الثلاثاء، 20 يناير، 2009

قلب ايمان ... الخامس


فات كم يوم وايمان داخل الدوامه وقرارها الي خدته بالتفكير لسه بيلف ويدور فى دماغها ومش عارفه لسه هاتعمل ايه لكن ده ما يمنعش انها كانت فى الدوامه نفسها
ويوم الثلاثاء وهى في الشغل :::
ايمان : الو ايوه يا داليا ازيك ؟
داليا : الحمد لله يا ايمى ازيك انتى ايه فينك ولا نزلتي الصلاه حتى ؟؟
ايمان : الحمد لله على كل شيء اه ما نزلتش كان عندي شغل ساعتها نزلت بعدها
داليا : انتى فاصله شحن ؟

ايمان : لا قافله الموبايل من الصبح .

داليا : اشمعن هو لسه اخينا بيبربش برضه .

ايمان : مش عارفه انا قلت انفض للكل . المهم باقولك ايه ما تعرفيش تاخدي مغادره ساعتين وتنزلي معايا ؟؟

داليا : اعرف بس خير راحه فين ؟؟؟


ايمان : مافيش عايزه اتكلم معاكي شويه على رواقه . يلا قدامك نص ساعه جهزي فيهم نفسك

داليا : اوووووك خير يارب .

واخدوا بعضهم ونزلوا قاعدو فى نادي قريب من الشغل .

داليا : ايه يا بنتى خير فى ايه قلقتينى .

ايمان : خير ان شاء الله . انا فكرت كتير فىكلامك يا داليا وانا فعلا عايزه اغير حياتي مش عايزه اعيش ميته


داليا : طيب وايه مانعك ؟؟

ايمان : مش عارفه ابدأ منين وخايفه .

داليا : مش عارفه تبدأي منين دي فاهمنها انما خايفه من ايه ؟


ايمان : خايفه احسن اشرف يصدني او يصدمنى وخايفه اتصرف غلط وخايفه وخلاص


داليا : طيب ماهو عشان تنجحي فى الامتحان لازم تخافي من السقوط لكن مش هاتنجحي الا لو دخلتي الامتحان .

ايمان: اه عندك حق . طب نبدأ منين ؟؟؟

داليا :اه طب هانشرب الشاي اهو ونمخمخ .

ايمان : ماشي يا عبقرينوا هانم.
داليا وهى بتشرب الشاي : انتى عيد جوازك امته فكرينى؟؟؟

ايمان : عدى يا اختي من شهرين .

داليا :ايه ده ما قلتليش ليه يا بت ؟؟

ايمان: اقعدي ساكته انا كان عندي اكتئاب يومها .

داليا : ليه يا استاذة الاكتئاب والسواد النفسي .

ايمان : كده عشان اشرف ولا جاب سيرته ولا افتكره ولا كأن فى حاجه قعدت 3 ايام عندي ا كتئاب ولما قلتله قعدت يتريق عليا ويقولي انتى فاضيه وبتاع واتخانقت معاه بقى وقعدنا اسبوع متخاصمين .

داليا : ياااااااربناااااا طيب ما كنتى تخديه مطوه فى جنبه وهو ياخدك مفك جنب عينك احسن اهى ذكرى تدوم برضه .


ايمان بضحكه كبيره : بلاش رخامه الله امال اعمله ايه يعنى .


داليا : المهم اي مناسبه قريبه عيد ميلاده فى مثل هذا اليوم شوفتك لاول مره كده يعنى .


ايمان : ما بنعملش اعياد ميلاد مش بيقولوا حرام وبتاع .

داليا : حرمت عليها عشيتهم البعدا هايحرموا على الناس عيشتها .

ايمان : بس اه زي الاسبوع ده كانت خطوبتنا

داليا : حلوووووو اوي . تعالى بقى نتفق

ايمان : قولي يا فيلسوفة عصرك .


