احبائي المدونين الاول انا اسفه انى خضيتكم البوست الى فات والله ما كان قصدي فعلا حتى انا كاتبه العنوان كابوس عشان تفهموا الموضوع
بس صدقا كنت مضايقه اوي ولسه صاحيه من الكابوس بجد وكتبت كده على طول طاخ كنوع من الفضفضه معاكم
المهم
ندخل فى بري امي وانا سيدك بقى
انتم عارفين طبعا ان ربنا اوصانا ببر الوالدين وخص الام بمكانه اكبر
والاحاديث والايات معروفه طبعا فى المجال ده واحنا كلنا حافظينها صم
اه حافظنها بس مش فاهمنها كالعاده
ايه هو بر الام وبر الاب؟؟
مين الى يبرهم ؟؟
انت يا ضنايا الى تبرهم
ايووووووووه انت تبرهم وتحسن اليهم فى المعامله والعطاء المادي وكله
انت نقول كمان انتتتتتتت
انت الي مطلوب منك تخدم امك وابوك او انتى طبعا
ايووووووووه
انتى الى مطلوب منك كبر لوالدتك انك تزوريها وتخدميها وتضحكي فى وشها
مش جوزك
انت الى مطلوب منك تخدم امك وتصرف عليها وتضحك فى وشها وتزورها او حتى تشيلها على راسك رايح جاي
انتتتتت مش مراتك
مليون مشكله يا ناس قدامي بسبب الخلط فى الموضوع ده
كل واحد متجوز
عايز مراته تخدم امه وتدلع فيها وتضحك فى وشها ومافيش مانع كمان تكون بتشتغل وتساعده عشان يعرف يصرف على امه
من الاخر يعنى تبر امه بداله
لو امه تعبت يعمل فيها خمسين راجل فى بعض وتعالى يا ماما عندي كلا الفته لايمكن يحصل ويجيب مامته يقعدها عنده فى البيت ومالوش دعوه بقى
مراته تخدمها وتمرضها وتخدم اخواته لما يجوا يزوروها
وكل ده غصب عنها وفرض عليها
ايييييييه انتى عايزاني ارمي امي ؟؟
لا طبعا ما حدش قالك ترمي امك اطلاقا
بس انت عايز تبر امك طيب برها انت مش تخلي مراتك غصب عنها تبرها
وتبقى ماشي بمبدأ هات حسنه وانا سيدك
او بري امي وانا سيدك
طيب افرض مراتك ست محترمه وبنت ناس وبتحبك وهاتخدم امك بعنيها عشان خاطرك حتى لو كانت امك مسحوبه من لسانها ويتفات لها بلاد .. تبقى كل يوم يا شاطر تبوس ايد مراتك وتبوس راسها وتشيلها على راسك عشان هى بتعمل ده بدالك وبتعمله لوجه الله فضل منها مش فرض عليها
أي حد هايجى يقولي ان خدمة الزوجه لام زوجها فرضها هايبقى جنى على نفسه ولعب فى عداد عمره
الى فرض عليه خدمتها ابنها او بنتها الى بتيجى اخر الليل تتمختر وتقعد تتضايف وتقل ادبها كمان بكلمتين ماسخين تفور دم مرات اخوها بها
وكمان الزوجات
ربنا قالك بري امك وزوريها ايووووووه تمام
بس ما تغصبيش على جوزك يروح لاهلك خلاص مش عايز يجى رييييييح
فرض عليكى انتى مش عليه
ولا من حقك تدي لاهلك فلوس من فلوس جوزك الا باذنه الا لو كنتى بتشتغلي طبعا ده موضوع تاني
وهكذا يا جماعه
صدقا مشاكل بالهبل
كانت فى واحده هبله مره عامله مشكله مع جوزها عشان ليه ما بتجيش معايا عند ماما اسبوعيا وتبات معايا هناك كمان يوم ؟؟!!! ليه مش فاهمه الصراحه المخ الغريب ده
وواحد تاني قالي انا طلقت مراتي ... اتخضيت ليه كده يا سيدى الفاضل ... قالي تخيلى امي صحتها تعبت شويه فقعدنا انا واخواتي (هما ولدين وبنت) ان احنا كل واحد يتكفل بطبيخ ماما عشر ايام فى الشهر
قلتله طيب تمام ايه المشكله
قالي هى رفضت وقالت لا ما اطبخش لحد
طيب هى حضرت معاكم الاتفاق ده ؟؟ قالي لا
قلتله امال انت بتتفق انت ليه هو انت الى هاتطبخ ؟؟!!!
المهم قالي بقى حصل مشاكل وانتهت انها راحت بيت اهلها وانا رميت عليها اليمين خلاص
بقالك اد ايه
قالي 6 شهور
طب مين بيطبخ لوالدتك دلوقتي
قالي انا طبعا وباعملها احسن اكل وقلت لاخواتي كمان عنكم انتم انا هاطبخ لها على طول
الله طب ما كانش ينفع يعنى تبر امك انت وتقولها خلاص يا ستى ما تطبخيش انتى وتبقى تطبخ انت لامك وخلاص ؟؟
مش يمكن كانت اتكسفت مراتك وقتها وقالت لك عنك يا سبعي ؟؟!!!
