الاثنين، 23 مارس، 2009

ازمة منتصف العمر(تحديث مهم يا قوم)

تحديث تاني مهم جدا
شهد شاهد من اهلها
وانا بامر على الاخوه المدونين كالعاده لقيت الموضوع ده فى مدونة هانعيش يعنى هانعيش
معبر جدا البوست ده وذو علاقه وثيقه بالكلام الى قلناه هنا ويلخص الموضوع ببساطه وهدوء جدااااا
*****************************************************************************************
تحديث هاااااااااااام صدر قرار من الباب العالي خاصتي (رضا يعنى ) انى اغير كلمة مرحلة الكهوله واخليها مرحلة النضوجه ههههههههههههههههههههههههههه
ايوه هو غيرها مش عاجباه
مع انه لسه ما تمش الاربعين
ههههههههههههههههههههههههه
**********************************************************************************************
السلام عليكم يا ايها المدونين الكرام

في موضع شاغلني بقاله فتره كبيره وانتم عارفني لما افكر فى حاجه هاتك يا قرايه ودعبسه وفرتكه واخيرا هاتك يا رغي فيه الموضوع لحد لما اكون عنه فكره مرضيه لدماغي الي جايبلي تعب القلب ده

المهم الموضوع زي ما شايفين هو ما يطلقون عليه عباقرة الزمان بتاعنا أزمة منتصف العمر

بصرف النظر عن التسميه دي وصحتها من عدمها الا انى شايفه انها موضوع كبير جدا ومش سهل تحليله

اولا : نعرف ايه هو منتصف العمر الى هو امته يعنى

ده من وجهة نظري المتواضعه عند الرجال من 40 الى 50 سنه وعند الستات من 35 الى 45 سنه

وثانيا بقى ايه هى ازمة منتصف العمر وملامحها وايه الى بيحصل فى الحقيقه مش لاقيه لها ملامح محدده

الا انها تكون فى هبل بيطبق على عقول الناس فجأه كده .

لا لا مش قصدي والله بس تلاقيهم فجأه فعلا بيتغيروا ويعملوا تصرفات مش من شيمهم وفى بعض منهم بيهد حياته كليا او يخربها وزي ما يكون قاصد يعمل كده .

وبعض الناس بتقول ان فى السن ده بيحصل مراهقه متأخره وان الى ما عاشش مراهقته (مش عارفه ازاي ما عاشهاش هو لازم يشرب سجاير ويضرب بانجو ويمشي مع بنات المنطقه كلها ولا يزور ام حسن كتاكت صديقة الطلبه عشان يبقى عاش مراهقته ؟؟؟).

المهم بيقولوا ان الى ما عاشي مراهقته بيرجع يعيشها بقى وهو عنده 45 سنه مثلا وده في رايي كلام يكيل بالباذنجان .

لان المراهقه مش لازم تتسم بالفسق عشان تبقى صح يعنى . يمكن تتسم بالرعونه او الاخطاء لكن مش لازم تكون منتهى الفسق والفجور مثلا .

انا شايفه ان هذا الراي بتاع المراهقه المتأخره راي مش واقعي تماما لان بالعكس كتير من يتعرضون لازمة منتصف العمر ومن بؤهم قالوا احنا كنا اشقيه واحنا شباب بس لما خلصنا الجامعه خدتنا الدنيا والحياه واتجوزنا وعقلنا بس ..........

بس دي بقى لازم يجي بعدها كلام كتير اوي وبيختلف من شخص لشخص هاسمعكم شويه

الاول احب اعرفكم ان ازمة منتصف العمر دي المفروض بيتعرض لها الجنسين الا انى من خلال بحثي ونخورتي فى نفوس البشر شايفه ان الرجال اكثر تعرضا لها فى مجتمعنا ليييييييييييه بقى ؟؟ هانقول لسه الكلام ده .

اسمعكم بعض ما سمعت من ناس فى العمر ده :

واحد كان عمره 41 سنه تقريبا قال: مش عارف انا جرالي ايه انا باقي ناقص عليا اقف اعاكس بنات فى الشارع .. انا خايف فعلا . ومش عارف انا باعمل كده ليه انا بقيت بافرح باي كلمه تتقالي من اي بنت صغيره من الى معايا فى الشغل زي العيال الصغيره

شخص آخر قالي انا فجأه حسيت انى مش عايش انا حسيت انى ثور مربوط فى ساقيه . كل يوم الف فى الساقيه من الصبح لحد بالليل باروح الشغل واشتغل وانجح وبارجع البيت اكل واشرب وانام وامارس حياتي الزوجيه بكل فصولها . بس حاسس انى باعمل كل ده وانا ميت وانا مش حاسس باي لذه ولا سعاده منه
حتى شغلي رغم نجاحي فيه الا انه بقى بالنسبالي ممل وخنيق . مش عارف اعمل ايه ؟؟؟!!!!! ومش عارف بيجرالي كده ليه ؟؟!!! انا خايف اكون باتبطر على النعمه وتزول من وشي زي ما بيقولوا بس والله انا حامد ربنا وشاكر فضله عليا بس انا تعبان اعمل ايه ؟؟؟؟؟؟؟؟؟ غصب عني

شخص ثالث وده صديق عزيز يعنى قالي شوية كلام بعدها قلتله دي ازمة منتصف العمر يا استاذنا .حسيت انه اضايق . وقالي : لاااااا دي والله ازمة عمر بحاله .

وفي اجابة الصديق ده انا لقيت بجد الاجابه على حاجات كتير كانت بتدور فى دماغي وهى ان ازمة منتصف العمر فعلا هى ازمة عمر بحاله لكن ........

