الجمعة، 20 نوفمبر 2009

تكعيبة الياسمين


تكعيبة الياسمين


نفسي افرد إديا للهوا وأغمض عنيا

نفسي أجري على شط البحر ... والموجه تلمس رجليا

نفسي اركب فرس يسابق الريح

وسط صحرا .... رملتها صفرااااااااا

نفسي اقعد تحت شجره ... واسمع صوت الطيور

واشم ريحة الزرع وترابه


نفسى أرجع بنت ست سبع سنين

أضحك .. وأملا الدنيا ألف ضحكة

و اقعد معاك على الحصيرة تحت تكعيبة الياسمينة

وساعتها أرسملك جوه إيدك قلب محنى


وكنت اقولك.. خلي قلبك دااايما ملك ايدك

وكنت يومها تقدر تحط راسك جوه حجري

و تحكيلى كلام كتيييييير... وتقولي خليه فى سرك

وكنت جايز يومها أنا أقدر احكيلك كتير

تحت تكعيبة الياسمين

انا قلت اطري على قلبكم بقى بعد الى حصلكم فى الايام الى فاتت واروق عليكم

اي خدمه ما تقلوش حارماااااااااكم من حاجه


هناك 58 تعليقًا:

بدراوى يقول...

الإحساس بالحرية جميل و بالسعادة كمان
------
على فكرة انا شلت البوست اللى حضرتك علقتى عليه مالوش لزمة خالص

الشعب لابد له من حكومه تشكمه يقول...

الله جمييييييييييييل اوى بس مع بعض التعديلات بلاها الرمله الصفرا دى:))
لكن الباقى معاكى ,بس الاقيه فين ده:(
ولو لقيته هاخد معايا مين يحب فيا شويه ههههههههههههههههه,اصل ده موقف عاتفى لابد له من اتنين يحبوا بعضيهم.
يلا لما اباه الاقيه اباه اشوف موضوع الياسمينه ده بس اما اشوفه بس :)

تسلمى على الاحساس:)

Wanda يقول...

هممممممممممممم
جميل :-)

كمان:-)

KING TOOOT يقول...

جميل قوي تعبير خللي قلبك دايما ملك إيدك
تحياتي على البوست الجميل
KING TOOOT

حنين القلب يقول...

ايه الحلاوة دى
تعيشى يا ستى ومش تحرمينا من حاجه

وحشتينى

محمد عبدالرحمن شحاته يقول...

احساس الإنطلاق جميل جداً
تقبلي مروري

خواطر شابة يقول...

و أنا كمان نفسي خديني معاك والنبي ههه
تحياتي لك

reem يقول...

ايه الكلام الجميل الكبير اوى دا

معانيها حلوة اوى

عجبنى اوى القلب اللى ملك الايدين اللى رسمتيه

حلو اوى احساس اننا نرجع بالسنين لورا يجى 10 او 11 سنة

دا على اساس اننا 18 طبعا
ههههههههههههه

لا بجد جميلة ياتوتة

bobo يقول...

صباح الرومانسية والحب والشجن
ايه الكلام اللي اول ما قريته حسيت ان حد -اول حرف من اسمه كينج توت - بيحط دراعه حواليا يدفيني ويطبطب على كتفي ويبوس راسي
الله عليكي

صبرني يارب يقول...

بدراوي

شكرا لك يا بدراوي

وبالنسبه للبوست انصحك ما تبقاش تمسح بوستات الا فى اضيق الحدود

لكن ممكن تغير رايك عادي

نورت يا بدراوي

صبرني يارب يقول...

واندا

انتى الى جميله والله

نورتي

صبرني يارب يقول...

شيماء الشعب

ايه يا بت انتى كل حاجه عندك عاتفي كده

لا لا مش لازم اطلاقا ممكن تاخدي واحده صاحبتك معاكي
ههههههههههههههههههه

تسلمى يا جميل

صبرني يارب يقول...

محمد شحاته

نورت ياباشا

صبرني يارب يقول...

حنين القلب

تسلمى يا جميل انت الى حلو يا حلو

وانتى كمان والله

صبرني يارب يقول...

كنج توت

يا مرحبتين

انا كمان على فكره عاجباني الحته دي مش عارفه ليه
هههههههههههههههههه

المدونه نورت يا فندم

صبرني يارب يقول...

ريم

اه اه 18 يادوب ما انتى عارفه
ههههههههههههههههه

مش قلتلك يا بنتى هاقطعكوا خلاص
ههههههههههههه

صبرني يارب يقول...

