الأربعاء، 14 يناير، 2009

قلب ايمان ... الثاني

سلام عليكم سوري يا جماعه على التاخير بس والله غصب عني يلا بسرعه عشان اقولكم عن ايمان كلام كتير ......
خلصت ايمان الصلاه ومشيت هى وداليا وما اتكلموش خالص لحد ما وصلوا لمكتب ايمان الى كانت وشها متغير وباين عليها الضيق جدا من كل شي ء
ويمكن علشان كده اشفقت عليها داليا من الموقف كله وطبطبت عليها

وقالت لها وهى بتشد على ايدها : ما تزعليش مني يا ايمى انتى عارفه انتى عندي غاليه ازاي ..دول عشرة عشر سنين يا بنتى
عموما انا هاحاول ا جي ازورك فى الويك ايند ونقعد مع بعض شويه

هزت ايمان راسها بالقبول وحاولت تبتسم ابتسامه متألمه وقالتلها : ماشي يا داليا عارفه والله
.
وكملت ايمان الكام ساعه الى اتبقوا فى يوم العمل وهى وشها بدون اي تعبيرات، وتظاهرت بانشغالها بالورق والشغل الى قدامها وما شافتش اي حد حواليها او تعمدت ذلك لحد لما خلص وقت الشغل ومشيت ايمان
بسرعه الساعه 3

ايمان بتروح بسرعه عشان يادوب تعدي على الحضانه عشان تاخد نور(2) ومازن(4) من الحضانه وتمشي بعدها خمس دقايق لحد البيت وتطلع جري عشان تكمل الاكل قبل ما اشرف جوزها يجى من الشغل الساعه 5
اول ما ايمان بتدخل بيتها بتدخل دوامه كبيره ما بتلحقش معاها تفكر فى اي حاجه تانيه اول حاجه بتجري وقبل ما تغير هدومها تفتح البوتجاز وتحط عليه حاجات وبعدين تجري على الولاد الى بيبقى لهم الف طلب وغالبا بياخدوا حمام وتخلص ماتش الاولاد وتجري كمان تكمل الاكل وسط طلبات الولاد وتغير هدومها هى كمان لو كان فى وقت
وما تعرفش ازاي الوقت ده بيجرى كأنه دقيقه وهى بتجري فى كل اتجاه في الشقه ويجى اشرف من الشغل .
اشرف : سلام عليكم

الولاد فى وقت واحد وجري : بابااااااااااااااااا جه يا مامااااااا .

ايمان : وعليكم السلام .

وجري على بابا وينطوا على ايده الاثنين ويفتشوا كويس يمكن جايب معاه حاجه تنفع .
وهو بيبوس فيهم ويسلم عليهم

وبعديين وهو بيغير هدومه : يا ايمااااان اخبار الاكل ايه انا ميت من الجوع

ايمان بترد من المطبخ بصوت هادي : طيب حاضر ربع ساعه بس .

اشرف بعد ما وصلها المطبخ : ايه مالك انتى تعبانه ولا ايه .

ايمان بارتباك ومحاولة اظهار ابتسامه باهته : انا لا لا ابدا بس مرهقه شويه من الشغل .

اشرف : شغل ؟؟!!! شغل ايه يا ماما هو الى انتى فيه ده شغل ؟؟!! الله يكون فى عونااااااا .

ايمان فى بالها :بدأناااااااا

اشرف: هادخل اصلي العصر اجي الاقي الاكل جااااااااهز .

ايمان بغيظ : حاااااااااااضر على النار هاكلملك النار تخلص بسرعه .

خلصت الاكل وهى كل شويه تسمع استعجال من اشرف وهو قاعد قدام التلفزيون واتغدوا وايمان اكلت الولاد وشالت الاكل واشرف خلص اكل وجرررررررري على التلفزيون وكانت لسه ايمان فى المطبخ ينده عليها .

اشرف : ايماااااااان بسرعه الشاااااي عايز انااااااام .

ايمان : حااااااااااااااااااضر اصبر عليا يا اشرف

تخلص ايمان الماتش كااااامل واشرف دخل ينام والعيال وايمان وراه
وبعد خمس دقايق....

