الأربعاء، 26 مارس 2008

17- هما الناس مش لاقيين بعض ليه ؟؟؟؟؟؟!!!!!

السلام والتحيه على الناس المستخبيه
وبعد بالنسبه للبوست الى فات يا كتاكيت امسحوها فيا انا ما كانش ده يوم قررت احكيلكم فيه حواديت من غير هدف زهقت من الاهداف وكنت بافك دماغي واللُك فى الفاضي يعنى هي جت عليا انا . وبعدين انا ماليش دعوه انا قايلاكم من اول المدونه ان انا رغايه وباتكلم كتير والمدونه اصلا اسمها رغي وقد أُعذر من أَنذر .
نرغي بقى . دلوقتي انا بعد الخبره الطويله العريضه دي وسط البنى ادمين الكتير الى اعرفهم فى الدنيا دي . لاحظت ان الناس تايهين ومش لاقيين بعض . أه يعنى كلهم بيدوروا على بعض ومش عارفين يلاقوا بعض . ما حدش فاهم ؟؟؟!!!
طب ندي مثال (بيان على المعلم ) :
انا مثلا وجوزي بقالنا يجى سنه بندور على حد يشتغل معانا مش لاقيين . ومع ذلك اينما تذهب تلاقي ناس مش لاقيه شغل وقاعدين عاله على المجتمع . يبقى دول ايه ؟؟؟؟ اثنين بيدوروا على بعض مش لاقيين بعض .
اتكلمنا احنا عن البطاله الاختياريه قبل كده (المصطلح الى انا اخترعته ) وقلنا هما ليه مش لاقيين بعض .
الى لسه ما اتكلمناش فيه ومحتاج عرائظ طويله وعريضه هو ان الشباب والبنات هما كمان تايهين نفس التوهه دي .
يعنى انا كل ماحد يشوفني(مش عارفه ليه ) يقولي شوفلنا عروسه يا ام مريم كأن رئيس حزب عروسه لكل مواطن .
وبرضه اينما ذهبت الاقي بنات قاعدين مستنيين بن الحلال من كل الاعمار والطبقات . طب ايه ؟؟؟؟
الاقي واحده بتقول انا اهم حاجه عندي انه يكون علىدين وخلق بس ما لقيتش حد كده الناس بقت وحشه !!!!!
والتاني بيقول ما عادش فى بنات كويسين انا ما يهمنيش الى انها تكون واحده محترمه وعلى دين ومن اصل طيب وحتى مش مهم الجمال بس هى فييييين ده انا دايخ بقالي خمس سنين !!!!!!؟؟؟؟
الله ؟؟!؟!؟!!؟!؟!؟ طب ايه ؟؟؟؟؟ طب ماهما الاثنين بيدوروا على نفس الحاجه ا هو اخلاق ودين وكلام ولا احلى ولا اجمل من كده . طب ايه مالهم هما بيدوروا فين بالظبط ؟؟؟؟
طيب عشان نضيق نطاق البحث احنا هانتكلم عن الناس الصادقين مع نفسهم اولا ومعانا وفعلا عايزين الدين والاخلاق بس وطبعا يكون فى قبول نسبي . التانيين الى بيقولوا كلام بس وبيضحكوا على نفسهم دول ما لناش دعوه بيهم دلوقتي لانه فى فى دماغهم كتاكيت هانتكلم عنها مره تانيه .
طيب تفتكروا ايه سبب الناس الى مش لاقيه بعضها ؟؟؟؟؟
انا بعد فحص وتحميص(حلوه دي؟) ودراسه للطرفين اكتشفت حاجات كتير قد تكون مجتمعه او منفرده فى كل حاله منهم :
أولا : هى ان تكون اساسا مفهوم الاخلاق عند البنات غير مفهومها عند الشباب .
اه يعنى الشاب عايزه محجبه اه ومتدينه اه بس مش كئيبه ومعقده الدنيا وتصعب عليه حياته مثلا ةوهي صعبه خلقه والعكس كمان بالنسبه للبنت.( ده مثال قيسوا على كده حاجات كتير )
ثانيا :ان يكون كل واحد فيهم بيدور فى المكان الخطأ .
