الأحد، 25 يناير 2009

قلب ايمان .... السابع

الكليب ده لايق على البوست النهارده
ايمان واشرف حاسوا النهارده انهم بيحبوا بعض اوي وانهم ممكن يكونوا سعداء اكتر فعلا

بس ايمان قالت فى بالها : أنا يمكن مقصره شويه ؟؟؟!!!! بس يعنى هو ليه ما فكرش برضه يسعدني زي ما انا عملت ؟؟ واشمعن انا ابدأ .


وأشرف فى باله برضه : يا سلام لما بتسلكي بتبقى عال يا ايمان . فى ايه يعنى لما تروقي عليه كده كل شويه...... يارب تفضل كده على طول وتبطل نكد ونوم شويه يمكن تعقل يا عم اشرف .


ايمان وهى نايمه على كتف اشرف ومغمضه عنيها : اشرف انت نمت ؟


اشرف : ها لا لسه شويه .


ايمان وهى بتبصله بسرعه : لا اصحى وفوق عايزه اقولك على حا جه .


اشرف وهو نصف نائم : حاجة ايه دلوقتي خليها الصبح اصل انتى الكلام معاكي اخرته نكد وانا ماليش مزاج اتنكد النهارده خلينا حلوين كده .


ايمان : لا والنبى عشان خاطري مش هانكد عليك ولا حاجه .


اشرف : طب قولي يا ستى


ايمان : بص يا اشرف انا مش عاجبني حياتنا كده وحاسه اننا بنبعد عن بعض ولازم نعمل حاجه .


اشرف : طيب ماهو انا اعمل ايه يعنى ما انتى السبب .


ايمان : لا طبعا مش انا السبب لوحدي احنا الاثنين السبب ولازم نغيرها احنا الاثنين برضه .


اشرف : طيب وايه المطلوب مني يعنى .


ايمان : شوف يا سيدى انا لازم افضي نفسي شويه عشان يبقى فى وقت نقعد مع بعض ونتكلم مع بعض احنا بقينا نقابل بعض صدفه .


اشرف : لو عايزه تسيبى الشغل براحتك ما انا قايلك من زمان .


ايمان : لا مش هاسيب الشغل وانت عارف انه برضه ايد على ايد رحمه والعيال مصاريفها بتزيد ولو سبت الشغل دلوقتي يمكن ما الاقيش غيره بسهوله .


اشرف : طب امال ايه ؟


ايمان : انا طبعا مش هاقولك ساعدني انا عارفاك كويس . بس اسمحلي اجيب واحده مرتين فى الاسبوع تشتغل بس بدالي شغل الفلبنيات الى انا باعمله ده . انا الشغل كتير عليا اوي يا اوشي والله .


اشرف : مش انا قلتلك نتكلم الصبح .


ايمان بدلع وبوسه حلوه : عشان خاطري يا اوشي هاجيبها وانت مش هنا هاتصرف انا .


اشرف : مااااااااشي زي بعضه بس وانا مش هنا وما لهاش دعوه بالاكل ولا العيال .


ايمان : ماشي كلامك . وحاجه كمان .


اشرف : استر يااااااارب .


ايمان وهى بتضحك : تخلي بالك مني شويه وتساعدني انشاله بقلبك وتعذرني انا والله باتعب .


ومن هنا ورايح ايدى على ايدك ورجلي على رجلك فى كل حاجه فى البيت وبره البيت .


اشرف : لا ده كده تبقى تكتيفه ارخم من تكتيفة الديك فى الحله .


ايمان بدلع : اخس عليك يا اوشي انا تكتيفه .


اشرف : احلى تكتيفه يا قطتي .


ايمان : بس خلاص كده بس ما يمنعش ان التغيير قائم وانت لازم تساعدني .وبعدين...... اشرف اشرف انت نمت ؟؟؟


اشرف : اوخخخخخخخخخخ.


ايمان وهى بتتاوب : طيييييييب تصبح على خير .


تاني يوم كان يوم جميل اوي حاولت ايمان تطبق فيه كل حاجه فكرت فيها واتكلم فيها مع داليا ومع نفسها ومع اشرف كمان .

