السبت، 17 يناير، 2009

قلب ايمان .... الثالث

تنويه وتنبيه وتحديث وتحذير مهم اوي اوي اوي
القصه يمكن واقعيه جدا جدا يا جماعه لكن والله والله والله لا تعبر عن اشخاص حقيقين فى حياتي ولا حياة اي حد اعرفه ولا الموضوع متعلق باي واحد او واحده اعرفهم ولا كلمتهم ولا سمعت عنهم
يا جدعان احلف لكم ان حتى انا ما كنتش اعرف انى هاطول فيها كده واكتب احداث عامله كده ؟؟؟
يا لهوي كل شويه الاقي بلوى جيالي وانا قاعده كده
القصه من خياااااااالي الخاااااااااص
يا ربييييييي هايموتوني يا جدعان والله
=====================================================
استاذ محمود بابتسامه عريضه: صباح الخير يا مدام ايمان ...

ايمان بارتباك من مفجأه ظهوره قدامها وابتسامه باهته على وشها : صباح النور يا استاذ محمود .

استاذ محمود : ايه اتأخرتي ليه .. انا منتظرك من ربع ساعه ولا انتى بقى قاصده تقلقينا .

ايمان بارتباك اكتر من الاول وهروب بعنيها : اه اصل كان الشارع مقفول وانا جايه .

استاذ محمود : طيب يلا نطلع المكتب .

ايمان بابتسامه صفرا وملخبطه : نطلع المكتب .لا ماهو انا لسه هاعدي على داليا الاول اتفضل انت وانا هابقى اطلع .

وتطلع ايمان السلم بهروب شيك من استاذ محمود الى وقف شويه مش محتار ومش عارف يحدد موقفه . وهز راسه ومشي بنفس الابتسامه العريضه .

وتوصل ايمان مكتبها بعد شويه وتلمح محمود زميلها بيبص عليها وهى تهرب بعنيها بسرعه وتقعد على مكتبها تشتغل وما تبصش لاي حد خاااالص لكن من آن لاخر كانت بترفع عينها تبص هناك وتلاقيه اكتر الاوقات ماطط رقابته على اخرها عشان يشوفها
وبعدين تسمع صوت رساله وتقراها وتبقى مش عارفه تعمل ايه وتحس نفسها مخنوقه بدموعها وغصب عنها ترفع عينها على محمود وتحاول تبتسم ابتسامه صفرا بالعافيه ردا على ابتسامته العريضه الشغوفه جدا .

ايمان لنفسها وهى بتبص فى الساعه : يااااااه الساعه بقت 3 خلص اليوم اخيرا كان يوم ثقيل ورخم .

داليا : ايمان يا ايمان استنى انتى ايه مركبه عجل فى رجليكى

ايمان : ما انتى عارفه الى ورايا .

داليا :طيب باقولك بكره الجمعه هاتروحي لماماتك ؟

ايمان : لا ماما مسافره عند اخوها ليه ؟

داليا : ايه الرخمه دي مش انا قايلالك هاجيلك فى الويك اند .

ايمان :اه والله نسيت يلا هاستناكي سلام بقى .

وبعد تكرار نفس اليوم السابق تقريبا مع ايمان واشرف . بدأ يوم الجمعه والى بيبدأ برضه بشغل اسبوعي لايمان فى الشقه والهدوم والولاد اما اشرف بينااااااااام لحد صلاة الجمعه .

وعلى المغرب كده اشرف لبس واتظبط اوي وراح يقعد مع اصحابه شويه فى الكافيه

قائلا لايمان الى يادوب سألته هو رايح فين : اييييه موشح كل مره بلاش الواحد يفك عن نفسسسسسسسه .



وبعد شويه

ايمان : اهلا يا داليا اتفضلي ايه النور ده .
ووسط صريخ العيال بقى مع بعض والهيصه سلامات وطيبون .
ايمان : تعالى يا داليا نقعد جوه عشان العيال دول صداع اوي .
داليا بصوت هامس : هو جوزك مش هنا ؟؟
ايمان : لا يا حبيبتى راح الكافيه يقعد مع اصحابه شويه يفك علن نفسه .

داليا ضاحكه : طيب يا اختي ربنا يفكها عليها . انتى بتربطيه فى رجل السرير ولا ايه ؟؟

وبعد شويه رغي هنا وهناك .
داليا : تعالى بقى اقعدي انا شربت واكلت وعايزاكي فى موضوع مهم .
ايمان : خيييير يارب .
داليا : ايه يا ايمان مالك ؟؟انا خايفه عليكى انا حاسه انك بقتى مش طبيعيه حتى ضحكتك بقت تطلع ماسخه مالك يا بنتي

ايمان بتنهيده كبيره : والله ما نا عارفه يا داليا انا بجد تعبانه ومضايقه ومش عارفه اعمل ايه .

