الأربعاء، 30 ديسمبر 2009

الجوااااز


السلام عليكم

أخيرا جيت أرغي حداكم

اولا احب انوه انى ما عدتش حاضره لقاءات تاني وبدأت اصدق بجد انكم عيال عينكم مدوره

طب المره الى فاتت وقلت من التبرع المره دي مافيش تبرع اطلاقا

من يوم السبت وانا نايمه يا جدعان مش كده النهارده اول يوم اقدر اصلب طولي شويه طالعلي حبايه فوق عينى

حاسه ان فى مسمار فى مخي

ادعولي ربنا يشفينى والى فيكم عينه مدوره يا الى كنتم فى اللقاء يوم الجمعه هاعرررررررفه

خووووووووووووووووووووونه فعلا

ندخل فى الموضوع بقى

الجواز

ايوووووه الجواز ماله بقى ؟؟

مالكم يا جماعه مش بتتجوزوا ليه ؟؟

طبعا شايفه نص البشريه بتقولك هو فين الجواز ده هو احنا كنا لاقيين

ايوه طبعا قدامك الجواز وبتستهبلوا

سيبنا من الظروف الاقتصاديه والماديات ده موضوعات قتلت بحثا

خلينا فى معنويا انتم ليه كده معقدين من الجواز وخايفين وحاسين ا نكم هاتقعوا فى البحر ؟؟

ليه ؟؟
انت ممكن تختار صديق بكل بساطه ويفضل الصديق معاك طول العمر او ما يفضلش

ما حدش ليه بيخاف اوي من اختيار الصديق زي اختيار الزوج والزوجه ؟؟

عشان الموضوع مش مرعب كل واحد حر فى الصداقه يقدر ينسحب وقت ما يحب

طيب ماهو يا جدعان والله الجواز كده بس احنا الى مش فاهمين

هاتوا الكاتلوج على راي الدكتور اسلام وشوفوا قال ايه

فامساك بمعروف او تسريح باحسان

بس خلاااااص واظن دلوقتي اي واحد يقدر يطلق واي واحده تقدر تخلع ببساطه

بس من غير ما تبصوا لماديات بقى هاتخسر فلوس ماشي بس مش هاتخسر نفسك

مش هاتخسر عمرك وانت بتقول يا ترى اتجوز ولا بلاش يا ترى هانجح ولا هافشل
هو فى ايه عندك اغلى من عمرك ؟؟

اتدخلت مره فى جوازه لواحده كان عمرها 39 سنه وقتها تقدروا تقولوا انها جربت على الراجل يا عينى كل التجارب والاختبارات الموجوده فى ظهر الجدول الدوري

وطبعا فى النهايه قررت انه غير لائق ويا اما يجى مجرد مكمل لحياتها الى اصلا مش ناقصها حاجه يا بلاش

طيب انتى متاكده ان حياتك مش ناقصها حاجه فعلا ؟؟ خليكى صريحه مع نفسك

طيب لو هو كان غير لائق او ما ارتحتيش فى الجواز يا ستى صحتك ما جاتش على هواه هاتخسري ايه ؟؟

اكتر من العمر الى راح عندك ايه خايفه عليه ؟

مش باقولك اتجوزي واحد وحش ولا واحد معيوب ولا قولي ضل راجل ولا اي حاجه من دي

بس بلاش الرعب الغير مبرر ده وبلاش الحسابات الكتير اوي الى بتدخلك فى دايرة وانا ايه يضمنلي انه مش هايكون كذا وكذا وكذا

عشان مافيش ضمانات هى كده اعملي الى عليكى اوزني الامور

اسألوا عليه بجد ناس ثقات اوزنيه بعقلك لما تشوفيه انتى مش قليله فكري


فكري بمخك انتى مش بمخ مجتمعك

مش عيب ابدا يكون عمرك اربعين سنه وعايزه تتجوزي ولا خمسين ولا ستين وطز فى المجتمع الى بعد كده هايدوسك ومش هايفكر هو داس فين

مش باقولك ارمي نفسك باقولك بس اعطي لنفسك فرصه للتجربه

باحس ا حيانا ان الى وصلت للسن ده وما اتجوزتش بتكون خلاص حياتها استقرت على الوضع الى هى عايشاه وما عادش عندها اي مرونه ومن الصعب انها تتاقلم مع حد او تتطبع عليه

ارجوكي حاولي تجربي مش هاتخسري اكتر من عمرك الى خسرتيه

اي خسائر ماديه تتعوض

واي خسائر معنويه مش هاتكون اد خسارتك بعدين واد خسارتك لعمرك الى راح


يا رجاله

بلاش التردد ده

على راي شجرة الدر يا اخويا مرض الجنس البشري

وحياة ابوك شيل من راسك انك ما حصلتش ولا هاتحصل وان البنات على قفا من يشيل وانهم مش لاقيين جواز وعليه وحسب نظرية العرض والطلب انت لازم تنقي النقاوه الى فيهم

لا يا فندم احب اقولك من كل قلبي اتوووووووووكس عشان البنات قاعدين مش لاقيين جواز لسبب واحد

عشان مش لاقيين رجاله

اااااااااه هو في بنت مش عايزه تتجوز ؟؟ في بس مش كتير وجوه نفسهم فى ربع كده بيقول عريس يا امااااااي

يبقى ليه البنات مش بيتجوزوا عشان مش لاقيين رجاله طبعا

فى مثل بيقول ايه قال ابوك مات من الجوع ؟ قاله يعنى هو كان لقى اكل ولا كالش

اهو كده برضه البنات بارت ؟؟ ما لقيتش رجاله نعمل ايه بقى نجيب لهم صينى ولا ايه

فوق بقى انى اكتشفت ان الرجاله هى الى بقت تهتم بالماديات

اه والله عايز يتجوز يكون عنده كل حاجه ااااااه امال يقولوا ايه عليه

بس بشرط مش بعرقه يعنى

تلاقي الى عايز امه وابوه يجهزوه زي البنات وبكل تناحه وصفاقه يقولك ايييييييييييه ماهى فى الاخر فلوس

وتلاقي الى معاه ملمين مثلا وحاسس نفسه بقى فرررررصه الواد جاي من بلاد بره يعنى مش اي حاجه فلوس افرنجي
ويقعد ويانتخ كده فى الكرسي ويتشرط على ابو العروسه ان ابو العروسه يحط اد الى هو هايحطه بالظبط فى الجهاز اااااااااه مش نهيبه هي
طب يا حبيبى ده انت العريييييييييييير قصدي العرييييييييييس انت الى المفروض تدفع مهر وتجهز بيت الزوجيه

ايه انتم مفتريين الحياه تعاااااون والناس كلها ماشيه على كده

طيب طيب تعاون وماشيه على كده يبقى نزل ركلك واقعد معووج واتكلم عدل وقول الى تقدروا عليه اعملوه والى اقدر عليه اعمله
ما تبقاش شحات وعامل نفسك فيها فله وداخل حرب وبتقول هايخسروني فلوسي او نازل السوق وواخدها شطاره وانت بتشتري وكانك بتشتري فازه يعنى (ماشيها فازه )



وبعدين كمان بعد ما حماه يجهز نص العفش بالاضافه الى اكل وخزين البيت والصباحيه ولبس العروسه والبرنس والبجامه بتاعة العريس وهراشه لظهر العريس

يجى برضه العرير ويقعد يانتخ تااااااني ويقول لااااا القايمه دي مش مااااضي عليها انتم كاتبين فيها التلفزيون ؟؟!!


لا دى ماما جايبهولي هديه ده بره اللعبه

طيب يا امور ربنا يخلي ماما ويخلي بابا ويخربيت الى يفكر يجوزك بنته

قدام عينى يا جدعان الواد كان بيستتنح ويقول لابو العروسه تدفع نص تكاليف الفرح

الراجل يقوله مش معايا فلوس يقوله ما يلزمنيش

الله طب انت عايز تروح ترقص فى الفرح الراجل يعمل ايه يبيع عيل من عياله عشان انت تروح ترقص

ما الى عايز يرقص يرقص على حسابه


يا رجاله بلاش استهبال وخليكم رجاله

وبلاش ا لخوف والهروب من الجواز والمسؤليه ليس هذا من شيم ا لرجال

وخد الى على اد ايدك بلاش بنت السلطان وحياة والدك وبعدين ترجع تعيط



يا بنات


مافيش حاجه مضمونه ميه فى الميه ومافيش حد هايبقى هو فارس الاحلام الكامل الفاضل
وارجوكم تمسحوا من نوافيخكم كلام الافلام والروايات الله يحرقهم

فاهمه يا بت انتى (عارفه نفسك طبعا ليكى بوست لواحدك يا فالحه )

اتجوزوا من يتق الله واتجوزي رااااااااجل والله الرجاله نادرين دلوقتي لو لقيتى راجل كلبشي فيه

(حتى لو كان اخوكي فى الدراسه يا مايله ) موضوع كده مالكوش دعوه


اعقليها وتوجهي لله تعالى واتمنى عليه التوفيق وتوقعي كل حاجه الوحش والحلو واسعي للحلو ولو جه الوحش


اهو قدر الله وما شاء فعل


لكم كلكم والله مافيش حاجه تسوى عمركم

عشان خاطري عيشوا حياتكم بدون عقد ولا كلاكيع

واي حد اهبل يخوفكم من الجواز ويلعن ايامه يا كذاب يا فاشل يا الاثنين مع بعض

والدليل على كده انه هايسعى يجوز عياله برضه وما حدش بيتمنى لولاده حاجه وحشه


بس خلاص المهم تتجوزوا ما تصدعونيش
يلا الرجاله على الشمال والبنات على اليمين عشان نوفق اد عشر خماشر راس كده فى البوست ده

بس بعيد عني يا حلوين اااااااه كفيااااااني

هناك 90 تعليقًا:

القدر و انا يقول...

