الأحد، 29 مارس، 2009

تاج من احساس طفله

تحديييييييث:
المهدى لهم التاج حسب ما قلنا اول عشره فى التعليقات غيررغيي انا وكيارا واستثناء الى جاوبوه
*****************************************************
وباشكرها على انها بطحتني بهذا التاج الجميل
ههههههههههههههههههه
ايوه اصل انا ما باحبش الامتحانات يا اختي
المهم نروح على التاج نجاوبه
اسمك ؟
اعتقد كل الناس عارفه اسمي بس انا بقيت احب اسمي الى بقاله خمس سنين لازق فيا صبرني يارب
الاسم المشهوره بيه وسط اصحابي
ايام الدراسه كانوا بيقلولي اصحابي والمدرسين يا خولي وده اسم عيلتى عشان كان معايا ناس كتير اسمهم زي اسمي
السن ؟
ثلاثون عام وشهر واسبوعين
مجال دراستك ؟
انا درست فى كلية تجارة قسم محاسبه
بكل حب دخلت الكليه دي واخترتها قبل ما ادخل ثانويه عامه مش دخلت مجبره بمجموع ولا تنسيق
اسم مدونتك؟
طيب يعنى هو انا مخبيه الاسم
رغي امرأه غير مطحونه
صورتك الرمزيه فى المدونه بتعبر عن ايه ؟
بتعبر عن انى باقول صبرني يارب
هل فكرت فى اغلاق المدونه ؟ والسبب ؟
يا لهوي يا مستهوي كلا البت لم افكر هذا التفكير الاسود
ده مدوناااااتي مش واحده انتم عارفين دول هما متنفسي الوحيد واستاذتي وطلابي فى نفس ذات الوقت
ولا يمكن ابدا بتاتا البته اكون فكرت كده قبل كده لكن الله اعلم فى الى جاي
ولو ان انا لا احد يقصينى عن مكاني اطلاقا
ايه رد فعلك لو حد قل ادبه فى التعليق ؟
باشيل تعليقه عشان دي مدونه محترمه حتى لو كان قالل ادبه على حد تاني وبارد عليه واديله فين يوجعه بس بادب برضه وانساه ولا كأني شوفته عاااااااااااادي الحكايه ما تستهالش ده انا حتى خدت حسنات على حسه
اسوأ مدونه ؟
دول عارفين نفسهم مش محتاجين نقول عليهم
وعموما هى اي مدونه صاحبها او صاحبتها لسانهم زفر واي مدونه لا تحترم اراء الاخرين فى نظري دول اسوأ بشر مش اسوء مدونات بس
هايحصل ايه للاميل بعد ما تموت ؟؟
مش عارفه جايز ابقى اوصي به للبت مريم هههههههههههههههههههههههههه
اديت الباص وور لحد قبل كده ؟؟
انا اميلاتي انا وجوزي ملخبطين على بعض واحنا عندنا كام باص وورد كده بنستعملهم وهو عارفهم وانا عارفاهم عااااااتي
بس مش معنى كده اننا نضايق بعض
السفر بالنسبالك ايه ؟
انا باحب السفر اوي لكن ما باحبش الغربه
لكن عموما انا اتغربت فتره بسيطه واتعلمت منها كتير وسعدت فيها كتير وتعبت فيها كتير برضه
الحمد لله
المود بتاعك ايه ؟؟
حاليا يعنى ؟؟؟
اكتئاب واحباط مصاحب للازمه الاقتصاديه العالميه واستهبال الناس المحلي
ههههههههههههههههههههههههههه
بتعمل ايه فى وقت فراغك؟؟
فراغي ؟؟؟
يعنى ايه فراغي دي هههههههههههههههههههههه
هو بعد ما يبقى الواحد عنده 3 عيال و3 مدونات يبقى عنده فراغ برضه هههههههههههههه
هو انا كل وقت فراغي باقضيه على المدونات بتاعتي والنت عموما لكن انا مش حاسه انه مجرد وقت فراغ باقضيه لا بالعكس ده انا باعتبره حاجه مهمه اوي لكن لانه ينفع يتأجل احيانا فبيكون فى اواخر اولوياتي اليوميه
