الأحد، 9 مارس 2008

12-احنا ..... وهما ( الستات والرجاله)

السلام عليكم يا قطاقيط والله واحشني . اي والله مع انى مش عارفه انتم مين اصلا . بس او واحشني ما كلتش ودانكم من الرغي بقالي يومين .
النهارده انا قلبت كده فى البلوج كتير وقريت اجزاء من مدونات كتير اوي ولقيت كلام حلو لناس كتير ما شاء الله باين علينا هانبقى كويسين يا ولاد فى يوم من الايام لسه فى ادمغه صاحيه الحمد لله فى امل . بس انا لما بيعجبنى مدونه باعلق عليها مش زي ناااااااااس . المهم ربنا معانا جميعا ومع كل فكر وضمير صاحي .
ودائما وابدا ادعو الله ان أرينا الحق حق وارزقنا اتبعاه وارنا الباطل باطل وارزقنا اجتنابه. لان فى ظل الحياه الى احنا عايشنها سهل اوي الواحد يتوه ما يعرفش هو واقف فين .
الا لو لقى كميه هائله من التراب فوقه وعادم عربيات كاتم نفسه وزعيق ودوشه وزحمه وناس صوتها عالي وكلسات عربيات لا منقطعه ولها اصوات عجيبه يعرف انه فى شارعنا . ده العنوان عشان لوحب حد يجي يزورنا .

ها هانرغي فى ايه كتاكيت ؟؟؟؟
بصراحه انا فى موضوع كده نفسي أرغي فيه بس المشكله انى مش هاتعرفوا تسكتوني .
بصوا انا هسأل سؤال وانتم بقى عليكم الاجابه ( أنا مش هاقول ولا كلمه هما يادوب صفحتين بس وهاسكت)
السؤال : هو ايه الفرق بينا وبينهم ؟؟؟ هاتقلولي طب مين احنا و مين هما ؟؟؟؟ انا هاقولكم يووووووووووه ده فى احنا كتير وفى هما كتييييييييييييير .
فى احنا الستات واحنا العرب واحنا المصريين واحنا المسلمين وغيرهم كتير ما جوش مع الهام .
وفى هما الرجاله وهما الى مش عرب وهما الى مش مصريين وهما الى مش مسلمين وغيرهم برضه نفس الموضوع.

ها تحبوا نتكلم عن ايهم احنا وهما ؟؟؟؟ عااااااااااااااارفه والله عارفه مش عايزين وجع قلب ولا مصريين ولا عرب ولا مسلمين بلاش وجع قلب ياما قلنا ومش مقصر معاهم حاجه( بس هاتكلم عنهم برضه ان شاء الله )

خلينا الى مش وجع قلـــ....... لا الى فاتوا مش وجع قلب ده وجع دماغ وضمير خلينا نايمين فى العسل نوم حلو النوم .

ندخل على وجع القلب الى بصحيح .
ايه الفرق بينا احنا الستــــــــات ....... وبينهم هما الرجــــــــــــــاله ؟؟؟؟؟؟؟؟؟

الستات عندهم شعر ...................... والرجاله فى الغالب قرع .
لكل قاعده شواذ ما حدش يقولي انا مراتي قارعه ولا واحده تقولي انا جوزي بشعر . ما لناش دعوه احنا .
ندخل على الجد بقى :

* أولا من ناحية الاقبال على الجواز : البنات كلهم عايزين يتجوزوا بس يا اما مكسوفين يقولوا يا اما بقت كرت محروق من كتر ما رسمت على ناس وفي الحالتين هى قاعده يعنى مستنيه عدلها .

الرجاله كلهم هايموتوا على الجواز لكن بقوا عاملين زي المشتري الخايب الى يقف يقلب فى عربية التفاح لما يموت صاحبها من النقطه وبعدين يسيبها ويمشي (ويبقى يا اما مش معاه فلوس التفاح يا اما ما بيعرفش يهضم الاكل النضيف يا اما حاسس نفسه لازم ياكل حاجه اعلى من كده من الفضاء الخارجي ) أي راجل يقول هو فين التفاح هاقوله مشيها برتقال ما تزعلش ولا كوسه حتى موافقين ده الكيلوا ب 4 جنيه .