بتتفجر عند نقطه معينه ..... طيب ايه السبب ؟؟ ايه سبب الازمه دي ؟؟؟ وايه يخليها تتفجر فى الوقت ده من العمر ؟؟

وجهة نظري ا لمتواضعه بقى

ان السن ده هو عبور لمرحله جديده والى هي حسب علم النفس وتقسيمه لعمر الانسان هى الكهوله

ايوه بينتقل من الشباب للكهوله(النضوجه) . فجأه بيلاقي نفسك كبير بيلاقي ولاده بيكبروا وولاد اخواته مثلا الى كان بيشيلهم ايه ده كبروا واتجوزوا وخلفوا !!!!! ايه ده هو انا عجزت ولا ايه ؟؟؟؟

طيب يعنى بس انا صحتي زي الفل والحمد لله ... بس ايه ده ؟؟ انا كده خلاص ما بقيتش شاب طيب ايه ؟؟؟ فين الفاني بقى في الموضوع ؟؟

انا كان نفسي اعمل حاجات كتير اوي وما عملتهاش ؟؟؟ طيب هاعمل ده امته ؟؟؟ طب انا سعيد ؟؟؟ لا ولا سعيد ولا زفت ده انا متنيل بستين نيله .

وبالنسبه للستات تبدا بقى الجنان الرسمي من انها مش واثقه فى نفسها ويا اما تبالغ فى الاهتمام بنفسها وتطرب لسماع المعجبين من حولها يا اما تعمل العكس تهمل نفسها اكتر واكتر وتبعد عن جوزها اكتر واكتر واكتر وتقول ما عادش بيحبنى اصل عجزت وطبعا هو ممكن يكون هو كمان فى نفس ذات المرحله العمريه الى ممكن يحصل فيها ازمة منتصف العمر .

وبالنسبه للرجال يبدأ اولا يثبت لنفسه بقى فحولته . ايوه ماهو احنا كشرقيين بنربط الرجوله والشباب بالقدره الجنسيه . عقلنا مقضينا على كده .

وكمان فاكرين هرم ماسلو ؟؟

لما قلنا ان فى الدرجه الثالثه من الهرم الى هى الحاجات الاجتماعيه لما قلنا ان بتبدأ تظهر تاني الغريزه الجنسيه بس بشكل عالي المستوى هنا مش عايز بس اشباع جسدي عايز كمان اشباع نفسي من الغريزه دي عايز الفه جنسيه ورضا جنسي من الشريك

وطبعا طبعا هايكون فى المرحله دي مر على جوازه من 10 الى 15 سنه والولاد كبروا والام مشغوله بهم . وهو طول عمره مكبر دماغه من العيال ومالوش دعوه بهم بيشتغل ويجيب فلوس بس .

سبل التواصل بينه وبين مراته قل . اها هو ما يهموش يسمع مواويل العيال مش من اختصاصه . وهى كمان ما يهماش اوي تتكلم فى الكوره ولا فى الاستمباط الى جت معيوبه من الصين .

كمان بقى في قيود حطينها حواليهم كتير مع وجود العيال واساسا هما بعدوا عن بعض تدريجيا وجايز بنوا بينهم سور كبييييييير من الجليد كمان وبقت خيبه

ومن هنا بقى تبدأ تطفو على السطح مشاكل كتير واحلام كتير ضايعه عايز الشخص يلحق يحققها ما خلاص بقى هاعيش امته ؟؟؟
وكمان الولاد كبروا دلوقتي اقدر اسيبهم

ويلاقي البنى ادم من دول الف سبب وسبب لتجريح شريك حياته ووصفه بكل حاجه وحشه عشان يهرب من لوم ضميره والمجتمع والشريك نفسه

ويلاقي كمان الف واحد ه عاجبها البيه المدير وبدلته وهيئته وعربيته ولسانه الحلو الى ما بيطلعش الا معاها اه ما هى حلوه وصغيره ولسانه بينقط سكر ومزوقه وبتفهمنى مش زي التحفه الى في البيت

(الى زمان كانت زيها وبتفهمه ومزوقه برضه وزي الفل بس هو غار عليها وقعدها من الشغل وقالها ما تتزوقيش عاجباني من غير ماكياج وقالها ما تكلميش صاحباتك دول مش مريحينى . وبلاش النت ده فيه قلة ادب . وبلاش تروحي ا لنادي وقتك وبيتك اولى بيكى وقالها ما تدخليش فى شغلي وما تاخديش قرارات فى البيت انا هنا الراجل وعمل منها كائن مالوش الا فى البيت والعيا ل والطبيخ )

وتلاقي الف واحد بصباص وزباله متجوز ولا مش متجوز يخرب عليها ويقولها اطلقي وانا اتجوزك ويلبس قناع الحب والفضيله ويقولها انا ما عشتش الا لما لقيت ويقولها جوزك ده ما يستاهلكيش ده انا كنت مكانه كنت شيلتك على راسي وعملت وسويت وهديت الدنيا عشانك .


وانا شايفه انها اكتر ظهورا عن الرجل فى مجتمعنا لان ببساطه الست فى المجتمع عندنا متحجمه واساسا احلامها محدده جدا وصغيره جدا ولو حاولت تثور على الاوضاع مش هاتلاقي حد ينصرها ابداااااااا وهاتكون مجرمه فى حق اولادها وبيتها وجوزها وتصب عليها اللعنات طول عمرها فده كفيل ان الازمه دي تتخنق جواها قبل ان تنفجر اساسا

اما الرجل فى مجتمعنا بالعكس لو عمل كده بيلاقي فريق من المشجعين والمتعاطفين معاه وكمان بيصبوا اللعنات على مراته الى ما عرفتش تحافظ عليه واهملت نفسها و و و و ..............
وكمان الرجل منذ نعومة اظافره مطلق ا لعنان والحريه لفكره وحلمه وامله خصوصا فى الناحيه الجنسيه

وهنا بتحصل الصدمه دايما لما الرجل الى شاف افلام جنسيه مبتذله وهبله بعدد شعر راسه يتجوز واحده اقصى حاجه شافتها زينات صدقى بتبوس عبد السلام النابولسي .
صحيح ده مش موضوعنا بس للاسف ان الصدمه دي بتفضل وبتستمر وما حدش بيعالجها والامور بتمشي زي بعضه فى اول خمس سبع سنين من الجواز على طريقة احسن من مافيش الا انها زي ما قلتلكم وقلنا فى هرم ماسلو ان بيجى وقت البنى ادم بيحتاج فيه اكتر من كونه اشباع جسدي

وطبعا طبعا بنصرف بنادول مع البوست عشان الصداع
بس وربنا انا الى عندي صداع وجايه من عند دكتور الاسنان حاشيه اربع ضرووووووس
وشكلي هدخل على منتصف العمر على الثلاثين هههههههههههههههههههههههه


اه نسيت اقولكم الاخ بيبرس الى كان لغى مدونته الى كان اسمها سهران لوحدي لاسباب مجهوله وشكلها ضغوطات خارجيه
رجع عمل مدونه تانيه اسمها سهران لواحدي 2
على غرار نورماندي توووو تووووووو توووو
هجوووووووووووم يا اعضاء الجمعيه على بيبرس


هناك 63 تعليقًا:

ستيته حسب الله الحمش يقول...