داليا : طيب ايه الى مضايقك وايه كمان حكايه سي محمود ده الى من يوم ما جه وهو عاملي فيها عبد الحليم وبيبربش على طول .

ايمان : محمود ايه بس . محمود ده تقدري تقوله انه نتيجه مش سبب .

داليا : طب ايه الاسباب ؟؟؟!!!

ايمان : مش عارفه انا حاسه ان حياتي بقت صعبه اوي وممله وزهقانه من كل حاجه بتهيئلي لولا ولادي كان زماني مت من الاكتئاب ويمكن كنت اتجننت وموت نفسي .

داليا ضاحكه فى محاوله فك الشحنه : ايه ده ؟؟ انتى اتجننتي فعلا باين . طيب نحجزلك فى المرستان من دلوقتي ؟؟؟!!

ايمان : انتى بتهزري يا ختي قريب ان شاء الله .

داليا : لا بجد انتى فى نعمه يا بنتى عندك ولد وبنت زي القمر وجوزك محترم واخلاقه كويسه وطيب والله وكويس ومستورين الحمد لله وبتشتغلي يعنى الحمد لله انتى احسن من غيرك
وان كان على الدوامه ما كلنا فيها انتى عارفه

ايمان : الحمد لله نحمده ونشكر فضله بس عارفه لو اضعاف كده دوامه والواحد يلاقي كلمه حلوه يسمعها ولا حضن دافي يستخبى فيه كانت تهون .

داليا : وليه كده طيب . ده اشرف طيب وبيحبك وما بيستحملش عليكى الهوا .

ايمان : تصوري انا ما بقتش عارفه هو بيحبنى ولا لا ولا حتى انا باحبه ولا لا !!!!

داليا : ليه بتقولي كده وليه الحياه وصلت معاكم لكده انتم متجوزين من ست سنين بس ما لحقتوش يعنى تقرفوا اوي كده من بعض .

ايمان : يا بنتى احنا خلاص ما عادش في بينا تقريبا كلام غير انا اقوله على طلبات البيت وهو يقولي على طلباته اكل وشرب وخلافه وبس على كده . لدرجة انى بقيت احس انى حتى باهرب منه ومش عايزه اكلمه حتى مش عارفه ليه .

داليا : يا خبر وليه وصلت الدنيا لكده ما هو دي غلطتك برضه مش غلطته لواحده . انتى لازم تعملي حاجه مش كده .

ايمان بعصبيه : هاعمل ايه انا ؟؟؟ اشحت منه الحب بس يا داليا انتى مش هاتحسي بيا انتى اصلك واخده ياسر عن حب ربنا يهنيكم ببعض انما انتى عارفه ان انا ما كنتش عرف اشرف قبل الجواز .

داليا : يا سلام لا طبعا مش هو ده السبب . انتى اكتر واحده عارفه ان ياسر خطبني بعد شهر واحد من شغلي فى الشركه القديمه ما لحقناش يعنى لا نحب ولا نعمل مجرد اتعرفنا . لكن بعد كده حبينا بعض انتى بس الى حاطه فى دماغك كده صدقينى .

ايمان : جايز مش انا باقولك انى ما بقيتش عارفه حاجه .

داليا : وبعدين ما انتى كنتى ايام الخطوبه بتحبيه ومبسوطه وطايره واول ايام الجواز برضه ايه الى حصل دلوقتي ؟ .

ايمان بدموع نزلت على خدودها وهى مش حاسه : مش عارفه يا داليا مش عارفه انا مخنوقه مخنوقه ومش عارفه اعمل ايه .قوليلى انتى اعمل ايه ؟؟؟

وفتحت فى البكاء فى حضن داليا

داليا : يخرب عقلك بس بس خلاص ما تعيطيش كده ايه يا بنتى طب اهدي بس اهدي ...... ايمان اوعى تكوني مخبيه عني حاجه ما اعرفهاش ؟؟

ايمان بصوت مليان بكاء: لا والله هو كده بس .

داليا : طيب خلاص اهدي بقى والله انده العيال يتفرجوا عليكى ويزفوكي ويقولوا الهبله اهي .

ايمان ضحكت والدموع فى عنيها وقامت مسحت دموعها وحاول تبطل بكا .

داليا : ايوه كده اعقلي وان شاء الله كل حاجه هاتتحل ما تقلقيش بس انا ليا عندك طلب .

ايمان : عنيه يا دولي .

داليا : لا مش عايزه عنيكى دلوقتي ..... محــــمــــــــــــود

ايمان : يووووووه بلاش السيره دي . خلاص انا عارفه هاتقولي ايه . انا نفسي ندمانه انى حتى فكرت كده ومش عارفه اعمل ايه

داليا : طيب يا فالحه . وطبعا اول حاجه تعمليها تستغفري ربنا كده وتعقلي وبلاش الهبل ده وسي بتاع ده من بكره ما يشوفش الا الوش الجبس عارفاه ؟؟

ايمان : من غير ما تقولي النهارده كان وشي كله جبس بس كان لسه طري على بكره يكون نشف .هههههههههههههههه
داليا : طيب لما نشوف بكره هاجي افتكش عليكى ههههههههههه..... يلا بقى قومي اغسلي وشك بدل ما جوزك يجي يلاقي كده وتعالي نشوف العيال عملوا ايه هناك زمان الانتريه بتاعك فى الشارع .