انما ما اعرفش اعيش فى فراغ ما اقدرش اقعد وانا مش باعمل حاجه
الاكله المفضله ؟
كل الاكل الى انا باعمله بايدى باحبه
الصفات الى اخدتها من والدك ؟
الصبر والقرايه والصدق
الصفات الى اخدتها من والدتك ؟
النشاط والحركه والمطبخ وحاجات كتير تانيه بالاضافه الى العصبيه كماركه مسجله باين للامهات
اكتر ست حاجات بتكرهم ؟
اشمعن سته يعنى
الكذب
الضعف
قلة الادب وطولة اللسان
اذية خلق الله
الظلم
الكسل
اكتر ست حاجات بتحبهم ؟
حاجات ؟؟
ما ينفعش ناس ؟؟
طيب جوزي وولاد وماما وبابا كده سته ههههههههههههههههه
خلينا فى الحاجات
البحر : وده لوحده حاجات كتير سماه وهواه ورمله ومايته وموجه وسمكه كمان
سته اهم
ههههههههههههههههههه
شخصيتك نوعها ايه ؟
قويه
بس مش فتريه والله ههههههههههههه
لكن انا مؤمنه ان المؤمن القوي خير واحب الى الله من المؤمن الضعيف
وكمان عصبيه ومجنونه حبتين عاااااااااتي
لماذا دخلت عالم التدوين ؟
عشان ارغي طبعا ايه السؤال ده
هههههههههههههههههههههههههههههههه
كنت بادور على مكان اكتب فيه والناس تسمع صوتي اكتب بحريتى والى يقرولي يكنوا ناس بيفهموا وقد كان الحمد لله
احلى جمله قيلت فى وصف مدونتك؟
لا مش عارفه بقى اي حاجه تتقال عن مدونتي انا راضيه بها كل واحد حر فى رايه
أهمية التعليقات بالنسبه لي ؟
لا ده موضوع مهم جدا بالنسبه لي ولازم ارد على كل تعليق لوحده احتراما وتقديرا لصاحبه
وما زلت لما باشوف تعليق اي حد بافرح به زي اول تعليق جاني على اول بوست فى المدونه
وكمان قوة التعليقات (مش عددها ) بتدينى مؤشر لاهمية الموضوع محل النقاش عند الناس
احلى بوست كتبته ؟
انا كل بوستاتي حلوه
هههههههههههههههههههههههههههههه
بجد مش عارفه لكن انا ممكن اقول انى حبيت اوي بوستاتي الى كتبتها فى اول دخولي عالم التدوين
أفضل مدونه قراتها؟
فاضيين لحد سنة كام ؟؟
لا ما اقدرش اقعد اعد ده كتير اوي
وانا عايزه اقوم اطبخ الرز ههههههههههههههههههههههه
أفضل بوست قرأته ؟
عندي قايمه اسمها قرات لك فى مدونات الحبايب فى مجموعه حلوه من افضل ما قرأت .
الشغل بالنسبه لك ا يه ؟
انا حاليا باشتغل ماما
وده شغل انا اخترته لنفسي وبالنسبه هو اساسا حياتي كلها
لكن ده ما يمنعش انى نفسي اشتغل عشان اهرب من البيت شويه ههههههههههههههههههههههههه
بس مش هاين عليا اسيب الولاد
الانترنت بالنسبه لك ايه ؟
انبوبة الاكسجين تحت مياه المحيط
من غيره اغرق فى الحلل وانسى دماغي او اعينها فى الدولاب احسن
اااااااااخر سؤال ايه ده طويل اوي التاج ده
تمرر التاج ده لمين ؟
لاول عشره يعلقوا عليه ولاي حد عايزه
عارفين لوماعلقتوش عشان ما تجاوبوش
ههههههههههههههههههههههههههههههههههههههههههه
شكرا لكي يا احساس طفله على التاج ونردهالك فى الافراح وابعتلك تاج اطول من ده واعذببببببببك
ههههههههههههههههههه

هناك 66 تعليقًا:

احساس طفلة محبة للرومانسية بس واقعية يقول...

