الاثنين، 12 يوليو 2010

وأنا معاك

وانا معاك ...باحس ان زي نور الشمس

صحيح  منور.... بس عنينا اوقات تتوجع منه

باحس انى جنتك.... بس كتير احس انى نارك

باحس انى طايره جواك ... بس محبوسه جوايا

جواك... بابقى عصايه سحريه .. بلمسه منها الاقي قلبك منور

ما بقيتش عارفه انا لك شط ولا بحر

ما بقيتش عارفه أنا  سعاده ولا شقا

يا ريتنى اهرب يا ريتنى ابعد

يا ريتنى اقرب يا ريتنى ضلك

ما بقيتش عارفه

******************************

ملحوظه هامه يا قوم : دى انا مش عارفه تصنيفها ايه الحقيقه
عشان بس ما حدش قولي ده شعر مفركش وكده

هما كلمتين نطوا فى دماغي  كتبتهم ومن زمان

وبما ان وندا مسميانى شجرة  الدر وبتدلعنى دردر

فممكن نوصف الحاله العامه للكلمتين الى فوق دول بالعباره دي :

التردد .. التردد يا عزيزي ايبك ... مرض الجنس البشري


هناك 43 تعليقًا:

فاتيما يقول...

آه

بس ممكن جنب التردد
يبقى اسمه
حب كبير برضو
مش نافع معاه
لا تراجع و لا خضوع


البت وندا دى شقاوة
حلو اسم دردر دا

وحشتينى يا ست
و بوسيلى العيال

shimaa elkholy يقول...

فاتيما حياتي

ايوه عندك حق ماهو معنى وجود تردد انها مش قادره تاخد قرار برضه لصعوبةالموقف

وحشاااااااني اوي يا جميل والله

حنعيش يعنى حنعيش يقول...

بما اننا بنتكلم بالافلام التاريخية حرد عليكى من فيلم صلاح الدين :
السلطان صلاح الدين علمنا كيف نكسب المعارك بالصبر ...

ستيتة يقول...

ده اللي بيقولوا عليه تعايش وتكيف
مش كده
ساعات عاوزة أحضنك
ساعات عاوزة أبطحك
ساعات عاوزة أعضك
بس مستغناش عنك :)

حلوة يا يا يا ............
إهيء إهيء إهيء

sony2000 يقول...

طب والله اكبر مشكله بنعانيها
هي فعلا التردد
دي عرفاها كويس
لاني بجربها كل يوم
وكل يوم بتخسرني حجات كتييييييييييير اوي:)

غير معرف يقول...

أكرهك وأحبك ولا أبيـك وأبيـك
لخبطت فكري ماعرفت الحقيقـه

ايه الي ملخبطلك مشاعيرك ياجميل

وحشاني اوووي ياعسسسل

يارب تكوني بالف خير

كلمتين جامدين بجد

سلامووووز

shimaa elkholy يقول...

حنعيش يعنى حنعيش

ههههههههههههههه
حلوه

بس الحكايه مش معركه ولا حاجه يا ريت كنا شمرنا عن ساعدينا وكنا حاربنا وكسبنا كمان

تحياتي يا فندم

shimaa elkholy يقول...

ستيتة حياتي

ازيك يا جميل

لا هى مش الفكره كده

هى كانت فكره خطرت على بالي اذا البنى ادم حاسس انه بقربه من شخص معين على اد ما بيسببله حاجات كتير كويسه ممكن يكون فى وقت من الاوقات ومن غير ما يقصد بيوجعه بشكل او باخر

فى الحاله دي يعمل ايه يبعد ولا يستنى ولا ايه


ايوه انا كمان اهيء اهيء اهيء ميت مره والله

shimaa elkholy يقول...

سوني

التردد ممكن يكون صحي فى حال انك بتدي لنفسك فرصه تفكري وتحسبيها كويس

انما اول ما يزيد عن الحد ده يبقى معوق على طول لكل حاجه وتلاقي نفسك واقفه على باب الحياه دايما ما بتدخليهاش

نورتي يا جميل

shimaa elkholy يقول...

نواره
هههههههههههههههههههه

لا انا مش متلخبطه ولا حاجه

دى افكار ودي مكتوبه من زمان

وانتى وحشاني جدا والله انتى فين مش شايفاكي من زمان

يارب تكوني بخير يا حبيبتى

سواحة يقول...

ايه الدرر ديه كلها يا دردر
:-)))))

قصيرة بس عمله زى البونبونى تدوب قوام
صحيح الصيف بيحب السلطة و البطيخ و الجبنة و عليه قفلتى المطبخ لشتاء الجاى؟؟

نفسى تفرح بيا يارب(الشهاب) يقول...

