الجمعة، 13 يونيو 2008

ياريتني كنت عنزه عمريه ولا ...خروفايه استراليه

السلام عليكم يا ايها المدونين والمدونات والزائرين والزائرات وبعد :

الاول احب اقول لكل الي تعاطف مع مبتلانا فى محمد وكل الى دعالنا ودعا لمحمد بالشفا متشكره جدا جدا وربنا يجعل الدعاء مقبول ان شاء الله ويرد عليكم بالخير باذن الله وحقيقى ممتنه لكم جميعا ولاهتمامكم
واطمنكم على محمد الحمد لله هو بيتحسن والدكاتره بيقولوا انت التحاليل فيها تقدم ملموس فعلا من العلاج وانه هايخرج من المستشفى بعد عشره ايام على الاكثر .ويبقى متابعه بعد كده تتباعد تدريجيا . وتاني شكرا لكم جميعا .

نعود بقى مره تانيه للرغي عشان كفايه عليكم كده اكتئاب مني هحاول اكون مش مش مكتئبه .

الحقيقه انا فى حاجه كده دايما باقولها لنفسي وقلت ابطل اكلم نفسي بقى عشان مش حلو علشاني ممكن تقلب معايا جنان اكتر من كده .

انتم عارفين ان انا غاويه دعبسه فى الكتب والموضوعات والى باوصله من الدعبسه دي باكتبها واحفظها عندي . وكان منها شوية قصص كده كنت قريتهم من حياة عمر بن الخطاب رضي الله عنه . شوفوا بقى بس بالراحله على اعصابكم

عن على بن ابى طال انه رأى عمر يجرى وراء بعير فسأله الى اين يا امير المؤمنين .فقال عمر :بعير ند من ابل الصدقه اطلبه. يقول على : لقد اتعبت الذين سيجيئون بعدك . فيجيبه عمر : والذى بعث محمد بالحق لو أن عنزا ذهبت بشاطيء الفرات لأخذ بها عمر يوم القيامه.

تعديل : توضيحا للروايه السابقه هانقولها بلدي عشان خاطر المؤسسه الخيخيه اعترض : الموضوع ان الحاج علي ده بيقول ان شاف عمر بن الخطاب بيجري ورا جمل من جمال الصدقه فقاله على فين يا امير المؤمنين قاله : ده جمل شطح من جمال الصدقه رايح اجيبه . فاقاله علي : انت هاتتعب ال هايجي من بعدك يا عمر ( يعنى عشان مش هايعرفوا يعملوا زيه ) فعمر بيحلف بالله الذى بعث محمد بالحق ان لو معزه راحت كده ولا كده بشاطيء الفرات ( اخر الدنيا يعنى ) عمر يتحاسب عليها يوم القيامه .

طب بذمتكم مش نفسكم تبقوا معزه من معيز عمر تلاقوا حد يحمل همكم وهو فى اخر الدنيا ؟؟

كل ما اعدي على القصه دي اقول يا حلاوه هو فى كده ؟؟ امال احنا ليه يعنى خير اللهم اجعله خير ما حدش سائل فينا ؟؟

متفرقين على الارض يمينا ويسارا وما حدش معبرنا الى فى معتقل والى فى سجن والى مش لاقي ياكل حتى الى مش فى اخر الدنيا الى فى البلد نفسها برضه ما حدش بيفكر فيهم اصلااااا . نفسي حد يفكر فينا يا جماعه كأننا معزه من معيز عمر كتير ولا ايه ؟؟؟

فى نفس ذات الوقت بقى يا كتاكيت لما اقرا القصه دي افتكر خبر كده كنت قريته السنه الى فاتت قبل العيد الكبير فى الجرنال . والله ما اول ما قريته رجعت قريته تاني واقول ايه ده هو بصحيح ولا ايه ؟؟؟

اليكم بقى الخبر بس الى المراره عنده فيها مشاكل يحاسب على نفسه وصحته :

استراليا ترسل لجنه لمعاينة الاحوال عندنا فى مصر والتأكد من اننا هانعامل الخرفان بتاعتها الى بنستوردها منهم كويس قبل الدبح وبعد الدبح ..!!!!!!!!!!!!! وكمالة الخبر بقى انهم الحمد لله لقونا مؤدبين ومحترمين وولاد ناس وبنكرم الخرفان ونعاملهم احسن معامله ومشيوا من عندنا وهما بيقولوا زي بعضه هانجيبلكم خرفان السنه الجايه وعليكم خير !!!!