داليا : بصي الاول لازم لازم تغيري فعلا جدولك بحيث تناموا سوا وتصحوا سوا دي اهم حاجه بلاش نظام الفنادق الى انتم عاشين فيه ده وورادي النوم .

ايمان : ازاي بس ما انتى عارفه اليوم شكله ازاي
داليا : اتصرفي يا ايمان اولا لازم تشوفي واحده تيجى تساعدك فى شغل البيت ولو مره فى الاسبوع او مرتين وكمان اشرف لازم يساعدك ولو معنويا عشان يبقى فى مشاركه بينكم فعلا
ايمان : اشررررررف ؟؟؟؟ انتى بتحلميييييييي ده ما بيجيبش لنفسه كوباية المايه .
داليا : ماشي ماهو برضه انتى عليكى عامل كبير انتى الى عودتيه على كده من الاول ولازم لما ترجعي فى كلامك بقى يبقى تدريجى
يا بنتى ربنا عرفوه بالعقل مش معقول تقدري تعمل كل حاجه فى الدنيا لواحدك موظفه وست بيت ومربيه اطفال وفلبينيه و زوجه مش معقول هو اليوم 24 ساعه هاتخليه بالعافيه 48 اكيد فى دور منهم هايسقط منك .
ايمان : عندك حق انا عودته على كده .طيب انا هحاول اقنع اشرف بموضوع انى اخلي واحده تجيلى مرتين فى الاسبوع ولو انه بيقول انه ما بيحبش حد غريب يدخل البيت .
داليا: اه بس تقنعيه مش تتخانقي معاه ما انا عارفاكي بتنقطي دبش احيانا .
ايمان ضاحكه : يعنى اعمل ايه يعنى .
داليا : يعنى نقي وقت لطيف كده وتكوني قاعده معاه وايدك فى ايده وتقوليله بصعبنه كده انا باتعب اوي فى شغل البيت يا اشرووووووف . انا عايزه اجيب واحده تساعدني عشان افضالك شويه يا قلبي .
ايمان ضاحكه : اشروووووووف ههههههههههههههههه ايه ده . ده انا بتهيئلي يطلقني لو قلتله اشروف دي .
داليا : يا ستى قولي اي حاجه بس خليكى ناعمه شوووووويه يا ساتر على تماثيل الشمع .
ايمان : ماشي يا ناعمه يا غريبه .
داليا : بجد يا بنتى الرجاله عقلهم صغير اوي بيضحك عليهم بكلمه والكلمه الحلوه بتسحر القلوب .
ايمان: طب وهو يعنى انا ماليش نفس اسمع كلمه حلوه ؟
داليا : يا بنتى هى مزاد مين يبدأ المزاد ومين يزود . يعنى انتى لو قولتيله باحبك هايقولك ايه باكرهك يا رخمه ؟
ماهو هايقولك باحبك برضه هووووو كده لو عايزه تسمعي كلمه حلوه لازم تقولي كلمه حلوه .
ايمان : طب ما انا ساعات باقول وهو ما بيقولش .
داليا : يادي الخييييييبه يا بنتى افهمي هو انتى هتعملي دفتر يوميه ولا ايه للكلام الحلو بينكم . قولي وما تبطليش ابدا كلام حلو . هو زي ما هايتعود يسمعه هايتعود يقوله .
ايمان : طييييييييييييب لما نشوف اخرتك ايه معايا .
داليا : كمان لازم تعرفي ان قمة سعادة الرجل لما يحس انك محتاجه له وانك ما تقدريش تعيشى من غيره . ده لما يكون رجل سوي يعنى . مش هو سوي يا بت ولا اييييييييه .
ايمان : اه مستوي ليه ؟ هههههههههههههههه
داليا : بجد تعرفي عامله زي ايه ؟ زي الطفل الصغير لو طفل حتى غريب عنك وحسيتى انه محتاجلك ولو سبتيه هايضيع من غيرك مشاعرك هاتتحرك ناحيته وتتعلقي فيه اكتر .
ايمان : يعنى اعمل عيله ؟
داليا : اه هو فى احسن من المعيله . اجمل حاجه تكوني مع جوزك عيله وتكوني امه وتكوني صديقته وتكوني حبيبته وتكوني اخته وتكوني عشيقته كمان .
ايمان : اه كده دخلنا فى قلة الادب .
داليا : لا ده هو ده الادب كله . قلتيلى بقى عيد خطوبتكم يوم ايه ؟
ايمان : استنى هاحسبها ...... هايبقى يا ستى يوم الخميس الى جاي
داليا وهى بتغمز لايمان بعينها وتضحك : مافيش اسعد من كده ظروف بقى ؟؟
ايمان وهى بتضحك فى خجل : مش باقولك قليلة الادب .
داليا : تعالى بقى عشان نتفق على الترتيبات ليوم الخميس .
ايمان : ايه ده انتى هاتبقى معانا ولا اييييييييه ؟
داليا وهى بتضحك : ليه يعنى فاضيالك انا ؟ المهم يلا بقى عشان نتفع على خطة يوم الخميس .
ايمان : يا خططك يا دووووولي لا قولي بسرعه
داليا : شوفي يا ستى اول حاجه ...................
يتبع يا كتاكيت
جامده التعليقه صح ؟؟؟