خواطر شابه

اهو ده الى انا كنت عامله حسابه

تشبطوا فيا هههههههههههههههههه

صبرني يارب يقول...

بوبو

صباح الهنا يا جميل

ايه ده يا ولاد الاثنين فى بوست واحد مش معقول كده عنينا وجعتنا من النور

ربنا يخليكم لبعض يا قمر

اي خدمه

بس التكعيبه مش للايجار ياعم شوفلكم تكعيبه تانيه
هههههههههههههههههههه

rony يقول...

و اقعد معاك على الحصيرة تحت تكعيبة الياسمينة

وساعتها أرسملك جوه إيدك قلب محنى


وكنت اقولك.. خلي قلبك دااايما ملك ايدك

انا كمان نفسى ارجع بالسنين

جميله كلماتك ورقيقه اووووووى
تحياتى يا قمر

ameen يقول...

ههههههههه

احنا عندنا تكعيبه ياسمين محترمه


هو بس اللى مش موجود الحصيره !!!


هههههههه



بجد الواحد كان محتاج للروقان بعد الماتش

صبرني يارب يقول...

روني

تسلمى يا جميل

ربنا يكرمك ونورتي

صبرني يارب يقول...

امين

بجدددددددددد

طب والنبى سلفهالي اصل مش عندي

والحصيره عليا

mahasen saber يقول...

يا سلام يا صبصب طريتى على قلبى زى ما بيقولوا ايوه كده يا شيخه حاجه تفرحنا شويه وتدخل البهجه علينا بعد وجع القلب ده


دايما كدا مصدر لسعادتى يا صبصب كل ما ادخل مدونتك او حتى تيجى على بالى

ايام مباركه عليكى يا حبيبتى

عاشقه الرومانسيه يقول...

حلالالالالالاوتك فى الرومانسيه ياصاصا
قشششششششطه
انا عايزه من ده كتييييير
(:
الله ينور
تسلم ايدك

صبرني يارب يقول...

محاااااااااااسن

ازييييييييييييك وحشااااااااني


شوفتي مش حارماااكوا من حاجه مش عارفه كنتوا هاتعملوا ايه من غيري

صبرني يارب يقول...

عاشقه الرومانسيه

مش انا قولتلك هاتمووووووووتي يا سوسو

قصدي يا دودو

ههههههههههههههههههههه

اي خدمه

فتاه من الصعيد يقول...

حلو اوي الاحساس ده

ربنا يخليكي للشعب :)

تحياتي

Cute Kitty **sookra يقول...

حلو اوى الرومانسيكيات دى على الصبح
ياصباح اللى بتغنى
هههههههههه
طيب ماتيجى كلنا نروح تحت التكعيبه دى بس تجيبلنا ياختى فطير وحمام وكلام من دا
ماليش دعوه انا عاوزه من ده ياحزومبل انا عاوزه من دا

الشعب لابد له من حكومه تشكمه يقول...

و اقعد معاك على الحصيرة تحت تكعيبة الياسمينة

وساعتها أرسملك جوه إيدك قلب محنى...

والنبى ايييييييييه وانا عمل ده مع صاحبتى ليه هبله ولا هبله ولا يمكن هبله وبعدين موقفى يباه ايه وانا برسملها قلب فى اديها؟؟؟
لا لا لالالا مينفعش اطلااااقا زى مقلتلك محتاجين عنصر تانى ههههههههههههه.
ال صاحبتى ال وصاحبتى اصلا اخدها واقعد معاها تحت الياسمينا ليه مهى بتقعد معايا فى بيتنا وبشوفها كل يوم:)

أحمد حسن البنا يقول...

محاولة جيدة ورغم أنها كانت ممكن تكون افضل الا ان احساها جميل وواصل للى بيقرا
تحياتى واكتبى تانى وتالت انتى مشروع شاعرة جيدة

حنعيش يعنى حنعيش يقول...

فل عليك ورد عليك ياعصفور الجنة
يالابقى نقلبها جنينة

صبرني يارب يقول...

سكررررره

شووووف البت بنقولك تكعيبة الياسمين

تقوليلى فطير وحمام

طب امال لو قلتلك شجرة جميز تطلبي ايه ياماما
هههههههههههههههههههههه

عيال غريبه
نورتي يا جميل

صبرني يارب يقول...

فتاه من الصعيد

اي خدمه تعالوا كل يوم

صبرني يارب يقول...