قالي لااااااا يمكن انا لااااا يمكن ابقى مش راجل فى بيتى وما اعرفش امشي كلمه على مراتي ( غصب يعنى )
وطبعا مش الام بس الى عليها المشكله والاب برضه
والحلاوه بقى تلاقي ولادهم البنات الى اولى بخدمتهم
هما الى بيتكلموا وبيحاسبوا مرات اخوهم ازاي ما تخدميش امي ولا ابويا
وتلاقي كمان الزوج بكل بجاحه وقلة ادب يقولك وانا اخدم امي ولا ابويا ازاي هاطبخ لهم واغسلهم يعنى
الله امال يعنى هى كانت خدامة اهلك ؟؟
ولو قعدت احكيلكم من هنا للصبح على مشاكل من النوع ده صدقوني مسخره
صدقونى فاهمين بر الوالدين غلط
صدقوني فاهمين الدين غلط والدنيا غلط والجواز غلط والقوامه غلط
صدقوني كل ما باقعد اتفرج على مشاكل المتجوزين بابقى عايزه اولع فيهم
تعبت صدقا
لا ستات بتفهم ولا رجاله عندهم احساس ودم ولا أي حاجه بذمتكم انتم شعب عايز يتربى من اول وجديد وانا زهقت منكم على فكره
ملحوظه تحطوها حلقه فى ودنكم : بينى وبينكم الكتالوج .. كتاب ربنا وشرعه
الى هايختلف معايا فى الراي يعمل حسابه على كده
مش عايزه مناهده فى الفاضي
هناك 27 تعليقًا:
السلام عليكم
الحديث الشريف يقول :
"ليسَ مِنَّا مَنْ لمْ يرحَمْ صغيرَنا ويُوَقِّرْ كبيرَنَاويَعْرِفْ لعَالِمِنَا حَقَّهُ"
وكما نعلم جميعا كما قلت ... ان بر الوالدين واجب علي الابناء ... وعقوق الوالدين من الكبائر من دون شك ... اما بالنسبة للخلافات التي تحدث بين الزوجين بخصوص هذا الامر .... فليس لزاما شرعيا او قانونياعلي الزوجة ان تقوم بذلك .... ولكن هنالك اعتبارات كثيرة تلزم الزوجة بذلك :
1- احيانا العرف والتقاليد
2- اعتبارات المودة والرحمة بين الزوجين
3- طاعة الزوج اذا ما لزم الامر
4- سنه الحياة ايضا في الارض ... فالزوجة الصغيرة الان .... هي ام كبيرة في المستقبل تعجز عن الوفاء باحتياجاتها في المستقبل ... واظن ان الزوجة العاقلة ان فكرت بتلك الطريقة ... فهي تخدم نفسها قبل ان تخدم الاخريين ... عملا بالحديث ... اعمل ما شئت يابن ادم كما تدين تدان .
واذا عدنا الي مقومات الزواج السليم في الشرع منذ البداية سنجد ان الحديث الشريف يقول :
( تُنكح المرأة لأربع لمالها , وحسبها , وجمالها , ولدينها فاظفر بذات الدين تربت يداك) رواه البخاري
كما يقول حديث اخر :
" إذا خطب إليكم من ترضون دينه وخلقه فزوجوه إلا تفعلوا تكن فتنة في الأرض وفساد عريض" رواه الترمذي وابن ماجه
وعملا بهذين الحديثين ... اذا ما ثارت ازمة بين الزوجين بسبب بر الوالدين ... فاظن ان حسن الخلق بينهما ... قد يحل المسألة ... فاذا ما استحكمت الازمة ... فيبقي الحل الاخير ... وهو امساك بمعروف او تسريح باحسان .... فالام مقدمه علي الزوجة في كل الاحوال ومن جميع الاوجه ... عملا بالحديث القائل ..( قال رجل يا رسول الله من أحق الناس بحسن الصحبة قال أمك ثم أمك ثم أمك ثم أبوك ثم أدناك أدناك )
وفي النهاية ... كما قال المصطفي ص ... ان خادم القوم سيدهم .. وكما قال ايضا "ما أكل أحدٌ طعامًا قطُّ خيرًا من أن يأكل من عمل يده، وإنّ نبيّ الله داود عليه السلام كان يأكل من عمل يده" [رواه البخاري]... فان يخدم الابن او الزوجة .. تلك المرأة العجوز او الرجل العجوز الذي افنيا عمرهما من اجل هذا الابن لينشأه رجلا في يوم الايام يستطيع ان يتزوج وان يكون اسرة عامرة ... هذا امر لا يقلل من شأن الزوجة ابدا بل يزيدها حسنا وكمالا .... فلا يجوز لاحد الطرفين ان تاخذه نوبة من الحماسة الزائفة ... وان يغتر بنفسه وتاخذه العزة بالاثم ... فيضيع علي نفسه حلاوة الدنيا وجزاء الاخرة ... فالحياة الزوجية قائمة علي المودة والرحمة ... والله يجزي المحسنين .... يستوي في ذلك الرجل والمرأة .. فالرسول ص يقول :
( الراحمون يرحمهم الرحمن ارحموا من في الأرض يرحمكم من في السماء الرحم شجنة من الرحمن فمن وصلها وصله الله ومن قطعها قطعه الله )
واظن اننا قد تغيرنا عن الماضي الجميل بعاداته وقيمه السمحة ... ونمضي صوب عادات الغرب السيئة ... وسوف ينتشر في مجتمعاتنا للاسف .. وظيفة جليسة الكبار .. كما انتشر منذ مدة وظيفة جليسة الاطفال .... فاي عالم هذا الذي نعيشه الان .... لا نحن ربينا الصغار .... ولا رحمنا الكبار .
ارجو المعذرة علي الاطالة ... وجزاك الله خيرا عن هذا الموضوع
لك مني كل التحية .
