الخميس، 27 أغسطس 2009

فيلم الشيخ حسن





السلام عليكم


شوفوا بقى انتم تشوفلكم حل مش فاضيه ومش لاحقه ومش عارفه اكتب


والاغلس من كده مش عارفه اتابعكم فى مدوناتكم



بجد متاسفه لكل الناس لانى مش عارفه اتابع خالص الايام دي رمضان بقى وكل سنه وانتم طيبين



النهارده يا قوم هاقولكم على كلمتين كده فى بالي من زمان وفضلت متحفظه عليهم عشان اقولهم لكم ونرغي بشأنهم


الموضوع متعلق بفيلم الشيخ حسن



طبعا الفيلم ده فيلم قديم لحسين صدقى الراجل ده كان محترم اوي يا جماعه بجد حاجه مفتقدنها حاليا فى الفنانين بتوعنا بكل صراحه



له مجموعة افلام انا باعتبرهم افلام هايله جدا وبتناقش فكر حلو اوي


بصرف النظر بقى عن انتى مضايقه مني والكلام بتاعهم المجبس ده ما علينا خلينا فى الفكر




نركز اكتر على فيلم الشيخ حسن الى حسين صدقى كان البطل فيه وكمان حواره واخراجه واشترك فى تاليفه واعتقد انه من انتاجه وتوزيعه كمان




يعنى الراجل كان قايم بالفيلم تقريبا




اولا الفيلم بيناقش فكره ما حدش دلوقتي يقدر يتكلم عنها اطلاقا وهى فكرة اسلام بنت مسيحيه من اصل اجنبي ودي حاجه شئنا ام ابينا موجوده




والعكس موجود برضه ما قلناش حاجه عشان كده باقول كان عندهم وقتها الجرأه يناقشوا من غير ما يحسسوا على بطحه ولا حاجه



ثانيا داخل الفيلم بقى اتعرض لنقط معينه من وجهة نظري هى نقط مهمه وجامده جدا



خلينى اقولكم الاول ملخص للقصه وبعد كده اقولكم كام مشهد معلقين فى دماغي



القصه ان فى بنت هى واخوها اجانب وعايشين فى مصر ودوروا على مدرس لغه عربيه عشان هما بيدرسوا فى مصر وكان الشيخ حسن الازهري ده هو الى بيدرسلهم




البنت بتقع فى حبه وهو كمان بيحبها وبيتجوزها بعد طبعا مشاكل مع اهلها ورفضهم لكونه مسلم وهكذا بقى احداث الفيلم بتكمل



المهم بقى المشاهد الى علقت فى دماغي


اولا لما طلب يصلي وهو عندهم ولقى عندهم سجادة صلاه وما للموقف ده فعلا من اهميه انهم كون هما مسحيين لكن عايشين فى بلد مسلم ولهم اصدقاء مسلمين راعوا ده وحرصوا على وجود سجاده صلاه فى بيتهم



ثانيا : لما البنت وقفت تتناقش مع الشيخ حسن وتنقد الدين الاسلامي بكل حريه وهو كمان كلمها بكل عقل وهدوء واحترام للراي ا لاخر وناقشوا نقط مهمه جدا جدا


زي مثلا التعدد وقالها بكل بساطه احنا عندنا تعدد زوجات اه بقوانين وروابط وده افضل بكتير من وجود تعدد علاقات بدون روابط ولا قيود محدده وقال كلام تاني كتير شوفته كلام صح جدا



وكمان لما قالتله ليه بتضيقوا على الستات فى اللبس بالحجاب وكده .


قالها عشان نحافظ عليها ونحافظ على المجتمع ككل



قالتله طب وليه كل ده لو كل الستات لابسين عادي مش هايبقى فيه فتنه ولا حاجه الرجاله هايعتادوا على الامر


قالها ومين قالك اننا مش عايزين الفتنه ؟ ده احنا خايفين على الفتنه منكم



قالتله ازاي ده ؟



قالها زمان مش امروء القيس عمل قصيده شعر فى صباع حبيبته الى بان ما شوفناش حد عمل قصيده فى شاطيء استانلي مثلا


احنا عايزين الفتنه تفضل موجوده بس فى مكانها (يقصد بين الزوج وزوجته )




