السلام عليكم
ايه يا جماعه في ايه هو انا باكلم نفسي هنا ؟؟؟!!! كل الناس تقرا المدونه من بعيد لبعيد ويجوا يناقشوني فيها فى مكان تاني غير هنا . لا شكلي بقى وحش يعنى يرضيكم جوزي يقولي ما حدش بيقرا المدونه الا أنا وواحد كمان ساعات بيقراها جبران خواطر( قصده على الأستاذ احمد) الى يقرا بوست يرد عليه ويقول اي حاجه انشاله يصلحلي الاخطاء المطبعيه . ايه ده الناس تقووووول ايه مقطوعه انا على النت ماليش حد . ست سنين على النت كده هدر . أما نشوف الشغل بقى .ناس مش بتيجى الا بالعين الحمرا
( اصلح حالكم بقى تعلقوا وتناقشوني عارضوني وافقوني اي حاجه عيب كده بقى ) دي عشان الناس الى بتيجى بالمسكنه .
ها يلا نرغي بقى . مش عارفه هو فى موضوع كده خانقنى ومن زمان عايزه اقولكم عليه بس أرجع اقول مش دلوقتي ورانا رغي اهم بس بقى خلاص الخنقه زادت والظاهره انتشرت انتشار مريع .
تخيلوا ان انا بقيت اخاف افتح الأميل بتاعي ؟؟!!!! اه والله . لا مش في عفاريت ، بس الناس الايام دي مخها مش عارفه جرى فيه ايه . يادوب افتح الميل الاقي الناس بتكلمنى عادي جدا فى البدايه منهم ناس يعرفوني من زمان سنين مثلا ومنهم ناس ما تعرفنيش او عارفاني ونسيانى ( اصل انا اميلى مولد يعنى عليها مئات الاميلات وهابقى اقولكم ليه)
المهم الناس دي - الا قليلا منهم - لحوحين بطريقه بشعه جدا جدا . فى طلبات عجيبه وغريبه من نوعها اسمعوا عينه من تسلسل الحديث :
ـ ممكن تفتحي الكاميرا عشان اشوف الى بتكتب الكلام الذوق المحترم ده شكلها ايه ؟؟؟
ـ باقولك انا تعبت من الكتابه ممكن نتكلم مايك ؟؟؟
ـ ما عندكيش صور لولادك ؟؟؟ أنا : ايوه اتفضل شوفهم اهم على المحادثه ( ده لو كانوا مش محطوطين اصلا) طب مافيش صوره لكي بقى ؟؟
ـ هو انتى بتدخلي امته عادة؟؟؟ أنا : ماليش مواعيد حسب ما ربنا يسهل . طب ممكن رقم موبايلك عشان ابقى ارنلك لما اكون هنا ؟؟؟
- هو انتى اسمك ايه ؟؟؟ أنا: ام مريم . أنا باحب الناس تقولي ام مريم .
طبعا انا بصرف النظر عن رايي فى صحة الطلبات دي من عدمها الا اني باعتذر للناس دي بمنتهى الذوق انى مش باتكلم لا مايك ولا كاميرا ولا بادي صوري لحد ولا رقم تليفونى ولا باخد رقم حد ولا صور حد .
طبعا بيسألوني ليه بكل تعجب . طبعا انا عشان مش اشرح وجهة نظري لكل حد باقولهم اعتبروها حرية شخصيه ورأي شخصي . انى الاقي حد يحترم الراي الشخصي ده - الا قليلا- اطلاااااااقا ، ليه؟؟؟ مش عارفه .
ده غير اني مش لاقيه اهميه اطلاقا للطلبات دي انا ليا ست سنين على النت عمر ما ساورنى فضول حول شخصيه معينه باكلمها انى اعرف اسمها ولا شكلها ولا اي حاجه اصلاااااااا بالكاس بسأل عن السن والعمل والحاله الاجتماعيه اذا استدعي الحديث ذلك . ويمكن بعد خمس دقايق انسى المعلومات كلها . مش لا مبالاه مني بالشخص لكن فعلا عدم رغبه مني فى معرفتها يعنى الحكايه ما تفرقش( ده غير الزهايمر انتم عارفين السن ) .
غير ان ايه عادة الالحاح دي ؟؟؟ انا اكره الالحاح جدا فى الاتجاهين لااحب الح على حد ولا حد يلح عليا .
واصلا ما طول عمري عندي اميل اشمعن الايام دي الناس جرالها كده ؟؟؟
انا طول عمري بادي اميلى لاي حد يطلبه عادي والى يطلع مش تمام بعد كده حظر وحذف ويتحول وجوده الى عالم النسيان ده سبب انى عندي اميلات كتير . كلهم ناس محترمين وأفاضل الى اعرفهم ( والى ما اعرفهمش احسبهم ذلك )
ليه ما بنحترمش الرأي والرغبه الخاصه للاخرين وبنعتبرها مجال للمساومه ؟؟؟ ولا احنا اتعودنا على الفصال فى كل حاجه ؟؟؟ واتعودنا على ان الكل بقى كلمته مش واحده وله عشر كلمات ؟؟؟؟ حقيقى مش عارفه .