شوف يا اخ معتز انت ما فهمتش كلامي واضح
انا لا انكر ابدا ابدا ان من حسن الاخلاق رحم الصحير ويوقر الكبير
ولا انكر ابدا ابدا ان يعنى مافيش مشكله لما الزوجه تعامل حماتها كأم لها وتخدمها وترعها
زي ماهو مافيش مشكله ابدا ابدا برضه ان الزوج يزور اهل مراته ويودهم ويقضى حوائجهم ان لزم الامر
لكن ازاااااااي ؟؟؟
بالحسنى يا فندم
بالحسنــــــــــــــــــى
بر الوالدين واجب والعقوق من الكبائر معاااااااااااك طبعا
انما بر الوالدين والديا انا مش والدين زوجي
الاعتبراتا لى انت قلتها
العرف والتقاليد ما يعتبرش ملزم زي الشرع بالعكس اي عرف وتقليد متعارض مع الشرع يعتبر لاغي يا فندم
والعرف والتقليد الى يقول لزاما على الزوجه خدمة اهل زوجها يبقى متعارض مع الشرع
الموده الرحمه ما اختلفتش معاك ماهى لو موجوده الزوجه هاتخدم بعنيها بس انت هات الموده والرحمه وهى تمشي فل اوي
طاعة الزوج
الزام الزوجه بما هو ليس واجب عليها يعتبر ظلم واهدار لحقوقها
والظلم ده هو هايتحاسب عليه يوم القيامه ان شاء الله عند ربنا
سنة الحياه مش الزوجه والحمى بس
والابنه كمان ان كان هو يرضى لبنته انه لما تتجوز تخدم ابو جوزها وما تخدموش هو يبقى يعمل كده مع مراته
وطبعا طبعا انا عارفه كويس اوي اوي انه كما تدين تدان
انا مش باقوم الستات على حمواتهم
انا باحط كل حاجه فى نصابها الطبيعى عشان المشاكل الى مالهاش معنى دي ما تحصلش
انا اقرب للاسر بحكم ظروف كتير وشايفه هبل بيحصل كتير فى الموضوع ده
الخلاصه انا شايفه ان خدمة اهل الزوج او الزوجه سيان عندي تندرج تحت بند ولا تنسوا الفضل بينكم
وما دام هو فضل يبقى كل واحد يحترم نفسه وبلاش اسلوب حسنه وانا سيدك
طبعا طبعا ما طولتش ولا حاجه بالعكس انا لى مطوله
هههههه
ونورتنى ومتشكره على المناقشه المثريه لموضوعي
حكاية طلفها عسان مطبختش
مش بلومه
لانها اذا كان امه تعبانة و معملتش كده حتي مجاملة
ايه شضمنله يتعب هو تخدمه اصلا
!!!!
عادل
صدقنى لو كان زواج ناجح ما كانتش هى هاتعمل مشكله على طبخه لست كبيره ولا كان هو هايطلقها عشان طبيخ امه
ولو كان احترمها حضرتك وقالها ايه رايك ماما تعبانه وانا هاتفق مع اخواتي ان ربنا يكرمك كده وتطبخ لها اسبوع فى شهر ولا اكتر ايا يكن
ايه المشكله ؟؟ كان هانشك فى لسانه ؟؟
انت عارف لما قلتله طيب ما دام حاليا مافيش مشكله وانت بتطبخ لامك ما تروح ترجع مراتك وصدقنى بالحسنى ولما تلاقيك انت الى بتطبخ لامك هاتعمل من نفسها
عارف قالي ايه
قالي لو ما كانتش تيجى تعتذر وتبوس راس امي وتطبخ وتخدم امي غصب عن عينها ورجلها فوق رقابتها مش عايزها
وبعدين هل تعتقد انه سبب كافي للطلاق انها ما رضيتش تطبخ لامه ؟؟!!
مش فاهمه ازاي يعنى
الفكره هى ملزمه ولا مش ملزمه
فى رايي انها مش ملزمه وما دامت مش ملزمه يبقى مش عافيه بالتراضي وبالادب مش قلة الادب
نورت
أنا متفق معاكى فى كل النقط
ان كان رجالة ولا ستات
هو ان ست تعمل حاجة لوالدة جوزها
دى زوق و أحترام
و كمان تعمله بعد ما يكون اساسيتها خلصت ان كان بتشتغل او ست بيت
لأن اولادها البنات هم اولى بهذه الخدمة
و كمان زوجة الأخ الأكبر عليها الطامة الكبرى
زى ما يكون انها بتتعاقب انها خدت البكرى (:(:
و الزوج شيىء جميل ان يود أهل مراته شيىء مستحب لكن ما يكونش على حساب اهله
علشان ميزعلش مراته أهله يغضبوا علية ؟؟؟!!!
يعنى الأتنين عليهم واجبات و لكن متخلش بواجتهم نحو بعضهم و نحو أهلهم
قليل قوى نلاقى حد متفهم الوضع
ربنا يفتح عقول البشر
موضوع جميل جدا
تسلم ايدك
بالتوفيق دايما
الاخت ندى
بالنسبة لموضوع الكابوس الاول عشان أنا ملحقتش اعلق عليه ..
الرسول الكريم عليه الصلاة والسلام ..
علمنا أذا رأى أحدكم في المنام يعني ما يكره فلا يحدث به أحد ..أو كما قال ..
الشاهد أذا رأى الانسان كابوس فلا يذكره ... طبعا أنا عارف أنك ذكرتيه من باب ؟؟ مش عارف من باب أية بس أكيد ليك سبب في نشره
المهم
بالنسبة بقة لموضوع بري أمي ولا أخدمي أمي وأنا سيدك
الموضوع دة فعلا شائك وملخبط وزى ما قلتي الواحد يتخنق من الناس في المشاكل دى ...
بسي طبعا مرفوض وأنا سيدك دى ..بس بجد النساء والبنات هذة الايام ليس لديهم مروءه ولا خوف من الله ولا رحمة ..
ايوة يعني واحد زوج ما بيقولش وانا سيدك ولا حاجة ويقول أعتبر الست الكبيرة المريضة بالسكر والضغط والكبد والتي لا تري ( عمياء ) أعتبرها ست غلبانة جراتنا ومحتاجة مساعدة ونعمل كدة ونسعدها لله يعني مش أم ولا حمة بل نعاملها كا جارة لله .
وهي في نفس البيت لا هتكلف نفسها خروج ولا شحططة وكمان في شقة منفصلة يعني مش مضيقة عليها شقتها وكمان محدش طلب منها تمسح وتغسل ليها كل المطلوب تجهيز حقنة الانسولين وعمل كوب شاي للفطار ( طيب الست العجوز الذى اصابها العمي كيف تحضر الحقنة وتشعل البوتوجاز )
وتقولي مش فرض عليها فرض اية وبتاع اية أحنا لما المرءة وصلت أنها تناكف وتعاند الزوج في كل شيئ ضاعت القيم والمبادء وضاعت الاسر ...