* بعد الجواز بقى : الستات لما بيتجوزوا هى سنه واحده وتبدأ عليهم علامات البله المنغولي والهدوم المقطعه والايشاربات الغريبه على راسهم وكل ما العيال تزيد عيل تظهر عليها علامات اكتر من البله المتعدد الجنسيات .

الرجاله بعد ما يتجوزوا بتبان عليهم النعمه كل شويه اكتر من الاول وتلاقي هدومهم بتتكوا كده وجزمهم ملمعه وريحة البرفان بتهفف حواليه . بس بيحلق دقنه بالعافيه غالبا لانه بيبقى حاسس ان حلاقة الدقن ظلم واقع عليه هو وبنى جنسه وكل ما يتقدم فى السن يأفلط فىنفسه زياده.

* الاجازات : الستات لو هى موظفه ممكن تاخد اجازه من الشغل اسبوعيه ولا يوم عيد العمال . لكن يا حبة عينى بتقضيها اشغال شقه ولا تجيبلها 5 كيلوا قلقاس تقطعهم و5 كيلوا بسله تفصصها وتحطهم فى الفريزر او باميا لو فى الصيف المهم . طيب مين يديها اجازه من شغلتها الاساسيه البيت ؟؟؟؟؟ ده سواء هى لها شغلانه تانيه ولا لا ما تفرقش خالص . مسؤليه غير منتهيه تماما حتى وهي نايمه المسؤليه لا تنتفي عنها .
الرجاله بقى : يوم الاجازه الاسبوعيه ده يا لهوي بيبهدلوا نفسهم . كل يصحوا يناموا تاني . ويمكن يتهوروا ويقروا الجرنال . ويبص بقرف كده وزهق ولو عملوا قدامه عرض السيرك القومي ولاده ما يتحركش فيه شعرايه . ويقولك ايه مش يوم اجازتي ؟

* فى الشغل : الستات فى كتير من الاوقات بيستهبلوا ويطالبوا بالمساواه وهما اصلا مش بيشتغلوا فعلا زي الرجاله ولو زنقتها فى شغلانه جامده تقولك الله انا الى هاعمل كذا ما الرجاله اهم قاعدين عيب عليكوا وبعدين بعد خمس دقايق تتشاكل مع المدير عشان زود زميلها عنها فى الحوافز والمكافئات.
اما الرجاله ما بيعملوش كده خااااااالص لكن اه واه لو ست قلة عقلها وفكرة تشتغل كويس زيهم وتنجح يصبوا جام غضبهم على الستات كلهم حتى الى في ا لبيت على المسكينه دي ويقولك ايه يعنى هى فاكره عشان بتعمل كده هاتبقى راسها براسنا لا الست ست والراجل راجل والرجال قوامون على الناس ..........واي كلام فى البتنجان وهما مش فاهمين اصلا يعنى ايه الايه؟؟؟؟؟؟؟؟؟؟؟؟؟؟؟؟

* فى المصيف : الستات بيشتغلوا طول النهار يطبخوا ويخلوا بالهم من العيال ولما يروحوا البحر تقعد تلمهم زي الكتاكيت من على الشط كل شويه وتفضل قاعده تاكل الى يطلع من البحر وتصور الى ينزل البحر وترجع البيت تحمي العيال وتغسل هدوم الشعب المصري كله وتأكل الى جم من البحر جعانين تاني وتنضف الشقه كلها عشان الرمل ما يبهدلش ا لعيال ا لى استحمت ............. هو لسه فاضل ايه فى اليوم ؟؟؟ لو عرفت تنام يبقى كويس .
الرجاله بيصحوا بالعافيه الظهر يتمطع شمال ويمين ويقرا الجرنال الى وصى مراته تبقى تجيبه من الواد الى بيعدي ا لصبح وياكل ويروح البحر ويرجع ياخد شاور ويقعد فى التراس يتفرج على التلفزيون ويقزقز لب ويمكن يكون معاه اخوه ولا صاحبه يقعد يلعب معاه طاوله ولا شطرنج ويا دماغه العاليا .