الموقف الى بعد كده هو لما هى بدأت تستفسر عن الاسلام وتسأله انت عايزنى اسلم قالها انا يسعدنى ده لكن لما تكوني عاملاه عن اقتناع مش عشان ترضينى وخلاص


وكمان هى فضلت تقرا فعلا وتسال مش الحكايه عبط وهبل ومدام باحبه اعمل اي حاجه



المشهد الى بعد كده الى فطسنى من الضحك الصراحه ولقيته حقيقى جدا فعلا هو موقف خالها القس لما استنجد به حسن بعد تفاقم المشاكل بينهم بعد الجواز




استنوا احكي لكم الموقف عشان تفهموا قصدي


ومبدأيا دي صوره من المشهد ده




اهلها راحوا ومعاهم البوليس وبلغوا انها مخطوفه وهى قالت انها مراته وطلعوا القسيمه ومشيوا اهلها وامها مرضت وهى حبت تروح تشوف امها


ابوها منعها وقالها روحي اطلقي منه وانا ادخلك البيت فراح الشيخ حسن استنجد بخالها القس وقاله انا متعشم فى عقلك وكده يعنى



الراجل اتكلم بكل هدووووء وعقل وميه ميه وقاله طيب لو كانت المشكله كده انتم عندكم طلاق وتردها عادي طلقها لحد ما تمرض امها وتطمن عليها وابقى ردها تاني ( كهين كهين يعنى ههههههههههههههه )



وراح الشيخ حسن عمل كده فعلا طبعا خدوا البنت وقالوله العب بعيد يا عم الامور وساعتها برضه خالها قاله وانا اعملك ايه بقى ده بنتهم وانت طلقتها ما اقدرش اتدخل ( مش قلتلكم كهن )



اوعوا المسحيين يزعلوا انا باهزر مش عايزه حاساسيه زياده وحركات من دي بقى



اخر مشهد فى الفيلم بقى الى بجد كان مؤثر لما البطله ماتت وهى بتولد ومنعوا من انه يشوفها ودخلوا لها خالها القس بس على اساس انها بتحتضر وقالتله انها مسلمه وطلبت منه انه يسلمها لجوزها


وطبعا هو كان عنده من الامانه انه فعلا عمل كده وسلمها لجوزها بعد وفاتها



وعجبنى اوي اوي اظهار القس فعلا بشكل مش وحش ولا غباوه ولا حاجه فى حين الفيلم بيتكلم عن الدين الاسلامي فى اغلبه بالعكس هما جابوه راجل حكيم ومحترم وعاقل ومؤدب وعنده ضمير ( كهين شويه بس عادي يعنى ههههههه )


وكان دايما الشيخ حسن يوقره جدا وهو بيكلمه ويقوله انت رجل دين وانا واثق فى عدلك وما الى ذلك


طبعا بتقولوا ايه الست القديمه الى بتتفرج على افلام قديمه دي



والله انا صدفه يعنى قريبا شوفته الفيلم ده ما كانش قصدي ولا كنت شوفته قبل كده اساسا


بجد فرحت لوجود فيلم محترم كده وراقي كده وده كان بيتعمل زمان على ادين ناس فعلا فنانين وفى نفس الوقت عندهم فكر واحترام


ورغم انه خلال الفيلم تلاقي المفروض طلعت بمجموعه لا باس بها من الاحاديث والافكار الاسلاميه الا ان الفيلم برضه مش ممل يعنى ولا افتقد جوانب الحبكه والقصه والدراما العاليه جدا


ياريت تتفرجوا عليه لو صادفكم



انا حاولت اجيب منه اجزاء ما لقيتش حاجه على النت


لكن هو بيجى على قنوات الافلام كتير



وكفايه عليكم كده عشان احنا فى صيام زي بعضه



(امال لو ما كناش فى صايم كنتى عملتي فينا ايه يا صبرني )


عادي كنت هارغي برضه زي كده وايه يعنى




موضوع جديد اهو يا خالو ولا تزعل اي خدمه





































هناك 19 تعليقًا:

AHMED SAMIR يقول...

فكرتيني بماما نونة في مسلسل حمادة عزوو
كانت غاوية برضة
حسين صدقي
انتي من القلائل بل من النوادر من محبي حسين صدقي
تحياتي

ستيته حسب الله الحمش يقول...

