السبت، 17 يوليو 2010

الشحاتين اهما


ازيكم يا  اصدقائي

النهارده عايزه ارغي معاكم فى موضوع خانقنى بشكل مش معقول خصوصا اننا على اعتاب ذروة انتشاره
الا وهو يا اصدقائي  الحلوين الشحاتين

الحقيقه انا بقيت امشي فى الشارع وحاسه ان الشعب كله بقى شحات ولله الحمد والبركه فيهم ربنا ياخدهم

انا عارفه كويس ان الحاله الاقتصاديه زفت والناس تعبانه ما قلناش حاجه

بس الحكايه بقة فوق العاده يا جماعه

تلاقي واحد شحط طويل عريض يجر عربيه بطوله ورايح يشحت

والمصيبه السوده ان الناس بيدوله
طب لييييييه

جوزي بيقولي كان فى واد بيعدي علينا كده كل فتره ينضف العربيات ويلمع وكده ويجى ياخد الى فى النصيب من الكل
حاليا بقى بيجى يقول كل سنه وانت طيب يا بيه  معلش اصل مش قادر انضف النهارده
واصل اخويا واصل ابويا والرويات تشتغل

كان فى واحد تاني بيعدى شايل سبت زبادي على كتفه وبيبيع زبادي ومعاه زماره حاليا ماشي بالزماره بس وبرضه بيبيع كل سنه وانت طيب يا بيه

كان فى واحده مصدعاني ومش عارفه ايه حدفها عليا تيجى تخبط وكل مره
تحكيلى مأساه شكل وكله كذب وانا عارفه ومره على  التانيه وهى ست يعنى فى الثلاثينات مثلا وما شاء الله شكلها صحتها كويسه فقلتلها من غير ما تحكيلى قصص تعالي كل اسبوع نضفي سلم البيت وانا اديلك الى انتى عايزاه وزياده

تخيلوا قالتلى ايه ؟؟!!!

لا انا ما بامسحش سلالم
وما زالت بتيجى  تخبط بس عنتش باعبرها

خلاص الشعب ناوي يانتخ عن العمل وقالك الشحاته حلوه ياعم  وبتجيب فلوس ومن غير دوشه ولا شغل ولا حاجه
ماشي يلف ويلم فلوس وبس


عارفين عندنا هنا فى وسط البلد سوق زي الموسكي كده بس على صغير يعنى تخيلوا بقى حضراتكم ان فى جروب كامل من الشحاتين بيمشوا كده سواحين على البلاد

ومقسمنها كل بلد يوم
يروحوا السوق الرئيسي كده ويمشوا على التجار يلموا النقطه
قصدي يشحتوا يعنى

وايه بقى بتناحه وقلة ادب وصفاقه ومش باخد فلوس فضه وربع جنيه اعمل به ايه وحاجه اخر مسخره

طب وبعدين ؟؟؟

كده الشعب كله هايتحول لشحاتين قريب ونبقى نغني ونقول الشحاتين اهما بقى  

لا وفى بقى قصص مبتكره للشحاته او بالاحرى النصب
الى يجى يقولك انا جايلك  من طرف الحاج فلان وبنلم فلوس لفلان وطبعا بيقولك اسامي مثلا من جيرانك كده يعنى  وبيدخلوا البيوت كمان


اظرف حاجه بقى  لما واحد راح لجوزي يقوله انا  اخوك فى الله فلان
وانا كنت تاجر وفلست وقصه كده طويله  عريضه  وايه بقى ؟؟
كان مسطول ... اه والله يا جدعان كان مسطول ورايح يقوله انا اخوك فى الله ومربي دقنه وكده
واول مره قلنا ان بعض الظن اثم جايز هو الى عنده تخلف عقلي  لكن عشان كان مسطول تاني يوم راحله تاني وهو ناسي انه جه هنا قبل كده طبعا ما هو كان مسطول  وراح قال نفس الكلام بس بقى يومها كان فايق
شوفتوا الحلاوه ؟؟


