الثلاثاء، 25 مارس 2008

16 - اسبوع هاديء جدااااا

السلام عليكم يا اهل الله يا الى هنا . مش عارفه اكتب شوفلكم حل فى الموضوع ده الاكتئاب عمال يستفحل فى مخي والهام مش معبراني باين عليها مكتئبه زيي .
واصلا بقالي كام يوم بالعافيه بادخل ابص هنا وارد بسرعه على اي حد واطلع اجري بتهئلي انا كده بقالي اسبوع باين . ما علينااااا اهي اياااااام .
بصوا اناهاحكيلكم على الى جرالي فى الاسبوع الى فات عشان كانت ايام لطيفه بصراحه .
نبدأ من اول يوم الاربعاء الماضي :
كان يوم لطيف جدا من بدايته بتهيئلي كان يوم عادي مدارس ومذاكره وما الى ذلك وصويت قدام ولادي عشان يناموا شويه العصر عشان بالليل عندنا فرح .ايوه فرح لسه فى ناس بتتجوز . بس دي كانت خطوبه عوائليه كده يعنى ،ابن اخت رضا . ا لمهم بدأنا رحلة العذاب وتلبيس العيال ساعه خناق على اللبس عشان مش عاجبهم رايي ومش عاجبنى رايهم . وبعدين ساعه تانيه زيها اختيار التسريحه ونفس خلاف وجهات النظر الى فات . المهم روحنا الفرح وزي ما قلتلكم كده اتفرست هناك من الى شوفته بس عادي حال كل الافراح .
اخر الليل ختمت بحاجه مش حلوه ان اخو رضا تعب جامد واخدنا وروحناه جري وكان حالته صعبه الله يشفيه ودمنا نشف والحمد لله ورجعنا البيت الساعه واحده تقريبا ونمنا مقتولين .
الى بععععععععععده يوم الخميس :
ده بقى كان يوم عظيم الشأن اي والله . طبعا ده كان يوم المولد النبى الشريف كل سنه وانتم طيبين صحيت الصبح على الساعه 10 كان عندي ميعاد جلسة علاج طبيعى( هابقى احكيلكم عليها بعدين ) روحت وجيت بدأت الشغل لان ماما كانت عازمانا واختي طبعا على الغدا يوم الخميس زي كل خميس بس يعنى الخميس ده وصايه شويه عشان المولد النبوي وعيد الام . وكمان لان برضه حماتي عازمانا يوم الجمعه وطلبت مني صنيتين مكرونه بالبشاميل بالحجم العائلي . المهم خلص الشغل وكلنا بحمد الله .
وبعدين اختي الله يصلح حالها خدت ولادي وراحوا يجبولي هدية عيد الام فتحوا الحصلات بقى وجابولي هدايا عظيمه جدا والاهم من كده انهم اشتروها فى يجى ساعتين كده وده فى حد ذاته هديه حلوه اوي .
بعدين كلمت حماتي قالتلى انهم بيعملوا محشي وقالتلى ما تيجى عشان تاخدي كمان الديك الرومي تسويه عندك قلنا ماشي لميت العيال وروحنا وعملنا شويه فى المحشي وانسحبت رغم انف الى مش عاجبهم انسحابي . ورجعت بقى سويت اسم الله عليه الديك شويه قبل ما انام . المهم نمت على الساعه 6 صباحا تقريبا .

