الاثنين، 19 يناير، 2009

قلب ايمان ..... الرابع

الشمس طاله من شباكهم جميييله ودافيه ومنوره ومليت عليهم الدنيا و ........
ايمان مفزوعه : اشررررررررررف قوووووووووووم يا نهار ابيض الساعه سبعه ونص بسرعه انا اتاخرت اوي انا شكلي نسيت اظبط المنبه بتاعي بالليل .
اشرف : ايه فى ايه طيب طيب بالراااااحه قايم اهو .
وبسرعه ايمان لبست ما تعرفش ازاي ولبست الولاد
وقالت لاشرف: ابقى هاتلهم كرواسون من تحت وانتم نازلين ما لحقتش اعمل فطار
أشرف : نعم نعم وانا افطر ايه طيب . وكمان انا هاوديهم المدرسه لا هاتأخر كده .
ايمان : الله وانا اعمل ايه يعنى ما انا متاخره فعلاااا وانت معاك العربيه
اشرف : متأخره ؟ طب وايه يعنى هايحصل ايه لما تتاخر الدنيا هاتتهد وبعدين انتى الى نسيتى تظبطي ا لمنبه ذنبي انا ايه ؟
ايمان : أنا ناااااااازله اتصرف انت مره فى اي حاجه .
ونزلت وهى متعصبه ومتنرفزه وجرررررري على الشغل .
ولما وصلت الشغل وهى بتجري كلمتها داليا: نموسيتك كحلي يا حلوه متأخره ليه شايفاكي وانتى جايه
ايمان: راحت عليا نومه يا ختي .
داليا : احترت فيك يا زمن . ما كنتى امبارح بتعيطى منه .ههههههههههههههههه
ايمان : بس يا رايقه انتى .
داليا : طيب نشفتي الجبس كويس
ايمان : اه يا اختي هو اساسا ناشف خلقه ومستنيل على الاخر .
داليا : طيب اشوفك الظهر ان شاء الله ونشوف اخبار الجبس .
......................
ايمان وشها فى الشغل وتتحاشى النظر لاي حد اصلا . وجالها رساااااااااله .
فتحتها : بنصبح على الجميل ابو قلب تقيل
فى بالها : يادي النيله السوده طب اعمله ايه ده ؟؟؟
فكرت شويه وبعتتله رساله : اصبحنا واصبح الملك لله ولا حول ولا قوة الا بالله
بعتتها ولما وصلته فضلت تبص عليه وهو بيقراها ووشه اتغير وبصلها وابتسم لها ابتسامه صفرا محتاره ومحرجه
وهى ردت عليه بابتسامه غلسه جدا .
ايمان لما روحت وخلصت ماتش كل يوم واشرف والولاد ناموا بصت لاشرف وهو نايم :
وقالت فى بالها : ياريتك تفهمني . أنا عايزه احبك لا انا والله باحبك بس عايزه احس انى باحبك وانك بتحبني
وبتنهيده طوييييييله وبينها وبين نفسها:
انا لازم اغير حياتي انا مش هاعيش كده ابدا
يتببببببببع

هناك 19 تعليقًا:

حاسوباتيه يقول...

ايه ده ليه حبه صغننين كده انا عايزه كتير القصه حلوه قوي بس كتريها شويه

ولعلمك انا اكتر حاجه عاجباني هي صاحبتها الي بجد فعلا كويسه لان في صحبات بتجيب مصايب لكن هي معاها بجد وده جميل جدا ومستنينين الباقي وعجبني كمان انها قررت تغير حياتها

صبرني يارب يقول...

حاسوباتيه

اها والله حسيت انى باتقل عليكم لما اطول البوست واكتفيت بكده النهارده

والى جاي بقى ربنا يسهل وصاحبتها دي عندي مهمه اوي برضه

أليس في بلاد العجائب يقول...

ايه الجبس دا يعني ايه؟!!!!!!

ابقي اعتبري الكلمة و مرادفها في اخر الصفحة علشان امثالي وبعدين ايه الذل داااااا هما دول اللي خرجوا من ذمتك

يارب اشرف يشوف الموبيل بتاعها علشان تبقي تقولي كلام مفهمهوش :(

صبرني يارب يقول...