طب بالذمه مش حرام عليهم ينشروا الخبر ده فى الجرنال ؟؟؟ ايه تقليب المواجع ده ؟؟؟ ما تخلوا الناس فى حالها ساكته وصابره على نفسها . مش كفايه ان احنا هانتنيل نجيب خرفان من بره . مع عندنا منهم كتيييييييير يا ابويا وقاعدين وكابسين على مراوحنا والواحد فيهم بقى اد الجموسه من كتر ما كل من لحمنا ؟؟؟

طب احنا ما حدش ليه بيفكر فينا يا ولاد مش برضه انتم زيي نفسكم تبقوا عنزه من عنزات عمر او خروفايه استرالي ؟؟؟

بس كده كفايه عشان العيال سايباهم فى البانيو زمانهم باشوا .


شوفوا اخر موضوعات الرؤيه الاسلاميه المتواضعه

هناك 24 تعليقًا:

واحدة مفروسة يقول...

هييييييييييه
اول تعليق اروح اقرى و اجي

صبرني يارب يقول...

مفروسه شوفتي بقى انا الى مفروسه منك اصلا عشان بتلقطي اوي تعليق فى المدونات كلها كل لما اروح اجري الاقيكى سبقتينا كلنا نوري يا جميل يا اقري وتعالى وكمان اقري الجديد فى الرؤيه لسه ما نزلتلوش رابط

واحدة مفروسة يقول...

ههههههههههههههههه
انتي بتسيبى العيال تستحمى و تيجي تكتبى بوست
ههههههههههه
و الله انتي عثل عثل عثل
ههههههههههه
انا ياختى ماانفعش اكون ولا عنزه و لا خاروفايه
الامكانيات الهيكليه و المخيه يادوبك على مقاس الفريزياان الدنماركي اللى بيهشكوه و يدلعوه فى الاعلاااان
ههههههههههههههههههههههه

واحدة مفروسة يقول...

ايه ده ده انا لوحدي كده ممكن لو العيال استحمت و نضفت تجبيهم نلعب مع بعض شويه لغاية لما الزوار يجوا

واحدة مفروسة يقول...

بصى يا جميله ادخلى على الريدر اللي فى المدونه بتاعتى و دوسى ريد مور و بعدين اعملى زرار الفييد اللى حيبقى فوق ...
يا اما تمشى مع الاخ اللى حيبقى جوه علشان تعملى واحد... و الله انا نسيت انا عملته ازاى؟مش نداله و الله بس فعلا انا الزهايمر بدأبدري معايا
هههههههههه

Unique يقول...

يا ريت .. لو عتدك وصفة للتحول الحقينا بيها

تحياتي

صبرني يارب يقول...

يونيكو

ياريت يا ختي ما كناش عذبنا نفسنا كده

صبرني يارب يقول...

مفروووووووسه
هههههههههههههههههههه حلوه حكاية الفريزيان دي .
والريدر ده هاشوف بيتعمل ازاي يا اختي ده لوحدي كده تخيلى عملت العداد والموقع بتاع افحت كده وانا بادعبس لطشوا فيا بس لسه هاتشوفوا مني ياما

وبعدين انتم مفكرين البوستات دي بتتكتب ازاي ؟؟

والعيال فى البانيو والطبيخ على النار وكله على كله وحياتك عارفه الصوره بتاعة خيخه ؟؟ اهو انا كده والله

والعيال يا اختي تعالى خديهم العبي معاهم براحتك على الاخر بس ما تبقيش تندمي

mayada يقول...