هناك 42 تعليقًا:

mayada يقول...

ام مريم انا كده مدمنه ايمان قبل ماانام
ماتقوليلي هتخصل علي خير ولا علي شر
وانا مش هفتن لحد

Che يقول...

حلوة التعليقه دى
بس على فكرة داليا صاحبتها دى لازم كرجاله نغتالها عشان ماتقلبش الستات علينا
الا هى داليا شاطره فى بيتها ولا بتجرب فى الغلبانه ايمان
مستنين نشوف اخره التعليقه دى ايه

عاشـ بلا روح ـق يقول...

الف مبروك على المدونة الجميلة دى وخصوصا قصة ايمان تسلم ايدك بجد بس انا خايف ان داليا تقنع ايمان انها تخلع اشرف تبقى كارثة وتقوله يلا على بيت ابوك انا خلعتك ربنا يستر ع الرجالة والله مساكين ههههههههههه
منتظر باقى القصة

عاشـ بلا روح ـق يقول...

بالمناسبة عاوزك تقوليلي رايك فى المدونة دى
http://habibalrooh.blogspot.com/

بنت الغربة يقول...

حبيبتى ياصبرنى
داليا دى الظاهر بت جدعه قوى
انا الظاهر هاصاحبها
دى معلوماتها قيمه قوى
بس بصراحه انت اسلوبك زى العسل
واوعى تعملى القصه بالفصحى علشان دمها مايبقاش تقيل..
ده بالاضافه انى ضعيفه فى العربى..
تحياتى ليك ياقمر

أحمد (زوج مخنوق ). يقول...

ام مريم
القصة دي اناحاسس اني شميت ريحتها قبل كده
الحوار على بعضه كده مش غريب عليا
مش كده و لا ايه؟؟

صبرني يارب يقول...

مياده

انا برضه يجى من ورايا شر ههههههههههههههههههههه

والله انا ما عارفه لسه هى هاتنتهي على ايه

لكن امبارح انا جاتلي فكره جديده هاتطول القصه شويه بس هاتناقش نقطه مهمه

صبرني يارب يقول...

che

بقى كده برضه ؟؟؟

اهو هما دول الرجاله عايزين يخدوا الى ما لا نهايه بدون اي استعداد لتقديم المساعدات

وداليا مش عارفه هى شاطره ولالا

انا اتعودت اسمع نصيحة الناس حتى لو ما كانوش هما بينفذوها انفذها انا وابقى اشطر منهم

جايز تكون داليا بتنصحها بالى هى ما عرفتش تعمله وجاي تكون عملته وحاسه بنجاحه وبتتمناه لصديقة عمرها ؟؟؟
الله اعلم

زعلان اوي انه هايساعدها فى شغل البيت

الرسول عليه الصلاةو السلام كان بيساعد زوجاته مين فيكم اكرم منه ولا مشغول عنه ولا همه اد هم الرسول عليه الصلاة والسلام
اما رجاااااااااااله صحيح
هههههههههههههههههههههههههههه

صبرني يارب يقول...

