السبت، 22 مايو 2010

انا هاخد حقي ناشف




انا اينعم سناني على اد حالها بس يعنى مش معنى كده انا ما اقدرش اخد حقي ناشف  ما دام حقي اخده زي ما انا عايزه

طبعا انتم عارفين انا ماليش فى السياسه ودهاليزها العظيمه الى احنا يا شعب يا غلبان  مطاوع  مهاود ما نقدرلهاش وسايبنها فى ايد امينه (غير يسرا طبعا)

وعليه فاحنا ننبط هنا ونقعد ساكتين ونتلهي فى  اكل عيشنا حلو ؟؟؟

لا مش حلو عشان ما عادش في عيش اصلا ناكله كشعب غلبان ومطاوع ومهاود يعنى

انا صحيح فهمى على ادي وعلامي على ادي بس للاسف الشديد عندي ودان وعنين وحاجات غريبه كده

فانا وانا قاعده كده بقالي فتره شايفه ملايين لا لا قول مليارات عماله تعدي من فوق راسي وانا قاعده ومافيش ولا مليون واحد على سبيل الخطأ وقع فى نفوخي كان الهمنى مليون فكره زي الى نزلت على نافوخ نيوتن لما وقعت عليه التفاحه

رجل الاعمال ده اسم الله عليه دفع مش عارف كام مليون للفنانه دي اسم الله عليها برضها  كمهر وبعدين رجل الاعمال التاني  دفع برضه كام مليون عشان يقتل الخاينه

وده ضحك على البنك الفلاني بكام مليار وكت على بره وده وده وده وده
وانا اقول ماشي ماشي يا بنى ادمين

بلاش حقد يا بت وما تبصيش للناس فى لقتمتهم

ولكن الى وجع احساستي بقى انى وانا باعمل سيرش على موضوع معين  اتكعبلت فى هذا المقال الى اصلا قديم بس وجع احساسياتي يا جودعان واثر على مشاعيرى

بيقولك ايه بقى التربيه والتعليم بتتخانق مع الماليه (وده سنة 2009)

طلبوا يا حبة عين امهم 36.1 مليار جنيه  انما الماليه الشريرين اعطوهم 31.6 مليار بسسس

يعنى هو بقى كان يجيب منين الاربعه مليار وشويه دول الفرق يسرق ولا يسرق
ولا يعنى يقطع من لحمه
ولا يسيب التعليم يبوظ هاه   يسيبه يبوظ
اما عالم مفتريه صحيح

فقام عمك الحاج الجمل عظم الله اجره  قاله يا عمونا يا غالي ما ينفعش كده
انا مش قايلك انى عايز ازود اجور المعلمين عشان ينصلخ حالهم ويبطلوا يقشطوا الناس
وعايز اجور بمبلغ 28.3 مليار جنيه  تقوم تقولي لا كفايه 26.4

حالتهم تقطع القلب بصراحه

بس السؤال هو احنا لو وزعنا مبلغ 26.4 مليار على ال80 مليون كلهم على بعضهم يطلع نصيب الفرد كام ؟؟؟
مش عارفه الحقيقه انا صحيح  معايا بكالريوس محاسبه بس ما باعرفش  اعد الارقام دي ما خدنهاش الحقيقه
لو  حد فيكم يعرف يعد ويحسب يقولي  نصيب الفرد يبقى كام  من ال80 مليون مش من التابعين لوزارة التربيه  والتعليم بس


ومن ضمن البنود الى قريتها فى الميزانيه جابتلي شلل فكري ومشاعيرى

ان الميزانيه المخصصه لهيئة الابنيه التعليميه 1.7 مليار جنيه

هو اينعم الحديد بقى فى السما وبقينا فى عب عز  قصدي وبقينا فى عز انما يعنى ال 1.7 مليار دول فى سنه واحده على هيئة الابنيه بيعملوا بيهم ايه ؟؟

وانا اذكر فيما اذكر اخر مدرسه دخلتها  الى هى مدرسة المنصوره الثانويه بنات  كانت المبنى الاساسي الى فيها هو قصر الشناوي باشا الى متامم من ايام الثوره العظيمه