يعنى لما تكون عايزه واحده اخلاق ودين ما تروح تدور على واحده ــ بتعبير بلدي باحب اقوله عشان افوق المستهبلين ــ تمشي معاه سنتين ثلاثه وبعدين تستغرب هى ليه طلعت مش تمام ؟؟؟ وطبعا الواحده تبقى عشره وتقول ما عادش في بنات محترمين . ما انت الى رايح تدور على الدهب عند الحداد يا ابنى . وبعدين انت مستنيى ايه من واحده اقل ما يكون كذبت يجى مليون كذبه طول سنتين مثلا على اهلها بسبب علاقتها معاك ؟؟؟؟ تبقى هي ايه يعنى ؟؟؟؟
والعكس برضه بالنسبه للبنات ما تفكروش ان الشاب الى بيدخل فى علاقه حب مع بنت بدون صفه رسميه مش غلطان لا طبعا نفس درجة الخطا طبعا ولو ما كانش بيكذب على اهله كفايه انه لم يتقى الله فى بنات الناس واكيد هو كمان مش اهل للثقه منها .
اكيد لو دوروا فى مكان صح ودخلوا من الباب دوغري وقالوا توكلنا على الله ونعم بالله وكيلا هايلاقوا بعض من غير ما يبقى الجواز على السكين والمداق كمان ساعات .
ثالثا : انهم يكونوا بيدوروا اه بس وهما فى منتهى الرعب من الجواز وعايزين جرانتيه (يعنى ضمان كل واحد وعلامه بقى) ابدى ان الجوازه الى هايقدموا عليها دي هاتعيش العمر كله زي الجنيه الكاوتش .
طب ليه ؟؟؟؟؟ مافيش توكل على الله ليه ؟؟؟ احنا ناخد بالاسباب والتوفيق من عند ربنا . واحد يقولي طب افرضي انا اتجوزت واحده وكنت واخد بالاسباب وما اتوفقناش وطلعت جوازه اي كلام ؟؟؟؟ ابقى اعمل ايه ؟؟؟؟
مش عارفه ايه المشكله ابقى طلقها ياعم واتجوز غيرها انت هاتروح جهنم ولا هاتتجوز .
اوواحده تقولي افرضي التجوزت وطلعت جوازه ندامه ؟؟؟؟ على راي ماما القاعده فى الخزانه ولا الجوازه الندامه .
اقولها لا مالكيش دعوه بماما الخزانه دي للفراخ يا حلوه مش للبنات . اتقي الله وخدي بالاسباب واعملي ا لى عليكى ولو حبيتى تتراجعي فى اي مرحله عااااديتقدري .
تلاقي صوت اهبل من كل واحد فيهم يقولك ويبقى اسمي مطلقه ولا كنت مخطوبه ؟؟؟؟؟ ما انتم عارفين المجتمع.
اه ما احنا عارفينه عندهم كتاكيت فى مخهم مالكوش دعوه بهم لازم نغيرها ونرجع تاني للصح .
رابعا : تكون الاحوال الماديه مش تمام . طب وايه يعنى على اد لحافك مد رجليك . كانت جدتى الله يرحمها تقول حاجتين لما الواحد يبدأ فيهم ربنا يسهلهم الجواز والمباني وتعقب ودى حكمة ربنا عشان الدنيا تعمر . ( كانت عظيمه )
وبرضه عايزين نغير افكار المجتمع عن ان الى ما بيجيش قبل الجواز ما بيجيش تاني . لا كل حاجه بتيجى الحمد لله . بس انتم ما تركبوش على نفس العيال لو تقدروا على حاجه اعملوها ما تقدروش سبوهم يبدأوا حياتهم بس وبعدين يعينوا بعض .والله المستعان يا سيدى .
دي الحالات الاكثر شيوعا فى حالات تانيه كتير بقى مش هارغي فيها عشان الناس اتخنقت من الموضوعات الطويله بتاعتي .
لسه بقى فكروني نتكلم عن الكتاكيت التى تنموا داخل عقول المجتمع فى ناحية الزواج
واشوفكم على خير

هناك 30 تعليقًا:

فرنسا هانم يقول...

