السبت، 27 فبراير 2010

انا نوتي الفتانه


هالوز عليكم

طبعا انتم فاكرني صبرني

هع هع لا انا مش صبرني

انا قرينتها

نيهاهاها هاها نيهاهاهاهاها

صبرني فين ؟؟ لا مشغوله مش فاضيالكم عقبال عندكم بتجهز عشان تبيض الشقه

وانا انتهزت الفرصه دي عشان اجي بقى ارغي مكانها شويه وبالمره افتن عليها كام فتنه كده اصلها خنيقه وخنقاني الحقيقه

اه لسه ما عرفتوكش على نفسي

انا اسمى نوتي الفتانه
عندي 18 سنه ........ اااااااااه بس امال انتم فاكرنى قد صبرني ولا ايييييييييه
والى فوق دي صورتي وانا فى كي جي تو

وطبعا باين من اسمي صفاتي الشهيره

وعليه فانا قررت انى افتن لكم على صبرني بقى وهابهدلها
اه نداله بقى .مش انا قلتلكم خنقانى
ده مبهدلاني يا جودعان

طبعا انتم فاكرينها هاديه وعاقله وعماله تكتب كلام عاقل ورزين والى فيكم شافها ممكن يقول فى عقل باله ده شكلها بريء كده وهبله

الحقيقه بقى غير كده خالص هى اينعم هبله مافيش مشكله انما هى مش هاديه اطلاقا وبتاتا البته ده شعنونه على مجنونه رسمي وساعات بتبقى مفتريه اوي .وما بتبطلش زعيق وصريخ طول النهار قدام عيالها الشعانين زيها . وعصبيه جدا وبتهيئلي انها ممكن تاكل دراع أي حد

ولا المطوه الى شايلاها يا خراااااااابي مفتريه اوي

ده جوزها ده بيستحمل بلاوي
وسمعته كذا مره بيبصلها وهى بتتشعنن كده ويقول فى سره
مجنووووونه والله
والقرين بتاعه قالي انه كل شويه يقوله سيبك منها ياعم ما تردش عليها ده مجنونه
اه ما القرين بتاعه صاحبى انتيمى يعنى ياما ضربنا حشيش سوا

وبعدين نفسي تبقى منظمه شويه مجنونه فى كل حاجه ممكن تقعد ترتب فى الشقه ساعتين وتهبطنى معاها راحه جايه وبعدين تنكشها فى نص ساعه هى وعيالها العفاريت

اه هى كمان بتنكش والله وكل ما اكلمها واقولها اتعلمي النظام شويه تقولي باقولك ايه ما تصدعنيييييييييش ما باعرفش اعيش بالمسطره انا

وبعدين انا عايزه افهم هى لازقالكم هنا ليه دى كل ما يكون عندها دقيقه فاضيه تجري تقعد هنا مجنونه دي ولا اييييييه . اقولها اتهدي يا بنتي روحي اقعدي تحت البطانيه وامسكي الرموت وقلبي واتفرجي على أي هلس ادى مخك اجازه وجربي الانتخه . تنفضلي برضه تيجى هنا يكونشي هو ده ادامن الانترنت الى بيقولوا عليه ولا ايه
الادمان شاع فى البلد برضه

ولا بقى ما اقلكوش عندها عقده نفسيه مركبه من التدخين والمدخنين . يووووووووه خنيقه تشم ريحة الدخان فى البنى ادمين من على بعد مترين
ولو شمت دخان نفسه بقى تقعد تكح وتدمع وتصدعنا

وكل ما تكتشف ان حد تعرفه بيدخن تتقفلها يومين على كده وتقولك ما كنتش احب حد باحبه يطلع بيدخن مش انا باقولكم هبله . ما كل واحد حر وبعدين ماله الدخان قشطه حتى وبيدفى الجو
ولا لما تشوف مزه بتدخن يا لهووووووووي تصدعنى بقى دى مزه رقيقه ما ينفعش تدخن وتطلع دخان يع من بؤها ومناخيرها كده .
مش عارفه ايه الهبل ده ما انا باضرب حشيش اهو وباعمل دماغ خيال زي الفل سيبكوا منها بلاش دوشه

ولا بقى اقولكم على الهبل المتقع بتاعها .