ايمان وهى بتحاول تضحك من قلبها : طيب يلا .

ايمان قعدت مع داليا والعيال وضحكت من قلبها وارتاحت شويه وبعد ما داليا مشيت قفلت الباب وفكرت كتير اوي طول ما هى بتعشي الولاد وتنيمهم .
وبعدين راحت اتوضأت وصلت وقعدت تقرا قرآن وتدعي ربنا انه يغفر لها ويلهما الصواب ويبعد عنها كل حاجه وحشه ويهديها وغصب عنها بكت جامد اوي اوي .
وصوتها علي شويه

وبعدين سمعت صوت اشرف : ايمان ايمان ايه مالك فى اييييييه ؟؟ بتعيطى ليه ؟؟؟ انتى تعبانه ؟؟ حد من العيال تعبان ؟؟؟
ايمان بصوت كله عياط برضه : لا لا مافيش حاجه يا اشرف كلنا كويسين انا بس كنت مضايقه شويه .

اشرف : يوووووووووه يادي النكد الازلي انتى يا بنتى واخده دكتوراه فى النكد العائلي . مضايقه ليه

ايمان وهى بتعيط اوي : مافيش لوحدي كده مضايقه .

اشرف وهى صعبانه عليه : طب تعالي قومي .
واخدها فى حضنه وطبطب عليها وهى غاصت فى حضنه اوي ومسكت فيه اوي
وقالتله : اشرف ما تسبنيش يا اشرف لوحدي عشان خاطري .
اشرف وهو بيحاول يضحكها : ايه ده هو انتى طلعلك عفريت فى الضلمه ولا ايه وانا مش هنا .
ايمان بتبتسم والدموع فى عنيها : بلاش رخامه بقى .
اشرف : طب يا قطتي قومي اغسلي وشك وفوقي كده .
ايمان : بقالك كتير ما قلتليش يا قطتي
اشرف : هو انا لازم اقول ما انتى عارفه .
ايمان : طيب مش هاتتعشى .
اشرف : يوووووووه مش عايز اتعشى كلت فى الكافيه بليله .
ايمان بوشوشه : طيب طيب ما تزعقش هاتصحي الولاد .
اشرف : لا يصحوا مين (وبشوشه خالص ) كلت فى الكافيه بليله .
............................................................................................

يتبع ان شاء الله

هناك 39 تعليقًا:

mahasen saber يقول...

الله ما احلى الرجوع اليه

وما احلى احساسه بيها

بس تخيلى يا صبرنى انا شفت حاله زى حالة ايمان كده بالضبط وانا فى ثانوى واستغربت جدا
بس لما الدنيا خدتنى لفه وجابتنى تانى
عرفت ان الحياه ياما فيها

بس لا يعلى على علاقة الواحد بربنا بتخليه يحس انه فوق المشاكل والبعد وفوق كل البشر

بس بجد انتى بتجسدى احاسيس ايمان جدا
ووصفك للحاله رائع
انا بحس انى قاعده وسطهم وبتفرج عليهم

وده ابداع منك يا جميله

يا سباعى المستقبل
تسلم يا قمر
بس ازاى ولادك يا رب يكونوا بالف خير ان شاء الله
ربنا يباركلك فى حياتك ويسعدك دايما
ويفرحك بكل من تحبين

صبرني يارب يقول...

اها وشكرا على السؤال يا جميل الحمد لله ولادي كويسين وبوسيلي بيرو

صبرني يارب يقول...

محاسن يا قلبي

ايه ده مش معقول كده النور ده

متشكره اوي على الكلام الجميل

ولسه مش عارفه هانعمل ايه فى ايمان

Lady E يقول...

روووووووعة بجد بجد اسلوبك جميل جدا

وحسيت بإيمان فعلا لأن كل انسان بيكون نفسه يحس بالحب والأمان وخصوصا من حبيبه

واتأثرت لدرجة ان عنيا دمعت وانا بقرأ الجزء الاخير من البوست لما ايمان كانت بتعيط

ده الجزء الثالث لسه هقرأ باقي الاجزاء ان شاء الله

هنتظر الجزء الرابع

حاسوباتيه يقول...

اخيرا الحمد لله في بشاير اهو بانفكاك المشكله ومستنيه اباقي بفارغ الصبر

Che يقول...

شايف التعليقات كلها تفاؤل بس انا مش متفائل ليه مش عارف جايو عشان انا سوداوى المزاج بطبيعتى و جايز عشان حاسس ان الموقف ده مجرد مسكن للحاله اللى كانت ايمان فيها .. مش عارف
بس لسه مستنى باقى الحكايه عىل نار

عمرو يقول...