صبصب الجميلة
كل سنة وانت طيبة يا مصبرة المدونين
والله بوست جميل وكلام فى النافوخ للبنت والولد
وفعلا وضحت صورة حقيقية لنماذج كتيرة من الشباب يجمدهم الخوف او القلق -الغرور أو الانانية - شباب مش عاوزين يتعبوا فى حاجة ابدا ..
وفعلا العمر بيضيع من غير ما يحسوا
ويا بخت من وفق عشرون راس فى الحلال
تحباتى لاسلوبك الساخر الممتع

فاتيما يقول...

صباح الرضا
و القناعة يا صبصب

كله هيسمع يا ماما
و يهز راسه

و محدش هيدوس
خطوة واحدة
لقدام

ليه؟!!

ما على رأيك
تحية كاريوكا
لخصّت و جابت م الآخر

التردد

ربنا يهدى العقول و القلوب
بوسة و حضونات
و سلامتك ألف سلامة

فتاه من الصعيد يقول...

ههههههههههههههه

حاضر

شمس النهار يقول...

اولا صباح الفل ياجميل
ثانيا سلامتك الف سلامه
حسدوكي يابيضه
انا قلت البلوجر ده
نقعد علي بابه الشيخه باتعه ماحدش صدقني

عارفه العروسه

لما يتلموا تاني في لقاء نعملك العروسه

ثالثا البوست جون جون يعني

وهدخل اعلق اكتر من مره
انا بانبه اهو

بس دلوقتي هتكلم في جزء مهم

موضوع الخوف من الطلاق مش من الجواز

وعلي فكره الخوف من الطلاق عند الاتنين البنت والولد

بس كل واحد له اسبابه المختلفه

البنات خايفه من الطلاق
علشان شايفه صحبتها او جارتها او خالتها او شوفي الصدمه دي امها

ياعايشه ميته منفصله متصله لاهي متجوزه والا مطلقه ومتحمله المسؤليه كامله
طيب مابتطلقيش ليه ياماما
معقول واجيب ليكي ولخواتك جوز ام والا ابوكوا هيسبكوا لي لو اتجوزت
وحتي لو اتطلقت ومااتجوزتش وابوكوا سابكم ليه هيصرف عليكم هيشيلني الجمل ومهما اشتغلت والا وقفت علي دماغي مش هعرف اصرف عليكم زيه
وكمان لو حد جه يخطبكم والا رحنا نخطب لأخوكي وعرفوا اننا مطلقين
(شوفي النظره المتخلفه هنا بقي)
هيقولوا ياالبنت طالعه لأمها او الولد مش هيصون مراته زي ابوه
ياعم دي اسره مفككه واللي بيتربي في اسره مفككه مابيعرفش يعيش
ياعم ايه اللي يجبرك ده جواز

*ده غير بقي نظرة المجتمع للمطلقه
وماتقليش طظ في المجتمع اي ست في مجتمعنا مطلقه بيتعمل فيها عمايل يا نهار ابيض والله ماتتحكي عايزه بلوجر لوحده
الارمله كمان بس علي خفيف بيكون في 10% تعاطف شويه علي اساس ايه يعني مش عارفه

هكمل بس كفايه كده دلوقتي علي الصبح كده ياصبررررررررني
طااااااايب

سلام مؤقت

شمس النهار يقول...

صحيح فين الاغنيه

مالييش دعوه
ابعتيهالي علي الميل
مش لقياها خالص

OlivE يقول...

انا واقفه اهو فى الصف مشوفتش حاجة ليه طيب
D:
ههههههههههه
هو مفيش نظر




بجد انا بحييكى على كلامك دا الموضوع بقى عامل زى الاستثمار مين هيجيب اكتر ويدفع اكتر فى الجوازه وبيجبوا شويه حاجات ملهاش اى لازمه مجرد ان كل واحد بيبص لفلان بن علان بن ترتان انا بشوف كدا كتير وليا بوست قريب عن الموضوع دا

بصى انا واحده من الناس مقتنع اقتناع تام ان فى فرق كبيررررررررر اوى ما بين راجل وذكر مكتوبه فى البطاله الرجوله شىء واللى بنشوفه فى مجتمعنا دا شىء تانى

بالنسبه للخوف من الارتباط لاننا دايما بنتوقع الوحش واننا مش هنستحمل الوحش دا فخلاص لا من الاول
خوووووووووووف ورعب من حاجة المستقبل مخبى لنا ايه بس دا غلط لان المكتوب هنشوفه هنشوفه لو عملنا ايه

أسفه على الاطاله
تحياتى ليكى

سلامى

محمد فؤاد (صاحب عمود النور) يقول...

اولا: الف سلالالالامة عليكى وان شاء الله تقومى بالسلامة ومحدش من اللى كانوا قاعدين معاكى عينه وحشة ولا حاجه والناس ماشاء الله زى الفل ومافيش اى حاجه وصلى ع النبى كدا .

ثانيا:
بقى هى كل مشكلة البنات فى الجواز انها مش لاقيه راجل؟؟؟ ياصلاة النبى؟
ازاى يعنى مافى ناس ماشاء الله عليهم رجاله وشايلين مسؤلية وعايزين يتجوزوا بصى يا صبرنى بلاش تتكلمى معايا فى المواضيع دى لانى اكتر شخص الناس بتيجى تتكلم معاه فى المواضيع دى زى اسامة منير كدا واللهى بدون مبالغه ..

المشكلة فى الرجالة؟؟؟!!! دا اللى ربنا قدرك عليه وقولتيه هقولك ايه مهو انتى فى المنصورة مانزلتيش مصر وشفتى البنات عالمين ازاى؟

وكمان فى حاجه غريبه قوى بجد يعنى بقى الولاد هما اللى بيعقدوا يتامروا ويقولا العفش والتلفزيون ويتنكوا ؟؟ لااله الا الله... ازااااااااااى
طب انا هحكيلك على موقف حصل معايا انا شخصيا بقى انا كنت هتقدم لواحده من سنه وكلمتها وكلمة مامتها سالتنى شقتك فين قولتلها فى الطالبيه سالتنى هى فين الطالبيه دى مع ان بينى وبينها 3شوارع وقال ايه مش عارفه الطالبية فين؟؟ وقالتلى لا انا بنتى لازم تتجوز فى حته كويسه بس برضة هقول لابوها كلمتها بعدها بيومين ابوها مارضيش يقابلنى الا لما يبقى عنى شقه فى حته كويسه وتمليك احكمى انتى يا طيبة على الموضوع دا!!!!!!!

ثالثا بقى: ان البنات بقيت اوووفر فى كل حاجه حتى المحجبات بقوا اخر بشاعه اشى مضيق ومحزق وكمان اللى زاد وغطى البوت اللى طالع موضع دا ايه القرف دا بقى بزمتك دول ينفعوا ستات بيوت؟؟؟
بقت دلوقتى المشكله عندنا احنا يارجاله؟؟
انا ماقدرش انكر ان فى رجاله معندهمش مسؤليه بس مش كلة طب انتى لو جبتيلى عروسه متدينه وعارفه ربنا وكويسه مستعد اتجوزها بس ابقى قابلينى لازم يطلعلك حاجه فى النص

وبرضه هقولك(من يتقى الله يجعل له مخرجا) طول ما الولد او البنت بيتقوا الله يبقى ربنا هيكرمهم (الطيبون للطيبات)

وعندى حكاوى بلاوى لو عندك وقت تسمعيها
مع السلاموا عليكو

سومه...مجنونه فى بلد عاقل يقول...

يا اختى احنا كنا لاقينا راجل نص احلام مش راجل احلامنا وموافقناش:))
كل سنه وانتى طيبه وانا شخصيا ان اتجوزت مش عاوزه اتسرح خالص غير ع الترب :))
الحل دلوقتى اننا احنا اللى نخطب الرجاله :))

OlivE يقول...

نسيت اقول

الف سلامه عليكى

اه هما عنيهم وحشه انا عارفه بخرى نفسك بخرى P:

الف
سلامه
عليكى

ستيته حسب الله الحمش يقول...

سلامتك يا ماما
ان شا الله العدوين على رأي عفرتو لما يحصل لي شيء
مش عارفة ايه العدويييين دي
هههههههههههههههههههههههههه

تصدقي بالله
وحشني رغيك
اه
مش قادرة كده ادخل البلوج من غير ما ألاقيكي مفضفضة من معاميك معاميكك

وياعزيزي العرير وعزيزتي العرورة
يفوز باللذة كل مغامر
لما يكون السمة الغالبة على البلد كلها مش انتم بس الجبن
يبقى انتم جزء من حالة الجبن والخوف دي

وبعدين هو الكتالوج يا اختشي هو الحل بلا ادنى ريب

وبعدين اي تجربة اي حد بيدخلها باحتمالات الفوز او الخسارة
بس لو اختارتوا بالكاتلوج الرباني فانتم بتوكلوا ربنا في انه يسخر لكم النص التاني ويختار لكم الأصلح ويصرف عنكم السوء واهله

ولكل بنت
لو جه مثل من الأمثلة اللي تحرق الدم اللي اوردتها صبصب ولم ارها ابدا في حياتي
وقعد معوج واتكلم عدل
او قعد عدل واتكلم معوج
او المصيبة والزغلولة الكبيرة
قعد معوج واتكلم معوج
في كل الحالات السالفة الذكر
بالجززززززززززززززززززززمة
ساعتها ملعون ابو الجواز

يا يقعد عدل ويتكلم عدل ويكون راجل راجل مش نص نص يا بلاها جواز خالص

قال تدفع نص الفرح قال
قال التلفزيون ضاضي اللي جايبه
اخرس
خسئت
عبيط وجاي يتجوز ويعمل فرد

تسلم الايادي يا ام العيال يا دايخة

bobo يقول...