عاشق بلا روح

ايه ده انت عاشق الى انا عارفاه ولا ايه شكلها كده

انت اسمك خالد تصدق اول مره اعرف ههههههههه

وبعدين تعالى هنا مدونه وحركات من ورايااااااااا

ماشي ياعم علمناهم المدونات سبقونا على البلوج ههههههههههههههه

نورت يا عاشق وان شاء الله هازورك ونشوف بلديتنا عاملين ايه فى البلوج

صبرني يارب يقول...

احمد زوج مخنوق

على فكره واضح ان انت هاتبقى مخنوق حاليا بس مخنوق حقيقى بقى بس بادور لسه على اداه للجريمه

الحوار على بعضه كلاااااااااامي

دماغي يا ناس

وانتم عارفين كلامي كله ودماغي كمان سنه بارغي فى دماغكم كلكم لازم تشبهوا على الكلام

الى هايقولي كده تاني هاعووووووووره

يا جدعان هاتجنوني حرام عليكم

صبرني يارب يقول...

بنت الغربه

والله يا داليا انا كمان عايزه اصاحبها هههههههههههههههههه

اعتبروها كلكم صاحبتكم واسمعوا كلامها

ومافيش فصحى بقى خلاص قررنا نعود ادراجنا

تحياتي ليكى ونورتي يا جميل

عاشـ بلا روح ـق يقول...

ايوة يا صبرني انا بلدياتك وأسمي خالد واسم الدلع ( عاشق بلا روح ) بجد القصة جميلة جدا وعاوز اعرف نهايتها بس ياريت ميكونش فيها خلع انتى عارفة الرجالة اليومين دول مساكين وانا لسه عريس مستجد ( تبقى مصيبة لما الواحدة تخلع جوزها وتقولة يلا روح على بيت اهلك ... روح وانت مخلوع )ههههههههههه
فى انتظار باقى القصة

عاشـ بلا روح ـق يقول...

وبعدين الحمد لله انى خليت المدام تخاصم داليا دى خالص ههههههههه

فشكووول يقول...

ام مريم .. صبرنى يا رب ..
تعليقه حلوه وانا عمال اقرى وفاكر حاوصل لحاجه والى لب المشكله عشان اديكوا نصايحى اللى تودى فا داهيه الاقى الموضوع خلص من غير ما اعرف حاجه
اشكرك على الملاحظه فى مربع الدردشه.. اصل يا ستى من حوالى سنتين جات لى ملك من بنتى الهام وفى شه8 اللى فات جه احمد من ابنى اسامه ومن حوالى شهر جه محمود من بنتى الهام برضه .. وفجأه لقيتنى جد لـ 3 احفاد وانا كنت قال فاكر نفسى 17 ولا بالكتير 21 سنه اما الروش ده واللى مطلع روحى دا محمود ابنى
تحياتى ياصبرنى

صبرني يارب يقول...

عاشق

ههههههههههههههههه يا سيدى ربنا ما يجيب خلع ولا تركيب ههههههههههه

بس لازم لازم لازم نعرف المدام على داليا

شوف داليا بتتعب عشانكم اد ايه وانتم عشان بس قالتلها خليه يساعدك فى البيت او هاتي شغاله تساعدك خلاص بقت وحشه بقى

رجااااااااااله صحيح
ههههههههههه

شمس النهار يقول...