الله فرحانه اوي انى بافتن عليها نيهاهاهاها

من حيث الهبل بقى عندها نقطة ضعف هبله اخر حاجه . بتقولك ما عنديش اخوات صبيان وكان نفسي يبقى عندي اهيء اهيء
بتنجان جدا ههههههههههههههههههه
وافضل اقولها يا بنتى كان هايقرفك وانتم صغيرين ويتخانق معاكي ويصدعك مافيش فايده

وبعدين أي حد بقى يقولها انا حاسس انك اختى ويثبتها بكلمتين اخوه من دول . عرق الاخوه ينقح عليها موت وتصدق بقى وتعيش الدور وحاجه اخر هبل

فاكرين الواد الى كان ضحك عليها وعيشها قصة مرض مريعه وياما عيطت عليه سنه ونص فلقتنى كان برضه داخلها من السكه دي واحن اخت واحسن اخت لما فلقنا .
وغلبت اقولها بيضحك عليكى وشكله بيشتغلكم اخر حاجه بس هى كانت بتنفضلي بررررررررررضه هرياااااني تنفيض

وتقولي هو حر حتى لو بيعمل كده حسابه عند ربنا انا ما اقدرش اكذبه

ولعلمكم لسه برضه دي نقطة ضعفها ولسه عرق الاخوه ده بينقح عليها كل شويه
بس اقولكم الحق برضه انا حقانيه هى ساعات بيطلع معاها حق وبيبقوا زي اخواتها بصحيح وناس خنيقه زيها كده برضه


وبعدين اكتر حاجه بتخنقنى منها حنفيات الحنان بتاعتها بايظه خالص عايزه جلده وساعات بتبقى عايزه تتغير اصلا
واي عيل عبيط ممكن يضحك عليها ويقلبها فى خمسه سته لتر حنان ويمشي
خنيقه مووووووووت غلبت فيها اعلمها تكبر الدي وتطنش

وتقول اااااه عندك حق يا بت يا نوتي انا ما عدتش هاعمل كده ابدااااااا لازم اتعلم الطناش والانتخه وانا هاعمل واسوي
وفى الاخر يطلع كل الكلام فاتشه واوانطه وبترجع فى كلامها

ايه تااااااااني ايه تااااااااااني مش عارفه

فكروني افتن عليها بايه كمان

يا خرااااااااابي ده جت جت جت

هاتموتنى من الضرب
مش باقولكم مفتريييييييييييييه

اوريفوار عليكم بقى فوتوكوا بعافيه

لو افتكرت حاجه هابقى اجي تاني

مع تحياتي لصديقى العزيز جولدن الى اوحالي بفكرة البوست

هناك 39 تعليقًا:

واحدة مفروسة يقول...

نوتي يا فتانة
ههههههههههههههههه
فكرة نميسة بجد
ههههههههههههههههههه
ايوه كده يا نوتي ابقى احكيلنا على كل اللى بتعملة صبرني
بس براحة عليها علشان هيه طيوبة و جدعة
و قوليلها ان مفروسة نقاش بريمو
لو عاوزة مساعدة
هههههههههههههههه
سلام

مصري جدا يقول...

يعني أحنا اصا أما يطلع لها قرينة كمان؟

دة بخت اية دة بس يا ربي

صحيح قلبل البخت بلاق صاصا وقرينتها في الكرشة

قصدي في البلوجر

سمع هوص (Abo 3li) يقول...

نوتي... اما انك فتانة بشكل!!! يساتر,,,,
ثم ملكيش دعوة يانوتي... لو مكنش ليها اخ في الحقيقة... فهيا هنا ليها الف اخ... مش مستنين منها مصلحة.. وبيحبوها في الله ... علشان هيا جدعة...


تحياتي لصبرني... مش ل نوتي

صبرني يارب يقول...

مصري جدا

الله الله هو انا عملتلك حاجه دلوقتي

وعبدين هما كلكم كده مخنوقين من صاصا ولا ايه مش انا قلتلكم خنيقه

صبرني يارب يقول...

ابو علي

ربنا يخليك يارب ما اتحرمش منكم ابدا

ايوه كده يا رافعين راسي
ههههههههههههه

صبرني يارب يقول...

مفروسه

اي خدمه يا مفروسه

على طول هابهدلها كده


ههههههههههههههههههههه

على فكره والله لسه كنتى على بالي الصبح لما بيضتى ابواب الشقه بتاعتك
هههههههههههههههه

ربنا يخليكى يا مفروسه

جنّي يقول...