نيجى بقى لليوم الوسطاني الى هو الجميل بتاع الاسبوع كله : صحيت مفزوعه من النوم الساعه واحده على رساله من صاحبتي بتعيد عليا على اعتبار انى ام يعنى . وجرييييييييت عشان راحت عليا نومه وقفلت المنبه حتى رضا نزل الصلاه ومش صحاني .
جري ورا جري ورا جري واخيرررررررررا الساعه 2 كده قدرت ابطل جري شويه واروح اغسل وشي واتوضا واصلي . وبعدين رجعت اجري تاني . وعلى الساعه 5 كان الاكل خلص وبرد شويه وخدناااااااه ولميت العيال وخدت النمليه معايا وروحنا كلنا ايييييييييه بقى الى حصلنا ؟؟؟؟؟
دخلنا ركنا العربيه وبعدين كان قدمنا عربية اخو رضا قلتله لو مامتك بصت من الشباك هاتقطعكوا عشان راكنين ورا بعض كده . قالي خليها على الله بقى نروح فين يعنى . لقينا واحد من الشباب الصغنن نازل يقول اطلعوا وما تجبوش حاجه اصل خطيبة عمو مغمى عليها . استر ياااااااارب . طلعت ابص للبنت لقيتها مش مغمى عليها دي عندها حالة تشنج . بعد ما لقيت البيت كله فيه حوالي 30 روح بيعيط وفى واحده فى اوضه تانيه بفقوا فيها من الخضه . الحمد لله البنت غمضت عنيها وراحت التشنيجه . روحت قلتلهم يا قوووووووووووووم فااااقت وردت علينا اهدوا بقى . بس نص البيت تقريبا اغمى عليه . من هول الصدمه حقيقى مش هزار .
لان البنت كانت بتموت فى اديهم حالة تشنج ونيموها على ظهرها وده غلط كانت هاتبلع لسانها وازرقت وموال كبير كبير كبير .
جبنا الدكتور شافها قام خرجنا الى كانوا بيفوقوها بالصلاه على النبى رجاله قلبها جامد مووووووووت اغمى عليهم برررررررضه والدكتور بقى مش ملاحق يفوق مين ولا يعمل ايه وقعدنا فى الموال ده بس نفوق الناس الى اغمى عليها من فرط الانفعال والخوف يجى ساعتين .
وطبعا اهل البنت جم واترعبوا عليها ( بس الحمد لله بعد كم هائل من الفحوصات قالولها ما عنديش حاجه ) فيظهر انها كانت عين وصابتها ورب العرش نجاها . الحمد لله
المهم اتغدينا مش عارفه امته يومها ولا عارفه كلنا ازاي اصلا . وبعدين ختمت الليله فى خلاف فى وجهات النظر مش حاد اوي بس بناء على فرسه من استهبال البشر لكن يبدوا ان موقفي كان حاد لكن ما حدش اتعور الحمد لله .
وانتهت بعقد النيه من حماتي بعدم عمل تتجمعات سياسيه كده تاني عشان الى حصلنا ده عين وصابتنا يا اخويا .
ومشينا من هناك طلعنا على بيت عمي الكبير عيد الام كل سنه وانتم طيبين . ورجعت البيت على الساعه 11 جاهدت اني افضل عايشه لحد ما انيم العيال وبعدين اخدت حمام سخن ومش فاكره حصلي ايه بعد كده لكن انا صحيت الصبح على صوت بنتى بتقولي ماما مش هانروح النادي ا لنهارده ؟؟؟؟؟؟؟؟؟؟

وده كان يوم السبت الجميل : كنت واعداهم اوديهم النادي يوم السبت مع اصحابهم واصحابهم اتصلوا يسألوا . لكن انا صحيت بقى لقيت عندي مغص كلوي قلت يا فتاح ياعليم يا رزاق يا كريم . طبعا قلت لها يا مريم قولي لها ان ماما تعبانه ومش قادره النهارده .
وبعد جهاد مع الالم شويه وانا باجهز الفطار اخدت حقنة مسكنه وعلى اخر النهار بقيت احسن لكن كان يوم فى مجمله هادييييييء جدا .
الاحد : يوم بررررررررضه لطيف بعد المدارس والسندوتشات والباصات وما الى ذلك . نمت شويه وصحيت علىالتليفون اخو رضا بيسأل عليه وهو مضطرب الصوت والاحاسيس .
أنا :خير يا ابنى. قالي :بتوع تنفيذ الاحكام جم اخدوا الواد الى شغال فى المحل !!!!!!!!
أنا: ايه ده لييييييه ؟؟؟ ( ده عيل اصلا عنده 16 سنه ) قال : مش عارف هما جم سألوا على صلاح اخويا قام الاخ ده اتبرع وقالهم انا صلاح خدوه هو ومش معاه بطاقه .
أنا : صلاح طب صلاح عليه احكام ايه ؟؟!!!!! والواد العبيط ده قال انا صلاح ليه . قالي : أنا عااااااارف مش فاهم حاجه فين رضا .
بصيت حواليا وما لقيتش الموبايل قلتله ده نزل كلمه بقى على الموبايل .
شويه وسمعت صوت رضا لسه بره جريت وقلتله على القصه ا ذبهل نفس اذبهلالي . وجري بسررررررعه راح قسم البوليس .
نص ساعه ولقيت مرات اخوه الى مطلوب القبض عليه جايه تجري وبتقولي صلاح قالي انزلي روحي لام مريم .
حكيت لها الى حصل وقلت لها ما تخافيش تلاقي مراته الاولانيه رافعه عليه قضية نفقه . ( طبعا ما كانش متجوز انا باهزر )

المهم بعد شويه اكتشفنا ان كان عنده قضيه من 3 سنين تبع المحل والرخص والمواويل دي وكانت خلصت وخد فيها براءه بس عشان احنا بلد متخلف زي ما انتم عارفين بيحصل فيه كده .وانتهى الموضوع على ذلك .
وبابا قالي انه حصله تقريبا نفس الموضوع وكان هايتسجن عشان ما دفعش رسوم اثنين جنيه ونص لان المحصل كسل يدور عليه بقى قام عمله امتناع وحجز وتبديد كمان على اثنين جنيه ونص بالصلاة على النبي .

