الاثنين، 22 فبراير 2010

البرادعي .... انا عايزه من ده يا حزمبل


السلام عليكم يا اصدقائي


طبعا انتم عارفين انى ماليش فى السياسه ولا التطبيل اطلاقا
بس انطلاقا من مبدأ
انا من البلد دي
هاتكلم عن البرادعي

اول ما بدأوا الناس يتكلموا فى موضوع البرادعي ويهللوا ويسقفوا وكان تبريراتهم فى كده مش منطقيه بالمره بالنسبه لي عشان نعمل كل ده

وكنت متغاظه اوي اوي من الناس وباقول بطلوا تسقيف وحاولوا تفكروا وتفهموا ولحد الان مش عاجبنى الى بيحصل والتهليل الى فى رايي نصهم مش فاهمين حاجه الى بيسقفوا

بما ان المنادين بالبرادعي تقريبا من الشريحه المثقفه كان نفسي نكون موضوعين اكتر ونقول والله لو البرادعي عايز يرشح نفسه لانتخابات الرئاسه يجى يورينا نفسه ويعرف عن نفسه وفكره وطريقه وبعد كده نتفاهم

انما كان الراجل لسه حتى ما ابداش استعداده انه ممكن يعمل كده واحنا شغالين تطبيل وتهليل . كنا ما نعرفش ايه هى توجهاته ولا افكاره وبرضه بنهلل

كانت كل مؤهلاته الى باسمعها من المطبلاتيه انه كان فى هيئه دوليه وهما يعنى هيختاروا واحد وحش ؟؟؟؟

وده امعانا منا فى نظرية عيش بصمجي وريح دماغك

بندور على حد نمشي وراه ونقول موافقه وخلاص

انا كان املي الوحيد فى البرادعي انه عنده ميزه واحده مهمه اوي اوي انه خارج الحلقه بتاعتهم خاااااااالص جاي من عالم اخر ودى ميزه لنا اه. لكن بتصعب الامور اكتر

شوفت جزء من لقاء له من كام يوم قلت ضاع الامل يا ولدي وحسيت انه مش عارف يتكلم وقلت لا مش ناااااافع شكله الراجل ده

كانت كمان فكرة انه عايش بقاله عمر مقلقه شويه لكن بالمقارنه بالبدائل قلت مين فيهم عاش معانا ؟؟؟!!!

امبارح منى الشاذلي عملت معاه لقاء حبيبتى منى دي يا اخواتي

انا ما شوفتش اللقاء كله شوفت اغلبه ( اه نمت شويه فى النص )

لكن كنت فى اخر اللقاء قاعده باقول هيه هيه هيه وباغنى اغنية سعاد حسنى الخالده

انا عايزه من ده يا حزمبل انا عايزه من ده .

انطباعي عن البرادعي من لقاء امبارح استنادا الى كلامه واحساسي الشخصي

انه محترم وعاقل وفاهم ونضيف

وعن توجهاته وسياسته من وجهة نظري صح ميه فى الميه وهى بتتلخص فى جمله واحده

قبل ما نعمل أي حاجه فى الدنيا لازم الجعان ياكل والمريض يتعالج والباقي كله يجى بعد كده

(ما ينفعش نعمل تنميه فنيه وثقافه لناس جعانه والله يا ناس )

عجبنى جدا جدا رده على منين هاتجيب موارد (اصل مش هانستهبل يا ناس احنا مواردنا مش قليله )

كان فى حاجه واحده قلقاني ا لحقيقه الراجل مستكين كده وهاااااادي خفت وقلت الحكايه مش هاتنفع ولا ايييييييه

اصل الهدوء ده عايز السكينه فى الحلاوه . والحلاوه خلصت من زمان طب ايه بقى

وبعدين بقى فى اخر اللقاء لما منى قالتله هاتقدر تعمل مؤتمر شعبي وهاتقدر تقابل الناس فى بيتك
رد عليها رد جامد جدا
كنت عايزه اقوله زي البت شيما اموت انا فى الراجل الحمش

انا يوم الانتخابات الرئاسيه الى فاتت كنت كل ما اقعد اتفرج على المسخره الى بتحصل واتابع فصول المسرحيه الهزليه الى كانت شغاله

ارفع اديا للسما واقول ياااااااااارب . يارب من عندك حاجه تحصل غير متوقعه . حاجه خارج دايرتهم .

حاجه تخلي خيوط الماريونيت الى فى اديهم تقع ولا تتشنكل فى بعضها وحركتهم تتشل.

تكونشي هى دي الحاجه يا ولاد ؟؟

خلص اللقاء وكلي امل الحقيقه انه باينه ممكن . اه والله ده شكله فى امل لسه . اه اه امل من بتاع زمان ده .

مافيش دقيقه وجه رضا من بره باحكيله اللقاء ( ايوه انا المراسل الخصوصي طبعا )

باقوله منى الشاذلي بقالها اربع ساعات بتتكلم مع البرادعي .
قالي هاااه ايه الاخبار
قلتله حبيته يا اخويا حبيته

قالي خسئتى وبتقوليها فى وشي

وبعدين حكيتله الكلام وانا مفعمه بالامل ( حلوه موت مفعمه دي )

فقام تطوعا كده منه راح محطم امالي وقالي هع مش هايحصل طبعا . الدستور بيقول انه لازم يبوس رجل اعضاء مجلس الشعب والحكم المحلي اولا عشان ينفع يرشح نفسه . ودول بالظبط افراد الفريق اياه بالاشبال كمان

وهكذا استمرت المناقشه يجى ساعه وهو بيحطم فى امالي . وبعدين قالي اوعدك لو غيروا الدستور انا هابقى ارشح نفسي للرئاسه لما افضى

قلتله الللللللللللله طب انا هانتخبك بس تخلينى رئيس الوزراء

قالي لا طبعاااااااااا

قلتله طب خلااااااااااص انا كمان هارشح نفسي ولا حدش احسن من حد اهو حتى لو انت الى كسبت ساعتها تبقى
تخلينى وزيرة الخارجيه زي الحاجه هيلاري اهو حلو مش وحش برضه

قالي هعععع لا يا ماما لاااااااا . دى كانت مرات الى قبله مش مراااااااته هو .

وبكده تكون كل امالي اتحطمت ؟؟؟

لا طبعا كلا البت . عندي امل فى ربنا بجد ان ربنا يرحمناااااااااااا . احنا اينعم نستاهل الى بيجرالنا بس والنبى غلابه يارب ونفسنا نشم نفسنا .