السلام عليكم


مساء الخييييييييير .. حشيش ودخان ليلتنا فل .. ولا مؤاخذ دي صورتك يا نوتي وانتي في كي جي ودلوقتي طلعلك رجلين ولا لسه ..
هو فيه ايه يا جدعان هو انا رحت الضاحكون ولا ايه ؟

ولا يهمك يا صبرني انا ها اسلخهالك ..
انت ناسية اني انا جني ..
قرينة ايه وبتاع ايه يا نوتي انا دورت في سجل مدني الجن والعفاريت ما لقتش ليكي كارنيه .. باين عليكي بتشتغلي من الباطن وورقك مبلول .. وبطلي افترا علي الست الطيبة .. ولا تحبي اسلط عليكي شمهورش ..

سلام وتحية

الشعب لابد له من حكومه تشكمه يقول...

عارفاها عارفاها وحفظاها دى حبيبتى من ايام الجيزه:)

بس سيبك انتى بمووووووووووووت فيها والله ,
سكررررررر الاتنين سكر اكتر من بعض:)..

ربنا يخليها لينا ومقولكيش باه على حنفية الحنيه يانهارى بموت فيها,
بس سعات ياصبصب بتعاملنى معامله مرات الاب:( معامله قاسيه فاكره:))

بس سيبك انتى عسسسسسسسسسسسسسسسسل وانتى فتانه كده:)

!! a7mad sala7 !! يقول...

هههههههههههههههههههه

هو دا عيب save password
:D

يا ترى بقي هتمسح الكلام ده لما تشووووفه
ولا ايييييه :D:D

فتاه من الصعيد يقول...

هههههههههه

هبله ايه بس .... ده انتي عثل والله

والعيب عليهم موش عليك يا جميل

البت قرينتك دي مفتريه

اضربيها جامد

تحياتي

Single Mummy يقول...

برافو نوتى

كل شوية كدة اظهرى واحكى لنا عنها عشان نعرفها اكتر واكتر بس عارفة انتى كدة هتخلينا نحبها اكتر بجد

البوست فكرتة عبقرية..برافو عليكى
تحياتى

reem يقول...

يعنى حتى نوتى الفتانة قرينة صبرنى عسوله زيها

هى صحيح فتانة بس دمها زى العسل

يا نوتى صبرنى دى بموت فيها وفي حنيتها

وفتى انتى اعترفتى انها كتير رأيها بيكون صح وبيطلعو اخوات بجد

وبصراحة لما بيكون في حد بيكذب هى بردو بتكون عارفه وحاسه بس من حنية قلبها ونيتها الصافيه بتكذب احساسها وتخاف تظلمه وتيجى على نفسها لحد ما تثبت بالادلة والبراهين

بس قوليهل يا نوتى الف الف مبروك على خطوبة اختها وربنا يتمم لها على خير يارب

ومبروك على الشقة مقدما وربنا معاها في التعب دا

دا اذا طبعا كلمتك يا نوتى بعد كل الفتنة دى

لولا وزهراء يقول...

والله العظيم عسووووووووووووووووووووووول اوى القرين ده اقصدى القرينه بس واضح كده انها مخنوقه منك ع الاخر لانك طيوووووووووووبه اوى اوى وهى بقى عاوزاكى تبقى شريره زيها
برغم انى استمتعت بالكلام لكن كان جوايا احساس بيقول انك حد طيب وحنووووووون جدا جد فعلا اتاكدت من الاحساس ده النهارده بجد
بصى بقى انا مش زى نوتى الكذابه دى انا عاوزه اقولك على نصيحه خليكى زى ما انتى الحنان لازم هيرجع لكى فى يوم من الايام اضعاف مضاعفه وكل حاجه بتعمليها فى حياتك لازم تترد لكى
يا ترى الاغنيه اللى موجوده احتيارك انتى او نوتى لانها حلوه اوى اكيد اختيارك انتى
تحياتى لكى يا ارق صبرنى واحن اخت فى الدنيا كلهااااااا

زهراء

صبرني يارب يقول...

جني

وعليكم السلام يا فندم

ايوه كده يا استاذنا عشان تعرف ان انا ورايا جنيين برضه مش اي كلام يعنى
هههههههههههههههه

بس ايه ورقك مبلول دي ههههههههههههههههههههههههههههه

شكرا لك يا استاذنا

صبرني يارب يقول...

احمد صلاح

لا مش باسيف الباس وورد

بس هى حافظاه بقى عفاريت بقى تقول ايه

ومش هامسحه طبعا عشان انتم بس علقتوا عليه
ههههههههههههههههههه

نورت

صبرني يارب يقول...

