الأربعاء، 17 فبراير 2010

مروه وامجد (الجزء الخامس والاخير )

سلام عليكم
اولا متشكره اوي اوي يا جماعه على التهنئه بتاعة عيد ميلادي ومتشكره يا ريم على الكلام الكتير عليا
ومتشكره يا واندا على التصييح هههههههههههه
ومتشكره لكل الناس
وعلى فكره النهارده مش بس عيد ميلادي ال31
لا عيد ميلاد المدونه كمان
والى عرفتنى بناس كتير اوي باحبهم ا وي وباحب وجودهم فىحياتي جداااااااااا
شكرا لكم بجد انكم هنا
******************************
وندخل على امجد ومروه وما تعيطوش من طول البوست بقى لانى كنت عايزه اخلص القصه النهارده
امجد ومروه بعد العتاب الطويل مروه اقتنعت انها برضه زودتها شويه وايه يعنى لما يوم ما يرنش عليها يرجع
وبرضه اتفقت معاه ما تبقاش كده وراه منين ما يكون وما تخنقوش واقتنعت ان زمان غير دلوقتي والحال اتغير ولازم هى كمان تتغير وتعقل بقى وتهدى و و و .....

وامجد برضه وعدها ما يزعلهاش تاني وانه ما كانش يقصد بس اصله متوتر شويه الايام دي وهى برضه ضغطت عليه و الى اخره من كلام التثبيت المعهود فى هذه الظروف .

وفعلا العلاقه بين مروه وامجد خدت بقى منحنى جديد ومرحلة جديدة .

مروه فى ازمتها الي فاتت ما كانتش بتكلم حد وما كانتش عارفه تشكي لحد غير ربنا . ولقت فى ده راحه نفسيه
وحتى بعد انتهاء المشكله قررت تكون اكثر علما بالدين وتتقرب لربنا اكتر وفى يوم من ذات الايام وبعد سماع خطبه للشيخ المشهور الى طالع موضه الايام دي (ايوه ايوه ماهو حسب الموضه كل حاجه فاكرين ايه ) راحت مروه قعدت تفكر وتقلب فى دمغها علاقتها بأمجد وقالت كما قال الشيخ يبقى انا باعمل حاجه حرام

وعليه قررت انها تقول لأمجد انهم لازم يبطلوا يتكلموا فى التليفون ويبطلوا سنسنه وفى الجامعه كمان مالوش لازمه بس كانت خايفه من رد فعله وحاسه انه ممكن يتصايق ومش بعيد يقفش معاها وتبقى موال

لكن برضه قالتله .... بس الى حصل ان امجد ما زعلش ولا حاجه بالعكس ده فرح جداااااا وشجعها وقالها انه طبعا ما يحبهاش تعمل حاجه هى شايفاها غلط وقالها بس هابقى اطمن عليكى كل فتره وكده يعنى وكان فرحان بها اوي ( زي ما يكون كان حاسس برضه ان دي حاجه مش صح ) وطبعا طبعا الموضوع ده استمر شهر كده وتدريجيا رجعت ريما لعادتها القديمه (تقريبا كانت الموضه راحت )



خلال السنه دي مامة مروه اصبحت عارفه وبدأت تسأل هو مين ومنين وفين وازاي و .............. ويقدر يعمل ايه وهايتقدم امتتتتتتته وهكذاااااااا من جميع مراحل التطور الطبيعى للحاجه الساقعه .

وطبعا كتير كانت بتزنق على مروه وتعمل معاها مشاكل وساعات تكون متعلقه بعلاقتها بامجد وتروح مروه تعيط لامجد والحقيقه كان بيزعل عشان مروه اوي ويتاثر ويتمنى من قلبه ان الايام تعدي عشان يخطبها رسمي ويرحمها من المشاكل دي .


وعدت السنه الاخيره من الدراسه له ولها اهدى فى العلاقه واركز كتير لا تخلوا من المشاكل بررررررضه والقفشات لكن بتعدي بقى زي ما يكونوا خدوا عليها وتحت شعار مرفوع من طرف واحد (مروه غالبا ) الى بيحب لااااازم يسامح امااااااال الحب يا اخويا الحب .

وخلصت السنه والحقيقه امجد كان متحمس وبيدور على شغل من قبل ما النتيجه تطلع ومروه كمان كانت بتدور على شغل
والنتيجه طلعت والقلق شغاااااال منها وطبعا هو حاسس بده .

ومامتها شغااااااله ضغط وزن وتضيق وكلام يسم .

عاشت مروه فى قلق شويه عشان كانت خايفه امجد يروح الجيش ويبقى كده الحكايه هاتطول اكتر لكن الحمد لله خدت تاجيل زي دفعته كلها تقريبا .

وامجد قال لاهله وابوه قاله يا ابنى مافيش مشكله بس اشتغل الاول بس كمان افرض هاتخطبها طب وهاتلحق ازاي فى سنه ولا اثنين توفر مصاريف الجواز انا برضه مهما ساعدتك مش هاقدر ده اصلا فى حال ان اهلها وافقوا على انك تخطبها سنه ولا سنتين


امجد طبعا طمن باباه انه ان شاء الله كل حاجه تمشي زي الفل وسمعه كلمتين كده من بعيد لبعيد انه من حقه ان اهله يساعدوه الدنيا كلها على كده دلوقتي امال يعنى هايعمل ايه؟؟؟؟!!!

ومامته قالتله طب يا ابنى مش تقولنا هى اسمها ايه ولا ابوها مين ولا ساكنه فين نسأل عليها ولا حاجه ؟؟؟

بصلها باستغراب واستعجاب وقالها نسأل عليها ؟؟!!! ليه هو انا باقولك انها واحده قابلتنى فى الشارع وبعدين هو انا هاتجوزها هى ولا هاتجوز ابوها واهلها ؟؟!!

عموما ماشي ماشي هابقى اجيبلك البيانات دي كلها

مامته قالتله تجيبها ؟؟؟ ليه هو انت ما تعرفهاش اصلا ؟؟!!!

قالها امجد : ...... لا طبعا عارفها .... هابقى اكتبهالك يعنى .

امجد باباه كان موظف كبير اد الدنيا مركز اجتماعي محترم جدا ومرموق ومامته كذلك وطبعا زي ما انتم عارفين حال كل من مثله هما مستورين الحمد لله .

مروه باباها كمان موظف ومن فتره كده كان سافر السعوديه عقبال عندكم وعمل قرشين حلوين وبنى بيت فى بلدهم حاجه زي الفل ومامتها ست بيت وتعز الدهب الى بيشخلل فى اديها مووووووت .