وحاولت تطبق دايما نظريه لازم تدي من نفس نوع الى انت عايز تاخده .

وفعلا لما كانت بتقول لاشرف: باحبك

كان بيبتسم لها ابتسامه ودوده اوي ويقولها : باموت فيكى .


وكمان اشرف اقترح يتغدوا بره . وراحوا اتغدوا واتفسحوا فسحه صغيره وبعدين راحوا زاروا مامتها وبعدها طلعوا على مامته كمان .

ورجعوا البيت هلكااااااانين بس مبسوطين وايمان كانت فرحانه اوي اوي وحاسه انها فعلا بدأت تغير حياتها للاحسن .


وبعدين جت ايمان تظبط المنبه بقى عشان النوم والشغل الصبح لقت فى رساله قلبها وقع فى رجليها وفتحت الرساله................


يتبع يا قطاقيط

هناك 21 تعليقًا:

mony يقول...

طيب الحمد لله علي الحوار الجميل ده و اللي ياريت يحصل بين كل الازواج



طبعا لازم المسلسل يتقفل بمفاجئة


و كلنا طبعا الرسالة ديه من مين و فيها ايه
ان ان ان

صبرني يارب يقول...

موني

ياااااريت يا موني كل الناس تعرف ان نسمة الهوا فى عز الصيف بتبقى كنز
حتى ان كانت على فترات متباعده

وان ان ان طبعا مهمه امال احنا بنلعب هههههههههههههههه

farahmarh يقول...

ماشى نستنى نعرف الرسالة فيها ايه مع

انى متوقعة بس مش هاحرق الاحداث بشرط

انك تكملى على على طول ما نستحملش

غيابك يا قمر

Che يقول...

انا زعلان منك ... كده تنزلى الفصل السادس فى الخباثه و انا مالحقش اعلق عليه ... بس ادينى باعلق على السابع
عجبنى أوى و هى بتفكر فى بالها انها مقصره فى حق اشرف انه فى باله بيفكر فى انها ماتنكدش عليه
بس انا زعلان من اشرف عشان بوسه و شويه دلع و الحته الروز يقوم يسلم كده على طول من اول جوله .. بس مش مشكله ... ابننا برضه
القطاقيط مستنين لما تقرى ليهم الرساله

شمس النهار يقول...

حلو جميل كده
لما نشوف سي اطفش هيعمل ايه الرخم ده
بقولك ايه ياصبرني يااختي
عايزين نعمل ورقه اعلانيه علي باب المدونه ممنوع دخول الرجاله
لحد مانخلص علي اطفش واهو احتياطي علشان مايلاقيش حد يحوش عنه من ناحيه ومن ناحيه تفضي له كده وتروقيه علي رواقه
ايه رأيك

حواء يقول...

السلام عليكم
ياعيني علي القصص واصحاب القصص
ابدعي ابدعي
اتحفينا يلا وكملي القصه بسرعه
بس سؤال يعني تنح حبتين
هو سعاتك ملقتيش غير اسم ايمااااان
خلاص مفيش غيره
خلاص جالك زهيمر ومفتكرتيش غير اسم ايمان
لاحول ولاقوة إلا بالله
سلام ياعسلوووووووووز

أحمد حسن البنا يقول...

اسجل حضور يافندم ( بصوت عالى وانا بأدى التحية زى العساكر ) تمام سيادتك يافندم الحوار عال العااااال وكل الشخصيات مروقة نفسهااااااا اما بالنسبة للاخت ايمان مرات الاستاااااذ اوشىىىىىى ربنا يوفقهااااااااااا فى قراية الرسااااالة وماتقعش فى ايد اوشى وتبقى ليلة اهلهااااااا طين .....سلام يافندم

أحمد (زوج مخنوق ). يقول...

يا رب اشرف يشوف الرسالة علشان يضطها
علشان بصراحة سكوتها على صاحبنا ده كل الفترة دي معناه مش كويس
فيا رب جوزها يشوفها

وش شرير و ضحكة شيطانية

صبرني يارب يقول...