حبيبة قلبي اللي مهنياني في المطبخ.. الف سلامة عليكي .. تصدقي ان فيه حد في الاخوة المدونين عينه وحشة بجد؟ دا انا يا ماما روحت من لقاء المنصورة اترميت انا وجوزي عيانين وحالنا كرب، ورجعت من البؤجة حصلي ما لا يحمد عقباه.. احنا بعد كدة كل واحد يروح التجمع وعروسته ودبوسه ف ايده... ههههه.. بهزر طبعا.. دول ناس زي الفل
بالنسبة لموضوع الجواز فعندك حق يا اوختشي مليون في الميه.. بس فعلا صعب الواحدة تلاقي راجل بجد من اللي ينطبق عليه قول الرسول صلى الله عليه وسلم : خيركم خيركم لاهله وانا خيركم لاهلي
والبنات برضه والشهادة لله بقى نادر فيها اوي اللي ينطبق عليها قول الرسول صلى الله عليه وسلم حين سُئل عن خير النساء قال : التي تسره إذا نظر و تطيعه إذا أمر و لا تخالفه في نفسها و لا في ماله بما يكره
بس والله كل واحد وواحدة لو توكلوا على الله والتزموا زي ما الست ستيتة قالت بالمنهج الرباني هيبقى الجواز اجمل حاجة حصلت في حياتهم
ربنا يهدي شباب وبنات المسلمين لما فيه خير الدنيا والاخرة
بوسيلي البنات

صيدلانيه طالعه نازله يقول...

ايه ده انتى كنتى بتتصنطى عليا و لا ايه؟
اصل انا كنت باتكلم مع واحده صاحبتى فى الموضوع ده من كام يوم
انا حزينه بجد على البنات و الشباب اللى احلى سنين عمرهم بتضيع فى المقاوحه و المكابره على الفاضى
اسأل اى واحده منهم طيب ازاى قادره تعيشى كده تقوللى عادى اهلى مش مخلينى محرومه من حاجه يا عبيطه مش كل حاجه حيقدر يجيبها ماما و بابا
فيه حاجات متتحققش غير مع شريك تانى يقاسمك دنيتك و فرحتك و حزنك و يبقى معاكى اطفال ان شاء الله يبقوا حافز انك تكملى عمرك بسعاده
بجد حتندموا قوى بس ياريت تلحقوا نفسكم قبل فوات الاوان
الحق اقوم اشيل كل الميكروفونات و كاميرات التجسس اللى انتى زارعاها عندى
هههههههههههههههههههههه

إنـســـانـة يقول...

لا فض فوكي ياست الكل

انا قبل ما اتجوز كان عندي حالة كدة زي الفوبيا .. خوف ورعب من الزواج وسميتها فوبيا الزواج حتى كتبت عنها ساعتها بوست

http://2insana.blogspot.com/2007/10/blog-post_25.html

النكتة بقا انى بعد ما عملتلي حزب الناس اللى عندهم الفوبيا دي اتجوزت مافيش بعدها بسنة تقريبا هههههه فوبيا وشها حلو

صيدلانيه طالعه نازله يقول...

سلامتك يا صبصب الف سلامه و بعدين مش عين الناس هيا السبب انتى قولتى ان بنتك كانت عيانه يعنى اتعديتى منها
بلاش بقى نرمى بلانا على الخلق
هههههههههههههههههههه
ربنا يشفيكى ان شاء الله

مسدس صغير يقول...

يعنى اعمل ايه دالوقتى؟؟
اتجوز وعلى ضمانتك؟
ههههههه
الانسان خلق فى كبد ومشقة فمجتش ع الجواز يعنى
بس الجواز كبد ممتع ومشقة متوقعه
المسئولية عمرها مكانت شر ابدا بس عايزة رجالة
مش رجالة النوع
لأ رجالة رجالة سواء ست او راجل
راجل يحتوى مراته ويحتوى اسرته ويحتوى مشاكل اسرة
وكذلك ست تشيل مسئولية راجل وبيت وتكون ستر وغطا عليه وتحتويه وتحبه وتخلصله
بس المشكلة فيما قبل الزواج
ازااى؟؟
اقولك
الحياة اصبحت حياة مادية وده الواقع
اهل العروسة بيبقو عايزين ضمانات كافية لضمان حياة سعيدة لبنتهم وبينسو ان الحياة السعيدة ملهاش علاقة بالماديات
او بمعنى اصح بيبقى ليها علاقة بس بنسبة قليلة اوى
وكذلك العريس تلاقيه عايز واجهة اجتماعية وعايز حد يشارك معاه فى الفرش و و و
فلازم بيفكر كتير فى حد مستور عشان يقدر يواصل معاه

مش عارف بقى العيب عند مين

والله الحب مع الستر همه اللى يجمعو شمل اى اسرة وكل زوج يتقى الله فى الاخر

والاسر بالراحة علينا شوية
واشترو رجالة

وكمان الراجل اختار ام لعيالك

وبس

صبرني يارب يقول...

القدر وانا

ميرسي يا حبيبتى

نوفق ايدى على كتفك

صبرني يارب يقول...

فتاه من الصعيد

يمين يا جميل ههههههههههههههههه

صبرني يارب يقول...

فاتيما

نعم ؟؟

على اساس انك مش واقفه فى الطابور ؟
ههههههههههههههههه

طب على الله تسمعي انتى وتهزي راسك

دوسي يا فالحه

وحشاااااااني يا بطه

صبرني يارب يقول...

شموسه

اه والنبى يا شموسه عروسه ونخرمها وكده
ههههههههههههههه

هو انا معاكي فى الكلام ده والله يا شموسه

بس برضه طز في المجتمع طزين عشان خاطرك

احنا لو بنطلق بشكل حضاري لا بشكل اسلامي صح
مش هايبقى العيال متضررين من الانفصال ولا عندهم مشاكل

انما الى حاصل دلوقتي ان كل بيت فيه انفصال فى تفكك ومشاكل فعلا بتاثر على شخصية الاولاد الا من رحم ربي

فاحنا عايزين بقى ننضف مخنا شويه

اما حكاية التعاطف مع الارمله والارمل لعلمك فده شيء طبيعى على اساس انه مالهاش ذنب فيها

وعلى اساس برضه ان الى مطلقه لازم تكون مضروبه يعنى

مش عارفه ليه الرسول عليه الصلاة والسلام اتجوز زينب بنت جحش بعد ما طلقها زيد ابن حارثه وكل زوجاته كانوا ثيب ماعادا عائشه

ايه بقى الهبل الى احنا بنعمل ده مش عارفه


طبعا مستنياكي تيجى عشر مرات يا باشا
تنورينى

صبرني يارب يقول...

اولف تري

طيب هاقولك على حاجه اطلعي قدام شويه
ههههههههههههههه

مرسي يا جميل

وكلامك تمام فرق كبير بين الراجل والذكر

وساعات باحس بجد انها قلة ايمان شويه

تحياتي ليكى وطولي براحتك طبعا

صبرني يارب يقول...

عمود نور

لا انت صدقت ولا ايه انا باهزر مش هاتهم فيك انك انت الى عينك مدوره مش عايزين نوقف سوقك وكده
هههههههههههههه


اما بالنوسبه لردك بقى
استحمل الى هايجرالك من فتايات الجمعيه

بص انا ما قلتش لك ابدا ان الرجاله كلهم بيتامروا والبنات امامير لا طبعا
فى وفي بس انا باتكلم فى الوقت الحالي والعموم الموجود

وبعدين البنت لما تتامر وتطلب ده عاااااااادي
الى مش عادي ان يكون راجل وشنبه فى وشه ويقعد يطلب من حماه يجبله السفره لونها فوشيا

دي قلة ادب


وبعدين انت زعلان ليه ان اهل البنت طلبت شقه فى مكان تاني

هو مش انت اخترت شقتك ؟
طيب هى مش من حقها تختار شقتها والحي الى هاتعيش فيه ؟؟

ولا انت هتاخدها تربطها فى الشقه وتمشي ؟؟

وانا قلت ماعادش فى رجاله شايلين المسؤليه
بس قليلين يا ضنايا امال باقولها كلبشي في لو لقتيه ليه

وانت اكتر شخص الناس بتتكلم معاه
واسامه منير وكده؟؟؟؟

عينى عليكى يا صبرني وعلى الى بتسمعيه والى بتشوفيه فى الدنيا دي
اسكت انت مش عاااااارف حاجه

وايه الى جاب البوتات واللبس فى الموضوع دلوقتي
ده موضوع تاني ايه الى جاب القلعه جمب البحر ياعم
هههههههههههههههههههه

بس ده ما يمنعش انى باكره الموضه بتاعة البوتات باحسهم شكلهم نازلين يسلكوا المجاري

ايوه بتوع البلديه بيلبسوا بوتات برضه
هههههههههههههههههههه

صبرني يارب يقول...

اولف تري

هههههههههههههههههههههههه

انا باقول كده برضه

صبرني يارب يقول...

سومه

بصي
شاوري بس وما لكيش دعوه انا هاخطبهولك
هههههههههههههههههههه
والله ما عندي اي مانع

صبرني يارب يقول...

ستيته

اه والله يا ستيته دايخه وربنا

الحبايه الى فى عينى عامله صاروخ فى دماغي

شوفوا الكلام طالع منها ازاي يا جدعان

زعيمه زعيمه يعنى مش اي كلام

هاتي بوسه يا جميل

بس والنبى بلاش بلاها جواز

خليها بلاها جواز من هذا العرير ونشوف غيره

نورتي يا جميل واحشاااااااني

صبرني يارب يقول...

بوبو

هاتي بوسه على البؤين الحلوين دول

بجد تمام ربنا يكرمك ايوه كده عايزه ناس حلوه كده متجوزين ويقولوا كلام حلوووووووووووووووووووو

نورتي يا جميل

صبرني يارب يقول...