هناك 70 تعليقًا:

blackshwak يقول...

والله أنا أختلف مع الأستاذ رضا في إن صحيح هو عنده حق إن الدستور كده لكن
زي ما حضرتك بتقولي
لازم يكون عندنا أمل

هسمع الحلقه بتاعت مني مع البرادعي وأرجع تاني

تحياتي علي الموضوع الممتاز

سلااااااااااام

صبرني يارب يقول...

محمد
اهلا بك اولا

والله هى الحكايه مش حكاية انه ما عندوش امل
بس حكاية انه خااااااايف يحلم تقريبا

ولعلمك انا كمان خايفه احلم اصل خيبة الامل وحشه اوي يا محمد

تحياتي لك ومستنياك لما تشوف الحلقه

Wanda يقول...

انا بقى اجيب الحلقة منين دلوقتى ؟؟؟
شوفيلك حل :-)) يا تقوليلى الرد الحمش ايه :-)))

صبصب
بصى ملكيش كلام فى السياسة ده ميدخلش على واندا
اطلعى من دول
ما السياسة هى الحياة
و الحياة هو ايه غير الشغل و الجواز و الاولاد و الحب :-)) شوفتى انت بتتكلمى فى السياسة بالورب :-)))

برادعى
عايزة يعمل حاجة واحدة يقدر يلغى المادة ديه من الدستور
اصل علاقاته الدولية :-)) ممكن تساعده قوى
بس هو فى حد ذاته

افكر لما اشوف دماغه الاول
مش اى حد اجرى وراه
تعرفى لو محجوب الى كان ماسك اسكندرية رشح نافسه و الله اختاره
راجل حمش كده و بينفذ على طول و بعدين ممكن يتكلم (صحيح اتعكم دلوقتى :-)) بسبب حب الناس :-))
صبرى ابو طالب الى كان ماسك القاهرة زماااااااااااااااان (لو لسه عايش )
بطرس غالى السكرتير السابق للامم المتحدة

كده يعنى :-) اشوف افعاله الاول

بصراحة البرادعيى فعله لحد دلوقتى معجبنيش ليه قوليلى ليه ؟؟
و هو فى منصب جامد و قال مفيش نووى فى العراق:-)) كاتموه بجائزة نوبل للسلام
ياسلام على ايه ماكلمته اترمت فى الارض
هو حاسس انه عمل سلام ؟؟ بجد
ما العراق برضه اضربت و متبهدله اهى
لو كان رفض الجايزة او استقال ساعتها كان اكرم :-(( يبقاله وقفه و يبقى حمش فعلا مش قولا

عايزة تبقى رئيسة الوزراء :-)
حاضر اول ما ترشحى نفسك
حاختارك يا شجرة الدر :-) لااخذ بالقبقاب :-)) بس خلى بالك من ام على :-)) بس

و الله ليه لا:-) متحاول واحدة زى الكاتبة سكينة فؤاد ترشح نفسها و الله بدون دعاية حتى و نشوف الستات ممكن يدوها صوتهم و نعمل قلبان :-)))))))))))))

نجاةو اعشق البحر
اقول بصرة :-))؟؟

adel يقول...

قبلها بيوم عمل لقاء مع عمرو اديب
كان افضل 100 مرة لان عمرو تقريبا كان مع الحكومة ياما كان عنده اوامر عليا

المهم الراجل انا مش معاه ولا ذده بس الحقيقة مفيش اي حاجة لسه اتعملت عشان اتعاطف معاه
ببس الحقيقة الشئ الوحيد اللي يشهد ليه انه نضيف و انضف الموجودين حاليا

بس لو اترشح نبقي نفكر

انا بكره مني الشاذلي دي علي فكرة انسانة اوفر قوي و تنكة و .... للغاية يعني

فتاه من الصعيد يقول...

انا لسه بشوف للقاء ع اليوتيوب

اتمنى يطلع وحش علشان ما ازعلش ... لانه فعلا صعب يترشح وصعب يغيروا الدستور

الدستور اتغير وشويه البهلوانات بتوع احزاب المعارضه دول موجودين وماكنش في خطر منهم

تحياتي

عطش الصبار يقول...

صبرنى
انا فعلا فى البدايه كنت رافضه موضوع البرادعى لانه زى ما كنت اعتقد انه راجل اكاديمى مالوش فى الاداره ومش كل واحد يقدر يحكم شعوب متناقضه فى رؤيتها للحلول اللى ممكن تنقذ البلد من وضعها الحالى
ولكن وآه من لكن
سمعت له حوار مع احمد المسلمانى وكم كانت فرحتى عندما وجدت رجلا فاهما متعمقا فى السياسه حاملا معه روشته علاج مصر من امراضها (الديمقراطيه+العداله الاجتماعيه)
اذا هو فاهم لاالام الشعب لم تجعله الغربه ولا الثقافه الغربيه الامريكيه ان تنسيه اهم ما يعانيه الشعب
صبرنى
انا كمان عايزه من ده
لكن ربنا يستر واملنا فى ربنا كبير
تحياتى

عايش... ولكن !!!! يقول...

اسمع كلامك اصدقك
اشوف افعالك استعجب
:)
معرفش بصراحه ايه ممكن يحصل لو البرادعى قفش الرئاسه
لكن كلنا بنجرى ورا اى تغيير
اصل مش هيكون اسوأ من اللى احنا فيه

أبو حميد يقول...

إيه؟
بتقولى عايزيين نشم نفسنا
طااااااخ طيييخ طاخ
اه ه ه ه ه
لأ لأ مش عايز أشم حاجة
ياعم أنا ماليش دعوة أنا جيت هنا غلط
أه ه ه ه
طب وانا مالى ماتشوفوا اللى كاتبة البوست
.
.
.
.
ونطلع من كده إن حزومبل قرر يرجع فى كلامه بعد جلسة إقناع هادييييييية

Single Mummy يقول...

عزيزتى
تفتكرى فية امل؟يغير الدستور او احد موادة دا محدش يعرف يغير اسم شارع فى بلدنا دلوقتى

صبرني يارب يقول...