طيب ما هو ده الواقع فعلا و بكل حذافيره
الزوجه مشغوله فى عملها طول النهار و بعدين شغل البيت اللى المفروض كانت تعمله أثناء تواجدها فى العمل و بعدين مذاكرة العيال و ما يستتبع كل ده من تأثيرات نفسيه عليها بالاٍضافه لشىء من الاٍهمال فى مظهرها و الوزج بالتأكيد مش عاوز كده
الزوج عاوز مراته مفرفشه و حبوبه و يمكن كمان يكون أنانى و مش بيقدر أوى تعبها فى الشغل و فى البيت و مع العيال فيبدأ يعمل له حياه خاصه بتؤدى بيه لكافيه سيلنترو اللى يا رب يولع بجاز و الزوجه كمان ممكن تبدأ تلتفت لشخص بيديها الحنان و الاٍهتمام و تنشغل بيه و يتخرب البيت بسبب أن الزوج و الزوجه لم يتفهموا اٍحتياجات بعض
نرجع مرجوعنا للدايره المغلقه اللى هى مين الغلطان فى موات المشاعر الحلوه بين الطرفين
الحقيقه يا أم خالد أن الأتنين معذورين بس رأيى أن غباء الزوجه و اٍهمالها فى الاٍستحواذ على زوجها و مشاعره و رغباته هو السبب الأساسى فى اٍنهيار العلاقه لأن الراجل بطبيعته بيكن لزوجته و بيته و عياله لو وجد راحته فيهم لكن الاٍنشغال عنه بالشكل ده بيبقى له مردودات سيئه متهيألى حنشوفها فى الأجزاء اللى جايه
سيرى على بركة الله يا أم خالد و الله يكون فى عون الجميع

بنت الغربة يقول...

حبيبتى ياصبرنى
يعنى ايمان دى بقالها ست سنين بس وبتشتكى....
امال انا اعمل ايه؟؟؟؟
طب والله كويس انى صابره ومستحمله
ومع اللى بشوفه من الباشا
عمرى مافكرت ابدا انى ابص لواحد غيره
مع انهم كتييير
وبعدين ده أشرف طلع كويس وبيقولها ياقطه...
مش بيديها بالمخده فى وشها....
بس بصراحه روايه تجنن
واسلوبك حلو قوى
وانا مستنيه هيحصل ايه بعد كده
تحياتى ليك ياقمر
ووحشتينى

صبرني يارب يقول...

ليدى

حبيبتى ربنا يكرمك شكرا اوي على الكلام الجميل وانا كمان مستنيه زيك برضه نورتي يا جميل

صبرني يارب يقول...

che
ههههههههههههههههههه سوداوي

لا لا انت مش سوداوي ولا حاجه

لكن هى لسه المشكله ما اتحلتش بالفعل

صبرني يارب يقول...

حاسوباتيه

هى فعلا يادوب بشاير

صبرني يارب يقول...

عمرو

ايه كافيه سيلنترو ده ؟؟ مضايق منه كده ليه ؟؟ ولا ا نت شوفت اشرف وهو قاعد هناك ؟؟
هههههههههههههههههههههه

عمرو مش غباء ا لست بس غباء الراجل كمان
صدقنى هى دايره ومش غلط واحد لواحده

لو خدناها من المنطلق ده يبقى كمان اكيد اكيد الست لو لقت الحنان والحب فى بيتها مش هاتدور عليه بره ابدا
والست مياله اكتر لبيتها والله

لكن طبعا هى برضه مسؤله عن وجود الحنان ده فى بيتها بشكل او بآخر
تحياتي لحضرتك ونورتنا

صبرني يارب يقول...

بنت الغربه

لا لا يا ماما احنا هانديلك جايزه اكبر مراره فى التاريخ ههههههههههههههههههه

لا هو جوزك ده مواله كبير اوي عايز اعادة تأهيل للحياه الزوجيه ههههههههههههههههههههه
على ييييييييييييدي ان شاء الله ايامه مش فايته معايا هو كيمو

ويا داليا ستات كتير وانتى منهم حواليهم ناس كتير برضه ومش بيعملوا كده مش بس عشان اجوازهم لا عشان هما نفسهم بيرفضوا الغلط

نورتي يا جميل

همس الاحباب يقول...

تسلم ايديكى يا ام مريم
انا قريت الثلاث حلقات دفعة واحدة علشان اربط الاحداث ببعضها
القصة جميلة جدا ومعبرة جدا
واحداثها مش غريبة عن واقعنا
انتى كانثى عبرتى عما بداخل ايمان وما يعتصرها من ضغوط واهمال احيانا
وعبرتى بطريقة رائعة جدا
ولكن ينقص القصة التعبير عن النصف الاخر لكى تكتمل القصة
بس بصراحة القصة رائعة جدا
تحياتى

mayada يقول...