يعني حاشية اربع ضروس وكتبتي بوست مدفعية موجهه
امال لو من غير ضاكتور كنتي عملتي ايه؟
سلامتك ان شا الله اللي يزعلك

نيجي للبوست
الكلمة الصح انتي قلتيها
هي ازمة عمر بحاله

مين فينا بيعيش طفولته في ظل مناهج قاتلة وشقق تقتل العفرته؟

مين فينا بيعيش شبابه اللي شافه في السينيما بس ويروح رحلات ويشترك في أسر الجامعة

بندخل الحياة الناجحين في بلدنا يقضوا عيشة صعبة علشان يتفوقوا في المذاكرة ثم يتبعوها بشقى في الشغل برضه لأثبات الذات

ثم هوب تلاقي الدنيا راااااااااااحت وبقت ورا وبتطلع لسانها

الرضا بما قسمه الله ده منحة ربانية تخلينا راضين حتى عما لا نفهمه من حكم ربانية مخفيه


يالهوي يا صبرني
انا بمر بالميدل ايدج كريسس
الحقوني

وانا بقرأ البوست لقيتني بمر بيها

على فكرة هي عند الرجالة على سن سبعين كده لأنهم اسم الله على مقامهم يافت ومش بيكبروا خالص ومطلوبين "من وجهة نظرهم" في السوق على طول

اما عند الستات فهي فعلا من اربعين
يالهوييييييييييي

الحقني يا حسبو عاوزة اعيش واضحك والعب ومش عاوزة اسمع قصة مذاكرة تاني ابدا

عاوزة افتح المحل يا صبرني ساعديني
المدام جت "وانا طبعا صاحية متأخر وعلى سنجة ميه"
هاتوا قهوة المدام "يااخي طظ ف الدكتورة"
هاتوا شيشة للمدام ههههههههههههه

ايوه ادلع نفسي بعد فوات الأوان

بوسة ع البوست الجميل

حبيبه سى السيد يقول...

اولا الف سلامة عليكى انا مجربة وجع الاسنان دة
وحشو الدرس اللع يكون فى عونك


لا انا مش خدت بنادول انا قمت عملت شاى

ما ادمنت الشاى من ساعة ما اتجوزت

ازمة منتصف عمر مرة واحدة اية الكلام الكبير دة

بس ساعات ناس مش بتعيش عمرها ودول اللى بيقولوا عليهم سابقين سنهم

بس يعنى يمكن انا مش عارفة اوى
لازم الزوجين مهما مر العمر وبقى معاهم اولاد
لازم يخلوا وقت ليهم يحسوا ببعض فيه

عارفة كمان الازمة دى بتظهر اوى لما الزوجين بيبعدوا عن بعض اوى

او واحد بيموت والتانى بيفضل وحدة
فبيحس ان الحياة ضاعت من بين ايده لما اولادهم يتجوزوا وبيكون لكل واحد حياتة
بيحسوا ان العمر ضاع ومش عاشوا ولا لحظة

اسيبك بقى واعمل كباية شاى تانية
اعملك معايا
:)

تحياتى

عاشقه وغلبانه يقول...

بصي ياستي
فعلا في ازمه في افتره دي من العمر
بس هي ازمه موجوده من زمان بتبدأ تبان وتتبلور في الفتره دي
ليه بقي
لان الانسان بيكون واصل لدرجه عاليه من التشبع
او الملل
او التعود علي روتين الحياه
بس بتكون الحياه ماشيه عادي وعند اول قشه تقسم ضهر البعير تظهر الازمه
يعني تلاقيه متعود يروح الشغل كل يوم بيلبس نفس اللبس وبنفس الاستايل بيعمل نفس الحاجات بنفس الترتيب طول الفتره اللي فاتت من حياته
ممكن كمان يكون الاولاد وصلوا لمرحله من السن تخليهم قادرين يعيشوا حياتهم مستقلين
تلاقي كل واحد وقف مع نفسه مره واحده يحاسبها ويسألها عن الايام اللي فاتت وازاي مرت
اللي ماعاشش طفولته من كتر ماكان بيذاكر ومفحوت يروح يدور عليها
اللي ماهيسش وهو صغير يروح يهيس
اللي مالتزمش وهو صغير يروح يلتزم
المهم يعمل عكس ماكان بيعمل وخلاص
يغير الفتره الجايه عن الفتره اللي عدت
علشان كده ممكن البعض يهدم كل اللي بناه

الراجل بيدور علي شبابه يلاقي روحه فناه علي اولاده وبيته وشغله وتلاقيه جاي يدور عليه وعلي اي تصر اوي كلمه ترجع الشباب ده
والست تلاقي البيت والاولاد اخدوا حياتها وشبابها تيجي تدور عليه

ممكن كمان الفراغ يكون القشه اللي قولت عليها في الاول
يعني واحد ساب شغله
ست اولادها اتجوزوا وسابوها

المشكله فعلا موجوده
واهي بجمله المصايب اللي في المجتمع ياختي
ههههههههههههههههههههههههههه

ِِAdem El-Mahdy يقول...