شيما

ايوووووووه مرات الاب فاكراها مفتريه ما انا قلتلكوا
هههههههههههههههههههه

مش عارفه فى حاجه بتزغلل فى عنيا كده وانا باقرا التعليق بتاعك

الدبله دي ولا ايه ؟؟

منوره يا جميل

صبرني يارب يقول...

سنجل مامي

متشكره اوي يا جميل ربنا يخليكى

انتى كلك ذوق

ونورتي

صبرني يارب يقول...

فتاه من الصعيد


هاقطعها يا اختي فضحتنى موت

نورتي يا جميل

صبرني يارب يقول...

ريم

وحشاني يا بت انتى اعمل فيكى ايييييه

والله يبارك فيكى يا جميل متشكره خالص

عقبال بنوتاتك ان شاء الله

نورتي يا قمر

صبرني يارب يقول...

زهرا

والله يا زهرا الحقيقه ان كتير كتير بجد باتخنق من نفسي بجد وباقعد اهزأ فى نفسي

بس برضه مافيش فايده عادي وترجع ريما لعادتها القديمه

ميرسي يا جميل انتى الى عسل والله ونورتي

صبرني يارب يقول...

اه نسيت

زهرا الاغنيه دي طبعا انا الى مختاراها وعجبتنى اوي من اول ما سمعتها

لا نوتي الفتانه دي بتسمع انا شارب سجاره بنى مثلا كده يعنى

هههههههههههههههه

الشعب لابد له من حكومه تشكمه يقول...

صبصب حبيبتى اسسسسسسسسسكتى مش انا قاعده فى بلوج طابخين ايه انهاردا:(
اختك بتذاااااااااااكر,,

ولعلمك لو حد قالى كلمه على الاكل هقول صبصب اللى قالت الوصفات دى ,,انا مليش دعوه:)

وبعدين تعالى هنا كل شويه بدخل على الميل علشان اقفشك واوريكى الصور مش بلاقيكى ينفع كده..

وفرحت اوىىىىىىىى ان اختك فتحتها اتقرت ,,بعد مكنتى عصبتينى من الزحمه:))
بس شكلك عملتى حركه جامده وشكمتى الكل:))

على فكره مش بحب القلقاس,,
ركزى معايا اليومين دول ارجووكى,,

الا ياصبصب ممكن تعملى الحمام بيتعمل ازاى وندخل رجليه عكس بعضيهم ازاى:)

هتقوليلى اسالى ماما اقولك ما انا بحس نحيتك بالحنان والامومه :))
مش اتفقنا ولا ايييييييييييه؟؟

اما كنت ازهقك مبقاش انا:)
هخليكى تكرهى اليوم اللى اتخطبت فيه,,:)

مش كنتى شغاله زن عليا,,
هخليكى تعضى على اناملك ندما وتقولى انا اللى غلطاااااااااااانه:)

Wanda يقول...

نوتى الفتانة
تعالى فى حضنى يا حبيبتى و احكى و لا يهمك
و انا اجيبلك حقك من دردر :-)))

عندك 18 و الى قبلك حصل فيها ايه ؟؟ اوعى تقوليلى راحت مع هنادى فى الوبا ؟ لا دردر متعملش كده ابدا
دى حتى بتحب الكروان خالص :-))

ايوه ياستى نوتى انت شغاله مع الانتيم و بتضربوا حشيش الله الله الله ياستى
و اتارى قصص الرومانسية منها بعدين بتشعش كده و ليها مزاج
قولتيلى :-)))

مدمنة نت ياعينى يادردر
لا زعلتينى يا نوتى خلاص حاجزلها فى المصحة معايا :-))

و التدخين :-))) نديها كورس فى تقبل الواقع المقندل و اسطوانة اكسجين
اصل مين حياكلنا و يفدنا بعد كده يانوتى
الا انت ليكى فى طبيخ العفريت ؟؟ بقى ؟؟ و النبى شويت وصفات بقى لاختك وندا
انا ياختى ملياش قرينة انا كفاية متشعبة بالعفريتية :-)))

قولتيلى بقى خلاص نثبتها و نفتح حنفية الحنان قول ما تقوم عليا انا كمان
ايوه ايوه ادينى و النبى نصائح
و انا حشوفك باطناف اعشاب معتبرة
متقلقيش :-)))

سلام يانوتى مستنينك فى المدونات الثانية كمان :-))

رحــــيـل يقول...

:))

ههههههههه ايون فعلا انها كذلك وبعدين اصلا من غير انتى ماتفتنى عليها
هى مش بتستر على نفسهااااااااااااااااا
خالص
وحشانى القعدة معاكى مووووووووت

Tamer Nabil يقول...