يتبع برضه
خليني وراكي ياام مريم
لما اشوف القصه دي هتنتهي علي ايه
عشان اقول رائي دفعه واحده

صبرني يارب يقول...

مياده

لا ما ليش دعوه كل مره تدخلي تناقشينى بقى ماليش دعوه هههههههههههههههه

نورتي يا جميل

صبرني يارب يقول...

همس الاحباب

والله انت منورنا يا فندم

بس حكاية الطرف الاخر ده بقى انا لسه محتاره فيها مش عارفه ادخله فىالموضوع واتوغل فى حياته هو كمان ولا اعمل ايه
لسه مش عارفه
قول يارب

ونورتنا

حنين القلب يقول...

ررررررررررررروعه يا صبرنى والله
الاسلوب البسيط اللى بيعبر عن الحنيه والحب
والله احنا يا ستات طيبين اوى
بحبه حنيه وحب يضحكوا علينا

انا عايزة الباقى
مش هقدر استنى
احكى بسرعه
ماشى
تسلم ايدك يا ام مريم

حسن حنفى يقول...

اتمني ان تكون النهايه سعيده

صيدلانيه طالعه نازله يقول...

يعنى اول مره اجى و الاقى عندكم اشرف زى عندنا
بس بجد القصه جميله قوى و فعلا كلنا محتاجين الحنيه و حضن الزوج و حنانه و مش لازم يكون فيه محمود خالص و عشان ميبقاش موجود لازم نقرب اوى من بعض و منجرحش بعض مهما حصل و الزوجه و الزوج يكونوا دايما متوحدين بحبهم و حنيتهم على بعض
ايه اللى باقوله ده طب ما انصح نفسى الاول
ربنا يهدينا كلنا

صبرني يارب يقول...

حسن حنفي

والله وانا كمان اتمنى كده

صبرني يارب يقول...

حنين

حبيبتى تسلمى يارب ونورتي

اه والله يا اختي مش احنا غلابه ؟؟؟
هههههههههههههههههه

عنيه حاضر ربنا يسهل

صبرني يارب يقول...

صيدلانيه طاعله نازله

ايه ده ايه النور ده

والله كلهم اشرف يا بنتى وبعدين فى الاخر يشتكوا

ولو سمحتي تابعي معانا عشان تشوفي ايمان هاتتصرف ازاي يمكن الموضوع ده ينفعك

أحمد (زوج مخنوق ). يقول...

اه بالمناسبة
سيلنترو ده يعتبر اشهر سلسلة كافيهات في مصر
جامد جدا

بس مش من النوع اللي بيقدموا بليلة

أحمد (زوج مخنوق ). يقول...

يتهيألي الجزء ده اثبت كلامي يا ام مريم
مجرد ما الزوج قدم خطوة اهو
راحت في حضنه و مسكت فيه و عيطت على صدره
كل ده من مجرد خطوة
و هو كمان
برضه رجع تاني للرومانسية لما حس باحتياجها ليه
على فكرة اي راجل في الدنيا ما يقدرش يقاوم ست مبيناله ضعفها
فعلا ده سر من اسرار الرجال
بس انا عارف ان 90% من الستات برضه مش هيعرفوا يستخدموه صح
معظمهم بقوا اعضاء في جمعية المرأة المتوحشة و المسترجلة
و الكارثة يجوا بعد كده يقولك ده مش حنين و مش رومانسي

ااااااااااااااااه
وش مفروس

منتظرين نشوف الوش الجبس
بس على الله ما يطلعش عجينة لسه مش جبس

تحياتي

أحمد حسن البنا يقول...

