الأربعاء، 2 يونيو 2010

سفينة الحريه.... اتكلموا

بقالي كام يوم باتابع وبانتظر عشان حاسه ان فى حاجه غريبه فى الموضوع

السياسه العالميه دلوقتي عباره عن لعبه قذره

اسرائيل تعادي وتصادق وتزور لاسباب غير واضحه فى البدايه

امريكا تحمي اسرائيل او تعادي اخرى برضه لاسباب تخدم مصلحتها ولو انصاعت لضغوطات مش هاتكون اكيد ضغوطاتنا احنا عشان احنا مش معانا حاجه اصلا نضغط بيها

حتى النفط ما بقاش فى ادينا سلمناهم المفاتيح وادينا القط مفتاح الكرار

تركيا كمان دخلت مرحله جديده
تركيا كنت باشوفها دايما بتاخد اسرائيل فى حجرها وتهشتكها عشان ترضي ماما وبابا  امريكا واوربا
اوربا الى تركيا لم تفتأ تتمرغ فى ترابها وتعملها عجين الفلاحه عشان ترضي عليها وتاخدها تحت جناح الاتحاد الاوربي

من فتره شوفت قناه تركيه موجهه بالعربيه وبالاحرى بالمصريه .... فتحت عين وقفلت عين كده وقلت اشمعن 

عموما هى سياستها باتت مختلفه   بصرف النظر عن تغير الحكومات ما هى الحكومات بتروح وتيجى 
 لا لا ماعادا احنا بتيجى بس

المهم ايا يكن الصوره الحقيقه للامر فهى حلقه من حلقات مسلسل صفاقة اسرائيل ووحشيتهم وبلطجتهم على العالم

وبعدين يطلعوا على الوسائل الاعلاميه الى هما اصلا مالكينها فى العالم كله ان ما كانش هما يبقى صبيانهم وان ما كانش صبيانهم يبقى الهبل الى منومين مغنطيسيا وتحت اديهم

يقولوا هما الى شريرين وداسوا على صباعنا والان نحن صباعنا واواااااااا  والواوا هاتكبر وهاتكبر لحد ما يبقى كلنا واوا
اهيء اهيء اهيء

والمطلبلتيه حواليهم شغالين

واحنا طبعا كفايه علينا نشجب وندد داخليا واصلا احنا ما عندناش  اعلام عالمي

اعلامنا مركز علينا احنا يسقينا الخنوع والخضوع وسياسة طنش تعش والجبن  بقى معشش فى قلوبنا من الى جوه اكتر من الى بره
عشان نتساق
ايوه لازم نكون مهيئين من كله لنصبح قطيع يعرفوا يسقوه باشاره من صباعهم

انا اؤمن جدا جدا بدور الاعلام ولو تلاحظوا اغلب الثورات والانقلبات اول حاجه بيحتلوها ايه ؟ المركز الاعلامي 

هو اهم حاجه  هو الى بيغير الفكر ويصلحه او يبوظه للاسف الى ماسكينه فى العالم العربي  بيعملوا فلوس مش فن

والفلوس عشان تتعمل وتتستف صح لازم يبقى كلب السلطه ولازم يبقى قواد او ما شابه ذلك

لا له علاقه بفكر ولا اصلاح ولا بتنجان بقى 

بما اننا مش من دول خالص الاعلام الوحيد الى فى ادينا هو الانتر نت ولله الحمد انه كمان مهم على مستوى العالم  من هنا اهمية اننا دايما نكون بنتكلم
بنقول الحق
بنعبر عن نفسنا مش بنعيط ولا بنستعطف العالم
لا لكن نكسب احترام العالم ونوريهم الحقيقه فعلا مش الاستهبال

ده فيديو ضرب اسرائيل على سفينى مرمره الى كانت شايفه مساعدات لاهل غزه

على صفحة اليو تيوب فى كليبات كتير انا اخترت ده والى عايز تاني يروح الصفحه ويشوف فيها ايه

ستيته نزلت عندها اميلات لجهات دوله عشان تبعتوا عليها  الفيديوهات دي عشان العالم كله يشوف  الحقيقه المره

ارجوكم ما تستهونوش باي خطوه صغيره  تعملوها  لو كل واحد فينا عمل خطوه صغيره فى النهايه هاتبقى حاجه مهمه صدقوني

الفيدو اهو ورونا الهمه


هناك 14 تعليقًا:

ستيتة حسب الله الحمش يقول...