انسانه

طب اتفضلي قدامي على المدونه اعملي بوست
وقولي انا اتعالجت من الفوبيا واتجوووووووزت والجواز ميت فل وخماشر

هههههههههههههههههه

هاشوف البوست ان شاء الله يا جميل

صبرني يارب يقول...

صيدلانيه

لا والله دي امراض مختلفه

ظهري وبعدين عينى

انا باهزر طبعا انا كنت نايمه وقمت مخضوضه على جرس الباب قمت غلط فظهري قفش يا اختي


لفيتى حوالين الكلمه وما طلعتش برضه ماشي كانك قولتيها وزياده
ههههههههههههههه

المهم يعنى ان مافيش حاجه اسمها ماما وبابا مش مخلينى عايزين حاجه

لان بابا وماما مش هايفضلوا ليكى طول العمر اينعم الاعمار بيد الله بس برضه لازم تعرفي كده
ماما وبابا هايجى عليهم الدور ويكونوا هما الى محتاجين منك مش العكس
مش ماديات بس طبعا

ثانيا زي ما انتى قولتي يا عبيطه مش كل حاجه ماما وبابا


صيدلانيه انا ليا عيون فى كل منطقه ههههههههههههههههههههه

صبرني يارب يقول...

مسدس صغير

الحل اننا نفهم

الحل اننا نتربى شويه ونعرف ان مش لازم البيت يبقى من الابره للصاروخ
امال هايعملوا ايه باقي حياتهم ياعم

الحل اننا نربي رجاله وستات

مش نربي عيال على الجنسي

الواد من دول يفضل فى حجر امه لحد مايتجوز وبعدين نقوله شيل
مش هايشيل

والبنت كذلك عاله على المجتمع ومدلعه ما تعرفش السما من العما لحد ما تتجوز ونقولها شيلى مش هاتشيل

المجتمع عايز ربير ايدك معايا ياا بو صلاح
هههههههههههه

adel يقول...

جواز !!!!!!!!
انا دخلت غلط ولا ايه ؟؟
مش هنا الفرن الالي :):)

بلا جواز بلا ديوله
اللي سنهم كبير يردوا بقي

الواحد كده تمام التمام الحقيقة :):)

محمد فؤاد (صاحب عمود النور) يقول...

يا امى يا يت الكل انا كل كلامى عن الموضوع بتاعة وماروحتش فى اى حته بره
يعنى ايه البنت تتامر عااادى انا مش فاهمها دا بمناسبة ايه؟؟؟ هما مش عايزين يتجوزوا؟؟؟ هو المهم الشقة تكون فين ولا مهم الراجل اللى هيقدر يحتويها ويحسسها انها ملكة فى مكانها؟؟؟
انا مش فاهمكوا بجد يعنى
بصى انا مش هتكلم فى الموضوع دا لان انا دمى بجد بيتحرق من ردود الناس ..تسمع واحه تقولك بس يجى العريس ان شالله حتى باوضة وصاله واول لما يجى تتأمر فى ايه ها؟؟؟ فى ايه؟؟؟

انا عارف ان انتى شفتى فى الحياه كتير واكتر منى كمان بس انا بحكى وبتكلم على قد اللى شفته

بصى يا صبرنى خلينا حبايب وبلاش نخسر بعض بسبب الموضوع دا عشان انا مضااااااااااااااايق ههههههههههههههههههههههههههههه

بس موضوعك هايل واكتبلنا حاجه فاريحى شوية

MaNoOoSh يقول...

ايوة فعلا عندك حق
البنات كتير منهم بيرفض يتجوز علشان مفيش رجااااااااااالة بجد

والذكور بيزعلو قوي من الكلمة دي
طب ما يركزو فى انهم يبقى رجالة أحسن ويتعلمو معني الرجولة وتحمل المسؤولية

سمكه واحده يقول...

طب وربنا بسبب ان مفيش رداله
لاموؤخده يعني يا رداله
الا من رحم ربي

وكمان عشان سمعه لامؤخده البنات اللي مش ولا بد خلت مفيش ثقه خالص عند الشوباب مش وثقين في حد
الا من رحم ربي طبعا


ومش هنقول بقي ظروف ماديه وصحيه وامراض وفقر وبلاوي واكتئاب

بصي من الاخر مبقاش فيه معرفش ايه
(.......) الا هو ايه؟

الشوباب فاقد الامل في حجات كتير
مجتش علي الجواز بلا نيله
عقبال ما كل الناس تتجوز في 2010 وتبقي هيصه وخالي الشعب يعيش

موضوعك مهم جدااااا
تحياتي

reem يقول...

الف الف سلامة عليكى ياقمر

مش انا والله اللى حسدت انا حسدت عن بعد بس
هههههههههههههههه

انا كمان يا صبصوبة عندى برد فظيع ومريع وصوتى رايح خالص خالص بس انا البرد بتاعى جه لوحده من غير لقاءت ولا حسد

كلام شموسة بجد عاجبنى اوى اوى على نظرة الناس للمطلقة واللى مهما كانت عايشة في مجتمع متحضر بردو بتفضل في نظرة متخلفة

بس انا مع دعوتك للشباب والبنوتات انهم مس يخافو من الجواز يا صبرنى ياعاقلة انتى

انتى وحشتينى جدا جدا جدا

أم .. بوبه يقول...

ايه الكلام المتستف الجامد العاقل ده أيوة قوليلهم يا ختى قوليلهم ... يعنى هيحصلهم ايه لو اتجوزوا هيقعوا فى البحر .. هو بس الراجل هيحصله حالة الخرس الزوجى وينفض دماغه وهيتأقلم على الوضع والست شوية زهايمر مبكر على هشاشة عظام على سواد تحت العين من السهر بالعيل وممكن تحتاج بس لحشو دروس بس مع شوية فيتامينات على زيارة للدكتور كل يوم هتبقى زى الأول واحسن

المهم انهم ميخافوووووووووش خاااااااااالص

الجواز حلو

الشعب لابد له من حكومه تشكمه يقول...

ايييييييه ده ايييه ده؟
انا ادخل الاقى تلقيح كده , وكمان حجات محدش فاهمها وانا فاهماها.:))

طب اصبرى بس هبهدلك..
وحياتك لنزلك بوست ارد عليكى واشهد الناس دى كلها عليكى ايه رأيك باه ههههههههههه


**
شوفى ياصبصب ياجميله الموضوع كمان متنسيش حاجه مهمه اوىىى,
وهى القبول والراحه النفسيه.لنفترض انى لقيت حد مفيش منه وهو كويس بس انا مش متقبلاه مفيش راحه نفسيه,وعلى فكره فى واحده راحت للرسول وقالتله فيما معناه انها مش بتعيب على جوزها حاجه غير انها مش متقبلاه ووافقلها على الطلاق.
يباه يعنى ايه لو لقيت حد وفى مواصفات كويسه بس انا بالنسبالى مفيش قبول .ازاااااااااى يعنى تقولى اتجوزى وغامى وهيحصلك ايه..؟؟؟
بتتعاملى زى ميكون الفشل فى الزواج حاجه سهله,انا بدخل جواز علشان ابنى بيت واسره واستقرار .
بس عموما عاجبنى اوى كلام دكتوره ستيته.

الشعب لابد له من حكومه تشكمه يقول...

*** عمود نور :
شوف يامحمد انت عصبى فى مناقشتك انا عارفاك هههههههههههههه.فاهدى كده علشان نتكلم.
اه انت متعرفنيش هتتعصب هتعصب هتكسر هكسر :)

بص يعنى ايه البنات مش لاقيه جواز,, اوم لما اول متشوف اى راجل تقول عريس ياماااااااى,
وتكلبش فى رجل بنطلون حضرتك...!!

ياسلاااااام افرض انا مش عاجبنى المكان اللى هعيش فيه,
ياسلاااااااااام مش من حقى..!!!

وبعدين حضرتك لو اتقدمت لواحده وعايشه فى مكان شعبى ممكن تقول لا مش عاجبنى اخطب واحده من المنطقه دى,
اشمعنى بتدى لنفسك حق الاختيار وتحرم غيرك منه..

قلم رصاص يقول...

أولاألف سلامة على سيادتك .. وعلى فكره اللي اداكي العين مكانش حاضر فعلا عشان بس منظلمش حد هههههههههههههه

المعنى في بطن الشاعر(وكلمة السر الكيكه)
ههههههههههههههههههه


باتفق معاكي جدا في الرأي

الموضوع محتاج إقدام وجرأة من الرجل على اقتحام الحياه الزوجيه ..أنا أعترف أن الرجل يتحمل الكثير من أسباب هذه المشكلة لأنه هو من المفترض به أن يتحرك ..ماهو مش معقول البنت هطروح تطلب إيده يعني..!

لكن بمرور الوقت أصبحت التصرفات من طرفي الزواج سواء أهل العروسه أو العريس ، أصبحت عادات راسخه في أذهان كل مقبل عل الزواج والبيوت أصبحت مهيأة بكل قوة لهذه المرحلة ..وكأننا داخلين حرب ..حاجة فعلا تزعل ^_^

أنا مثلا عن نفسي ..لا يهمني في شريكة الحياه سوى صفاتها هي ..وان تكون من بيت طيب فقط ..مليش علاقه بقى اطلااااقا
بكونها غنيه فقيره ..بنت مين وضعها ايه..وهتجيب كام حله وتدفع كام ..ونفس الكلام اتمنى ان شريكة الحياه تنظر لي من نفس الزاوية..الخ الخ .. دا كلام فارغ وسفه ..الناس اللي بتنظر للزاوية دي بالتحديد باعتبرها ناس مريضه وتحمل كل فيروسات المجتمع..من جشع وطمع وتلكيك وعدم تحمل مسئولية وعدم توقع الخير ..الخ

وقوامة الرجل على المرأةفي الإنفاق مصدرها كلام ربنا سبحانه وتعالى حين قال :

"الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنفَقُوا مِنْ أَمْوَالِهِمْ"

وانا بريئ من الراجل اللي ماشي بالنهج ده ..وكمان من اللي بينظر لعمل زوجته على انه ضرورة لابد منها لمعاونته على تحمل أعباء الحياه .. مالم تكون ظروفهما تحتم ذلك !