السلام عليكم ورحمة الله وبركاته
نحياتى اولا ....والتحية كبيرة جدا للدماغ اللى بتدير الحوار الممتع ده ....عجبنى السلاسة فى الحوار والسيناريو البسيط السهل الممتنع للاحداث وفعلا الحكاوى دى فى كل بيت وكل شغل وكل مكان فيه ايمان وفيه اشرف وفيه كافيه بس عجبتنى اوى حكاية البليلة ههههههههههههه انتى كلامك بدا بحكاية عادية لكن الحوار والاحداث بتعلا معاكى واعتقد انها هتبقى قصة مش عادية تحياتى ليكى وانتى عندك فكر حلو جدا بس ليا تعليق اتمنى تتقبليه
- القصة جميلة والفكرة حلوة والحوار ممتع يبقى ليه صياغتك ماتكونش على شكل سيناريو حركى مكتوب بالفصحى ؟ دى ممكن تكون مسلسل ازاعى ممتاز ولو خليتى التعليق على الحركة والسيناريو بالفصحى يبقى انتى كده عملتى ورق متكامل لمسلسل محترم بيناقش اهم قضية فى البيوت انهارده وهى قضية الرجل التانى الدخيل فى حياة الزوجة المطحونة ؟ انا بقول كده لانى شايف ان فكرك فى السيناريو عالى وبلاش تخلى القصة رغى عادى من امراة مطحونة وخليها رواية متكاملة جاهزة للعرض لكل قارىء سيناريو حقيقى ( اقصد ورق سيناريو فنى بجد) لكن ده مش مهم مادمتى بتكتبى تحت عنوان رغى امراة مطحونة ....هو رغى لزيز جدا لكن خسارة تخليه رغى لان قماشة الموضوع سيناريو خطير ممكن يكتمل ادبيا وفنيا ويوصل شكلا لمستوى مسلسل ازاعى او حركى بس حقيقى رغيك شيق جدا ومافيش فيه رغى خالص الكلام فى الصميم وكل كلمة فى مكانها ومافيش مط فى الحوار
تحياتى لك وهتابعك كتير جدا واتمنى الاقيكى فى مدونة المسرح والروايات الخاصة بيا فيها نصوص مسرحية وقريبا باذن الله هنشر اول مسلسل كتبت نصه حاليا لكن بنسق الكلام تجهيزا للنشر وانا شغلى شغل سيناريوهات حركة ممكن تضيف ليكى شىء اعتقد مش هيكون جديد عليكى لكن ممكن يغير كتير من اسلوبك الرائع ولانى استفدت جدا من سيناريو امراة ممتعة فى الكتابه اوجهلك تحية عميقة جدا من القلب واقولك شكرا على حاجات حلوة اضفتيها لفكرى عن المراة الكاتبه ونظرة الست لبيتها وشخص اخر داخل حياتها نظرة تهمنى جدا وبدرسها اجتماعيا من فترة وبحاول ارصد تطوراتها على المجتمع المصرى وحاسس انى هستفيد من رؤيتك كامراة لامراة اخرى بتمر بالمشكلة
تحياتى اختى المحترمة والفنانة المتميزة وبلاش تهتمى باستفسارات الناس عن اصل قصتك وهل ليها علاقة بيكى او بحد حواليكى او لا ....اكتبى وبس ولو كل مؤلف كتب تنويه على كل قصة كتبها انها مش شخصه يبقى نبطل كتابه باه ونأزأز لب زى كل الناس ونردم على ابداعنا عشان الناس مش فاهمة ان دى قصص ...............سلامى ليكى وجايلك تانى
احمد البنا

صبرني يارب يقول...

احمد زوج مخنوق

اها بس لسه مش عارفين جرعة الحنان دي هاتستمر ولا لا وهاتفضل لحد امته

وهى المره قدمت رجل ياترى هو هايجي مره ويقدم هو مره ؟؟؟

ولا المفروض انها تفضل هى بس الى محتاجله وتشحت منه الحنان والحب ؟؟؟؟

وبالنسبه للكافيه معلش بقى انت عارف اختك قرويه ساذجه ههههههههههههههههه ما اعرفش حاجه فى القاهره

وبعدين ازاي ما يقدموش بليله يا احمد البليله دي مهمه اوي اوي فى الحياه هههههههههههههههه

لا انا لما انزل القاهره هاروحلهم مخصوص ينزلوا بليله

نورت يا استاذنا

صبرني يارب يقول...

احمد حسن البنا

ايه ده سيناريو حته واحده ؟؟؟

لا لا كده هاصدق نفسي بقى هههههههههههههههههه

اولا انت نورتنا بجد وان شاء الله هازورك انا بس دخلت الوصله الى ادهاني محمد وما اعرفش ان عندك مدونه تانيه

ثانيا بالنسبه للحوار بالفصحى أنا عملت كده فى الجزء الاول بناءا على نصيحه صديق واخ برضه بس مش عارفه ليه حسيته رخم ومش لايق عليا ههههههههههههههههههههههه
مع انى باحب اقرا بالفصحي واحيانا اكتب بها لكن تحويل الكلام بالعاميه للفصحى سهل

مش عارفه حبيت القصه تبقى ابسط ما يمكن عشان تعبر عن حياة الناس بلغاتهم

على فكره لم اكن انوي باي شكل من الاشكال عمل قصه بالمنعنى الادبي لانى كمان فعلا مش دارسه وما عنديش علم بالمواضيع دي خالص

انما انا حبيت اقول كلام كتير اوي لقيته هايكون اسهل واجمل من خلال قصه

وربنا يسهل يمكن نقرا اكتر ونتعلم اكتر ونكتب احسن الله اعلم

حضرتك نورتني ويارب دايما منور

صبرني يارب يقول...

بيبرس

لالا ما بامضيش اتوجرافات يااستاذنا بقت موضه قديمه بقى ممكن ابعتلك امضتي على اميل هههههههههههههههههههههههههههههههه

ايه يا استاذ بيبرس خليتنى ابص ورايا اشوف فين الاذاعه والتلفزيون والمسرح ده ههههههههههههههههههه

تحياتي لحضرتك ونورت

شمس النهار يقول...

