السبت، 26 ديسمبر 2009

اليوم الجميل

السلام عليكم


ازيكم يا يا اصدقائي


اد ايه انا واحشني الرغي معاكم فعلا وبقالي كتير ما كتبتش حاسه انى قربت اصدي بس مين يارب يومين كده وافضى واكل ودانكم من جديد




على وجه السرعه دلوقتي هاحكيلكم على اللقاء الجميل بتاع امبارح والى كان فى المنصوره




نبدأ من الاول




هو اينعم اليوم بدأ معايا بدايه مش حلوه

عشان وانا نازله لقيت مريم بتكح وبدأه دور برد وده خلانى اتاخرت على المعاد وكمان فضل مزاجي مش حلو باقي اليوم

ولما رضا كلمنى كمان العصر وقالي ان حرارتها عاليه اتلخبط على الاخر وانتم عارفين القلق بتاع اليومين دول

ما كنتش هاين عليا اسيبهم والله بس غصب عني مشيت بدري وما كملتش معاهم للمركب وكده عشان اروح اشوف مريم

اليوم كان جميل فعلا وهااااااديء جدا طبعا

اتكلمنا كتير كتير كتير كتير فى حاجات كتيره اوي

اتكلمنا عن فلسفة اللقاءات نفسها ومعناها واهميتها عند كل واحد فينا

واتعرفنا ببعض كويس المره دي كمدونين المنصوره وكمان على ضيوفنا الى من بره المنصوره لان العدد ما كانش كبير اوي زي المره الى فاتت

وعمود نور اقترح فكرة اننا نعمل كتاب منوع زي ما عملنا كده مدونات مصريه للجيب بس تكون بشكل تاني اقترحه هو وناقشنا فكرته ومستنيه منه انا باقي الكلام فى الموضوع ده ان شاء الله

نقول الحضور بقى ويارب ما انساش حد

شيماء الشعب لا بد له من حكومه تشكمه
ساره رحيل
بسمه انور
دعاء مجرد حلم
حلم كان
محمد شحاته بلاد السحر والخيال
ابراهيم العدوي كاتب مصري
ابراهيم مواطن شوجاع
مصطفى فك زنقه
محمد عمود نور
كيمو صوت من مصر
بدراوي
صلاح مسدس صغير
محمد انها حياتي
محمود حشمت
ايمن بدر العرضحالجي
بوكيه ورد
وكان فى مدونه جت فى الاخر يا جودعان وقعدت بعيد عني ما لحقتش اتعرف عليها لانى زي ما قلتلكم مشيت بدري تعالى يا جميله قوليلى معلش اسمك واسم مدونتك تاني

بس خلاص نسيت حد ؟؟ طب الى اتنسى يرفع ايده فوق عشان اشوفه

تعليقى بقى على الناس الي اتعرفت عليهم فى التجمع ده

بدراوي عاجبنى انك بتفكر كتير بس اسلوبك فى عرض فكرك ورايك مش صح وما بتعرفش تسمع راي غيرك وما بتقدروش كده هاتتعب ومش هاتتعلم كتير اتعلم تعرف فكرتك بشكل واضح وتسمع كمان راي الاخرين وتفهمه وتحترمه عشان توصل للحق والحقيقه لازم تعمل الى انا قلتلك عليه ده يا باشا انت نورتنا

محمد عمود نور طبعا مستنيه منك بجد متابعة موضوع الكتاب عاجبنى حماسك اوي للكتابه وانت من الناس الى انا فرحانه بمكسب معرفتهم فى اللقاء ده فعلا بس ليا تعليق من فضلك خليك اهدى فى المواجهات والنقاشات عشان تقدر تسيطر على مسار الحديث وتخلي الناس تسمعك اكتر وبعدين هما نقاشين ثلاثه من بتوعك دول وتلاقي شعرك ابيض يا بابا بالراحه على نفسك ههههههههههه

وبطلوا بقى تتلزقوا فى المنصوره مش معقول كده ههههههههههههههههه

صلاح العميري ما كانش عاجبنى خالص فى اللقاء وسألته كتير مالك ما رضيش يقول بس هايروح مني فين كرسي الاعتراف مستنيه

البت ساره رحيل دي عسل اوي يا جدعان هاديه وراكزه كده وعاقله وحلوه وكده يعنى

دعاء مجرد حلم كانت عماله تغيظني هى ومحمد عمود نور ويصوروا النيل وانا ما كانش معايا ذاكره اصور ولو ما بعتوليش الصور هاموتهم ان شاء الله

شيماء دماغك ناشفه وهاكسرهالك طبعا انا وهى ناكفنا فى بعض وبوسنا فى بعض لما قولنا بس

بسمه انور هاديه جدا جدا جدا ما كانش باين عليها على الميل والمدونه ليه مش عارفه

حلم كان مش هاقول بقى الى حصل فى المسجد عشان تعرفي انى جدعه هههههههههههههه

ابراهيم العاتشفى قصدي ابراهيم العدوي انا وشيماء عاكسناه لما كان هايفرفر مننا يا عينى وبعدين لبس البالطو الاصفر وعمل فيها كروموا وفضل يقولنا العسس بيتعسس عليكم بس احنا الحقيقه نفضنا للعسس وقعدنا ناكل السندوتشات بقى ههههههههههههههه

ابراهيم مواطن شوجاع هادي اوي وادار نقاش حلو اوي عن اهمية اللقاءات والى اتكلمنا فى كتير على اثر شوية كلام مفقع اتقال قبل اللقاء بتاعنا وكلنا تقريبا اتفقنا على ان السبب الاساسي لاننا بنعمل اللقاءات دي هى اننا بنحاول نعرف بعض وتحويل الشخصيات المجهوله لبعضها والعالم الافتراضي الى واقعي يعنى الهدف الاساسي اننا نتعرف على بعض

