السبت، 15 مارس 2008

13- قوانين ستاتيه عجيبه

هييييييييه اخيرا جيت مشوار طويل اوي بس جيت يعنى فى الاخر . اخواني واحبائي وكتاكيتى الاعزاء بعد البوست الى فات والاحساس البشع من الرجاله الى قروه انهم مهضوم حقهم وانى انا متحيزه وباعطي دروس للستات ياكلوا دراع اجوازهم ازاي .
فقرر انى اشن حملى من الهجوم على بنى جنسي من باب تحسين العلاقه مع النوع الاخر عشان انتم عارفين ان جوزي بيقرا المدونه ومش عايزين بقى نعمل قلق عشان انتم عارفين ما حدش لاقي جواز الايام دي .
المهم هانرغي النهارده على السريع عشان فاضل ربع ساعه والمنبه يضرب وهايقوم يصلي ويسبنى .
وقبل ما ارغي احنا اتفقنا ان كل قاعده لها استثناء . مش عايزه دوشه حول الاستثناءات
هانرغي عن مجموعين قوانين كده ستاتيه عجيبه وغريبه فى اغلبها عدائيه شويتين .
عدائيه ؟؟؟؟؟ اه اه عادائيه ومتحفزه وبيعتبروها من الثوابت زي ايييييييييه ؟؟؟؟؟
* شوف يا عم حماتي دي عمرها ما هاتحبني وعلى رأي المثل ( لو الغله تيجى اد التبن الحمى تحب مرات الابن ) اه وعشان كده الواحد لازم يحرص منها من الاول وحبذا لو نبين لها العين الحمرا .
طب ليه كده ما تجربي الحلول السلميه الاول ما يمكن تطلع ست لطيفه وتحبك وتحبيها او حتى تعيشوا فى سلام نسبي ؟؟؟ واكرمي فيها زوجك يا ستى .
* سلفتي ؟؟؟؟ يا باااااي اكيد بتغير مني ومش طايقاني هى يعنى هاتحبنى ليه ولا تحبلي الخير ليه ده حتى بيقولوا ( مركب الضراير سارت ومركب السلايف غارت ).
طب ليييييه يا ماما هو قانون يعنى ان السلايف يكرهوا بعض ؟؟؟تخيلوا وصلت ان مره حماتي عشان باقول لسلفتى بهزرا يا سلفتي تقولي ما تقوليش سلفتك كلكم اخوات الحمد لله . كأن الكلمه دي تنم عن عداء وضغينه ساحقه .
* لا ما هو ما دام اتجوزتي لازم تنسي الدلع وتنسي الخروج واعرفي ان ايامك فى الدنيا بعد كده عذاب وشقاء .
طب ليه كده طيب هو انتى رايحه معركه حربيه عادي ممكن تعدي عليكى اوقات صعبه لكن هاتعدي وتفضي وتروقي وكل حاجه ايه السوداويه دي .
* أنتى مخطوبه ؟؟؟ طيب يا اختي عايزه تتجوزي ليه انتى بتعيشى احلى ايام حياتك عيشيها على مهلك بكره تتجوزي يعنى الى اتجوزوا خدوا ايه ؟؟؟
طب ليييييييه يا امي كده يا ربي حد عارف الغيب ما يمكن الى جاي يكون احسن واسعد ما تسيبى البنيه تتعشم فى الخير
* الناس كلها باصينلي وحاسدينى مش عارفه على ايه مع ان فلان ده عنده وفلان عنده وفلان عنده وانا بس الى باتحسد.
طبعا فلان وفلان المذكورين اعلاه ماتوا مفلسين فى ظروف غامضه . وطبعااااا هما من قرايب جوزها ( جابهة الاعداء).
* ده فوق العاده الوحشه اوي بجد عند اغلب الستات فى تنغيص حياة الاخرين والتدخل الشنيع فى حياتهم . زي مثلا انتى ازاي ساكته لجوزك ده ؟؟؟ قوليه كذا وقوليله كذا .
عمري ما شوفت واحده بتقول كلمه عدله ولا كلمة حق لصاحبتها ولا اختها ولا بنتها ( الا قليلا طبعا )
* العاده التانيه الاشنع الكيل بمكيالين . فى حاجات كتير اوي اوي اوي . يعنى نفس الموقف تحكم فيه بحكمين مختلفتين باختلاف الاشخاص مثلا .
( زي مثلا ان بنتها من حقها تزور اهلها مرتين فى الاسبوع انما مرات ابنها لو راحت مره واحده يبقى مالوش لازمه تقطيع السكك رايح جاي )
* التفاخر والتقليد وتحت الاثنين دول حطوا مليووووووووون خط
أمنية حياتي الاقي عند الجميع مش الستات بس افتراض حسن النيه مع ا لناس اولا واذا ثبت يا ستي عكس ذلك ابقى اتبعي ما يحلوا لك (بس من غير سكاكين ) لكن الاول جربي حسن النيه بلاش التحفز مع الناس خصوصا اهل زوجك .
وعلى فكره يمكن عشان انا قلت كام مثل شعبي تقولوا ان الكلام الى انا قلته كان زمان وعلى مستوى الناس البسيطه فى العلم والثقافه .
انما الحقيقه بجد هى لا . هو موجود على جميع المستويات مع اختلاف الطريقه الى بتتحسب بها العداوه والتحفز مش لازم يكونوا حافظين الامثال دي الا انهم بينفذوها بجد تقريبا ده استعداد وراثي ( مسألة جينات مساكين مالهمش ذنب ).
اي واحده فيكم هاتزقل طوب تستصغر الطوبه الى هاتزقل طوبه كبيره هاعرفهااااااااا .
والمنبه ضرب خلااااااااااااص