اهو كده الكلام والا فلا مش تقولي لي محمود
الشرع والحلال يكسب
وماتخافيش عليا ياصبرني وراكي رجاله
انت مش موجوده احنا في الخدمه
وعمرو زي ماشفتي استنجد بالاخوه المدونين ماحدش حاش عنه
وماخدش غلوه يااختي
قال سيلنترو قال وقطه
ماتخافيش القصه في امان والمدونه في الحفظ والصون
عيزاكي بقا تعلمي الستات ازاي يحافظوا علي رجالتهم
اي تفعيل نظرية
كوني له امه يكن لكي عبدا
ومشاركه مني لأيمان والحفله عملت كوارع وجلاش في مطبخ شموسه
مبسوطه

صبرني يارب يقول...

استاذ فشكول

لا مستنيين نصايحك وتودي لفين ما تودي احنا تحت امرك


وربنا يخليى يارب ما شاء الله كلهم زي العسل وربنا يديلك الصحه يارب ويفرحك بهم

صبرني يارب يقول...

بيبرس

ايه ده طب ما كمان عمرنا ما شوفنا ابهاتنا بيقعدوا على سلنترو ولا بيشكوا ويشكوا زيكم

كانوا بيشتغلوا وحامدين ربنا وشاكرينه على فضله

وبعدين يا سيدى مين قالك كده ؟؟؟ ياما فى رجاله كتير على مر الزمان عندها مروءه ويصعب عليهم الست تتهرس فى البيت والشغل ليل ونهار وهو مأنتخ على جنبه نص اليوم

والمؤامره الحقيقه بقى هانعملها ان شاء الله ونعلق اي راجل يدخل هنا على باب المدونه عشان انا جايبه اخري منهم

صبرني يارب يقول...

شموووووووووووسه

انتى جيتى امته

يا حبيبتى ان كيدهن عظيم يقفوا قدام مين
حد يقف قدام القطر ويقول انا جدع

خلي سلينترو بقى ينفعهم

شوفي انا مع مبدأ كوني له امه يكن لك عبدا

بس على شرط

الاول مبدأ الشراكه لازم يكونوا الاول شركاء فى كل حاجه مش عاملين فصل للمهام والقوات

شغل البيت من مسؤلياتها لكن هى بتشتغل بره البيت كمان يبقى هو كمان يساعدها ولو وجدانيا جوه البيت

حتى لو مش بتشتغل لما تكون مريضه او مرهقه وهو عنده وقت

ايه المانع انه يساعدها على سبيل المشاركه والحنيه والرحمه ؟؟؟

مش عيب ابدا ابدا

وهافضل اقولهم دايما لستم اكرم من رسول الله ولا اكثر منه انشاغالا

يبقى ما اسمعش صوتكم بقى
ههههههههههههههههههههههههه

شموسه هاروح اشوف الكوارع فوووووورا ولو انى مش باحبها

وما تنسيش تزوري المطبخ بتاعي بقى

abdo يقول...

السلام عليكم
انا فى كل مرة ببقى عايز أعلق
بس ببقى مش عارف أقول ايه
بس ما شاء الله كتاباتك و أسلوبك رائع
جزاكى الله خيرا

شمس النهار يقول...

انا موجوده بس مشيت ورجعت تاني بوروبم
اي حد من الاخوه يحب يترد عليه والا حاجه
مش صابرين ليه الرجاله لحد ما القصه تكمل
مستنين البنيه تغلط عشان يقولوا شوفو
طب اهي مش هتغلط وهتوريهم الست لما تحب جوزها وبيتها بتعمل ايه
بس لعله يطمر
يعني عمرو مابنش من امبارح
خير ان شاء الله

صبرني يارب يقول...

شموسه

صبرررررررك عليا بوستين بس واتفرجي عليهم فى الدفاع عن جانبهم بقى

هههههههههههههههه

عمرو مش عارفه هو فين بس هو الايام دي مش عاجبني كده لعله خير

صبرني يارب يقول...

عبده

كفايه تنورنا بس من غير ما تقول حاجه يا فندم وشكرا لك

صبرني يارب يقول...

