فيلم الشيخ حسن

السلام عليكم

شوفوا بقى انتم تشوفلكم حل مش فاضيه ومش لاحقه ومش عارفه اكتب

والاغلس من كده مش عارفه اتابعكم فى مدوناتكم

بجد متاسفه لكل الناس لانى مش عارفه اتابع خالص الايام دي رمضان بقى وكل سنه وانتم طيبين

النهارده يا قوم هاقولكم على كلمتين كده فى بالي من زمان وفضلت متحفظه عليهم عشان اقولهم لكم ونرغي بشأنهم

الموضوع متعلق بفيلم الشيخ حسن

طبعا الفيلم ده فيلم قديم لحسين صدقى الراجل ده كان محترم اوي يا جماعه بجد حاجه مفتقدنها حاليا فى الفنانين بتوعنا بكل صراحه

له مجموعة افلام انا باعتبرهم افلام هايله جدا وبتناقش فكر حلو اوي

بصرف النظر بقى عن انتى مضايقه مني والكلام بتاعهم المجبس ده ما علينا خلينا فى الفكر

نركز اكتر على فيلم الشيخ حسن الى حسين صدقى كان البطل فيه وكمان حواره واخراجه واشترك فى تاليفه واعتقد انه من انتاجه وتوزيعه كمان

يعنى الراجل كان قايم بالفيلم تقريبا

اولا الفيلم بيناقش فكره ما حدش دلوقتي يقدر يتكلم عنها اطلاقا وهى فكرة اسلام بنت مسيحيه من اصل اجنبي ودي حاجه شئنا ام ابينا موجوده

والعكس موجود برضه ما قلناش حاجه عشان كده باقول كان عندهم وقتها الجرأه يناقشوا من غير ما يحسسوا على بطحه ولا حاجه

ثانيا داخل الفيلم بقى اتعرض لنقط معينه من وجهة نظري هى نقط مهمه وجامده جدا

خلينى اقولكم الاول ملخص للقصه وبعد كده اقولكم كام مشهد معلقين فى دماغي

القصه ان فى بنت هى واخوها اجانب وعايشين فى مصر ودوروا على مدرس لغه عربيه عشان هما بيدرسوا فى مصر وكان الشيخ حسن الازهري ده هو الى بيدرسلهم

البنت بتقع فى حبه وهو كمان بيحبها وبيتجوزها بعد طبعا مشاكل مع اهلها ورفضهم لكونه مسلم وهكذا بقى احداث الفيلم بتكمل

المهم بقى المشاهد الى علقت فى دماغي

اولا لما طلب يصلي وهو عندهم ولقى عندهم سجادة صلاه وما للموقف ده فعلا من اهميه انهم كون هما مسحيين لكن عايشين فى بلد مسلم ولهم اصدقاء مسلمين راعوا ده وحرصوا على وجود سجاده صلاه فى بيتهم

ثانيا : لما البنت وقفت تتناقش مع الشيخ حسن وتنقد الدين الاسلامي بكل حريه وهو كمان كلمها بكل عقل وهدوء واحترام للراي ا لاخر وناقشوا نقط مهمه جدا جدا

زي مثلا التعدد وقالها بكل بساطه احنا عندنا تعدد زوجات اه بقوانين وروابط وده افضل بكتير من وجود تعدد علاقات بدون روابط ولا قيود محدده وقال كلام تاني كتير شوفته كلام صح جدا

وكمان لما قالتله ليه بتضيقوا على الستات فى اللبس بالحجاب وكده .