هناك 14 تعليقًا:

Anonymous يقول...

السلام عليكم

أنا أول واحد يرد على الموضوع لازم أخد ربع دنيه ولا حاجة

المهم تسلم إيدك يا صبرني وفعلا الستات بيحطوا حاجة في دماغتهم الحاجة دي مش بتطلع ولو بال00000

مش مهم الأهم أنهم يا رب يستفيدوا من الكلام بتاعك ده

وبمناسبة الستات اللي بيتكلموا وحش على أجوازهم

افتكرت موقف مش ظريف كنت رايح مرة أعمل عملية إزالة عصب من ضرسي

كانت الحكاية نفسها مضايقاني ومتهيألي أن الدكتور أو الدكتورة اللي هيشيلي العصب هيبقى متوحش وما عندوش قلب

المهم والدي سمع وجهة نظري وأقنعني أني أروح بعد عذاب وإكراما ليه روحت لوحدي ما رضتش أنه يجي معايا

المهم دخلت العيادة كان فيها دكتورة وممرضة
بدأوا يشتغلوا على ضرس العبد لله
العملية خدت تقريبا ساعة إلا ربع

طول الفترة دي الممرضة بتحكي عن جوزها وغباؤه كل ده عشان طلب يستلف عربيتها لأن عربيته عطلانة

المهم والأخت الدكتورة تشعللها وتقولها هو فاكرك إيه ومش فاكرك إيه

ولوك لوك لوك من بتاع الستات

وانا طبعا مخروس مش بقول حاجة

ولما روحت البيت والدي بيقولي عرفت يا ابني أن الأطباء ملايكة أهم ساعدوك وما بقتش بتشتكي من حاجة

قولتله طبعا يابابا دول ناس ملايكة خالص ملايكة موت

الشاهد من الموضوع
ليه الست مش بتفتكر لجوزهاإلا الحاجة المنيلة بس
مش بتفتكر الحاجة الحلوة

ربنا يهدي كل الستات

ونصيحتي لكل راجل يحط جهاز تنصت في هدوم مراته ولو قالت حاجة غلط

يقولها روحي وأنتي 000000


التوقيع /// THE WHITE KNIGHT

خمسة فضفضة يقول...

السلام عليكم ورحمة الله وبركاته

ماشاء الله هو ده صوت العقل والرزانه اللي علي حق
ياريت كل واده تقرأ الكلام ده تعمل بيه
كانت هاتريح وتستريح


تحياتي

صبرني يارب يقول...

فضفضه نورتييييييييييييييييييييي جدااااااااااااااااااااا المدونه صاحبتها والله .