وباقي المدرسه مباني صغيره كلها على بعضها لما تطبقها وتحطها فى جيبك ما يعملوش نص مليون جنيه باسعار دلوقتي    والارض طبعا بلوشي يا معلمي جنينة  القصر

ايه بقى ؟؟؟


طب  انا عندي اقتراح احنا نوقف الصيانه والمباني الجديده لمده عام فقط

ايوه عام واحد فقط
وال 1.7 مليار جنيه دول نوزعهم على الشعب وكل واحد ياخد حقه ناشف وانا متاكده ان ساعتها الطلبه احسنلهم يروحوا يتعلموا بره اصلا
وان الابنيه التعليميه مش هايجرالها أي حاجه خالص


بلاش  بلاش انا اصلي علامي على ادي وبابص تحت رجليا ما عنديش طوووووول نظر


فى نفس ذات المقال الى يشل ده

قريت البند ده
21 مليون جنيه لبرامج السكان وتنظيم الاسره  (ده برضه فى سنه واحده والله )

تنظيم الاسره ؟؟؟ ليه

ده لو تم صرف لوب دهب لكل مواطن  فى  البلد دي  (اه حتى الرجاله ) ما كانوش اتكلفوا 21 مليون جنيه يا جرع

كانوا نزلوا  وسائل منع  الحمل  على الرقم القومي ( يعنى كل واحد يروح يطلع رقم قومي يدوله وسيله مناسبه )

ما احزننى اكتر واكتر واكتر  انى قريت بعدها الخبر الى بيقول

رجب  طيب اردوغان بيشجع الاتراك على الانجاب وهايصرف  مكافآت لليخلف اكتر


بلاش تنظيم الاسره   قلتلكم انا بابص تحت رجليا

كلام تاني قريته منقول على لسان البهوات بتوع المجلس فى محادثه مستفزه جدا عن ملاين ا بوهم الى بيفرقوها على بعض

قوم واحد فيهم قال  ايييييييه

بيقولك خلال 30 عام الماضيه تم انفاق  عشرين مليار جنيه على 14 مشروع استصلاح  وكلهم فشلوا

وانا مصدقه الخبر ده عشان انا شوووووووووووووفت بعينى

شوفت الحسره فى  تقسيمات الاراضي المستصلحه حوالينا  مسخررررررررره حاجه تحسر  شوفتهم بعينى والله

متقسمين وداخل لهم مايه ومتوزعين على الجمعيات والجمعيات بتبيع وتشتري فيهم وتقلب رزقها  ومن  ايد لايد تكبر وتزيد وهى زي ما هى تلال رمل

الى استصلح منها نسبه بسيطه جدا جدا


المهم نطلع من ده كله بايه

ان انا عايزه حقي ناشف

انا مش هاعمل زي هاني رمزي فى  عايز  حقي  واقول نبيع البلد ولا نبيع الممتلكات

فيها حاجه يعنى لو نوقف انشاء مدارس جديده لمدة سنه ؟
ونوقف نصرف على تنظيم الاسره سنه واحده
والاستصلاح والاستهبال

سنه واحده
ونفرق فلوسهم على  الشعب الغلبان المهاود

يشم نفسه مافيهاش حاجه دي هو حرام ؟؟

لعلمكم انا فكرت فيها بجد ومش بشكل سطحي ولا حاجه انا عارفه كويس تباعية موقف زي ده

فى  زيادة الانفاق القومي والسوق وكل حاجه

بس برضه انا عقلي وتعليمى  على ادي   فعشان كده قلت اسألكم برضه واشوف رايكم اديكم برضه متعلمين ومتنورين يعنى

طبعا اكلت دماغكم وصدعتكم بس  عادي هابقى اصرفلكم على البطاقه شريط بنادول ( اه مع الوسيله )

هناك 32 تعليقًا:

جنّي يقول...

السلام عليكم

كيف حالك اختنا الطيبة .. فينك ..

تريدين ايقاف بناء المدارس ومشاريع الاستصلاح وتنظيم الاسرة .. اذن من اين تمتلئ جيوب اللصوص ( الحكومة والنواب سابقا ) ويمتلئ الساحل الشمالي وشارم .. تريديهم ان يزاحمونا على شواطئ الغلابة خليهم هناك احسن لاننا مش ها نطيق رائحتهم القذرة ووجوههم العكرة ..