هههههههههههههههههههههههههه

اليس

الجبس ده فى الجزء التالث اتكلموا عنه الوش الجبس

وبعدين هى مسحت الرساله

ده اشرف هو الى هايطلع عينه عن قريييييييب
هههههههههههههههههه

MISS\GH يقول...

ماشاء الله ممتازه اسلوبك رائع جدا
اول زياره ليا وبجد اعجبتنى مدونتك تحياتى لقلمك المبدع

صبرني يارب يقول...

ميس

الله يكرمك انتى نورتينى واتمنى ما تحرمناش من نورك وشكرا للكلام الجميل

حسن حنفى يقول...

ربنا معاها

بس يارب تفضل علي كده مش ترجع تاني

واشرف يساعدها بقي يكون فيه اي رد فعل كده

:d

Che يقول...

رغم ان الفقره دى قصيرة انما جامده ... بس اوام كده اشرف لحق يقلب عليها ... لسه واخدها فى حضنعه بليل و يقلب عليها الصبح
ما علينا ... ادينى مستنى اشوف ايه القرارت الثوريه اللى هتغير حياتها بيها

أحمد حسن البنا يقول...

صباح الكروتة ياست هانم......بلاش تضحكى علينا وتبدأى تكروتى ...انتى المفروض بترغى وكان نفسنا نستمتع برغيك اكتر من كده...لكن المهم احب الف نظرك لشوية حاجات ليس للتوجيه ولكن للاستفسار والتساؤلات اللى جوايا كراجل مشغول بتركيبة شخصية ايمان ....انتى وضحتى من الاول ان سبب المها هو اهمال اشرف ليها او بمعى اصح عدم تعبيره عن حبه ( اللى جواه فعلا ليها ) واحساسها بالفراغ العاطفى (اللى هى محتاجاله ) وواضح برضو انها نفسها تعيش الحب او الحالة دى مع جوزها اكتر من كده بس نفسى تركزى اكتر على حاجة مهمة وفى الحلقات الجاية عايز افهم نقط مهمة جدا جدا تهمنى بشكل ادبى انك تفسريها لانك اكتر واحدة فاهمة ايمان لانك اولا ست وثانيا لانك اللى بتكتبى الحكاية والنقط دى تتلخص فى الاتى
1- هل لو كان اشرف مهتم بيها ومعيشها جو روميو وجولييت ( الى حد ما مش طول الوقت يعنى لان ده صعب عمليا لان الحياة بقت ليها مشاغلها برضو) كانت مش هتنظر لاخينا التانى من الاصل ؟ ولا احساس الست ممكن يتشغل باى نظرة اعجاب حواليها حتى ولو كانت بتحب جوزها وعلاقتهم اخر تمام؟
2- نفسى تركزى اكتر على تفسير احساس ايمان وهى بتبعت رد الرسايل على اخينا المتيم عايز اعرف ايه رد فعلها الداخلى وهى بتكتب الرد هل فعلا عايزه ترد عشان تطول العلاقة بينهم بالرسايل وتخليه يبعتلها تانى رسايل تحسسها بانوثتها ولا فعلا مش عايزاه يبعت رسايل تانى ؟ ولو مش عايزاه يبعتلها تانى ليه بترد عليه اصلا ؟!! الحته دى اهم محور لازم تدوسى عليه لان المشكلة اللى طرحتيها مش مشكلة اهمال اشرف لايمان بالعكس المشكلة الحقيقية هى ظهور المعجب فى حياتها واهم المحاور هو تفكير ايمان فى كيفية التعامل معاه لان الشخص ده ممكن يظهر لاى ايمان تانية وممكن تكون حياتها مستقرة مع جوزها ساعتها رد فعلها هيكون ايه؟ هتطنشه ولا هترد برضو؟؟؟؟ ركزى على الحته دى جدا جدا لان تركيبة الست فى رد الفعل ده بالذات اهم شىء نفسى اعرفه
3- تركيبة الشخص المعجب ده عايزك توضحيها اكتر وايه سر انشغال ايمان بالرد عليه ؟ هل لانه مميز فى شىء معين عن جوزها غير انه معجب بيها ولا هى مش شايفه فيه اى حاجة مميزة غير اعجابه بيها اللى هى مفتقداه ؟؟ يعنى لو كان اصغر منها مثلا او اكبر منها بمراحل او سىء السمعه او معروف انه حلانجى نسوان هل كانت برضو هتندمج معاه عشان عاجبها الاعجاب بغض النظر عن شخصيته؟؟!!!
4- هل ايمان بتفكر ولو للحظات فى خيالها بعلاقة محرمة مع الشخص ده تعيش فيها لحظات متعه بينها وبين نفسها ؟ مثلا يعنى وسورى انى بتكلم فى الحته دى بالذات بس ده ادب مش قلة ادب والله - هل وهى مع جوزها ممكن تتخيل انها مع شخص تانى ولو للحظات فى خيالها ؟ بخلاف طبعا انها عايزة كده فى الحقيقة ولا لا لانها المفروض انها برضو ست محترمة ومتربية وبتصلى لكن تركيبة الست الحالمة اللى زى دى ممكن تدوس الحتت دى فى التفكير ولا لا؟؟؟
استفسارات كتير مش عايزك تردى عليها هنا ولا مستنى تفسير نظرى او مسبق للاحداث بس عايز اشوفها فى الحلقات الجاية ان شاء الله
تحياتى ليكى ولفكرك المحترم واسلوبك الشيق فى الكتابة بس بلاش كروتة الله يخليكى وارغى اكتر من كده لان رغيك ممتع وفكرك مميز
تحياتى للاخت المحترمة وصاحبة الفكر الابداعى المميز
احمد البنا