واشتغل أمجد فى شركة ادويه صحيح المرتب على صغير شويه بس لو صبر واجتهد فى امل وضعه يتحسن ده غير انه مافيش غير كده وهو لازم يشتغل عشان ما ينفعش يروح يقول لاهلها انا عاااااااااطل يا جودعان وعايزه ا تجوز بنتكم .

وبعد الترتيبات والحيثيات والسؤلات والاعتراضات

اه اهله كانه معترضين ومش عاجبهم باباه مش عاجبه انه يخطب بدري كده وهو لسه مش معاه ولا مليم ولا قبض ولا مره حتى
ومامته مش عاجبها النسب .... اه شكلهم كده يا امجد ناس بيئه انا سألت عليهم خلي بالك .

واهلها كانوا معترضين
باباها مش فاااااااااااهم انا اوافق ازاي على واحد ما عندوش شقه حتى يعنى هاتتجوزوا فين ؟!!!
مامتها : نعمممممم دبلتين وفاتحه والخطوبه بعد 6 شهور لا يمكن ابدااااااا لو ما كانش يجيبلك شابكه تضرب شابكة المزغوده بنت عمك الى اتخطبت الشهر ا لى فات انا مش هوااافق ابداااااااااااااا

الا ان امجد ومروه اصروا على موقفهم وضغطوا على اهاليهم لحد لما حددوا معاد يروح فيه امجد واهله بيت مروه

واتفقوا ان اول زياره تكون تعارف دون الدخول فى تفاصيل الا ان برضه الى فى نفس كل واحد فيهم كان طالع على وشه لا مش وشه بس كان فى كلام كده بيترمى فى الهوا زي الفل

بعد الزياره
ابو امجد مقاس بوزه كان مترين وربع . ومامة امجد بتقول كده يا امجد كان نفسي اجوزك واحده تكون بنت عيله كده واهلها يشرفوا دول بيئه اوي يا امجد شوفت الست مامتها والى كانت عماله تعمله بالغوايش الى فى ايدها وطريقة كلامها عامله ازاي
وابو امجد منفجرا : ولا ابوهااا ده كان ناقص يشتمنا يا ابنى . وبيكلمنا كاننا رايحين نشحت منه .
حاجه مش ممكن والله
وامجد عمال يصلح من هنا ويثبت من هنا ويسكت من هنا وهكذاااااااااااا

ابو مروه معلن عن البوز التمام اياه : ايه الكلام الفاااارغ ده . حتة عيل وما حلتوش حاجه وجاي عايز ايه مش عارف . وان شاء الله لو ابوه الى منفوخ ده ساعده فى الجواز هاتعيشوا ازاي بمرتبه ده ؟؟

مامة مروه بينها وبينها : هو ده الفالح الى انتى مصدعاني به . ايه ده يا بت ده ما حلتوش حاجه ولا الست امه دي يا اختي شكلها كده مناخيرها فى السما ومرسومه على الفاضي .
لما نشوووووووووف اخرتهاايه معاكي

ومروه بدورها بتصلح وتثبت وتزوق وتروق ويااااااااا مسهل

وفى اللقاء التاني :
الاتفاقات والحسابات كل حاجه تقريبا كان صعب الاتفاق عليها من اول الشبكه ومعاد الخطوبه ومعاد الفرح التقريبى والشقه الى هاتبقى ايجار مؤقت واتفاق الجهاز مين هايجيب ايه والمؤخر والخ الخ الخ الخ

وكل ما يصلحوها من ناحيه تبوظ من الناحيه التانيه وطبعا طبعا الحوار لا يخلوا من كلمه تلطش كده وعصبيه من هنا وزغدين فى جنب مروه ودموع محبوسه فى عنين مروه وتنهيده طووووووويله من امجد
وزعيق من هنا وشد من هنا وجذب من هنا وقلة ذوق ساعات وكلام رخم برضه ساعات والحقيقيه الجو كان مشحون جامد جداااااا

وانتهت الجلسه ولم يتفقوا تقريبا ولكن ارجأوا الامر لحين ا لتوصل لاتفاق يرضى الطرفين

ونزل امجد واهله والموقف كان محتدم جدا عند ا لطرفين

والحقيقه ان امجد كان مضايق من اهل مروه اوي
وكمان مروه كانت مضايقه من اهل امجد

وبعد كده فضل يحاول مروه وامجد يوصلوا لاي حل يرضى الطرفين وكل واحد حيران مع اهله وما حدش فيهم برضه ناوي يغضب اهله وده اتفاق بينهم من الاول
لا هى تنفع تتجوز بغير رضا تام من اهلها ولا هو كمان يقدر يخالف اهله .

فى ا لحقيقه المشكله فى الاخر ما بقتش بس بين اهل مروه واهل امجد المشكله كمان بقت بين مروه وامجد نفسهم

امجد ما استحملش من اهلها ابدا انهم يضايقوا اهله وكان حاسس انهم غلطانين دايما وكان متوقع من مروه انها تكون واقفه الى جانبه وهى كمان تغلط اهلها( هى اصلها كانت دايما فى صفه وبتقتنع برايه وبتسمع كلامه دى حتى كانت بتشتكيله من اهلها لما يزعلوها فى حاجه ) لكن ده ما حصلش طبعا

مش بس كده دى مروه كمان كانت حاسه ان اهله هما كمان غلطانين وكانت فاكره امجد هايكون احن علياه من كده وانه هايكون فى صفها وينصفها ( ماهو كان دايما حنين عليها وبيحبها وما يقدرش يستغنى عنها وياما هى وقفت جمبه وسمعت كلامه واستحملت كتييييييير منه وعشانه الدور عليه بقى ) لكن برضه امجد ما عملش كده

الحكايه كبرت اوي والمشكله المره دي مش بين اثنين بيحبوا بعض . المشكله المره دي بين عيلتين والاثنين الى بيحبوا بعض حتى زعلانين من بعض .

مروه حاولت تتمسك بامجد لكن حست فجأه انها بتيجى على كرامتها . ووجعتها اوي الحته دي .
وخلاص امجد بدأ هو الانسحاب الصريح
وفى اخر مره شاف فيها مروه

وبثبات استغربت له اوي مروه . قالها مش هاينفع نكمل مع بعض .