ياريت الناس كلها تسمع كلامك
وتبطل تغلى فى المهر والجهاز
انا اعرف جوازات كتير اتفشكلت بسبب المواضيع دى
تحياتى لرغيك
الجميل

Unique يقول...

هش هش

كتاكيت كتير في دماغي
انتي بتجيبي الرغي الفرز اول ده منين
اولا انا سعيدة جدا باكتشافي لمدونتك
الجميلة
بالنسبة للناس اللي بيدوروا على بعض
فاعتقد انهم مش ممكن يلاقوا بعض طول ما
احنا بنضحك على نفسنا وبنقول حاجة
ونعمل حاجة تانية

كتير جدا الاهل ممكن بيرسموا صورة للعريس غير اللي تناسب بنتهم وكمان البنت تطلب مواصفات غبر اللي على هوى اهلها وبعدين يفاجا العريس والعروسة انهم مش مناسبين لبعض حتى لو كانوا توهموا انهم اختاروا بعض .. كتاكييت .. كتاكييت

تحياتي ........

بت خيخة وأي كلام يقول...

ايوة انا معاكى فى موضوع ان الحياة لو ماستمرتش بينهم بما يرضى الله ما يطلقوا ويشوفوا حياة تانية وبلاش الكلام الفاضى من نوعية وهيبقى اسمى مطلقة؟
ولا هو انا بتجوز علشان اطلق
لا طبعا محدش بيتجوز النهاردة علشان يطلق بكرة
بس افرضوا يعنى ان حصلت مشاكل وكان الانفصال هو الحل ما ينفصلوا وبلاش يقعدوا فى ارابيز بعض وهما بينهم مشاكل مش هتتحل ابدا
علشان مايوصلوش انهم يكونوا كارهين بعض
ينفصلوا بكل ود واحترام احسن ما يعيشوا مع بعض وكل واحد فيهم مش طايق التانى او تكون النتيجة انهم يكرهوا بعض جدا وينفصلوا بالمحاكم وقضايا وبلاوى زرقا


والنبى يا ام مريم عندى عروستين ياختى واحدة تلاتة وتلاتين وواحدة واحد وتلاتين
معندكيش عرسان مناسبة
دول اللى انا مستعجلة عليهم اوى
وعندى كمان من 22 وانتى طالعةلحد 26
لو عندك عرسان مناسبة والنبى ادينى خبر
علشان خلاص البنات دى هتتجوز على روحها
عايزة استرهم

تحياتى ليكى
اختك خيخة

بت خيخة وأي كلام يقول...

اه صحيح
ايه حكاية العلاج الطبيعى وحكاية الحقنة المسكنة دى
لو تعبانة قولى علشان ندعيلك بالشفا
مش تعبانة قولى برضه علشان نوفر الدعوة لحد تانى محتاجها

تحياتى ليكى والف سلامة عليكى
اختك خيخة

صبرني يارب يقول...

فرنستي بحالها يا ولاد

المشكله مش مشكلة مهر والله يا فرنسا بس.
انتى عارفه ان الناس بقت تغالي فى المهر يعنى الطلبات من العريس عموما وكمان بقوا يغالوا على نفسهم ؟؟؟
يعنى بيجهد نفسه فوق طاقته وفوق حاجة العروسه اصلاااااا عشان يجهز بنته بجهاز زي فلانه وزي علانه .
ويخليها تبدأ حيث انتهى الاخرون
لازم يكوت البوتجاز 5 شعله اخر حاجه
وتكون التلاجه 18 قدم على الاقل
وتكون الغساله 18 برنامج مش 14 مع ان مافيش فرق تقريبا .
وتكون السجاجيد مش عارفه ايه
واطقم كاسات وشربات وخشاف وصينى وبايركس واركوبال وبلااااااااااوي
ويقولك اجهز البنت . ويدين ويبيع هدومه كمان .