كلمات رائعه وجميله
مدونتك فوق الرائعه
ادعوكى الى مدونتى المتواضعه

shimaa elkholy يقول...

تصدقى بالله يا وندا

انتى بنت حلال

انا والله مش عارفه ليه مش جايلى نفس اشتغل فى مدونة المطبخ
رغم انى عندي صور جاهزه كتييييير

بس مش عارفه ليه ماليش مزاج والله

انا بالعافيه باكتب اليومين دول
واوقات باكتب حاجات وبعدين ما انشرهاش مش عارفه ليه والله

بخروني يا جماعه ولا حاجه

نورتي يا جميل

shimaa elkholy يقول...

شهاب

متشكره اوي اوي على الكلام الجميل
وطبعا هاتشرف بزيارتك ان شاء الله

Humman being يقول...

آآآآآآآآآآآآآآآآه يا مشموش
التردد
أختك شيماء هيه "أم التردد" للأسف فى كل حاجة... يمكن "خوف" .. خوف لا أظلم حد أو أتجنى على حد....أو آخد قرار أندم عليه بفكر 100 مرة قبل ما أعمل أى حاجة

بس البوست كله حب برده يا مشمش ومش مفركش ده كلام من القلب

richardCatheart يقول...

عزيزتى شجره الدر

والله واندا دى بتفهم انا معرفش سبب التسميه بس هى ليقه عليكى وعلى شخصيتك فايتر يابت والله هههههههههههههه


اللى انت كتباه دا حيره تنورى وانتى مطفيه

تسعدى وانت حزينه
تنفضى البت وانت مستحميه

اقصد طبعا البشر عموما مش شجره الدور بفصه خاصه علشان مابحبش الاسقات الشخصى غلس

وديما نسال احنا بعمل كده ازاى وانا مش حاسين الشىء

بصى الكلام جميل والاجمل ان كل واحد يشوفه بعينه واحساسه هو

سلامات وبوسات واحضان وسلمى على القبيله

mrmr يقول...

تعرفى ان التردد ده مناسب لحاجات كتير فى حياتنا
فعلا على اسم على مسمى
مش اقصد انتى طبعا يا جميل

بس كلماتك حلوه
سلمت يداكى
ابقى بوسيلى العيال
ربنا يسعد اوقاتك

قلم رصاص يقول...

دردر؟
هههههههههههههههههه

حلو الاسم دا

بس صحيح الكلام بتاعك دا تصنيفه ايه
دا شعر جنوب إفريقي؟ ههههههه

احسن حاجة انك قولتي توقعك لردود الافعال

رغم ان الكلام حلو اوي والله
معانيه حلوه فعلا
بس عاوز يتظبط من حيث الأوزان والموسيقى والذي منه

يلا مزيد من الابداع

واااااادي موهبه جديدة الى جانب الطهي والرغي

ع المدونه طبعا ^_^

momken يقول...

مش مهم خالص تصنيفها ايه

مش لازم تبقى شعر او نثر او مقامه او مقال

لكنه ببساطه زى ماهى كده لمست القلوب بقوة

واثرت فيها اياما تاثير

تسلم ايدك

البوست جميل بشكل استثنائى


تحياتى

shimaa elkholy يقول...

شيماء

احب فيكى دلعك ليا الصراحه
هههههههههههه
حلو اوي

شوفي التردد لوقت معين بيكون مفيد لكن لما بيزيد عن الحد ده بيبقى مضيع للعمر والامال

نورتي يا جميل

shimaa elkholy يقول...

قطقوووووطه

بقى انا لايق عليا شجرة الدر ماشي ماشي يا بني ا دمين

تصدقي وانا بامووووووت من االاسقاطات برضه

عموما مش هايريحكم واقولك اصل الموضوع برضه
ههههههههههههههههههه

وتسلمى يا جميل على الكلام الجميل الى زيك

shimaa elkholy يقول...

مرمر

تسلمى يا جميل ربنا يخليكى ونورتي

shimaa elkholy يقول...

ام خلود

حاضر يا فندم علم وينفذ ان شاء الله

shimaa elkholy يقول...

قلم رصاص

يا عم سيد انا قلت مش شعر والله
هههههههههههه

ولا باعرف فى الشعر ولا الموسيقى ولا القوافي صدقنى انا

تحياتي لك ونورت

shimaa elkholy يقول...

ممكن

متشكره اوي ربنا يخليك

مرسي كلامك كله ذوق متشكره اوي
ونورت

اميرات الاسرار يقول...