نعمل بقى نشاط خيري ما يضرش نناقش افكار معينه ما نقولش لا نتفق على اي مشروع ادبي ولا غيره نعمله سوا برضه ماشي الحال
لكن كلنا تقريبا فعلا جايين اللقاء عشان تعرف بعض بكل احترام وادب ورقي فعلا ربنا يكرمكوا يا شباب انتم تفرحوا بجد


محمد انها حياتي كنت حاسه انه قاعد فى كورنر مركز مع الكل وبيتعرف علينا كلنا واتمنى تنشط مدونتك وتكتب وتبقى تعلق عندي عشان اعرف مكانك

محمود حشمت وبوكيه ورد والعرضحالجي جم متاخرين شويه لكن اتشرفنا بمعرفتكم ونورتونا

اه نسيت اقولكم مصطفى فك زنقه ومحمد شحاته كانوا جايبين معاهم اخواتهم البنات بنتين عسولين كده وهادين وصغننين يا اخواتي
بس يا عينى احنا انقضينا عليهم فجأه خضيناهم ليه بقى

احنا ساعة صلاة الجمعه خلينا الرجاله راحوا صلوا هما فى المسجد الى بره وقلنا لهم احنا هانصلي هنا فى مسجد النادي وبعتناهم وقلنا لا يونكن ابدا نضيع الفرصه العظيمه دي ونحقق امنية حياتنا ونرغي ونلك لك حريمى براحتنا شويه شوية اكشوجين يا عالم

وهاتك بقى يا رغي وفجأه البت شيماء قالتلي بؤين فى ودني قمت انا وهى مبرقين للبنتين يا عينى واشارنا اليهم باصابع الاتهام وقلنا خيااااااااااانه العيال دول اخواتهم من الشوباب الى معانا وبعدين بقى هما يا قلب امهم اترعبوا وقالوا اطلااااااااااقا احنا مش من معسكر الاعداء فقولنالهم بقى ماشي زي بعضه بس على الله الاقي كلمه راحت كده ولا كده هاتتقتلوا انتم على طول هههههههههههههههههههههههه

انا بقى حكيت للبنات حواديت حلوه اوي وتركيزا على قصص الناس الى استهبلوني على النت نظرا للاحداث الفائته القريبه

اه وشمس كلمتنى فى التليفون وعرضت عليا الحمله بتاعتها الى هى لا للخداع والكذب على النت عايزين نت نضيف
طبعا انتم عارفين الحمله دي جت على هوايا موت واتناقشنا فيها مع الناس امبارح شويه وان شاء الله نروح لشمس الى نورت البلوج نشوف ايه الموضوع

واتصل علينا حازم من غزه ربنا يكرمه والله كان الواحد حاسس انه معانا بقلبه فعلا رسايل واتصالات وكان منورنا

وعاشقة الرومانسيه كلمتنا برضه وتامر الى كان بيقولي هو انتم عملتم اللقاء بصحيح ؟؟!! ومش فاهمه لحد دلوقتي يعنى ايه

وقبل التجمع بيوم اتصل عليا الاستاذ محمد مدونة شوية كلام واتمنا لنا لقاء سعيد ربنا يكرمه اتشرفت باتصالك يا فندم

اه ورييييييم الي هاتضرب لو ما شوفتهاش بنتها تعبت وما جاتش ربنا يشفيها هى ومريم بنتى بس كلمتنا فى التليفون حقدت علينا بكفايه

المهم بقى ان انا كنت اكبر واحده فى اللقاء تخيلوا ؟؟
مع انى عندي 18 سنه زي ما انتم عارفين وكل شويه البنات يقولك الكبير الاول قولي يا صبرني حتى فى الصلاه انتى الكبيره صلي بينا اقولهم يا كلااااااااب انا عندي 18 سنه مافيش فايده
اه وبالغيظه فى كل الى ما جوش انا كنت عامله كيك بالشيكولاته واكلير بالجبنه وكانوا حلوين اوي
وابراهيم استولي على باقي العلبه وقالي هانقنق واحنا فى المركب ههههههههههههههههه


بتهيئلي انا قلت كل حاجه اهو عشان ستيته كانت هاتضربني من شويه عشان ما حدش اتكلم عن اللقاء

وشايفه البت شيما عماله تعض على صوابعها من الغيظ وتقول كده يا صبرني بتحكيلهم ليه مش انا قلتلك ما تقوليش حاجه خليهم على نار
هههههههههههههههههههههههههههه

احب اقولك هى دي النداله يا حبي ايه رايك فيا وانا ندله نيهاهاهاهاها

بس خلاص وعقبال كل مره







هناك 77 تعليقًا:

بدراوى يقول...

البوست ده
جاى فى وقته
لإنى صراحة مروح من اللقاء شايط
و ندمان اساساً انى جيت
بس البوست هدانى شوية

ربنا يديم المعروف دايماً

الشعب لابد له من حكومه تشكمه يقول...