مع ان الموضوع ابسط واجمل من كده بكتير

هابقى احكيلكم عن جوازتي عشان ما تقولوش انى باتكلم بس ومش باطبق
شكرا لك فرنسا

Anonymous يقول...

السلام عليكم,,

الكلام كلام خبرة بصحيح.. وبيحصل فى الواقع.... مش الكل لكن الاغلبية بيعمل او بيتعامل بنفس الاسلوب


نقول ان الدين وما حدده الشرع هو المنهاج والطريق الاساسى

واهى دنيا فانية...

السلام عليكم..

Anonymous يقول...

السلام عليكم,,

الكلام كلام خبرات بصحيح

بيحصل طبعا الاغلبية بتعمل كده

نرجع ونقول خليك مع الشرع ...هو المنهاج والطريق الاسلم

اهى دنيا فانية

السلام عليكم

صبرني يارب يقول...

unipue
يا حبيتى انا الى سعيده انك نورتيها هنا

عجببتنى اوي حكاية الفرز اول دي وقعدت اضحك انا والبج بوس كان بيقرا معايا كمان

واتفق معاكي فى كلامك تماما

صبرني يارب يقول...

خوختي الجميله

بصي يا ستى حكاية الطلاق دي هبل مجتمعي طبعا واتفق معاكي فى كلامك كله

اما بقى انك عايزه عرسان دي فمش عارفه بصراحه اعمل ايه
بافكر اسس جمعيه اجوز فيها الناس

وعلى فكره انا بقى عندي كوكتيل عرايس اكتر من الكوكتيل بتاعك بكتييييييييير
انا عندي بنتين واحده 38 انسه والتانيه 37 مطلقه
هاموت انا واجوزهم

ده غير بقى كوتكيل عام من جميل الاعمار يااختي اي خدمه يعنى
بس انتى من القاهره لو اي حد عدى عليا من حداكم هاقولك .


والحقنه المسكنه يا اختي كان عندي مغص كلوي مش عارفه ليه بس عدت خلاص فى امان الله
والجلسات دي جلسات ابر صينيه تخسيس

لكن ان كان عل الدعاوي ادعي يا اختي من قلبببببك
الا انا كنت عند دكتو السنان امبارح مش قادره اعدلك هو حشالي كام ضرس عشان كتير اوي يا امي خلاص انا تقريبا قربت اركب طقم

صبرني يارب يقول...

غير معرف
والى اعتقد انه الاخ محمد ابراهيم

شكرا لك ونورت واه هى دنيا فانيه
بس اعمل لدنياك كأنك تعيش ابدا واعمل لاخرتك كأنك تموت غدا
وشكرا ونورت

Anonymous يقول...

السلام عليكم بالنسبه للباحثين عن زوجات بشروط معينه افول لهمان الله جمع الخلق جميعا كارواح واشهدهم الست بربكم قالوا بلى - اذا فكل مخلوق مقدر من الأزل فمعلوم بالتالي آبآئه وبالنتيجه معلوم من الأزل طرفا الزواج الى الأبد فلا تتعب نفسك فاللتي قدرها الله لك ستتزوجها وقد تكون مغايره تماما لما اشترطت من شروط ونفس الحديث للفتيات بالعكس ومن هنا فعلي كل شخص ان يرتاح ويسلم الأمر لله ويبدا بنيه صافيه واليتاكد ان الله لن يخذله مع خالص تحياتي ام مريم والسلام ختام

واحدة مفروسة يقول...