بيبرس

طب انا عايزه زمتك واحده زيي انا عندها فضلة خيرك 3 عيال و3 مدونات فيها نفس تشوف مسلسلات منين

خااااااالص مش باشوف اي مسلسلات والله

وبعدين ما تسبوهوم يشوفوا مسلسلات ولا يعنى الماتشات هى الى عليها عسل وسكر

بس خلاص ... يقول...

حلوة قوى القصة دى وفيها ملمح كبير من الواقع واللى بيحصل ... لكن باختلاف التفاصيل لكن فعلا انتى نجحتى انك تصورى كيف يبحث الانسان عن الحب حتى ولو كان وهم او غير موجود عندما يفتقده فى حياته العائلية
ولكن يجب ان ينتبه الازواج الى هذه الفجوة التى قد تكون عواقبها لاقدر الله سيئة جدا
فى انتظار باقى الحدوته
انا متاكده انك هتتحفينا وتفاجئينا بحاجات حلوة

صبرني يارب يقول...

بس خلاص

ادينا بنبه يا بنتى على الله تيجى بفايده

نورتي يا جميل

أحمد حسن البنا يقول...

ست الكل انا قريت الحلقة من اول مانزلتيها لكن ماكنتش عايز ارد عليكى الا لما اقراها تانى ومش همدح كتير فى الفكر لاننا خلاص قلنا انها فكرة حلوة جدا لكن المرة دى حسيت انك طولتى الحوار فى سطور كتير كانت ممكن تختذل وكان ممكن مضمون الفكر اللى عايزة تقوليه يوصل فى اربع او خمس سكور حوار لكن انا مش هرفض ده لانه المفروض كلام اتنين ستات مع بعض وطبيعى جدا انهم يرغوا اكتر من اللازم يعنى طول الحوار ما اضعفش الحلقة بالعكس ده اكد طبيعة الستات اللى هما انتم ياحلوين فى الرغى لما بيجتمعوا على الكلام على الرجالة اللى هما احنا الوحشين وكان نفسى داليا دى تتبروز اكتر ويظهر خبرتها واصول فكرها الخبير فى الامور الحياتية عشان اقدر اقتنع بكلامها ومنطقيته يعنى مش معقول اصدق انها عديمة التجارب او مش واضح خبرتها دى جت منين واقتنع انها ممكن توجه ست متجوزة (مهما كانت ضعيفة قدام مشكلتها ) وهى اللى ترسملها خطط التصحيح وتنصحها تعمل ايه خصوصا انها بتتكلم فى امور نسائية خاصة بين الست وجوزها واللى اكيد ايمان على دراية بيها اكتر لانها سبقتها للمرور بالمرحلة دى يعنى توصفلها ازاى تعامل جوزها فى لحظات الروقان وهى اصلا مش مجربة زى ايمان !!!! لكن جميل حوارك ورغم ان رغى ايمان وداليا غلب رغيك الا انك كنتى رغاية جميلة ومازهقناش منك .....فى انتظار الباقى يانجمة غلاف مجلة حوا
احمد

شمس النهار يقول...

فين الجزء السادس
هي كام جزء والا انت مش محدده وزي ماتيجي
يارب تكون مليون بوست هي لطيفه ومفيده
بالنسبه لعمرو انت كمان لاحظتي
فعلا هو غريب اليومين دول
وكمان مابينزلش بوستات زي الاول
بس علي فكره المدونين كلهم كده
حاسه ان في حالات اكتأب عام
ربنا يريح قلبهم كلهم
مابدخلش مدونه الا والاقي حزن وفراق ووجع قلب
ياله اهي ماشيه علي فين مش عارفه

صبرني يارب يقول...

