الأربعاء، 18 يونيو 2008

كن بلطجيا .... تكن مرموقا

ايها الناس افيقوا واستيقظوا :
اها فوقوا معايا بقى كده عشان انا مبقووووووقه(قريبة مفقوعه ) على الاخر .شوفوا بقى انا كل ما احاول اغير مود الاكتئاب بتاعي مافيش فايده .
حصلي موقف امبارح من ساعتها وانا عندي احباط واكتئاب وخوف ورعب وكل حاجه . هاحكيلكم عليه عشان انتم عارفين ما بيجليش نوم من غير ما اصدعكم .
امبارح الساعه 11 مساءا قلت ايه ويا ريتنى ما قلت احنا ننام بدري النهارده مره من نفسنا . كان خالد عايز ينام والبنات ناموا بالفعل ورضا جاي من القاهره شبه نايم . وانا كمان كنت هاموت وانام .حيث انى اليوم الى قبله كنت مطبقه 24 ساعه من غير نوم .
المهم انا يا اخوانا قلت الكلمه دي من هنا لرضا وقالي بسلامته : هو احنا وش ذلك برضه .
يااادوب شربت كوباية الشاي .
ولقيت تليفون ماما تعبت اوي انزلي اديها حقنه .نزلت جري اديتها حقنه وقعدت معاها قوووووووم وانا ركبي سايبه من تعب ماما اصلا .
سمعت خناقه بره فى الشارع كالعااااااااده طنشت شويه وبعدين خرجت بصيت ومعايا رضا وبابا واختي ولقينا زعيق شويه وبعدين هديت الامور وقفنا رنغي واذ فجأة وقفت عربيه كده قدام بيتنا ونزل منها واحده ست كده متشرده ومعاها 3 عيال انا اول ما شوفتهم مش عارفه ليه عرفت انهم جايين للخناقه . وتحول الامر الى شله من البلطجيه شالين اسلحه مختلفه اتعرفت عليها بمساعده ابو رياض (سنجه - سيف - مطاوي ) ودول اصحاب فرش الفاكهه الى في الشارع . وشله تانيه من الصعايده اصحاب المقله ومعاهم شوم وعصيان وما الى ذلك ويقال ان كان فى كمان طبنجه يا بوي .
بس طاحوا في بعض وبعدين وقفوا قدام بعض وسط ذهول وازبهلال من الناس كلها الى طلعوا جري كلهم بعيد عن الشكله لما شافوا الاسلحه الى بتلمع دي
والى حصل ان كل واحد وقف يكسر
اه يكسر كل حاجه
عربيات ومحلات وكل حاجه كل واحد قاصد حاجه الطرف التاني ومش مهم مين يجى فى السطه بقى تكسير وتخريب فى الشارع كله .
شارعنا شارع رئيسي رايح جاي وقف طبعا العربيات على الصفين يستنوا التكسير يخلص .
وصاحبتكم بقى قلبها خفيف بقيت واقفه اعيط ومنهاره تمام من المنظر المرعب وجريت كلمت الشرطه ما عرفتش اقولهم ايه اول ماردوا عليا . قلتلهم انتم فين الله يخرب بيوتكم سايبين الدنيا والعه وقاعدين .
طبعا الي رد عليا ما عجبوش كلامي .
الشرطه جت بعد حوالي ساعه من لما اتصلنا عليهم رغم ان القسم على اول الشارع . ولما جم كل العيال طلعت تجري الى كانوا شايلين اسلحه . وخدوا معاهم شويه عيال كده . مالهمش اي لازمه
وكل الى قدروا عليه ولاد ال ...... ان في واحد منهم بن نفس ال ........ وقف يشتم فى الناس الى واقفين فى الشارع من بعيد شتيمه قذره جدا . ويقولهم واقفين هنا ليه .