انا قرفانة يا ندى
انا خايفة اروح لدكتور نفساوية مع اني محتاجاه جدا
ها يهبب ايه يعني
ها يديني ادوية انتي اكتئاب تنيمني
طب ما الشعب كله نايم اهو
انا مش عارفة انخمد ليه

بقول لك ايه
حد يعرف النائبين المصريين فين؟
مش لاقية اخبار عنهم وهم مغادرين الأراضي المحتلة من فترة

طيب والأتنين المصريين اللي معاهم جنسيات تانية بتوع الجزيرة

حد وانا في الشغل عرف حاجة ومخبيها

طيب حد عنده اخبار عن السفينة اللي كانت متعطلة ومتجهة دلوقت لغزة

حد يرد عليا يا بشر

هتشوفوا يقول...

النائبين المصريين موجودين والحمد لله

ود. محمد البلتاجي طلع امبارح 1 يونيو على الجزيرة ومفيش مشاكل, وفيه كمان حوارات معاهم انهارده 2 يونيو في الشروق والاهرام

تحياتي لندى ول د. ستيتة

richardCatheart يقول...

اه ياندى هانعمل وهانعمل وهانعمل

كل اللى هانقدر عليه مهما كان صغير

ومش هانستهين

بعت لكل اللى اعرفهم ووصتهم حتى لو ماهتموش يبعتو للى يعرفوهم
علشان خطرى
وبعت على الفيس وخليت الحج يبعت هو كمان على الفيس علشا اصحابه اكتر
وهانفضل نعمل
بلاش احباط فى صوتك يا ست الستات
ارجوكى احنا بعمل واحنا مش متوقعين حاجه تحصل بس علشان نبقى اؤدام ربنا عملنا اللى علينا على الاقل اللى فى ايدنا نعمله

النواب كويسين انا شوفتهم بس السفينه التانيه الحقيقه ماعرفش

تحياتى يا ندى
وماتحباطيش ياست الستات خير ان شاء الله

فتاه من الصعيد يقول...

شيء مؤسف... ربنا معانا يا رب

حكوماتنا نايمه ... يا رب نصحى بقا

تحياتي

شفـقــة و إحســــان يقول...

موضوع رائع
تسلم ايدك
واضح من قلمك صدق مشاعرك
وياريت نفكر في عمل جماعي
يشترك فيه المدونين كلهم
ويساهم في مسح دمعه
أو سد جوع
إخواننا في غزه

مع تحياتي
إحســـان

قلم رصاص يقول...

ربك هيعدلها من عنده
من فووووووووووق
عما نبقى نصحي النوم

ندى الياسمين يقول...

سوتيته

ايه حكاية النوم دي معاكي لا لازم نشوف ايه الموضوع

عايزه اكلمك قلقت عليكى وادوية اكتئاب تعالى يا خالتي نقعد ننقى رز شويه وانا اطلعك من عندي فله

قال دكتور نفساوي قال

واخبارايه الى انتى بس مش منيماكي تعالى بس نقعد نرغي شويه انشاله على الميل
هاتي بوسه بقى

ندى الياسمين يقول...

هاتشوفوا

شكرا على الافاده يا طارق ربنا يكرمك

ندى الياسمين يقول...

قلب القطه

اه ما اخبيش عليكى انا محبطه فعلا

وباعمل كل حاجه وانا محبطه

ومضايقه من الخنقه والعجز الى احنا فيه

بس ادينا بنعمل لما نشوف

وعشمي فى ربنا ليس الا ربنا يسترها معانا

تحياتي يا جميل

ندى الياسمين يقول...

فتاه من الصعيد

لا هما صاحيين بس مش للسكه دي

نورتي ياقمر

ندى الياسمين يقول...

شفقة واحسان

والله ياريت

بس للاسف انا الباب العالي عندي مانعنى من اي حاجه يا اختي مش عارفه اليه الدكتاتوريه دي

حتى اللقاءات مؤجله لاجل غير مسمى

بس عموما انا معاكم بقلبي بس انت قولوا

تحياتي ليكى وشكرا على الكلام الجميل

ندى الياسمين يقول...

قلم رصاص

مش لواحدها

نتوكل عليه مش نتواكل يا سيد

نسعى

تحياتي لك ونورت

غير معرف يقول...

مبروك علي النيو لوك

(:

ندى الياسمين يقول...

الله يبارك فيكى

والنبى ده كان مشروع اكبر من كده بس ما لحقتش اعمل حاجه

هههههههههههههههه

ربنا يسهل بقى