ومروه وهى بتتقطع من جوه: قالتله فعلا صعب نكمل مع بعض . صعب اوي.
وما عرفتش تكتم الدموع اكتر من كده

دموعها وجعت امجد بس هو كان واخد قرار حاول يكمل كلام لكن ما عرفش يقول ايه
وهى كمان حاولت تنفي الدموع وحاولت تكون ثابته زيه بس كانت دموعها بتخونها كتير

امجد مشي.. مشي لواحده ... ومروه كمان مشيت لواحدها فى اتجاه تاني

ما عادش خلاص طريقهم واحد ....
****************************************
تفتكروا كل واحد فيهم هايكمل مشواره ازاي ؟؟
تفتكروا كل واحد فيهم هايقدر يحب تاني ؟؟
تفتكروا مين الى غلطان ؟؟
وليه قصة الحب دي فشلت ؟؟

واخيرا تفتكروا امجد ومروه هايتقابلوا تاني ؟؟؟
ولو اتقابلوا ايه هايحصل ؟؟

هناك 56 تعليقًا:

Wanda يقول...

عارفة كام واحد قلى على التكملة
بس حطلهم اسئلة صعبة قوى:-)))
صبرنى هذة هى الحياة
C'est La Vie

بس جميل نهاية واقعيه متوقعنها
صحيح تخلوا من الرومانسية
بس برضه حنجيبك تكتبلنا رومانسية

راى و الاجابات رجعالك
ثانى
اصل الكلام ده لازم نفصصه الاول و ناقشه
ثم نقول راينا فيه

بس تسلم ايديك
اخبار التورتة ايه ؟؟:-)
كل سنة وانت طيبة كمان مرة

احساس طفلة محبة للرومانسية بس واقعية يقول...

كنت فكراهم هيكملوا
وهيقدروا على التواصل اكتر من كدا
بس الظاهر ان فعلا حب الجامعة دا مش بيستمر لانة بلا قواعد ثابتة بلا خبرات حياتيه وخاصة لامجد لان هو اللى مفروض يكون الطرف الاقوى

اعتقد ان لسة قدمهم الحياة عشان يكملوها ويتعلموا حتى لو وجهوا تجربة قاسية زى دى هيقدروا يفوقوا ويكملوا

هم الغلطانين فى الاصل لانهم مدعموش بعض مفهموش بعض واكبر دليل اخر مشكلة ولا هى فهمت انها عودتة على التسامح ولا هو فهم احتياجها لية

الحب لوحدة مش كفاية لازم يكون فى دعائم تثبتة هم معرفوهاش ومعرفوش يبنوها مع بعض

اكيد لو اتقبلوا بعد فترة زمنية كبيرة وكانو لسة سنجل ممكن يتفاهموا ويتعاتبوا بس هتفرق السنين واللى هتكون عملتة فيهم
او ممكن برضو يبتسموا جواهم ويفتكروا التجربة دى على انها تجربة ادتهم خبرات فى حياتهم ومشاعرهم ساعتها مكنتش حقيقية او كانت بس مش بالدرجة اللى هم متخيلنها
فى كذا نهاية واقعية وبتحصل دا حتى كان ممكن يتجوزوا وتنتهى الحكاية بمشكلة لان السبب مش الاهل بس هم طرف فى المشكلة بس مش هم اساسها

القصة ليها كذا طريق وكذا فكر يا صبصب عشان كدا لما بتحصل فى الواقع
بيكون ليها كذا نهاية حسب شخصية كل طرفين وقوة علاقتهم مش بس حبهم

يلا بقى شوفى فكرة جديدة
بس تكون اطووووووول من دى :)
كل سنة وانتى ومدونتك بخير يا جميل
ويارب دائما فى احسن حال
تقبلى مرورى

ذو الوجه المبتسم يقول...

كل سنة وانتى طيبة
عيد ميلاد سعيد
وعقبال اقول مليون سنة
ولا نخليهم الف
زى ما تحبي

القصة لذيذة بجد
بس انتى نويتى تتجهى للتاليف خلاص ولا ايه هههههه

تحياتى لك

سمع هوص (Abo 3li) يقول...

فيه حاجة عجبتني..
وحاجة نرفزتني..
العجبني: ان قصتك فعلا منتهي الواقعية.. لأن ده بالظبط البيحصل دلوقتي... فشل قصص الحب الحقيقية بيكون في معظم الاحيان بسبب الاهل... وخصوصا اهل البنت... انا مش بقول كده بتحيز... لأ .. بالعكس... فعلا ديما اهل البنت بيعقدو الامور بشكل مبالغ فيه... واقرب مثل علي كده اهلي انا شخصيا... ساعة جواز اختي الكبيرة.. بهدلو العريس بهدلة.. والله كان صعبان عليا... شبكة لاتقل عن كذا (رقم لو عدت احوش فيه هتجوز وانا عندي اربعين سنة)... وشقة تكون تمليك... العفش كذا... الفرح في المكان الفلاني.... وانا اقول لابويا حرام عليك ياحاج.. دنتا عندك ولايا(اقصد نفسي طبعا) ... هيجي يوم وابنك هيطلع علي عنيه ال بتعمله ده... يقولي وهي اختك شوية... ياسيدي مش شوية.. بس منا الهتجوزها في يوم ما مش هتبقي شوية بالنسبة لاهلها.....
الخلاصة ربنا يهدي الجميع..
الحاجة بقي النرفزتني: " تفتكروا كل واحد فيهم هايكمل مشواره ازاي ؟؟
تفتكروا كل واحد فيهم هايقدر يحب تاني ؟؟
تفتكروا مين الى غلطان ؟؟
وليه قصة الحب دي فشلت ؟؟

واخيرا تفتكروا امجد ومروه هايتقابلوا تاني ؟؟؟
ولو اتقابلوا ايه هايحصل ؟؟"
ده تمهيد لمجموعة اجزاء جديدة ولا ايه؟؟؟؟
حاجة اخيرة: كل سنة وانتي طيبة وبخير.... وبالغلط بدل مقولك كل سنة وانتي طيبة اتلخبطت ودخلت في بلوج تاني غنيتلك ابو الفصاد... شفتي الاحراج.... هههههههههه
صباحك سكر زيادة... تحياتي

أبو حميد يقول...

أولا كل سنة وأنت طيبة
ثانيا القصة أجمل مافيها إنها واقعية
ثالثا أمجد غلطان من الأول طالما عارف إنه مش قد الإرتباط مايعملش فى نفسه وفى بنات الناس كده
يعنى يدوس على قلبه ويتنيل ويكتم جواه لحد مايبقى قد الإرتباط والجواز وساعتها هو ونصيبه لو حبيبته لسه موجودة يتقدملها لو لأ خلاااااص ويكمل حياته

لولا وزهراء يقول...