اعمل فييييييييييكى اييييييييه بهدلت صوابعى عض من الغيظ..هههههههههههه
مش قلت محدش يحكى عن اليوم خلي الناس كده على ناااار:))

ماشى ياصبصوبتى ,,بس ضحكتينى مووووووووووت لما اتكلمتى على البنات اخوات الشباب هههههههههه,
اصلهم خافوا مننا اوىىىىى وخوصا لما شاورنالهم على رقابتنا,
اى هتضيع رقاب لى كلمه راحت كده ولا كده,دى قاعده حريمى ونم وما ادراكى ما النم,

** واه محمد عمود نور ال منصوره ال وفى الاخر اكتشف صدفة انه بيتمحك فينا:))
بس اييييييه شوفتينا واحنا بنقوله بطل التماحيك دى:)

**ضحكتينى مووت على حته حلم كان فى المسجد,ههههههههههههه..وبرضه مش هقول انا كمان طبعااااااااا:)

**ابراهيم باه والعسس ,شوفتيه وهو رايح يبيعنا ويقول انا ماشى :))قلبه اسود على فكره مع اننا قلناله خلاص حقك علينا مش هنغلس تانى ,بس نعمل ايه مسامحناش وقال انه هيمشى ويسيبنا مع العسس.:))

**بالنسبه لكيك الشيوكولاته والمركب احب اقولك انه اتنسف يازعيم,,الشوباب اكلوه وكان ناقص ياكلونا بعده هههههههه..
تسلم ايدك ياصبصب بجد تحفففه..
على فكره بعد ممشيتى انا كنت حاسه ان ناقصنى حاجه:( ينفع كده؟؟
وفى المركب قعدت كده عماله هاتلوى صبصوبتى.:)
ال سلامه على مريومه ..

** اخواتنا الشوباب باه واحنا بنصلى العصر سمعنا صوتهم جايب اخر الدنييااااا وروحنا لاقيناهم بيتخانقوا .قصدى بيتناقشوا هههههههههه.عصبيين اوى فى المناقشات,ههههههههه..

***اهو تعليق نص صفحه علشان انا مش هتكلم عن اللقاء فى بوست عندى لييييييييه,,
يمكن علشان كله متوقع كده وانا محبش حد يتوقع منى حاجه لانى بعمل عكسهاعلطووووووووول.
فعلشان المتوقع ده مش هكتب:))

lostlove يقول...

السلام عليكم
انا مش عارفه حاجه
بس المهم شكلها كانت مقباله حلوه
تحياتي ليكي
واتمني التوفيق

الشعب لابد له من حكومه تشكمه يقول...

بدراوى,مروح شايط ههههههههههههههه.
تستااااااااهل قلتلك خلاص اقفل المناقشه كل واحد وعرض وجهة نظره ومش هتوصلوا لحل وسط وكل واحد حر فى رايه,,
تروح تانى تفتح الموضوع هههههههههه يقوموا هم يتعصبوا فى المناقشه :))
تقوم انت ترد يقوموا هم يردوا .

صاحب رأى يقول...

طبعا كان يوم جميل جدا
وكنت زعلان من نفسى انى اتأخرت فى الحضور بس غصب عنى

والله يا بدراوى انت روحت شايط وفى ناس تانيه روحت شايطه والحمد لله انى روحت مبسوط والله لانى عرفتكم :)

بـــــسمة انـــــــــور يقول...

خالتو صبصب ياقلبى
انا فعلا مكنتش على طبيبعتى وانا كنت حاسة نفسى كده فعلا
بس حصل معايا موقف بايخ على الصبح وانا جايه فى الطريق وترنى طول اليوم ونكد عليا اووووى
وزعلت من نفسى اوى لانى فعلا مكنتش قادرة اسيطر على قلقى وتوترى ده

ان شاء الله ملحوقه يا قلبى
والمرة الجايه هيبقى فى مفاجآت ان شاء الله

وبجد اسفه جداااااااااا
مسلمتش عليك وانا ماشيه
مأخدتش بالى والله مكنتش مركزة خالص وكنت تايهة خالص والله
كنت ناويه تصل عليك اكلمك اسلم عليك فى التليفون بقى بس برضو معرفتش
معلش يا قمرة

بس بجد بجد انتى حد طيوووووبة اوى وحبيبتك اوى
حسيت انك اختى الكبيرة
وكن نفسى اقعد ارغى معاك بس الفرصه مسمحتش بقى

ستيته حسب الله الحمش يقول...

يعني
اهو كده شبه معقول
بس شيما طلعت سيماوية النظرة حادة الطباع
بقى يا شيما عاوزانا نفضل على نارنا؟
حاضر
صبرك علي
بس اشوفك بس

اه تنبيه لكل مدون ومدونة باسمه
غير مسموح ان صبصب يتقال لها خالتو والكلام ده
فاهمين
صبصب لسه صغنونة ياض منك ليها
دي بالكتير ندلعها
دي 18 سنة والا انتو بتستهبلوا؟
ميرسي على الوصف التفصيلي يا جميلة
بحبك يا ولية يا صبصب جدا
وبحب البه شيما رغم انها ها تتعض
وسلامة مريم ألف سلامة عليها

amany abdel_rahman يقول...

السلام عليكم

إزيك يا أختى بما إننا 18 زى بعضينا

فكرانى

أنا واحده من اللي هددتونا بالقتل أنا أخت محمد شحاته

أنا وعدتك إنى مجبش سيره علي اللي حصل بس إنتى كده عرفتيهم إن في سر

يعنى ممكن أعترف بالضغط ربنا يستر بقي

وهو بجد كان يوم جميل جدددددددددددددا

وألف سلامه علي مريم ربنا يشفيها

ولازم لازم تقولي علي اللي حصل مع مى في الجامع

لقول أنا

وفي الأخر إحنا مخفناش من التهديد علي فكره إحنا إترعبنا بس

إحنا ناس جامده أوى

تقبلي مرورى

سلاااااااااااااااااموا عليكووو

شمس النهار يقول...

ازيك

سلامة مريم الف سلامه

وواضح ان اللقاء كان جميل
ربنا يسعدكم
اجمل حاجه اننا نتقابل ونعرف بعض حتي من باب التأكد ان المدونه مدونه والمدون مدون:))

سلام

قلم رصاص يقول...