اما حقنا من اللصوص لن يسقط بالتقادم وسنأخذه عاجلا ام اجلا ..

تحيتي

قلم رصاص يقول...

هههههههههه

يكفيكي كام ارنب؟

عموما اللي تطوليه تقسميه علينا مااحنا كلنا المدونين في الهوا سوا

ولا اللي ربنا يفتح عليه ياخد الباب معاه يعني وهو مااااااااشي؟

______

بخصوص سؤالك هو ينفع نوقف الاستصلاح والانتاج وبناء المدارس والحاجات دي ونوزع الفلوس على البشر

هو من الناحيه الاقتصاديه الفنيه والنظريه مينفعش عشان ابسط قواعد الفهم الاقتصادي هتقولك هيحصل ارتفاع اسعار نتيجة الزياده من المعروض من النقود دون مايقابلها من انتاج حقيقي وبالتالي هيظهر التضخم

بس ماهو اصلا دا مووجود وهما بيبنوا وينتجوا يعني مفسش جديد لان اقتصادنا مازال اقتصاد رعوي متخلف

ياسلاااااااام على تحليلاتي الاقتصاديه
هههههههههه

وبناءا عليه اجابتي على سؤالك بالنسبه للظروف الحاليه ..

أيوووووا ينفع ياستي

وبالتالي انا وانتي وكل البشر منتظرين حقنا ناشف

احنا دارسين ايكونوميكس وعارفين ناخد حقنا تمام
ههههههه

احييكي على البوست ورغي اليوم

تقبلي مروري وتحيتي

قلم رصاص يقول...
أزال المؤلف هذا التعليق.
عطش الصبار يقول...

انا معاكى يا ندا اناعايزه حقى ناشف
بس ما تنسيش الضرايب اذا اخدتى مليار
هتدفعى مليار ونص
وبعدين تاخدى حقك ناشف وتضيعيه وتروحى تشترى لحمه وفراخ لا الحكومه عارفه مصلحتك
تحياتى

غير معرف يقول...

انا بالضبط مع جني
أومال جيوب اللصوص تتملي منين


عارفه لو مفيش رشاوي ومفيش فساد بلدنا ديه هتبقي اغني من السعوديه ودول الخليج


انا بجد زهقت من الرغي في الموضوع ده
لو نبطل ندفع رشوه
لو نتفق علي حاجه واحده نعملها كلنا في وقت واحد



طيب عارفه وعن تجربه
لما قطعنا اللحمه
والله الجزار وقف ماما وسئلها ليه مش بتشتري لحمه ليه انتي مقاطعه
وطبعا نتيجة المقاطعه كيلو اللحمه نزل من 55 ج الي 46 ج ولسه برده ماما مش بتشتري ولا انا كمان بشتري

يعني احنا نقدر نعمل حاجه
برده كتر الاعتصامات واللي بتوصل لاكتر من 60 يوم ده معناه ان الناس فاض بيها


بصراحه مع ان كلامي يبان منه عدم التفائل إلا اني متفائله جدا جدا



كانت المشكله في الاول اننا مش بنطلب حقنا

وبعدها بفتره بقينا نطلب ومفيش حاجه بتحصل لاننا سلكنا طريق غلط وكنا بنطلب بشويه كسل علي هبوط عزيمه


لكن دلوقتي بقينا بنطلب صح ونصر علي حقنا لحد مناخده ان شالله ده يكلفنا اننا نقعد في الشارع بالشهر والاتنين معتصمين


هو ده
هو ده بالضبط المطلوب
اننا نطلب حقنا ونصر عليه ونطلبه صح

علشان يعرفوا ان خلاص
عصر التنبله انتهي

واننا هنطالب بحقنا وهناخده ولو علي رقبينا

ومفيش تنازل بعد اليوم
مفيش سلبيه
في قوه وطلب حقوق حتي لو كانت بسيطه

تحياتي

غير معرف يقول...

ركبي طقم يا صاصا

ستيتة يقول...

