نظارة شمس

سما

طول عمرها ما بتحبش تلبس نظاره شمس بتحس انها بتخنقها وما بتخليهاش تشوف الدنيا كويس بالاضافه انها بتكتم على نفسها فى الحر وتحررها

فقالت طب حل وسط انا اجيب نضاره جراي  فتبقى فاتحه وتشيل شويه الشمس وفى نفس ذات الوقت تكون شايفه الدنيا كويس

بس لقت ان النظاره الجراي مش بتشيل عنها برضه ضوء الشمس الشديد خصوصا فى ظهر يوم صيفي حار

وبرضه كاتمه على نفسها هياها بقى  فبطلت برضه تلبسها

بس هى اصلا كانت طول عمرها ما بتخرجش كتير من بعد ما خلصت الكليه بقت تخرج قليل وبالليل ايه هايخرجها فى عز الحر ولا فى الشمس الحارقه  مافيش حاجه ضروريه للدرجه دي كله ممكن يتعمل بالليل

اه قصدكم زمان وهى لسه فى الجامعه مش فاكره ما كانش ضوء الشمس بيضايقها للدرجه  جايز عشان قلبها كان اخضر كانت حابه نور الشمس وعوده طري كان ما يهموش الرياح    احتمال برضه

المهم تروح الايام وتيجى وتضطر سما انها تخرج كتير وفى الشمس الحارقه

وفى مره كانت عنيها تعبانه جدا من مشوار فظيع عملته امبارح وحاسه جلد جفونها تعبان مش قادره وكانت لازم تخرج تاني وتواجه نور الشمس تاني

فاشتكت حالها لاختها  اختها قالت لها انتى عبيطه ولا ايه ما تلبسي نظاره شمس هاتريحك

وبعد مناقشات وشرح من سما لاختها انها ما بتحبهاش وليه...  اقتنعت سما برأي اختها على مضد بشكل مؤقت  وخدت منها نظاره تجربها النهارده بس وهى بتقول لنفسها انا عارفه انى مش هاطيقها  غير كام دقيقه

وفعلا كل شويه سما تزهق من النضاره وتشيلها بس تاني ترجع الشمس تلسعها فترجع تلبسها

بعد كام يوم سما اشترت نظاره شمس من اول محل نضارات قابلها وجابتها المره دي غامقه

واتعودت عليها بقى ساعات بتزهق منها وتشيلها دقايق لكن بترجعها تاني

اكتشفت سما ان الدنيا مختلفه بالنظاره الشمس

احساس غريب انك تكون شايف الناس وهما مش شايفينك

كأنك بتتفرج على الناس الى حواليها من كاميرا تجسس وبتشوف هما بيبصولك ازاي او حتى بيبصوا لشخص تاني  ماشي جمبك ازاي

ايوه ماهو الناس مش بيبقوا شايفين عنيك بتبص فين

هو صحيح الدنيا بالنظاره بتبقى قاتمه والنظاره بتمنع الضوء الشديد والتراب  اه بس  كمان بتمنع الهوا

بس تخيلوا بعد فتره سما بقت تحب اوي تلبس النظاره  لدرجة انها لما بتخرج بالليل بقت نفسها تلبس برضه نظاره شمس

اصلها كانت بتستخبى فيها

يعنى مثلا طبيعى لما تركب  تاكسي  ساعات  تشيل النظاره عشان الضوء بيكون اقل وفرصه عنيها تشم شوية هوا

تلاقي سواق التكسي السخيف حاطط خمستاشر مرايه  وعامل زي الى بيشتغل فى المخابرات وبيراقبها

تقوم تآثر السلامه وتنزل النضاره على عنيها وتلزق وشها فى الشباك  هروبا من السخافات  واملا فى ان شوية هوا يدخلوا من الشباك ويعدوا من تحت النظاره

تفتكروا النظاره دي افادت سما ولا كتمتها

تفتكروا سما احلى بالنظاره ولا من غير النظاره

تفتكروا  ممكن فى يوم سما تدمن النضاره وتفضل لبساها ليل ونهار وحتى جوه بيتها ؟

طب تفتكروا لو ده حصل هى هاتستحمل

تفتكروا سما لو حبت تستغنى عن النظاره هاتعرف ؟؟ هاتقدر ترجع زي زمان ؟؟

ولا خلاص القلب الاخضر ما بقاش اخضر  وبقى يهرب من الشمس خايف تحرقه  وعوده الطري شد ونشف وبقى يهرب من الريح لتكسره ؟