حلوه القصه وتابعتها مش من الاول بس اشلوبك خلانى اقراها من الاول
عندك اسلوب وطريق عرض حلوه اوى اوى
انتى عارفه من اجمل الحاجات اللى فى القصه انها واقعيه يعنى ممكن تتكرر وممكن تحصل لحد من معارفى او حتى حد فى العيله
دمتى بكل صحه وسعاده
وفى انتظار حاجه جديده علشان نتابع من الاول


لـــــــــولا

star in the sky يقول...

بالنوسبة للقصة الفراق كان متوقع مش عارفة ليه

بالنوسبة بقى للسؤلات

تفتكروا كل واحد فيهم هايكمل مشواره ازاي ؟؟
امجد هيسيب حياته ويشوف هتوديه فين
اما مروة فى الاول هتتعب بس هتكمل حياتها عادى يمكن تشتغل عشان تندمج فى الحياة وتنسى ويمكن تستسلم بس عامة مع اول واحد يتقدم لها اعتقد انها هتوافق لو كان كويس ومناسب لها

تفتكروا كل واحد فيهم هايقدر يحب تاني ؟؟
امجد يمكن يحب بس هيروح منه تانى الحب لانه مش مستعد يضحى
اما مروة يمكن مش تثق فى انه فى حب اصلا بس لو حبيت تانى هتضحى تانى وهتقدر تلاقى الحب

تفتكروا مين الى غلطان ؟؟
محدش غلطان

وليه قصة الحب دي فشلت ؟؟
بيتهيالى اللى بينهم كان حب بس لا الظروف ساعدتهم ولا هما قدروا يتحملوا المسئولية ويثبتوا انه حب

واخيرا تفتكروا امجد ومروه هايتقابلوا تاني ؟؟؟
ممكن يتقابلوا وممكن لا

ولو اتقابلوا ايه هايحصل ؟؟
حسب كل واحد حياته ماشية ازاى وقتها وهل نسى ولا فاكر ولا هل مجروح ولا عادى بس فى كل الاحوال هيفتكروا كل اللى فات يمكن يتكلموا ويسلموا ويمكن ييبعدوا ويمشوا فى طريق مختلف زى اخر مرة

خواطر شابة يقول...

النهاية واقعية جدا لكن انا عندما أقرأرواية او أتفرج على فيلم لا أفضل ان ينقل لي الواقع بسوداويته يكفيي ما أراه وماأعيشه فليبق لي على الاقل الخيال باسم ومبشر
في هذه القصة امكانية انهم ينجحوا كانت ممكنة بقليل من الصبر والتحمل والتضحية من الجانبين لكنك لم تشائي لهم أن يفعلوا يالله ماحدش بيأخذ أكثر من نصيبه
كل سنة وانت طيبة وبألف خير
دممت بكل ود

شفـقــة و إحســــان يقول...

اول مرة اتابع القصة بس بجد جميلة جدا وفكرتنى بايام الجامعة والحب والرومانسية
تسلم ايدك
القصة هايلة

ستيته حسب الله الحمش يقول...

ليا مزاج اكمل القصة
عااااااااااااااااااا
والنبي والنبي يا اوختشي اكملها

موافقة
يخليكي ليا

مروة ها يتقدم لها الصبح اشكال وألوان
معظمهم لقطة طبعا
بابا راجع من جنة الخليج البترولية
وماما شبه فاطمة مرات عبد الغفور البرعي
كل ما يجي عريس تسأل مروة
احط التعابين والا الغوايش كده كفاية

مروة لفترة مش بسيطة عينيها مش ها تشوف راجل غير امجد
وها ترفض مهما اختلفت مع امها
ولما تخاف العنوسة
ها تقبل بعريس لقطة
لقطة ده لفظ بابا وماما وطنط وانكل وكل اللي ها يعملوا كتلة برلمانية علشان يقنعوها


امجد
ها يسك على الموضوع كله
اصلا هو لا جاهز ولا ليه علاقة بالجواز لسه
قفلة عاتشيفية زائد نقص حاد في الإمكانيات المادية مع عقل عملي اصلا ومش عاتشيفي زي ما بان من تتابع القصة
بعد خمس ست سبع سنين ها يشوف بنت ويلاقيها مناسبة
مجرد مناسبة وفلة وحلوة ومفيش مانع انها ها تزغزغ قلبه كبوناص للحدوتة
ها يتجوزها

المصيبة الحقيقية
وحتى ان فرضنا ان جوز مروة فله
ومرات امجد فلتين
وده احتمال وارد جداااااااااااااا

كل خناقة زوجية
كل نكد زوجي عادي
كل خلاف زوجي
ها يستدعي في مخ مروة ان لو كان امجد كان بقى كذا
كان عمل كذا
كان زماني سعيدة جدا بالطريقة كذا

اما عن امجد فهو مش عاتشيفي زي مروة
لكن كل شويتين تلاتة اربعة كده برضه ها يتذكر الحب الأول
الحب الأول اللي خلى رجال بلوج سبوت يفتكروه كده بعد ما عم فشكول حكى عنه وبقوا كلهم عندهم حالة شجن ماركة فلة يا روحي

الجميل في الأمر ان الحب بتاعهم لو كان كمل كان انتهى عادي جدا في محاكم الأسرة
ولكنه الحنين للنكد من آن لآخر والتصور انه لو مكنتش اتجوزت سوسو كانت مروة ها تبقى ملاك بجناحين


والشاهد ان حب فترة المراهقة وما يليها لو استمر فترة
وعاشوا احلام
واحلام غير واقعية
فهو له القدرة على افساد حياة كاملة تليه

اما ان كانت مجرد زغزغات قلبية
تخلي الإنسان يعيش شوية هه وينجز ومزاجه يبقى فله
فده حب صحي ومش مضر ولن تكون له تبعات مدمرة

اما اللي ربنا خالقه بريء
والحياة مقدرتش تخرجه عن خط السكة الحديد اللي راسمه لنفسه
واللي قال مش ها احب غير جوزي وده كلام نهائي
وقدر يستمر على مبدأه
فده عادة الراضي اللطيف اللي زوجه او زوجته له اول كل شيء
وده منطقي عقلاني اخر جمال

وعنها وخدها قلمين وادى امها بونية وراحوا القسم

مع تحيات
عبد الحميد الترزي

sony2000 يقول...

انا قولت اكيييييييييييييييييييييييد اكييييييد النهايه هتبقي كدا
لان بجد بعد كل اللفه دي طبيعي انه يحصل كدا لان هما حبوا بعض فقط لكن المعرفه كانت لحد هنا وبس ودا عامل ذي المثل اللي بيقول تعرف فلان قاله اه قاله عاشرته قاله لا قاله يبقي متعرفوش
فالحاله دي هما الاتنيبن موش عرفين بعض اصلا واول موقف اتحطو فيه من ناحيه العلتين سلمو علطول
نفسهم قصير جدا للاسف
تقبلي مروري وتحياتي

Wanda يقول...