* فى الرغي : الست لما تكون رغايه بتبقى مسليه ( اه ولا كلمه) انما الراجل لما بيكون رغاي يا لهويييييييييي بيقول كلام وقصص دمه خفيف موووووووووووووووووت .

* فى التركيز : الست ممكن تكون بتنقى الرز وبتذاكر للعيال وفاكره ان اللحمه على النار وبتكتب مدونه (هههههه) وكل شيء ماشي كويس اوي
الرجاله بقى لو كان بيتفرج على فيلم اجنبي واتكلم حد فى الشارع ممكن يصور قتيل عشان مش عارف يركز . واه لو كان بيشتغل . وأه ثم أه ثم اه لو كان بيتفرج على ماتش تبقى وقعة اهله سوده الى يكح عند الجيران.

* فى دور البرد : الست لما بتتعب بتفضل لاخر نفس تجاهد نفسها وتاخد حبيتين مسكن وانتى بايوتك وانتى هستامين وتقوم تحمي العيال وتطبخ وتروح الشغل وتخدم البيت عادي جدا .
الراجل لما ياخد دور انفلونزا يا ابوياااااااا بيبقى حاسس بظلم بين . وينام فى السرير وياخد كل انواع ادوية البرد ويشرب حاجات سخنه ويقول ااااااااه ياني طول الليل وكل خلق الله يجوا يزوروه وياخد اجازه من الشغل اسبوع وفى نص الاسبوع حالته تتحسن تكون مراته اتعدت منه بس هو برضه نايم وهى الى بتخدمه .

يا لهوي ايه كل الكلام ده كفايه كده اصل انا سرحت .


هناك 20 تعليقًا:

فرنسا هانم يقول...

كويس جدا انى فى اول زياره اكون اول تعليق

عموما
ده فعلا ظلم واقع على الست فى كل الاحوال اللى قولتيها
وفعلا الراجل لما يجى يتجوز فاكر نفسه ينقى تفاح
حوار جميل جدا جدا
ومدونه جميله رغم انى خدت لفه كده على السريع فيها
وقريت شويه عن الرومانسيه وكلام العصفوره
ولكن
محتاجه
الف لفه تانيه بتأنى

صبرني يارب يقول...

يعنى مش عارفه اقولك انا اد ايه مبسوطه انك شرفتيي المدونه لان انا معجبه بكلامك جدا رغم برضه انى قريت قليل فيه لكن الجواب بيبان من عنوانه وشكرا لكي
وشكرا لك واتمنى اسمع رايك بصراحه فى اي بوست تقريه مش المجامله ونورتي بجد

3mr kenawy يقول...

ماننقى براحتنا مش احنا اللى هانتجوز واحنا اللى هناكل التفاح!!!
بس مدووووونه جامده اخر حاجه
ومش تفتكرى ياصبرنى انك بتتكلمى كتير
لاعلى العكس انتى مش بتتكلمى خالص

بس جامده موووووووووووووووووت
يا مدوناتك ياعم ...!!

صبرني يارب يقول...

قناااااااااااااوي ازيك يا قناوي وربنا لك وحشه انت فين ياابنى نورت المدونه والله .
وبعدين تفاح ايه الى هاتنقي فيه يا قناوي وجواز ا يه بس انت اخرك تشتري 2 كيلوا بطاطس من ام 75 .
قال تفااااااح قال هههههههههههههههه
شكرا يا قناوي على حضورك ونووورت وكل يوم تيجى هنا تمضي تمام

بت خيخة وأي كلام يقول...

تعبتينى معاكى يا ام مريم
اتناشر بوست قريتهم بالتمام والكمال

نيجى لاول مرة تكتبى مدونة واختيارك لاسم مدونتك
عايزة اقولك ان انا كمان اعتبر امرأة غير مطحونة
الحمد الله انا اعتبر انسانة مرفهة
ودى نعمة اشكر ربنا عليها


بالنسبة لبوست عيد ميلادى النهاردة
احب اقولك كل سنة وانتى طيبة ومعلش جت متأخرة
واحب اقولك
ان انجازاتك فى التسعة وعشرين سنة اكتر من انجازاتى انا شخصيا وانا اكبر منك بسنة وشهر لان عيد ميلادى التلاتين كان خمستاشر يناير
ومش عايزاكى تحسى انك عجزتى
انا شايفة ان الشباب شباب القلب
انا مازالت بحس انى عيلة صغنونة
وده اجمل احساس لكن لو حسيت ان انا كبيرة ممكن فعلا اكتئب