الى ربنا قدره عليهم كان نفسي اوي يبصلي فوق ويقولي واقفين هنا ليه عشان كنت ساعتها حدفته باي حاجه فى خلقة اهله.عشان بدل ما يروح يشوف خيبتة وخيبة الي مشغلينه جاي يزعق فى الناس الى مزعورين .
طبعا عربية بابا كانت تحت . اول لما بدأ الضرب ده بابا حاول ينزل يشيل العربيه لكن انا بوست ايده عشان ما ينزلش وافق بالعافيه وبالفعل على ما رجعنا البلكونه كانت العربيه ازازها راح . طبعا فداه المهم كا جاش فيه حاجه .
عارفين انا مش مركزه ومش عارفه اقول الكلام كويس لكن انا كنت مرعوبه بجد وخايفه اوي وقعدت ادعي على الى ماسكين البلد والشرطه الى ما عادتش بتحمي الشعب . وعلى الخيبه الى احنا فيها .
تخيلوا انا لما اتصلت اول مره على الشرطه ادتنى مشغول كتير . تليفون الطواري مشغول شوفوا الحلاوه ؟؟؟!!!!
تخيلوا كمان انهم قالوا لبابا احنا اتأخرناا صل الشارع كان مقفول . وطبعا لان الشارع طويييييييييييل يتمشى فى 3 دقايق كله على بعضه على رجليهم ما عرفوش يوصلوا للاخناقه الى قافله الشارع اصلا .
تخيلوا المنظر بقى ان البلطجيه دول مين ؟؟؟ ده مراقب موقف الميكروباصات بتاعة الارياف الى في شارعنا . واخواته .
هما كانو اصلا مبلطجين فى الشارع وفارضين اتوات على الناس .
قووووووووووم الحكومه عينته رسميا عشان بدل ما يلم ايتاوات لنفسه بس يلم كمان للحكومه
وأأأأأأأأأأأأأه يا حكومه
والى حصل ان بتاع المقله قاعد فى المحل ده عافيه عقده خلص وقاعد بلطجه كده والمحاكم شغاله بقالها سنه .
وقاعد محمي فى عم البلطجي الى فارش فاكهه قدامه . بقياده الاخت المصون لحضرة مراقب الموقف بلطجي الحته .
ووقعوا فى بعض بقى ا لاثنين ونعاني احنا الويلات .
بتهيئلي ان عصر فتوات الشوارع والبلطجيه عائد او عاد لا محاله . على فكره بالفعل رجب ده عامل اتاوايت على كل الى بيعدى من الشارع حتى .
ده غير اتاوات الموقف نفسه . وسط الموقف ده خفت وقلت خلاااااص احنا بقينا ما لناش ديه وما لناش كبير ومافيش حاجه هاتحكمنا
بجد اتعقدت واحبط جدا واعصابي باظت خااااااااالص .
والبت اختي سألتنى سؤال مهم اوي برضه : قالتلى يا لهوي كل ده من شوية عيال بلطجيه امال الى بيصحوا يلاقوا الدبابات بتضرب فى الشوارع بيعملوا . حقيقى بيعملوا اييييييييييييييييه .
عرفت حاجه واحده بقى انك عشان تاخد حقك وعشان تعيش لازم تبقى بلطجي اها كن بلطجيا ....تكون مرموقا .
فين الامن والامان ؟؟؟
فين الامن المستتب ؟.؟؟
فين الشرطه ودوريتها ؟؟؟
فين حاميها ؟؟؟
فين الكبير ؟؟؟
فين المدير بتاع القاعده دي ؟؟
فييييييييييييييييييييييييييييييييييييييين
فين الحكم فين الحكومه وفين المسؤولين عننا .
حقيقى واسفاه . فكرت جديا فى الهجره حقيقى
زهقت وتعبت وخفت خفت اوي يا جماعه ...
وكفايه كده عشان زهقتوني يووووووووه اقصد زهقتكم