وانا الحمدلله أفهم هذه الأيه جيدا ..عكس ناس تانية بيستخدموها غلط وعن عمد عند المقارنة بين الرجل و المرأة..

وأؤيدك بأننا مفروض نسيبها لله في مسألة المستقبل لأن دي غيبيات مش من اختصاص البشر الكلام فيها..

لكن من حق كل طرف زي ماقولتي انه يسأل عن التاني .. ده حق أصيل عند الشروع في هذه الخطوة .. لأنها حياه جديدة بكل ما تحمل الكلمة من معنى

أسف في التطويل عليكي

وهتروحي فين مننا .. الاخوه ليها حقوق على سيادتك .. وسيبك من الحجج الواهيه دي هههههههههههههه

لازم تتصرفي في عدد اتنين عروسه ..واحده للعبد لله والتانية لأبو صلاح

أصل انا وهو هنتجوز في فرح واحد ..عشان الجديد بقى ان صلاح اللي هيحاسب
ههههههههههههههههه

كل سنة وانتي طيبه

في حفظ الله

Cute Kitty **sookra يقول...

اولا وربنا وربنا انا كتبت كومنت العصر وموش وصل
وجيت اكتبه تانى الكهربا قطعت قلت بس
It's a sign
وعشان كدا موش هاقول اللى كتبته وهاكتفى انى اقولك الف سلامه عليكى

! Д ĦMΞĎ 3∑źŽż يقول...

اولا انا طلع عين الفاميلي بتاع الأنا علشان ارد على المدونه بتاعة سعادة سيادتك دي
ثانيا ندخل في الموضوع
الرد ده ليكي يا صبرني علشان ماحدش يصدع مني :D
وأكيد لكل الناس بس ده رد على التوبيك بتاعك في المقام الاول
أولا مع احترامي ليكي احب اقوللك أنك على أد حالاتاتك :D
لأن كل اللي قلتيه ده فيه كتير اوي مش موجود او نقدر نقول موجود بس بشكل آخر
وانتي بصراحه بأه ظالمة ومش واقعيه ومش حيادية
لأنك سوداوية النظره للرجاله بصراحه وده طبعا على أساس انك رئيسة جمعية المرأة المتوحشة
اولا وقبل كل شئ الموضوع في حد ذاته جميل
بصرف النظر بأه عن اللي كاتباه او المحتوى
محتوى تعبان كللنا عارفيييييييين
ههههههههههههههههههههههههههههههههههههههههه
بس عادي ممكن نجبره احناوغيرنا من الناس الكويسه اللي بترد اللي زي حالاتي كده
المهم يا ستي موضوع ماديا واننا نسيبنا منه دي مش فاهم يعني ازاي مايتبصلهاش
بس مش هتكلم فيه لأني ممكن ارغي فيها واصدعكم واصدع الناس
وكمان شكلكم زي ماقلتي اتكلمتم في الموضوع كتير وانا مش عايز اعيد موضوع اتكتب فيه قبل كده
وهحاول اتكلم في أغلب النقط اللي اتكلمتي فيها وارد عليها على أد ما اقدر
يا صبرني هانم بتقولي (خلينا فى معنويا انتم ليه كده معقدين من الجواز وخايفين وحاسين ا نكم هاتقعوا فى البحر ؟؟)
ده كلام مش موجود تقريبا
لأن مافيش حد بيلاقي نصيبه ويتنك عليه
او نقدر نقول مافيش حد عاقل يعني ...
انتي كلامك ده لا ينطبق غير على اخواتنا اللي نصيبهم ماجاش
ودلوقتي انا عارف ان العرسان قليلين ده لأسباب كتير اولها طبعا انهم فعلا قليلين
واننا ضحك علينا الإعلام وهنتكلم في الموضوع اللي اختنا صبرني ماحبتش اصلا تتجهله
اما اللي بتقولي عليهم خايفين من الجواز
الله اعلم ليه بيرفضو طبعا دي حاجه بترجعلهم
يعني هديكي مثل يا صبرني
احنا لينا واحده جارتنا سنها حاجه واربعين سنه
بس شكلها كويس ومش باين عليها السن ومقبوله جدا
المهم جبتلها عريس زييييي الفل والله رفضته
ال ايه علشان مطلق
وانا زكيته عندها وقلتلها الراجل ملتزم ومصلي ومافيهوش عيب والله
وزي القمر ودمه خفيف وانسان عاقل وووووو...
واوات كتير اوي والله
المهم رفضت
وقبل كده برضه زكيتها عند ناس كتير بس بتحاول تشوف حاجه ترفض منها الراجل
وقريب جبتلها واحد عقيد في الأمن القومي يعني على وش لوا وعايش في ايطاليا
راجل ماشاء الله مايتعيبش ورفضته
انا مش بتكلم عليها طبعا هيه شخصيا هيه يمكن ليها اسبابها الشخصية
لكني بتكلم عن الموضوع بشكل عام والبنات اللي زييها كده
الواحد بيلاقي اسباب رفض تافهه يعني يا صبرني ده بالنسبه للبنات.
تابع >>>> الرد ماخلصش >>>>>>>>

عاشقه الرومانسيه يقول...

قطيعه تقطع الجواز والكل كليله
هو الموضوع ده ماله محاصرنى ليه كده؟
(وش هيفرقع من الغيظ)

! Д ĦMΞĎ 3∑źŽż يقول...

علشان تعرفي ان البنات لو محترمه والأهل برضه محترمه مش هيكون فيه حاجه اسمها عنوسه بمعنى الكلمة زي اللي احنا شايفينها دلوقتي
والصنف ده لازم تتجوز ذكر مش راجل لأن الفرق كبير
لأن يا صبرني اللي ماتعرفيهوش ان الولد لو لقى البنت واقتنع بيها هيعمل اي حاجه علشان يتجوزها
هوه فعلا البنات كتير . لكن البنات الكويسه نادرين
وفعلا الشباب قليل . بس الرجاله الرجاله تقدري تقولي في انقراض
اما (ويقعد ويانتخ كده فى الكرسي ويتشرط على ابو العروسه ان ابو العروسه يحط اد الى هو هايحطه بالظبط فى الجهاز اااااااااه مش نهيبه هي)
انا اصلا لو طرف العروسه اديله بالـ .... لامؤاخذه يعني واطرده بره البيت
واللي يخليني اقبل بشخصيه كده يبقى انا انسان معدوم الكرامه
اه انا هتعامل بالعرف لأن العرف بيحكمنا بعض الشئ الأيام دي
في نفس الوقت مش هتشرط فيه على أي حاجه
والله لسه قريب اهو خطيب اختي ماحدش قالله هات كذا وماتجبش كذا
وفي نفس الوقت هنجيب الحاجات اللي المفروض نجيب يعني زي ماالعرف بيقول
انا معاكي في انهم فعلا عراير مش عرايس اللي قلتي عليهم
انا مثلا لما بتكلم مع اصحابي اقوللهم والله انا مش ناوي اجيب دهب
تلاقي الراجل بنبرة الرجاله يقوللي ماهو لو انت اللي هتتجوزها بتحبها مش هتستخسر فيها حاجه
واجي اقولله مش هتتجوز بدري ليه يا فلان يقوللي ماهي البنت لسه ماجهزتش نفسها
يا حلاوووووووووه
طالما انت راجل بأه وبتعرف تشتري دهب ماتهجز البت طيب
لكن المشكله ان الرجاله بيعملو رجاله في حتت وحتت تانيه يعملو فيها عميان
وكلامك ميه في الميه صح يا صبرني في الجزئية بتاعة الجهاز دي
وان انا شخصيا بعتبرها من هوادم القوامه اني استنى اهل مراتي يجيبولي حاجه في البيت
وان بيتي ده مش كلله بتاعي
انا هبقى حاسس اني اهل عروستي مجوزيني كده ونص رجولتي مش موجوده
وكمان الأخ اللي بيتمنظر بالدهب ده تلاقيه بينه وبين نفسه يقوللك الدهب اصلا كده كده بتاعي
حبيت ابيعه هبيعه واحزم دماغ البنت وكلام من ده والبقاء لله في الرجاله
لكننننننننننن
انا مش مع ان الأهل تبقى بنتهم مرميه بقالها سنين وييجو يقولولك
عايزين دهب بكذااااااااااا ومايقللش عن كذااااااااا وبالجراااااام كمان مش بالقيمه
وعايزين العفش شكله ازاي والنييييييش
الله عالنيش ده
بصو انا مش هلومهم لو هما ماشيين بالعرف العقيم ده وطلع العريس معفن
لكن لما انا اقول والله انا هجيب كل شئ وبعد كده هملا بيتي براحتي
وواحده واحده هكمل اللي ناقصني
لكن يا خساره الناس كلها بتحب المنظرة مش عايزه تجوز بناتها غير والشقه فول اوبشن
يعني خليكي يا صبرني حياديه في الحته دي عدتك شويه
وبالنسبه للبنات زي مافيش راجل مضمون برضه مافيش بنت بيضه مقشره يعني
والبنت الواحد يحط ودانه جنب بقها ع

! Д ĦMΞĎ 3∑źŽż يقول...