نار مين يا اختي منك ليها
لالالالالالا دانتوا فاهمين غلط خالص..الوهم ساعات بيعمل حاجات عجيبة في بنات حوا

انا مثلا يعني ..اهو مجيتش ..ومع ذلك عادي جداااااا ولافي دماغي .. لأني عارف اني هعوضها في لقاء تاريخي ..أما لو حضراتكم بقى واخدينها تحدي ..فانتوا مش أدي ولا أد أي حد أدي هههههه

يا ام مريم ..سلامة مريم ألف سلامة ..يارب تكون كويسه دلوقتي يارب

18 سنة بس ..ياحلاوة .. وانا اللي كنت فاكرك 18 ههههههههههههههههه

انا حقدي الوحيد على الكيك بس
لكن ده حقد مؤقت ..ينتهي بمجرد مايتعمل لي زيه في البيت ^_^

الحمدلله ان اللقاء كان ناجح وتم على خير

وحقيقي سعيد بكده ..وربنا يوفقكم دايما

في حفظ الله

همس الاحباب يقول...

ههههههههه
الحمد لله ان اليوم كان جميل
ودايما متجمعين فى الخير يا خالتو
هههههههه
ولا بلاش خالتو ماشيها يا طنط
علشان خاطر د/ ستيته
كا سنة وانتم بخير

كاتب مصري يقول...

لا كده هزعل زعل ملوش حدود هههههههه بأه المرة الي فاتت أطلع معنديش دم ومتبرعتش بدم والمرة دي أطلع بضرب ع الكيك وأبيعكم ههههههههههههههه كده غلط على الزلط على فكرة وخدو بالكم بأه انتو عملتوا فيا امبارح حجات تخلي الواحد يشييييييييييييييييط ومع ذلك قلت المسامح كريم

بس الظاهر كده المسامح ده مش أنا ولا أعرف حد اسمه كريم ههههههههههههههههه

كان يوما لذيذا بطعم الشكولاته بتاعتك يا بنت ال18 سنة الي مزادوش من لما عرفتك ههههههههههههه لولا ان كذا حاجة عكرت مزاجي وحرقت دمي وهي الجدال بالباطل في موضوعات قتلت بحثا والدين مفيهوش رأي يا عمنا وقفل ع السيرة لأحسن العسعس لو كان سمعنا واحنا بنتخانق في الدين كانت ختبقى مصيبة وكنا هنتمسك متلبسين بيقولوا الله ههههههههههههههههههههههههههه

أما عن الي عملتوه فيا امبارح ده فللأسف فعلا لفترة ما زعلت وحسيت انه مكانش يصح أبدا خاصة اننا معانا ناس من محافظات أخرى فرجتوا مصر عليا وبقيت مسهوك دوت بلوجسبوت وبقت فضيحة ههههههههههههههه

الله يسامحها شيما خلت عمود النور نزل ع الأرض من كتر الضحك ..

يلا المسامح إبراهيم وبما إني ابراهيم فسماح يا أبله صبصب وسماح يا شيما المرة دي بس موعدكيش في المرات التانية هيجرى ايه


تصبحوا على خيييير

أحمد عاطف يقول...

ربنا يسعد كل ايامكم

هاقولك زي فيلم الطريق الى ايلات

يارتني كنت معاااااااااااهم

أحمد عاطف يقول...

صحيح يا ام مريم عايز رايك في المدونة الجديدة لو سمحتي

http://eid3laeid.blogspot.com/

فاتيما يقول...

ربنا يكتر من اللقاءات دى و دايما تكون حلوة و محترمة كدا و أعرف آجى المرة الجاية عشان المرة دى إتاخدنا على مشمنا و ملحقتش أرتب حالى ...
بصى ياصبصوبتى
بورسعيد يوم 29 /1 إن شاء الله
رتبوا إنتوا لقاء الشهر اللى بعده
و بعد يوم 25 ف الشهر نكون قبضنا
ماشى
ربنا يحييناو نقدر نيجى
كان نفسى أشوفكم قوى ..
بس ملحوقة و اللقاء الجاى أنا اول واحدة إن شاء الله
كلكم وحشتونى قوى على فكرة
خالص حبى يا حبيبتى

حـــلـــم كــــان يقول...

كده ياصبصب

مكنش العشم

ماشى كاشى

ضحكتى شيما عليا

وكمان امانى

رغم ان كان المفروض ناخدها من الاسره

بعد ماكنتشفنا انها جاسوسه

اولا الف سلامه لمريم عايزه اطمن عليها


ثانيا بصراحه انا المره دى عرفتك اكتر

بس والله العظيم حبتك جدآآآآآآآآآآآآآ

للدرجه كبيره

وحبيت الاكلير بالجبنه بتاعك

ولاالكيكه مش قادره اقولك

ومتخفيش الكيكه اللى كانت مع

ابراهيم اتصدرت على المركب كله

بس بجداستفدت من كلامك وخبراتك كتير

انتى اينعم عندك 18 سنه ومش باين

عليكى بس عندك خبرات انا استفدت منها ده غير خفه دمك اللى خلتنى طول الوقت اضحك

بجد كان يوم كنت هندم كتير لو مكنتش موجوده
لانه فارف معايا جامد

ده كفايه اكلير الجبنه

Mr.Hazem يقول...

مساء الخير
بداية انا سعيد جداً بأني حاولت اشارككم اللقاء من خلال اتصالي بيكم من غزة ..
بجد انبسطت كتييير لدرجة اني حسيت نفسي موجود بيناتكم ,, سمعت صوت المدونين بيرغوا بالحكي ههههه
كنت اتمنى اني بالفعل اكون ولكن للأسف دائماً نمنع من ابسط الحقوق التي يجب ان يتمتع بها كل انسان

ولكن صدقوني فرحتي لا توصف
فأشكرك لحسن استقبالك اتصالي , واشكر شيما ..
وان شاء الله بنكلمكم باجتماع قادم :)
ارق نسمة

الشعب لابد له من حكومه تشكمه يقول...