فرح مرح

والله عمري ما نزلت بوستات بسرعه زي ما باكتب ايمان على فكرة وبعدين بس احداث ايه وحياتك انا نفسي ما اعرفها لسه بس لا انا بدأت كتابه فى الجزء التامن
تحياتي يا جميل ونورتي

صبرني يارب يقول...

che

لا يا باشا ما نقدرش على زعلك والله لك عليا لما انزل بوست جديد هاجي اقولك بس يارب الحق اصل انا باكتب البوست على خمسين مره اصلا

وبعدين زعلان من اشرف ليه كلهم كده يا ابنى على مر العصور هههههههههههههههه

صبرني يارب يقول...

شموسه

تصدقي فكره ؟؟؟

والله يا شموسه انا عايزه ارتب مع الستات كده ياختي نعمل جيش حمايه اصل انا حاسه ان انا فى ناس هاتغتالني ههههههههههههههههههه

بامووووت من الضحك يا شموسه على اطفش دي هههههههههههههه

صبرني يارب يقول...

بيبرس

احترنا فى امركم يا بعده

بعيد عنكم ده سايبنا ونايمين

قاعدين معاكم ده كابسين على نفسناااااااا

والله ما حد كابس على افكارنا الا انتم يا اخويا

بيبرس خلي بالك من نفسك على فكره انا مش مسؤله عن الى هاحصلك هنا
ههههههههههههههه

صبرني يارب يقول...

زوجه

والله يا فندم كان يوم الوان لماا خترت الاسم ده هههههههههههههههههههه

انا اصلا باحب الاسم ده طووول عمري وفى ناس كتير بجد باحبهم اسمهم ايمان مش عارفه هل انا باحبهم عشان الاسم ولا العكس ولا ايه ههههههههههههههه

بس برضه كان يوم الوان لما اخترت الاسم ده لبطلة القصه هههههههههههههههههههه

صبرني يارب يقول...

حسن البنا

تمام يا فندم هههههههههههه نورت والله

وبعينك مش هاعمل افلام عربي محروقه هههههههههههههههههه

صبرني يارب يقول...

احمد زوج مخنوق

طب انا عايزه منك طلب بجد انت وكل حد ماسك السكينه لايمان وشايفها انها مقصره فى صد محمود لحد دلوقتي

تقولولي كنتم عايزين منها تعمل ايه عشان تقدر ترجع فى كلامها ؟؟؟

يعنى تصده ازاي تخيل كده من فضلكم عشان بس نتناقش فيه مش عشان اغير حاجه فى مسار القصه بالنسبه لمحمود بالذات

قول احسنلك وش شرير وماسك شوكه والايد التانيه ساطوي وما بيضحكش

انا الى باضحك بس هنا هههههههههههههههههههههه

حسن حنفى يقول...

مش دخلت من زمان بس الحمد لله قرات كل اللي فاتني المره دي

:d

بس الحمد لله ويارب يفضلوا كده مع بعض علي طول مع اني هموت علشان اعرف الرساله بس يلا مستني البقيه

صبرني يارب يقول...

حسن حنفي

تنور فى اي وقت يا باشا وان شاء الله نقرا الرساله النهارده

حنين القلب يقول...

بصى الحوار عجبنى جدا


بس الرساله من جوزها
صححححححح
ولا من المنيل على عينه محمود

على العموم انا مستنيه اعرف

بت يا صبرنى انتى لازم تأليفى مسلسلات
مااااااااااشى
اسلوبك حلو اوى بجد
تسلم ايدك

شمس النهار يقول...

مين ده اللي يختالك
ده انت وراكي ستات
ربنا قال ان كيدهن عظيم
ماتخافيش ياصبرني اكتبي اللي انت عيزاه
نحن ورائك
ويااحنا يا اطفش وامثاله

صبرني يارب يقول...

شموسه

ماشي الواحد كده يتطمن ويكتب ويدووووووووس

ما شوفتيش الاستاذ عمرو باقليه كام يوم غايب لعله خير

صبرني يارب يقول...

حنين يا حياتي

نوووووووورتي نزل الجزء الجديد اهو يلا

ومسلسلات ايه بقى احنا ندخل على السينما على طول