واندا

ده جزء يا جميل من الحلقه

http://www.youtube.com/watch?v=qggg8yFnj0o
ودوري على اليو تيوب هاتلاقيه على اجزاء

اي خدمه يا معلمي

بالنسبه لموضوع العراق
يا بنتى انتى بتحكمي غلط جدا من وجهة نظري

يعنى هو كان اخر سلطاته انه يقول لا مافيش

هما كانوا بيضغطوا عليه عشان يقول فى ويديهم شرعيه دوليه

قال لا مافيش وحط صباعه فى عنيهم

سكتوه عن ايه

هو اصلا ما كانش يقدر يعمل اكتر من كده

من وجهة نظري انه لو كان استقال ساعتها يبقى بيفضى لهم الساحه وبيتخلى عن المسؤليه

عارفه لما عادل امام كان بيقول لو كل واحد ساكن تحت رقاصه هايعزل كانت مصر كلها عزلت ؟

بالظبط كده لو كل واحد بيتعرض لفساد وضغط الفساد فى العالم كله استقال يبقى كل النضاف هايبيعوا سميط وبيض وجبنه

ما ينفعش ابدا نفكر كده

وبعدين مالها يا اختي شجرة الدر
بذمتك مش كانت جدعه وميت فل وخماشر ؟؟

وياما قالتلكم التردد يا عزيز ايبك مرض الجنس البشري


اه والناس الى انتى قولتي عليهم دول

اعرف اه محجوب و فعلا فعلا حب الناس خلاهم يركنوه على الرف لا ويعملوه فى باكت بلاستك كمان

بطرس غالي الله يسامحك كفايه ابنه والى عامله فينا

صبري ابو طالب برضه كان اسمه فله

انما بررررررررررضه يا واندا كل دول من الفريق القومي بتاعهم

تحت ضرسهم بمعنى اصح

علاقته الدوليه تسمحله يضغط لتغيير الدستور

اتمنى من قلبي ده يحصل
مش عشان البرادعي نفسه يبقى الرئيس

لا عشان ده حقناااااااااااااااااااااااااااااااااااا

سلكي ودانك عشان دي نجاة باحلم معااااك

هههههههههههههههه

منوره يا جميل

صبرني يارب يقول...

فتاه من الصعيد

صعب بس مش مستحيل
انا عندي امل

الدستور اتغير المره الى فاتت لصاااااااالحهم
مش لصالحنا احنا
دى مسخره

صبرني يارب يقول...

عادل

عمرو اديب مش مع حد خالص

عمرو اديب مع التطبيل ما كان ما تلاقي تطبيل تلاقي عمرو

انا معاك انه لسه البرادعي ما عملش حاجه عشان نقول اه ولا لا

بس انت عارف يا عادل

انا لما باجي اروح لدكتور ما باخترش اشهر واحد ولا امهر واحد

باختار اكثر واحد عنده ذمه وضمير اولاااااا

عشان الى عنده ذمه وضمير حتى لو مش عارف هايقول مش عارف


انت بتقول انه لا شك انه نضيف

طيب والنبى يا عادل نفسي هفاني على شوية نضافه

والباقي كله هايطلع فى الغسيل مش مشكله

منى الشاذلي ما بتحبهاش
يا رااااااجل

انا عن نفسي باحبها وباحترمها

وشايفاها ست مثقفه جدا ومش تنكه انما معتده بنفسها وواثفه فى نفسها

والناس الى اتعاملوا معاها فيس تو فيس قالوا عنها انا ست ذوق ومحترمه وبتحترم ضيوفها جدا حتى لو كانوا ناس مش معروفين ومش مهمين

الحياه وجهات نظر يا دوله

لما تيجى تتجوز هاشوفلك عروسه مش شبه منى الشاذلس
خليك انت فى منى ذكى

يا ما بقى نشوفلك اخت بولين
نيهاهاهاهاهاها

صبرني يارب يقول...

عطش الصبار

بالظبط يا فندم انا حسيت كده

انه الراجل فاهم برضه وعايش مشاكلنا مش اوانطه

وخلينا بقى نهتف انا وانتى ونقول انا عايزه من ده يا حزنبل على الله حزنبل يعبرنا

صبرني يارب يقول...

عايش ولكن

ماهو احنا لسه ما شوفناش افعاله يا فندم

والنبى سبونا نشوف

والنبى اي حد يقفش النظريه اصلها اعلى من كونها مجرد احسن واوحش

النظريه كونها اقتلاع شجرة الفساد

حتى لو كان بزرع شجره غيرها وانما هاتكون على الاقل مش ضاربه بجذورها فى الاررررررض

تحياتي ونورت

صبرني يارب يقول...

ابو حميد

مين ده يا جماعه

ما اعرفوووووووووووش

انت تايه يا عم الحاج ولا ايه
هههههههههههههههههههه

عموما الى بيخااااااااااااااف يطلع بره

صبرني يارب يقول...

سنجل مامي

بتهيئلي احنا ممكن نغير جلدنا اسههههههههل

بس انا باقول يارب

باقول يارب تفلت اديهم وتفرط ما يعرفوش يلموها

مش عايزه الحكايه توصل لانها تنتهي بمجزره

تحياتي ليكى ونورتينا

Mano يقول...

شعبنا شعب جميل اوي
بيهلل وخلاص
هما مش عايزين البرادعي بعينه
هما يهمهم التغير وخلاص
يعني لو اي حد قال انا هارشح نفسي برضوا هايجروا وراه ويهللوا
ومن وجهة نظري انا شايف ان البرادعي لا يصلح انه يبقي رئيس للدوله دي اطلاقا
تحياتي

مصري جدا يقول...

طبعا

أصلة أصلعاوي

زي رضروض


طبعا الحب في القلب زي الرز في الكوسة ما يبعدوش عن بعض أبدا

صبرني يارب يقول...

مانو

ايوه فالحين فى التسقيف

ينفع او ما ينفعش ده ما نقدرش نحدده دلوقتي

صبرني يارب يقول...

مصري جدا

رضروض

يا نهاري

حد يدلع حد كده

ده انا لو قلتله يا رضروض دي ممكن يغزني
هههههههههههههههههه

blackshwak يقول...

