الأحد، 25 يوليو 2010

الكابوس

كنت قاعدة فى مطعم ومعايا ولادي وكان فى فى المطعم ناس كتير


غيرنا  وبعدين مريم قالتلى يا ماما شوفي العربيه الى ماشيه هناك


 دي بيلفوا ويبصوا على هنا كل شويه قلتلها مالكيش دعوه يا ماما بحد عادي
بعد شويه وقفت العربيه بكسره مفاجأه على باب المطعم الزجاجي ونزلوا منها بسرعه اربعه منهم بنت
وبسرعه انتشروا حوالينا وطلعوا كلهم اسلحه بيضا وقالولنا بهدوء كده كل واحد يطلع الى معاه فلوس موبايلات ساعات ومن غير اي دوشه عشان ما حدش يتاذى
بصيت على ولادي وشوفت الرعب فى عنيهم قلتلهم اقعدوا ما تخافوش هما هايمشوا دلوقتي

وبدأت  اطلع الحاجه من شنطتي ولقيت معايا موبايلين فكرت اطلع واحد وبالتاني احاول اتصل على البوليس
بعدين فكرت... بوليس ؟؟ طب هاتكلم ازاي ولو اتكلمت اصلا هايجوا ويعبرونا ولا لا
ولو جم هايجوا  امته
طب اكلم مين ؟؟ اكلم جوزي  يتصرف ؟؟

ضربات قلبي كانت سريعه جدا جدا وكنت مرعوبه جدا وخايفه على ولادي جدا

ولقيت جوزي بيخبط على كتفي وبيقولي اعمل حسابك فى الشاي؟؟

صحيت من النوم بصيت حواليا ولقيتنى فى بيتى الحمد لله
وقلتله ماشي

بس لسه قلبي بيدق بسرعه والخوف والرعب مالينى

والاكتر والاكتر المراره فى حلقي زايده

عارفين ليه ؟؟
لان ده ممكن يحصل
ايوه بكل بساطه ممكن يحصل 
ومش هانلاقي  حد ينجدنا

لا هانقدر نعمل زي الافلام الامريكاني ونتصل بالنجده  يجوا بعد دقايق

ولا حد فينا اصلا هايبقى له تمن لو مات ساعتها

مش عايزه اشوف الخوف فى عيون ولادي واعجز انى اطمنهم

يارب ما تكتبهاش علينا وارحمنا



هناك 40 تعليقًا:

فاتيما يقول...

الحمدلله انه مش حقيقة
انا قلبى وقع ف رجليا بعد كام سطر


وهوه فعلا كابوس يا صبصب

وهاجس أى حد دلوقتى
خصوصا الأباء و الامهات
و خوفهم على عيالهم
و عدم قدرتهم على حمايتهم
و لا الإستعانة بحد ينجدهم


و حكاية البوليس دى للأسف
صحيحة


للأسف


الحمدلله انه كان حلم

adel يقول...

اصلا لو اتصلتي بالبوليس
غالبا هيرد عليكي كنتاكي او هارديز
جربي كده ؟؟

shimaa elkholy يقول...

فاتيما

على فكره بجد الكابوس ده جالي وانا نايمه من ساعتين كده

ومن ساعتها وانا مقفوله قافله سوده

سوري انى خضيتك

shimaa elkholy يقول...

عادل

ازيك

انت عارف انا اتصلت على البوليس قبل كده كذا مره فى مناسبات عده مش قادره اقولك على الردود كانت بتبقى ازاي

حسبنا الله ونعم الوكيل والله العظيم حسبى الله ونعم الوكيل فى دي بلد

فاتيما يقول...

سلامتك من الانزعاج يا صبصب

عارفة انا الإحساس الرهيب
بعدم الامان دا


اقرى قرآن يا حبيبتى
و انتى تروقى شوية

ربنا يحفظك انتى و العيال و ابوهم و كل احبابك من كل شر
يا رب

ستيتة يقول...