اولا انى اعترض
دكتور عبد الحميد الترزى لازم ينزل فيلم لوحده فى مدونته
امال حنلف على السنيمات ازى علشان نخس شوية :-))))

بس تكملة منطقية

ادخل افصص بقى الثوم :-)))
بصى بقى
انا مش ضد حب الجامعة :-)) على الرغم انى متصبتش بيه :-)) و فى صيدلة صعب قوى تلاحظية (الكبلس عندنا قليلين قوى) عادة الولاد كانوا بيرتبطوا ببنات من دفعات اصغر :-)) اصلهم كانوا بيذكرولهم :-))
احنا كنا اغلبنا اخوات فى بعض و مجموعات كبيرة و قصص الحب الفردية اغلبها مكنش بيكمل
اغلب النبات كانوا العرسان الى عايزنها صيدلانية (تفتح صيدلية يعنى و تجيب فلوس ، موجودين جاهزين و بالتالى الاهل بيقفلوا على حب الجامعة من بدرى)
المهم
نرجع لامجد ومروة
اعتقد لو مكنوش مروا بالتجربة بالارتباط ديه كانوا حيفضلوا يعانوا كثير قوى
هى بينت انهم مينفعوش لبعض
و هما كانوا حسينها من جواهم من الاول

ما فيه ابهات و امهات بيقبلوا فى الاخر بعد الحاح من البنت او الولد و تلاقيهم واقفين على ظوافرهم علشان الجوازة تفشل و يقولوا مش قولنالكم :-))

بس بصراحة استجدعت امجد
معلش بقى عارفة حتقولى متحيزة لزميل المهنة
بس هو حتى و هو مش مقتنع قوى كمل الطريق لجزء مكنش بيتسلى على الاخر
حتقوليلى و مروة :-))
مش هى قبلت تتجر رجلها فى القصة السنسنة من الاول لحد مابقى النهاية لازم تكون ارتباط علنى
هى عارفة اهلها بيفكروا ازى و لو كانت بتحبه بجد كانت تفهمه على انه حيتعب بطلباتهم و انها حتتشتغل و تحاول تستناه بس مش وعد (لانها فى الحقيقة مع عيلة بالشكل ده لا تملك من امرها شئ )

اه حتت الموضة التدينية ديه بقى لا عايزلها قصة لوحدها متكليناش اونطة :-)))) جريتيها انت كده ارجع و اعد براحة :-)))

حتة الناس الى بترجع من الخليج بفلوس كثير فعلا بتتغير كثير
لان حياتهم هناك فلوس هات فلوس و اصرف فلوس و الحياة بعدها بتبقى فلوس فى فلوس

امجد لما سابها اقولك ليه لانه فهم هى مروة حتكون بعد الجواز و انحسار الموجة الرومانسية ازى ، نسخة من امها :-)) كما قال الفيلسوف اقل القدرة :-)) ايوه انا مقلوب قدرة الست الوالدة شئت ام ابيت :-)))

نرد على الاسئلة التعجيزية
يا مسهل :-)))
1- تفتكروا كل واحد فيهم هايكمل مشواره ازاي ؟؟

عادى حتتجوز تقريبا ثالث عريس عنده امكانيات تناسب متطلبات الاهل ، و حياتها عادية البيت العيال :-))ممكن جوزها كمان لو فعلا حبته (للاسف ده مش بيحصل كثير :-)

هو حيشتغل شوية و حيسافر للخليج برضه و يطالب اهله و الاصحاب و الجيران يجهزولوا عروسات اوقات نزوله مصر يرتبط بانسبهم ليه
و ممكن بعد فترة يتقلب هو و المدام زى ابو و ام مروة :-)

2-تفتكروا كل واحد فيهم هايقدر يحب تاني ؟؟

ايوه
عارفة ليه
لانى بصراحة مع كل السنسنة ده محستش انهم فعلا حبوا بعض
القلب لسه خالى و اعتقد بذات قلب امجد ، مروة حتعانى شوية عقبال ماتصدق مشاعرها و مشاعر الحبيب الثانى الحقيقى :-))

3- تفتكروا مين الى غلطان ؟؟

محدش :-)) لان هذة هى الحياة
خلينا واقعين مقسوم يتقابلوا يحبوا يسنسنوا يرتبطوا يكرهوا يفارقوا
:-)))
مصممة ان حد غلطان
يبقى مروة لانها مفروض الاعقل و تختار الطريق الى بتمشى فيه :-(

4- وليه قصة الحب دي فشلت ؟؟
لان مكتوبلها الفشل
و احسن بدرى بدل بعد فوات الاوان

5- واخيرا تفتكروا امجد ومروه هايتقابلوا تاني ؟؟؟
ممكن قوى
الدنيا ديه غريبة لما متعوزيش تشوفى حد معين تلاقيه فى وشك :-))


6- ولو اتقابلوا ايه هايحصل ؟؟
لو متنكدين قوى من اجوزتهم
ممكن الشيطان الشاطر يصوصولهم منجرب من جديد جايز :-))
لو مبسوطين حيسلموا على بعض عادى بابتسامة
لو فى حالة الصفر لا فرح و لا حزن حيقعدوا كل واحد لوحده يسترجع الذكريات و يتنهدوا :-)))

كفاية كده :-))
بالمناسبة حفيدة عرابى الصبح بتقولى
"وصبرنى كملت القصة بتاعها
اتبسطتى اهم العيال سابوا بعض "
حاسها بتلومنى :-)))))))))))))))
و النبى فهمى الناس انى مليش ذنب
انا برئ يا بيه
و الله يا عرابية كنت عايزه رومانسية حالمة بس اعمل ايه صبرنى مودها واقعى :-))))
شايفها معلقتش عندك لسه
زعلت عليهم :-)) و لا مش عارفة ترد على الاسئلة

رحله البحث يقول...

حسيته افضل جزء فى القصه كلها يا صبرنى
واقعى جدا واحداثه سريعه
بس ايه اريك متكمليها بقى اصلى باقى لى اسبوع وانزل
متورينا كل واحد هيحصل له ايه
ما انا فاضى لك بقى اليومين دول لحد ما انزل وابقى مشغول بالنوم
جميله بس مفيش حاجه فرايحى المدونات كلها كئيبه
فرفشينا بقى كده ببوست فرفوش او قصه حب ناجحه وكل حاجه فيها ماشى لوز
تحياااااااااتى

عاشقه الرومانسيه يقول...