انا اللى جبت دا كلة لنفسى
وبعدين يا صبرنى هو فى حاجة بين الاخوة اسمها رد للتاجات يا قمر

بس قوليلى هتعملى رز اية محمر ولا شعرية ولا اية اصل مطبخك داخل دماغى اوى ووصفاتك سهلة لان مكونتها متاحة هنا وما ادراكى الغربة والاكل الحرام والحلال

وبعدبن مش تقولى انك خريجة تجارة محاسبة ومختارة الكلية بمزاجك يعنى بتحبيها
كدا نفهم لية الازمة الاقتصادية عملالك اكتئاب
هاهاهاهاهاهاهاهاهاها

ربنا يوفقك فى حياتك ويسعدك دائما ويخليلك اولادك :)

تقبلى مرورى

صبرني يارب يقول...

احساس طفله

اه والله يا اختي عاملالي اكتئاب يمكن عشان انا فاهمه ان لسه فى اسوأ

والرز لا انا باعمله ابيض ما حدش عندي بياكله بشعريه

ولو على المطبخ اجبهولك لحد اليابان بحلله
هههههههههههههههههههههه

قوليل بس مش لاقيه ايه عندك وانا اقولك تعمليه ازاي

تعيشي يا قمر ونورتي وشكرا على التاج

كيــــــــــــارا يقول...

اه انا مش هجاوب علي التاج انا بقول اهو

كيــــــــــــارا يقول...

بجد انتي عثل

اجاباتك شفافه زيك

كل سنه وانتى بخير ياصبصبتي

صبرني يارب يقول...

كيارا هاتجوبي هاتجوبي مش بمزاااااااااااجك
ههههههههههههههههههههههه

يلا بسرعه

وحشاني يا بطه

كيــــــــــــارا يقول...

اجاوب فين يابنتي انا قافله المدونه من فتره

صبرني يارب يقول...

ليييييييييييه يا كوكي

انتى واخده اجازه بس


وبعدين مش باشوفك على الاميل ليه

حتى بعتيلى اضافه من ميل تاني وبرضه مش باشوفك

كيــــــــــــارا يقول...

معلش ياقمر واخده اجازه من النت ان شاء الله هبقي ادخل بس شويه كدا اكون ارتحت اما المدونه فربنا يسهل

صبرني يارب يقول...

طيب ماشي عايزه اقعدك على كرس الاعتراف واعرف في ايه

ربنا يرجعك لنا بالسلامه يارب

كيــــــــــــارا يقول...

ممممممممم مش في بس شويه لعبكه كدا وحوارات تعبتني نفسيا عامة انا الحمد لله ادعيلي بس

صبرني يارب يقول...

ربنا معاكي يا قمر ويشيل عنك يارب
وعايزه الموضوع يخلص بسرعه

انا هاقوم اتغدى يا جميل

سلام

حنعيش يعنى حنعيش يقول...

مش لاقى حاجة غير بيت شعر محدش عايز يبص لة
الام مدرسة اذا اعددتها اعدت شعبا طيب الاعراق
ربنا يكتر من امثالك

ضايع يقول...

صبرني يا رب

جميل اننا نتعرف اكتر واكتر

بث ثؤال ومن غير زعل

انتي من كلامك شكلك كده والله اعلم والله اعلم بتعرفي تطبخي !!! آل الاستنتاج ده صجيج ولا وسوسه من عمل شوشو؟

تحياتي .....

همس الاحباب يقول...

ههههههههه
ايه ده ده تااااج ولا سلطانية
بس تسلم الايادى يا ام مريم
اجاباتك جميلة ودمها خفبف
والحمد لله انى رقم 14
طبعا ولا اعرفكم
احسبى ردودك وتعليقات كيارا
سلام يا ستى

ستيته حسب الله الحمش يقول...