شمس النهار يقول...

شفتي
ادي الرجاله
زي ماتكون كانت سهرانه مع حد غيره
يعني لو تعاون معاها الصبح
كانت هتخلي كل ايامه حلوه
هي هتفكر الف مره انها تعمل كده

صبرني يارب يقول...

بيبرس

الرد العنيف ما ينفعش لان اصلا هما ما كانش بينهم حاجه اساسا

وكمان لانه زميلها فى الشغل ما تنسوش الحاكايه دي لازم تنسحب بذكاء

صبرني يارب يقول...

che

ايوه يا سيدى نعملهم ايه الرجااااااله ههههههههههههههههه

صبرني يارب يقول...

حسن حنفي

انا كمان عايزه اشرف يساعدها بس هو مش عايز يفهم

صبرني يارب يقول...

احمد حسن البنا

هههههههههههههههههههههههه والله مش كروته انا قلت اخف عنكم الرغي شويه تبقى جرعه صغيره وان شاء الله النهارده احاول اكتب الجزء الجديد

بس ايه ده الاستفسارات دي كلها انا كده لما اخلص القصه هاعملكم ندوه بقى هههههههههههههههههههههه

بس على فكره
النقط الى انت اتكلمت فيها مهمه اوي وكلهااااااا دارت فى بالي

بص انا هارد عليك عشان انا عايزه اوضح النقط دي لانها فعلا مهمه

شوف ما فيش حد فى الدنيا مش محتاج انه يحس باعجاب الناس عموما مش بس الجنس الاخر دى غريزه طبيعيه

لكن لو وصلت لكونها كشخصيه يعنى بصرف النظر عن ايمان تستثير الاعجاب ده وتنتشي لسماعه يبقى هنا الشخص عنده مشكله نفسيه تتعلق بتقدير الذات مثلا

انا شايفه انه مش السبب اهماله لها لا السبب هو اهمالهم الاثنين لحبهم وانشاغلهم عن بعض واهمالهم لمشاعر بعض وكل واحد مستنى التاني الى يبدأ

السبب الاساسي انهم بدل ما يتشاركوا حياتهم قسموها نصين وبقى كل واحد له عالمه الخاص بعدوا عن بعض

ثانيا : بالنسبه لاحساس ايمان فى كونها عايزه تطول الامر لا خااااالص بالعكس هى بس بتحاول تنسحب بشياكه وذكاء ما يعملهاش مشكله او يثير حواليها كلام مش تمام خصوصا ان اصلا اصلا ما كانش في بينهم اي حاجه

ثالثا :بالنسبه للشخص التاني هنا فى القصه هو مالوش ملامح مميزه عن جوزها ولا حاجه بالعكس يمكن جوزها اميز منه لكن انا مش عايزه اركز عليه ولا عايزاه يكون راجل وحش له علاقات متعدده ومشبوهه لكن فى خيالي شايفاه واحد زيها تمام محتاج يحس بالحب وبيدور عليه بره بيته خلينا نركنه على جنب ونناقش مشاكل الراجل من خلال اشرف عشان نركز على على البطل والبطله

رابعا : بالنسبه للنقطه دي انا هنا باحاول انى اناقش حاله عامه جدا لواحده عاديه جدا

من وجهة نظري ان الاعم الاغلب من المجتمع العربي على الوجه الاعم والمصري على الوجه الاخص فى الناحيه الجنسيه بيربي البنت فى مكان مختلف خالص عن الولد وده بيخلق بينهم وفجوه كبيره اوي بتخلي العلاقه الجنسيه فى الجواز مهمه اوي عند الرجل فى حين ممكن جدا تكون مهمشه او حتى منبوذه من الست .