اولا كل سنه وانتى طيبه ياصبصب
هاروح اقرى القصه بقى واشوف اخرها ايه؟

عاشقه الرومانسيه يقول...

تحكمات الاهالى هى السبب
انا شايفه كده
المظهريه الزياده اللى بقت فى مجتمعنا هى السبب
زمان الصحابه كانوا بيتزوجوا على القران
سبحان الله

ويمكن يكون مروه وامجد نفسهم قصير ومش قادرين يكملوا
يمكن لانهم اتعودوا على بعض فذهدوا بعض
لان كل مملوك مزهود
الله اعلمممم

قيس بن الملووووح يقول...

المشكلة المعروضه علي مدونتي قد تستفيد منها للمستقبل
زورنا شاركنا الراي الذي قد يفيدنا جمعا

صبرني يارب يقول...

واندا

يا مفصصاتي انتى يا متين

تورتة ايه يا ماما كلناها خلاص
ههههههههههههههههه

صبرني يارب يقول...

احساس طفله

اهلا يا جميل وانتى طيبه وبخير يارب

اتفق معاكي تماما ان المشكله ما كانتش مشكلة اهل بس

لا المشكله عندهم هما كمان

وفكره ايه بقى لا اجازه بقى
هههههههههههههههههههه

صبرني يارب يقول...

ذو الوجه المبتسم

ربنا يخليك يا استاذ ناجي

ومتشكره لك اوي

اتجه للتاليف ايه بقى اولا دي مش اول مره اكتب قصص

كمان انا ليا فى كل حاجه باين
ههههههههههههههههه

نورت يا فندم

صبرني يارب يقول...

ابو علي

كده ؟؟
هههههههههههه

لا ياعم ما تخافش مافيش اجزاء تانيه سبتلكم انتم النهايه تكملوها بقى


بالنسبه لكلام حضرتك عن الاهل اوك ماشي ده بيحصل والمغالاه مش مطلوبه


لكن مش هما السبب فى فشل قصة الحب ا لعظيمه وحدهم

لا طبعا فى اسباب تانيه رئيسيه كتير

اعتبر الاهل ده سبب ثانوي

وكده تتوه فى البلوج مش تكتب ا لعنوان عندك
ههههههههههههههههه

صبرني يارب يقول...

أبو حميد

وانت طيب مرسي اوي

وانت قلت كلمتين بصراحه عجبووووووووني اوي اوي وباقولهم دايما

بجد باقولهم بنفس الطريقه حتى باقول يتنيل ويكتم
ههههههههههههههههههههههه

برافوا عليك تصفيق حاد هنا يا جودعان

صبرني يارب يقول...

لولا وزهراء

اصل انا ماليش ا لا فى الواقعيه للاسف ساعات الواحد بيبقى نفسه يزيط وكده ما باعرفش يا اختي والنبى
ههههههههههه

وحاجه جديده قصص ؟

لا اجازه شويه

منوره يا جميل

صبرني يارب يقول...

سكاي

حلاوتك

ماحدش غلطان ؟

شوف الحلاوه بقى طلعتي الناس كلها مش غلطانه

يظهر انا الى غلطانه بقى
ههههههههههههههه

طبعا وجهة نظرك على راسنا بس انا مختلفه معاكي فى وجهات النظر

بس عادي مش هاغزك ولا حاجه
هههههههههههههههه

فتاه من الصعيد يقول...

والله هو الحب بيبان قوته في المحك :)

وياما ناس حلمت ... وصحيت على الحقيقه

تحياتي

صبرني يارب يقول...

خواطر شابه

يا ريت يا اختي والنبى

ماليش فيه والله انا نفسي اعملكم احلام ورديه بس ما باعرفش عموما ادعولي جايز اعرف

ولو انا القصه الى فاتت خلي بالك كانت نهايه سعيده ورومانسيه اخر حاجه والناس اعتبروها خياليه انثاويه بلهاء
ههههههههههههههه

مع انى اعتبرتها واقعيه برررررررضه جدا

نورتي يا جميل

صبرني يارب يقول...

شفقه واحسان

ايوه لايام التعطيف صح ؟

بس انا ما عطفتش فى الجامعه الحقيقه

ههههههههههههه

كنت باعطف بعد ما اروح عشان كنت مخطوبه
ههههههههههههه

صبرني يارب يقول...

ستيته حياتي

لا لا لا ده انا بافكر اخد النهايه بتاعتك دي وانشرها فى بوست لاحق

لييييه بقى

لان اصلا اصلا كأنك دخلتى جوه دماغي وقريته النهايات المقترحه


بصي يا خالتي سلميلى اوي على عبد الحميد التارزي والنبى يعنى الواحد مش عارف يشكره ازاي
ههههههههههههههههه

منوووووره يا جميل

صبرني يارب يقول...

سوني

الفكره مش فكرة نفس قصير

هما حبوا بعض ماشي

لكن فين العقل

فين الاختيار الاول بالعقل عشان يبقى اختيار مناسب

مافيش طبعا احنا سنسنا كام سنه الاول وبعدين فكرنا نسأل على الاهل

ودي غلطه مش قليله

نورتي يا جميل

حنعيش يعنى حنعيش يقول...

اية اللى بيحصل دة عيد ميلاد صبرنى ومحدش يقولى ...كل سنة وانت طيب ياباشا ويجعل ايامك سعيدة وهنية ويحقق لك كل احلامك
انا قولت اهنى الاول وبعدين اروح اقرأ مروة هانم والحاج امجد حيوصلوا لفين ...مرة تانية كل سنة وانت طيبة وعقبال متين سنة

حنعيش يعنى حنعيش يقول...

اية اللى بيحصل دة عيد ميلاد صبرنى ومحدش يقولى ...كل سنة وانت طيب ياباشا ويجعل ايامك سعيدة وهنية ويحقق لك كل احلامك
انا قولت اهنى الاول وبعدين اروح اقرأ مروة هانم والحاج امجد حيوصلوا لفين ...مرة تانية كل سنة وانت طيبة وعقبال متين سنة

صبرني يارب يقول...