جميلة الأجابات يا خولي الجنينة يا مرات ابو رياض ههههههههههههههههه

اصلا انت كوميديا على فلسفة على رؤية على مطبخ
خليط بهارات مصري جميل يفتح النفس والعقل
بحبك

mahasen saber يقول...

احمدك يا رب انا مش من العشره ههههههههههه

ايه الجمال ده قريت اجابتك للاخر وانا مبسوطه قوى قوى انى بتعرف عليكى اكتر يا جميله

ربنا يباركلك فى زوجك واولادك ويا رب دايما ايميلاتكوا والباسوورد بتاعتها متلخبطيين على بعض

صبرني يارب يقول...

حنعيش يعنى هانعيش

الله يكرمك ويكتر من ا مثالك انت كمان حقيقى مش مجامله والله

mahasen saber يقول...

بس طمنينى على الرز شاط ولاا لسه

على فكره بالنسبه للمدونات اليى بتكرهيها انا حزينه لسوء افهم الاخير انتى محترمه جدا ونيتك خير

وهو برضه غلبان وطيب بس لسانه زالف

يا ريت يبقى زعل اخوات بس
واسفه لو اتكلمت فى الموضوع ده ممكن تمسحى التعليق ده يا جميله

ربنا ييسرلك كل خير يا حبيبتى

صبرني يارب يقول...

ضايع

كلا البت ايه ده دي ضربه موجهه فى مقتل يا استاذنا

ده سؤال برضه ؟؟

بتعرفي تطبخي ؟؟

طيب ما انا عندي مدونة بتاعة طبيخ

طب ده انا حتى باصورلكم الاكل الى بناكله طب نثبتلكم اكتر من كده ايه
ههههههههههههههه

خلاص انا هاجي عندك المدونه واعزمك على الغدا فى مدونة الطبيخ ان شاء الله
بس لما ننزل صنف رئيسي على الواجهه

نورتنا يا فندم

صبرني يارب يقول...

ستيته حياتي

والله انا باحبك اوي

شوفتي الكولكشن بقى ههههههههههههه

فري انترستنج وووووومن
ههههههههههههههههههههه
ومع ذلك راح يتفرج على الماتش مع اصحابه يا اختي

صبرني يارب يقول...

محاسن صابر

يا جميل انا شكلي هادبس العشره الى على مزاجي فى التاج فى الاخر
هههههههههههههههههه

البت كيارا قعدت ترغي معايا عشان تفوت العشر ارقام باين انتم دافعين لها كام

والرز اتاكل ولله الحمد ههههههههههههههههههههه

وبدأنا نفكر فى الرز الى بعده

وهو ده الى انا كنت خايفه منه
بعد ما كتبت البوست انكم تفتكروا انى اقصد كريم بكلامي عن اسوأ مدونات

ابدا والله ما قصدتش كريم تحديدا اقصد فعلا المعنى العام للكلام مش كريم بس الى لسانه طويله وعايز يتغسل بكلور
ومش كريم بس الى يمكن قالي كلمه تضايقنى على البلوج

ومش كريم الى اخد على كلامه واقعد عيط فى جنب
ببساطه انا اتعاملت مع ناس زي كريم وعارفه هو بيعمل كده ليه

وصدقوني الموضوع مش ماثر معايا خالص كل ما هنالك انى هانفذله طلبه وما عدتش هادخل مدونته من الاساس وحتى شلتها من قايمتى عشان ما افكرش فيها كمان

ومش كريم اول مدونه تتمسح من قايمتى على فكره

وشكرا لكى يا قمر على اهتمامك ومش هامسح التعليق ولا حاجه عادي الكل يعلم الامر

صبرني يارب يقول...

همس الاحباب

ايه ده انت مستخبي فى وسط التعليقات مش باين

الله هو هنا وفى الحقيقه ولا ايه هههههههههههههههههههههههههه

ده سلطانيه شوربة عدس يا اخويا بس ايه زي الفل

ورقم اربعتاشر ا يه انت هاتخم انت دافع كام للبت كيارا
هههههههههههههههههههههه
تسلم يا استاذنا ونورت

Ahmed يقول...