موضوع حلو

بصراحة انا مأدرش أحكم
لانى مجربتش الموضع ه

لما اكون فى الاربعين هبقا اقولك تجربتى

بس اعتقد ان الموضوع ده مرتبط بدرجة تدين الشخص ...تدين حقيقى

يعنى درجة فهمه للدين و عمله له وسط كيان

اعتقد انه بيدى سبورت للواحد

حاجة كمان

فهم الزوجة لهذه المرحلة و معرفة التعامل معها
من التغيير فى نفسها و تجديد من شخصيتها او طريقة تعاملها مع زوجها

و طبعا الزوج له دور متبادل مع زوجته

جزيتم خيرا على الموضوع

احساس طفلة محبة للرومانسية بس واقعية يقول...

الف سلامة عليك يا صبرنى
4 ضروس بجد ربنا يعينك
وجع الأسنان صعب اوى

المشكلة اللى اتكلمتى عنها دى حلها سهل اوى دا طبعا من وجه نظرى المتواضعة
لو فى تفاهم بين الزوجين وفى علاقة اسرية ناجحة وتفاهم ومناقشة واسس للعلاقة بين اطراف الاسرة هيكون حل المشكلة فعل جدا
لو الزوجة متفهمة وفى صراحة وحوار
المشكلة هتتحل ببساطة وايدهم فى ايد بعض
لان هم كانوا طول عمرهم ايدهم فى ايد بعض مسبوهاش فى النص شوية وبعد كدا رجعين بيدوروا فين الخطأ

المشكلة فعلا اشباع عاطفى ونفسى الانسان بيكون محتاج لية ولما ميلقهوش فى بيتة بيبحث عنى خارجا

تقبلى مرورى

MR.PRESIDENT يقول...

هو..يعني..ايه..ازمة..اصلا..طبعا
انا..بهزر..المشكلة..هل..الاعلام
اللي..غرس..فينا..الشماعة..دي
وهل..الأزمة..دي..عند..جدودنا
وكون..طبيعة..الرجل..إنه..يبحث
عن..الجنس..فدي..طبيعة..مثلها..عن
كون..المرأة..تبحث..عن..الحب..وهل
الشخص..المدعي..عنده..ازمة..بيشوف
طبيب..نفسي..يحل..المشكلة..ولا..بيخليها
شماعة..معاه..تشكري..علي..عرضك..لموضوع

بنت مصر يقول...

اولا حمد الله على السلامة بعد حشو الضروس الاربعه والله يكوون في عونك

وانتي جيتي من الدكتوور على الكمبيوتر ورميتي البوست القنبلة وخرجتي ولا اكنك عملتي حاجه :)

بصي انا قربت على المرحلة دي وربنا يستر ومش حكدب عليكي واقولك انه مش بيجيلي اوقات بحس فيه اني خلاص ابتديت اكبر وهو انا حياتي في الولاد والبيت طيب وانا فييييين وكتير بقعد افكر طيب هو جوزي حيفضل يحبني بعد مااكون في الاربعينات وشكلي كبر

بس حقولك من خلال الواقع انه الراجل فعلا اكثر عرضه للأزمة دي مش علشان كل الستات متحجمه واحلامها محدده وصغيره جدا زي ما قلتي في موضوعك لكن علشان المجتمع بيسمح بده للراجل وشايف ان ده شئ طبيعي

لكن المرأه المجتمع عايزها تكون متحجمه

المرأه في ايدها انها تعدي المرحلة دي بسلام وتاخد بايد زوجها علشان يعدي هو كمان المرحلة دي بأمان ودون أذية ليه او ليها او للاولاد اللي هم اكثر ناس بينضرو في النص

بأنها تفضل تهتم بنفسها وبزوجها وتنمي تفكيرها حتى لو من خلال النت زي ما احنا بنعمل ما هو ده تنمية لتفكيرنا واهتمامنا بحاجه خاصة بينا احنا الزوجات بعيدا عن اهتمامات البيت بس طبعا يكون بصورة صحيحه

وبعيدن وايه يعني لما تسمع اللي بيقوله عن الكورة ولا اللي بيحصل في الصين ولا حتى كوالالمبور

المهم انها تفضل تسمعله وباهتمام حتى لو مش عاجبها الكلام

تحياتي وبانتظار الموضوع القادم

Appy يقول...

انا راى ان الرجاله اللى بتمر بدى فى السن ده بالذات يا ريت تبص لولادها لو عندها ولو متجوزة تبص للى متلقحه فىالبيت وتعيش الفتره دى برونقها وتبطل استعباط يا اوختى والجرى وراء البنات الصغيره وخاصه اللى بيطلشوا فى عقلهم وفاكرين ان هو لو معاه فلوس يعرف يتجوز بنت صغيره او يستقطبها ليه
فانا من هذا المزنق يا اوختى احب اقوله روح جامعه الدوله هتلاقيهم متلقحين
وغير كده برضه اللى بيعيش نفسه فى قصه حب مع بعض الستات اللى عندهم ازمات
يروحوا يعملوا عمره
ولا يحجوا ويرحمونا بقى
بصى يا رغايه هانم انتى
كل سن وله طريقه حياته يعنى الشباب الشغل والحب والتنطيط وبعدين يدهولوا ويتجوزا
ثم بعد ذلك يتهببوا فى البيت ويشيلوا مسئوليه العيال وبرضه يتنيلوا ويحبوا مراتتهم واولادهم
انا اعرف ناس عايشه مع مراتهم مش سعدا اوى بس سعدا باولادهم اللىعاوز يتنحنح ويجيب دباديب اقولهم حب ولادك وهاتلهم يا حج
اسكتى يا بنتى جيتى على الجرح اصلك وانا كنت ناويه انشهم بوست محترم الرجاله اللى ماشين فى الشارع دول ولا الستات الكبار اللى رايحه تحب عيل قد ولادها وتقولك ازمه منتصف العمر يا فرستى اللى اخدتها من مفروسه يانى
شالوم بقى عليكم

reem يقول...