واندا

المفصصتيه اخر حاجه

ههههههههههههههههه

لا يا واندا احب ا قولك صيدله ايامكم غير يا ماما تعالى ا تفرجي

ولما هما كانوا جاهزين يا موكوسه ما روحتيش تفتحي صيدليه ليه
ههههههههههههههههههه


اما امجد ومروه

قولتي بؤ عجبنى جدا يا بت يا وندا يا اروبه

انهم كان لازم يوصلوا لمرحلة الارتباط ويلاقوا الموضوع فاشل
عارفه لو كانوا الاهالي قالوا لا من الاول

كانوا عاشوا طول عمرهم معتقدين انهم سابوا السعاده بسبب اهاليهم الوحشين

انما المشكله وصلت انها بقت بينهم الاثنين وهما الاثنين خلاص سابوا بعض


حفيده عرابي انا ما اعرفش انها بيتجى هنا

ومن موقعي هذا مافيش اي حد له علاقه بالنهايه الحقيقه
هههههههههههههههههه

انا اصلا كنت ناويالهم يعنى

واي حد يعرفنى كان يجى يقولي هاااااااا هاتعملي فيهم اييييه عارفييييينك
هههههههههههههههه

واندا بريئه يا جودعان

صبرني يارب يقول...

رحلة بحث

لا لا ده انت عايز مسلسل تركي بصحيح

ولما تيجى هانصحيك ونعذبك هاوصي عليك صلاح بقى
ههههههههههههههههههه

منور

صبرني يارب يقول...

قيس بن ا لملوح

اووووووووك ان شاء ا لله نتشرف بمدونتك عونيه

صبرني يارب يقول...

عاشقة الرومانسيه

ميرسي يا جميل وانتى طيبه وبخير

يعنى انا شايفه ان المشكله مش مشكلة مغالاه وبس

ولا حتى مشكله المملوك مزهود

انما اعقد من كده

لكن برضه الى قلتيه احد ا لاسباب

منوره يا جميل

صبرني يارب يقول...

فتاه من الصعيد

ماهو المفروض تكون الفرامل شغاله حلو عشان ما نصحاش نتصدم يا جميل

منوووووووووره

صبرني يارب يقول...

حنعيش يعنى حنعيش

ربنا يخليك يا دوك وانت طيب وبخير يارب

متشكره اوي

وطبعا انا مستنيه تعليقك اهو

يلا بسرعه اقرا وتعالى

حنعيش يعنى حنعيش يقول...

بصراحة القصة تستاهل ان احنا نستناها كل دة ...واقعية ,ذكية ...بس يارب حد يفهم ...ونبطل نعيش فى احلام اليقظة ونعيش شوية الواقع ...ومانجريش ورا اوهامنا علشان مانجرحش احساسيسنا بايدينا ونرجع نعيط ...بصراحة كدة انا ضد الحب وبأعتقد ...من العقيدة... ان مافيش حاجة اسمها حب ...بس برضة بأعتقد ان فية حاجة اسمها مودة ورحمةوعشرة لكن الحب اللى بيجى فى التليفزيون دة مابنخدش منة عير الجروح النفسية اللى صعب انها تصحى ...حوشوا مشاعركوا لاجوازكوا ومراتتكوا الدنيا حتبقى احلى من اننا نعيش معاهم بنص قلب وساعات كتير من غير قلب خالص ...ودا نوع بايخ من الخيانة لان الخيانة وقتها بتبقى لنفسنا قبل ماتكون للى قدامنا ...وافكركوا تانى بقصة التلت سمكات الغبية والذكية والاذكى ....تسلم ايدك يا صبرنى

صبرني يارب يقول...

حنعيش يعنى حنعيش

متشكره اوي يا دوك والله

وفعلا نفسي الناس تصدق حكاية تحويش المشاعر دي

بجد باحس الى بيحبوا عمال على بطال دول فى النهايه بتبقى المحصله صفر

حاجه زي بعترة نصيبه من الحب فى الدنيا

بالتالي يحس دايما ان ناقصه حته

هو انا الى فهمته من كلامك انك مش بتؤمن بالحب الى من غير رابط رسمي وشرعي

او حسب القاموس بتاعي حب الشوارع

سنسنه وتعطيف فى الهوا

انما هى الموده والرحمه ومن عندي كمان السكنى هما جزأ من الحب اصلا

انما انا باؤمن بالحب بكل فصوله بس فى اطار صحيح
وبامووووووت اوي من اي زوج او زوجه يقول اصل انا عشتش قصة حب اصل اتجوزت جواز صالونات

على اساس انه الواحد ما ينفعش يحب مراته ولا تحب جوزها لازم نبدأ بحب الشوارع الاول

حاجه تفرس هو انا شلت المراره من قليل

نورتنا يا دوك ومتشكره تاني على كلامك عن القصه

Anonymous يقول...

عزيزتي
اولا شاكر اهتمامك بمشكلتي ةانا اعترف اننا صاحب النصيب الأكبر من الحطأ ولهذا سوف اتحمل
بخصوص الماديات للمنزل مصروف مقنن يزداد كل عام حسب التضخم وزيادة الاسعار ..اما المشاكل التي تنتج عن الماديات هي بخصوص طلباتها الاسثفزازيه فمثلا لو اراد الابن ان يذهب الي رحله مع الكليه اعطيه مبلغ اتصور انه يكفي لكنها تحدث مشكله لماذا لايضاعف المبلغ احد الابناء في الثانوية العامه وهذا البند تابع لي فتصر علي ان يأخذ درس خصوصي بمفرده ويأتي المدرس الي المنزل رغم ان الغالبيه من زملائه يأخذون الدروس في مجموعات...اذا قمنا برد زياره لاحد الاصدقاء في مناسبه وقد احضر لنا تورته يجب علينا أن نأخذ اثنين ومن افخم المحلات...الخ
ع.ل.ع

القدر و انا يقول...

ريم
كل سنة وانت ورضا واولادك بالف خير
وعيد ميلاد سعيد ليك يا قمر
وانا اسفة جدا مش عارفة البوست بيختفى احيانا من الرايدر
ولازم اقرا مروة وامجد كاملة لان باين انها ممتعة
تحياتى يا حبيبتى وكل سنة وانت ومدونتك فى تقدم دائم

رحــــيـل يقول...

شوشو ازيييييييييييييك
وحشانى والله

قصتك واقعيه جداااااااااا
اعتقد انها بتكرر كتير جدا جوا كل جامعات مصر يوميا
المهم بقى ياستى الفكرة مش مين غلطان
الموضوع كله ان محدش فيهم كان نصيب التانى
مساله وقت وكل واحد بعد ما يعيش حبة مجروح بيبدأ ينسى ولما بيختار تانى بيختار باسس مختلفة ونضج اكتر لو اتقابلوا تانى بقى كل واحد هيبقى معااه ولاده ويعملوا نفسهم ولا كانهم يعرفوا بعض
تن تن تن تااااااااااااااا
وهنا ينزل الستار وكلمة النهاية ومحدش واخد منها حاجة

MaNoOoSh يقول...