السلااااااااااااااام عليكم

كالعاده أجمل رغي
اجاباتك جميله عشان صريحه

مسعدة يقول...

تاج جميل

شمس النهار يقول...

اجاباتك لطيفه كلها والحمد لله اني دخلت بعد العشره مادخلوا لحسن التيجان دول بيتعبوني جدا
لوان التيجان دي بتقرب الناس من افكر بعضهم البعض

عاشقه وغلبانه يقول...

عثل
عثل
عثل
وحشاني موت
التاج ده مبعوتلي من كفايه طيبه

يومين كده واجاوب عليه

بس حلو اوي تشبيه انبوبه الاكسجين ده

حبيبه سى السيد يقول...

احلى حاجة فى التاج انه بيعرفنا اكتر عليكوا

ربنا يخلى المدونات اللى عرفتنا عليكى

:)

صبرني يارب يقول...

ابو العيليه

هههههههههههههههههههه

وعليكم السلام يا باشمهندس

تسلم يارب نورت

صبرني يارب يقول...

مسعده

تسلمى يارب ونورتي

ahmed_k يقول...

الحمد لله عديت التعليق العاشر
تاج جميل ولذيذ يا صبرني
والأجمل أجوبتك عليه
وايه أخبار الرز أوعي يكون شاط هههه
وباتفق معاكي أن المدونات البذيئه
تعد من أسوأ المدونات
والحل الأمثل لمثل تلك المدونات هي تجاهلها

تقبلي خالص تحياتي

صبرني يارب يقول...

شمس النهار

طيب انا لسه هاعد بقى وابلغكم مين الى اتدبس فى التاج عشان كيارا ضيعت اول عشر تعليقات فى الرغي
هههههههههههههه

تحياتي ليكىيا شموسه ونورتي

صبرني يارب يقول...

عاشقه وغلبانه

والله انتى الى عسل يا جميل

مستنيه تاجك يا قمر

صبرني يارب يقول...

زوجه عنيده

تسلمى يارب ونورتي

صبرني يارب يقول...

احمد كيه

والله احنا منفضين يعنى ما انت شايف
هههههههههههههه

والرز اتاكل بسلام الحمد لله

نورت يااستاذنا

بنت مصر يقول...

فعلا احلى حاجه في التاج أنه بيعرفنا على صاحبه اكتر

تشرفنا بمعرفتك يا صبرني يارب

تحياتي

حواء يقول...

ايه الحلاوه ديه
ايه الطعامه ديه
ايه الجمال ده
عثل ياناس عثثثثثثثثثثثثثل
موووووووووووووووووه يأحلي صبرني

لجين أبو الدهب يقول...

مبسوطة دا من التاج اللى بيمر على المدونات علشان يعرفنا الناس اكتر ..

عجبتنى اجاباتك علشان بسيطة ومافهاش تكلف ..

اول مرور ليا على المدونة وكان حظى انى اقرأ التاج ..

دمتِ بخير ..

صبرني يارب يقول...

حواء

البت دي بتعاكسني شكلها وبعدين بقى باتكثف كده
ههههههههههههههههه
نورتي

صبرني يارب يقول...

بنت مصر

الله يكرمك يااااااارب ونورتي يا جميل

صبرني يارب يقول...

لجين ابو الدهب

يا جميل انتى نورتي المدونه وصاحبتها وشاكره ليكى كلامك الجميل

نوووووووورتي

MaNoOoSh يقول...

والله انتى عثل ودمك ثكر
بس اول مرة اشوف حد يدخل كلية تجارة برجليه وعن حب كمان
ربنا يوفقك يا عثل

صبرني يارب يقول...

مانوش

يا حياتي انتى الى عسل والله


وبالنسبه لكلية تجاره ماهو ده يا ماما ابتلاء مكتب التنسيق لنا

اننا نبطل نحب ونفكر فى اي حاجه غير كليات القمه

وبالتالي قتل فينا الميول والاتجاه

انا فعلا كنت باحب مواد تجاره جدا

وقريت في كتب كلية تجاره وانا فى ثانيه ثانوي عشان اقدر احدد انا عايزه ايه

حاسوباتيه يقول...