اشرف: ايماااااان حرام عليكي انا مش عارف انام خدي العيال دي وروحوا الاوضه التانيه سبوني ارتاح شويه دى مش عيشه دي.

ايمان اخدت الولاد وانسحبت للاوضه التانيه ونام مازن انما نور فضلت صاحيه ايمان قالت اهلا وسهلا شكلك نايمه فى الحضانه ومخمخه .

نور بحروف مكسره وابتسامه شقيه : اه نايمه فى الحضانه.

تضحك ايمان فى ارهاق وتبوس نور جامد اوي .

وطبعا ما نامتش ايمان الا غفوات خاطفه لمده ساعتين لحد لما مازن واشرف صحيوا
وبدأت ماتش تاني من طلبات البيت والعيال واشرف نفسه ...الى جه على الساعه عشره كده وجاله تليفون من واحد صاحبه ولقته بيلبس

ايمان : رايح فين يا اشرف دلوقتي ؟؟

اشرف : مافيش اسامه صاحبي اتصل عليا وهايعدي عليا ننزل نتمشي شويه مش عايزه حاجه من بره ؟

ايمان : طب ما تاخد معاك مازن ده قاعد زهقان على ما اخلص باقي الشغل الى ورايا .

اشرف : لااااااا باقولك نازلين نتمشى مازن هايتمشى ؟؟

ايمان بعصبيه : الله مش معاك العربيه .

اشرف بغلاسه: لااااااا مش عايز وجع دماغ .

ويخرج اشرف وتصارع ايمان مع الولاد وشغل البيت ساعه كمان من الزمن ما بين جري وصريخ وعياط احيانا ويرجع اشرف الساعه 11 وشويه يلاقي الكل نااااااااايم .

يبص عليهم ويظهر على وشه ابتسامة راحه يشوبها اسف

ويغير هدومه ويدخل المطبخ يدور على اكل يلاقي صنيه على عشاء خفيف ياخده ويقول : كتر خيرك والله .

ويهز راسه فى غير رضا: بتهيئلي لو كانت مربيه قطه كانت بقى اهم مني .....

ويتعشى اشرف وبعدين يعدي على ايمان الى نايمه جنب نور
ويقولها وهو بيخبط على كتفها بالراحه : ايمان ايمااااان. مش هاتقومي تنامي مكانك ؟؟

ايمان وهى غرقانه فى النوم : العشا فى المطبخ .
اشرف بضيق : عارف يا ستى اتنيلت كلت باقولك مش هاتتنقلي مكانك .
ايمان: لا يا اشرف مش قادره اقوم بقى خلاص خلينى هنا .
اشرف بضيق اكبر وزفرة كبيره : طييييييب خليكى يا اختي .
ويفتح الكمبيوتر ويقعد قدامه لحد الساعه 2 صباحا
وتبدأ ايمان يومها بعد كده ب 3ساعات الساعه 5 يعنى حيث الطبيخ ولبس العيال وسندوتشاتهم وفطار اشرف ولبسها وخروجها للشغل
وعلى باب المبنى ايمان رفعت وشها وقدامها مباشرة ومش عارفه جه منين..
بابتسامه عريضه من استاذ محمود :صباح الخير يا مدام ايمان
ايمان : ............
يتبع يا حلوين


وده كان مخلص متعب لكم اوي اوي يا جماعه عشان تعرفوا ايمان واشرف عايشين ازاي
واعتقد هى دي حياة كل النااااااااس الى زيهم فى اغلب واعم الايام صح ولا لا ؟؟؟
حياه صعبه ومتعبه وجافه ودواااامه ما حدش عارف يخرج منها
اسفه على الاطاله الممله
بس حبيت تشوفوا ايمان واشرف بعينى

هناك 33 تعليقًا:

mahasen saber يقول...

انا تعبتلها سلف
ودماغى تقلت وهموت واحطها على المخده
وتفكيرى خلاص تقوقع فى طلبات البيت والعيال وابوهم
وحزنى الدفين بان ممكن الحياه تبقى احسن من كده

لو اشرف حس بيها طبعا

كان الله فى عون كل ايمان
ويا رب كل اشرف يحس بكل ايمان
حتى لو يوم فى الاسبوع
..............

mahasen saber يقول...