الأول كل سنة وانتى طيبة يا قمر

ثانيا بقى مش عارفة لية محستش ان النهاية حزينة
هي مش حزينة ولا حاجة

اصل لا دنيا مروة هتقف عند أمجد وتنتهي
ولا دنيا أمجد هتقف عند مروة وتنتهي

مش موضوع كرامتهم وأهلهم
هم لو كان عندهم اقتناع تام ببعضهم كانو قدرو يحتوا الموقف والمشاكل
لكن هم نفسهم أعتقد انهم مقتنعين بآراء أهلهم علشان كده مكنش عندهم تمسك ببعض

صبرني يارب يقول...

اخي الفاضل

ع ل ع

أنا الى متشكره على تشريفك لنا يا فندم

وبالنسبه لكلام حضرتك
واضح ان زوجتك بتهتم شويه بالمظاهر والحركات وشويه قوانين كده انا عارفاها وحافظاها

بس انا شايفه برضه انه ما زال الخلاف عادي يعنى ممكن تمشي الامور بس انت حاول تاخد الحكايه بهدوء شويه وخليك متفاهم اكتر مع ولادك وقرب منهم

صبرني يارب يقول...

القدر وانا

انا صبرني يا جميل
ههههههههههههه

عموما انا وريم واحد

مرسي اوي اوي يا جمل وكل سنه وانتى بخير وسلام

وتنوري دايما يا جميل

صبرني يارب يقول...

رحيل

وانتى كمان والله وحشااااااااني

مش هانتقابل ولا ايه

الجو حلو اهو شوفلنا يوم سبت كده فى الخباثه نتقابل فيه

وبالنسبه لكلامك انهم هاينسوا ويكملوا
وكمان انهم ممكن يقابلوا بعض ما يكلموش بعض

اه برضه ممكن
منوووووووووره يا جميل

صبرني يارب يقول...

مانوش

الله يفتح عليكى

هو كده بالظبط الحكايه مش حكايه مشاكل اهل

وكمان فعلا حياتهم مش هاتقف ده حقيقى

نورتي يا جميل

وميرسي ليكى

أحمد عاطف يقول...

هيتقابلوا تاني

هايكون امجد ماشي مع واحدصاحبه

وهي ماشيه شايله ابنها او بنتها على كتفها

وعينيهم تتقابل

ويعدي كل واحد وهو بيقول

يا حبيبي كل شيء بقضاء

ما بايدينا خلقنا تعساء

ربما تجمعنا اقدارنا ذات يوم .. بعدما عز اللقاء

فاذا انكر خل خله وتلاقينا لقاء الغرباء

ومضى كل إلى غايته .. لا تقل شئنا

فإن الحق شاء

صبرني يارب يقول...

احمد عاطف

لا لا ده انت كده مش احمد عاطف ده احمد العاطفي

ايه ياعم ده يا عم

ايه العاتشيفيه الى جتلك على حين غره دى
هههههههههههههه

ماشي يا سيدى احتمال برضه عادي

منورنا يا باشا

جنّي يقول...

السلام عليكم

كيف حالكم اختنا الفاضلة والاسرة الكريمة خاصة الاستاذ رضا لعلكم بخير والحمد لله .. وكيف حال اخوانا واخواتنا الضاحكون .. سلامنا لهم حتى ازورهم ان شاء الله .. فمدونتكك اول ما زرت بعد العودة وجزاكي الله خيرا على مبادرتك بزيارة مدونتي ..

قرأت التدوينة ولكن يجب ان اقرأ الاجزاء الاربعة السايقة ان شاء الله .. واسمحي لي بالتعليق على الجزء الخامس .. طبعا كلنا او بعضنا قد مر بمثل القصة وسيسير كل منهم في طريقه وتظل القصة ذكرى جميلة بحلوها ومرها .. ولو انا امجد بالطبع ها احب تاني واعيش حياتي .. فزمن روميو وجوليت ليس زماننا .. واذا تقابلا سيكون الاحترام وتمني التوفيق كل منهم للآخر ..

اما من منهم الغلطان فالغلط غلط الظروف المادية والحياة المريرة التي تقضي على الحب في مهده .. وانا مؤمن بان الزواج له مقومات لابد من توافرها لنجاح الزواج ..وان كان احسن لهم الدخول بحصيرة ووابور جاز ما دام لا توجد انابيب البوتاجاز ..


جزاكي الله خيرا

أم .. بوبه يقول...

أنا بقى فاتنى كل أجزاء مروة وامجد تقريبا لأنى كنت بجد مشغولة ومقصرة مع الكل

انا قولت أسلم عليكى وأمسى

وآخد نفس عميق وأروح أقرا من الأول

العواف عليكى .. أستأجز أنا بقى

لو غبت متقلقيش يمكن أنام فى النص وأكمل بكرة هههههههه

صبرني يارب يقول...

جني

العفو يا استاذ سعيد ده احنا الى اتشرفنا بك

وانت نورت البلوج والله ومتشكره على انى اول مدونه تزورها

وبعد اذن حضرتك انا هاختلف معاك

ان القصه هنا مش قصة احوال اقتصاديه وحصره وانبوبة بوتجاز خالص

المشكله اكبر من كده

المشكله انهم اصلا فعلا عائليا مش مناسبين لبعض

وهما عارفين وحاسين ده المشكله فيهم هما برضه مش فى الفلوس ولا الامكانيات الماديه

تحياتي لك ونورت يا فندم

صبرني يارب يقول...

ام بوبه

انتى كده اغمن عليكى من حلاوة القصه بقى
هههههههههههههههههههههه

تنوري يا جميل فى اي وقت

هتشوفوا يقول...

الله ده انا جيت متأخر في الجزء الأخير

قصة جميلة جدا وان شاء الله هبقى متابع للقصص الجاية

صبرني يارب يقول...

هتشوفوا

شكرا يا بلدياتي

انت شرفتنا يا باشا

Anonymous يقول...

بصراحة أنا عمرى ماحاولت انى اعلق عند حد قبل كده رغم انى بتابع مدونات كتيييييييير اوى ومعجبةبأسلوب ناس كتيرة اوى وانت من اهمهم طبعا ياصبرنى بس بصراحة قصتك اكتر من رائعة وواقعية لدرجة لا يمكن تصورهالدرجة انى قراتها اكتر من مرة وعلى فكرة هى حصلت مع ناس كتير حتى لومش بنفس السيناريو لكن بنفس النهاية  

صبرني يارب يقول...

الغير معرف

انا متشكره لك اوي اوي

حقيقى تعليقك اسعدنى جدا

واتمنى فعلا تكون قصتى لمست الحقيقه الى عايشها الشباب فعلا

ما تبقاش تبخل علينا بالتعليق يا باشا

وتنور فى اي وقت