انا قرفت يا ندى
قرفت واظنها حالة عامة

الإصلاح مش صعب لعلمك
حقنا جوا مش صعب
وحقنا بره مش صعب خالص
والوحدة الوطنية مش صعبة

بس فيه ناس مصلحتهم اننا نعيش في المتاهة
ونفضل نجري ورا اللقمة
لازم نفضل نجري ورا اللقمة وشربة المية
وامتحانات الثانوية
والموازنة المضروبة
وخناق المعارضة ومع الحرامية
والإعتصامات المية مية

كل ده هم عاوزينه وعلشان كده
مفيش فاااااااااااااااااااااايدة
ولما تاخدي حقك ابقي قابليني :)

الجواز و سنينه يقول...

انا علمى علوم
ههههههههههه
يعنى ضيعت عليكى انى احسب
بصى اتحرق دمى من الارقام
و هاروح آخد الدوا

غير معرف يقول...

ههههههههههه

دي اخره اللي يقرا الموازنه

وعلى فكره كده غلط على صحتك.... اصلا الموازنه عملينها علشان الشعب كله يموت مفروس :))

تحياتي

shimaa elkholy يقول...

جني

عندك حق

وحياتك عندي حتى شواطيء الغلابه لا ولقمة الغلابه والله باصين فيها

وحقنا على الاقل نحس بس انه حقنا

تحياتي لحضرتك

shimaa elkholy يقول...

قلم رصاص

انا عايزه ذمتك

تسيب الدنيا كلها بتقلبكم وبعدين تيجوا تقسموا معايا انا
ههههههههههههههه

بتتشطروا عليا ولا ايه

الاثار الاقتصاديه والتضخم بسبب الانفاق القومي دي ضحكه يا فندم

اه استهبال لنا

كده هاتخلينا افرد بوست مخصوص اقوله فيه الاثار ا لاقتصاديه الى ممكن تحصل لو كل بنى ادم فى البلد قبض مليون جنيه

وهاقولك ازاي هما طريقتهم الى عملت تجميد للثروات وللدخل القومي وحبسته فى كروشهم

تحياتي لك وللاكونميكس هههههههههههه

shimaa elkholy يقول...

عطل الصبار

نو نو نو

انا عايزه حقي ناشف ومشفي

وبعدين لعلم حضرتك يا فندم الحل اصلا فى ان الناس تاخد فلوش وتشتري بهم لحمه وفراخ وقتها السوق عندنا هاينظبط وهاقولك ازاي فى البوست الجديد

تحياتي لك

shimaa elkholy يقول...

مصري جدا

والله جزئيا فى طقم يا استاذنا ما تقلقش من الموضوع ده
ههههههههههههههههه
هات انت بس النواشف ومالكش دعوه

shimaa elkholy يقول...

ستيتة حياتي

بصي يا جميل احنا الرساله لنا واضحه

يا تبقى من فريقنا وتلهط معانا

يا تبقى من الشعب الغلبان وتعيش تاكل وتشرب وتنام فى احسن احوالك

تتلهي على عينك وعين الى مخلفينك فى الهم المم وما تفكرش فى اكتر من كده

هى دي النظريه الى احنا ماشيين عليها دلوقتي شئنا ذلك ام ابينا

نورتي يا جميل

shimaa elkholy يقول...

الجواز وسنينه

طب هاتيلى معاكي حبايتين ينوبك فيا ثواب يا اختي

هههههههههههههههه

shimaa elkholy يقول...

فتاه من الصعيد

والله يا بنتى ما كانش قصدي

الا انه كنت بادور على حاجه مش فاكره هى ايه

وقبلها بكام يوم كان طالع وزير التعليم بطلعته البهييه وقال حكاية الابنيه التعليميه

فلفت نظري الكلام بقى كله وقلت ماليش دعوه انا عايزه حقي ناشف

نورتي يا جميل

shimaa elkholy يقول...

غير معرف

ايه ده ما شوفتكيش الا دلوقتي

رشاوي ؟؟

هى المشكله فى الرشاوي بس ؟؟

المشكله صدقينى اكبر بكتيييييير من اننا احنا كشعب غلبان ندفع رشاوي ولا لا

يا بنتى انتى واحده زيك ولا زيي انا كده يوم ما تدفع رشوه هاتدفع كام يعنى

اه لما ننحرف ونبدأ ندفع رشاوي يعنى
هاتدفعي كام

الف اثنين ثلاثه عشره

يا بنتى مستوى الرشاوي دلوقتي بيوصل بالمليار
اماااااااال

مش وطن بيتباع عايزه ايه

الموضوع اكبر من اننا نبطل ولا نتفق

احنا نفسنا بنتباااااااع

نورتي يا جميل واختريلك اسم بقى

richardCatheart يقول...