العيال الصغيرين فى المناطق الشعبيه تمشي  تلاقي عيل بيقولك هات جنيه يا عمو وياخدوا ويروح يجيب شبسي يعنى مش ميت من الجوع الولد

ايه بقى ؟؟ اخرتها ايه

مين الى غلطان يا ناس فى الموضوع ده

مين غلطان ؟؟

فين محاضر ا لتسول ؟؟؟

فين  الكرامه الى كانت فى نفوس الناس

فين الوعي من الناس الى بتدفع للناس دي وتساعدهم على التنبله والبطاله ؟؟

احنا داخلين على رمضان  وانا عارفه ان ده الموسم بتاعهم ده هما انتشروا من دلوقتي اصلا

ارجوكم فى وجوه خير كتييييييره اوي والناس المحتاجين فعلا جوه البيوت تحسبهم اغنياء من التعفف

فارجوكم شحاتين الشوارع دول ما حدش يعبرهم

دول محترفين شحاته بالاحرى نصابين

ولولا انهم لاقيين الادين كتير بتتمد لهم ما كانوش سابوا اشغالهم وقعدوا يشحتوا

ارجوكم فكروا ان كل قرش هنتحاسب عليه حطناه فين

المحتاجين كتير والفقرا كتير واوجه الخير ومصارف الزكاه كتير كتير كتير

ارجوكم ما تربوش جيل من الشحاتين

يا ناس ده احنا انتشارنا فى الصين خلى الصينين يشحتوا بالعربي

الصينين المسلمين ماشيين فى المناطق المنتشر فيها العرب ولما يلاقوا واحد شكله عربي يقولوا مسلم مسلم وبيشتحتوا

 يعنى ولله الحمد هاتبوظوا العالم كله مش الشعب بس

شوية عقل يا اصحاب العقل

هناك 18 تعليقًا:

حنعيش يعنى حنعيش يقول...

العيب مش فى الشعب ... العيب فى الحكومة ... او فى الوزارة ... اوفى الريس ... او في اى حد .. لكن الشعب فلهههههههههههه... موافقانى كدة

shimaa elkholy يقول...

حنعيش يعنى حنعيش

يا دوك انا ما قلتش الشعب مافيهوش عيب

انا قلت المنظومه كلها بايظه ولعلمك ايوه بقى الحكومه برضه غلطانه

احنا ياعم شعب عايز يتربى

طب نجيب مين يربينا ؟؟ ها قولي انت

منور يا دوك

mrmr يقول...

انت بتحكى على اللى بيخبطوا على البيوت واللى بيلفوا فى الشوارع
عايزه اقولك موقف حصل وانا شفته قدام عينى

قعدين فى امان الله على مكاتبنا ولقينا خير اللهم اجعله خير واحد داخل علينا ماسك فى ايده كاسترا ورابط بطنك بشاش مليان دم والكاسترا مليانه بول طبعا
حاجه تقرف بصراحه لكن بيقولك انا عامل عمليه محتاج الدواء ده ياريت تساعدينى
طبعا صعب عليا وكل واحد اداله اللى فيه النصيب
بعد لفه فى المبنى كله نزل
كنا فى الوقت ده بصين من الشباك لقيناه شال الكاسترا ورماها فى الشارع وخذ تاكسى وقال يا فاكيك
دلوقتى المرض بقيت وسيله لشحاته
وياما ناس فى امس الحاجه لجنيه تجيب بيه عيش للاولادها مش لقيه
انا بضم صوتى لصوتك بقول فى اماكن مخصصه لدفع الذكاه او العشوووور
وده حرصا على كله قرش انه لازم يروح لمستحقينه
الغطله مش غلطه شعب ولا حكومه
بقيت غلطه اخلاقيه من الدرجه الاولى
موضوعك فى غايه الاهميه

رحــــيـل يقول...