اية القرينة المفترية دى

خلى بالك بقى مننها دى فتانة بشكل صعب هههه

مع خالص تحياتى

Haytham Alsayes يقول...

علي فكرة انا مش فاهم حاجة ممكن عشان جديد عليكم
المهم تقبلي مروري

جنّي يقول...

السلام عليكم

كيف الحال ..

الورق المبلول مصطلح يستخدم عند كثير من الفئات التي تتعامل بمستندات البيع ويعني انه مزور او مضروب ..

ايتها خدمة

هتشوفوا يقول...

ايه اللخبطة دي

يعني لما اعوز اخاطب صاحب المدونة اكلم مين,

يا صبرني يا رب والله

صبرني يارب يقول...

شيما

منوره يا اختي والله مستعده اديلك دوره تدربيه مجانا

واظن انا عرضت عليكى اصلا قبل كده
هههههههههههههههههه

تذاكري دروسك كلها يا شااااااطره ها
كلها
وشكرا يا جميل على المباركه لاختي
انا يا ختى ما عملتش اي حركات ربك لما يريد وبس

المهم

بالنوسبه للحمام على الميل بقى اصل ما عنديش له صور مش هاعرف انشره

وبعدين صدعي براحتك المهم نخلص منك
قصدي نفرك بيكى
هههههههههههههههههه

صبرني يارب يقول...

واندا

شوفي البت يا اختيييييييي ما بتصدق

ماشي ماشي انا هاوريكى

بتضربي صحوبيه مع نوتي وتتفقوا عليا مااااااااشي هاقطعك انا

صبرني يارب يقول...

رحيل

مش كده والنبى فاضحه نفسي

ايوه انتى كنتى معانا فى جلسة الاعتراف يوم اللقاء
ههههههههههههههههههه

انا كمان نفسي اشوفك والله
شوفوا كده رتبوا مع شيماء يا ولاد عشان عايزه اشوفكم يوم لواحدنافى الخباثه

صبرني يارب يقول...

تامر نبيل

اه شوف بهدلتنى ازاي والنبى

صبرني يارب يقول...

جنى

افادكم الله يااستاذ سعيد والله ما كنت اعرف
ههههههههههههههههههه

العلم نور برضه

صبرني يارب يقول...

هيثم السايس

معقوله ؟

هو مافيش يعنى يا هيثم انا الى كاتبه البوست برضه

بس باستهبل وعامله انى قرينتى عفريتى يعنى هى الى كاتباه

مجرد فكره مجنونه اوحالي بها حديث مع صديق عزيز

متشكره لتشريفك يا هيثم

صبرني يارب يقول...

هتشوفوا

والله هو صحيح واندا مسميانى شجرة الدر

بس ممكن تستنى على ما نشوفلك بيبرس ولا محمود فى اي دكانه قريبه
هههههههههههههههه

نورت

طهر فؤادك يقول...

السلام عليكم ورحمة الله وبركاتة

عيشتينا فى فكرة احتلال المدونة هههههه

بجد فكرة جميلة ورائعة وطلعت منك حاجات جميلة واستمتعنا بالفكرة وبالاسلوب ... ومستنى زيارتك ومعاكى قرينتك الفتانة ..:)

Shaimaa يقول...

صبصوبة ...
أيوة.. اسمى على اسمك ومن بلد واحدة... وممكن أطلع قرينتك كمان.... يعنى أبقى أنا ونوتى...
ههههههههههههههه

أنا أول مرة أعلق عندك بس ميتعاكى من بعيد لبعيد

وبعدين ايه البت نوتى الفتانة دى ... ده مسبتش حاجة مقلتهاش .. يا ساتر.... خدى بالك منها وركزى كدة معاها
وبعدين ايه موعد عودة صبرنى عشان أبقى عارفة؟؟؟!!!
خالص تقديرى يا صبصب

صبرني يارب يقول...

طهر فؤادك

منوووووور يا يا باشا

الف شكر على الكلام الجميل

وعنيه حاضر هاروح طبعا

صبرني يارب يقول...

شيماء

اهلاااااااا يا جميل نورتي

طب متبعاني قولي نحن هنا عشان اشوفك واتابعك انا كمان

انا هاعرف مكانك ازاي طيب

عموما نورتي يا جميل وانا حطيتك فى القايمه عندي هاتلاقينى عندك فى كل بوست ان شاء الله

وانا جيت اهو ما تقلقيش
ههههههههههههههه