الف سلامة عليكى ياصبرنى وعلى ضروسك .
انا حسدتك ولا ايه ؟؟

وبعدين ايه يابنتى البوست اللى قلقنى دا ؟

انا فعلا بفكر زى ماقلتى بحس ان الحياة خدتنى ومش بعمل حاجة لنفسي خالص
هو انا بمر بالازمة ولا ايه ؟

لا وقلقت اكتر احسن جوزى هو كمان يكون بيمر بيها... وانا يا صبرنى مش ناقصة ازمات

هو انا شايفة ان لو الزوجين فاهمين بعض فعلا وكل واحد بيحس بالتانى اوى هايقدرو يتجاوزو الازمة دى في بدايتها
وممكن هما الاتنين يعملو تغيير في حياتهم مع بعض بدل ما كل واحد يعمل التغيير دا مع طرف من برا

واعتقد ان الست الذكية ممكن تفهم اى تغيير طفيف بيطرأ على جوزها وتحاول تعالجه بهدوء

وفي حاجات صغيره وبسيطة بتعمل تغيير في حياة الزوجين وبتخرج بيهم من دائرة الملل

اما الحق افكر في اى حاجة تعمل تغيير قبل ما الراجل يمر بالازمة ويروح منى فيها

بوست حلو اوى بجد

بنت الغربة يقول...

البوست ده اكتر من راااااائع ياصبرنى ياموورة
بجد جاى على الوتر الحساس فعلا ..
الفترة دى فى حياة اى راااجل صعبه جدا ...واكيد فى حياة اى ست خصوصا لو كانت معاها عيال ومحتاسه بيهم لوحدها وجوزها شايل ايده من الليله..
ونفسه يعيد امجاد شبابه الضائعه فى الجواز وتربية العيال ..
انا مش عارفه الواحده تعمل ايه فى الموضوع ده بالذات ...
لأن الواحده هتتعلم من مين الحياة الزوجيه غير من جوزها ..؟؟؟؟؟؟
لأن حراااام اصلا تتفرج على الافلام دى او حتى تشوفها على النت ..
وليه الزوج متوقع ان مراته هتكون عارفه لوحدها التفاصيل الصغيرة والكبيرة فى العلاقه ....؟؟؟؟
صدقينى احنا محتاجين ثقافه جنسيه
محترمه من دكتورة متخصصه علشان التغيير مهم جدا فى الناحيه دى بالذات..
لأن زى ماهى مهمه للراجل ..هى مهمه للست جدا كمااان..
وده ممكن يغير كتيير جدا فى علاقتهم..
وانا رأى انه مش عيب لو الست اخدت درووس فى كيفية المعاشرة الزوجيه..
بس المشكله انك تلاقى دكتورة متخصصه فى الناحيه دى ..
واهتمام الست بنفسها مش عيب فى حدود المعقول ..وجوه البيت اكتر من بره..
وفى الاخر ربنا هو اللى بيستر ياصبرنى ..
وربنا يهدى كل الرجاااله والستااااات
تحياتى ليك ياقمر

ضايع يقول...

انتي بصراحه جبتي موضوع في الجون

ويامحاسن الصدف او محاسن الحلو كنت لسه باشرح فيه لزوجتى الحبيبه

عموما انا هعرض وجهة نظر في الموضوع هي متسقه مع ما ذكرتيه ولكن تختلف في الصياغه.

وطبعا هبدء بالرجل عندا في ستوته

ازمة منتصف العمر حقيقه وليست خيالا ولها اسباب منطقيه جدا.

الراجل فعلا بيلاقي نفسه بقى طور في الساقيه بس مش هي دي المشكله بالسبه له.

المشكله الحقيقيه ان زوجته بتبدء التعامل معاه من منطلق ابو العيال او الزوج وبيختفي تماما الحبيب والصاحب من العلاقه الزوجيه وهنا بتكون مشكله الراجل

الاحساس الي بيتولد عنده في الحاله دي بالكبر والعجز. وهنا بيثور الطفل الي جواة اه لسه معجزش ولسه مش عاوز ياخد لقب او العيال دلوقتي وعاوز يتدلع ويحس انه لسه حبيب وانه لسه تتمناه اي بنت.

وهنا دور الست العاقله بصراحه وانا عارف ان ستيته هتهب فيه دلوقتي

بس فعلا خدوها كلمه من راجل في منتصف العمر

الست هي الي تقدر تخلي الفترة دي تعدي بأمان لزوجها وتخلي الازمة دي في صالح حياتهم الزوجيه وليست ضدها بل بالفعل ممكن تكون نقطه انطلاق لتجديد الحياه الزوجيه بالكامل وعمل انتعاش جديد وكانها حياة جديده.

نيجي بقى للست
مش نفس اسباب الرجل ولكنها مشابهه
هي اتحولت إلى ام ببساطه
آه هو شعور جميل وكل حاجه بس برضه عاوزة تقول انها لسه في قمه انوثتها
وانها لم تفقد اغرئها ولا جمالها
فبيحصل لها حاله الارتداد للمراهقه وهي هنا مش بتكون ازمه على قدر ما بتكون حاله لان الحاله عند الرجل نظرا لتعامله معها هو ما يحولها لازمة ولكن المرأة بطبيعتها تتعامل بشكل مختلف مع الحاله فلا تصل بها لمرحله الازمة

وهنا برضه يجي دور الرجل العاقل الي يعرف يقرأ ده في عين مراته ويتعامل معاه ومعاها بحنكه وعقل
يعني ميقولهاش " انتي اتهبلتي يا وليه " ولا عيب الي بتعمليه ده شوفي سنك" لا ممكن جدا يجاريها ويتعايش مع المرحله معاها

وعلى فكرة المرحله دي بجد حلوة بس لو نعرف نوجها لمصلحتنا هتلاقوها مرحله مرحه ومفيده جدا لعشرات السنين القادمه من زواج ناجح انشاء الله


معلش طولت بس الموضوع دسم

تحياتي ...........

خواطر ليست عابرة يقول...