عندك في الارياف انا اعرف ذلك جيدا يتزوج الولد ويأتي بزوجتة ويعيش في بيت أمة وتقوم الزوجة بخدمة أمة كاملا
دون أعتراض ولا تذمر لية لانها تربت علي ذلك وتشعر بسعادة انها في عزوة..
المهم
يعني مجرد تجهيز حقنة أو كوب شاي دة مش فرض بالرغم أنها زوجة تعد من الملتزمات العابدات ,,
والذي زاد وغطى بعد اليئس منها أنها تعصي أولاده أن يقوموا هم بمساعدة جدتهم تنادي عليهم , يسمعونها ولا يردون , ويدعون أنهم كانوا نيام أو في غرفة أخرى ... حسبي الله ونعم الوكيل..
يا ست ندى والله ارحمينا شوية وبلاش تقلبي المواجع علينا ...
مافيش داعي تخوضي في مواضيع زى دى تاني عشان أنا بعزك وبحترمك وبحترم مدونتك جدا ومتزعلينيش منك بقه
يلا سلام بقة
رامي
ربنا يخليك متشكره ونورت
دعلي يونس
هاتزعل مني انا ليه بس هههههههههههه
شوف الموضوع ده مالوش اي علاقه بالصعيد الشخصي اولا ربنا عالم على الصعيد الشخصي بيحصل ايه
وانا معاك تماما ان الى حضرتك بتقول عليه ده واجب على البشر اجمع مساعده بعضهم مش بس ام الزوج
لكن نفسيا يا فندم لما تكون الواحده بتعمل حاجه لوجه الله غير ماتكون بتعملها مجبره
كمان ام الزوج والزوج لازم يفهموا الحكايه دي
مش اخدمي غصب عنك لا اطلاقا
على فكره انا حماتي عندها 8 عيال منهم 3 بنات
مش هاحكيلك من 11 سنه
من شهرين بس
كانت عامله عمليه فى عينها وقعدت عندي شهر
كنت باعقم ايدى كل ساعه عشان احطلها القطره ده غير برضه الانسولين والادويه ومواعيد الاكل
انا مش باقول زوجة الابن ما تخدمش حماتها
لكن الشعور العام بتاع مجبره تخدم ده مسخره
الحاله الى حضرتك بتحكي عليها دي خاليه من الانسانيه اطلاقا
لكن كمان لعلمك الخاص اوقات بتكون الحمى ولانها من اصول الريف الى انت بتقول الزوجه كانت بتخدم وهى مش متذمره عشان متربيه على كده
اهو كده ده هو الى غلط ... لان الحمى نفسها عايزه مرات ابنها تخدمها مش ذوق واخلاق منها وانما فرض عليها وغصب عنها وده الى بيعمل مشاكل
يعنى ان كانت الحمى كده لسانها حلو وتقول تسلم اديكى يا بنتى ما اتحرمش منك والله ايدك خفيفه فى الحقنه يا بنتى
عادي تفتح نفسها مش هايحصل حاجه
عموما البوست الجاي هاصالحك يا فندم ما تزعلش :)
اه سوري م علي مش د علي
سهوا يا فندم
وبالنسبه للكابوس
انا نشرته طبعا لغرض فى نفسي طبعا ابداء فعلا مشاعر بعدالامان فى البلد نامي جوايا بقاله فتره
تحياتي لحضرتك
عارفة يا مشمش .. كلامك ده صح جدا جدا ... ولو كل واحد فعلا فهم الكلام ده وطبقه صح هيرتاح..
بس تيجى بقه "للبراشوت" الناس يعنى اللى مبتريحش نفسها .. ومدخلة نفسها فى كل صغيرة وكبيرة... تبتدى النصايح اللى هيه نفسها مش بتعمل بيها
زى مثلا... هوه انتى يعنى هتخسى لو طبختلها..... هيجرالك ايه يعنى لو أخدتيها عندك أسبوع ولا اتنين..
ده ثواب والله خدمة حماتك ده..
ماشى يا جماعة بس أنا مش ملزمة .. أعمل بمزاجى مجاملة ..مرة كدة أو اتنين ...انما تبقى قاعدة مطالبة بيها
.... لأ
وتبقى غبية اللى تطلب من جوزها يزور أهلها ويسأل عليهم ويجاملهم فى المناسبات و...و.... غلط.... الحب والمودة مش بيطلبوا.... لو هوه عايز من نفسه خلاص ... لو مش عايز ...يبقى منطلوبش ونخلى عندنا كرامة
شيماء
تصفيق حاد خصوصي لكلمه واحده
الحب والموده ما بينطلبوش
مش بس لاهلها لا
ده لها هى كمان
الحقيقه بيبقى نفسي اسألها بيكون احساسك ايه وانتى مثلا واخده جوزك وراحه لاهلك بالضغط عليه ؟؟
يعنى ايه المتعه فى كده بقى ؟؟
انا افرح لما جوزي يبقى معايا عند اهلي برضاه ويكون حقيقى مبسوط وهو قاعد معاهم او حتى بيودهم عشان خاطري اي حاجه بس تكون جايه منه
انما بالعافيه ؟؟!!!