شفت الحلقه
عشره / عشره

عملتلها بوست من هنا :

http://storyendhere.blogspot.com/2010/02/blog-post_22.html

وعجبتني الكلمه الحمشه اللي في الاخر

عجبني الكلام عن :

١- فكرته في تعديل التعليم
٢- فكرته عن تعديلات الدستور
٣- مبادرته أنه ينزل للشارع يشوف المناطق العشوائية
٤- كلامه عن انه قام بالتبرع بقيمة ٥٠٠.٠٠٠ دولار قيمة جائزة نوبل للجمعيات الخيرية واللي ممكن البعض يشوفها من ال ( المن والاذي ) أو الرياء لكن أنا شوفتها انه ليضرب مثل يحتذي به للناس الميسورة الحال
٥- أنه قال ان الصراعات والصدمات علي السلطه هنا عمرها ما كانت بتخوفه
لا هو ولا والده اللي كان نقيب للمحامين ووقف ضد عبد الناصر والسادات
وأنه اللي يدخل مع الولايات المتحدة الأمريكية في صراع تكون الصراعات اللي في مصر دي بالنسبة له لعب أطفال
٦- أنه قال أنه لن يرتاح إلا لما يري أن كل مواطن مصري مكفول له حق العيش الإنساني الكريم مثله مثل أي إنسان في العالم

اللي معجبنيش :
١- إن اللقاء كان قصيرا كنت احب ان استزيد من اراء خبير مثله
٢- إنه فضل انه يخدم بلده من خارج الإطار السياسي واللي خلاني أحس انه مش هيرشح نفسه

تحياتي 

صبرني يارب يقول...

محمد

اه تمام كلامك

لا بس هو لسه عنده رايه بانه هايرشح نفسه لو الظروف مواتيه

بس الى انا شايفاه انه متخوف من الموقف الشعبي

يعنى من الاخر شايف اننا مطبلتيه واننا وقت اللزوم هانخلى به ومش هاننتخبه ولا هانعبره


وعلى فكره ما عرفتش ادخل مدونتك

شرفتنا يا محمد

نجم يقول...

آسف
الشباب اللي طرح فكرة ترشيح البرادعي
وكون مجموعات لتقوية الفكرة فعلا كانوا
عارفين اتجاهات البرادعي مش عملوا كدا هبل
ولا بطيخ يعني
ممكن في قصور عند البعض مش يعرفوا اتجهاته
والحمد لله بدأت تظهر فعلا زي ماحضرتك ذكرتي
في اللقاء الأخير بين الدكتور محمد والابله مني
:d
شكرا علي التدوينة دي

ستيته حسب الله الحمش يقول...

والله لو عمل خمستلاف حوار
والله حتى لو محترم
لن اتنازل
انا احط أمل في نضافة البلد دي

وبعدين نتسك قلم على قفانا يطلع من عينينا

تعرفي يا صبرني الراجل ده ممكن يبقى مرشح امتى؟
مجرد مرشح مش رئيس كمان

لما ماما الحاجة الكبيرة تقول عدلوا المادة 76
طب دي تتعدل ازاي وابو الزهور اليانعة قاعد على مراوحها هو وشلة الأنس؟
انسي

ماهو يسمع كلام الحاجة في كل شيء
لكن لما يقولوا له اسمع الكلام يا نطلع عينك
يقول طلعوا عيني علشان الزهور تيجي برضه مكاني

انا مع ابو رياض
مفيش حاجة خالص
انا مجنونة ابتدي اعيش الدور وأفوق على لعبة
نووووووووووووووووووووووووو

بس زعلانة منه
طب كان قال لك ها أخليكي رئيسة الوزراء
كده يبين نيته قبل الهنا بعشرتلاف سنة
خلاص خلاص
مالناش غير الصين

لولا وزهراء يقول...

ايه البوست اللى داخل دماغى ده
هههههههههههههههههه
بصى يا صبرنى مع كاما احترامى وتقدير للدكتور البرادعى ده رجل دبلوماسى يعنى راى واحده صديقتىب بيتكلم بالشوكه والسكين
بصراحه انا استغربت من كمية الناس اللى خجرت تستقبله فى المطار الشعب ده غلباااااااااااااان اوى اوى بجد
لكن احنا مش ينفع معنا حد بيتعامل كده بهدوء ودبلوماسيه وكمان هو بعيد عن مصر يعنى مهما كان مش عارف اللى بيحصل فيها وفينا غير طريق الجرايد واللى يعيش فى مكان يعرف اهله بيتعاملوا ازاى يعنى لازم يبقى عايش هنا علشان يحس بينا
يا ست الكل اللى موجودين هنا اصلا مش حاسين بينا فمابالك بحد بقى عايش بره فى البلاد النظيفه اوى
على فكره نا ماليش فى السياسه خالص مالص

ياريت بس تحجزى لى معاكى وزاره وبعدين انا ممكن اخترع وزاره جديده اسمها وزارة سمعنى شكوتك وانا بقى اقعد اسمع شكواى الناس لانها هوايتى الاصليه
يلا بقى اول زياره ومعها كمان وزاره ايه الهنا اللى انا فيه ده كله
اتمنى لكى النجاح والسعاده

زهراء

خواطر شابة يقول...

انا اكتشفت شئ واحد ان الاعلام يلعب دور كبير في توجيه الرأي العام في كثير من المدونات وجدت ان العديدين غيروا موقفهم من الرادعي وتعاطفوا معه بل وأمنوا به بعد حلقته مع منى الشاذلي

القدر و انا يقول...

ريم
ازيك يا حبيبتى
والله انا ما عندى امل اطلاقا ان حاجة ممكن تتغير
ولو جالنا 100 برادعى
الديمقراطية عندنا قوية جدا ما احنا اللى واضعين بنودها
واول واهم بند عيش كما تحب بس لا ترى لا تسمع لا تتكلم والا حيطلع تيت تيت اللى جابوك
تحياتى يا اجمل رئيسة للوزراء
اول مرة اشوف ريسة بتطبخ حلو كده

جنّي يقول...

السلام عليكم

البرادعي حديث الساعة .. بصراحة اخويا رضا عنده حق بس مش علشان الدستور وبوس رجول اعضاء مجلس الشعب المقشفة .. بصراحة اراه لا يصلح لانه لن يزيد عنهم الا بالدكترة قسوف يكون العوبة في يد امريكا كما كان ايام الوكالة اياها التي رأت كل المفاعلات الذرية عدا مفاعل ديمونة اليهودي ..
لا اقول هذا حبا في مبارك والوريث لاني اكرههم مثل كراهية البعض للكرشة ..

سلام

sony2000 يقول...

والله انا اهم حاجه عندي ان يحصل تغيير فعلا ويكون في امل لبكرا
ان الله لايغير مابقوم حتي يغيرو مابأنفسهم
تقبلي مروري وتحياتي

صبرني يارب يقول...