قالها عشان نحافظ عليها ونحافظ على المجتمع ككل

قالتله طب وليه كل ده لو كل الستات لابسين عادي مش هايبقى فيه فتنه ولا حاجه الرجاله هايعتادوا على الامر

قالها ومين قالك اننا مش عايزين الفتنه ؟ ده احنا خايفين على الفتنه منكم

قالتله ازاي ده ؟

قالها زمان مش امروء القيس عمل قصيده شعر فى صباع حبيبته الى بان ما شوفناش حد عمل قصيده فى شاطيء استانلي مثلا

احنا عايزين الفتنه تفضل موجوده بس فى مكانها (يقصد بين الزوج وزوجته )

الموقف الى بعد كده هو لما هى بدأت تستفسر عن الاسلام وتسأله انت عايزنى اسلم قالها انا يسعدنى ده لكن لما تكوني عاملاه عن اقتناع مش عشان ترضينى وخلاص

وكمان هى فضلت تقرا فعلا وتسال مش الحكايه عبط وهبل ومدام باحبه اعمل اي حاجه

المشهد الى بعد كده الى فطسنى من الضحك الصراحه ولقيته حقيقى جدا فعلا هو موقف خالها القس لما استنجد به حسن بعد تفاقم المشاكل بينهم بعد الجواز

استنوا احكي لكم الموقف عشان تفهموا قصدي

ومبدأيا دي صوره من المشهد ده

اهلها راحوا ومعاهم البوليس وبلغوا انها مخطوفه وهى قالت انها مراته وطلعوا القسيمه ومشيوا اهلها وامها مرضت وهى حبت تروح تشوف امها

ابوها منعها وقالها روحي اطلقي منه وانا ادخلك البيت فراح الشيخ حسن استنجد بخالها القس وقاله انا متعشم فى عقلك وكده يعنى

الراجل اتكلم بكل هدووووء وعقل وميه ميه وقاله طيب لو كانت المشكله كده انتم عندكم طلاق وتردها عادي طلقها لحد ما تمرض امها وتطمن عليها وابقى ردها تاني ( كهين كهين يعنى ههههههههههههههه )

وراح الشيخ حسن عمل كده فعلا طبعا خدوا البنت وقالوله العب بعيد يا عم الامور وساعتها برضه خالها قاله وانا اعملك ايه بقى ده بنتهم وانت طلقتها ما اقدرش اتدخل ( مش قلتلكم كهن )

اوعوا المسحيين يزعلوا انا باهزر مش عايزه حاساسيه زياده وحركات من دي بقى

اخر مشهد فى الفيلم بقى الى بجد كان مؤثر لما البطله ماتت وهى بتولد ومنعوا من انه يشوفها ودخلوا لها خالها القس بس على اساس انها بتحتضر وقالتله انها مسلمه وطلبت منه انه يسلمها لجوزها

وطبعا هو كان عنده من الامانه انه فعلا عمل كده وسلمها لجوزها بعد وفاتها

وعجبنى اوي اوي اظهار القس فعلا بشكل مش وحش ولا غباوه ولا حاجه فى حين الفيلم بيتكلم عن الدين الاسلامي فى اغلبه بالعكس هما جابوه راجل حكيم ومحترم وعاقل ومؤدب وعنده ضمير ( كهين شويه بس عادي يعنى ههههههه )

وكان دايما الشيخ حسن يوقره جدا وهو بيكلمه ويقوله انت رجل دين وانا واثق فى عدلك وما الى ذلك

طبعا بتقولوا ايه الست القديمه الى بتتفرج على افلام قديمه دي

والله انا صدفه يعنى قريبا شوفته الفيلم ده ما كانش قصدي ولا كنت شوفته قبل كده اساسا

بجد فرحت لوجود فيلم محترم كده وراقي كده وده كان بيتعمل زمان على ادين ناس فعلا فنانين وفى نفس الوقت عندهم فكر واحترام

ورغم انه خلال الفيلم تلاقي المفروض طلعت بمجموعه لا باس بها من الاحاديث والافكار الاسلاميه الا ان الفيلم برضه مش ممل يعنى ولا افتقد جوانب الحبكه والقصه والدراما العاليه جدا

ياريت تتفرجوا عليه لو صادفكم

انا حاولت اجيب منه اجزاء ما لقيتش حاجه على النت

لكن هو بيجى على قنوات الافلام كتير

وكفايه عليكم كده عشان احنا فى صيام زي بعضه

(امال لو ما كناش فى صايم كنتى عملتي فينا ايه يا صبرني )

عادي كنت هارغي برضه زي كده وايه يعنى

موضوع جديد اهو يا خالو ولا تزعل اي خدمه