وكل الى انا اقصده من الموضوع فعلا مش انها ماتخدمش حماتها لا
انما المعتقدات الى بتقول انه فرض عليها دي غلط
احنا نصلحها ونخليها زي ما الكتالوج قال كل واحد فرض عليه امه مش ام اي حد تاني
هو ده بر الوالدين
تحياتي يا جميل
عارفة ماري منيب لما كانت واقفة وتقول
التلاااااااااااااااااااااك
لن نتنازل عن يمين التلااااااااااااك
انتي رأيك الكتالوج؟
أنا رأيي الحدود
وبما أن الحدود أساسا من الكتالوج
يبقى اللي فاضل ها تاخدي من مين تفسير الكتالوج
آه يا حلوة
كل كتالوج وليه مفسرين وكل مفسرين ولهم مذهب وكل صاحب مذهب وله بلده وكل بلده ولها عادتها وبلدك فين يا جحا؟ اللي فيها المدام
الحدووووووووووووووود
واللي معرفش يحط حدود أول الجواز
لأنه كان أهبل
أو لأن السكينة كانت سارقاه
أو لأن مراية الحب عامية بنورتها مش قوي
يرجع بسرعة قبل خراب ملطة ويحطها
مفيش دين على وجه الأرض يغصب البنت تتحمل خدمة حما
لكن في عرف في اماكن كتير
وكون ابنها بلطجي وكسول ومأنتخ
ميجيش يفسر ده تفسير ديني ابدا
ايوه
سبب كل المشاكل مش إن الكنة مش عاوزة تخدم حماتها - وده حقها اربعة وعشرين وملوش دعوة بالإلتزام
سبب المشاكل زوج امه اخدته على البلطجة وانها ليه خادمة وعاوز يستبدلها بخادمة اصغر
وبما انها اصغر تبقى انشط
وبما انها انشط يبقى انا وعائلتي والكل كليلة
اعرف رجل نحسبه من الصالحين
مامته عايشة في شقة تحت وهو بعدها بدورين
والبيت كله اخواته ومامتهم تحت ارملة
بيرجع من الشغل الساعة اربعة مساءا يعدي على مامته يشطف لها الحوض
تنزل البنت تطبخ
الأخ التالت يوديها للدكتور
بيعملوا كل ده بدون ما يحكوا لزوجاتهم ولا لعيالهم اساسا
بيعملوا ده وبيطلعوا يساعدوا زوجاتهم ويضحكوا في وشها عادي جدا
بيعملوا ده من غير نكد وهم ناس هاي كلاس ودكتور ومهندس وربة منزل
لا الولد رمى على اخته البنت
ولا رمى على مراته
ببساطة لأنه نشيط وراجل
لكن اللي يرضى ان الغريبة تخدم أمه
بلطجي مصري اصيييييييييييييييييل
اظن مرغتش خاليييييييص
بوسة
معلش بؤي بيوجعني وميرضكيش
بالنسبة لقول المهندس علي
فأنا ها اقول له يا باشمهندس اللي يقدم السبت يلاقي الاحد قدامه
ومحدش يقول ست مش راضية تعمل كذا
انا عارفة ان فيه ناس طباعها وحشة من الاساس
بس كمان عارفة ان فيه ناس بتشوف كتير لحد ما تتملي فتبان وحشة وهي في الأصل مجني عليها
اساس الحكاية بيودي للنهاية
ولو فيه حد مؤذي بالسليقة
فيه عشرة بيخافوا الأخرة
منهم خمسة تعبوا شوية وبيكون ردود فعلهم بعد كتيييييييير مش قد كده
يعني تقول لي زوجة مش عاوزة تخدم اقول لك لييييييييييييه؟
هه
ده الست بتعمل اي شيء علشان حبيبها يرضى بس وتشوف ضحكته الحلوة
ياترى حبيبها ده عمل ايه لحد ما بقى سعادته ملهاش لازمة
وبقت كلمتها الشهيرة اللي خدته القارعة تاخده ام شعر؟
نؤسف لإقحام مناخيرنا ولكن يشهد الله اني بتناصح بس ويمكن بنفتح لبعض حاجات مش واخدين بالنا منها
تحياتي للباشمهندس والست ندى
ستيتة حياتى
بصي
العرف على راسي وعينى لكن العرف الى يتعارض مع الشرع طز فيه يا فندم
ولما العرف يكون فى اجبار يبقى طزين فيه لانه بيتعارض مع الشرع
باتفق معاكي فى كلامك للمهندس علي
يعنى ما ينفعش ناخد اخر لقطه
وكمان ما ينفعش اقول هى بتوحي العيال
قد يكون الموضوع مش كده خالص
وقد يكون كده برضه الله اعلم ما ينفعش نحكم من بعيد كده
لكن من وجهة نظري انا وما ربك بظلام للعبيد
وبرضه السؤال يقول ليه ممكن بنى ادمه تعمل كده ؟؟
خالتي مدونتك وزياااااده قولي براحتك خالص خالص
ونورتي
الاخت ندى
الاخت ستيتة
(بس كمان عارفة ان فيه ناس بتشوف كتير لحد ما تتملي فتبان وحشة وهي في الأصل مجني عليها
اساس الحكاية بيودي للنهاية)
لا أقصد أن تحكم أحداكن من أخر مشهد ولا أصل الحكاية أية, بس كنت أقصد أن أوضح أن ذكر أن الزوجة ليست مسؤلة عن خدمة أن الزوج , كنت أرى أنة من الافضل أن تكون التدوينة نصح وتوجيهة للزوجات أنة بالرغم من عدم فرضية خدمتها لام زوجها ألا أنة من الافضل لكب تكون الحياة فاضلة أن تقوم الزوجة بخدمة أم زوجها وذلك سوف يؤدى الي أن تكسب الزوج رضا ربها وزوجها.
أخير نعم توجد زوجات غريبة الاطوار وبدون أى وجة حق ولا أى مشاكل هي تتخذ هذا الطربق الخطء
لكن أطمنكم أن الله سبحانة وتعالي يمهل ولا يهمل
فقد أنتهت المشكلة من عند الله وانتهت من اوسع الابواب
فقد ماتت الام غير راضية عن زوجة الابن
وقد فشلت حياة الزوجة التي طلقت ثلاث مرات بلا رجعة
تعيش الان حياة فاشلة بدون هدف ولا مستقبل كا البيت والوقف
وقد عوض الله الزوج الطيب المسكين بزوجة طيبة هادئة محترمة وماتت امه وهي راضية عنها .