نجم

راجع كلامي لانى ما قلتش ان كلهم مش فاهمين حاجه وفى البطيخ
مع ان انا باحب البطيخ جدا

انا قلت نصهم مش فاهمين حاجه وبيطبلوا فى الزفه

وده شيء ما حدش ينكره ابدا

ونتمنى من الله انه يكون خير

صبرني يارب يقول...

ستيته

ايوه ماشي يا ستيته بلاش نعيش الدور ونفوق على لعبه

بس بلاش نموت الامل فينا

باقولك انا بادعي ربنا تخرج من اديهم غصب عنهم
بهدوء

اصلها هاتنتهي هاتنتهي

نفسي تنتهي بهدوء مش بدم

وبعدين الوزاره بتاعتنا ان شاء الله
فى الصييييييين بقى

هانبهدل الدنيا هناك تيجى معايا ؟

صبرني يارب يقول...

لولا وزهرا

زهراء يا حبيتي

ما تتفرجيش على القناه الاولى والتانيه ولا تقري جرايد الحكومه ولا تتكلمي مع حد بيعمل كده
هههههههههههههه

اول لما شوفته بجد قلت عليه زيك كده
هادي وغلبان

لكن لا لا مش كده بجد الراجل جامد موت الحقيقه حمش حمش يعنى


ومين دول الى موجودين معانا

انا عمري ما شوفتهم يا زهراء

ولا هما عمرهم حسوا بينا يا ماما

لا بياكلوا من اكلنا ولا بيشربوا مايتنا ولا ماشيين فى زحمة شوارعنا ولا الجوع قارصهم زي ما قارص 40 فى الميه من الشعب ا لغلبان

صدقينى انا كنت باقول زيك بس الراجل مش بيقرا فى الجرايد لا لا لا

الراجل فاااااااهم يا جماعه انا ليا نظريه فى الاشخاص

والوزاره الجديده بتااااااااااعتك ما يهمكيش

بس فى الصين بقى

صبرني يارب يقول...

خواطر شابه

ابسلوووووووووتلي الاعلام مؤثر

عشان كده هما بيحاولوا يسيطروا عليه

الناس مش اتعاطفت معاه

الناس الى فهموا كلامه لقوا كلامه منطقي ولقوا شخص محترم

ومنى بجد من وجهة نظري محترمه وبتقدم اعلام محترم من غير هتفات ولا فرقعات

نورتي يا جميل

صبرني يارب يقول...

القدر وانا

عارفه هاجيلك البيت انا اقولك ان اسمي شيماء مش ريم
ههههههههههههههههههههههه

انا جيت عندك المدونه على فكره ما عرفتش اعلق على كلام مرموره مش عارفه التعليقات عندك مش شغاله معايا ليه

والطبيخ بقى يا باشا ده اهم مباديء الوزاره الجديد
معا ضد الجوع بقى وكده

فى الصيييييين هنا مش نافع
ههههههههههههههه

صبرني يارب يقول...

سوني

اينعممممممم

ادينا بنحاول نغير ما بانفسنا والله العظيم

وباقول ياااااااارب لا تاخذنا بما فعل السفهاء منا ويرحمنا بقى

تحياتي لك

صبرني يارب يقول...

جني

بصراحه يا جماعه انا شايفه اننا فى مسألة النووي دي احنا ظالمين الراجل

الراجل يا ناس مش سلطه تنفيذيه

ده برضه اخره فتش هنا يا ذكي يا قدره يفتش بس ما يقدرش يعمل اكتر من كده


والعصابه ما حدش عايزها بتهيئلي هما نفسهم مش عايزين نفسهم ده انا زهقتلهم

نورت يا استاذنا

هتشوفوا يقول...

أزيك يا بلد

جميل انك تقولي انك مكنتيش مقتنعة بيه وبعدين تغيري رأيك

بس مينفعش نقول ع الناس اللي بتسانده مطبلاتية

اصل الواحد مش هينفع يتعلم كل حاجة لوحده, اكيد فيه ناس كبيرة بيتعلم منها, وده مش معناه اني ماليش رأي

انتي بقى مين مرجعيتك بعد عقلك

صبرني يارب يقول...

هتشوفوا


ما فهمتش كلامك

يعنى ايه الى جاب ناس كبيره نتعلم منها ؟؟؟

ومرجعيتى بعد عقلي برضه بالنسبه لايه اصل تفرق

بس انا هارتبلك مرجعياتي عموما

اولا كتاب الله وسنة نبيه (الصحيحه طبعا )
ودول ثوابت مش بيتغيروا

الى بعد كده ممكن نغيره لاي سبب بقى

ثانيا دماغي

ثالث : اي حاجه واي حد يوافق عليهم الاثنين الى فوق دول

بس خلاص

فهمت حاجه ؟؟

ههههههههههههههههههههه

لكن ما تنكرش ان احنا عندنا مطبلاتيه كتير وفى جميع المجالات

هتشوفوا يقول...

الحكاية كلها أني مع أي حد ضد النظام بتاعنا, كفاية قوي انه يقول لا لمبارك
أحبه علطول

طبعا متفق معاكي في مرجعيتك وفهمت والله

برده مينفعش نقول عليهم مطبلاتيه,

المطبلاتية دول بيبقوا مستنيين حاجة من اللي بيطبلوله, قوليلي انتي بقى كانوا مستنيين ايه

nody يقول...

الحاجه الى تخوف اكتر من كونه مستكين
تالرجل بيفهم فى القانون وفى حقوق الانسان
ودى حاجه تقلق ناس كتير

فعلا احنا نستاهل اكتر من الى بيجرى لنا لكن فى نس الوقت احنا اغلب شعب فى الدنيا

فاتيما يقول...

إهىء إهىء

انا مشوفتش الحلكة دى

لازم اشوفها بقى

و بعدين اقول رأيى لحسن كدا مينفعشى


سلام موكتا يا صبصوبتى

صبرني يارب يقول...

هتشوفوا

ايه بيطبلوا لمين ؟؟

للرقاصه طبعا

عادي
هههههههههههههههه

بس مش اقصد طبعا انه هو كده

انما هما عايزين كده

ما بيصدقوا يعنى يلاقوا مولد وهات يا تطبيل

بس هى دي الفكره

نوووووووورت

صبرني يارب يقول...

نودي

جت فى بالي والله

وقلت هوالمشكله انه هايقلق المنطقه كلها
وهايقلق كل من على راسه بطحه فى العالم

بس برضه باقول يارب احنا غلابا خليها تيجى معانا صح رغم كيد العادين

صبرني يارب يقول...