تسلم ايدك ولاا بلاش تسلم ايدك
بحس انى كلت صينية بطاطس

نقوليسلم احساسك وكيبوردك المبدع يا قمر يا غير مطحونه

Anonymous يقول...

معسكر القسام
واجبات عملية
لقد قمت بترجمت كلمات الأخ الكريم أبو خيري " كلمة حق " إلي واجبات عملية نعمل بها إلي أن نكون في معسكر القسام كمدونين خصوصا ومن أراد أن يعرف واجباته العملية كفرد عادي دون تخصص المدونين عليه أن يرجع إلي"
1: علي كل مدون أن يدعوا إلي فتح باب الجهاد فورا ويضع له ما يعبر عن هذا في مدونته.
2: علي كل مدون يريد أن يكون في معسكر القسام أن يضع علي الشريط الجانبي دعوة إلي المقاطعة ويصمم بنر أو شعار لهذه المقاطعة ويضعها علي مدونته.
3: علي كل مدون أن يدعوا الجميع إلي الجهاد بالمال وذلك أيضا عبر مدونته.
4: علي كل مدون أن يدعوا إلي فتح معبر رفح وذلك عبر مدونته.
5: علي كل مدون أن يدعوا الجميع إلي قولة الحق والغضب علي هذه الأنظمة الفاسدة.
6: علي كل مدون أن يدعوا الجميع إلي العودة إلي الإسلام مرة أخري.
7: علي كل مدون أن يدعوا إلي معرفة القضية معرفة جيدة ومعرفة تامة.
هذا وبالله التوفيق

mayada يقول...

جميل ياام مريم
التعليق























يتبع

صبرني يارب يقول...

محاسن

عارفه انا جاتلي تعليقات متناقضه جدا على البوست ده

الستات متعاطفين جدا مع ايمان
والرجاله متعاطفين مع اشرف
هههههههههههههههه

على الاميل مش هنا والله

تحياتي يا جميل وتسلمى انتى وتنوري دايما يا قمر

صبرني يارب يقول...

مياده

ثااااااانكس نورتي يا جميل

Che يقول...

العزيزة صبرنى
مش عايز اسبق الاحداث و احط تخيلات بس بجد انا مشدود اعرف اللى ايمان قالته بعد ماكونت صوره واضحه عن الخلفيه اللى هى عايشه فيها
متغيبيش علينا كتير

farahmarh يقول...

ربنا معاها ويقويها على الثلاث عيال اللى معاها ويصبرنا احنا بقى لحد ما تكملى يا قمر
ارجو زيارة مدونتى
http://fengankahwa.blogspot.com/

حاسوباتيه يقول...

ياه هو الجواز كده ربنا يبشرك بالخير

قصه حلوه ومخيفه بالنسبالي بصراحه ربنا يستر على ايمان

صبرني يارب يقول...

che
تسلم يارب ان شاء الله قول يارب ونكتب بسرعه الى جاي

صبرني يارب يقول...

فرح

حبيبتى هما اثنين بس مش ثلاثه

بس يمكن تكون حامل بقى مش عارفه هههههههههههههههههههه

تحياتي ليكى وعنيه هازورك
ان شاء الله

صبرني يارب يقول...

حاسوباتيه

لا ممكن يكون احسن من كده هانشوف بقى هانعرف نحسن حياة ايمان ولا لا
نورتي يا جميل

mony يقول...

انا اهووووووووووو


بس من غير شغل

كفايا علي شغل البيت


هههههههههه


ماتتأخريش علينا بأه

أحمد (زوج مخنوق ). يقول...

بصي يا ام مريم بدون تحامل على طرف من الاتنين
و عن تجارب شفتها بعيني
الاتنين بيبقوا محتاجين الرومانسية
و الاتنين بيبقوا قرفانين من الجمود و الروتين الممل اللى في الحياة
و الاتنين بيبقى عندهم استعداد يعبروا عن رومانسيتهم دي
بس الكارثة
ان كل واحد بيقول مش انا اللى هأبدأ التاني اللي لازم يبدأ
و فعلا لو واحد منهم قدم خطوة واحدة بتلاقي التاني قدمله خمسين خطوة
انما الكارثة ان كل واحد يقولك اصل انا لو قدمت هو مش هيتقبل
اصل انا قدمت قبل كده
طب اشمعنى مش هو اللي يقدم

على حين انه زي حالة قصتك بيبقوا الاتنين عندهم استعداد يقدموا و يتجاوبوا
بس في الحرام

منتظر الباقي

صبرني يارب يقول...