طبعا أغلبهم بيضرب عن الجواز والجزء التاني بيجيلهم نصيبهم اللي متجوز واللي مطلق وهكذا
مع العلم بيكون اتقدملهم قبل كده عرسان يا إما اتنكو عليهم يا إما رفضوه لأسباب تافهه
ومستنيين ابو مرسيدس وابو 100 ألف شبكه وهكذا
فتحس ان العقاب الإلهي بيجيلهم لأنهم ماصانوش النعمه ـ اللي هيه العريس الكويس طبعا ـ
هنعدي كلام كتير قلتيه علشان الاختصار ومش هرد عليه......
نيجي بأه في اللي يخصنا يا قاسم يا سماوي
بصي يا صبرني
انا ولا ببرأ ساحة العريس ولا ببرأ ساحة العروسه
وكلامك ان البنات مش لاقيين رجاله والله انتي غلطانه
ده الرجاله اللي مش لاقيين بنات كويسه
ولو لقوهم كويسين تلاقي اهلهم مش مناسبين
واللي اهلهم مناسبين تلاقي البت مهفوفه ومطيوره ودماغها هاجه
وبالنسبه لحتة البنات مش لاقيه جواز دي حقيقه مانقدرش ننكرها
بس طبعا ده احنا السبب فيه والله
احنا اللي بنصعب على نفسينا



وبعدين يا صبرني انا لو انا راجل حر وجالي واحد بيتنك عليا وجاي يتجوز بنتي
مش عايزه طبعا وفي ستيييييين داهيه
هقولله روح يا حبيبي أي حته تانيه يدور فيها على طلبك
لكن اللي يخليني اقبل بكده يبقى اكيد انا عايز اتخلص من البنت او البنت فيها عيب برضه
وأحيانا قليله اوي طيبة اهل البنت وأحيانا كتيره بتبقى طمع في العريس
ده م الأاااااااااااخر
وبعدين كمان اللي بيتعامل بالطريقه دي يا صبرني بيدل على شخصية الولد اللي نص لبه وبتدل على قلة أصله
ومين اللي مش لاقيين رجاله ياختي
تلاقي البت ضاربالك البنطلون الجنز والبادي وايه ..ونازله تتعايق في وسط الشارع
والتربيه الزفت دي ما اتكلمتيش عليها ليه
هيه دي فيه راجللللللللل ـ راجل بمعنى الكلمه يعني ـ يرضى يقربلها
اللهم إلا لو عايز يتمنظر بيها وسط اصحابه او عيلته او او او..إلخ إلخ
تابع >>>> الرد ماخلصش >>>>>>>>

الشعب لابد له من حكومه تشكمه يقول...

صبصب فى حاجه بجد انا ملاحظاها وفرسانى:

البنات الكويسه والمحترمات كتير بجد,,
والله والله انا عرف بنات مفيش زيهم,
ولا ليهم باه فى اى كلام فاضى ولا هئ ومئ وطريقهم دوغرى وبسسسسسسسس.
وفى نفس الوقت مش بيقابلوا نوعية الرجاله اللى بجد حظهم مش بيقابلوا غير النوعيه الملزقه او المريضه.

وفى نفس الوقت الرجاله يدخلوا يقولوا لا فى رجاله كويسين بس البنات هم اللى مش كويسين ومفيش بنت محترمه,,الخ الخ

انا عاوزه افهم باه لما دول متوفرين ودول متوفرين مش بيقابلوا بعض ويريحونا لييييييييييييييييييييييييييييييييييييييييييييييييييييييييييييييه؟

لما الحياه بمبى كده وجميله؟
فى حاااااااااجه غلط,ايه هى مش عارفه.

اقصوصه يقول...

ذكرتيني بمقوله

دايما ما اسمعها من صديقتي

هم اللي تجوزوا

كانوا عملو ايه

لوووووووووول

Wanda يقول...

اولا
سلامتك الف سلامة
و يارب الى يبصلك بعين وحشة ينطس :-) فى مناخيره :-))

ثانيا
كل سنة و انت طيبة
اخبار المطبخ فى راس السنة ايه؟؟؟

ثالثا
الجواز :-)))))
مؤخرا برد على السؤال الذيذ ده بجملتين
الاولانية : لما ربنا يريد
الثانية(اصل الناس مابطبطلش انتقاد فيا علشان رفضت عريس واحد بس والله و بعد صلاوات استخارة بقيت بصح مفزوعه من احلام هو فيها طب بعد كده اقول اه ازى ، ده خلانى كرهت نفسى)
اه الرد (يا وواندا يا رغاية) عندك عريس ايدى على كتفك :-) تلاقى الناس اتكتمت و هى الى تقول انشاء الله ربنا يرزقك :-))

رابعا
ارجع اقراء تعليقات الناقين بقى
جايز ارجعلك ثانى :-))

خامسا
عاجبنى مزاجك الغنائى ، اليسا يعينى
وش منسجم مع المزيكا

كفاية بقى يا وندا يا رغاية :-))
معلش لازم انا امسك لسانى اصله سايب اليومين دول

كرسي أعتراف يقول...

أول زيارة لمدونتك اللذيذة

وتساءلت حقا بعيدا عن القسمة وأمر الله لما يرفض البعض الزواج؟

سأحاول البحث عن إجابات

كل عام وأنتي بخير

تقبلي مودتي

حلم بيعافر يقول...

الحكاية اول عن اخر فلووووووووووووووس
الرجالة مندهاش فلووووووووس شوفلنا حد يتجوزنا ويصرف علينا

حلم بيعافر يقول...

الحكاية اول عن اخر فلووووووووووووووس
الرجالة مندهاش فلووووووووس شوفلنا حد يتجوزنا ويصرف علينا

! Д ĦMΞĎ 3∑źŽż يقول...

حالا حالا لسه قاري التعليقات والله
مالقتش حد نصفني في كلامي قبل ما اقوله غير الأخ عمود نور
يااخويا ده البنات وأهلهم بياكلو في أته محلوله ياعم مش داريانين بحااااااااجه اسكت
والله مابيحسو الفلوس بتيجي ازاي والشاب بيسف التراب ازاي
ويقولولك يتنك ويتهبب
ده الشاب اللي بيفكر بس تفكير في الجواز يتعملله تمثال ياسيدي
أما اللي كون نفسه بأه من اوله لأخره ده يتحط في قائمة المحاربين القدامى ويعمل الكارنيه بتاعه كمان
ده تروح لأهل البت يقولولك بنشتري رااااااااااجل
وكفايه يا حبيبي اخلاقك وكفايه انك من عيله وهنلاقي احسن منك فين
تيجي تخش في الجد
يقولولك بص مش هنقوللك هات وهات والكلام ده لأننا مانرضاهوش لأولادنا الشباب برضه يا حبيبي
عندنا اولاد ادكم كده .... الكلام ده طبعا بيتقال على لسان ام العروسه اغلب الأحيان
يعني ممكن تجيب أوضه عاديه خالص
احنا بأه عندنا نجار رخيص موت أسعاره على أد الشاب المتكحول اوي وحاجته معقوله
يعني من عشر الاف كده اتناشر .. حرام نقوللك هات الأوض أمو 18 وعشرين لا طبعا
احنا عندنا اولاد زييك وفي سنك
والدهب ده بأه هدية العريس يا اخويا .................. تجيبه بعشره بعشرين
والله دي قيمتك
زي مايكون الواد بيشتري تييييييييييييت ولامؤاخذه
يعني بيقيمو البنت بالحاجات اللي بيجيبها الولد
والله بأه بالنسبه للسفره..........
اما بالنسبه للمطبخ......
تعالى الصالون........
كننا هننسى الستاير والسجاد ياريت تبقى تاخد رأي البنت فيه
والأجهزه الكهربائيييييييييييييييية
والدهان ده طبعا زوق العروسه
ويابني انت زي ابننا ماتحاولش تتقل على نفسك وماترهقش نفسك يا حبيبي
اااااااه أيييييييوه انت زي ماقلنالك في مقام اولادنا يابني
ويكلموك بالدين ويقولووووووولك
الرسول صلى الله عليه وسلم بيقول ـــ تقوم انت قايل صلى الله عليه وسلم ـ
أقلهم مؤونة أكثرهن بركه
ده طبعا على أساس انك داخل بأقل حاجه يعني
وانا هقول كلمة على لسان كل الشباب واللي مش معانا واللي مش قادر يقولها
.
.
.
.
.
.
.
.
.
.
.
حسسسسسسسسسسسسسسسبي الله ونعم الوكيييييييييييييييييييييييل

bos bos بسمه عبدالباسط يقول...

هو فعلا مفيش حد مش عايز يتجوز بس الناس حصل عندها رعب من الجواز لأسباب كتيرة

البنات أولا مش لاقية رجالة بمعنى رجالة وانتى فاهمة معنى كلامى وعارفة انهم بقوا عملة نادرة
ثانيا لو فعلا صادفوا حد كويس ممكن يحصل حاجة من الاتنين يا أهلها يا أهله يقفوا فى النص ويفركشوا الجوازة
ثالثا الضحك على الذقون والتمثيل واللى يدخل ويعمل نفسه ملاك وفجأة يطلع شيطان بعد ما يكون دمر البنية يا عينى
وده أكتر حاجة بقت مخوفة البنات
رابعا الاستنطاع زى ما انتى قولتى هو مفيش مانع ان لو اهل العروسة معاهم يجيبوا احسن حاجة لبنتهم واللى حتى لو العريس قصر فيه يكملوه ولكن تعملى ايه فى اللى بيبقى داخل طمع لانه عارف
ان البنت دى واهلها عندهم فلوس وممكن يستفاد من الجوازة

نيجى بقى للرجالة خايفين يتجوزوا ليه
من الافلام العربى الكتيرة اللى بيشوفوها وبقوا متخيلين ان كل البنات ممكن تفرط ف نفسها وشرفها ويقولك انا اضمن منين ان دى كويسة

وكمان من اللى بيشوفوه حواليهم ومتخيلين ان كل البنات كده طيب ما انتوا عندكم اخواتكم بنات لية مش شايفينهم وحشين

وكمان من علاقاتهم الزفت وتلاقى كل واحد يعرف مليون واحدة وبيتسلى معاهم وفى الاخر تجيله عقدة ويقولك كلهم مش كويسين

ما أنت اللى عقدت نفسك يا ابن الحلال ومش كل صوابعك زى بعضها

يوووووووووة انتى فتحتينى ليه الموضوع لسة عايزله قاعدة هعمل شاى وابقى اجى اكمل

محمد فؤاد (صاحب عمود النور) يقول...