فاتيما

يا جميل اجبلك منى نفسها تعيد الحلقه تاني ولا يهمك

بؤ انا صح ؟

هههههههههههههههههه

ماشي يا جميل شوفيها وتعالى قوليلى رايك

Tamer Nabil يقول...

من ناحية احنا غلابة فا احنا غلابة

حال البلد ينصلح لما الناس اللى تحت مش تضحك على بعض وتعامل بعض كويس ساعتها هنقدر نختار رئيس البلد


مع خالص تحياتى

فشكووول يقول...

السلام عليكم صبرنى
تحياتى
طبعا انا قريت الموضوع عندك ولى عليه تعليق طويل جدا ومستفيض وشارح لكل الاسئله التى تدور فى خواطرك .. لكن انا ح ارتب افكارى واكتب التعليق عشان ممكن ينفع بوست عن الموضوع .. بس ادخل استريح شويه وبعدين اكتب مسودة التعليق وربنا يفرجها علينا وعليك .. ولو انى عايز اجيب طلف فشكول لانى مش بقيت طايق التدوين خالص

تحياتى

Wanda يقول...

انا رجعت ثانى
بس بصراحة وش مكسوف كده و بجرجر رجليا

اصلى طلعت هبلة
حكمت على الراجل منغير ما اسمعه :-(
بصى حقولك حاجه انا ش عايزة حزمبل
ممكن يبعتلنا ابنه ؟؟
مدام ابوه عرف يربيه و هو شكله عارف يعنى ايه تربية :-) يبقى اكيد ربى ابنه
و بالتالى مدام لازم الرئيس القادم يكون من الشوباب متخطاش ال60 علشان يعرف يلحق يقعد براحته يبقى يبعتلنا ابنه :-)) ايه رايك :-))
فكرة مش كده
او بنته :-))

المهم حد متربى (كلامى منغير اسقاطات بس دا مطلبى انا فى الى يحكم البيت )
متربى يحترم الغير
يحترم فلوس الغير
يحترم حق و دين الغير
يحترم نفسه فالغير يحترمه
يخاف من ربنا
و يخوف الى يحاول ينهب البيت
راعى على حق

بصى كلنا اعتقد وصلته الاحساس انه مش حيحارب علشان يرشح نفسه
عايزنا احنا نحارب (و ده صح لان المادة غلط من الاساس) و بعدين هو يتفضل او اى حد ثانى و يرشح نفسه

بصراحة عايزة تجى من الانتخابات مش بثورة
احنا كلنا اولاد البلد ده سواء كنا اشراف او .... (مش حنطرد منها حد)

بس كلامه رزين تعليم دستور حقوق
عجبنتى كلمه هو ان الاسلام جوهر مش مجرد مادة نحطها فى قانون

عارفة عايزة يعمل ايه
يلف و يدرس احوال الناس
ينشا حزب جديد
و يبدأ به يغير
يبقى الغاندى المصرى :-))
مش لازم يكون منصب
ممكن يعلم صاحب المنصب
يبقى الراجل الى يقف وراء السلطان و يقوله لا تغتر ما انت الا بشر

--------------------------

موضوع العراق (شكل الموضوع لسه متكشف كله لسه كمان 10 سنين حنفهم ايه الحكاية بش شكل الموضوع بايظ من كل النواحى من الخارج و الداخل )
و عليه فى ظل الشفافية و المعلومات و الفضائيات الكثير حسكت عن الحكم عن الاحداث الحديثة الزمن حتى افهم كامل الموضوع

موضوع الجائزة(كلامه انه فخور بيها و فرحان كمان و حاسس انها عطاء من ربنا ، و مادمت انا مفهمتش انه استحقها يبقى لازم ادور وراه اكثر علشان افهم ايه النظرية
المشكلة ان الجائزة بالنسبة ليا بعد ما منحت لاوباما فقدت مصدقيتها :-((


سوال اخير
بطرس غالى بتاع الامم المتحدة مش والد بطرس غالى بتاع الضرائب و العلاج الملاينى :-)) مش كده ؟ ممكن من عائلة واحدة ؟؟

و نحن وراكى يا شجرة الدر
و الى يزعلك يبقى بالقبقاب
و حنغلب الفرنساوين ثانى :-)) و نديهم بالفلكة :-))))

وراكى يا شجرة الدر (خلاص بدل صبصب حتبقى درة :-) دردر ايه رايك ؟؟

Tarkieb يقول...

الدستور متفصل على الريس وابنه.. حظهم ان كل الناس اللي في الساحة بجد وقيع معارضة وحكومة واخوان .. حتي ايمن نور ده تعبان جدا وشاري دكتوراة من روسيا دليل النقص مع كل الناس الهرتك اللي في الساحة دي افتكرنا فعلا ان مصر عقمت وقولنا خلاص بلاش خوخ ده خواخ خلاص ناخد شرابه .. لحد ما لقينا بصيص امل جه .واحد كان يعتير رئيس مكان محترم وشاف الدول المحترمة ازاي ماشية وده اللي احنا عايزيينه .. دولة عصرية مش دولة توقف بها الزمن من ايام 52.. والله ليس حبا في البرادعي ولكن كرها في الخوخ وشرابه... مع انه بتتاتا مش مهم احنا مش عايزين حد يخطب احنا عايزين حد يطورنا

فكرة من الزمن ده يقول...

شوفي انا كنت باقول كده
لكن لما شفته مع منى حسيت انه دماغ
ويمكن يعرف يعمل حاجة لان ليه نظرة مختلفة
المثل بيقول ياطابت يا اتنين عور
وانا بقول ياتطيب يانبقى زي ما احنا لاننا مافيش اعور من كده
وضربو الاعور على عينه قال ايه؟

مش عارفة ليه حاسة اني بقيت شايفة بعين واحدة
تحياتي

صبرني يارب يقول...

تامر نبيل

يعنى انت شايف ان احنا الى عايزين اصلاح بس ؟؟

مش الحاكم يعنى ؟؟؟

طب ايه رايك فى مقولة اذا صلح الحاكم صلح المحكوم

عشان احنا نتصلح لازم حد يجى يقف ويقول انتباه يا بلد

ما ينفعش لازم حد يقود الجماعه

صبرني يارب يقول...