دكتوره ستيته:
انا سماويه ههههههههههه,وبعدين انا لو اعرف ان دى اوامر من حضرتك طبعااا مقدرش اتكلم,,
وهمووووووووووووت واشوف حضرتك والله وجبت سيرتك كتير:) كالعاه كل لقاء اقول هاتولى دكتوره ستيته:)




ابراهيم:
قلت خلاص باه حقك عليا:)
مش هقولك مسهوك تانى ههههههههههه.وبعدين انا اعمل ايه يعنى محمد(عمود نور) هو اللى كان هيغمن عليه من الضحك ذمبى انا؟؟؟؟؟؟؟؟؟؟؟؟
بس خلاص والله مش هقولها ادام اى حد تانى,
هقولها بينى وبينك هههههههههه.

بدراوى يقول...

ممكن الموضوع بتاع الحديث عن السلام و تضييق الطريق
حضرتك تجبيلى لينكه عشان فيه اخت مدونة عاوزاه

قصدى عاوزه دليل انهم موجه لموضوع
يهود بنى قريظة

الازهرى يقول...

للاسف كنت مشغول كتير
بس الحمد لله
لو كنت اعرف انكم هتقعدوا لبعد الجمعة كنت اتصلت على الاقل بس توقعت ان اخركم الجمعة وكل واحد يروح بيته وهترشوا ميه وكلام من ده
وانا قبل الجمعة كنت مشغول كتير

خيرها فى غيرها ان شاء الله

شمس النهار يقول...

اه نسيت اقول لك

الاغنيه ناااااااعمه وجميله


عجباني انا كل شويه ادخل اسمعها

رامز عباس يقول...

بجد ربنا يبارك فيكن يا شباب وشابات المدونين

بصراحة الوصف يحسس الواحد أنه كان معاكم

مع أنه كأول لقاء هيبقى فيه كسوف يعنى علشان ناس لأول مرة بتشوفهم


لكن أنا متحير خالص
بعتلكم رسالة أسلم عليكم

أقصد من خلال هاتف أم مريم
ومحدش ولا رد ولا سلم

دلوقت عرفت هى مردتش ليه
فالف الف الف الف سلامة لمريم
والله يا ام مريم او مرة اعرف ان عندك مريم


روحى ربنا يخليهالك ويباركلك بأسرتك الجميلة


وانا يا ستى مقدرش غير انى ابعت رسايل فقط

لظروف وانتى عارفها


وانا كنت بتصل لان محاضرتى خلصت فصليت وفضيت فقعدت أرن يمكن تردى فأحضر
واتعرف بيكم

مع اننى من البوست بتاعك عرفتكم خلاص

وانتم كالتالى
معسكر اصدقاء
معسكر اعداء
بدراوى شايط
ابراهيم مسهوك
عمود نور وقع من الضحك
شيما سماوية

كيك بيتاكل على المركب
اشطة ويجعله عامر

رامز عباس يقول...

بس وصفك لبدراوى غريب أوى ده يوم لقاء بالقاهرة


كان معانا وهادىء جدا ومتكلمش حتى

كان بيلعب بموبايله هههه

صبرني يارب يقول...

بدراوي

ليه مالك شايط ليه ياعم ده انت شيط الناس كلها اصلا
هههههههههههههههههههه
روستخ روستخ يا زكي روستخ
نورتنا يا بداروي

صبرني يارب يقول...

شيماء

والله قعدت كتب واضحك واقول شيماء ه اتقطعني

هههههههههههههههههه

كان يوم جميل برضه يا بت سيبك انتى

صبرني يارب يقول...

لوست لوف

الحمد لله ونورتي يا جميل

صبرني يارب يقول...

صاحب راي

انت شرفتنا والله وربنا يكرمك

بدراوي هانقعده على الكرسي ا لكهربائي

نهر الحب يقول...

والله كان نفسى جدا اكون معاكم
لكنى حظى وحش
ان شاء الله المرة الجاية اشوفكم على خير
تحياتى وحبى لاولادى بلدى

احبكم فى الله

صبرني يارب يقول...

بسمه انور

ايه ده خالتو كمان حصلللللللللت
باقولكم 18 سنه

يلا مش مهم خالتوا خالتو اهى تمشي برضه

ياجميل كان مالك

ايه الى وترك بس وانا عورهولك

عموما كرسي الاعتراف مستنيكى على الاميل

انتى عسوله يا بسمه والله

صبرني يارب يقول...

سوتيته حيااااااتي

اه شوفتي يا اختي العيال عايزين يكبروني
هههههههههههههههه

يلا اهم برضه من دور اولادنا

والله يا ستيته وانا كمان باحبك اوي

يارب اشوووووووووفك بقى

صبرني يارب يقول...

اماااااااني

ههههههههههههههههههههه اه فاكراكي طبعا

يا جامد انت يا جامد بس خافي يا بنتى احسن احنا مفتريين
ههههههههههههههههههه

نورتي يا جميل

صبرني يارب يقول...

شموسه حياتي

ربنا يخليكى يارب


يارب اشووووووووووفك بقى


بس ايه رايك فى الاغنيه جامده جامده

ده انا مش عارفه اغيرها من ساعتها يا شموسه والله

نورتي يا جميل

صبرني يارب يقول...

قلم رصاص

المفروض ياعم كنت توصي صلاح يشيلك حته

وانا مالي بقى انا عملته وسلمته لهم هناك

بالغيظه فيك اللقاء كان جميييييييييييييل

صبرني يارب يقول...

همس الاحباب

ههههههههههههههههه

ماشي ياعم الى يجى منك كويس طنط خالتو كله كويس

كان اليوم ناقصكم والله

صبرني يارب يقول...