شوفي يا صبصب
انا عمري ما شفت الفيلم ده
لكن حسين صدقي ده راجل أمور أمور صراحة
من زمان احس انه الجينتلمان الحقيقي الصالح لكل العصور
لما تشوفيه تحسي راجل مستحمي كده وشعرة مسرح ولابس بدلة شيك
مش تامر وسخام وقطران اللي مستخسرين ينضفوا النهاردة

حسين صدقي قبل موته اخد اغلب الأفلام اللي انتجها وحرقها ما عدا فيلم صلاح الدين الأيوبي
وما هو موجود من افلام له اليوم هو من انتاج اخرين وبنى مسجد موجود لحد دلوقت وقعد يربي العشر عيال اللي خلفهم ويعبد ربنا

الله يرحمه

شمس النهار يقول...

صباح الخير ياصبرني
ازيك
الحقيقه انا اول مره اعرف ان في فيلم اسمه كده اصلا
بس زمان الناس دي كانت عارفه بتعمل ايه وليه
والفن كان بالنسبه لهم هوايه وهدف للأشباع الهوايه دي
علشان كده همه ابدعوا علي قد الامكانيات وقتها وكانوا بيحفروا في الصخر علشان يعملوا الافلام دي
وعلشان كده الافلام دي قعدت لحد دلوقتي
مش دلوقتي الفن بقا سبوبه ولقمة عيش وهبل وضحك علي الدقون
وتتفرجي علي الفيلم ماتبقيش عارفه هو ابندي والا خلص والا له جزء تاني والا مين اللي مات
ماعلينا اللهم اني صايم

انت عامله ايه ومش باينه ليه اصلا
ماتقوليش رمضان كلنا في رمضان زيك

فاتيما يقول...

و الله يا صبصب مشوفتوش
بس اسمع عنه و عن حكايات حسين صدقى اللى قالتها ستوتة إنه اعتزل التمثيل و حرق نيجاتيف بعض افلامه و تزهد فى أواخر ايامه
بصراحة انا عكس ستيتة مبحبوش شكلا و اسلوبا
بس بحترمه لأنه راجل محترم فعلا
يعنى فى وقته طبعا كانت دى السمة الغالبة إن الفنانين ينتجوا لروحهم
بس هوه اختارموضوعات اجتماعية و ناقشها بشكل ساذج ساعات و واعى غالباً من الآخر كان عاوز يقدم شىء هادف مش كلام فاضى و تسالى و يكسب فلوس بس ...
الله يرحمه و يرحمنا جميعاً
خالص حبى يا صبصب
و إرغى زى منتى عاوزة ميتشبعشى من رغيك اصلاً
بوسيلى القمرين

reem يقول...

صبرنى فينك

واحشانى اوى

بصي بصراحة مش ليا في الافلام القديمة خالص

بس الحقيقة الناس زمان كانت محترمة وهادية وراقية وبيعرفو يتعاملو بطريقة فيها كم كبير من اللياقة


خلينى اشوفك ياتوتة واطمن عليكى

أحــوال الهـوي يقول...

تتسألين عن نوعية الناس التي كانت تشاهد هذه الافلام و الفكرة التي تحترم الاديان و تناقش موضوع موجود بيننا بلا حساسيه

سيدتي اختلال المجتمع و تسطح الفكر جعل الناس يعشقون الافلام التي لا يبذلون جهدا في التفكير فيها بل اسكتشات مسليه تسليهم و تضحكهم و عند انتهاء الفيلم تكون المحصلة صفر

الموضوعية في هذا الفيلم و الشفافيه لم تنفي تحيز القس لدينه و لم تقلل من عدله و حكمته
و ايضا تناقشت مع بعض التسألات عن الدين الاسلامي

اسف اطلت عليك و لكن موضوعك جميل و يحتاج صفحات للتحليل و الرد

تحياتي

تامر علي يقول...

ولو ان تسريحة شعرة كانت عجيبة بس دي كانت موضة الاربعينات محدش يقدر يقول حاجه:)

الحقيقة مشوفتش الفيلم قبل كده فمش هاعرف اناقشه لكن شكلة كده فيلم اجمد من عنتر ولبلب :)

تحياتي :)

مصري جدا يقول...