طب ايه رأي حضرتك بأة اذاكنت انا لسة عندي 26 سنة وحاسس بأزمة منتصف العمر دي مع اني لسة ما دخلتش دنيا أصلا لكن من كتر ملل الحياة سعاة بحس اني خالاص مش عاوز حاجة وساعات بحس العكس اني لسة ماعملتش أي حاجة وكل اللي عملته لا يمثل سوي أقل من 1/1000000000000000 من المفروض اني أعمله.

mony يقول...

ازيك يا صبرني

الف سلامة عليكي يا اختشي


ندخل بأه في الموضوع اللي مابحبش اتكلم في

مافيش حد (راجل)قريب او بعيد اتكلمت معاه في موضوع منتصف العمر ده الا و قال:
سن الاربعين ده الراجل بيبدأ فيه حياته
في حين ان الست خلاص بتكون شطبت خلاص و قفلت الدكان

انما الرااجل بوصل لمرحلة الكمال في النضج الفكري و العقلي و مرحلة الكمال في فحولته

في حين ان الست بتكون خلاص بقت ستنا الحاجة و كفايا عليها بيتها و عيالها و لا احفادها و سجادتها و سبحتها


رديت علي الكلام المتخلف ده بقول الرسول صلي الله علي وسلم
ان الله تبارك وتعالى يُجرى يده على وجه العبد بعد سن الأربعين " إن لم يتب " فيقول الله تعالى أما آن لهذا الوجه أن يستحى

مش يبدأ يدور علي شبابه اللي ضاع


فكرتيني بواحد قريبي سنه مش باين عليه كنت فاكراه في اخر التلاتين بسأله حضرتك عندك كام سنة
قعد يلف و يدور
و يقول انا قلبي لسة شباب
انا مش حاسس اني كبرت
اصل انا متجوز صغير

يا عمو حضرتك كام سنة اصل شكلك مش باين عليه سن
طبعا (عمو)ديه اكني اديته قلم علي وشه
:)

و فيييين علي ما قاللي انه 45 سنة


انما الست لما تمر بالمرحلة ديه بتكون من توابع الاعراض اللي عند الراجل
(من وجهه نظري المتواضعة)
يعني الراجل بيبدأ يدور علي نفسه بره متناسيا ان زوجته بتمر بنفس المرحلة
فبتحس انها بقت خلاص مش عاجباه و انه بيقارن بينها و بين الاصغر منها


اما بأه لما الراجل يقعد يقول لمراته ماتحطيش مكياج شكلك كده عاجبني
و ابعدي عن ديه و سيبك من الشغل بيتك اولي
فهو كده اللي بيخليها توصل للمرحلة ديه بدري
و يجي في الاخر يقول مابتهتمش بنفسها و لا بتهتم بيا و طول اليوم في المطبخ و مع العيال
و بعدين الكلام ده بيتقال بدري اوي
قبل ما الراجل يوصل للاربعين بكتير


و النبي يا صبرني لو فضلنا نتكلم في الموضوع ده مش هنخلص
فتك بعافية بأه علشان انا كمان ضرسي بيوجعني و عاملي صدااااع

صبرني يارب يقول...

سوتيته حياتي

اه والله يا اختي اربع ضروس قطعيه واحده

وبعدين ماهو ده وقت مناسب جدا لكتابة بوست
حيث انى شفايفي متبنجه ومش عارفه اتكلم ولا ارد على حد من العيال ولا ابوهم وعليه يكون دماغي فاضيه بقى للرغي بصوابعي على البلوج


والرجاله لا لا ما بيعجزوش ولا بيبقوا اكسباير ابدا
على اساسا ان كونتينرات بودرة السيراميك الى لقوها كلها فياجرا دي كانت جايه عشان تقوي بلاطة السيراميك
هع هع هع

وازمة منتصف العمر مش لازم كل الناس تعدي عليها بنفس الدرجه
ومش هاتكون ازمه ابدا لو الانسان عايش حياه متوازنه وعاديه وسعيد مع مراته تحديدا

والمحل اوك انا موافقه واول زبونه لعلمك انا خلاص ظبطها
ههههههههههههههههههههههههههه

صبرني يارب يقول...

زوجه عنيده

تمام الكلام يا فندم بس فى ناس بتوه فى الدنيا وما بيعرفوش يرجعوا

وبيستسهلواويستعذبوا هد المعبد

والشاي بالنعناع بقى بليز

صبرني يارب يقول...

عاشقه وغلبانه

الملل والفراغ قد يكونوا مؤثرين فى الامر انما مش اسباب اساسيه ابدا

واهى بجملة المصايب فعلا

صبرني يارب يقول...

ادم المهدي

ايه ده انت عايزنا نستناك لما تروح هناك كده على الاربعين
ههههههههههههههههههه

اتفق معاك فعلا

المرجعيه الدينيه والفهم الصحيح للدين والى فى رايي بيتبعه فهم صحيح للحياه اساسا
ووجود شريك حياه متفاهم ومثقف وعلى قدر برضه من الدين وفهم الحياه ممكن يكون حل للمشكله دي من قبل ما تحصل

صبرني يارب يقول...

احساس طفله

فعلا ده حقيقى الموضوع اشبه بنقطى انفجار لوضع غلط

وتغير فسيولجي ونفسي ما اتعملش حسابه من الشخص لجهله بتطورات الحياه والشخص جايز

او لاسباب تانيه كتير

عمرو يقول...

الأزمه موجوده و لا يجوز اٍنكارها
و لها أسباب كثيره أغلبها خارج عن اٍرادة الشخص صاحب الأزمه و لكن لا أظن اٍن مشاهدة الأفلام الاٍباحيه من أسبابها
أرى اٍن المرحله دى علشان تعدى فلازم الطرفين يكونوا أصلا عارفين أنه فيه حاجه اٍسمها أزمة منتصف العمر و أعراضها كذا و كذا و لابد من المصارحه بأسبابها و اٍستعداد كل طرف لتحمل مسئوليته و مش بس يحدف المسئوليه على الطرف التانى و اٍلا فعلا الحياه بينهم حتتجمد و سيسوء الأمر أكتر و الله وحده أعلم بما ستؤول اٍليه الأمور ..
تحياتى على هذا البوست الرائع و سلامة ضروسك :)

صبرني يارب يقول...