هههههههههههههههههههههههههه
ندى انا عايزة اللوب الدهب ايون وهاروح ابيعه عند بتاع الدهب انا اولى

ناشف ايه وطرى ايه يابنتى دول جبابره وكروشهم ولا الحوت الازرق
كل الهم اللى اتكلمتى عليه دا بيتعمل كل سنه علشان يكلو ويأكلو اللى حوليهم
قال ماعرفش قد ايه للتعليم وابصر ايه للصحه
واحنا ملط ولا حتى بقينا لقين العيش الحاف

اسكتى بقى لاحسن يمسكونا ولا اعرفك هههههههههههههههه

shimaa elkholy يقول...

قلب القطه

ولا انا اعرفك اصلا اصلا

وبعدين انا باتكلم على ميزانية الصيييييييييييين

انتم ولا فاهمين حاجه مش انا قلتلكم قبل كده ان انا مرشحه نفسي لرئاسة الصين
هههههههههههههههههههه

واللوب من عنيه حاضر روحي شوفي بقى الحاجات الى بلاش كده عندهم يا اختي
ههههههههههههههه

نورتي

حاجات جوايا يقول...

انا كمان عايزة حقى ناشف
يا بنتى اصلا دول مش بيعملوا حاجة مش بيشتغلوا
دول بيشتغلووووووووووووونا

يصرفوا الملايين عالطرق ويرجعوا يبوظوها ويعملوا الصرف
ويصرفوا ملايين عالمبانى ويرجعوا يهدوها ويقولوا اخده كام سنتى من الطريق
ويصرفوا ملايين عالمستشفيات ويرجعوا يقولوا اتبنت فى مكان غلط
دى ناس مافيش وراها حاجة وبتتسلى
شايفين الفلوس كتير قدامهم ومش عارفين يعملوا بيها ايه
عندهم استعداد يعملوها مراكب ورق فى النيل يفرجوا السياح عليها ولا انهم يزودوا المرتبات ويشغلوا العاطلين ويحققوا حياة ادمية للشعب

وبناءا على ذلك اضم صوتى لصوتك واطالب بحقى ناشف وانا هبقى ابله براحتى هههههههه

Remas يقول...

ياتوتة عاوزه الناس تاخد حقها ناشف

والشعب الصينى يعيش مرتاح

ازاى بس ؟
والناس بئا ترتاح وتهدا وتعرف تفكر صح

هو ينفع بردو ؟

الشعب الصينى لازم يفضل متعذب كدا يتفرج من بعيد على فلوسه اللى بتضيع

وهو ياحرام منهك من الحياة الصعبة اللى عايشها

تصدقي صعب عليا اوى الشعب الصينى دا

الحمد لله يارب اننا في مصر

shimaa elkholy يقول...

حاجات جوايا

بالظبط كده يا جميل

هو يجيب حمام ويطيره

انما حمام ياكله الشعب الغلبان وياخد على اكل الحمام والوز والعز ابسلوتلي نوت

والاالعز حضرتك ده حبيبنا

لازم تفضلوا يا ولاد ستين تين تجروا بالمشوار ورا لقمة العيش الحاف وانا كان عاجب اهاليكم

هذا هو المبدأ

shimaa elkholy يقول...

ريم

يا فهمنى انت

ايوه ايوه الحمد لله يا اختي

واضم صوتي لصوت المجموعه واقول ما شربتش من نيلها

والمجموعه التانيه يبقى انت اكيد فى مصر

وسيبك من المجموعه الى بتقول حقيييييييييييييي ولا افرط فهيشي ومعللللللللهشي


لما اجي اروح الصين هابلغهم استيائك يا ريم
ههههههههههههههههههه

نورتي يا قمر

باحث عن حب يقول...