موني

صبرني يارب يقول...

احمد زوج مخنوق

انا معاك تماما فى الى انت بتقوله

الا ان المصيبه كمان ان فى مرحله ممكن يوصلوا لها ان ما بيبقاش فى تجاوب من الطرف التاني

والرفض ده بيخلي الطرف الباديء يرجع ميت خطوه ورا من الصدمه والاهانه الى ا خدها

تحياتي لك ونورت

الفراغ يقول...

لالالالالالالالالالالالالالالا
كده انا اتشوقت اكتر
مين بقى محمود؟؟؟؟؟؟؟؟؟
يتبع ... برضه
:)

بنت الغربة يقول...

ازيك ياصبرنى ياحبيبتى...وحشتينى
انا بينى شفت اشرف ده قبل كده
هههههههههههههههههه
بس على الاقل دى عندها اتنين بس
انا عندى تلاته والحمد لله..
ربنا يصبرنا كلنا
تحياتى

mostafa rayan يقول...

بس المفروض لمايقولها قومي نامي مكانك كانت تقوم
مش صح ابدا تسيب الراجل لوحده وهي نايمةمع العيال
وانتي عارفة ان النت في حاجات وحشة كتير
وترجع تقولك هاملني ومش عارف ايه

هههههه
شكلك هتتغاظي مني
بس بجد اشرف مظلوم قوي مع ايمان
ياريت يا صبرني تخليها تاخد بالها منه شوية دة الراجل تعبان وبيشقي عليها هي وعيالها
تحياتي ليكي
وربنا يستر بقي

-

ملحوظة اعتقد ان تواجدي في مدونة الطبيخ بتاعتك ألذ واسلم
صح ؟
سلاموز بقي كفاية كدة

فشكووول يقول...

اوعى تكون صبرنى يا رب هيى ايمان
وحتى لو مش ايمان هى فعلا دى حياة الست اللى بتشتغل .. والله يا بنتى عن تجربه .. انا وام اسامه بنشتغل .. امال حنقدر نأكل العيال منين .. اللى انت حكيتيه دا بيحصل بالضبط .. واحنا الرجاله بقى زى التنابله قاعدين نشخط وننطر وندى اوامر وخلاص .. مش رجاله بقى ... طز فى الرجاله كلهم.. بس انا يا صبرنى كنت بادخل مع ام اسامه واشطف الحوض وساعات اقشر لها البصل والثوم وفى بعض الاحيان اعمل المكرونه
اما بالنسبه لتعليقك عندى فيا ابنتى لا تقسى على حماس فبالرغم من انتقادى لهم الا انهم فى النهايه اخوان لنا فى العروبه والاسلام والمفروض ان نكون بجانبهم لا عليهم ولى الشرف العظيم ان اكون مثل والد حضرتك .. وانا باعمل نفس الحاجات دى وعندى فهارس وبيانات كتير من الجرايد والكتب وبتنفع وقت الزنقه .. تحياتى يا صبرنى

صبرني يارب يقول...

الفراغ

نورتي يا فندم وان شاء الله بكره اقولكم مين هو وقال ايه

صبرني يارب يقول...

بنت الغربه

ما انا قلتلكم بقى هى دي حياة كل الناس للاسف

صبرني يارب يقول...

مصطفى ريان

طيب ما هو الظهر طردها بعيالها يا فندم عشان ينام ولا هو بس الى من حقه ينام

هما الاثنين لازم ياخدوا بالهم من بعض اكتر من كده صح ولا لا ؟؟؟

ولا ياعم مش الطبيخ بس انت على راسنا يا فندم

صبرني يارب يقول...

استاذ فشكول

الله يكرمك يارب

ههههههههههههههههههههههههه

لا لا مش انا خالص مالص بالص انا مش ايمان ولا اي حد فى القصه انا .