ههههههههههههههههههههههه
عمودا حميدا ياام مريم حميدا مين قصدي محمودا ايه الرجاله الكتير اللي بقولها دي
بصي حمد الله علي السلام
مرتبط بخبر استراليا ياام مريم خبر
تاني الكبل بتاع
شيخ الازهر عاوز يصدر قانون
وده بمساعده منظمات حقوق الحيوان
لحمايه الحيوان
خاصه في ظروف النقل ميتنقلش في عز
الحر والسكن يسكن في حته واسعه وشرحه وبرحه وشمس
الاكل اكل طازه بطازه
شفتي شفتي ياام مريم
الرحمه حلوه وماله بس يبصوا للبني ادمين
بعين الرحمه برضه ياريتنا عايشين في جنينه حيونات هههههه

صبرني يارب يقول...

مياده

لا عيب عيييييييب حديقة حيوانات ايه امال لو ما كنتيش من عروس النيل يا اختي ؟؟؟

ابقى روحي شوفي حديقة الحيوانات بتاعتنا فى المنصوره لوما كنتيش بتروحي هابقى احكيلك عليها فى بوست لواحدها

ahmed_k يقول...

امثال عمر بن الخطاب رضي الله عنه نادر في هذا الزمان وجميع الخلفاء الراشدين كانوا كذلك فهم الذين صدقوا ما عاهدوا الله عليه فصدقهم الله وعده يا أختي لو اهتم الحاكم في زماننا هذا باحوال الرعيه بصدق وبشكل عام وليس الأفراد لعمل الناس له تماثيل في كل مكان ولتسموا باسمه ويصبح هذا الأمر نابع من النفس ليس فيه رياء ووالله لما احتاجوا لكل تلك الحراسات التي تسير حولهم ولكن الظلم وتغليب المصالح الشخصيه هو ما أوصلنا لتلك الحال ونسأل الله لهم الهدايه , ويا ريت تشرفيني في مدونة دردشة عرب هي لسه في بداياتها بس بعمل علي تطويرها أصلي لسه جديد في موضوع التدوين والله المستعان . والسلام ختام

صبرني يارب يقول...

استاذ احمد

نورتنا وسلم لسانك واكيد طبعا لازم اجي وشكرا لدعوتك ليا ده شرف ليا يا استاذنا

صبرني يارب يقول...

استاذنا الفاضل احمد
انا عندي مش عارفه ليه مش باعرف اعلق على المدونات الى التعليق فيها فى لوحه منفصله دخلت مدونتك وقريتها كلها بس ما عرفتش اعلق ياريت حد يقولي يا جماعه المشكله دي سببها ايه
لان بتقابلنىكتير فى مدونات كتير
وشكرا لكم مقدما

mohamed يقول...

عنزة فى أمانة عمر رضى الله تعالى عنةولا خروف من صادرات الحكومة الاسترالية,لا هذا ولاذلك ,أدعوك للبس طاقية الاخفاء وزيارة أى مدبح ولترى كيف يتعامل الجزارون مع ذبائحهم وبعدين قولى لى رأيك وأن كنت أعتقد أنك ستتحولى الى أنسان نباتى, عموما عندما يصبح الانسان وكرامتة قيمة لها أحترامها بين أفراد المجتمع سيكون الحيوان لة كرامتة, شرفتينى بالزيارة فى شوية كلام(مدونتى) وحديثك عن الشاتنج وقد علقت على تعقيبك, لكى منى كل أحترام
محمد

صبرني يارب يقول...

استاذنا الغالي محمد

حضرتك انا اروح انا مدبح ليه ؟؟؟

ومدبح من بتاعنا ؟؟؟

اذا كان احنا بنى ادمين وبيعملوا فينا كده ؟؟؟؟
وبعدين ماذا يضير الشاة سلخها بعد ذبحها يا سيدى .

وابقى نباتيه انا ليه ؟؟؟

الذبح المشروع ربنا محلله

واروح انا اصلا مدبح ليه انا ما باحضرش الاضحيه اروح مدبح
وطبعا هاجي المدونه حالا ان شاء الله وليا الشرف وحضرتك نورت

اوعى تفكر يقول...

هههههههههههههه
ياريتنى كنت خرووووووووف
طب ما ييجو يشوفوا
البنى ادمين اللى بيتعاملوا وحش قبل الدبح وبعده
حاجه تفرس

حاول تفتكرنى يقول...

