوما لاول مره ؟؟؟ وبعدين اعجبوا ببعض وبعدين قالوا ياهادي واتخطبوا وبعدين اتجوزوا !!!! ايه بقى ؟؟؟؟
وايه يخلي الحب فى الشوارع اقوى من الحب فى البيوت ؟؟؟!!!!
ومين يقول ان ماشي مع واحده ( سوري فى التعبير بس باحب اقوله عشان هى دي الحقيقه من غير تجميل ) هايقدر يعرفها اكتر من الى خاطب واحده ؟؟؟
بالعكس على الاقل الى خاطب واحده سأل على اهلها وسأل عليها قبل ما يتنيل يطب فى الحب وكمان بيدخل بيتهم ويقرأ ما بين السطور .
الحكايه مش محتاجه كل ده . والحب مش كائن هلامي . ودائما وابدا اقول ان الى اوله غلط اخره غلط برضه .
وان الحب بيتولد فى البيوت مش فى الشوارع . وبيعيش وبيكبر فى البيوت .
اما الى فى الشوارع هو هبل فى هبل ليس الا .
واي حد يقول ان الحب مش ممكن يجى بعد الجواز ده يبقى اصلا ما يعرفش لا الجواز ولا الحب .
الجواز ممكن يعيش من غير حب . لكن الحب مش ممكن يعيش ولا اصلا يعد حب مكتمل الجوانب من غير جواز .
واحتمال الفشل واااااااارد فى جميع المراحل سواء مع عيلين هبل لسه بيعطفوا فى الجامعه . او اثنين متجوزين بقالهم عشرين سنه .
الضامن هو الله والتوفيق بتاع ربنا فعلا . احنا بناخد بالاسباب واحنا بنختار .
ونختار الى قلبنا ارتاحله .
وقبل كل كده نكون بينا وبين ربنا عمار مش خواء . وكمان نكون احنا نفسنا كويسين عشان فعلا الطيبون للطيبات .
عايز تتجوز حد كويس خليك انت كويس الاول .
مش المقياس ابدا التقليدى والى مش تقليدى . المقياس للنجاح والفشل للزواج حاجات تانيه كتير اوي ما لهاش دعوه ببداية الحب كان ايه .
لكن احدى اسباب الفشل هي البدايه الغلط . وسؤال رفيع لكل واحد (ماشي مع واحده والعكس ) تفتكر بعد ما عرفتها لمده سنه مثلا ولا حتى شهور بدون علم اهلها(ابوها يعنى) مش امها الى بتستهبل . تفتكر هى كذبت كام مره على اهلها عشان تكلمك وتعرفك؟؟؟ اهلها الى ربوها!!!! طب ابقى اسأل نفسك بقى هاتبقى تكذب عليك اد ايه . وصدق اولا تصدق هاتكذب عليك يا ضنايا والله .
وكفايه كده عشان حاسه فى ناس فرفرت فى ايدى خلاص
شكرا لحسن استماعكم لرغينا

هناك 23 تعليقًا:

واحدة مفروسة يقول...

هيييييه
انا اول تعليق
اما اروح اوقف توكتو لحست البوست طويل..حتعب من المشي
هههههههه
حروح استقرا و اجي
ياااارب تكون بتعمل الزبادي علشان مش تيجي تعورني

واحدة مفروسة يقول...

انا رجعت
إيه يا بنتي البوست الجامد ده
يسلم قولك و الله
لأ حسيبك تعوريني برراحتك
لأبجد الكلام جميل جدااا و مقنع جدااا...

احييكي بشده على البوست و الله و ده مش رغي ده كلم موزون

انا اجوزت جواز صالونات...ده بس بالمناسبه

صبرني يارب يقول...

مفروووووووسه
دايما يا ولاد قاعده للبلوجر كله مستنيه حد يقول بم
عسل عسل من غيرها البلوجر يبقى مالوش طعم

ام محمد كانت عندن النهارده بس انا لسه ما عملتش الزبادي ما عنديش خميره
لو عندك احدفيلى معلقتين

عملت الجبنه البيضا بس .
وجار عمل القريش .
وجاري التحضير لعمل ام علي هابقى اجيبلك طبق .


وتسلمى يا رب على البؤين الى قلتيهم على البوست هو بس وسع مني شويه وطويل حبتين بس انتى عارفه يا اختي بقى الرغي ده اصله مش بايدى

والصالون بتاعكم كان لونه ايه يا مفروسه ؟؟؟

صبرني يارب يقول...

اوك جني عنيه طبعا لكم اروق بس واجي ازوركم والله والاعلان ده هاينور المدونه بس اشوف بس الاول ايه الموضوع لما اجي ازوركم


نورت يا جني

ليلـــــــــــــــــــــــــــــى يقول...