عشان كده ايمان ما لهاش اي اطماع من الناحيه دي ولا احلام مع محمود بالعكس هى زيها زي بنات كتير حلمت بالحب الافلطوني الى الناس شربته فى الافلام والقصص الرومانسيه الغير واقعيه بالمره

ومش باقول ان ده حال كل الناس انما انا باتكلم عن ايمان مخصوص وهاتعرف ليه ان شاء الله الجزء الجاي او الى بعده على الاكثر .

تحياتي لك ومبسوطه اوي بنقاشك على فكره ياريت تستمر

صبرني يارب يقول...

شمس يا شموسه

والله انا مش عارفه حبيتك ليه يمكن من كلام عمرو عنك لا بس انا حبيتك من قبلها لما دخلت عندك وانتى كنتى فى الحج

المهم يا جميل بتهيئلي ما حدش قراني فى النقطه دي ولا لمسها الا انتى

فعلا هو كده الى انا اقصده تحميل ايمان كل شيء فى الدنيا حتى تاخيرها فى النوم بعد ما سهروا سوا
فعلا ده بيخليها مره بعد مره تحسه عبء عليها ليس اكثر

تحياتي يا شموسه يا جميله

أحمد (زوج مخنوق ). يقول...

طبعا بغض النظر عن الكروتة المرة دي يا ام مريم
بس طبعا ده و لا وش جبش و لا حتى ميلامين
الوش الجبس يا ماما بيخلي اللى زي ده يقطم
ما ينفعش يفكر يبعت بصة حتى تاني
انتي عارفة كده بتفكرني بايه؟؟
يتمنعن و هن الراغبات

ثم هي ما فكرتش للحظة هو عاوز ايه منها و هي متجوزة؟؟؟؟؟!!!!!!!
ما ينفعش نقول معجب بيها و بس خلاص على كده وعايزها تبادله المشاعر

الكلام ده يبقى اهبل جدا

منتظرين الجديد بس بدون كروتة بليييييييييز

صبرني يارب يقول...

احمد

تاني نقول من الاول

انا هنا باقول يا جماعه هى اساسا مافيش بينهم اي حاجه مجرد ابتسامه وقبول رساله هبله ليس اكثر ده فى البدايه

ولو قطعت معاه بشكل خشن ودرامي هايبقى فضيحه لها ليس اكثر وده زميلها فى الشغل

ولا يتمنعن ولا بتاع هو اصلا مش حد لحوح ولا حلنجي ولا عايز منها حاجه

هو زيها بيدور على الحب الى مش لاقيه في بيته والى اكيد هو السبب فى ضياعه برضه بالاشتراك مع الطرف التاني

اقرا الرد بتاعي على احمد البنا بليييييييز يا احمد
وخلي زوجه تخلص امتحانات بقى وتيجى عشان وحشتني

بنت الغربة يقول...

حبيبتى ياصبرنى
انا عايزة اعرف بس
ليه رقم موبيل ايمان مع الاستاذ ده
وبعدين ماتغير الرقم بتاعها وهو هيفهم لوحده..
بلاش ترد عليه اصلا ..لان الرد بيعمل حوار ..حتى لو الحوار ده تهزيق..بس برضه حوار..
وبعدين انت بتكسل ليه ياجميل فى الكتابه؟؟
ماتكمليلنا اللى حصل بعد كده..
تحياتى ياقمر

شمس النهار يقول...

ده مش كده وبس
لو العيال نجحوا وعملوا حاجات جميله يقول لك ولادي طالعين لي
ولو عملوا حاده مش كويسه
يقولك
ادي خلفتك ادي ولادك
زي ماتكوني خلفتيهم لوحدك ومافيش بقا جينات وراثيه
ربنا معا ايمان
بس اوعي تخليها تغلط اوعي