هناك 26 تعليقًا:

محمد يقول...

الله اكبر هو أنا ألاول طب عال العال
بأختصار أحنا بقينا هيكل ديناصورى
بدون اسنان ولا أحشاء, يعنى بأختصار
منظر بدون مضمون وجمجة بدون مخ وطبيخ بدون لحمة وفم بدون أسنان ولا معدة ولا أثنى عشر.....وكفاية تشبيهات منى
أيوة ياست الكل البلطجى الى معاة سيف ولاسنجة ولا فرد(طبنجة مصنوعة يدويا) هو الى يكسب وفى نوع تانى من البلطجية بالقانون الى بيستخدم القانون وثغراتة
للبلطجة على الناس المسالمين.
ياسيدتى القانون العادل لصالح المجتمع
هو الحل مع وجود أجهزة وظيفتها الواحيدة تطبيق القانون العادل على الكل بدون أى استثناء والباقى مفهوم
عموما سلمى ليا على الثانوية العامة وتسريب أمتحاناتها والمترو والقطار أذا قام فى ميعادةوالاكل الملوث وحديد التسليح والاسمنت وتسقيع الاراضى علشان الجو سخن
فى انتظار زيارتك على مدونتاى

http://kalamfekalamm.blogspot.com

وhttp://kalamfekalamm-mohamed.blogspot.com/
مع تحياتى ومتنسيش الشيكولاتة

محمد فوزي يقول...

انا جدا متعاطف معاكي طبعا من الخضه اللي حستيها وعشتيها مع اسرتك , ربنا يبعد عنكم كل سوء

ومعلش أصل الأمن مشغول بكل من يعبر عن رأيه وفاكر ان هي دي مهمته المقدسه ( الدفاع عن الدوله ضد الخطرين على الأمن القومي !!! )

زيارتي الأولى التي سأحافظ على تكرارها إن شاء الله

تحياتي

المـــفـــــــقــــــــوعـــــة مــرارتـهــا يقول...

هدي نفسك وأمسكي أعصابك
انا جات عليا فترة ماامشيش في حتة الا لما الاقي خناقة ذي اللي بتحكي عليها
دي فعشان كدة اخدت مناعة ولو اني كل ماأقرب من خناقة تلاقي جتتي لبشت
والدنيا اسودت في عينيا بس بقيت بأفرفش علي طول
بس ضحكتيني بقي انتي مستنية الشرطة تقوم بشغلها وتوقف الخناقة في ساعتها
ماتبقاش مصر ياباتعة

قبل ماانسي ابقي زورينا في مدونة الرايق وفرنسا والضاحكون
http://faransaraayek.blogspot.com/

صبرني يارب يقول...

الحشري :

حلوه اوي التشبيهات بتاعتك تبعث اكثر على الاحباط والاكتئاب

بس معلومة الفرد دي جديده سجلتها .

شكرا لك ونورتنا وعنيه الشيكولاته حاضر ههههههههههههههههه

صبرني يارب يقول...

محمد فوزي

نورت فى زيارتك الاولى وان شاء الله تنورنا دايما .

وفعلا انا الى ناقطنى انهم بيبقوا واقفين زي الصقور لما يكون اي بقره معديه تبع اخوانا البعده .

وحسبى الله ونعم الوكيل وشرفتنا

صبرني يارب يقول...

مفقوعه :

لا يا مفقوعه انا شوفت خناقات كتير وقليل لكن عمري ما شوفت كده حسبى الله ونعم الوكيل

تعرفي النهارده النار تحت الرماد وكله قاعد متحفز واحنا مرعوبين من تكرار المأساه

تخيلى كلمت الشرطه واداني البيه الظابط
كلمنى بقلة ادب لبيته على قفاه وحست انه بيستهزأ بكلامي وحاسس انى من احد الطرفي وبوقع فقط
بعدين لما اتكلمت بشده شويه وكلمتين فصحى لم نفسه بقى واتعدل فى الكلام .

بس مش عارفه عمل حاجه ولا لا لكن الاجواء هاديه

وادينا فى مصر يا عبله لما نشوف الحكايه ايه

صبرني يارب يقول...

اه مفقوعه بتهرجي طبعا ما فاتتنيش زورتك والله وقريت البوست بس ما لحقتش اعلق هاجي اعلق عنيه

انا يفوتنى مدونه زي دي ؟؟؟؟؟؟؟؟

ahmed_k يقول...