تاج جميل خالص وردودك جميله

Anonymous يقول...

مساء الخير عليكى صبرنى وعلى الاستاذ رضا بصراحة انا من المعجبين بالمدونه ومستنى تنزلى طريقه البشاميل عشان المدام مش بتعرف تعملها ويجعله عامر

ابوزيد يقول...

بالمناسبه انا معرفش هو صح احط اميلى هنا ولا لأ لو فيها حاجه يبقى شيليه ولو مش فيها اى حاجه ياريت تبعتى طريقه البشاميل عليه امضاء ابوزيد
medo132005@yahoo.com وشرحه على الهوت ميل

صبرني يارب يقول...

حاسوباتيه

تسلمى يارب ونورتي

صبرني يارب يقول...

ابو زيد

يا فندم حضرتك نورت

والاميل عينى حاضر هابعتلك عليه لما انزل الطريقه على المدونه بتاعة المطبخ

وحضرتك نورت

عمرو يقول...

التاج ده عجبنى و اٍجاباتك عنه حلوه أوى يا أم خالد و واضح أن عندك سرعة بديهه تحسدى عليها :)
أنا جاوبت عليه عندى على فكره ..
تحياتى ليكى و للأستاذ رضا ..

صبرني يارب يقول...

استاذ عمرو

وانا صبحت عليك من الفجر على التاج انت الى ما شوفتوش يا باشا

بس اشمعن سرعة بديهه ما لقطتش دي ؟

والسلام يوصل يا باشا وتسلم يارب

ابوزيد يقول...

بقولك يا ام مريم معرفش ليكى فى علم النفس ولا لأ الموضوع باختصار ان بنتى عمرها سنتين ونصف وابنى 8 شهور بس البنت بتغير من اخوها بطريقه فظيعه وانا بجد تعبت من الموضوع ده لو عندك شىء مفيد فيه هلم به شاكر ومقدر

الطائر الحزين يقول...

بارك الله فيكم

صبرني يارب يقول...

الطائر الحزين

وفيك يااخي الفاضل انت فينك من زمان ؟؟؟

صبرني يارب يقول...

ابو زيد

والله يعنى كلنا لها يا ابوزيد

وموضوع الغيره ده بالنسبه للطفل الاول بالذااااات من الطفل التاني مأساه عشتها طبعا

عشان كده انا حاليا اقتنعت ان مش المفروض يكون الفرق بين اول طفلين اكتر من سنتين لمصلحتهم

لان ببساطه الطفل الاول اتعود انه يكون الوحيد البيت كله بتاعه وماما وبابا وتيته وجدو اول ما يجى الطفل التاني يا منجي يارب من الى بيعملوه

بس الحقيقه هى الحكايه ممكن تخف شويه لو انت كنت مهدت للموضوع من قبل ما يجى البيبى

وفى حاجات الناس بتعملها حقيقى بتزود الموضوع
زي مثلا ان يفضل الطفل الاول ينام جنب مامته لحد ما الام تولد فعلا دي طبعا بتبقى مأساه
او يفضل ينام فى سرير البيبى لحد ما البيبى الجديد يجى

او اول ما الام تولد تودي الطفل الكبير الحضانه

وطبعا غير تعليقات الكبار بتاعة وديه الحضانه استريحى منه وبكره النونو يجى يخليك تتخلع من هنا والكلام ده بيقولوه قدام الطفل على اعتبار ان الطفل اطرش يعنى
انما طبعا هو بيسمع وبيفهم اكتر مني ومنك

وكمان لما البيبى الجديد يجى مش عارفه ايه مزاج بعض الناس انهم يفضلوا يقولوا البيبى ده وحش وعبيط وبيعط وانت الى حلو وجميل