الريس بحاله يا جودعنا ؟؟؟

تماااااااام الله ينور عليك شمااااااعه

فى ناس فعلا بتاخدها كده وبتقولك اصل انا باعيش ازمة منتصف العمر والمراهقه المتاخر ويلا بقى نقضيها بمب ومراجيح ويهبل الدنيا

طبعا حضرتك اكيد عارف ان المجتمع ككل ما بيعترفش بمشاكله اصلا ولا بيحاول يفكر فى موضوع طبيب نفسي ده بتيتا ايه هو مجنون ولا ايه
احنا شعب مثقف انت عارف
والشماعات اهي بتنفع برضه وبتشيل عننا عذاب الضمير

صبرني يارب يقول...

بنت مصر

اتفق معاكي تماما فى كل كلمه قولتيها

واه والله جيت كتبت البوست وقفلت لتاني يوم بقى على ما عرفت اوصل للكمبيوتر تاني


تحياتي يا جميل

صبرني يارب يقول...

آآآآآآآبي
شوفوا البت اسم الله عليها ماشيه بمطوتها على طول

تبلطل استهبااااااااال اهو ده تماما الى انا شايفاه ان نص هذه الازمات استهبال حقيقى

ونشي البوست يا بطه مستنيه

نورتي يا جميل

صبرني يارب يقول...

ريم

لا يا حياتي انا سناني دي شغاله فيها من سنتين مش عارفه اخلصهم والمشوار متأجل بقاله شهر لحد ما جاله يوم يعنى

وما تقلقيش يا جميل ما يقدرش يعمل معاكي حاجه صفريلى بس وانا اجيب اعضاء الجمعيه واجي انتى طلعتي قريبه ساعة زمن
هههههههههههههههههههه

واتفق معاكي فى الكلام الى قولتيه تماما

صبرني يارب يقول...

بنت الغربه

هى يا جميل المشكله فى السن ده ما بتبقاش متعلقه بس بالنواحي الجنسيه
الا اننا دايما بنعلق الشباب والصحه والجاذبيه بالجانب الجنسي والقدره الجنسيه

وعليه بيبدا بقى يدور على مرتبه اخرى من الاشباع ما بيلاقيهاش مع مراته لان اساسا فى خلل فى العلاقه دي من بدايتها وده الى قصدته من اخر كلام فى البوست

وبالنسبه لموضوع الدكتوره اعرف انه بدأ يظهر حاجات زي كده دلوقتي فعلا


وانتى فين يا بنتى ورينى نفسك كده وابقى شوفي الاوف لاين الى سبتهولك

صبرني يارب يقول...

ضايع

يا فندم انا لعيبه قديمه كله فى الجون كده
هههههههههههههههههههه

كلامك كله تمام يا فندم فيما عدا ان حضرتك اسقط العلاج ومواجهة الازمه كلها على الطرف الاخر

الست لواحدها ما تنفعش لازم يكون هو عنده رغبه حقيقى فى اصلاح حياته وتحمل مسؤلية افسادها اصلا

من غير ده مش هاتقدر ميت ست عاقله تثنيه عن هدم المعبد

والعكس طبعا كمان

ستيته خشي انتى كملي بقى
هلمي يا فتاه
ههههههههههههههههههههههه

نورت يا فندم

صبرني يارب يقول...

خواطر ليست عابره

تمام ماهو ده يثبت وجهة نظري ان الازمه تتمثل فى انه حاسس انه ما عملش حاجه

بس ايه اللون الاسود ده يا معلم
هههههههههههههههههههههه

ماهو الواحد لو ما حاسبش نفسه بدري هايحتاس بعد كده ويقول ازمة منتصف العمر برضه

تحياتي لك ونورت

صبرني يارب يقول...

موني

قبل اي شيء
اي حاجه ممكن توجعك فى جسمك وتطنشيها تروح لواحدها

الا الاسنان ياامي الى يوجعك لازم تروحي للدكتور الانتظار معناه عذاب اكتر عند الدكتور

حيث انه هاينتقل من تنضيف جير بس
الى حشو
ومن حشو عادي الى حشو عصب
ومن حشو عصب بس الى تركيب تلبيسه

موال زفففففففففففت روحي يا حاجه انا مجربه كل السكك


بالنسبه بقى لموضوع البوست

فطبعا هما ما بيكبروش خالص مالص بالص انما الستات الى بتسلم نمر
مش عارفه ازاي يا حاجه والله

ده ضد العلم والطبيعه البشريه تماماااااااااا

وبعدين ما نضحكش على بعض منحنى القدره الجنسيه عند الرجال بيبدأ ينزل من 45 سنه غصب عن عينه

وفعلا فعلا انا معاكي ان كتير الست بتتاثر بحالة جوزها خصوصا لو هو وصل للمرحله دي قبلها

وطبعا هو اساسا كان واخدها فله وهو الى عملها كده وبعدين يقولها ايه يا وحشه يا كده

ههههههههههههههههههههههههه

وعلى رايك مش هانخلص كلام فى الموضع ده يا اختشي

صبرني يارب يقول...

عمرو

ايه ده مين قال ان انا قلت الن الافلام سبب فى المشكله ؟؟؟

ابلوتلي لاااااااااا مش هو ده السبب

موضوع الافلام الاباحيه ده جت كجمله اعتراضيه لسبب فى الفجوه الى ممكن تحصل فى العلاقه الجنسيه بين الزوج والزوجه

وطبعا لازم الطرفين يلجأوا لبعض بس ده لو كان عندهم نيه اصلا للاصلاح الاثنين لان واحد لوحده ما ينفعش

حضرتك نورتنا يا استاذنا

عمرو يقول...