كاتب مصري

مالكش حق تزعل والله يا ابراهيم

يا راجل انى كنت باضحك معاااااااااااك

ههههههههههههههه

والله بنهزر يا ابراهيم معلش يا ابنى الى يقعلنا كده يا اخويا

وانت برضه حووووووونين بزياده يا جدع

اوعى تزعل يا ابرااهيم بجد ده انت غالي علينا يا راجل

صبرني يارب يقول...

احمد عاطف

ما جيتش ليه يا اخويا ولا هو كلام وخلاص

ياريتك كنت جيت


والمدونه الجديد والله وصلني خبر ريم قالتلى بس اعمل ايه والله انا محتاسه على الاخر

عنيه حاضر هاروح طبعا ما افوتش ا نا انت عارف

صبرني يارب يقول...

فاتيما

والله ا لعظيم كانت ناقصاكي الحكايه

ويا سيتى قبض ايه طيب والله لو كنتى قلتى بدري كنت اجلته مخصوص عشانك وربنا

ولقاء بور سعيد صعب انى اجي الله اعلم

عموما اشوفك يا جميل على خير قريب ان شاء ا لله

وعايزه اطمن عليكى بقى طمنينى عليكى يا جميل

صبرني يارب يقول...

حلم كان
ههههههههههههههههههههههههه

ايه رايك مش متوقعه انا كده على طول

هههههههههههههههههه


انا كمان يا جميل والله حبيتك

بس شوفتي بقى خبراتي هههههههههههههههههه

افتكري الجمايل

صبرني يارب يقول...

حازم

والله واحنا فرحنا جدا بمكالمتك وبجد كنا حاسين انك معانا بقلبك

ربنا يفك عسيركم يارب

صبرني يارب يقول...

بدراوي

عونيه لك يا فندم

اهو اللينك

http://islamic-vision.blogspot.com/2008/05/blog-post.html

صبرني يارب يقول...

الازهري
اطلع من دول شكلك حبيت توفر المكالمه
هههههههههههههههه

ان شاء ا لله المره الجايه تنورنا

صبرني يارب يقول...

رامز


والله يا رامز ما خدت بالي من موضوع الرساله

عارف التليفون كان بيلف على الناس طول الوقت

معلش والله غصب عني

ومتشكره اوي لاهتماك يا رامز والمره الجايه تكون معانا ان شاء الله

صبرني يارب يقول...

نهر الحب

والله يا جميل كانت القاعده ناقصاكي فعلا

معلش ا لمره الجايه هانجيبك بالبوليس

نفسي اشوفك يا ايناس والله

مواطن شووجااع يقول...

كان يوم جميل بجد

تعيشي حضرتكـ وتعملي الكيك

ونعيش إحنا ونحضر لقاءت تانية ونأكل الكيكـ

صبرني يارب يقول...

مواطن شوجاع

الف هنا يا ابراهيم انت تنوووووور

أحمد شريف يقول...

السلام عليكم

ربنا يديم جمعكم هذا في الخير والحب والعطاء والتواد والتراحم

دمتم جميعاً بكل ود

أم مالك يقول...

الحبيبة صبرنى
الله ياحبيبتى وصفك جميل وفعلا الوصف
بعد القاءات بيخلى الناس اللى محضرتش
كانها ذهبت
فعلا القاءات ديه جميلة وفعلا انا نفسى اشوفك واشوف البت شيما العسل ديه
ربنا يسهل ونعمل لقاء تدوينى شامل
نشوف فيه كل الحبايب
الف سلامة على مريم وياريت تطمنينى
عليها وياترى التليفون المكتوب ده
علشان القاءات فقط علشان نفسى اسمع صوتك مش عارفة ياصبرنى كل مدى باحس
انك حد حلو قوى
ربنا يحفظك انتى واسرتك من كل سوء
ودايما مجمعين فى الخير

صبرني يارب يقول...

احمد الشريف

متشكره اوي وربنا يكرمك

صبرني يارب يقول...

أم مالك

والله يا حبيبتى وانا نفسي اشوفك واسمع صوتك

وياريت تكوني انتى تمام ونطمن عليكى

عموما يا ستى هو التليفون ده انا بافتحه فى التجمعات بس

بس يعنى افتحولك مخصوص على ما تكلمينى واديلك رقمي

او كلمينى على الاميل لو حبيبتى

sbarny_yarb@yahoo.com

هاتشرف بيكى يا قمر

mahasen saber يقول...

طب انا كنت جايه زى ما قلتلك بس حصلت اعاجيب اعاجيب
كنت فى القاهره بحضر حفلة توقيع كتاب مصطفى ريان وبعد كدا روح وديت بيرو لجده وجدته ونزلت من هناك متأخر وطبعا ماما شحورتنى فى التليفون وقالتلى باتى عند اختك واختى اصلا مش فى البيت دى عندنا فاخدت مفتاح شقتها واستوليت عليها
وطبعا طول اليوم الليى هو الجمعه كنت فى القاهره المهم وانا بخلد الى النوم قلت حلو ااقوم على المنصوره ومنها للشرقيه
بس طبعا صحيت من القاهره على الشرقيه

وتتعوض فى لقاء اخر ان شاء الله قوليلى بئا هتضربى ولاا قلبك ابيض

بس والله يا صبصب كان نفسى احضر عشان اشوفك يا حبيبتى انتى رؤيتك عندى غاليه قوى قوى وتستاهل انى اتشحور عشانها

فتاه من الصعيد يقول...

كل لقاء وانتم بخير :)

تحياتي

اللى موش عارف يتغير يقول...

ايه الموضوع
المنصورة كلها مدونين ولا ايه ؟
ياريتنى كنت موجود
كنت هكون موجود معاكم طبعا
تقبلى تحياتى
ده مرورى الاول
.

صبرني يارب يقول...