حقيقي
موضوعاتك تختلف تماما عن ردودك

أحيي اسلوبك فى النقد

لانه يصلنا بسهولة

تحياتي

صبرني يارب يقول...

حاول تفتكرني

نورت المدونه وصاحبتها ومتشكره لك

لكن يعنى ايه موضوعاتك تختلف عن ردودك ؟؟

يعنى اوصف موضوعاتي واوصف ردودي عشان اعرف الفرق
نورت تاني اخي الفاضل

بت خيخة وأي كلام يقول...

ده انا متأخرة اوى
انا جيت لاقيت حكاية محمد ابن اخو جوزك
ربنا يشفيه ويعفى عنه
ياااااااااااه
انا اللى صعبان عليا ام محمد
ربنا يكون فى عونها ويديها القوة والصبر
ربنا معاكم كلكم

معلش يا ام مريم
انا مش هاعلق على البوست ده لانى مافهمتش الكلام ده


عن على بن ابى طال انه رأى عمر يجرى وراء بعير فسأله الى اين يا امير المؤمنين .فقال عمر :بعير ند من ابل الصدقه اطلبه. يقول على : لقد اتعبت الذين سيحيئون بعدك . فيجيبه عمر : والذى بعث محمد بالحق لو أن عنزا ذهبت بشاطيء الفرات لأخذ بها عمر يوم القيامه

ياريت تفهمينى يعنى ايه
يعنى ايه بعير ند
طب بعير وفهمناها
بس الجملة كلها يعنى ايه


المهم
الف سلامة على محمد
وتحياتى
اختك خيخة

صبرني يارب يقول...

خووووووووووخه

حمد الله بالسلامه ايتها الخيخه ا لعامله .

شوفي انا لسه بافتح الردود قام جوزي جه كده قري وقالي اما خييييييخه صحيح .هههههههههههههه

والله الكلام واضح

طب انا هاقولهولك بالبلدي :

الراجل بيحكى بيقول ان عمر كان ماشي بيجري ولما سأله على فين يا عمر قاله جمل من جمال الصدقه شطح بعيد ورايح اجيبه .
قاله : تعبت الى هايجوا بعدك يا عمر (يبقوا خلفاء يعنى )
فقاله : لو ان معزه راحت كده ولا كده هنااااااااك فى الفرات بعيد يعنى يتحاسب عليها عمر يوم القيامه .

اي خدمه خوخه حبيبتى نورتي يا جميل

جنّي يقول...

السلام عليكم

من الأقوال المشهورة لسيدنا عمر : ليت أم عمر لم تلد عمر ..

وهم يقولون خالدون إلى الأبد أنا ومن بعدي ابني وأبن ابني ...
واللي مش عاجبه يرفع حاجبه ..

وأنا موجود ولا يفوتني بوست والتعليق عليه ..

صبرني يارب يقول...

جني
انشاله دايما موجود ومنور يا استاذنا

بت خيخة وأي كلام يقول...

اولا الف شكر ليكى يا ام مريم على توضيحك ليا لمعنى الجملة

ثانيا بالنسبة للبوست ده
لو لاقيتى هجرة ومهجرتيش لا تلومى الا نفسك
ولو لاقيتيلى معاكى هجرة ومبعتليش
هاحط السيخ المحمى فى سرسور ودنك

سلام
اختك خيخة

صبرني يارب يقول...

خوخه يا حبيبتى والله ده اقل واجب التفسير ده .

اما بقى الهجره والله يا خيخه لو دورنا مش هانتعب على ما نلاقي الحمد لله الظروف تعتبر ممهده

لكن انا متردده عشان مش عارفه هاقدر فعلا ولا لا
وجوزي مش موافق بيقولي انا بقى قاعد فى ام البلد دي لحد ما اشوف اخرتهم ايه .

فوق ان والدته مسنه ومريضه ومش عايز يبعد عنها
وكذلك الحال ليا برضه مش متخيله انى اسيب ماما وبابا للعيال اخواتي دول فى شيخوختهم . اخواتي شكلهم ما يجيبش حد ينفع .
والله المستعان

واتعودت دايما انا وجوزي ان الله يدفع بنا دفعااااااااااا واحنا بنسمع الكلام على طول اصلا .