تصدقى عندك حق فى كل كلمه قلتيها
انا مش حعلق على الجواز انا حعلق على الشغل....فيه شغل كتير و بالهبل فى البلد .. بس احنا من سلالة الفراعنة.. الناس عاوزة تبدأ من فوق مش تطلع السلم واحده واحده...

صبرني يارب يقول...

غير معرف

والله يااخي الفاضل هى ازمة ايمان بالدرجه الاولى فعلا .
وشكرا لك نورت

صبرني يارب يقول...

مفروسه

بصي اكتر حاجه مضايقاني من الناس حكاية الشغل دي
يمكن عشان احنا عندنا مشكله حقيقيه مش لاقين حد كويس يشغل معانا
ماحدش عند يا ولاد الحلال حد عايز يشتغل ؟؟؟


شكرا يا مفروسه ونورتي

المـــفـــــــقــــــــوعـــــة مــرارتـهــا يقول...

انتي ناقشتي المشكلة وجيبتيها من الحتة الصح ... مش لاقييين بعض
انا نفسي نعمل مدونة علي النت نوفق فيها راسين في الحلال بس للأسف الشباب وأستهتاره بيخلي المشكلة عويصة
ربنا يعترهم في بعض ياحبيبتي
تحياتي لكي ولموضوعك ... هاأتابع الحلقات النقاشية بعون الله

صبرني يارب يقول...

تسلمى يا مفقوعه يارب
وعلى فكره انا بجد فكرت فى حكاية انى اعمل مكان اوفق فيه بين الناس بس المشكله انه صعب اوي لانك مش هاتضمنى جدية الناس الى فيه
بالاضافه ان الناس للاسف بيعتبروه مكان عشان يصطادوا بنات يكلموهم على النت

ولو ظهرت بارقة امل انى اعمل كده بس يكون تحت اشراف دقيق منى ان الموضوع يا اما يوصل للجواز يا اما الى لا شيء مافيش فى النص

انا مستعده والى عنده افكار يقولي

Anonymous يقول...

أختى الفاضلة /أم مريم
فكرة جميلة أن تجمعى بين اثنين و لكن الأهم جديتهم فى ذلك .فى الدستور أتابع
قرية فى الصعيد بدأت حرب على المغالاة فى المهور و الشبكة و الجهاز و لقد نجحوا فى تزويج الشباب فى القرية بعد توقف دام طويلا لأرتفاع أثمان الذهب و الأجهزة ،و عملوا نظام بخمسة الاف جنيه على العريس و مثله على أهل العروس و ببساطة شديدة نجحوا يا ليت هذة الفكرة تعمم على مستوى مصر.
سعيدا أنى تعرفت بمدونتك و لك كل الاحترام و التحية.
أبو خالد

صبرني يارب يقول...

ابو خالد

على فكره انا هايحسدوني كده الناس انا هاضطر احط المعوذتين على باب المدونه .

عشان انا لسه بادأه اكتب اول امبارح يادوب فى كي جي وان كتابه هنا
وبيعلق عندي ناس وجودهم هنا كتير عليا والله .

شرفت ونورت يا ابو خالد قبل ما اقول اي حاجه وكل الى بجد اسعدوني بوجودهم .

صحيح حضرت اول مره اشوف هنا بس انا باشوف ردودك فى المدونات على البلوك ومتبعاها كمان .

وعلى فكره انا كمان ام خالد برضه .

وبالنسبه للفكره بتاعة الصعيد دي ياريت والله انا ما عنديش اي مانع فى المساعده باي شي والله
والله المستعان

Liberal Muslim يقول...

اه جدتك كانت عظيمه عظيمه اعظم عظمات الستات :)


بجد اللي ملاحظه ان الواحد لما ينوي يتجوز بجد ربنا بيوفقه وبيلاقي كل حاجه ماشيه بسهوله ويسر غريب .