بجد النساء والزوجات هذة الايام أصبحوا شيئ صعب وأصبحوا مفتريين ججدا ومش اللي يقدم السبت يلاقي الحد
الكلام دة مش واقعي مع زوجات هذة الايام دى بتاخد السبت والاحد والاثنين والثلاثاء والاربعاء والخميس والجمعة ويومين كمان من الاسبوع القادم..
ربنا يرحمنا برحمتة والحالة انقلبت والدنيا معادش فيها بركة
بجد النساء والزوجات هذة الايام أصبحوا شيئ صعب وأصبحوا مفتريين ججدا
طب وهما الحموات ايه يا فندم ما هما كمان نساء برضه ؟؟!!!
متفريين ؟؟
شوف يا فندم انا ليا 3 اخوات بنات حط فوقيهم حماتي كمان
وعليه ارجوك بلاش الكلام ده اصل انا عندي حساسيه زياده
مين الى مفتري ؟؟
ده انا باشوف اهوال ... تحب احكيلك اد الى انت بتقوله ده عشر مرات مافيش مشكله
ولعلمك ربنا يعلم انا حقانيه ولو واحده من اخواتي قصرت فى حاجه كده ولا كده انا اول من بيردها وقولها لا
حضرتك عايزنى اعمل ايه
ادلس يعنى ؟؟ اغمي عنين الستات عن شرع ربنا ؟؟
اقولها اخدمي غصب عنك عشان تنولي الرضا والى مش هاتنوليه برضه لو هو مش بالعك وراجل ودني وقاعد يسمع لامه الى لو عملتلها البدع برضه مش طايقاكي عشان خدتى منها الشاب الطرب بتاعها ؟؟
لا يا فندم اسفه الحق احق ان يتبع
مافيش حسنه وانا سيدك
فى ولا تنسوا ا لفضل بينكم
وما دام هى هاتخدم امك تبقى صاحبة فضل عليك تبوس ايدها وتشيلها على راسك
وبعدين تعالى هنا بقى
مين بقى قالك ان لما الزوجه تخدم حماتها قوم هو الزوج الى ينول رضا ربنا
يا سلام يا اخويا
حتى الحسنات عايزين تاخدوها على حسنا ؟؟!!!
لا ده انا هاجيب اعضاء جمعية المرأه المتوحشه كلهم واجيلك هناك فى اسماعليه حتى نصيف
لا يا سيدى الفاضل خالص
هو مش ماجر خدامه عشان لما هى الى تخدم امه هو ياخد حسنات
هى لما تخد امه هى الى هتاخد حسنات مش هيصه هى
قولوا باقوم عليكم الستات قولوا ستات مفتريين قولوا زي ما تقولوا
اقولكم شرع الله وكتاب ربنا الى عنده حاجه خلاف ما بقول يقول
مافيش فرضيه يعنى مافيش فرضيه
فضل منها من حقها ما تعملوش
وبما انه بقى كما تدين تدان
فياريت كل واحد شايف ان مراته بتعامل امه وحش يسأل امه عملت ايه فى جدته ام ابوه هع هع هع
البوست الجاي هاحكيلكم قصه حلوه
تيجى على هواكم
سوري ان مش دايما كلامي على هواكم يا رجاااال
اصل انا ما باعرفش اركب الموجه واطبل فى المطبل واقول البؤين بتوع تطييب ا لخواطر
السلام عليكم
كيف حالك اولا والاسرة الكريمة ..
وبعدين ما تسيبينا نختلف بادب ها يجرى ايه ؟
بس انا مش ها اختلف معاكي وما قلتيه صحيح ولكن أليس من حسن خلق الزوجة أن تخدم أم زوجها أو والده حبا لزوجها وبلا اجبار ولكن بالحسنى .. ماهي الزوجة كده كده ها تطبخ فما المانع ان يكأل الاب او الام من طعامها ,, وكده كده ها تغسل .. المهم ان يكون هناك وفاق وحب وان تحتسب هذا العمل لوجه الله فتزيد بركة البيت في ايام انعدمت فيها البركة ..
ومن المعقول ان تمتنع الزوجة عن خدمة ام وابو زوجها .. ولكن هل من المعقول ان تمتنع البنت من خدمة امها او ابوها بحجة انهم مسؤلين من الابناء الذكور ؟ بيحصل والله .. واظن ان عندهن حق ولكنها مسؤلية الانفاق فقط ..