شيماااااااء
هههههههههههههههههه

يعنى كنا بنصبرك بس

بس عموما يعنى عادي ممكن برضه يكون بينك وبين صحبتك الكلمتين دول

لعلمك انا مش قصدي بيها رومانسيه خالص يعنى
انتم الي عندكم نقص فى الرومانسيه بقى بعيد عنك
ههههههههههههههههههه

صبرني يارب يقول...

حنعيش يعنى حنعيش

يا فندم انت كفايه وجودك نقلبها جنينه على طول

ربنا يخليك متشكره اوي

صبرني يارب يقول...

احمد حسن البنا

مش انا قلتلك يا باشا احنا مش ادك
ههههههههههههه

شاعره ايه بس صلى على النبى

انا ما ليش فى السكه دي

هما شوية كلام طلعوا فى ساعة صفا وخلاص

لا بافهم فى الشعر والله ولا غيره

تحياتي يا فندم ونورت

حلم بيعافر يقول...

فكرتينى بتكعيبة الياسمين بتاعة نجيب محفوظ اللى فى اولاد حارتنا
بس عندها بقى كان بيقعد عرفة مع ناظر الوقف ويحششوا
انت بقى بتشمى هوا نضيف وصوت عصافير
هههههههه هناك فرق

صبرني يارب يقول...

حلم بيعافر

يحششوا حرام عليك ياعم بنقول ياسمين والله مش حاجه تانيه
هههههههههههههههههههههههه

بس انا الحقيقه ما قريتهاش القصه دي

ده من دماغي راسا اليكم

تحياتي يا فندم

Tamer Nabil يقول...

الحرية اكثر من رائعة

طول ما احنا عايشين بحرية ومش بنضر حد بحريتنا فاهلاا بها


مع خالص تحياتى

دموع كابر يقول...

ماكنتش اعرف انك شاعره وبتكتبى شعر كمان
كلامك رقيق وحلو زيك بالظبط

donya يقول...

مساء الخير
ياستي كتر خيرك
لكن ان كان علي الياسمينه موجوده ياابلتي
لكن وكأن وكيف واين الشخص العدل المحب المخلص اللي يحب كده من غير مايكون شايل خنجر وراء ضهره يطعنك بيه
بعد ما يسجدك وهوباااااااا يغدر بيكي و
تلاقي نفسك قاعده تحت الارض

تحياتي

ستيته حسب الله الحمش يقول...

يا مشهيصة الشعب
يا مزغزغة المكتئبين
يا صبصب يا أم دماغ عالية
تسلم ايدك

صبرني يارب يقول...

تامر نبيل

ايوه اعطني حريتى اطلق يداي

نورت

صبرني يارب يقول...

دموع كابر

لا لا مش اوي كده

يعنى هى كانت مجرد فكره وكملتها عشان تنفع نشر

شكرا يا جميل انتى كلك ذوق

صبرني يارب يقول...

ستيته

ايه رايك يا بقى

والله مدلعااااااااااااكم

منوره يا جميل يا واحشني

صبرني يارب يقول...

دنيا

لا لا لا ده كلام مش صح

الناس الكويسين موجودين

اختاري صح

وخلي ما بينك وبين ربنا عمار عشان ربنا يوفقك فى الاختيار

وقبل اي حاجه خليكى انتى انسانه كويسه عشان تستحقي ربنا يديكى انسان كويس
بطريق صح

نورتي يا جميل

donya يقول...

صباح الخير
ليه بس كده؟؟؟؟؟؟؟؟
مين قال لك اني انسانه مش كويسه
انا انسانه كويسه بشهادة الجميع
ومع هذا ربنا اداني انسان اقل مايقال عنه انه ....بلاش ياخد حسنات علي قفانا
انا اعتبرته ابتلاء
والحمد لله علي كل حال
واللي قلتيه ده مش قاعده
يعني سيدنا لوط كان وحش لما ربنا اعطاه ست مش كويسه باعته لقومها
ده بيبقي ابتلاء يااخت صبرني
وربنا يكفيكي شر الخيانه والغدر علشان طعمهم مر علقم

صبرني يارب يقول...