انا كان ليا واحد صاحبي كان كل ما يشوف واحده يقول هي دي (فرسة أحلامي) المهم بعد ما يسأل عليها وتطلع بنت كويسه وكده يتراجع عشان العين بصره والإيد قصيره (ماكنش علي فكره بتاع انه يمشي مع البنت وكده هو كان عايز يتجوز بس خايف)
المهم يعني أخر مره قال علي واحده انها فرسة أحلامه إحنا (أصحابه يعني) جمعنا بعض وفضلنا نقنعه انه يتقدملها ويخلص بقي (عشان وجع الدماغ اللي معيشنا فيه ... إنتوا عارفين يعني ومش محتاج اشرح) المهم يعني اتقدم وبعد الروئية الشرعية علي طول لقي وظيفة بضعف مرتبه القديم .... ولقي شقة بايجار معقول ... والموضوع ماخدش كام شهر وما شاء الله عنده أحمد دلوقتي .


أنا عارف ان الموضوع اللي كاتباه يا أم مريم عن الناس اللي مش لاقيين بعض بس انا حبيت اكتب في النقطة دي بالذات عشان اغلب الشباب مش قادرين يتجوزوا بس والله لو توكلوا علي الله كل حاجه هتتسهل .

بلوجاتي يقول...

اللي عايز عروسة محترمة وبنت ناس و جمال متوسط أنا عندي


على فكرة انا مرة اتقدمت لواحدة معايا بتدرب في الصيدلية واتهربت من الموضوع , سلطت عليعا دكتورة كبيرة تقأررها عرفت انها رفضتني عشان دخلت دوغري او حسب كلامها (انا أهم حاجة عندي الداخلة )

أما حكاية الناس مش لاقية بعض فدي عن تجربة طويلة في البحث عن زوجة قسمة ونصيب بجد
كل واحد مكتوبله واحدة بعينها مش هيقدر يتجوز واحدة تانية مهمان عمل !؟ وتحياتي

صبرني يارب يقول...

كلامك صح يا وائل فعلا
وعلى فكره انا فعلا رايي ان تيته الله يرحمها كانت ست عظيمه جدا جدا جدا .
كنت باحبها اوي اوي ومن اكتر الشخصيات الى اثرت فيا ايجابيا فى حياتي. رغم انها ماتت وانا عندي 16 سنه بس .
المهم
انا موضوعي اه عن الناس الى مش لاقيه بعضها لكن انا قلت ان في الموضوع ان فعلا الناس خايفه تتجوز لاسباب كتير كتير .
ومنها انهم مش متوكلين على الله فعلا وكويس الى عملتوه فى صاحبكم ده كملوا على باقي الشعب يلا .
نورت

صبرني يارب يقول...

بولجاتي

الاول خطوع عزيزه ونورت

حكاية انك عندك عروسه دي للي عايز انا مش عايزه بصراحه انا عندي كتير
الى عايز يجري على بلوجاتي

واما بقى الاخت الى انت بتقول عليها بتاعة الداخله دي . مخها تعبان ده عادي دول متوفرين .

وانا متفقه معاك انه قسمه ونصيب لكن برضه هما مش لاقيين بعض .
مش عشان هما مجبرين على التوهان اه هو نصيبهم . لكن النصيب مش معناه نقعد ايدنا على خدنا نستنى الحل يجي من السما .
لازم نسعى ونتوكل على الله الاثنين مع بعض مش حاجه واحده منهم .
واه كل واحد مكتوبله واحده لكن مش معنى كده انه ينام فى بيتهم يستناها تهبط عليه من السماء .
بالظبط زي مبدأ انا ليا معاد اموت فيه يبقى ممكن ارمي نفسي تحت القطر ولو ليا عمر هاطلع صاحي ؟؟؟؟!!!!1

نووووووورت بلوجاتي ودايما تنور يارب

Anonymous يقول...