محاسن

يا جميل والله وانا نفسي اشووووووفك بجد

ومعلش بقى ما كانش فى نصيب

كيمو قالي انك مش جايه وقلت اكيد تعبت من سفر القاهره وكده

ربنا يسهل ونشوفكم كلكم اصل خلاص هاعيط بقى

محمد فؤاد (صاحب عمود النور) يقول...

بقى هى كدا؟؟
تماحيك ايه بس واللهى انا من المنصورة.. لااله الا الله اتمحك ليه على العموم انا اصلا بحب الصاعيده هههههههه

كان يوم حلو قوووى وقاعدت انا ودعاء ومى نصور تصاوير حلوة قوووى..

انا عارف ياصبرنى انى شديت كتير مع بدراوى بس هو فعلا استفزنى انا وابراهيم وصلاح مسدس صغير بس انا كنت متعصب اكتر منهم بس ف الاخر انا كلمته عادى وواضح كمان ان الموضوع اللى اتكلم فيه ماينفعش اى حد يرغى فيه اصلا لانه مش عالم دين ولا سنه صح؟

ان شاء الله انا هبدا احط خطة للكتاب فى الفترة الجاية وهبعتهلكوا ان شاء الله وربنا يقدرنى واقدر ارتب اللى انا عايزة واعمله

ملحوظة: الكيكة كانت تحفة تسلم اديكى (صبرنى يارب)

الحظ اللى خلانى اقعد قدامك وكانت رؤيتى صح لما قريت مدونتك وشفتك ع الحقيقة وشفت انفعلاتك وطريقة حوارك( شيما )

اعجابى الاساسى بمدونتك وشعرك وافكارك كل دا كانت نتيجة طبيعيه للكميا اللى حصلت بينا واخدنا ارقام تليفونات بعض ( صلاح مسدس صغير)

هدوئك وانطوايتك استفزونى انى اتعرف عليك واقتحمك (محمد عبد الرحمن)

دكتورة دكتورة دكتورة زهقت من الكلمة دى طول النهار فى الصيدليه وكمان مع صحابى... دى اول كلمة سمعتها منك لما كنا ماشين ع النيل دا غير كدا اننا اتفقنا فى الصورة وطلعتى بتحبى التصاوير زيى وفنانه كمان(دعاء سلطان مجرد حلم)

بص انا عارف انك فعلا كويس وبتعمل حاجات كتير بس بلاش تحكى كتير عشان الحسد صدقنى دى محبة..الكلام دا قولته لمحمد بعد رحلة النيل ويارب مايزعلش منى لانى كنت بقولهوله من قلبى
(محمد كامل)

الهدؤ والعقل والثبات والكلام الجانبى هى وشيماهههههه ربنا بجد يحفظك (سارة طوبار)

تلقائية الاطفال ( مى-حلم كان)

كان يوم حلو قووووووى وياريت يتكرر تانى

Anonymous يقول...

من خلال منبركم الرشيق اهنئكم بالعامين الهجري والميلادي الجديدين وامتني من الله دوام التألق لكم وتحياتي الخاصة لكم
عبد الجليل

صبرني يارب يقول...

فتاه من الصعيد

وانتى بخير يا جميله ونشوفك ان شاء الله

صبرني يارب يقول...

الي مش عارف يتغير

اه والله اكتشفت اننا كتير اوي

الحمد لله ربنا يزيد ويبارك

كان معانا من بلدكم اثنين صلاح وساره

المره الجايه ان شاء الله تشرفنا

نورت فى مرورك الاول ودايما منور

صبرني يارب يقول...

عمود نور

ايوه ياعم حبهم على ادك هههههههههههههههههههه

انا بس صعب عليا انكم ماتكونوش زي ما حبيت اشوفكم فىاختلاف الراي

بس عموما لسه قدامكم الدنيا طويله واتمنى تتغيروا فى الناحيه دي


وتعليقات على الناس حلوه اوي على فكره وعاجباني وواصفهم حلو

وهات الصور ما تدكنش علييهم اصل بعدين احرمك من الكيك بعد كده
ههههههههههههههههه

انا شرفني بجد التعرف عليك

صبرني يارب يقول...

استاذ عبد الجليل

حلوه الرشيق دي يا استاذنا

وكل سنه وحضرتك بخير وهنا يارب

reem يقول...

الاول الف الف سلامة على مريم

انا كنت زعلانة جدا يا بنتى كل لقاء مش اعرف اجى كدا

وكنت هاتجنن واشوفك انتى وشيما وكل الموجودين

وكمان عامله كيك وبتغيظينى ماشي يا صبرنى

المهم بجد انه كان يوم جميل وربنا يجمعكم دايما كدا على خير بس اكون معاكم المرة الجايو احسن والله هاحسد بجد

reem يقول...

على فكرة هى المرة الجاية مش الجايو بس معلش السن بئا انتى عارفه


بردو 18 ومش بيزيدو

محمد فؤاد (صاحب عمود النور) يقول...

شيما...

بقى انا عمال اقول فيكى شعر وانتى كاتبه انى بتمحك هى بقيت كدا.؟؟ ماشى يا بلد هههههههههههههه

محمد فؤاد (صاحب عمود النور) يقول...

يعنى انتى ماسكانى من اول البوست بتتمحك فى المنصورة بتتمحك فى المنصورة وبعد كدا تقوليلى هات الصورة ..؟؟

هى مش بلدك؟؟ طيب روحى بقى انتى زى الشاطرة صورى الصور اللى انا ثصورتها هههههههههههههههههه

ياسلام من عنيا الاتنين هبعتهملك ان شاء الله فى مقابل الكيكة هههههههههه

الشعب لابد له من حكومه تشكمه يقول...