كده يا ست انتي
انا انتهيت بعد الفقرة الأولى
وقلت طالما بتكتب تبقى كويسة
الحمد لله حلم
هو اقرب للحقيقة بس الحمد لله
ها اروح الإمتحان وبعدها ارد
مع اني اقسم بالله ما عندي رد
اه ممكن
ربنا منه الأمان
خلاص كل شيء ممكن للكل
ربنا يأمني ويأمنك ويأمن الكل

مش قلت لك
القراءة والكتابة والفهم تعبوا النفوخ وبقوا خطر على الصحة العامة
سلامتك من الأذى يا حبي

shimaa elkholy يقول...

فاتيما

ميرسي يا جميل

حاضر ان شاء الله

شكرا يا جميله ما اتحرمش منك

Ramy يقول...

اولا هأعلق على طريق السرد

بجد انا كنت بقراها و انا عايش مع القصة جدا (:

لغاية ما صحيت (:

ثانيا الموضوع

أحنا عندنا النجدة دى زى ديكور بنكمل بيه الشكل الرسمى للدولة الحديثة
بدون استخدام حقيقى ليها

معندناش 911
(:(:(:

دى النجدة اللى بصحيح (:

ربنا الحافظ أكيد

ربنا يحفظك و يحفظ عيلتك دايما

قولى امين

shimaa elkholy يقول...

ستيته

سوري والله ما كان قصدي اخضكم هى جت كده

بس اصل انا اتهزيت من الموضوع ده بجد

وربنا معاكي وهاستناكي لما ترجعي

وعايزه ارغي معاكي والنبى شويه

shimaa elkholy يقول...

رامي

اميييييين والله بادعي وعارفه ان احنا ماشيين بستر ربنا علينا والله

والنجده حقيقى هى اقل من ان تكون ديكور
هابقى احكى لكم بعد كده مواقفي معاهم

تحياتي لك ونورت

خواطر شابة يقول...

سلامتك من الكوابيس
انا وانا اقرأ تسائلت هل وصل انعدام الامن لهذه الدرجة هجوم في وضح النهار على مطعم ملئ بالزبائن وتسائلت ايضا هل اربعة اشخاص منهم بنت قادرين على السيطرة على مطعم كامل بأسلحة بيضاء فقط ليتضح ان الامر كابوس مزعج
سبب الكابوس عزيزتي هو تنامي الاحساس بعدم الامان صراحة نوع الجرائم التي اصبحنا نسمع ونقرأ عنها الان تنمي هذا الاحساس وتغذيه ربي يحفظنا جميعا
دمت بكل ود عزيزتي

سواحة يقول...

دردر
سلامتك من الكوابيس يا ست الدار

اولا بلاش اكل ثقيل على المعدة و بعدها نوم - تقليلا للكوابيس

ثانيا لو حصل فعلا طبعا الدماغ ساعتها مبتفكرش بنظام عادى
ففكرى دلوقتى يا تتصلى بجوزك و تسيبى الخط مفتوح و ترمى الموبيل فى حته قريبه يسمع اصوتكم و يفهم منها الموضوع و ياريت يكون عارف خط سيرك ساعتها
\او تتصلى بالنجدة بس للاسف فعلا معتقدش حيرد او لو رد حيحس بان فيه موضوع غريب

ثالثا
بجد عن تجربة متستهونيش بكلام العيال
لسه لحد دلوقتى فاكرة لما بنت اخويا نبهتنا لحريقة و لحقنها بدرى لاننا مطنشنهاش على الرغم اننا مكناش مصدقنها

Remas يقول...

حرام عليكى بجد
انا اتخضيت وانا بقرا ولانى مش في البيت
والنت مش مظبوط كنت قايمة اكلمك بس الحمد لله فهمت انه حلم
وبردو هاكلمك الصبح

ربنا مش يقلقك ابدا على ولادك ولا على اى حد يا توتة
بس للاسف فعلا الامان بقى مش موجود

رحــــيـل يقول...

:( ((
للأسف فعلا ممكن يحصل وزى ما انتى قولتى مش هنلاق حد ينجدنا
ربنا يسترها علينا

باحث عن حب يقول...