الفتونه زمان كان ليها أصول وقواعد يحترمها الفتوه ويحرص عليها قبل غيره وكانت الفتونه ليست بالقوه العضليه فقط ولكن الفتوه كان يمتاز بالحكمه والنضج العقلي اما ما نراه اليوم فليس الا كما وصفتيه بلطجه وقلت أدب وغباء مستفحل وكلهم من مرتادي السجون واصحاب السوابق لا يعرفون قيمه لخلق والمجدعه بتاعت فتوات زمان ليس لهم بها صله من قريب او بعيد والشرطه للأسف في بعض الأحيان تستخدمهم لقمع معارضين الحكومه وبعض فيادات الفكر في البلد , اذا فهم رجالتها فكيف تطالبين ان يقضوا عليهم , ربنا يصلح حالنا لأنه لو لم ينصلح ستاتي علي بلادنا ايام لا يعلم سوئها الا الله . ( ربنا لا تؤاخذنا بما فعل السفهاء منا ) وتقبلي تحياتي والسلام ختام

خمسة فضفضة يقول...

السلام عليكم ورحمة الله وبركاته

الحمد لله البلد عندنا لسه ماوصلش فيها البلطجيه للدرجه دي
كبيرهم اوي يعني انهم يضربوا بعض بشوية عصي او حتي يتشاكلوا بالايدي

الله يكون فعونك يا بنتي انا لو مكانك كت مت من الخضه

سلام

Ali-7ob يقول...

أم مريم
هى المنصورة كمان فيها بلطجة و واسلحة والحاجات دى انا عارف ان البلطجة موجودة فى كل حتة بس انا قلت ان الاقاليم بيكون الموضوع اقل شوية بس الظاهر ان الفوضى انتشرت فى مصر كلها هنقول مفيش لا امن ولا امان لا لينا ولا لاهينا ربنا يرحمنا ويحسن ختامنا
تحياتى ودعواتى ليكى
على حب

واحدة مفروسة يقول...

فرستيني يا صبرني
فيه أيه......على العموم الحكومه عارفه بيهم و سايباهم يرعبوا المنطقه
منها مع الرعب كله بيتك بيتك...و الشرطه مرتاحه
او لو قامت العركه حيروح فيها اتنين و لا تلاته
برضه مصلحة التعداد حيقل 2 او تلاته
و بعدين انتي بطلي جبن كده
حتي الجبن مش كويس على الصحة
مع انه مصنوع من اللبن

صبرني يارب يقول...

فضفضه

والله يا حبيبتى انا كنت باقول زيك كده برضه ان مافيش المستوى ده من البلجه فى بلدنا لحد ما شوفت بعينى ما حدش قالي

صبرني يارب يقول...

استاذناالغالي احمد :

عندك حق فى كل الى قلته عن الفتونه لكن الفتونه لانها بتعتمد على القوه مش اي حاجه تانيه تحولت فى النهايه الى البلطجه .
وده حقيقى يعنى مش كلام افلام .
لانه واقعي جدا

وحقيقى حاليا البلطجيه فارضين اتاوات على الناس بصحيح مش كلام .

وحسبى الله ونعم الوكيل

صبرني يارب يقول...

علي حب

والله انا كمان كنت فاكره زيك كده نورت

صبرني يارب يقول...

مفروسه حبيبتى

والله الظابط فى التليفون باقوله الناس دول بلطجيه وفاردين اتوات على الناس فى الشارع

بيقولي وسايبينهم ليه ؟؟؟!!!!
قلتله هو احنا الى سايبنهم انتم الى سايبينهم

وبعدين البلطجي الكبير واخوه متعينين من قبل الحكومه مراقبين فى الموقف ؟؟؟!!!!

اه يا نفوووووووووخي

mayada يقول...