بالنسبة لبوست ايه هى السعادة
متفقة معاكى بنسبة مية فى المية يعنى معنديش اى تعليق على كلامك فى البوست المذكور



بالنسبة لبوست انا اخترعت مصطلح جديد اللى بيتكلم عن البطالة الاختيارية
بصى يا ام مريم
طبعا انا متفقة معاكى
بس انا اتحطيت فى الموقف ده قبل كدة ويمكن كتبت بوست عنه
انا من فترة كدة كنت هاشتغل ولقيت المرتب ربعمية جنيه من تسعة لحد خمسة والاجازة الجمعة فقط
المهم انى ماشتغلتش
ليييييه؟
علشان اسباب كتير بينى وبينك
بس سبب منهم كان علشان صعبت عليا نفسى لما اعرف ان الساعى عند جوزى فى الشركة بياخد ستمية وخمسين جنيه وهو معاه دبلوم
وانا اللى معايا مؤهل عالى اخد ربعمية جنيه
والساعى ياخد جمعة وسبت اجازة
طب بذمتك مش ده ظلم
طبعا ده مش سبب علشان ماشتغلش هو كمان السبب الرئيسى انى كنت هاجى على شريف ابنى لو كنت اشتغلت
فقلت لأ بلاها الشغل دلوقتى و اركز مع ابنى احسن

بالنسبة بتاع بوست رغى امرأة غير مطحونة اللى بتتكلمى فيه عن ابنك خالد وحكاية اختياره لسريره
انا متفقة معاكى فيه
ومتفقة معاكى فى الفكرة اللى عايزة توصليها ان احنا لو كنا اخترنااااااه اخترنااااااااااه
كان ممكن احوالنا تكون احسن



بوست خلى بالكم من دخان الطبيخ
كنتى مية مية انا عن نفسى اى نعم مش بشتغل لكن الحمد الله من وقت للتانى بحاول اشيل دخان الطبيخ بانى اقرا كتاب او اتفرج على برنامج كويس او حتى اروح الاوبرا اتفرج على عرض باليه
يعنى الحمد الله مش بخلى دخان الطبيخ يتكوم على مخى



بوست ساحرة القلوب وبوست يعنى ايه رومانسية متفقة معاكى فيهم معنديش تعليق عليهم


بوست اتجوز تانى ومتصدعناش عجبنى اوى طريقتك فى العرض
وانا معاكى بقولها بعلو صوتى اللى عايز يتجوز تانى يروح يتجوز ويورينا شطارته



بوست قلة ادب ولا قلة حيلة
عجبتنى اوى الجملة دى

المقاييس اختلفت ولا العيال اتهبلت . ولا الاهالي بتستعبط

وارجوكى تتكرمى وتقرى بوست عندى اسمع شريف جالكوا صلحوا حالكوا
هتلاقيه عندى فى ارشيف شهر ديسمبر السنة اللى فاتت
ارجوكى اقريه علشان تقريبا يفيد نفس المعنى بتاع البوست بتاعك


يا سلام لو نبقى دوغرى
معنديش تعليق عليه لانى مش بتكلم مع حد على الماسينجر تقريبا فبالتالى مش بتحط فى المواقف دى بس لو اتحطيت فيها اكيد هارفض بطريقة مهذبة زى ما انتى بتعملى


البوست ده بقى اللى هو احنا الستات وهما الرجالة
تعليقى عليه
ايوة معاكى حق
احنا مطحونين حتى ولو كنا مرفهين
احنا علينا كل حاجة ومش مسمحولنا ان احنا نعترض
وانت كتبتى البوست بشكل واقعى جدا ودى حاجة بتعجبنى اوى
بس خلاص
سلام بقى علشان الاكل هيتحرق منى
اه بالنسبة لتعليقك عندى
انا موافقة انك انتى تطبخيلى وانا انضفلك الشقة
سلام يا ام مريم
وبوسيلى مريم ورحمة وخالد كتييييير
تحياتى ليكى
اختك خيخة

صبرني يارب يقول...