احمد حسن البنا

مين قالك ان داليا عديمة الخبره وان ايمان سابقاها ؟؟؟

داليا هى كمان متجوزه وعندها عيال وهى زميلة ايمان من عشر سنين وانا قلت الكلام ده من تاني جزء تقريبا

ومش شرط الناس تكون على نفس درجات الخبره لان الافكار بتختلف

يعنى ممكن اثنين متجوزين وكل واحد فيهم له فلسفته في الحياه

وعموما البوست الجديد انا بدأت اكتب فيه وفى لمحة تفسير لموقف داليا ومنبع كلامها ده

وبالنسبه للرغي زي ما انت قلت رغي حريم بقى يا ابنى هههههههههههههه

والله جميل الرغي اوي ههههههههههههههه

شكرا لك يا احمد وانت منورنا

صبرني يارب يقول...

شموسه

اه انا لسه ما كتبتش باقي الاجزاء فعلا ولا اعرف هاتبقى كام جزء
لكن والله اعلم يا شموسه شكل الحكايه هاتطول عشان انا قررت اطبق فى زمارة رقبة اشرف من اول الجزء الى بعد الجاي ان شاء الله بما ان الرجاله محموقين اوي على ايمان وداليا كده .

وبالنسبه لعمرو لعله خير الله اعلم .بس يعنى نعملهم ايه عشان نشيل حالة الهم المدونين
مش كفايه مدونة الضاحكون نقطع نفسنا بقى هههههههههههههههه

ربنا يستر ان شاء الله ولعله خير

والجزء الجديد ان شاء الله ربنا يسهل نخلص بس الطبيخ والغدا ونيجى نكمله
منوره يا برنسيس على راي عمرو

شمس النهار يقول...

لأ ياصبرني ياحبيبتي
ماتطبقيش في الزماره تبع الريس اشرف دلوقتي
لأ
دلعيه الاول واعمليله كل اللي هو عايزه وبعد كده اطبقي زي ماانت عايزه عشان يكون ضميرك مرتاح ياشابه

صبرني يارب يقول...

ايوه يا جميل ماهو انا باقولك البوست الى بعد الجااااي ليييييه

انا هاوضبه ما تقلقيش

هههههههههههههههههههههه

ايه ده ما تيجى نكتب سوا والله نبقى دوتوا تحفه

همس يقول...

هههههههههههههههه


حلوه يا جميل علقينا ومالو

بس المهم النتيجه

وتحكيلنا بالتفاصل الممله فاهمه ( عين بتغمز)

ههههههههههه

لما نشوف اخرتها

عمرو جويلى يقول...

السلا عليكم ورحمة الله وبركاته
أعجبتنى قصة إيمانحيث أنها مشوقة للقارىء
تحياتى
أتمنى منكم زيارة مدونتى اللؤلؤة على الرابط التالى :
http://alooloa.blogspot.com/

ويارب تعجبكم

من غير عنـــوان يقول...

صديقتي ابنتي العزيزة

الحق ومن غير كدب.. أنا مالحقتش اقرا... بس جيت أصبح عليك

الوقت فظيع... مش موجود

شكر على مرورك
كل التحيه والأمنيات لك

صبرني يارب يقول...

اللؤلؤه

شكرا على الاطراء وان شاء الله اتشرف بمدونتك عنيه

صبرني يارب يقول...

من غير عنوان

انا ليا الشرف يا استاذنا ان حضرتك بس طليت عليا حضرت نورت

بس لما تفضى ضروري تقولي رايك فى الرغي الى انا عماله ارغي فيه ده

صبرني يارب يقول...

بيبرس


لا لا لا اوعى تفكر انه هايتقطع عشان البليله ده هايتقطع من سكه تانيه خالص
هههههههههههههههههههه

صبرني يارب يقول...

ههههههههههههههه ماشي يا بيبرس

enjy يقول...

ايه دة انا اول مرة اجى هنا اعتقد مش الاخيرة خالص...حلوة التعليقة دى بتفكرنى بالمسلسلات الامريكى

enjy يقول...

على فكرة انا اخدت لفة وقريت قلب ايمان كلها وعجبتنى اوى جدا خالص...الله ينور بجد

صبرني يارب يقول...

انجي

يا حبيتى نورتي والله ومتشكره ليكى ويارب دايما موجوده ان شاء الله