طيب يعنى على اساس ايه لما هووحش وزفت كده انتم عمالين تبوسوا فيه وتدلعوا فيه يعنى

وكانت اكتر حاجه بتسكن المواضيع شويه هى انى احسس الكبيره بمسؤليته عن الصغير

يعنى مثلا يا فلان خلي بالك من اخوك على مااصلي

اينعم باصلي قدامهم وانا عنيه فى وسط راسي بس هو لما بيحس بالمسؤليه وانه الكبير ده ميزه نفسيته بتتصلح

وقدر الامكان حاول ترجع كل مساويء البيبى الصغير الى صغر سنه بالمقارنه بسن الكبير طبعا ومهاراته التي لا تعد ولا تحصى

وان الكبير بقى هو الى هايعلم الصغير كل حاجه ويوديه المدرسه وكده يعنى

والله المستعان

تحياتي لحضرتك
انا بعتلك المكرونه مش عارفه وصلت ولا لا وعموما هى نزلت على المدونه

سومه...مجنونه فى بلد عاقل يقول...

ههههههههه كاتبه سنك يا صبرنى دا اوحش سؤال تتساله واحده ست

mohamed ghalia يقول...

جميلة أوى إجاباتك
ربنا يكرمك ويسعدك

نهر الحب يقول...

لقاء تدوينى يوم الجمعه 10/4
ببورسعيد اللقاء عبارة عن تجمع للتبرع للايتام المعاقين
ولقاء وتجمع تدوينى بعدها
ان شاء الله
ياريت تشرفنا
التفاصيل عندى وعند ماما امولة

نهر الحب يقول...

لقاء تدوينى يوم الجمعه 10/4
ببورسعيد اللقاء عبارة عن تجمع للتبرع للايتام المعاقين
ولقاء وتجمع تدوينى بعدها
ان شاء الله
ياريت تشرفنا
التفاصيل عندى وعند ماما امولة

جنّي يقول...

السلام عليكم

ما شاء الله دبلوماسية بريمو .. بدليل انك ما زعلتيش حد منك ..

يعني انا شايف ان اجاباتك كلها موفقة ..

دعواتك لي بتمام الشفاء

صبرني يارب يقول...

سووووووووومه

ايه يعنى لما اكتب سني عااااااتي يعنى هانروح منه فين

هههههههههههههه
نورتي يا جميل

صبرني يارب يقول...

نهر الحب

يا حياتي يا ريتنى اعرف اجي والله لكن هاتابع طبعا الاخبار
ربنا يجعله فى ميزان حسناتكم

صبرني يارب يقول...

محمد غاليه

الله يكرمك يارب تسلم ونورت

صبرني يارب يقول...

جني

استاذنا ايه خير فى ايه مالك

الف الف سلامه عليك ربنا يتم عليك فضله ان شاء الله ويتم شفاك على خير

ومتشكره اوي على الكلام الجميل ربنا يكرمك

ابوزيد يقول...

هو المواضيع الجديده بتنزل كل اد ايه ولا على حس شوقك للرغى عاوز حد يصدعنا شويه ههههه بالتوفيق يا ام مريم

reem يقول...

كل يوم بتأكد اكتر انك زى العسل

ايه الاجابات العسولة دى ؟

وبعدين انا اول مره اعرف ان انا وانتى خريجين تجارة زى بعض

بس انا ادارة اعمال مش محاسبة

وانتى ام وزوجة جميلة اوي اوي ودا واضح جدا ربنا يسعدك ويخليك ولادك وجوزك

وحشانى جدا ياقمر

صبرني يارب يقول...

ابو زيد

ايوه الموضوعات الجديده حسب ما ربنا يسهل
بقالي يومين ناويه بس مافيش وقت

مع ان الموضوع جاهز محتاج شويه تنسيق وكده يمكن بعد شويه ربنا يسهل

صبرني يارب يقول...

ريم

ايه ده انتى ما تعرفيش انى تجاره
عادي ما نص شعب مصر معاه بكالريوس تجاره

والله وانتى كمان زي العسل ربنا يكرمك يارب ونورتينى ووحشتينى