يا لهوي يا لهوي يا لهوي اه 3 يا لهوي بت خيخه كلها عندى على فكره انتى ما شرقتيش وانتى بتقري المدونه اصل انا كنت باحكي على المدونه بتاعتك لجوزي وجايبين سيرتك .

وبعدين انتى قريتى ازاي كل المدونه فى يوم واحد انا بالعافيه كل يوم باقرا بوست او اثنين عندك وعند فرنساهانم ده لو سابوني اركز .

الاول وانتى طيبه وانتى برضه كل سنه وانتى طيبه وعلى فكره انا مش حاسه انى عجزت ولا حاجه بالعكس تماما انا بس من سياق الكلام كان ليا افكار معينه عايزه ابرزها لكن انا بالعكس ساعات بابقى مش مصدقه انى بقيت كبيره كده واقول ياترى ماما قيدتنى قبل ما تولدنى بكام سنه .هههههههههههههههههه

بالنسبه لحكاية البطاله انا معاكي فى قرارك وعلى فكره اخدت زيه تماما ومريم صغيره وانا كنت فىالامارات لكن انا مش اقصدك انتى لانك انتى ظروفك مختلفه انا كلامي موجه فى الموضوع ده لاي حد قاعد من غير شغل وعاطل لان انا شايفه ان اي ست لو قاعده فى البيت مش هاتكون عاطله ابدا انما الرجل لما بيقعد فى البيت هايبقى عاطل ومعطل كمان الى حواليه .
انما انتى وأنا وامثلنا فاحنا مجرد تأدية ادوارنا الاجتماعيه كفايه يا اختي احنا هانقطع نفسينا ولا ايه .

هاروح اشوف البوست بتاع شريف فوراااااا ان شاء الله وربنا يخلي لك شريف يارب وباباه واخواته الى جايين .

وتحبى تاكلي ايه بكره ههههههههههههههههههههههه

دكتور حر يقول...

تاني عنصر رجالي عميل يدخل يعلق على التدوينه اللي مبصزص لنا فيها دي

انا دايما بقول لنفسي لو خيرت اكون راجل ولا ست
بختار الراجل

بأمانه عشان زنقة الاختيار دي

لكن ربنا مش ظالم أبدا

وكل حاجه ليها حاجتها


من التعليقات
حاسس ان كلامك القديم جميل

نروق بس يوم كده ونرجعله ان شاء الله

والحمد لله اني راجل
:)

صبرني يارب يقول...

يعنى مش قادره اعبرلكم على سعادتي بتشريفكم ليا جميعا وشكرا لك اوي دكتور حر انت نورت فعلاااااااا واكيد عايزه اعرف رايك فى الى فات على مهلك خالص من هنا لحد السنه الجايه كل يوم سطر عادي يعنى انت تشرف اينما كنت وقتما تشاء.

وبعدين احنا كنا قلنا ان احنا مظلومين ؟؟؟ لا احنا بعون الله ما حدش يقدر يظلمنا احنا جامدين اوي يعنى .

وبعدين ايه لو خيروك تختار تبقى راجل يعنى .
قصدك اننا بنحقد عليكم ؟؟؟
لا عاتييييي على راي الست سعاد حسنى فرحانين اننا اتولدنا بنااااااات .

أنا برضه لو خيرونى هاختار ابقى ست مش راجل مش عارفه ليه بس هو كده .

نوووووووورت بأمانه يا دكتور حر وربنا يكرمكم جميعا وايانا

رئـــــيسـة حزب الأحلام يقول...

السلام عليكم المدونة جميلة ورغيك فى محله

رجل من غمار الموالى يقول...

السلام عليكم
............
المدونة جميلة ..( تمشى )
....
بس مش كل الرجالة لامبالية بزوجاتهم قوى كده زى ما انت مصورة يا .. ست الكل...
.......

Anonymous يقول...