أول حاجة أحييكى على البوست الجامد أوى ده.
تانى حاجة هو يعنى مفيش غير النوعين دول؟؟:)
ممكن يكون عرف البنت فى الشغل مثلا و بحكم طول ساعات العمل يكونوا اتعرفوا على بعض أكتر (مثلا و قت الغداء مع زملائهم) و بعدين ييجى يفاتحها و يتقدملها

أنا حقولك ليه جواز (أو بلاش جواز خليها معرفة) الصالون عاملة للناس بعبع:

1. يمكن عشان اللى بيجيبوا العرسان للبنات بيجيبوا أى حد شايفينه مناسب من و جهة نظرهم هم بس.

2. كمان علشان البنت بيعدى عليها أشكال و ألوان من الشخصيات و المواقف اللى أحيانا بتكون غير ظريفة لحد ما تلاقى الشخص المناسب.

3. ساعات بعد ما يقعد معاها مرة و لا مرتين يجى يقول: لا مش دى اللى تناسبنى أصل مناخيرها معرفش ايه و لا شكلها ايه و ده بيضايق أى بنت و بيجرحها قوى.

مش عارفة الموضوع عاوز بوست تانى لوحده بس علشان محدش يفهم غلط أنا مش بشجع الإنحراف :) أنا بس بقول ان التعارف عن طريق شغل أو دروس دين أو أعمال خيرية أكيد أحسن من اللف و الدوران و السهوكة و بتبقى البنت على طبيعتها و فى نفس الوقت ما بتعملش حاجة غلط و برضه أحسن من الطريقة التقليدية و خاصة ان كل واحد جاى البيت فاكر انه حيلاقى هيفاء و هبى مستنياه.

تقبلى مرورى و تحياتى :))

Liberal Muslim يقول...

تحليل جميل جداً للموضوع
وانا بصراحة كده شايف ان الحب بعد الارتباط أقوي بكتير
انا اتجوزت جواز صالونات تقريباً
يعني شوفتها في لقاء مرتب وعجبتني وعجبتها وبعدين ارتبطنا واتجوزنا .... والحمد لله بعد 3 سنين جواز الحب بينا بيكبر يوم عن يوم
تحياتي

صبرني يارب يقول...

ليلى

شوفى حبيبتي انا فى البوست قلت انه ممكن برضه يقابلها فى شغل او دراسه لكن بعد ما يشوفها وتعجبه يبقى الاجراءات المتبعه
انه يسال عن اهلها وعنها هى نفسها
ويعرف الاول اذا كانت مناسبه ولا لا
ولو كانت مناسبه يتقدم على طول

مش الاول يقولها وبعدين يفضلوا يسنسنوا سنين
وباتغاظ اوي من الى يقولي اصل قلت اكلمها واعرف رايها ودماغها الاول افرض انا مش عاجبها

الله طيب ما تتقدم لو وافقت يبقى انت عاجبها ما وافقتش يبقى انت مش عاجبها ياعم هى قصه ؟؟؟

ده حتى ممكن ده يحصل من غير مواجه بينهم عشان الاحراج .من خلال واسطه بينهم

وبعدين يا ليلى الى مش بتشتغل وخلصت دراسه وقاعده فى بيت ابوها تعمل ايه حضرتك تتجوز ازاي ؟؟؟

وغير ده وده هو احنا قلنالك ان احنا هانجوزهم وهما مغميين عنيهم ؟؟؟

انا جوزي يا ليلى كان ابن عمي عارفاه بس ما اعرفش دماغه فيها ايه .

بعد ما وافقت عليه فضلت فتره طويله قبل ما نبدأ الاجراءات الرسميه عشان ظروف الامتحانات وكده وانا قلقانه برضه مش عارفه فكره من نواحي معينه ازاي .

يعنى ما كانش فى فرص كتيره للكلام وقتها لكن فى خلال 3 ايام عرفنا الى طمنا لبعض من قبل الخطوبه الرسمي .
الحكايه مش معضله يا ليلى ومش محتاجه سنين يعنى

الى محتاج سنين ومعاشره وبيت يضمه عشان يعيش هو الحب والحب يتضمن الزواج المفروض .

نورتي يا ليلى

صبرني يارب يقول...

مهاجر
حضرتك نورتنا وربنا يوفقك يارب ويكرمك

ويبارك لك فى اهلك وبيتك وشكرا لك

وما زلت مش باعرف اعلق فى المدونه بتاعتك مش عارفه ليه التعليقات مش شغاله من عندي

mony يقول...

عندك حق يا ام مريم

هي ديه وجهة نظري بالضبط في الزواج التقليدي و الشواريعي(علي رأيك)



مش مشكلة شافها ازاي ولا مين جابهاله


المهم بعد ما شافوا بعض ايه اللي حصل



و علي هذا الاساس بيكملوا او مش بيكملوا مع بعض

ahmed_k يقول...