استاذنا فشكول

وش مذبهل مرعوب

حرام عليكم مش كل شويه حد يمشي

هاتسبوني لوحدي كده ولا ايه ما اقدرش امشي لوحدي والنبى بلاش كده يا جماعه

هاستناك لما ترتاح يا فندم وتشرفنا برايك هنا او عندك وراك وراك ما تقلقش

اووووووعى تفكر يا استاذنا

صبرني يارب يقول...

واندا

حصلت الى دردر كمان
هههههههههههههههههههههههه
ماشي ياعم

يوسف بطرس غالي اه مش ابنه

بس انا باتريق اصل اتعقدت يا اختي من الاسسسسسم وشكله وصفته وايامه السوده


وما تتكسفيش يا اختي كلنا لها ما انا كنت برضه باقول هاو كام لحد لما شوفته

بالزمه يا واندا مش امور
ههههههههههههههههههه

صبرني يارب يقول...

تراكيب

اولا منورنا اول مره تقريبا انشاله منورنا دايما

بالنسبه لموضوع طوق النجاه ده

انا عن نفسي شايفه ان اي حد يجى مش مشكله المهم نقتلع شجرة الفساد من مكانها حتى لو زرعنا غيرها مش هاتبقى ضاربه جزورها فى الارض زي الى موجوده دلوقتي

وانما انا ملاني الامل لما شوفت البرادعي وكلامه قلبي كده استريح له يا اخويا والنبى

نووووووووووورت

صبرني يارب يقول...

فكره

انتى فين من زمان مش باينه


اهو انا كنت باقول كده برضه لعلمك هايجرالنا ايه اكتر من الى جرالنا

بس الى اتغير جوايا لما شوفت البرادعي وكلامه

انى بقيت اقول لا مش فكرة يا صابت يا اثنين عور

انما كمان بقى عندي امل ان يكون بصحيح اختيارنا ويكون فى اصلاح
اصل خلاص بجد
الحكايه جابت اخرها معايا

KHALED يقول...

الناس مش عايزة البرادعى بالتحديد خصوصاً المثقفين لإنهم أعلم بحال متطلبات شغل المنصب و إنة موضوع مش سهل لكن شايفين فى البرادعى أول التغيير أو بمعنى أصح خيط بيتعلقوا فية

تفتكرى لو رشحت نفسى للرياسة حايقبلونى

صبرني يارب يقول...

خالد

مين بالظبط الى هايقبلوك

هما مش هايقبلوا اي حد اصلاااااا

انما الناس زي ما انت قلت عايزين اي تغيير

وبالنسبه لحضرتك يا استاذ خالد قول خطتك وبعدين نقرر
ههههههههههههههههههه

نورت يا فندم

فشكووول يقول...

العزيزه صبرنى
تحياتى
شوفى يا ستى وجهة نطر المؤيدين للبرادعى
1 - انه اقوى المتواجدين على الساحه حاليا
2- انه غير قابل للعبث به وتشويه سمعته الشخصيه والعامه والتنكيل به كما حدث مع شخصيات سابقه كأيمن نور - ولو ان كل حاجه ممكن تحصل فى البلد دى
3 - ان المؤيدين له ليس لشخصه وانما يعتبرونه ازاحه لقوى وشخصيات كونت شبكه من العلاقات ومراكز القوى من خلالها يتم حكم البلد وباغت فى الارض فسادا
4 - انه بالدرجه الاولى مؤيد لتغير الدستور بالكامل او على الاقل الماده 76 و 77 واللذين يعتبران ثلاثة الرابع الاصلاح السياسى فى مصر
5 - انه لو ازيحت هذه الطغمه فمن السهل ازاحة اى احد اخر من على الساحه حتى لو كان البرادعى فى وقتها
6 - اليك المفاجأه
- ان نجاح البرادعى غير مضمون حتى لو انتخبه الشعب كله بالاضافه الى ان شعبنا لا يعنى الدور السياسى وان قوى التخلف رهيبه ومتحجره وفيه ناس ما تعرفش غير (فكره ربنا يخليه الريس )
- اننا ومعظم شعبنا تربينا على فرعنه الحكام وتأليههم ولا نرى فيهم الا اسيادا لنا وجب علينا طاعتهم وحبهم سمعت تعليق لاحد الناس يقول ( والنبى الرئيس وشه زى البدر وهو فى التليفزيون) ... اصله حيخطب بنتها ان شاء الله ... جهل
- هل تعرفى يا سيدتى ان العبيد فى مصر بعد محمد على هم الذين قاوموا تحرير العبيد وفولهم المأثور (نحن عبيد الملك احسن من احرار بعيدا عن بلاط الملوك) .. والله حصل الموضوع ده

واليك بعض الملعلومات

- ان الدوله المصريه ثانى دوله فى العالم قامت بمد السكك الحديديه
- ان الديمقراطيه فى مصر من اعرق واقدم الديمقراطيات فى العالم منذ انشاء مدلس شورى النواب ايام الخديوى اسماعيل
- ان البرلمان المصرى من اول 10 برلمانات على مستوى العالم
- اننا ولو نفضنا الغبار عن انفسنا مؤهلين تماما للديمقراطيه بل وممارستها على اعلى مستوى عكس ما يقولونه

مع الاحاطه بانه يمكن ان يحدث اى شيئ فى الانتخابات وكما نحن دوله عريقه فى الديمقراطيه ايضا عريقه فى التزييف والتزوير ولا ننسى ان 16 قتيل فى انتخابات مجلس الشعب الماضيه (تكونش كانت حرب مش انتخابات) فما بالك من انتخابات الرئاسه وان القابضين عليها لن يتركوها بسهوله للبرادعى ولا لغير البرادعى ولكننا بلجوئنا للبرادعى عايزين نقول آآآآآآآآآه أو غيتونا يا خلق هووووووى اى حد ينقذنا من جهنم اللى مصر فيها دى.

معلهش بقى التعليق طويل بس الكلام له عازه

تحياتى

صبرني يارب يقول...

استاذنا الغالي فشكول

لا طويل ايه

ده انا استمعت جدا بكلام حضرتك

ومقتنعه به جدا والله

وموافقه على كل الكلام تقريبا

واول مره اعرف حكايه العبيد فى مصر دي بجد

لا اصلا اغلب المعلومات الى قلتها انا ما كنتش اعرفها بجد

تحياتي لك يا استاذنا

وما نتحرمش من نورك ابدا وتشرفيك لنا

تعالى قولي بس مين زعلك وانا اعلقهولك على بابا البلوج اسبوت

فاتيما يقول...