السلام عليكم يا صبرني

تعرفي أنني ما قرأتش بالترتيب النهاردة
دخلت على طول على العنوان العجيب بتاع أحنا وهما
محسساني أننا مخلوقات فضائية وأنتم ملايكة مش مهم

بس كلامك صح وكلها حاجات شفتها بعيني محدش قالي

بس أنتي دماغك حلوة فرزتي الكلام وظبطيه
أنا الحمد لله ما فياش دماغ للكلام ده

بس يا ريت شوية نفاق من أبو نص جنيه الكيلو

عشان الرجالة الحلوين كلهم طيبين وغلابة

يلا ربنا يعين الجميع

بجد شرف ليا يا صبرني أقرأ مدونتك وأرد عليها

أول مرة أعرف أن ممكن أرد على المدونة

يلا العلم نور برضك

تحياتي ليكي ولدماغك العالية

التوقيع ////// THE WHITE KNIGHT

صبرني يارب يقول...

رئيسة حزب الاحلام نورتي يا ست الكل وشكرا لكي من قلبي

صبرني يارب يقول...

رجل من غمار الموالي

انت تنور المدونه كله ما دام دخلتها يا اخي الفاضل

لكن انا مش باقول ان الرجاله عندهم لا مبالاه لكن هو زي ما تقول طباع يعنى وزي ما انا قلت اول الكلام كل قاعده ولها شواذ انا باشوف حالات على النقيض التام الست مكبره دماغها جدا فى كل حاجه وجوزها هو الى شايل على راسه الكبيره والصغيره .

وعموما انا البوست كله عباره عن اجزاء من الوضع بس لكن تقدر تقول انى يعني من وجهة نظر ست
بس حقيقى انا متحامله على الرجاله ولا فى صف الستات على طول الخط تابع البوستات الى جايه هاتلاقين حقانيه والله
وشكرا لك ونووووووورت

صبرني يارب يقول...

وايت نايت

الله يكرمك ايه النور الى حصلنا ده.
وشكرا لك على ردك ومتابعتك يا باشا

Liberal Muslim يقول...

وربنا الكلام ده اغلبه مش حقيقي معايا انا بالذات
أولا انا مش اقرع وشعري سايح ونايح كده ياختي وبيهفهف :)
تاني حاجه انا مافضلتش انقي ولا حاجه ... ولا تفاح ولا برقوق .. مراتي شوفتها في مناسبة اجتماعية عجبتني طلبت ايدها واتجوزنا بعد التعارف ب شهرين و 12 يوم بالظبط .
اه يمكن نضفت شوية بعد الجواز بس ده عشان ربنا زود شوية في رزقي وبقيت اجيب هدوم كويسه وعطور غاليه وكده .. يمكن يكون ده رزقها وكان وشها خير عليا ... بس مش معني كده اني كنت معفن قبل الجواز يعني ... بس كان الدخل محدود شوية .
بس في نفس الوقت اللي حصل معايا حصل مع مراتي ... يعني برضه هي بقيت تلبس أحسن وربنا جبت لنفسي عربية مستعمله وجبتلها هي عربية جديده .
تاني حاجه في شغل البيت انا بساعدها كتير ....ويمكن اكتر ما هي بتعمل في البيت ومع انها بتشتغل بس انا اللي بصرف علي البيت كله ... هي بس بتشتري لوازمها الشخصية .
ويوم اجازتي انا لازم اخرجها انما في أجازتها هي بتأنتخ في البيت وتصحي عبد الضهر
وانا كمان ممكن اركز في اكتر من حاجه في نفس الوقت بس مراتي لو ركزت في حاجه تنسي الدنيا من حواليها .
نيجي للحاجه الاخيره
انا الشئ الوحيد اللي مايخلينيش انزل الشغل هو اني أكون في المستشفي بصارع الموت .
يعني الحمد لله بقالي سنتين ونص هنا ماخدتش ولا يوم اجازه مرضية ولا غير مرضيه حتي .
إنما هي لو حست بشوية صداع صغيرين ماتروحش الشغل وماتقومش من السرير اساساً لمدة اسبوع

هي الدنيا عندي ماشيه بالشقلوب ليه؟

صبرني يارب يقول...