وبعدين اتغدينا عند اخوه لاننا وسلفتي الصغنونه مرات الاخ المطلوب فى قضيه سياسيه ده انقضينا على سلفتنا الكبيره مش عارفه ليه بس زي ما تقول كده غلاسه الصغنونه كانت رايحه هناك وانا ما صدقت وشبط فيها عشاني بقالي شهر بانوي اروح ازورهم وانتهى اليوم الحمد لله نهااااااايه سعيده حتى بعد النقاش مع سلفتي الكبيره حول الخلاف فى وجهات النظر الى حصل يوم الجمعه والى كان سببه زي ما قلت انا على راي خلتى فرنسا ( نسوان شلت مش عارفه تربي ) .
باقي بقى امبارح ما حدش يسألنى عليه عشان انتهي بصويت وصريخ وعياط وشبه انهيار عصبي لعده اسباب مجتمعه اهمها انى بالعم خالد الحمام الايام دي وااااااااااااااااه ياااااااااااااااااني .
طبعا رغي فاضي كله مالوش اي لازمه لكن اهو بدل ما اتناقش فى حاجه شبه المود بتاعي دلوقتي واجيب لكم اكتئاب حاد مزمن . ولو مش عجبكم البوست ابقوا قوليلي من باب العلم بالشي ء مش هامسحه ولا كأنى سمعت حاجه عادي .
اه كنت عايز اخد رايكم فى حاجه . انا عندي شوية بحوثات كده صغنونه على اد علامي بحوثات اسلاميه ايه رايكم ابقى انزل منها فى المدونه هنا ؟؟؟ ولا نعملها مدونه مستقله ؟؟؟؟ ولا ما نكتبهاش خالص اصلا .
لا بس هى كبرت فى دماغي اكتبها على البلوج اختاروا بقى هنا ولا فى مدونه تانيه
واشوفكم على خير يا قطاقيط

هناك 10 تعليقات:

دكتور حر يقول...

وجبة قلق دسمه
وتعب محترمه

ربنا يعينك لكن عندي رأي

أكتبي أي حاجه في المدونة أي حاجه وأي مواضيع بس
مش تكون طويله قوي كده
وتكون ليها هدف واضح عندك
ومتختاريش أكبر خط غي الحجم

كل ده هيضفي على كلامك روح رائعه خاصة وان اسلوبك جميل

بس أفكرك انك ( صبرني يا رب)
ومتجوزه ((رضا))

يعني لازم تستحملي
:)

خايف من الحقيقة يقول...

ليه حاسس ان مراتي كتبت معاكي البوست ده
او على الاقل شلاكت في نظم ملحمه الذاب دي بنصيب كبييييييير
عموما الحمد لله ان احنا اتولدنا رجاله
وربنا معاكوا


ملحوظة الف شكر انو الخايف موجود ضمن قائمة مدوناتك المفضلة

Bongo يقول...

مدونة جميلة و هادئة اول مرة ازورها

و ان شاء الله مش الأخيرة

ربنا يوفقك يارب

و بخصوص بحوثات اسلامية فياريت تنزليها هنا علشان كلنا نستفيد منها

منتظرييييييين :)

تحياتي

صبرني يارب يقول...

دكتور حر

نورتنا اولا وبالنسبه لنصايحك
حكاية طول المواضيع ده مش بايدى والله اصل انا رغايه جدا فعلا بافتح مش بيعرفوا يقفلوني كده .

والهدف اعتقد انا تقريبا كل بوست كتبته كان له هدف الا البوست الاخير ده حقيقى مالوش اي هدف ومش عارفه انا كتبته ليه لكن اهو طلعت فى دماغي كده .
والخط الكبير ده بناءا على طلب الباشا رئيس الحكومه عندنا انت عارف بقى ما نقدرش نرفضله طلب بس نحاول نختار خير الامور الوسط .
وان كان على الاستحمال ادينا مستحملين وصابرين وبنقول الحمد لله فى كل وقت الحمد لله من قلبنا مش كلام والله
واسفه على الصداع الى سببته برغيي الكتير اوي ده

صبرني يارب يقول...