شيما......

اولا انا مش عصبى فى مناقشاتى ولا حاجه(معرفش ايه الفكرة الغريبة اللى اتاخدة عنى دى حتى انتى ماكونتيش موجود لما شديت مع بدراوى)

ثانيا: ياستى اللى عايزة تتجوز فى المكان اللى يريحها ماتتجوز هو انا هحوشها بس كل واحد بيعرض المتاح ليه دا المعروض بتاعى مثلا لو فى موافقة فى مافيش يبقى خلاص بس هى دى وجهه النظر بس الحالة اللى اتكلمت عنها هى الحالة الوحيده اللى واجهتنى بالاعتراض لكن فى حالات تانية وافقوا بدليل انى لما خطبت البنت وافقت لكن ماحصلش نصيبب لسباب اخرى.

فى الاول فى الاخر ان انا الاقى الزوجة التى تتق ربنا وفى نفس الوقت اى بنت كويسة تلاقى الزوج اللى يتق ربنا فيها

(ومن يتق الله يجعل له مخرجا)

بس خلاص

واحدة مفروسة يقول...

هههههههههههههههه
الحمد لله انا مش جيت علشان مش تقولى مفروسة حسدتنى
ههههههههههههههههههههه
ثانيا كل سنة و انتى و جوزك و اولادك طيبين و بخير

ثالثا انتى بتحثي العيال على الجواز؟؟؟؟؟
ده مشروع فااااشل و يفرس
هههههههههههه
روحي اسالى المتجوزين كده؟؟؟؟
سلام يا باتعة و سلامة الفسفوسة
ههههههههههه

حنعيش يعنى حنعيش يقول...

يا عم هوة انت بياثر فيك عين ولا حباية على العين انت ماشاء الله صاروخ افكار ...بهزر طبعا مش بحسد ...بس بصراحة بوست يتتاقل بالدهب .. خصوصا الحتة اللى بتستشهدى فيها باقوالى المأثورة ..الواحد كدة يحس انه مهم ...لا بجد بقى البوست روعة روعة روعة ...روعة روعة روعة ..ويارب حد يفهم ...والف سلامة عليك ياباشا ...وشوية بخور كدة فى الشقة ساعة ادان الضهر يعنى مش حيحصل حاجة

أحمد عاطف يقول...

انا شامم ريحة في الموضوع دا مش عجباني

وانتي فهماني يام مريم

انا مش هاتجوز مش لاني ماحصلتش

ولا لاني يعني الواد اللي مجابتنيش ولاده

لاني فعلا فعلا مؤمن بمبدأ اللي ممعاهوش ميلزموش

والا مكانش الرسول صلوات الله عليه قال من استطاع منكم الباءة فليتزوج

طيب ومن لم يستطع يعمل ايه

يكابر ويقول انا مش عايز اتجوز ؟؟


لا من لم يستطع فعليه بالصوم

واحنا صايمين يا صبرني

ولما نستطيع يحلها الحلال بفضله وكرمه

تحياتي

صبرني يارب يقول...

عادل

بعدين تيجى بعد سنه بس تعيط وتقول جوزوني هابعتلك لفاتيما واقولها شوفي ابنك ده
هههههههههههههه

نورت

صبرني يارب يقول...

عمود نور

والله ؟

يعنى بما انهم عايزين يتجوزوا والجواز بقى عمله نادره
يبقى احنا نقول يرضوا باي حاجه واي وضع واي شقه

قلتلك انت اخترت شقتك بمحض ارادتك

ليه بتنكر عليها هى واهلها انها تختار شقتها ؟؟

وايه مشكلتك فى انك اترفضت مره من حد ؟؟

هو انت المفروض لما تتقدم لواحده تمسك فيك وتقول عريس يا امااااااي طخه بس ما تموتوش
هههههههههههههه

ماهو طبيقى لما تكون بتطلب واحده للجواز احتمال عدم القبول لاي سبب موجود

فى ايه مالكم ؟؟

واه البنت تطلب وتتشرط وتتامر حقها
الشرع كفل لها الحق ده

فى اعتراض ؟

عمر بن الخطاب لما جه يقنن المهور ويحددها
راجعته واحده صحابيه وقالتله مش من حقك
وقالها اصابت امرأه واخطأ عمر وعدل عن القانون ده

من حقها تتشرط ومن حقك ما تقبلش الشروط وتشوف غيرها
عااااااااااااادي

صبرني يارب يقول...

مانوش

تمام طب ما يخلوهم رجاله الاول وبعدين يتكلموا فعلاااااااااا

نورتي

P A S H A يقول...

كل سنة وأنت طيبة.

صبرني يارب يقول...

سمكه واحده

تمام الا من رحم ربي

ربنا يرحمنا برحمته الواسعه يااختي

ويارب يتجوزوا ونخلص منهم بقى

صبرني يارب يقول...

ريم

ماهو اصلا هى دايره واصله على بعضها

ماهو ليه نظرة الناس كده للمطلقات واولادهم
لان اصلا الطلاق بيتم بشكل مش صح والى بيحصل مش صححححح

بالتالي فعلا الطلاق بياثر سلبا على الاولاد

لازم المجتمع فكره يتغير واخلاقه تتغير
من الاخر لازم يتربى

الف سلامه عليكى يا جميل
يارب ت كوني بقيتى احسن
وانتى كمان وحشاااااااااني جدا

صبرني يارب يقول...

ام بوبه

يا لهوووووووووي ده انتى طلعتينا بقينا ما ننفعش ببصله

بس بينى وبينك

اه انميا وسناني كلها محشيه لعلمك وبوظان من كله

بس الحمد لله برضه

هاتضربي على فكره
ههههههههههههههههههههههه

صبرني يارب يقول...

شيماء

بس بقى ما تصيحيش لنفسك

هو انا قلت حاجه فى القبول يا عنيه

المهم يكون الموضوع موضوع قبول
مش كتاكيت فى الدماغ

وبعدين ايه البتنجان ده

انا ما قلتش ان الفشل فى الجوازحاجه سهله

لكن كمان الموت حتى نفسه مش بادينا

امال احنا بنعيش ونتعب ونعمل حاجات كتير ليه ما احنا هانموت فى الاخر يبقى لزمته ايه ؟

احتمال الفشل موجود
وكله بايد ربنا

لما الخوف من الفشل يتحول لرعب يثنى عن الجواز من اصله هنا المشكله يا هبله هانم

اتركني يا بت انتى ليكى روقه

بنت الغربة يقول...

حبيبتى ياصبرنى
مش هاقولك رأى فى الجواز ...لأنك عارفاه..مفيش داعى نقلب المواجع على بعض..خليها فى القلب وبلاش نعقد الناس..
انا جايه ااقولك بس كل سنه وانت طيبه ياقمر وان شالله السنه الجايه تبقى احلى من اللى فاتت
تحياتى

صبرني يارب يقول...

قلم رصاص

تمام يا فندم كلام بس ننفذ والناس تفهم

وانت تطور براحتك يا فندم كل مره هاقولكم هنا موطن الرغي الاصلي ولا ايه

صبرني يارب يقول...

ٍسكره

ات اساين ايه يا ماما لا لا ماليش دعوه
تعالى اكتبي
يلا تاني

صبرني يارب يقول...

عزوووووووو

يا ابنى انت مين عرفك طريق المدونه بتاعتي

بص انت اعملك مدونه بقى عشان اعرف اقتص منك
هههههههههههه

بص انا ما قلتش ان ماديا مش مهم

انا قلت قتل بحثاااااااااا

يعنى اتكلمنا فيه قبل كده كتير مش هانقعد نعيد ونزيد بقى

انا ما قلتش بيتنك على نصيبه

انا باقول مش قادر ياخد القرار او تاخد القرار

دي مشكله نفسيه صدقنى ولا اراديه احيانا
عشان كده انا باتكلم فيها

وبالنسبه لحالة جارتك
قلتلك انا عندي حاله زيها ونفس الى انت بتقوله ده بيحصل

وهى دي الى باقولها هاتخسري ايه اكتر واهم من عمرك ؟

بس ازاي امن قومي وعايش فى ايطاليا والنبى يا اخويا عشان دي ما فهمتهاش
هههههههههههههه

يادي اللبس

انتم بتدخلوا المواضيع فى بعضها ليه
ايه جاب عيشه لام السعد دلوقتي

يا ابنى انا باتكلم فى ايه وانتم بتتكلموا فى ايه

بص يا عزو ادخل دماغ الشاب من دول تلاقيها شمال
عايز واحده من الى لابسي ومحزقين بس على شرط تلبس نقاب

اه ماهو برضه عايز واحده متدينه بس تكون فى نفس الوقت مزه ونغشه

اوووووووووووووو
عايز واحده بقى يلبسها النقاب ويقعدها فى البيت ومافيش نمله تشوف عرقوب رجلها الى يتدبحوا بيه فرخه

اعقلوا يا جدعان الوسطيه حلوه
العقل مافيش زيه والله

اهل العروسه مش عايزين يخلصوا منها يا عزو لا

اهل البنت مضغوط عليهم من كل ناحيه
مصلحة بنتهم والمجتمع الى بيدين الى فسخت خطوبتها والمجتمع الى حكم ان الحياه تعاون والعروسه لازم تجهز زي العريس
وكل حاجه فى الدنيا بتقوله ضحي واتك على نفسك وادين عشان تجيب هراشه مناسبه لظهر العريس
مش معقول ابدا نقوله انت غلطان