بصى
يا اختى ندى
ككده هيجيلك الضغط والسكر والعصبى
ووووو
بعد الشر عليكى
(من رأى منكم منكرا.)
باقى الحديث معروف
انا بقعد على on tvبشوف برنامج بلدنا ودمى بيتحرق
وبرنامج مصر اليوم على الفراعين
48ساعه على المحرو
ودريم تو العاشره مساءا
وخدى عندك
واحد من الناس
وكمان باتابع اليوم السابع الموقع والدستور الموقع
وكمان المصرى اليوم
يعنى كل مصايب البلد الواحد بيشوفها دمه بيتحرق
طيب 80ميلون دمهم اتحرق اللى فوق
معندهم دم؟
مش عارف والله
اتخنقت فعلا
والله
ايه الحل
؟
الحل مش عارفه فى اعتصامات من غير هدوم قدام مجلس الشعب
ولا انتفاضه عراه
مش عارف
ولا سياسه تقشف زى اللى فى اليونان
دول حرميه عينى عينك
قروض ومجاس طبيه اخويا مريض شلل رباعى معرفتش اجيسب ليه قرار على نفقه الدوله الا5000 جنيه فى6شهور بس
وهو محتاج15الف جنيه فى الشهر
وبعدين التلغى القرار بعد الهوجه بتاعه القرارات بتاعه شوبير واعز والجبالى
البشاوات ولغايه
تلوقتى مش عارف اطلع قرار واحد
حسبى الله ونعم الوكيل

shimaa elkholy يقول...

محمود

اولا ربنا يشفي اخوك يارب ويقدرك عليه

وطبعا انا عارفه ان قرارات على نفقة الدوله دي هاتتلغي للغلابه انما هما هايفضلوا زي ما هما

واصلا ماهو بيعملوا كل حاجه على نفقة الدوله شئنا ام ابينا


وبطل يا ابنى تتفرج على البرامج دي كلها احسن كده مش هاتحمل فى ايدهم يومين

تحياتي لك ولباقي الشعب المتبهدل فى اديهم حسبنا الله ونعم الوكيل

ahmed_k يقول...

ممكن في البدايه أسأل سؤال عابر
هو المليار واحد وقدامه كام صفر ؟؟؟؟؟؟؟
عارفه يا أم مريم أحنا في بلدنا الفساد مستشري بشكل طاغي
ومش حنقول الحكومه بس لأ طبعا
أحنا كشعب بقى حالنا سيئ
وقد ذكرتها مره في نقاش مع أحد الصدقاء
أننا 80 مليون مواطن فينا 40 مليون حرامي بيسرقوا ال 40 التانيين
ومع الزمن بتزيد نسبة الحراميه وبتقل نسبة الشرفاء مع زيادة ضغوط الحياه
مما يؤدي للكثيرين إلى التكسب بطرق غير مشروعه أو بالرشاوي والإكراميات وخلافه
ده حتى في المشاريع الخاصه والبسيطه
أصبح المواطن عايز يستنزف اللي في جيب أخيه المواطن اللي بيتعامل معاه
فأنا منذ فتره ذهبت لمطعم فول وطعميه وكده يعني ودفعت حساب كم سندوتش
أووووووم أيه الأخ اللي بيعمل الساندوتشات لما لافيته بون الطلبات
لقيته بيقولي صبح
قلتله صباحك زي الفل
وهو شغال يقولي يا عم صبح
وبصيتله بشكل متعكنن لقيته بغمز بعينه وهو بيشاور للفاترينه وبها بضع نقود فكه
قلتله حتى في المطاعم يآخي حتشلونا طب والله منا مصبح
وفعلا أسوأ سندوتشات أكلتها في حياتي لنه تعمد يديني أسوأ خبز لديه
وأقل كمية مأكولات داخل السندوتشات
فأحنا اللي وحشين بجد
ومن انفسنا سلط علينا

hasona يقول...
أزال المؤلف هذا التعليق.
shimaa elkholy يقول...

احمد كيه
والله يعنى

انا بعد البحث والاستفسار استهيئلي كده انه 8 والله اعلم برضه قلتلك والله ماخدنهوش

ههههههههههه

كلام حضرتك صح وميه ميه

بس احب اضيف عليه

اذا صلح الحاكم صلح المحكوم

والا كان يبقى ليه في حاكم وقانون ؟؟

احنا عندنا شريعه شامله وكامله وميه ميه

بس مين بيطبقها ؟؟

عندنا قوانين بالهبولي بس مين بينفذها وقائم عليها

حاميها

وحاميها ؟؟

اه قول انت ماليش دعوه

نورت يافندم

سواحة يقول...