خايف من الحقيقه

كلنا هذه المرأه يا خايف والله واحنا غلابه ومساكين ( ما حدش يقول الحقيقه يا بنات)
ولا شكر على واجب يا خايف انا مش كاتباها مجامله هى فعلا مدونات كلها عاجباني

صبرني يارب يقول...

bongo

نورت المدونه وتنورها دايما وقتما تشاء
وشكرا على الاطراء
وبالنسبه للبحوث الاسلاميه

انا باقول انزلها فى مدونه منفرده ولا وسط البوستات هنا على مدونة ا لرغي

بصراحه انا مياله اعملها مدونه لواحدها لكن نسمع رايكم برضه افيدونا افادكم الله
واكرر للجميع اسفه على البوست الى كله رغي مالوش لازمه اعتبروني بافضي شحنات .
شكرا لبنجوا

واحدة مفروسة يقول...

ييييييييييييييييياخرااااااااابى
ايه يا بنتى...ده انتى احسن حاجه تعمليها انك ما تناميش ابدا من كتر الاحداث....وبتقولى عندك اكتئاب... امال اللى حياتهم فاضيه..يقولوا ايه....وبعدين معلش يعنى بدون قرر....هيه الديوك الرومى لسه بتتاكل....هى اتعالجت من البرد.. ااقصد الانفلوزة...هههههههه ربنا يعينك...والله .. و اكتبى اللى انتى عاوزاه..و احنا كمان لينا حق التعليق

صبرني يارب يقول...

مفروسه نورتي

انتى بتقولي فيها ؟؟ أنا فعلا بيجيى عليا ايام مش بانام خالص وبتسألي عندي اكتئاب ليه .
بصراحه هى عدة اسباب مجتمعه الحمد لله مش من ضمنهم الفراغ من اي نوع
لا فراغ وقت ولا اجتماعي ولا دينى ولا عاطفي ولا اي فراغ
يمكن عندي اكتئاب من العكس ؟؟!!!
انا باحمد ربنا فعلا ان حياتي مش فاضيه لان انا جربت الحياه الفاضيه الهاديه الرتيبه الى مافيهاش حد تقريبا أيام ما كنا متغربين .
واتمنيت صخب الحياه فى مصر لكن الصخب يا اختي طلع كتير وجامد اوي .
وبعدين الواحد على مر الاحداث دي بيشوف حاجات من الناس والدنيا تموت من الفرسه والاكتئاب ولله الحمد .

نيجى بقى للديك الروم. وربنا بعد ما كتبت البوست توقعت الكلام ده منكم .
ده حكايته حكايه يا بنتى ده متأمن عليه من اربع شهور فى تلاجة حماتي العزيزه . لانه كان جايلها فى صباحية ابنها . يعنى من اهل العروسه .
وهى اتحفظت عليه وقالت لا ممكن اكله لوحدي ابداااا لازم نجتمع على هذا لكن ولادها ما كانوش راضيين كلهم لانهم مكسلين يطبخوا .
وشكرا لك يا مفروسه وهاروح ادور وراكي اشوفك مفروسه ليه يا مفروسه .

Anonymous يقول...

السلام عليكم يا صبرني

يا بنتي احمدي ربنا انك لسه عايشة لحد دلوقتي

بيني وبينك الحاجات دي اي نعم بتطلع عين الواحد

بس هيا اللي بتحسسه انه لسه عايش

اسلوب حلو يا صبرني لطرح ايام من أيامنا الحلوة على رأي الناس

ربنا يقويكي يا رب يا اختي

التوقيع /// THE WHITE KNIGHT

صبرني يارب يقول...

الحمد لله يا وايت
والله انا باحمد ربنا طبعا ومش مضايقه لكن بابقى مضغوطه اوي نفسيها ومرهقه طبعا .

وفعلا ا لاحداث ساعات بتكون مطلوبه بس لما تكون كتير وورا بعضها ومستمره تبقى دمار شامل .
لان انا الايام الى زي الاسبوع ده بتتكرر كتير منفرده او مجتمعه عااااادي .
لكن لما كنت عايشه فى الامارات وكانت الحياه هاديه طبعا جدا كنت برضه بابقى مضايقه واشتاق لمصر واقول صخب الحياه فى مصر طعم تاني
بس يا اخويا الصخب جه جامد اوي اوي
نوووووورت ياوايت