صبصوبتى

امبارح قعدت اشوف الحلقة على اليوتيوب

بصراحة ؟؟؟


عندك الف حق

راجل محترم بجد

واجهة مشرفة الواحد يفتخر انه يمثلنا

بس هوه اصله راجل ذكى و فاهم

ان الدنيا مش بالسلاسة دى
حتى لو ملايين وراه

عشان كدا واخدها واحدة واحدة

و النهاردة صحيت على خبر فرحنى
ان لسه فيه امل فى الدنيا
و ان الخطوات تبتدى واحدة واحدة
و دى اولها
http://dostor.org/politics/egypt/10/february/23/7409

احييكى على رايك
و انضملك

مش لازم يبقى هوه الفارس

بس كفاية يكون ايجابى
و قد امل الناس فيه

والمهم البعدا يسبوه

و كمان ميطلعش فى الآخر خنجر فى قلوبنا

كلامه بيقول انه حد طيب
و ذكى
و مش سهل برضو

خير

كله خير


تعرفى و انا بسمعه فكرت فى ايه؟؟؟

فكرت فى عيالك و يوسف و شريف و عمر ابن حنين و ولاد كل المدونين و المدونات و الناس اللى بحبهم و بعرفهم
و قولت يا ترى
دى اشارة لزمانهم الجاى عشان يكون احسن

و فكرت فى عادل و بسكوتة و كل شباب المدونين و اللى اعرفهم و قولت ياترى برضو خلاص هانت و ايامهم جاية |أهى و هيقدورا يعيشوها زى ما بتنمنالهم ؟؟؟

يا رب

بوسيلى العيال

صبرني يارب يقول...

طب يعنى ولادنا والشباب

واحنا ما لناش نفس ولا ايه

طب نشم بس رياح التغيير

شمه واحده والنبى يا ابله

ولو انا مش متفائله بالناس الى اتلموا حواليه دول

بس مش ما ينفعش برضه يبقى لواحده

استرها ياااااااااااااارب

منوره يا فطوم يا جميل انت

الجواز و سنينه يقول...

يا صبصب و ادلع
بصى يا حبيبتى
انا عجبنى الرجال ده جدا
بس هو فيه مشكلتين بالنسبالى
اولا انه عايش بره و مايعرفش كهن المصريين

ثانيا الرجل ده بيتعامل على ان المصريين لما بتعامليم كويس بيتصلح حالهم ابدا و كلا البته
احنا نحب اللى يدينا على دماغنا
علشان نمشى عدل
بس الاكيد ان الحال لو فضل على اللى احنا فيه ده هانطق
مطلوب اصلاح الحال علشان الناس تعبانه
بس البردعى لو مسها هاتبوظ
مطلوب حد جامد و صايع و عايز يصلح البلد

صبرني يارب يقول...

الجواز وسنينه

لا لا لا حرام والنبى بلاش صايع كفاينا صياعه بقى

وبعدين صدقينى الراجل ده مش شخصيته ضعيفه

وحرام ما تظلميناش احنا اه عايزين حد يربينا من جديد بس مش بقلة الادب والبلطجه

واحنا لما بيكون بجد عندنا قياده مؤمنين بها بنختلف تماما

والتاريخ يقولك الكلام ده

انا ضقت ذرعا بالحياه بجد فى البلد دي وبجد باطلب الرحمه من ربنا ليس لنا رب سواه

منوره يا جميل

الجواز و سنينه يقول...

يا صبصوبتى
انا لما قلت صايع ماكنش قصدى انه يبهدلنا
كلا الفته
علشان لا يمكن هانتبهدل اكتر من كده يبقى حرام حتى
قصدى انه هو اللى ما يتضحكش عليه
يعنى ده ممكن حد خبيث يلعب بيه الكوره
انا قلت واحد عايز يصلح
بس صايع بمعنى ما يتضحكش عليه و علشان ما يبقاش فى وادى و الناس فى وادى

صبرني يارب يقول...

الجواز وسنينه

ماشي عايزين واحد يلعب بالبيضه والحجر
بس صياعه لا والنبى خلاص كفايه كده

منوره يا جميل

Haytham Alsayes يقول...

اول انا اول مرة ادخل مدونتك وعجبتني وان شاء الله مس اخر مرة اما عن موضوع البرادعي
بتهيقلي الراجل دة محترم بس مينفعش يمسك دلوفتي لازم يشتغل في الساحة ويورينا نفسه دة اولا
اما ثانيا يعول علي الشباب بعد ربنا طبعا والشباب بس عشان الكبار معلش كفاية كدة مش عارفين يعملو حاجة من 50 سنة في عمل حراك في كل حتة وعل جميع المستويات بتوعية الناس ويعرفوهم علي البرادعي ودة رأي المتواضع لازم نشتغل طهنا من كل حاجة في البلد وقربنا نطفش وانا بتكلم بلسان الشباب دي معركة الشباب في رأي ياما يفوزا او يشفولهم بلد تانية
معلش طولت عليكي
تقبلي مرورى ونورينى في مدونتي المتواضعة

صبرني يارب يقول...

هيثم

ايوه انا معاك فى نقطة ان الشباب بقى يدافعوا عن حقوقهم ونبطل نكون سلبيين فعلا

وانت شرفت المدونه

وان شاء الله اتشرف بزيارتك

Anonymous يقول...

كما قال الاديب علاء الأسواني في مداخلته في العاشرة مساء كل مرحلة تاريخية لمصر يظهر زعيم يلتف حوله الناس وظهر البرادعي لهم من حيث لم يحتسبوا !!!
العمل ان يفيق الشعب ويبحث عن مصلحته وكما قال البرادعي اصلاح سياسي معناة اصلاح في حاتي اليومية في رغيف العيش في انبوبة البوتجاز الخ....
عبد الجليل

صبرني يارب يقول...

استاذنا الجليل عبد الجليل

انا كمان عجبنى كلام علاء الاسواني جدا

تحياتي لحضرتك يا فندم نورتنا

mahasen saber يقول...

والله يا صبصب كلامك جميل وانا متفرجتش على اللقاء للاسف بس كل الليى اتفرج اجمع على انه انسان رائع

بس نقاشك انتى ورضا بيدينا رساله انه مفيش ايده هههههههههه

صبرني يارب يقول...

محاسن

تصدقي بالله

هو فعلا فعلا ياما قالي يومها يا بنتى انسى مافيش فايده
ههههههههههههههههههههههه

وانتى وحشااااااااني يا محاسن والله