زي ماقالت محاسن
مااحلا الرجوع اليه
ماالدنيا حلوه اهو والرجل اول مالقي ريق حلو
دلعها وقال ياقطتي
يقطع القطط وسننها
وعلي رأي عمرو ربنا يولع في سيلنترو واقرانه من الكافيهات
محمود بقا يروح يدور علي قطه تانيه

صبرني يارب يقول...

شموووووووووسه حبيبتى

يولع محمود بقى مش مهم هههههههههههههههههه

صدقينى كل واحد فيهم محتاج ريق حلومن التاني بس

عمرو يقول...

شمس النهار
طيب سيلنترو و عرفنا حكايه
بس أنتى ليه متغاظه من القطط ؟؟

شمس النهار يقول...

شوفي لو كل واحد استني التاني هتخرب دايما الست هي اللي بتعشش علي بيتها وجوزها
تعالي كده قولي لها ان جوزك عينه من واحده تانيه هتعمل البدع عشان ترجعه وتفتكر الحب وسنينه
وصدقيني كتير من الرجاله لما بيلاقي مراته اتعدلت كده بيرجع
الست الشاطره اللي ترضي جوزها وبيتها
حماتي كانت تقول
دي حرب الصبايا
جوزك الاول وبعدين البيت والعيال
وامي كانت تقول اي شغل للبيت تعمله شغاله لكن في حاجات ماتعملهاش غير ست البيت
المهم تعالي نشوف عمرو ماله
بيقول مالها القطط نرد عليه بقا
اصل ياكينج عمرو
كل ماواحد يحب والا يمشي مع واحده والا يعاكس واحده يدلعها ويقول لها يقطه
ايه الحكايه هي مالهاش اسم دلع يعني
قوم ندلعها بقطه
بصراحه اسم مستفز
طب هي تدلعه وتقول له يا ايه اختار حضرتك كده من نفس النوع اسم تدلعه بيه
معلش ياصبرني
تعديت علي حقك في الرد
بس حسيت ان الطلعه دي تبعي

عمرو يقول...

شمس النهار
يا برنسيس اللى بيروح خلاص مش بيرجع
يعنى لو الزوجه فضلت تخنق فى الزوج و تهمله و يبقى البيت و العيال ليهم الأولويه لما تزهقه و ماتعرفش تعمل تعادل بين جوزها و بين بيتها و عيالها فيقوم الزوج يلاقى اللى ناقصه فى سيلنترو تقوم الزوجه تفوق و ترجع لعقلها و تحاول ترضيه بيبقى الوقت متأخر يا برنسيس
خلاص اللى راح مش ممكن يرجع تانى
و لو رجع بيبقى مشروخ خلاص و حاجه كده مسخ مالهاش طعم لأن الزوج بيبقى عارف أن دى مجرد خطه من مراته علشان يرجع لها و بس مش علشان هى عاوزه ترضيه
و بعدين يعنى لما هو حيدلعها و يقولها يا قطه المفروض هى حتدلعه تقوله أيه ؟؟ أكيد حتقوله يا مشمش :))

شمس النهار يقول...

صبرني ياحبيبتي الموضوع كبر بيني وبين عمرو
اطلعي انت منها بقا والا اقول لك تعالي اقفي جنب بنت جنسك
اه ده تفعيل لنظرية مش كل قط يتقال له يامشمش
وبعدين هو الزوج بيتلكك اول حاجه يجري علي سيلنترو واقرانه
مايحاول يصلح مايحاول يساعدها عشان الحياه تمشي
والا هي تماحيك عشان يبص بره

عمرو يقول...

شمس النهار
أهلا
أهلا أهلا
أنا وقعت فى مدونه نسائيه
و فى بوست نسائى
و فى تعليقات أغلبها نسائيه
حاسس أنى فى عربية المترو بتاعت السيدات
أين أنتم يا رجال بلوجر ؟؟
أخوكم بيتعرض لحملة اٍضطهاد !!
يا برنسيس شمس النهار أكيد أى زوج بيحاول كتير كتير يصلح من شأن حياته الزوجيه قبل ما بييأس و بيشد الرحال على سيلنترو و أكيد برضو مافيش راجل ماعندوش اٍستعداد يبص بره اٍلا من رحم ربى و ده بيتوقف على مدى اٍحتواء زوجته له
بس أكيد مش كل الرجاله عينهم زايغه :)

شمس النهار يقول...