احنا بنشتغل فى العمل التطوعى بقالنا كذا سنة ولما فكرنا نعمل مشاريع صغيرة للناس اللى بتاخد فلوس كل شهر اعترضوا ومرفضوا وقالوا احنا منعرفش نشتغل عايزين فلوس رغم انا لمشروع اصلا ممكن يخرج ليهم اكتر من الفلوس اللى بيخدوها بشكل مباشر بس خلاص هما اتعودوا على كده
مش مشكلتهم وبس لكن فعلا مشكلتنا احنا كمان المفروض نميز مين اللى شكله محتاج فعلا ومين اللى مش محتاج

خواطر شابة يقول...

عزيزتي المسألة عامة انا ايضا كنت ناقشت هذا الامر في تدوينة سابقة وكان رأيي من رأيك في اننا ينبغي ان نبحث عن المتعففين لكن اختلفت اراء المعلقين بين من وافقني الرأي ومن قال ان الله سيجازيني على نيتي وسيجازي من ينصب على نيته ايضا
عزيزتي هناك اناس احترفوا التسول اتذكر انه هنا مرة قبض على امرأة تتسول وعثر معها على ثروة تربطها تحت ملابسها واكتشفت الشرطة انها تملك بيت ومجوهرات ومع هذا تحترف التسول
ندى اخر اربع سطور انا مفهمتهمش ايه علاقة الصين بمصر
تحياتي وودي ياجميل

shimaa elkholy يقول...

مرمر

ايوه يا بنتى دي بتحصل كتييييير باقولك على جميع الاشكال والاصناف والله

المشكله برضه يا مرمر المؤسسات دي مين ماسكها ماهو ما عادش فى ثقه فى اي حاجه فى البلد دي

نورتي يا جميل

shimaa elkholy يقول...

رحيل

ايوه يا بنتى والله الحكايه محتاجه وقفه من الكل

حاجه بقت مشينه فعلا

نورتي يا بطه

shimaa elkholy يقول...

خواطر شابه

ماشي نيتك لما تكوني مش عارفه انما لما تكون واضحه وجليه انه نصاب ومحترف التسول يبقى ما ينفعش نقول هو ونيته

اخر اربع سطور قصدي الصينين المسلمين اتعملوا الشحاته مننا لانتشار العرب والمصريين هناك عشان التجاره الى بينا وبينهم

منوره يا ريسه يا قمر

غير معرف يقول...

وبهذه المناسبه

هاتي ربع جنيه

خواطر شابة يقول...

عزيزتي رأيت الان بانر مدونة الليالي وضغطت عليه لاجد نفسي داخل مدونة الليالي انا لم اتكلم عنها لانك اخبرتيي ان لااعلن عنها الان لكن طالما موجودة ومفتوحة لما لا تعلنين ذلك
الدكتور اسلام اقترح حاجات جوايا لفترة رئاسة ثالثة طالما المدونة موجودة فكروا في طريقة كي تتولى هي الاشراف ويكون النشر مباشرة على مدونة الليالي
ياعزيزتي هموم الشعب ورائك ورائك ههه يالله فكري وردي علي

Kiara يقول...

يالهووووووووووووووووووووووووووي انتي اتكيتى علي موضوع رخم

وخناقس مع ماام علي كدا

في واحده في المترو محروقة وبتقول ان جوزها ميت ولله ماما تديها اقولها يامام مش تديها

لان الست دي اصلا واخده قرار ان المجلس القومي للامومه والطفوله عاملها راتب شهري وصلحلها المكان اللي عايشة فيه وجوزها عايش مش ميت

تقولي مهو تلاقي الفلوس مش مكفاياها

اقولها طب هوديلك الفلوس دي لناس محتاجه فعلا


وللاسف اغلب الناس زي ماما كدا مش بيفكرو هما بيدو مين ومحتاجهم ولا لا

باحث عن حب يقول...