انا جاي النهارده علشان اقدملك واجب الشكر
فأنتي اول من عرفني عالم التدوين الرائع عندما التقيت بحضرتك عالشات ودعيتيني لمدونتك وكان البوست تقريبا يتحدث عن علاقتنا بالغرب
ومن يومها وأنا متابع لمدونتك الجميله وبأترك تعليقاتي دوما بها
حتي عرفت بداية الخيط وقمت بانشاء مدونه خاصه بي والحمد لله بدأت الاقي بها اشخاص أفاضل يزوروني وأرد زياراتهم حتي لا اتهم بأهمال أحد اخواني,

انا فقط أحببت أن أرجع الفضل لأهله أو لمن دلني علي بداية الطريق

فشكرا أختي الكريمه

صبرني يارب يقول...

موني

نورتي يا جميل تسلمى يارب ونورتي

صبرني يارب يقول...

استاذنا احمد

الله يكرمك يارب انت الى افضالك علينا والله
وانا الى مقصره تقصير وحش اوي والله بس وربنا غصب عني

انا بقيت باكتب فى 3 مدونات بفضل الله
مش لاحقه اروح لحد خالص
حضرتك عارف مشكلة الوقت معايا
لكن اول فرصه لازم اجي ان شاء الله
ربنا يكرمك يارب ده حضرتك جميلك على راسنا
اول ما بدأت المدونه يا جماعه الاستاذ احمد كان هو الوحيد الى بيجبر بخاطري هنا هههههههههههههههه

نورت يا استاذنا

واحدة مفروسة يقول...

صبورة يا طويلة
يا ام رجلين بتقفل البيبان عاوزه الايميل يا إما انتي ابعتيلي على الميل
علشان السؤال اللي انتي سالتيه؟
اكيد مش بتاع الصالون يا ام المفهوميه
التاني اللى فى الخباثه
اصل فرنسا حلاجت نكلم بعض كده فى الشارع الكلام كله هناك
ومبدئيا مافيش حدبيشيل ولا همه
لو اتنين تواجدوا بس فى نفس الوقت
ابقى الغي التعليق ده لحسن يمسكوه عليا ذلة و يبتزوا بي اموالي

صبرني يارب يقول...

ما فهمتش حاجه يا بت يا مفروسه منك
انا جايه هناك اشوف في ايه

اسلام الحضرى يقول...

انا التقرب من بعض فى فتره الخطوبه بعد الاعلان الرسمى بيكون احسن
وفى ناس بتتكلم عن جواز الصالونات ده اكنه حاجه متاخره متخلفه مستورده من بلاد تركب الافيال وبيقولك ده كان زمان ايام جدى وجدتى

مع انه هو ده الحب والجواز اللى بيعيش
وان معظم الشباب رايهم انه مش هيتجوز وحده مشى معاها ويوم ما يفكر يتجوز بجد هيتجوز جوزا صالونات

سلام

المـــفـــــــقــــــــوعـــــة مــرارتـهــا يقول...

مفروسة بتنام بدري ذي الكتاكيت
ضيفيني انتي وانا هانضاف علي طوووووووووول

المـــفـــــــقــــــــوعـــــة مــرارتـهــا يقول...

SOSOGHARIEB@YAHOO.COM

المـــفـــــــقــــــــوعـــــة مــرارتـهــا يقول...

انا اللي صاحية
معكم مفقوعة تنفع مفقوعة
مش لاقية ايميلك علي فكرة
انتي رامياه فين ؟

صبرني يارب يقول...

مفقوعه يا حياتي انا ضفتك بس يظهر انى اتأخرت عليكى اصل النت كان فصل عندي

Desert cat يقول...

اصدقائى الأعزاء المدونين والمدونات
غدا السبت 5/7 يتم اذاعه الحلقة الخاصة بشحن بطارية المحمول
فى برنامجنا الإذاعى
أنت تسأل والكمبيوتر يجيب
والذى يذاع يومياً الساعه 9.10 صباحا على إذاعة البرنامج العام ما عدا يوم الجمعة
وسيتم اذاعه اجابات كل من
ام احمد المصرية
صبرنى يارب
أيوية
متنو
انجى البوهى
هارت بيت
الجده فصيحه
حاجات جوايا

يمكنكم سماع الحلقة مباشرة فى نفس موعد إذاعتها الساعه 9.10 صباحا من خلال موقع البرنامج
http://dear.to/cairo

تمنياتنا بدوام التواصل

صبرني يارب يقول...

يا حلاوه انا اسمي هايجى على البرنامج العام كده خبط لزق

طيب هاروح اصيح بقى فى المنطقه

عاشقة الحب يقول...

انا متفقة معاكي
في كل كلمة قلتعيها
يا رب كل الناس تفكر كده

تحياتي

صبرني يارب يقول...

عاشقه
تسلمى يا حبيبتى ربنا يكرمك