استاذ سعيد
حضرتك كلامك مش مختلف معايا خالص
بالعكس
وبعدين ماهو ده الى انا باقوله ان كان ولا بد خدمه وطبيخ وغسيل الى هو يعنى عرفا ده تبع الستات
يبقى الاولى بنتها الى تخدمها مش مرات ابنها
وعارفه حكاية مسؤلية الذكور دي
وطبعا ده عرف برضه غلط واستهبال
لا والى بيجننى يا فندم ان الاخت بتروح كمان تتريس على مرات اخوها وتقولها عملتي كذا وما عملتيش كذا
الزوجه تعمل كل حاجه لاهل جوزها بما يرضى الله بالحسنى مش بالغصب
ولما تقول لا ما نعتبرهاش مجرمه كل واحد حر فى حياته
بمعنى لو واحده ما بتصليش النوافل هل من حق اي حد انه يوجه له اي لوم او تقريع ؟؟
اكيد لا
المطلوب هو وضع الامور فى نصابها الحقيقى
وبعدين مين قال انى مش عايزه حد يختلف معايا
بس انا باقول ما حدش يجادل بغير حق
بينى وبينكم شرع الله فقط لا غير
تحياتي يا فندم ونورت
بصي ياعسل
كلامك كله صح جدا بس اللي هيفهمه من غير تعصب
عارفه ليه هما فاهمينه بتعصب اولا لانك ست ثانيا لانك هتخليهم يخدموا ويغسلوا ويطبخوا ويشيلوا هم امهم زي مهي شالت همهم وهما صغيرين ومش هيبقي البلطجي المصري علي راي ستيته
ولا كنتوا عارفين الغيب ياحموات وكنتوا رحتوا تربوا مرتتات عيالكم مع امهم
الاغرب بقي ياست الكل ان تلاقي خدمة مرات الابن حلوه اوي علي صدر حماتها وجوزها لكن خدمت بنتها لا اصلها يعاني شقيانه في بيتها أكن مرات الابن ديه برده مش شقيانه في بيتها
لكن لما تقول الزوجه رايحه لامي يبقي خمسين تلكيكه في البيت لما ترجع
ويمكن تتحرمي الاسبوع اللي جي من زيارة امك
عارفه حق الله بيقول
من احق الناس بحسن صحابتي
امك ثم امك ثم أمك
يعني راجل وست
وان مش من حق اي راجل يقول لمراته متروحيش لامك كعقاب مثلا
الموضوع ده دايما يخليني اقول ان ربنا مش ظالم وده اكيد
طيب ليه بيقولوا ان الست تسمع كلام زوجها لو قالها متروحش عند امها
طيب ليه الست جوزها يبقي قبل امها والراجل امه قبل مراته
لييييييه
ده ظلم
والاكيد ان احنا اللي ظلمنا نفسنا مش ربنا
ضيقنا علي نفسنا زي معملوا اليهود في حكايه ذبح البقره
انا عندي رغي كتير اوي في الموضوع ده
لكن هكتفي اني اقول لكل من يهمه الامر
ان امي فوق راسي انا لوحدي
واني مش هسمح ليك تاني تقولي لا متروحيش عند امك علشان ترضي امك
امي هي اللي ربتني وتعبت فيا وشالت بيتها وهي موظفه علشان تساعد جوزها وتستر بيتها
وصرفت عليا هي وابويا وصرفت علي بنتي وهتصرف علي بنتي الجايه
حقك في بنتك لا يساوي نقطه في بحر من حق امي في بنتك
لحم بنتي من خير امي
ولحم انا من خير امي وابي
ولحم اللي جايه برده من فضل امي وشقاه
وحسبي الله ونعم الوكيل
الاخت ندى الفاضلة
انا قرأة تعليققك الاخير علي وانت شككتيني في نفسي .
وقلت أنني
(وبعدين تعالى هنا بقى
مين بقى قالك ان لما الزوجه تخدم حماتها قوم هو الزوج الى ينول رضا ربنا )
أنا رجعت ما كتبت وهو
(كنت أرى أنة من الافضل أن تكون التدوينة نصح وتوجيهة للزوجات أنة بالرغم من عدم فرضية خدمتها لام زوجها ألا أنة من الافضل لكب تكون الحياة فاضلة أن تقوم الزوجة بخدمة أم زوجها وذلك سوف يؤدى الي أن تكسب الزوج رضا ربها وزوجها.)
شفت قلت لما تعمل كدة تسكب الزوجة رضا ربها وزوجها , بس في تة مربوطه وقعت في السكرة من كلمة الزوجة وتجدي باقي الجملة مؤنسة
ماشي
برضك واضح أني لم أستطع توصيل مقصدى
المقصد نعم انني نعرف شرع الله ونعرف الواجبات والمسؤليات ..
ولكن أقصد أنة لا داعي للتأكيد علي أمور كد تساعد ضعاف النفوس من النساء لخلق مشاكل وقلب الحقائق وافساد حياتهن.
المهم أأكد لك أنني عن نفسي أذا حدث وكانت زوجتي تخدم امى بشئ بسيط جدا وهى ليست خدمة بل مساعدة مثل تجهيز الحقنة وخلافة كنت سأضعة فوق رئسي واشكر فضلها وليس بالجبر..
مع العلم أننى علي سبيل المثال لا أسمح بتعدى أحد الطرفين علي الاخر أو التدخل في حياة الاخر ولو بكلمة لكن كما قلت لك زوجات اليوم عاوز تأخذ دون أن تعطى .
وأذا تلكمت عن الخدمة تقول شرع الله طيب لما تتكلمى علي تعدد الزوجات تقول أنت من طريق وانا من طريق ..
طيب فين قول الله تعالي
{فَلاَ وَرَبِّكَ لاَ يُؤْمِنُونَ حَتَّىَ يُحَكِّمُوكَ فِيمَا شَجَرَ بَيْنَهُمْ ثُمَّ لاَ يَجِدُواْ فِي أَنفُسِهِمْ حَرَجاً مِّمَّا قَضَيْتَ وَيُسَلِّمُواْ تَسْلِيماً }النساء65
يعني
( أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ فَمَا جَزَاء مَن يَفْعَلُ ذَلِكَ مِنكُمْ إِلاَّ خِزْيٌ فِي الْحَيَاةِ الدُّنْيَا وَيَوْمَ الْقِيَامَةِ يُرَدُّونَ إِلَى أَشَدِّ الْعَذَابِ وَمَا اللّهُ بِغَافِلٍ عَمَّا تَعْمَلُونَ }البقرة85
ربنا يهدى
غير معرفه
اه طبعا مش من حقه انه يمنعك عن اهلك
ولكن
هاقولك الحكايه ازاي
دلوقتي هو عليه مسؤليه الى هى القوامه وعشان عليه مسؤليه
لازم يبقى عنده سلطه
زي المدير المسؤل كده
عشان كده انتى واجب عليكى الطاعه بس بدون معصية الخالق
يعنى زيارة الام دي وبرها لما تمنعيها تبقى وقعتي فى معصية ربنا
وعليه مش من حقه ولا واجب عليكى طاعته فى معصيه
لما يمنعك بالقوه يتحاسب عند ربنا طبعا
غير انك كزوجه تقدري تلجأي لحكم من اهلك وحكم من اهله او تسبيه خالص
والمصروف والكلام ده بقى مش موضوعنا بس انا عارفه انك مليانه وما صدقتى خرم ابره
ربنا معاكي ويصلح حالك وحال الجميع ويهديكى ويهدى كل عاصي
اه انتم الاتنين كده وان كان عاجبك :)
روقي عشان البيبى
م علي يونس
اولا اسفه على سوء الفهم وعموما انا كنت باهزر على فكره
بس يعنى ماليش دعوه انت الى نسيت تاء مربوطه ودي مهمه اخر خمس حاجات يا فندم
المهم نرجع لموضعنا
حاخمات اليهود احتكموا للرسول عليه الصلاة والسلام فى حادث زنا وقالوله الراجل ده زنا وثبتت عليه نعمل في ايه
قالهم عندكم ايه قالوا مش عارف نعمل في ايه وايه حاجات كده مش فاكراها والله
المهم قالهم كذبتم وقالهم هاتوا كتابكم وفضلوا يقروا لحد ما وصلوا عند حد الرجم وحط ايده عليه وما رضيش يكمل
وقال اصل احنا خفنا لو ان هو ده العقاب هايبقى صعب تنفيذه وبعد كده الى هايحصل انه يتطبق على الفقراء والضعفاء وعلية القوم لا
وهكذا يبدأ التحريف فى الشريعه
حضرتك عايزنى اطمر قاعده شرعيه وبلاش نتكلم عنها ونتخن ودان الستات وخليهم كده احسن ما يعرفوهاش كلهم سواء اصحاب نفوس ضعيفه ولا لا عشان ما نعملش مشاكل !!!!!