طب خلوها موقف جماعي
انما واحد يطلع كده ويقول مش مجهز بنتى ما حدش هايرضى يتجوزها صدقنى

ولعلمك اه بقى ما عادش فى رجاله عدله
ما عادش في شباب نقول عليهم رجاله فعلا مسؤلين
الا من رحم ربي

وفى نفس الوقت برضه البنات

مش هاقولك انهم حاجه قله

لا تلاقي العقل وتلاقي الاخلاق وتلاقي النسب الكويس

ويجوز جداااااا تلاقيها مش ست بيت وتلاقيها ست اشهر

عادي هى يعنى كانت لقت راجل عشان تبقى هى ست

ماهو احنا فى المجتمع الميزان مختلف ما بنربيش عيالنا برنبي فراخ

اه احنا شاطرين فى المنظره ودي وكسه بنى انا عارفه وهى دي المصيبه الاكبر


انما هارجع تاني واقولك زي ما قلت لعمود نور

البنت من حقها تتشرط والى مش عاجبه بلاش منه يشوف غيرها

عمر بن الخطاب لما جه يحدد المهور رجع فى كلامه وقال اصابت امرأه واخطأ عمر

عشان مش من حقه ينكر الحق ده الست

ما تستهبلوش بقى

التعدد ايامك مش فايته معايا يا عزو

مافيش فايده فى لسانك الزالف يا عزو

انا باتكلم بس وعايزه احل المشاكل من ورا الكمبيوتر

صدقنى انت هاتخرج من هنا متقطع مكعبات

يا ابنى تعدد ايه الى هايحل العنوسه

لجين أبو الدهب يقول...

والله فعلا زى ما قلتى
يعدوا يشرطوا ويمين وشمال والعمر يعدى بيهم ولا فى زوج سند فى الحياة ولا عيال يتقوى بيهم ويضيع العمر كده هباءا ..

وكمان بأكد على النصيحة اللى قلتيها للبنات
مافيش فارس احلام كاااااامل
ما تقعدش البنت
اصل لسه اودمه كتير
اصله مش جاهز
اصله مش رومانسى

مافيش حد كامل وولا فى ملايكة على الارض

بوست حلو جدا

دمتِ بخير ياصبرنى

صبرني يارب يقول...

عاشقة الرومانسيه

محاصرك ازاي يعنى

اعملي بقى ان الناس واقفين طوابير بقى
هههههههههههه

وحشاني يا بت والله

صبرني يارب يقول...

ِشيما

اه فى حاجه غلط

لا فى حاجات كتيييييييييير غلط

اول حاجه اختلاط الحابل بالنابل والناس بقت محتاسه فى النص

على فكره انا كتبت بوست مره كان اسمه

هما ليه الناس مش لاقيين بعضهم

ابقى دوري عليه وشوفيه

صبرني يارب يقول...

اقصوصه

معنى كده حاجه واحده بس

ان هما ما يعرفوش حد اتجوز عمل حاجه

لكن مش معنى كده ان كل الى اتجوزوا ما عملوش حاجه كويسه تستاهل التعب

صبرني يارب يقول...

كرسي اعتراف

نورتي يا جميل ودايما منوره

ولما تعرفي حاجه قوليلي

صبرني يارب يقول...

واندا

يا حياتي انتى ترغي براحتك خالص

وطبعا لو حد مش مستريحاله انا معاكي

وطبعا لو لقيتلك عريس فى الطابور الشمال على طول هاجيبه فى ايدي واجي اقابل ضاضي هههههههههههه

والمطبخ يارب افضاله بقى

اقري وتعالى براحتك خالص

صبرني يارب يقول...

حلم بيعافر

موافقين بس على شرط

نرجع لعهد الرقيق تاني وتبقوا ما ملكت انتم بقى

قال حد يصرف علينا قال

ده انت هاتتقطع

صبرني يارب يقول...

عزو

اخرتك قربت والله

الاقرع ياكل حلاوه بفلوسه

مليون مره اقولكم اتجوزوا حد على اد ايدك

مش لازم تروح تخطب بنت السلطان وبعدين تقول اي

وبعدين قلتلكم البنت الشرع يا سيدى كفلها حق التامر والشروط انت مالك بقى

صبرني يارب يقول...

بسمه

ماشي اعملي حسابي فى الشاي وتعالى كملي

ودايما كده يا بنتى الواحد يشوف الناس فى مرآته

طبيعى العكاك يدفع تمن عكه بشكل اولي انه يشوف الناس كلها عكاكه ومقرفه

صبرني يارب يقول...

حنعيش يعنى حنعيش

ربنا يخليك يارب

اه طبعا اقوالك الماثوره اهم حاجه
ههههههههههههههه

ده احنا نتشرف يا باشا

نورت يا فندم

صبرني يارب يقول...

مفروسه

اخس عليكى عشان انتى اتجوزتي مش هامك العيال يا اختي

سبيهم ياخدوا فرصتهم يا اختي

هاقطعك
وكل سنه وانتى طيبه يا قمر

صبرني يارب يقول...

باشا

وانت طيب وبخير وسلام يارب

صبرني يارب يقول...

أحمد عاطف

لا انت فهمت كلامي غلط

على فكره والله مش كان قصدي كده خالص
البوست ده بناءا على افكار كتير فى دماغي واحاديث دارت بينى وبين البنات فى اللقاء

عموما على الميل هابقى اشرحلك الموضوع


وبعدين انا قلت حاجه ؟

بس انا باحثكم تفطروا بقى هاتصوموا الدهر ولا ايه

مكروه ياعم
هههههههههههههههه

صبرني يارب يقول...

لجين

اهو مش رومانسي دي الى بتعفرتنى بقى
هههههههههههههههههه

المدونه نورت فينك من زمان

صبرني يارب يقول...

بنت الغربه

وانتى طيبه يا قمر

ليه بس كدددددددده ده الباشا يا بت الحب يا بت العشق يا بت
هههههههههههههههههههه

نورتي يا جميل

Anonymous يقول...

والله باين عليه قريب هخليكى تشوفى عروسه لمحمد الولد ربنا كرمه وخلص الكليه وكمان مدخلش الجيش وربنا سهل واشتغل ...وكنت مسافر مشوار القاهره ورجعت فجر اليوم لقيته صاحى وصلى وبيستعد للشغل وبيقولى متشوفلنا عروسه يا عم الحج ده محمد .. انا بقى ما تروح تتجوز هو انا ماسك فيك الغريبه انه لسه بكره 3 يناير ان شاء الله هيكمل 21 سنه وعاوز يتجوز طيب بذمتك اعمل معاه ايه ده .. خللى بالك الجواز عندنا مختلف يعنى العريس بيشيل الليله كلها ولو هيه جابت المطبخ يبقى ده كرم اخلاق من ابو العروسه مش اكتر ... ربنا يهدى لما فيه الخير .. وانا لسه مافهمتش ده بيتكلم جد ولا بيهزر .
عمك مدحت

Anonymous يقول...

نسيت اقولك وبعد ده كله بيمضى على القايمه اللى جايبها بما فيها الدهب ومن غير ما يتكلم وربنا هو اللى بيسترها بعد كده ... والله اعرف رجاله او شباب بمعنى ادق بعد ده كله باعوا ارض عشان يسددوا القايمه اللى همه جايبينها او تمن الدهب اللى اخدته العروسه ومكتوب فى القايمه بس المخ الزفت الصعيدى تقولى ايه ربنا الهادى .
راجل صعيدى

صبرني يارب يقول...

راجل صعيدى

يا عمو ده تقوله اشتغل يا حبيبى الاول وابدأ بس الطريق وانا اكملك

انما ما تشيلش عنه الشيله كلها عشانه هو والله

والعروسه عنينا يا عمو لو ما كناش نجوزه هانجوز مين بس

ولو انى زي ما انت عارف مقروصه قريب حرمت اعمل خاطبه تاني
ههههههههههههههههه

منور يا عمو

محمد عبدالرحمن شحاته يقول...

الجواز الكلام فيه كتير جداً

ومشاكله مالها حد

وهو قدر ولا يمكن يرد

زي الكلابشات اللي في اليد

بس الحمد لله احنا لسه ع البر

بعتذر على عدم متابعتي الفتره الماضيه
علشان بقى المذاكره واللذي منه

كل عام وانتي بخير

صبرني يارب يقول...

عمو مدحت

لا بدري عليه برضه سنتين كده لما ينشف حبه

ويحوش قرشين يبدأ بهم بس الجوازه حتى يجيب الشبكه

يعنى يحس انه تعب فيها

وربنا يخليك انت بقى للباقي

ويفرحك بيهم

وكل سنه وهو طيب

صبرني يارب يقول...

محمد شحاته

كلابشات ؟؟

ليه بس كلابشات

مالها الاساور الجميله الزاينه ادينا بس

ليه بس تاخدوها كلابشات

هو يعنى كان حد قابض عليكم

ما كل يسعى الى حتفه
ههههههههههه

ربنا ينجحك ان شاء الله وتشرف فى اي وقت

ميمى واحمد يقول...

حفلة صغننة ل د / ستيتة ..

قولوا كل سنة وهيا طيبة في البوست ده

صبرني يارب يقول...

عزو

انا اصلا مش هارد عليك خالص

اصل انا بجد تعبت افهم فيك وفى امثالك لا ممكن راضيه تظبط معاهم
وانا مليون مره رديت على كلامك ده وانت الى في دماغك فى دماغك


دماغك شمال طول عمرك وبتقول كلام مفقع بصراحه ومستفز لدرجة انى لو رديت عليك صورتي ها تيجى فى الجرايد بجد

! ДĦMΞĎ 3∑źŽż يقول...

بتفكريني بواحد بحب اشوفه اوي
بصي ممكن تتفرجي على اعلان كوكاكولا الفتايين
هيعجبك اوي
هههههههههههههههههههههههههههههههه