محمد فؤاد:(عمود نور)

بضاحك معااااك وازيكن ازيكن:))
بس دا ميمنعش انك بتتمحك يامحمد,,انت دقهلاوتش ولست منصورتس...
بطلوا باه التماحيك دى فينا..:))

مبسوطه انى عرفتك بجد وانت حد هايل..مستنين موضوع الكتاب ياليدر,,اى يازعيم..

فشكووول يقول...

السلام عليكم صبرنى

ايه اللقاء اللى طلع لنا فجأه ده
من غير حد ما ياخد خبر .. صحيح النت عندى هو اللى غلطان عشان كان قاطع من يوم الاحد 20 ديسمبر .

بس الحمد لله عشان انا ما حضرتش اصل كنت حابقى اصغر واحد فيكم يعنى انت 18 سنه وانا 17 سنه

ان شاء الله لازم اروح اللقاء القادم مع انى تقريبا فى المنصوره كل يوم اثنين او بالكتير اثنين بعد اثنين

تحياتى

مجرد حلم صغنتوت يقول...

كان يوم حلو اوي
كنت محتاجة يوم زي ده في وسط جو الاكتئاب المحيط.. بجد نسيت كل حاجة وانا في اليوم ده :)
الاكل كان جااااامد جدا.. تسلم ايدك بجد
والصور هبعتهالك حاضر...بس اللي معايا مش كتير على فكرة.. خليكي ورا محمد علشان يبعتلك اللي معاه بقى

رحله البحث يقول...

السلام عليكم
يارب دايما متجمعيين كلكم
وفعلا فاتنى اليوم لكن الجيات اكتر ان شاء الله
تحياتى للمنصوريين احبائى كلهم ولكل المدونيين بشكل عام

صبرني يارب يقول...

ريم الله يسلمك يا جميل

مريم الحمد لله بقت كويسه

وان شاء الله المره الجايه بقى هانموتوكي يا شابه

وبعدين مش معقول كلكم طمعانين فى السن بتاعي يعنى
هههههههههههههههههه

وحشاني يا جبانه ا ظهري بقى

صبرني يارب يقول...

عمود نور

فى ماقبل الكيكه ؟

شوف المبدأ الميكافيلى الصارخ بقى

نفعي نفعي يعنى

ماشي ياعم هات الصور يلا بقى

بت يا شيماء شوفي شغلك معاه ولاا عرفه
ههههههههههههههه

صبرني يارب يقول...

استاذ فشكول

والله لو اعرف ابلغك كنت بلغتك يا استاذنا هو احنا فى ديك الساعه برضه
هههههههههه

وبعدين بلاش تصغر نفسك يا استاذنا بلاش كده قول الحقيقه

انت قايلي عمرك 18 ونص ايه ده مش معقول كده
ههههههههههههههههه

ان شاء الله نشوفك قريب

صبرني يارب يقول...

رحلة بحث

متعوضه يا باشا ا ن شاء الله ربنا يسهل

فكها انت بس وخليها على الله اصلك مش عاجبنى خالص

صبرني يارب يقول...

مجرد حلم

والله ياا ختي وانا كمان بجد كان يوم حلو وخرجني شويه من كل حاجه

اصل انا عندي كمية حاجات مختلفه ماثره على اعصابي

برضه هاتي الصور الى عندك بس اوعى تكوني بتصوري الكوتشيات زي بدراوي انا باقولك اهو
ههههههههههههههههههههههه

محمد فؤاد (صاحب عمود النور) يقول...

شيمااااااااااا..

ماشى يا ستى انا دقهلاوى دقهلاوى وفخور كمان ومش هجيب سيرة المنصورة تانى فى اى حديث تلفزيونى او صحفى ههههههه
ليدر وزعيم حته واحده؟؟ هههههه ينهار ابيض دا وسام شرف على صدرى منك يا شيما .. الكتاب ان شاء الله هحط الخطة بتاعته وهبعتهالكوا ع الميل هبعته لكل الناس اللى معايا ايميلاتهم واخد بالك انتى يا شيما اللى ادونى ايميلاتهم هههههه
وهبعتلك الصور بس اللى انا صورتها ماكنش فيها حد كل اللى صورته كوبرى اللى بيعدى عليه القطر والنيل بس حد ليه فى المناظر الطبيعيه ؟؟؟

صبرني يارب يقول...

عمود نور

اااااااااااه قصدك ايه بقى حد له فى المناظر ا لطبيعيه

ها ؟؟
قصدك ايه اعترف بسرعه


ان احنا مش فناااااانين

لا ياعم لنا بلاش اوريك تصاويري بقى عشان ما تتعقدش
هههههههههههههههههههههه

انا عايزاهم

وبعدين ده صور بلدنا يعنى (ضحكه شريره مدويه )

محمد فؤاد (صاحب عمود النور) يقول...

اقصد المناظر الطبيعية ..ها ..مش فاهمه يعنى ايه مناظر طبيعية؟؟

يعنى النيل والخضرة اللى شفناهم فى النيل فى الرحلة النيلية مهو انتى ماكونتيش معانا ..

ابعتهم على انهى ميل؟؟؟

وربنا يخليلك بلدك ابقى اشوفك هنا فى القاهرة او أجا عشان ازيلك الزل اللى زلتهولى هههههههه ربنا ع الظاااااااالم هههههههههههههههههههه

صبرني يارب يقول...

عمود نور

فاض تكه واطلع المطوه بقى
ههههههههههههههههههه

اه والله المناظر الطبيعيه اه فاكراها
حدانا فى البلد بنقول عليها ناتيورال سينس

(وش مطلع لسانه )

الاميل اهو

sbarny_yarb@yahoo.com

ابعت بقى

عاشقه الرومانسيه يقول...

قطيعه تقطع الجواز والكل كليله
هو الموضوع ده ماله محاصرنى ليه كده؟
(وش هيفرقع من الغيظ)