طيب حضرتك ما جاش على بالك ان زوجات اليوم هم حموات المستقبل ؟؟
ولما تكون الحمى عارفه ان مرات ابنها مش فرض عليها تخدمها تسعين فى الميه من المشاكل هاتتحل
لما تتعامل مع مرات ابنها بود وتمتن لكل كوباية مايه بتديهالها وكل حقنة انسولين بتديهالها ؟؟؟!!!
اي قاعده دينيه صحيحه يا فندم ولا غبار عليها مش من حق اي حد طمرها لاي سبب
اظن احنا اقل من ان نعلم مصلحتنا اكتر من ربنا الى انزل القرآن ورسوله الذى اتم علينا الدين
ولا ايه حضرتك ؟؟
اوعى تزعل مني انا والله باناقشك بكل ود حضرتك اخ عزيز والله
التعدد بقى يا سيدى الفاضل انا خضت فى الحديث عنه قبل كده على الصعيد الاجتماعي والدينى وقطعوني الناس فى النقاش هاجيبلك وصلاته وتعرف رايي فيه
وشكلنا هانتخانق كتير :)))))
يا اخ علي يونس
ادي مناقشتنى للتعدد على الصعيد الاجتماعي
في بوست بعنوان اتجوز تانيه وما تصدعناش :)
http://ndaelyasmeen.blogspot.com/2009/04/blog-post_8845.html
وده على الصعيد الشرعي
بعنوان التعدد بين مؤيد ومعارض
http://islam-as-i-see.blogspot.com/2009/04/blog-post.html
اهو مش حارماكم من خناقات يا يا استاذنا
باقول ما تعرفني على المدام
نيهاهاهاهاها
ندى الياسمين
أنا ذهبت الي الرابط الخاص بالتعدد علي الصعيد الشرعي
الموضوع كبير وانت طرحتي موضوع مهم وقوى بس كان لي في كلام كتييير قوى .
بجد أنا خايف افتح لنفسي معاكى فتحة وما خلصش منك لذا سوف اوثر السلامة واقفل بقى علاوة علي ان الموضع طرح منذ فترة كبير وخلاص ..
بس عاوزك تعرفي انى بحترمك جدا ومش عاوز النقاش يفسد للود قضية ماشي
وكمان مش هاعرف اتبادل النقاش في هذا الامر في المدونة ... المهم خلاص انا شفت التدوينة ..
سيبك من الكلام دة كلة المهم بقة
أن شاء الله سوف انزل اجازة في العيد الصغير لمصر
لذا اتوجة لك وللبية الباشا والاولاد بأنة يسعدني ويشرفنى دعوتكم لقضاء العيد الصغير معنا بالاسماعيلية
قلتي ايه بقي ؟؟؟
ماتخفيش في ماكن يساع الكل وان شاء الله تسعدوا معنا
م/ علي يونس
يا باشمهندس والله حضرتك كلك ذوق
احب اقولك ان انا اصلا اصلا باحب اسماعليه اوي عشان هاديه وانا مخنوقه من زحمة الدلتا
وانا ناويه اروح اسماعليه ان شاء الله لما الجو بس يتصلح شويه عشان انا فى الحر لا احبذ اي انتقالات
وعلى فكره انا ليا ضلع فى اسماعليه عيله بحالها تبعي
ههههههههههههههه
وحقيقى متشكره جدا جدا على دعوة حضرتك وعلى راسي يا فندم وان شاء الله نتشرف بمعرفتكم مش عارفه ازاي وامته لكن ربنا يسهل
وطبعا لا يفسد للود قضيه
وانا تحت امرك فى اي نقاش
وايه مش هاتخلص مني دي اوبااااا قصدك ايه بقى
بالعكس ده هاديه ووديعه جدا (ضحكه شريره )
متشكره لحضرتك يا فندم وربنا يكرمك يارب وارحب بالنقاش مع حضرتك على عينى يا باشمهندس
أنا معاك أن المرأة غير ملزمة بخدمة أم زوجها لكنه من أجل زوجها تساعده في نيل رضا والديه وهو بالمقبل يعترف بجميلها ويبوس إيديها وش ودقن
دا رأيي في القضية
ابو ريان
يبوس ايده هو شعر ودقن ان لاقي حد يخدمه هو شخصيا
ههههههههههههه
تحياتي يا فندم ونورت
إرسال تعليق