أختى الفاضلة/أم خالد
جزاك الله كل خير و بارك الله فى عمرك على الحفاوة بتعليقى و الله أدمعت عينى .
بالعكس أختى الكريمة عظمة مدونتك أنها إيجابية و محاولة جيدة لحل مشاكل الشباب أولادنا و فلذات أكبادنا تصورى شاب فى مقتبل العمر عفيف مطلوب منه شقة و جهاز و شبكة بما يوازى ثمانون الف جنيه و هو لازال يبدأ الحياة..
أختى العزيزة/أم مريم علشان مريم متزعلش - ربنا يوفقك فى هذه التجربة.
و أخيرا لكى عظيم تحياتى و أمنياتى بحياة سعيدة مطمئنة.
أبو خالد

صبرني يارب يقول...

شكرا يا ابو خالد ومن قلبي الترحيب والله
وغير دموع الفرح ما تشوف عنيك يارب

وشكرا لك وربنا يكرمك

mayada يقول...

وسع وسع
انا جايه اتخانق محدش يحوشني
ازيك ياصبرني يارب انا جايه ارد لك
الخناقه هههههههههههه
اول حاجه انا كتفت لك فيروز وجبتهالك لحد عندك ملناش بركه اللي انتي
عشان ترغي لنا

http://lu2a.blogspot.com/2007/11/blog-post_09.html

دي المدرسه الام (قصدي الاب)
بتاعه وائل لاحتراف التدوين

كده رفعنا الرايه البيضه
ندخل بقي علي الشديد
لان انت لو رغاييه(صابون)فانا رغايه اكتر برضه(شامبو )

بصي مش مساله توهان والله
المساله مساله الترزي يفصل
والناس تقيس

احنا بني ادمين
مفيش حاجه اسمها علي المقاس
وظيفه علي المقاس
عريس علي المقاس
عروسه علي المقاس
يعني مش فاهمه اه المشكله لما تيجي ضيقه شويه واسعه شويه مش هتتلبس
هتتلبس وممكن كمان مع مرور الوقت
نظبطها علي المقاس او هي تتظبط لوحدها

اما بقي لمساله التوهان فالتوهان
بقي جينات فينا انا حاسه ان احنا مجتمع
تايه وهنجيب اجيال تايه ودوخينا
يالمونا دوخينا
وبعدين حكايه الببنات اللي بتمشي
مع ولد وولد يمشي مع بنت
مبدئيا هما الاتنين عاوز السياف
اولا وقبل اي حاجه
يحط في دماغه انها مخافتش من ربنا
(تفتكر هتخاف من اي حد من عباد ربنا)
ثانيا
هي تحطه في دماغها انه مش بيحترمها
يبقي هيرتبط بيها
خليها دي اخته كان وافق علي كده
حتي لو كان واد روش وكول(لو صايع حتي
سوري في اللفظ)
برضها عمره مايرضاها علي اخته
ولااخته مكتوب عليها ممنوع اللمس
واللي انت اقل من اخته
واهلك اقل من اهله
ولااهلك مش طافحين الدم عشان يربوها
زي مااهل طافحين الدم عشان يربوا اخته
بجد بوسط هايلللللللللل
تسلم ايدك
انا رغيت كتير بس انا من فصيله لولك

صبرني يارب يقول...

مادي
يا قلبي ارغي براحتك مدونتك وزياده

وهاشوف موضوع البلوج الى باعتاه اصل انا خيبه تماما فى الموضوع ده .
شكرا ياجميل

أبصم بالعشره على كل الكلام الى قلتيه وباقوله دايما فى كل وقت .
مش عارفه هما مستنخينك مني ولا يا مادي
ههههههههههههههههههههههه
نورتي يا جميل

Anonymous يقول...