ولا في اي حد فى القصه اصلا حد بعينه او حد اعرفه

كل شخصيات القصه من دماغي

وهاكتب التنويه ده بعد كده على فكره لان فى واحد قالي بجد انتى بتوصفي مراتي مصيبه ليكون فى محمود هي كمان هههههههههههههه

وطبعا يا استاذنا انا الي اتشرف والله بحضرتك وببابا طبعا

وكمان انا مش باجي على بتوع حماس ولا حاجه انا بس انا لا اغفر لهم اي خطأ يتحمله ابرياء واطفال ما لهمش اي ذنب واظن حضرتك شايف ان اخطائهم كتير اوي اوي وما لهاش معنى او سبب واضح

رابطة هويتي اسلامية يقول...

شارك معنا في حوارنا
غزة في قلب مدون
مع المهندس : الحسيني لزومي
الحوار موجود علي الرابطة شارك معنا في الحوار
كن إيجابيا وحاول المشاركة في إنشاء بلوجر فعال
حوارنا مستمر مع المهندس
متي دخلت سجل تعليقك بسؤالك أو إستفسارك بالنسبة للمهندس
مع تحيات
رابطة هويتي إسلامية

حرروف يقول...

ازيك ياصبرني بشوفك عند كريم ولسة شيفاكيعند خالتو ستيتة اول زيارة حلو البوست اليوميللحياة الزوجية الروتينيةوفعلا حياة ناس كتير كدة
دمتي بالف خير

KHALED يقول...

مش حاعلق إلا لما الحدوتة تخلص

تحياتى

صبرني يارب يقول...

خالد

اها طيب على فكره انا لسه الموضوع شكله طويل مع انى ما كنتش ناويه اطول
بس شكلهاهاتطول

صبرني يارب يقول...

حروف

والله وانا كمان باشوفك

بس على فكره الموضوع مش موضوع يوميات خالص ياريت تكملي معانا

عمرو يقول...

العبقريه اللى مذهول قدامها هى براعتك فى تطويع اللهجه المصريه لتحل محل الفصحى فى روايتك !!
لعلمك اللهجه المصريه لا تقل روعة و جمال عن الفصحى خاصة لو كان اللى بيكتب بيها مستوعب لمفرادتها العجيبه اللى بتعبر تعبير دقيق عن كتير جدا من المقاصد بكلمه واحده
مثلا عبارة : يمكن جايب معاه حاجه تنفع
اللى وردت عندك الحقيقه منتهى البراعه فى التركيب و فى المدلول يعنى مش مهم تكون حاجه حلوه تتاكل لأ هم يعنى الأطفال عاوزين أى حاجه تنفعهم يعنى تتاكل أو تنشرب أو يتلعب بيها
بالنسبه للسرد
فيه مدرستين .. مدرسه بتشد القارىء للتفاصيل المكانيه و الزمانيه زى مثلا مدرسة نجيب محفوظ اللى كان بيهتم بوصف تفاصيل المكان على حساب وصف الأشخاص
و مدرسة يوسف اٍدريس اللى كان الله يرحمه بيهتم بوصف ما بداخل الأشخاص أكثر من اٍهتمامه بوصف المكان و تفاصيله و أعتقد أنك من هذه المدرسه
هنا بقى اٍهتمى بما يدور داخل عقل و تفكير شخوص الروايه طالما أنك لا تهتمى كثيرا بتفاصيل المكان
بجد أنا مبهور باللغه
أدخلى بينا غلى الجزء التالت علشان نعرف قد أيه الرجاله بيتعبوا فى حياتهم العائليه :))

صبرني يارب يقول...

عمرو

ايووووووووووه كده حمد الله على سلامتك والله مستنياك عشان تقولي رايك

نووووووورت

وشكرا اوي على الكلام الجميل الكبير عليااوي

اناعلى فكره بلهاء تماما فى الادب والمدارس والكلام ده هههههههههههههههههه

انا باكتب كده الاوي خالص ههههههههههههههههههه

وانا نزلت الجزء التالث ا هو
يلا بقى

شمس النهار يقول...

بصراحه انقطع نفسي وانا بجري وراها
شغل وبيت وعيال وكمان راجل رخم
الله يعينك عليها بقا

صبرني يارب يقول...

شموسه يا منوراااااااني والله

ايوه هى الراجل ا لرخم ده الى منغصه عليها حياتها يا اختي