قصدك ان العقل زينة

عارفين

اية الرغي دة كلة

يا عيني يا رضا يا خويا

مسدس صغير يقول...

موضوع جديد
قصته هادفه
برغم البعد الزمنى
الا ان التفكير لا تحده حدود
فالاستنساخ كان فكرة فى احد الافلام الامريكية الا انه صار واقعا ملموسا
احييكى على البوست

صبرني يارب يقول...

سمير

والله انا شايفه انه كان متميز فعلا

بصرف النظر طبعا عن طبيعة تمثيل الافلام القديمه الى بشكل او باخر كانت مرتبطه بالطريقه المسرحيه القديمه

نورت يا فندم

صبرني يارب يقول...

ستيته

راجل مستحمي كده وشعرة مسرح ولابس بدلة شيك


ههههههههههههههههههههههه

انا صايمه يا خالتي مش قادره اضحك
هههههههههههههه

حلوه بجد

بس المعلومه الى انتى قلتيها عن حسين صدقى كانت اول مره اعرفها

لو كان يعرف الحقيقه كان ساب كل افلامه يااختي بس هو ما كانش يعرف الوكسه البنى
الى هانوصلها يعنى

الله يرحمه
نورتي يا جميل

صبرني يارب يقول...

شمس النهار

شموسه الجميله

والله يا شموسه انا رمضاني غير كل الرمضانات

امبارح كان عندي خمسين ضيف على الفطار تخيلينى بقى قبل وبعد هذا الحدث

وحشااااني موت

صبرني يارب يقول...

ريم

وحياتك انا ماليش فى التلفزيون كله

بس هى صدف

وحشاني خالص والله بس رمضان مبهدلنى على الاخر

صبرني يارب يقول...

فاتيما

عارفه ليه احنا شايفنها بشكل ساذج

لان احنا كمجتمع حاليا الى اصبحنا معقدين

اقصد يعنى اصبح المجتمع عندنا مقعد اكتر

يعنى وقت الفيلم ما كانش الطريقه ساذجه ابدا بالعكس كانت متفقه مع جو المجتمع البسيط جدا الى كان موجود ساعتها


جربي كده تتفرجي على مسلسل مثلا كان بيتعرض من خمستاشر سنه وكنتى انتى وقتها حباه اوي

مؤكد هاتتفرجي كده وتقولي ايه ده ؟؟ دول كانوا بيشتغلونا على فكره

يا جميل منوره بس يعنى انتى الى قلتي ارغي اهو ماليش دعوه بقى

صبرني يارب يقول...

احوال الهوى

انا دايما اقول ان الافلام الموجوده حاليا الى عملها افراد من مجتمعنا

لكن برضه يا استاذنا ما اقدرش اتجاهل دور الاعلام فعلا فى تغيير فكر المجتمع واصلاحه فعلااااااا او افساده حتى
لما له من تاثير سرييع ومباشر على المجتمع

حضرتك يا فندم تطول براحتك وانا اهو نتناقش لحد بكره

نورت

صبرني يارب يقول...

تامر علي

طب انا عايزه ذمتك مش حلو وهو مسبسب كده على راي ستيته ومستحمي

ولا الشباب الفانكي الى عامل سبايكى

عنتر ولبلب ههههههههههههههههه

ما شوفتوش من زمان اوي يا عم والله

بيجى على ايه ار تي الافلام

والنبى يا استاذنا تطمنى على موني كده وتبقى تقولي لما تقوم بالسلامه

صبرني يارب يقول...

مصري جدا

انا عارفه والنبى ان العقل زينه فى الباتريه على ذكيه زكريا

بس يعنى مش لازم الواحد يفشرها كويش ؟

ورضاه ماله ياعم كويس اوي تمام ما يقدرش ينام من غير ما اكل ودانه رغي ويسقط شبكه وانا باتكلم
هههههههههههههههههههههه

صبرني يارب يقول...

مسدس صغير

اي اختراع بيكون اصله فى الاول تخيل نتيجة حاجه مثلا

نورت يا باشا

mahasen saber يقول...

الله حسين صدقهى الله يرحمه وافلام ابيض واسود

الله يا صبرنى امتعتينى وكأنى اتفرجت على الفيلم مع انى نفسى اشوقه تصدئى

المهم رمضان كريم ووحشانى جدا جدا
يا رب تكونى بافضل حال