السلام عليكم
اولا
انا صدقت القصه
دى
مش عارف ليه
بس
والله حمدت ربنا
انها مش حقيقه
فى بلد اللاواقعيه
اللى هى مفروض بلد الامن والامان
مش بلد..................
اكمل النقط
المهم
ربنا ما يحكم علينا
ولا عليكى
فى حاجه
زى كده ابدا

انا لى عليكى عتاب
مش بتزورينى
خالص
انتى
زعلانه منى
ولا ايه؟

حنعيش يعنى حنعيش يقول...

تصدقى صدقت ... والنبى يا ندى اتغطى وانتى نايمة وماترعبيناش ... وعموما مصر حتفضل بلد الامن والامان

shimaa elkholy يقول...

خواطر شابه

اه وصل انعدام الامان لهذه الدرجه واه المسلحين البلطجيه ماليين البلد

سبب الكابوس شوية قرف في دماغي من البلد والى فيها على شوية كتمة نفس مش قادره اتكلم

shimaa elkholy يقول...

وندا

هو ده الى بيحصل عادة وده الى انا فكرت فيه

بس ده ما يمنعش انى كنت مرعوبه

وبعدين صدقا انا فى الحلم اهتميت بكلام مريم بس ما حبيتش ارعبهم انا اترعبت اصلا من منظرهم بس

عموما المشهد ده او قريب منه حصل قدامي فعلا فى الحقيقه وانا واقفه فى بلكونة بيتنا
وشوفت الرعب ده وعربياتنا اتكسرت

لمجرد شوية بلطجيه بيتخانقوا مع بعض

وعارفه على ايه ؟؟
على رصيف
ايووووووه مين يقعد على الرصيف يبيع فاكهه

والبوليس جه بعد ساعه الا ربع

shimaa elkholy يقول...

ريم

معلش والله يا جماعه انا كاتبه العنوان كابوس عشان ما تتخضوش تعرفوا انه كابوس

ايه ده

والصبح ان شاء الله هاكلمك

shimaa elkholy يقول...

رحيل

قوليلهم اصل بيقولوا عليا مفتريه على البلد

shimaa elkholy يقول...

محمود

ليه بس تقول كده والله معلش انا كنت الفتره الى فاتت مشغوله اوي وبصراحه لسه مشغوله

بس ان شاء الله من عنيه التونز لازم اجيلك

نورت

shimaa elkholy يقول...

حنعيش يعنى حنعيش

بزمتك انت حد موحيك عليا صح ؟؟

بص يا دوك الهي يسترك بلاش تفرس فيا الايام دي اصل والله اعصابي تعبانه اوي

اتفضل اقرا كده البوست ده وسلملي على الامن والامان

http://ndaelyasmeen.blogspot.com/2008/06/blog-post_9257.html



عشان خاطري بلاش الكلام ده وربنا هاموت منكم كده

amirelhob يقول...

كويس انها مش حقيقه بس انا زيك خايف يمكن انا لسه معيشتش ان يبقى ليا حد اخاف عليه اوى بسي تخيلى بقى لو جيل كامل طلع خايف جيل قاعد فى بيته مرعوب بيت بيفكر يهج من بلده عشان ملقاش فيها الامان تتخيلى الكابوس دا ممكن يبقى حقيقه فى يوم يمكن يكون قرب تخيلى بقى لو مفيش امن ولا فيه امان لناس حياتهم كلها احلام جميله وهاديه

بوست بجد يخوف على الرغم من انو جميل وبيسال سؤال مليار واحد نفسو يساله بس بالنسبه يا صحى احساس جوايا ان اليوم دا قرب


ربنا يوفقك ومتعيشيش اليوم دا ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر وتقبلى مرورى

Humman being يقول...

ألف سلامة ليكى ولأولادك... بس فعلا المصيبة يا مشمش ان ده ممكن يتحول فعلا لحقيقة... ومش هنلاقى حد ينجدنا

ممكن بقه نحط يافطة على صدرنا مكتوب فيها "مصر بلد الأمن والأمان" ...تصبيرة يعنى

كل ما يمر يوم كل ما أتأكد اننا ملناش تمن فى البلد دى

richardCatheart يقول...