ههههههههههه
ام مريم خدي بقي التوصيات الماد ماديه دي
بند رقم واحد
الف حمد الله علي سلامه مامتك
البند اتنين
فكرتيني بناس كانوا بيتخانقوا عندنا
وكان طرف جزارين مانع الست وولادها من دخول بيتهم
كده موز
وبعدين الست جابت البوليس عشان تعرف تدخل بيتها قشطه كده
المهم قاموا الجزارين دول ضاربينها
في وسط البوليس كسروهم والبوليس واقف يتفرج
لوووووووووووووول
بند تلاته تطفشي وتروحي فين
يانجيب اخرها البلد دي ياتجيب اخرنا

حاول تفتكرنى يقول...

سألت نفسى يوما - فى مدونتك - ليه صبرني يارب ؟؟؟؟

اللى يقرأ موضوعاتك لازم يعرف ليه


حقيقى بفرح أوي هنا
بحس بكل حاجة فاقدها فى مدونة شفافة عفوية صادقة


تحياتي لمدونتك
ولموضوعاتك
ولعفويتك
للحكومة
وبتاع مقلة اللب


تحياتس

بت خيخة وأي كلام يقول...

ام مريم
التعليق اللى عايزة اكتبه
كتبته على البوست اللى قبل ده

روحى اقريه هناك بقى

صبرني يارب يقول...

مياده

يا سلام ضربوهم قدام البوليس ؟؟؟

طيب ربنا يطمن قلبك

وبعدين هى هاتجيب اخرنا ما تزعليش .

هاروح فين بلاد الله واسعه يا اختي والله احنا الى معقدنها وعاملين فيها وطنيين

خاطبة المدونات يقول...

نريد متطوعون لإنجاح فكرة المدونة
ومن يجد في نفسه حب الخير فليتفضل
elkhatbah60@yahoo.com

صبرني يارب يقول...

حاول تفتكرني

الله يكرمك يارب كتير عليا كلامك الكبير الراقي ده ومتشكره لك ونورت المدونه وصاحبتها

tarek alghnam يقول...

امن اية بس الامن بس يحمى الناس الكبيرة
لكن الشعب
لاتسالنى من انا
بصراحة بوست رائع وياريت الامن يعرف ان فية ناس محتاجين جهودهم
تقبلى تحياتى
ودمتى بود

صبرني يارب يقول...

طارق الغنام

اولا نورت المدونه واهلا بك يا اخي الفاضل

ثانيا من كلام حضرتك نطت قدامي عباره قريتها او سمعتها م عارفه فين ان مجمل العاملين فى الحكومه حوالي 11 مليون

منهم خمسه مليون امن دوله هههههههههههههههههههههههههههههههههههه

عرفت بقى الشرطه ورجالتها بيحموا مين ؟؟؟

الشرطه والشعب والى خلفوا الشعب بيحموا مصالح حفنه من الحكام .
والجيش يؤمن الوجود ده فقط ليس الا .

وشكرا لك ونورت ولو روحت فى ابونيكل هاقول من اول قلم ان طارق هو الى قالي اقول كده
ههههههههههههههههههه
نورت ياا ستاذنا

Appy يقول...

يا نهار ابيض ده بقى العادى بصى الشرطه تقولك سبيهم يصفوا بعض وبعدين ندخل موضوع الدوريات الراكبه على بال ما تيجى للبلاغ بيكون عدى وقت لانها مش منظمه صح كل منطقه متلاقيش فيه اكتر من عربيه وده غلط
يالا ربنا يستر

صبرني يارب يقول...

آبي

اولا نورتي

فعلا احنا عايشين بستر ربنا

mony يقول...

معلش يا صبرني علي اللي حصلك


ده العادي يا ماما


انا بأه اتصلت ببوليس النجده علشان مشكلة حصلت جنبنا برضة

و يا تري ايه اللي حصل



تخيلي


البيه الامين اللي رد عليا كان بيعاكسني

بعد ما قفلت معاه لقيته لقط الرقم الي ظهر عنده و لقيته بيكلمني بعد كده عايز يتعرف

شوفتي الحلاوة