يرضيك يا دردر يعنى ابقى التعليق 29 و لما تردى عليا تكمليهم 30 عليا :-((
انا بقيت فى اخر الصف كده و الله انا مش قصيرة قزعة و لا طويلة اهبلة
انا وسط و خير الامور الوسط :-))))

دردر عايزهم يفرقوا
حيقولولك خدى مليمين ده نصيبك بعد خصم الدمغات و التامينات و المعاشات و ال......
انا فاكرة مرة بصيت على مرتبى من اوله لاخرة اتصدمت :-) مبصتش ثانى بعدها و بست ايدى انى مبدفعش فى الاخر :-))))

و الباقى يا دردر عارفة حيروحوا فين فى نعل القبقاب علشان لما تخبطيهم بالقبقاب ميوجعهمش :-)))))))))))))

عارفة فيلم ابو حلموس
المقال مكتوب بطريقة الريحانى
سنفرة بكذا...
دهان اول وش بكذا ..
دهان ثانى وش بكذا..
تشطيب بكذا ...
تنظيف بكذا ..

و فى الاخر يطلعولك الدنيا مديونة

امال محاسبة و ايكونوميك ايه بس
انا اشك فى الشهادة
هاتيها افحصها تحت اشعة الUV كده
ولا اقولك انا حسكت خالص بس تخدينى معاكى الصين :-))) سكرتيرة خصوصية :-)))) ماشى ؟؟ اصل الرؤساء بيروحوا و بيجوا انما السكرتارية بيعمروا :-))))))


اما بخصوص الوسائل
اولا على حسب بمعلومات البايظة ده يا دردر اغلبه من فلوس معونات الامريكية علشان نحدد النسل
قوليلى ليه عايزن نحدد نسلنا ليه
علشان يقل خطر الشعوب الفقيرة على الشعوب الغنية
و عليه بيبعتولنا فلوس مخصوصة للدعاية و التوعية و الاعلانات و الادوية و الوسائل و فيه منهم وسائل بتيجى مستوردة و ادوية بتتركب محليا

و بعدين انا متنازلة عن حقى :-)))
و مليش فى النواشف :-)))
و مبحبش البنادول كمان
ادينى قبقاب اضرب بيه دماغى احسن
و يبقى بيدى لا بيدى دردر :-)))
و ينفع للاعداء كمان لو ربنا كتبلنا عمر

shimaa elkholy يقول...

وندتي

انتى يا جميل انشاله تشعبطي فى المدونه من بره تنوريها ولا يهمك
هههههههههههههه

بصي الكلام الكائن بان هذه معونات فهذه استهبلات يا حبيبتى

وانا لما اتكلم عن بنود ميزانيه دي مش داخل فيها اكيد اللوب البايظ الى امريكا بتبعته لنا
ولاحق الهرمونات الى منعوها فى الدنيا كلها وبيرموها عندنا فى صورة معونات للدول الناميه

واه انا درست اقتصاد كده على اد علامي فى الجامعه لكن انا قريت كتب ونظريات اقتصاديه وفاهماها وعارفه الية السوق وعارف كويس تباعيات الكلام الى انا باقوله ده وباقول وايه يعنى
طزززززززززز احنا اصلا متنيلين بنيله

المره الجايه هاعملكم بوست المليون جنيه ونشوف


وبعد الشر عليكى يا بطوط من القباقيب انشاله هما البعده ميت قبقاب يطرقع على نفوخ اهاليهم


منوره يا جميل

Haytham Alsayes يقول...

هههههههه

حلوة حكاية الوسائل علي الرقم القومي
بس تصدقي يعملوها دول جبابرة


تحياتي لاسلوبك الساخر

shimaa elkholy يقول...

هيثم السايس

متشكره ربنا يخليك

السخريه دي مغلبنا يا فندم

ويعملوا ايه لا طبعا ينزلوها على البطاقه امال يلهفوا ايه