وشكرا لك ربنا يكرمك وكل سنه وانتى طيبه كمان مره يا جميل

صبرني يارب يقول...

وايت نايت

وعليكم السلام يا وايت دخلت برجلك اليمين ولا لاء ؟
وبعدين ايه عملية ازالة عصب دي ؟؟

عشان تعرفوا ان الرجاله دول ما بيصدقوا حاجه يصعب عليهم نفسهم بصوا بيتكلم عن الموضوع ازاي كأنه فاجعه انا لحد الان شايله يجي نص دستة اعصاب من ضروسي واخر واحد شايلاه بقاله يجى 3 شهور ومش عارفه اروح اعمل اخر جلسه

وايه الممرضه دي كان حقها اكلت دراعه ما دام عايز ياخد عربيتها .
ولو ان برضه يمكن الموضوع له وجه تااااااني مايمكن هو الى بدأ مثلا وما كانش بيرضى يسلفها عربيته برضه ؟؟؟؟؟؟؟
لكن طبعا في رايي عيب اوي اوي واحده تتكلم عن جوزها وحش لاي سبب من الاسباب حتى لو مع اقرب حد لها.
شكرا وااااااايت

المـــفـــــــقــــــــوعـــــة مــرارتـهــا يقول...

علي فكرة موضوع التحفز للحما ده مش في بالي خالص علي فكرة
انا قبل الجوازكنت متحفزة عشان احب حماتي لكن بعد الجواز لقيتها هي اللي حطاني في دماغها ومعتبراني ضرة موش بنتها
انا لسة ماليش سلفة بس اخو جوزي بيعتبرنيس اخته ودايماً بيقف في صفي
يارب يتجوز واحدة تحبني عشان الاقي واحدة تحس بيا

صبرني يارب يقول...

يا مفقوعه انتى نورتي المدونه اولا

لكن انا على فكره عذراكي ومش شايفاكي متحفزه ولا حاجه انتى صعبانه عليه عشان الى حالها زي حماتك بيبقى صعب اوي لانها فعلا حاسه انك خدتى منها حياتهاكلها .

ويارب تبقى سلفتك كويس ياااااااب
انا ليا سلايف كتير ما تعديش
وعلاقتى بهم كلهم كويسه بصرف النظر عن اختلاف وجهات النظر .
منهم الى قريب لنفسي اكتر شويه
وربنا يوفقك يا مفقوعه ويصبرك
على فكره انا شلت المراره من 4 سنين مش هايلاقوا حاجه يفقعوهالي

بت خيخة وأي كلام يقول...

والله يا ام مريم
كلامك فيه شء من الصحة
حكاية ان الواحد يكيل بمكيالين دى بصراحة ممكن الكل يقع فيها
انا نفسى ساعات اقع فيها
باقى الحاجات محصلتش معايا فبالتالى مش هاعرف اعلق
بس بالنسبة لموضوع ان الواحدة تكون مخطوبة والناس تقولها عايزة تتجوزى ليه انتى بتعيشى اجمل ايامك والكلام ده
هما بيقلوه لان معروف طبعا ان الجواز مسؤلية بنت كلب ومش كله دلع وفرفشة زى ماكتير فاكرين

وماعتقدش انهم بيقولوا كدة علشان هما وحشين من جواهم
هما بس مش عارفين يعبروا بجد عن مدى مسؤلية الجواز اللى هتخلى تفكير الناس تتغير
الواحدة وهى مخطوبة احلامها بتكون وردى وبتفكر فى عش الزوجية والوان الستاير والحاجات دى
لكن اول ما تتجوز بيفكروا فى ديون الجواز وبعد كدة الست تبقى حامل يفكروا فى الضيف اللى جاى وازاى هيربوه وازاى هيعلموه
و و و و
ولو الست مش حامل ولا عدى عليها سنة من غير حمل
يعيشوا فى دوامة الدكاترة و و و
يعنى حياة تانية خالص بتقابلهم
مهمها كانت حلوة فهى مش هتيجى بحلاوة ايام الخطوبة

كفاية عليكى كدة
سلام اختك خيخة

صبرني يارب يقول...