السلام عليكم يا صبـــرني

يا صبــرني الناس أصبح عندها خطأ عام في كلا المفاهيم خاصة ما يتعلق منها بالعلاقات الانسانية الناس دلوقتي مش بيستريحوا لبعض خالص وكلو بيدور على خراب بيت كلو

بالنسبة لحكاية الشغل أعرف أمثلة كتير لناس دورت واشتغلت أحسن شغل وناس برضك اتهدوا في بيوتهم مستنيين السما تمطر لهم الدهب وهما قاعدين بتفرجوا على الدش ويدلعوا على مامي وبابي

بس الخلاصة في نقطة ان اللي بيدور على ناس يشغلهم ومش لاقي برضك عائد لفكرة الغباء اياه يعني خريج حقوق تقوله تعالا اشتغل في مكتب كمبيوتر لغاية ما تفرج يقولك لا يا عم وانا مالي

يا اما اشتغل بشهادتي يا بلاش
طيب وايه المانع تشتغل دلوقتي لغاية ما تلاقي شغلانة تناسب مؤهلاتك يا اخويا


بالنسبة لموضوع البنات والشباب ده حالتهم صعبة وتصعب على الكافر زي ما قلتي بيدوروا غلط وتفكيرهم مش زي بعض

بس انا اخالفك في نقطة انك عايزة البنت يعني تتجوز اي عريس يتقدم المهم أنه يكون ابن حلال

ايه مفهموم ابن حلال دي؟؟ لازم يكون دين وخلق
وحضرتك بتقولي انها تتجوز وعادي تطلق وما يهمهاش نظرة المجتمع احنا عايشين في المجتمع ده يا صبــرني

ما ينفعش نتجاهل نظراته للمطلقة واولا وأخيرا ده موضوع توفيق من ربنا

يبقى ما ينفعش البنت تتجوز خمسين مرة وتجرب

أومال الخطوبة شرعة ليه عشان تفهمه ويقهما وتظهر امكانية تعايشهم مع بعض

يبقى يخطبها الأول مشي حاله يبقى تتجوز وتتكل على الله زي ما بتقولي ما نفعش وبانت عيوبه المتلتلة

يبقى تتهد وتستنى نصيبها والراجل كمان نفس النقطة لازم يستفيد من فترة الخطوبة

عشان يعرف نظام زوجة المستقبل هل هي هتبقى متوافقة معاه فكرا واحساسا ولا لأ

وبناءا عليها يروح يتجوزها


في النهاية لا أملك الا شكرك على حلاوة الموضوع

بالمناسبة في نقطة ما عقبتش عليها في الموضوع السابق

يا ريت لو كنتي عايزة تحطي بحوثاتك يكون مدونة مستقلة تحطي رابطها في المدونة دي عشان يبقى الكلام كلو مترابط مع بعضو

ده رايي ولكي القرار في الأول والأخر طبعا

تحيــــــــاني ليكي يا صبـــرني

التوقيع/// THE WHITE KNIGHT

صبرني يارب يقول...

وايت انت نورت
وبالنسبه لموضوع ان انا باقول ان البنات تتجوز ومش مهم تطلق

لا انت فهمت كلامي غلط انا اقصد ان الواحد دايما يعقلها ويقول اقصى ما يمكن ان يحدث ايه ؟؟؟ الطلاق ؟؟ اقصد كده
والخطوبه طبعا مطلوبه بالعكس دي مهمه اوي ولو كانت هى تمشي صح من الاول كان بانت كل حاجه فى الخطوبه

وبالنسبه للمجتمع الى احنا عايشين فيه لو كان المجتمع ده مخالف للشرع والدين ويتجاهل حقوق الفرد يبقى لازم المجتمع ده يتغير .
ايام الرسول ما كانتش المطلقه عيب ولا وصمة عار ولا يصح ان تكون .

وبالنسبه للمدونه الجديده ان شاء الله هايحصل كده وشكرا لك وايت

mostafa rayan يقول...

كلام كويس بس تفتكري يعني حد هيتعظ
اشط هنفضل نغالي ونترسم علي بعض ونعمل كل العوءدة

صبرني يارب يقول...

مصطفى

ادينا بنقووووووول وكله على الله

ولنبدأ بانفسنا

نورت ياا خي الفاضل