دنيا

لا لا انتى فهمتى كلامي غلط على فكره

بس عموما برضه حتى لو ابتلاء

مافيش ابتلاء بيجى من الهوا

دوري كده يمينا ويسارا تلاقي له سبب

انما يبتليكم الله ليطهركم

من ايه يا باشا يطهرنا ؟؟

لازم فى حاجه تستاهل ؟؟

دوري بس هاتلاقي

انا ما قلتش انك وحشه

انا قلت خليكى احسن تشوفي الاحسن

ودايما دايما فى الاحسن


وقولي ياااااااااااارب

وحكمي عقلك قبل اي حاجه

سيبك من كلام الافلام

عقلك يا ماما اولا
وما خاب من استشار

ومش استشار ام محمد الى بتضرب الودع نوووووووو

لاهل الحكمه

نؤتي الحكمة من نشاء ومن اوتي الحكمه اوتي خيرا كثيرا

اووووووووووك ؟

فهمتي حاجه ؟

هههههههههههههههه

وربنا يكفينا وكيفيكى طعم الغدر والخيانه ان شاء الله

منوراني

donya يقول...

مساء الخير ياصبرني يارب
مين قال ان الابتلاء بس تطهير
ربنا بيبلي عبده المؤمن المخلص ليمتحنه في ايمانه ياصبرني
واقول لك تاني الحمد لله ماعملتش حاجه في دنيتي صعبه اوي كده علشان اتطهر منها بالابتلاء في الغدر والخيانه
ومين قال لك اني لم استشير العقلاء من الناس انا من عيله بها من العقلاء والمشايخ اللي بجد مش كده وكده
وانا نفسي دكتوره علم مش ودع والا فنجان والا كوتشينه

اعتقد انك مندفعه شويه في حكمك علي الاشياء

ياريت تتوخي الحزر شويه علشان بعض الكلمات تجرح اكتر من المشرط

شكرا لك علي النصيحه مش هشوف الودع تاني
تحياتي

صبرني يارب يقول...

دنيا

انتى على فكره مش قادره توصلي لمعنى كلامي
او انا جايز الى كلامي مش واضح ومش مركزه معلش تعبانه شويه

المهم انا صحيح ليا راي شويه فى موضوع الابتلاء ده شويه غريب

انما انا باشوف ان الى ربنا اصابه بابتلاء ده رساله له قررررب اكتر دي وجهة نظري يعنى المتواضعه

والابتلاء بالمرض مثلا تطهير من الذنوب

وهو فى حد فينا من غير ذنوب يا بنتى ؟؟؟

انا ما اعرفكيش فاخمن فقط وبانصح عموما

لا قصدي انك وحشه ولا قصدي انك ما عملتيش الى انا هاقوله

انا مااعرفش عنك تقريبا حاجه خالص مالص

انا باقول بشكل عام ليكى ولاي حد بيقرا كلامنا
وحقك عليا يا باشا لو زعلتك

وعموما شوفي الاياتين دول عن الابتلاء كده



ونبلوكم بالشر والخير فتنة والينا ترجعون


ولنبلونكم حتى نعلم المجاهدين منكم والصابرين



فى النهايه باشوفها رساله بتقول قرررررب اكتر


اسفه اسفه اسفه ما كانش قصدي ابدا اجرحك يا بنتى والله

انا دايما بارد بشكل عام للناس الى ما اعرفهمش فعلا
وانا ما اعرفش عنك حاجه

فاهمه ؟؟

معلش انا ليا سياسه شويه قاسيه فى محاسبة النفس ومراجعتها

مفتريه على النفس شويه معلش

وسوري تاني

donya يقول...

مساء الخير
صبرني حصل خير
واطلب منك انك ماتقسيش علي حد من غير بينه
وهي دي مشكلة مشاكل مجتمعنا
اننا مابنسمعش بعض كويس فامابنفهمش بعض كويس فامابنحكمش علي الامر صح

اعذرك اختي اللي مايعرفك يجهلك

ومش زعلانه

تحياتي

صبرني يارب يقول...

دنيا

باقولك باقسو على النفس

حتى على نفسي

لا قول انا اول الى باقسوا عليهم


بمبدأ حاسبواانفسكم قبل ان تحاسبوا
حصل خير يا جميل

اتمنالك كل خير

ذو الوجه المبتسم يقول...

السلام عليكم
كل سنة وانت بخير

صبرني يارب يقول...

استاذ ناجي

يا اهلا وسهلا

نورتنا بعد الغياب

كل سنه وحضرتك طيب وبخير يارب

م/ الحسيني لزومي يقول...

كل عام انتم بخير
تقبل الله منا ومنكم صالح الاعمال

من غير عنـــوان يقول...

كل عام وأنتم بخير

تقبلي مروري

صبرني يارب يقول...

من غير عنوان

الله يكرمك يا استاذنا كل سنه وانت طيب

صبرني يارب يقول...

د حسين

كل سنه وانت بالف خير

ومتشكره اوي