خيخه يا حياتي منوراني

ابقى فكرينى اعرف منك عيد ميلادك عشان ابعتلك هديه عظيمه .... مبرد حدادي .... اه اه هو ده عشان عندك ربع متر كده فى لسانك ناخدهولك ههههههههههههههههه

انا مش معاكي خالص ان الجواز مسؤليه بنت الهوهو دي لا هو مسؤليه كبيره فعلا وعظيمه بس مش وحشه اوي هى متعبه بس لها متعتها.
الواحد عشان يلعب مثلا انشاله ماتش كوره شراب بيتعب جدا بس بيكون استمتع
نفس الحكايه الجواز مسؤليه كبيره اوي وصعبه اوي بس فى نفس الوقت جميله اوي
وبعدين انا ضد ان البنات والشباب يكونوا قبل الجواز بدون مسؤليه اصلا
ومين قال ان الخطوبه عشان ينقوا الستاير؟؟
مش عارفه انا كانت الخطوبه بتاعتي مختلفه شويه بتهيئلي اخر حاجه فاكراها قبل ما اتجوز اننا كنا بنعمل الكهربا بتاعة شقتي وكنت انا بليه على فكره هههههههههههههههههههههه
هابقى احكيلكم الموضوع ده بعدين
وبعدين انا مش معاكي خااااااااااالص انا قابلتنى ايام كتير بعد الجواز احلى من ايام الخطوبه وعشمي دايما فى ربنا انه يكون في احلى مش عارفه ربنا شايلي ايه طبعا بس اهو متعشمه بقى وخلاص
وأنا معترضه على الناس الى بتتكلم كده عن الجواز لانها بتسودها تماما وبتتكلم من ناحية تانيه كمان غير المسؤليه هانبقى نقول الكلام ده بقى فى بوست لوحده .
ثاااااااانكس يا خيخه نورتي

ahmed_k يقول...

الحمد لله وشهد شاهد من اهله فعلا الستات التعامل معاهم صعب وربنا يعين الرجاله يشيهلوا الهم قبل الجواز عشان يتجوزوا ويشيلوا الهم بعد الجواز كمان ربنا معانا

صبرني يارب يقول...

استاذنا احمد

الهم موجود قبل الجواز وبعد الجواز
وبصراحه انا ضد وصف الزواج دايما بأنه هم .
هو مسؤليه كبيره بس مسؤليه حلوه
بنتعب اه بس ساعات بيكون فى تعب حلو

وربنا يعين الرجاله على الستات
ويعين الستات على الرجاله برضه

ahmed_k يقول...

انا كنت بهزر معاكي بس ولكني مقتنع بردك تماما ويا ريت كل الهموم زي هم الجواز لو اعتبرنا انه هم وهو مش كده طبعا والسلام ختام

صبرني يارب يقول...

انا عارفه بس انت عارف باتلكك عشان اتكلم في اي موضوع واقول رايي فيه خصوصا انى في بعض نقط معينه ما باصدق اتكلم فيها نوووووووورت

Anonymous يقول...

مساء الخير أو صباحه
لا يا أم خالد بعتزر دخول المدونة دي للي مثلي معناه ضياع مستقبل بصراحة حروفها منظومة بطريقة ميزة وبتسحب الواحد من غير ما يشعر سواء مع المشاركة أو التعليقات يعني كده مش هنشتغل هنقرأ بس وفي النهاية هشوف نفسي صغير خالص عن اني ارد على العمالقة ربنا يوفقك فعلا اسلوب رائع وعلى فكرة اسلوبك أدبي ولازم تهتمي بكل حرف بتكتبيه وتدونيه في أرشيف وأنا واثق هيكون لك شأن عظيم الاسلوب مميز والفكرة فعلا بتعالج مشكلات عظيمة تعاني منها الأسرة المصرية.

صبرني يارب يقول...

الغير معرف ؟؟؟

مش عارفه ليه حاسه انك الاستاذ صالح
هو الى بيرفع من معنوياتي كده دايما

لكن انا متشكره اوي اوي على الكلام الكبير ده بس انا غلبانه يا استاذنا مش كده اصل اصدق نفسي
وشكرا لك ونورت