السلام عليكم
كلام جميل والله مش مهم نسميه ايه بس المهم انه بيبقى طالع من قلبنا من غير اى تزوير

تسلم ايديكى

ياريت تشرفينا فى مدونتنا

مستنينك اميرات الاسرار

غير معرف يقول...

Whatever

بس حلوة :)

تسلم ايديكي

رحــــيـل يقول...

بغض النظر عن نوعية الكلام بس هو حلو
:))
عايزين نتقابل فى المنصورة الاسوبع الجاى ايناس نهر الحب موجوده فى المنصورة وهنقابلها ايه نظاااااااامك فى المنصوره اهو جمبك يعنى لا حجج ولا اعذار
:) هكلمك ميل عشان نتفق

غير معرف يقول...

منوره

يعني كهربا

وطول النهار

وعينك وجعتك

بس يا حاجه

هتدفعي فاتوره مكلبظه عالاخر

لــــ زهــــــراء ــــولا يقول...

ندى الياسمين والفل ندى النور والشمس جميلة الخاطرة عزيزي ايبك الدرة المكنونة الندى بتقولك لا تتردد
لـــولا

Kiara يقول...

دا حب من الدرجة الاوووووووووووولي ؛)

وحشتيييييينى ياقمر

نفسى تفرح بيا يارب(الشهاب) يقول...
أزال المؤلف هذا التعليق.
نفسى تفرح بيا يارب(الشهاب) يقول...

شكرا على الرىء السديد
والزياره الجميله

باحث عن حب يقول...

السلام عليكم
كيف الحال
انا كنت متابع البوستات اللى فيها الليالى المصريه ب سبصراحه تهت شويه
علشان اكون صادق معاكى
بس
محاوله جيده طبعا
للاحياء الاستاذ الراحل اسامه انور عكاشه
ربنا يبارك فى كل من ساعد فى هذا العمل
واتمنى من الله فعلا انها تتكتب وتكمل وتتعمل كتاب
زى غاده عبدالعال عايزه اتجوز
والله ياريت فعلا فعلا
وما ذالك على الله بعزيز
ده اولا
ثانيا
فاكره البوست بتاع اوشه وايوشه
والله اعجبت بيه جدا
وحفظته على الكمبيوتر كمان كل ما حد يدخل عندجى ضيف يقرأه
ونقعد نضحك
افكارك رائعه والله
معلش بقه انا بقول رأيى بالجمله علشان ليا زمااان

مدخلتش عند حضرتك
بس
انا متابع مدونتك من اول ما عرفتها
كلماتك رائعه والله الله يرحم شجره الدر
والجمله الشهيره مش عارف هى قالتها بالفعل
ولا
تحيه الله يرحمها
طبعتها فى ذاكرتنا كلنا؟\
الى الامام دوما
واسف على الاطاله

shimaa elkholy يقول...

اميرات الاسرار
ربنا يخليكى يا جميل

وطبعا ان شاء الله اجي ازوركم ونشوف ايه الاسرار

نورتي

shimaa elkholy يقول...

رحيل

انا معاكم اهو لحد ما نشوف الميعاد ايه

shimaa elkholy يقول...

مصري جدا

يا سيدى ندفع يعنى هى جت على دي
ههههههههههههه

نورت يا فندم

shimaa elkholy يقول...

لولا

ربنا يكرمك يا جميل على الكلام الجميل

ونورتي

shimaa elkholy يقول...

كيارا

حبيبتى ربنا يخليكى وحشااااااااني والله العظيم يا بنتى انتى فين مختفيه ليه كده

shimaa elkholy يقول...

الشهاب

الله يخليك متشكره انا اتشرفت بزيارتك

shimaa elkholy يقول...

محمود باحث عن الحب

بوستات الليالي المصريه يا سيدى عشان ما توهش خالص
احنا عملنا مدونه جديده ونزلنا عليها القصه كامله ورا بعضها فاضل اخر جزئين لسه ما اتكتبوش بس هانزلهم برضه وراها


لسه طبعا هاحط البانر هنا وكده
انت اول حد اديله الوصله والله
وطبعا من كل قلبي باتمنى النجاح لليالي المصريه على اي وجه

ومتشكره على الكلام الجميل عن بوست اوشه وموشه البوست ده انا باحبه جدا وله مكانه خاصه عندي بجد

وحقيقى فرحت بمتابعتك ليا ومتشكره لك اوي

shimaa elkholy يقول...

سمو الامير

سوري تعليقك تاه فى النص مش عارفه ليه

متشكره جدا ونورت

shimaa elkholy يقول...

يا محمود باحث عن الحب سوري نزلت التعليق من غير الوصله

الوصله اهي

http://laialy-masrya.blogspot.com/