يا نهار اسوح

حرام عليكى علتيلى الضغط حاسيت ان عينى طلعت على الشاشه وانا بقرا زى توم وجرى ودخلت عينى تانى


وانا بقول لاى حد لاقدر الله لاقدر الله يحصل معه كدا او شبه كده يديهم اللى معه ويخلص ودا مش جبن دا تقدير للموقف لا البوليس هايجى ولا جوز حد هايلحقه واللى زى دول مسعورين لابيصعب عليهم عيل ولا تيل

الحمد لله انه حلم نشفتى دمى يا دردر

ربنا يسترها معاكى ومعانا ومع عيالنا يارب

غير معرف يقول...

بعد الشر عليكي يا جميل

ماتقلقيش ربنا بيسترها دايما

تحياتي

غير معرف يقول...

ياشيخه خضتيني


حمد الله علي السلامه


ها والراجل عمل حسابك في الشاي ولا لا

mrmr يقول...

الف سلامه يا حبى
بس اكيد انتى كنت بردانه من كتر الحرررررررررررررر


ههههههههههه

ربنا يسترها علينا وعليكى

قولى امين

shimaa elkholy يقول...

امير الحب

عند حق فى كلمه قلتها

للاسف عندك حق

تحياتي لك ومتشكره على الدعاء اوي

shimaa elkholy يقول...

شيماء

ايوهوانبى قولي لدكتور اسلام الى مصمم ان مصر بلد الامن والامان وهايجننى

shimaa elkholy يقول...

قلب القطه

لا والفكره انهم بيبقوا مجرمين فعلا حتى لو خدوا الى هما عايزينه ممكن ياذوا حد

وعموما هما بياذوهم نفسيا اولا

ومرسي ليكى يا جميل وسوري انى خضيتك والله ما كان قصدي بجد

shimaa elkholy يقول...

فتاه من الصعيد

مرسي يا جميل ربنا يخليكى
احنا وانتى يارب

shimaa elkholy يقول...

غير معرفه

ابطحها البت دي ؟

هههههههههههه

ايوه يا اختي عمل وشربته

shimaa elkholy يقول...

مرر

ايوه بينهال علينا عرق الشعوب
ههههههههههه

مرسي يا جميل متشكره اوي ونورتي

مجرد حلم صغنتوت يقول...

انا مبقتش عارفة احب البلد دي ولا لا
بس كل يوم بشوف حاجات بتضايقني منها زيادة
زي ما انتي قلتي
ولا حد هييجي ولا حد هيلحقنا
ربنا يسترها معانا بقى.. مفيش غير كده

الحمد لله انه كان حلم بس

لــــ زهــــــراء ــــولا يقول...

ربنا يسعد قلبك وقلب اولادك وتشوفي فرحتهم ف عيونك
على فكرة خضتيني وافتكرت الموضوع بجد
النجدة اتاخرت على مذيع قطاع الاخبار فمستقبلة ضاع بعد ما قتالها !!! يعني البوليس عندنا مش 911 لا دا تعدي من واحد لتلاتة ساعات على ما يلحق تكون مالطا خربت

لولا

shimaa elkholy يقول...

مجرد حلم صغنتوت

والله يا دعاء انا صدقا ماعنتش قادره استحمل البلد والى فيها

حسبنا الله ونعم الوكيل

shimaa elkholy يقول...

لولا

فعلا هو ده الى يخوف بعد 3 ساعات على ما يبقوا يعبروا حد

نورتي يا جميل

Unknown يقول...

في بلد زي دي مالناش الا ربنا ، كل واحد ياخد باله من نفسه حتي م البوليس نفسه...
تحياتي و ما يلزم...

saadeddine يقول...

السلام عليكم
أنت تشاهدين الأفلام كثيرا
إنعكس عليك ما تشهدينه مع خوفك الشديد على أطفالك دمتي بود.