والله
بتستنجد دلوقتي
انت مش شايف جوزها عمل ايه تاني يوم
حملها مسؤلية التأخير وكأنها كانت بايته بره البيت
صحيح مش كل الرجاله عينهم زايغه
بس في اللي عينه بتزوغ وبيفعل هذا الزوغان فابيبان طبعا
وفي اللي بيزوغ ومش بيقدر يفعل النظريه فامابيبنش
وكل واحد وظروفه
اللي عايزه اقوله ان الحياه الزوجيه مشتركه بين الاتنين
لازم همه الاتنين يشيلوها مع بعض وخصوصا لما تكون الزوجه بتشتغل
يعني حلو تساعد في مصاريف البيت وتشيل عنه الحمل ومش حلو هوه يساعد في مسؤلية البيت معاها
وخصوصا ان عمل المراه دلوقتي مابقاش فنطزيه والا عشان تحرير المراه وتحقيق الذات والكلام اللي ضحكوا بيه علي الستات ده
لا شغل المراه في ظل الظروف الاقتصاديه اصبح ضروره
وكمان بقا امان لها منغدر الزوج اللي غالبا مابيكونش راجل كما ينبغي وعند الطلاق يرفع ايده عن كل حاجه بحجة انه يربيها مش عايزه تطلق تشرب
يانهار ابيض
ايه ده كله انا تشعبت كده ليه
معلش ياصبرني
انت اللي عملتي كده بقصتك اللي فتحت علينا ابواب الحوار

صبرني يارب يقول...

ايييييييييييه ده خياااااااانه

قاعدين فى الجزء التالث وانا قاعده لوحدي فى الجزء ا لرابع ينفع كده ههههههههههههههههههههه

شموسه ابصم على كلامك بالعشره

عمرو تعالى ده وقعت ولا حدش سمى عليك

يا نهار الوان

ايه الى انت بتقوله ده ؟؟؟؟


تقوم الزوجه تفوق و ترجع لعقلها و تحاول ترضيه بيبقى الوقت متأخر يا برنسيس
خلاص اللى راح مش ممكن يرجع تانى
و لو رجع بيبقى مشروخ خلاص و حاجه كده مسخ مالهاش طعم لأن الزوج بيبقى عارف أن دى مجرد خطه من مراته علشان يرجع لها و بس مش علشان هى عاوزه ترضيه


نعم !!! لا لا حقيقى نعم بقى يعنى مطلوب منها ايه حضرتك ويعنى ايه الى انكسر ما عادش يصلح ويعنى عشان عايزه ترجعني مش عشان ترضينى يعنى ايه الفرق يا فندم

حتى لو كانت يا اخي مش بتحب وكارهاك وحبت ترجعك عشان عيالها الست تشكر يعنى

مش معقول ابدا نفضل نتحايل على بعض طول عمرنا اننا نعيش كويس ولما تمد لها ايدك تهرب هي ولا تمدلك ايدها تقولها خلاص بعد العيد ما يتفتلش كحك يا حدوقه

لا يا عمرو الست حقيقى فى مجتمعنا غلبانه وعندها مشاكل كتير نفسيه ما حدش حاسس بها

عشان كده مش لازم تصدها وتقولها خلاص خلصت سنيترو وصل يا ناس يا عسل

المفروض تكرمها زي ما اكرمتك عمرها بحاله وغصب عنها اعتبره يا اخي مرض نفسي عن بعض الستات

عمرو احنا نقسوا على بعضنا اوي مع ان المفروض يكون بينا موده ورحمه مش كرامتي العاطفيه نقحت عليا والنبى ياا ختي

شموسه مدونتك يا جميل اي حد تحبي بزنقيه فى اي كورنر اتفضلي
هههههههههههههههههههه
حتى عمرو او اقولك بالذااات عمرو وابقى اندهليى وانا اساعدك

قال خلصت قااااال والى اتكسر ما يتصلحش

صبرني يارب يقول...

اه شموسه صحيح

ايه موضوع قطه ده ههههههههههههه

على فكره انا قعدت افكر كتير انقيلها دلع بس حبيته يكون خصوصي يعنى مش عارفه جت معايا كده ساعتها

وبعدين بصي خدي دي امووووووووه
اه دي بوسه كبيره اوي عارفه ليه

عشان اكسبرشن يمشي مع واحده
ههههههههههههههههههه
عارفه ليه ؟؟
عشان انا باحب اقوووووله اوي عشان هما بيهربوا منه ويقولك دي كلمه بيئه

وهما بيسقطوا زباله من بؤهم احيانا الشباب يعنى

بس الكلمه دي بالذات بتوجعهم بقى بس انا باحب اقولها عشان هى دي الحقيقه الى بيهربوا منها بكلمة اللووووف بتاعي ومرتبتيييييييين وبنحب بعض والحركات دي

وانا كنت هازعل اوي على فكره لو القصه عدت من غير ما نختلف حواليها كده


خلي بالك يا شمس ايمان مهاجمه هجوم فظيع من القراء حتى الستات منهم على اساس انها ارتكبت جريمه فظيعه انها ضحكت لمحمود

تفتكري لو كان بطل القصه راجل كانوا برضوا هايعملوا كده ؟؟؟؟

شمووووووسه يا منورااااااااني