وائل يعنى انت صعبان عليك ان واحده بس يا عينى من الستات تكون كده ؟؟
وبعدين انا قايله تحديدا ان مافيش واحده تقولي انها قرعه او ان جوزها بشعر احنا بناقش حالات عامه مش فرديه
وبعدين ياعم انت فى امريكا مالناش دعوه بك .
بايضالك فى القفص وماشيه معاك عال وبتنتخب وعندك بسبور امريكاني لو جيت مصر كمان هايشلوك على كتاف حسني عشان من ريحة الحبايب .
ههههههههههههههههه قر مباااااشر
وعلى فكره انا من الناس الى قلت انت عليهم انهم بيقولوا انهم لو عرض عليهم بسبور امريكاني هايرفضوا مش عشان اي حاجه غير ان امريكا كدوله مش حباها لله فى الله اى كانت العوارض والاسباب .
بس لو بسبور سويسري او فرنساوي ممكن عشان ليااصحاب هناك ولو انجليزى برضه ماشي الحال بس ما حدش يرمينى من البلكونه هناك بقى .
وشرفت يا وائل

mony يقول...

مدونة تحفففففة

كل الكلام ده علي لساني ليل و نهار

الحمد لله ان مش انا لوحدي اللي بقول كده
بس ربنا يجعله في ميزان حسناتنا

اشجينا و قولي كمان
ننتظر المزيد

صبرني يارب يقول...

موني يا حبيبتى تسلمى يارب

وعنيه لك قشري بس شوفي عايزه اعملك فيهم ايه الرجاله ههههههههههههههههه
اي سواطير اكياس انا موجوده
نورتي المدونه يا جميل

Liberal Muslim يقول...

اه صعبان عليا ان واحده من الستات تبقي كده
يعني الواحده دي ماتجيش غير فيا انا؟
وايه نظام القر المباشر ده؟
بايضالي في القفص ليه؟ هو انتي مفكره اني بربي فراخ؟
وبعدين اهوه من حظي الفقري الاقتصاد الامريكاوي في النازل ... والدورار (الدولار) عمال بينزل والحاجات عماله بتغلي .

اه وبعدين الحياه في امريكا أحسن من اي مكان تاني علي فكره ... الناس هنا متسامحين جداً وطيبين قوي .... وكمان مافيش ترابط قوي بينهم ... ودي ميزه للي جايين هنا عشان بيقدروا يتأقلموا في المجتمع بسرعه عكس الدول الأوربية ... أنا روحت اسبانيا مره وياريتني ما روحت .... أهلها بصراحة مايتعاشروش ... وفي كل خطوة الواحد يسح انه غريب وان الف عين بتبص عليه وبتقوله انت ايه اللي جايبك عندنا ؟
معاملتهم زباله وبيتكلموا مع الناس كأنهم احسن من اي حد علي وش الأرض .

يللا فوتكوا بعافيه

صبرني يارب يقول...

بص يا عم وائل عشان انا باهدي النفوس بقى
انا عايزه اميل المدام بس عشان عايزاه فى كلمتين وكده تيجى تقراا لمدونه عشان نعرف الحقيقه من الطرف الاخر .
ويمكن تشوف ردودك بقىىىىىىىى وتعرف انك بتقول ما تجيش الا فيا انا
وشوووف بقى هايحصلك ايه ماليش دعوه بقى .
بعدين ياعم مش قر ولا حاجه انا لو عايزه اسافر امريكا واقعد هناك هسافر انت عارف ان امريكا زي اي بلد من بلاد المهجر ما دام رايح بفلوسك وانت اصلا شخص ناجح هايرحبوا بيك
خليك هناك يا حبيبى ربنا يهني سعيد بسعيده زي ما بيقولوا
اموت انا فى الامثال الشعبيه .

لكن هو امريكا فعلا فيها ميزه نسبيه للغرب انهم اصلا فى امريكا كلهم غرب وكلهم لهم اصول غير امريكيه وواخدين على كده اصلا فمن السهل انك تعيش وسطهم .

الا انى اساسا مش باحب عدم الترابط ده . وبالنسبه للمجتمع الاسباني انا اعرف فعلا ان طباعهم صعبه وحادين وسو هارد فى التعامل .

وبعدين انا ماشيه انا قاعده فى ام البلد دي لما نشوف اخرتها اييييييييييه معاهم .
وهاروح اكل بقى سمك