الشحاته انواع
والناس بتخترع انواع جديده كل يوم
وانا ماشى بالعربيه مع اخويا
وقفنا فى اشاره وقفت
سياره جنبنا
اللى بيسوق اشتغل يبكى ويقول ان العربيه هتقف منه ونسى المحفظه فى البيت ومعهوش فلوس خالص انه حتى يتصل
قال ممكن فلوس امون العربيه واروح

كلام غريب

حديث شريف مش عارف صحته(اعطوا السائل ولو على فرس)
وانه يجب علينا اعطاء السائل مهما كان
علشان سمعت فى خطبه جمعه ممكن يكون ملك مبعوث من عند الله
فلا ترد
يده
ممهما كان قعليك اعطائه
مش عارف صحه الحكم الشرعى ده ايه برضوا
بس عاوز اقول حاجه

الواحد ممكن يعطى واحنا منعرفش
حقيقه السائل ايه
احنا مش هنغوص فيه ونبحث
بس
فى ناس
من منظرها بيظهر عليها
موضوع
جميل
بس
نعتمد على الفراسه
بقه

shimaa elkholy يقول...

مصري جدا

لا ياعم هي سايبه
هههههههه

shimaa elkholy يقول...

خواطر

ايوه انا ما لحقتش اعلن عنها يا جميل والله
ولسه البانر كمان عايزه ارفعه على لنك وكده موال يعنى

بس هى المدونه خلاص جاهزه

فاضل بس الدكتور اسلام يتسملها مني ومصمم هو انه اسلمهاله عليها اسمى ان انا الى مصممها ومش راضي يتنازل وانا مش عارفه اكتبها ازاي

ولا طبعا تولي انتى النشر لحد نهاية القصه
ونبدأ هناك بقى من القصه الجديده فاضل ليله واحده


ويا باشا عنينا للشعب والريس الجديد

shimaa elkholy يقول...

كيارا

ماهو بس احنا لو نفكر شويه بمخنا من غير عواطف

بس هانعمل ايه

ماهو انا بقى ماما مش بتدي لواحده ماشيه نوووووووووو

ده لها زباين كده حضرتك بيجولها لحد البيت كل شويه لما هارينا

هانعملهم ايه يعنى امي بقى وخلاص
ههههههههههه

منوره البلوجر كله يا كوكي

هتشوفوا يقول...

أنا برده بضايق جدا بس مش لدرجة ان أجرسهم ببوست

طب تعملي ايه لو حد من الأخوة الشحاتين قرا البوست ده هتبصي في وشه ازاي هيجيلك وش تمدي ايدك وتديله اللي في النصيب ازاي
وبعدين هو حد لاقي شغل عشان يشتغلوا اعتبريه نوع من انواع التكافل الاجتماعي واصلا لو فيه شغل هما مش فاضيين يشتغلوا ولو اشتغلوا هيكسبوا كام

سيبي كل واحد يعمل اللي عايزه وبلاش اسلوب كتابة التقارير بدل ما ينشوكي دعوة يجيبوكي الارض

shimaa elkholy يقول...

محمود

تصور ان رضا برضه قالي حاجه زي كده بس بقى هو بيروح لحد عنده فى المحل وينزل من العربيه ويحكيله برضه قصه وحدودته

يادي الهبل يا ولاد

بالنسبه للحديث الى انت قلته فى الحقيقه انا دورت ولقيت انه حديث ضعيف

الراوي: الحسين بن علي المحدث: ابن حجر العسقلاني - المصدر: تخريج مشكاة المصابيح - الصفحة أو الرقم: 3/208
خلاصة حكم المحدث: [حسن كما قال في المقدمة]

ده الروايه الوحيده الى لقيتها يعنى تعتبر الى حد ما فى حكم الصحيح الى هو حسن يعنى


المهم حتى وان اخدنا بالحديث انا ادي للسائل حتى لو كان راكب حصان مااااشي بس مش حتى لو كان بينصب عليا

تحياتي لك

shimaa elkholy يقول...

هاتشوفوا

يا عم طارق لا مش نظريه دي خالص يعنى الشغل مرتبه قليل اسيب الشغل واقعد اشحت ده نصب وابتزاز للناس

دعوة ايه ياعم بس هههههههههههههههه

فكرتنى بواحده كانت بتقعد قدام المدرسه بتاعتنا الصبح كل الى ما يديهاش تدعي عليه
ههههههههههههههههه