بتهيئلي لاننا اتعودنا ندور على الى مش حقنا عشان ناخده ؟؟
ولا يمكن عشان اتعودنا نتنازل عن حقوقنا وما نحاولش اننا ناخدها بايدينا ولكن نقعد نعيط ونقول خدوا حقنا ؟؟
ويمكن كمان عشان ما عندناش حاجه نعملها مفيده فبنضيع وقتنا فى اننا نلح ونساوم ونفاصل ؟؟؟
يا سلام لو نبقى دوغري كده وكلمتنا واحده ومحترمين نحترم نفسنا ونحترم الرأي الاخر حتى لو كان غلط من وجهة نظرنا . ونمارس حريتنا ونحترم حرية الاخرين .
يا سلام لو كنا نخلي وقتنا دايما له قيمه وثمن ونخليه دايما وقت مثمر مش رايح فى الهوا .
يا سلام لو نحترم القوانين ( الالهيه والوضعيه ) ونفذها من نفسنا من غير ما يبقى فوق راسنا شاكوش .
وأأأأأأأأأأأأأأه يانى . عرفتوا ليه ان اسمي صبرني يارب ؟؟؟؟؟؟؟؟؟؟؟؟؟؟؟؟
والى لقاء اخر ان شاء الله
هناك 3 تعليقات:
اختي العزيزه في البدايه أود ان ابعث بتحياتي للأستاذ رضا الذي من حديثك عنه علمت انه ذو شخصيه فريده فخالص تحياتي لكما وثانيا اريد ان اعلق على كلمه وردت خلال حديثك وليس علي موضوع حديثك الذي اوافقك علي كل ما ذكرتيه بخصوصه اما الكلمه فهى الصاق مرض الزهايمر بنفسك ولو من قبيل الهزار , اختي يجب ان تعلمي ان مرض الزهايمر مرض خطير عافانا واياكم الله منه وعلاجه يعتبر من الصعوبه بمكان وانتى تعلمي قول رسول الله عليه الصلاة والسلام (لا تمارضو فتمرضو فتذهب ريحكم) واني علقت على هذه النقطه لأني لاحظت اشخاص كثر (يهرجو) ويصفوا أنفسهم بانهم عندهم الزهايمر لما ينسو حاجه مع اننا نعلم ان الله خلق النسيان نعمة للبشر واشتق منها اسما لهذا المخلوق واني احب ان انبه لهذا من قبيل خوفي علي الشخص حتي لا يصاب فعلا بما ادعي انه مصاب به وفي الختام ادعو الله ان يديم عليكي نعمة الصحه والعافيه ويبعد عنا وعنكي كل بلاء والسلام ختام
معلش نسيت يا ريت تخبري استاذ رضا اني لا اقرأ مدونتك جبران خواطر انا وبصدق معجب باسلوبك وباختياراتك لموضوعاتك واني مسيف عنوان مدونتك واول ما ادخل النت بادخل واشوف ايه الجديد وده كلام صدق وليس مجامله مع خالص رجائي لكي بدوام التقدم والسلام ختام
الله يكرمك يا استاذنا يارب ونورت اولا
اما حكاية الزهايمر انا أعلم فعلا انه مرض عضال وصعب جدا ومالوش علاج لكن هو على فكره له أنواع ودرجات . وانا فعلا باهزر الحمد لله انا ما عنديش زهايمر واتمنى ما يحصليش ده ولا باتمناه ولا بادعي المرض لانكم عارفين انى باهزر وان كان فلا رد لقضاء الله .
ولكن على فكره انا فعلا بقيت بانسى كتير اوي لكن مش كل حاجه وقريت مره انه ممكن يكون بسبب نقص الهيموجلوبين لكن لسه فاكره اسمي الحمد لله . وشكرا على حرصك يا أخي الفاضل
اما عن رضا الله يكرمك ويخليك هو فعلا شخصيه فريده الله يكرمه ( وما حدش يقول مين يشهد للعريس) لانه هو فعلا كده ولا اوفيه قدره ان تحدثت عنه .
اما حكاية المجامله والله يا اخ احمد انا كتير اقول لنفسي شكلهم بيقولولي ان المدونه حلوه بيجاملوني .
لكن ارجع اقول لنفسي طب يعنى بيدخلوها تاني ليه ؟؟
وبعدين انا لسه اثنين امبارح قايلينلي ان المدونه وحشه وما لهاش لازمه . مع انهم ما قريهوش بس هما قروا العناويين وشايفيين انه مش حلوه . عادي مش عضيتهم ولا حاجه ( أه باعض احيانا)
عموما انا شرفنى رايك يا استاذ احمد وطبعا رضا كان بيهزر معايا عادي .
وعلى فكره انا رغايه كفايه كده
وشكرا لك يا استاذ احمد ودمت بكل ود
إرسال تعليق