:)
لا أنا برضو ما قلتش اٍنك قلتى اٍن مشاهدة مثل هذه الأفلام هى السبب
أنا قلت اٍنها مش من الأسباب يعنى فيه أسباب كتير غير كده و ده تأييد لكلامك ضمنيا
فعلا التفاهم مطلوب جدا بين الطرفين لعبور هذه الأزمه اللى مش شرط أنها تكون فى منتصف العمر لأن الله وحده أعلم بالأعمار :)

صبرني يارب يقول...

عمرو

استاذنا انا عارفه ان الاعمار بيد الله

انا شايفه انها تعبير مجازي عن نقطة الانتقال من مرحلة الشباب الى مرحلة الكهوله

لا لامش الكهوله ابو رياض اصدر قرار بتغيير كلمة الكهوله الى النضوجه
ههههههههههههههههههههههه


اه هو فى اسباب كتيره يا استاذنا لفشل العلاقه الجنسيه بين الزوجين لكن انا جبت مجرد مثال عليها هو اختلاف درجات العلم بالامر واختلاف الاحلام الخاصه بالموضوع ده
ده موضوع كبير عايز بوستين ثلاثه عشان نقدر نلمه

لكن الفشل فى العلاقه الجنسيه هو من اهم اسباب تفاقم الازمه محل النقاش
وده فى رايي لربطنااحنا بين الرجوله والشباب والفحوله او القدره الجنسيه .

تحياتي لحضرتك وما نقدرش على النور ده كده مرتين
نورتنا يا فندم

يــوم جــديد يقول...

تدويناتك أكثر من رائعة
تدل على شخصية واعية ومثقفة ومحددة

أنا كل فترة بقرأ كل تدويناتك الجديدة لكن مش بلحق أعلق لأنك بتكوني كتبتي التدوينة اللي بعدها وماشاء الله كل بوست بيكون محتاج تعليق في بوست لوحده
ماشاء الله عليك
لا حرمت لوحة مفاتيحك :)

صبرني يارب يقول...

يوم جديد

معقوله ده انا تقريبا بانزل بوست كل اسبوع يعنى

هههههههههههههههههههههه

الكي بورد بتاعتي اشتكت يا بنتى والله ده انا هاعملها مقام
هههههههههههههههههههههههههه

وهابخرها كل يوم بعد المغرب
اه والله باحبها مووووووووت وما بارتحش الا فى الكتابه عليها وبس

تحياتي ليكى ومتشكره على الكلام الحلو بتاعك ده
نورتي

د. ياسر عمر عبد الفتاح يقول...

بجد بوست مفيد
وكويس إن الواحد يعرف هيحصله إيه من دلوقت لما يوصل للمرحلة دى

عمرو يقول...

فاتورة الكهربا حتيجى عاليه شويه فى البوست ده :)
مانقدرش نسميها فشل العلاقه الجنسيه لكن نسميها فتور أو برود العلاقه الجنسيه بين الأزواج
و ده فى رأيى مش من الأسباب اللى بتؤدى لهدم الحياه الزوجيه لأن ده مش سبب و لكن نتيجه ..
نتيجه لفشل العلاقه الزوجيه الحياتيه الاٍنسانيه بين الأتنين
و أصلا أسباب هذا الفشل الاٍنسانى له أسباب قد لا تبدو للبعض مقنعه و لكن لكل واحد مقاييسه و ميزانه الخاص اللى بيوزن بيه الأمور من وجهة نظره

حنعيش يعنى حنعيش يقول...

روعة ..بجد روعة...انت غطيتى لمشكلة من كل جوانبها.. انا بحل المشكلة فى قصة وانت تحلى المشكلة بطريقة البحت والنخورة ..... بس يارب حد يسمع

شمس النهار يقول...

سلامتك الف سلامه انا بقا لما ضرس العقل قعد يوجعني سبع سنين خلعته كده يعني عملت له خلع بعيد عن القراء
قلت اجرب يمكن لما اشيله اتجنن شويه كده والامور تتوازن
اما موضوع الازمه ده الناس ماشاء الله اتكلموا كلام جميل خالص
وخصوصا الاخ ضايع ربنا يرجعه بالسلامه
اتكلم كلام جميل خالص
بس انت عارفه الانسان المتوازن عمره ماتجيله الازمه دي
يعني اللي عايش الوسطيه في كل شئ
يعني وقت للعمل ووقت لله ووقت للأهل ووقت لمتع الحياه ومايحرمش نفسه من الهوايات اللي طول عمره بيعملها
يعني اللي بيحب يسمع موسيقي مايبطلش عشان اتجوز هو الجواز قال له ماتسمعش
يبتدي يسقط من الواحد حاجه في حاجه لحد مايحول حياته الي حياه ممله بارده فارغه من اي متعه
فايبتدي يدور ليه عشان ايه ويبتدي يتصرف غلط وعلي فكره كل طرف لما بيحس بالموضوع ده بيتكسف يقول للتاني بس بيحاول يجرب معاه من بعيد لبعيد ولما بيتصد يبتدي يدور بره
يعني الست تغير لون شعرها وتقص قصه جديده وتقول له ايه رأيك فيه كده ياحبيبي ياجوزي
يروح جوزها قايل ايه جوزي حبيبي دي انت عايزه حاجه مني والا ايه و مش عيب يبقا اولادك طولك وتعملي شعرك اللون ده
خلصت ياكبير وشكرا وقد ازعر من انزر
الرجل مثلا يجي يقول لمراته ماتيجي كده نلبس ونتشيك ونتعشي في حته هاديه ونرقص زي زمان تروح هي راده عليه من تحت اللحاف وهي رابطه راسها والا ريمبو المنتقم في زمانه
جري ايه ياراجل ماتتلم ده احنا عندنا عيال عايزه كل قرش
وبكده تنتهي التجربه المنزليه القانونيه ويكون هذا هو الاذن للزوج بالتدوير علي اللي هتتعشي وترقص وتحب في جمال حضرته
المشكله ان كثير من الاحيان الازمه دي بتترك جروح عند كلا الطرفين مابتخفش
مع ان لو كانوا قعدوا مع بعض واتكلموا كانت هتكون احلا فتره ممكن يعيشوها مع بعض
وعلي فكره الحب بين الازواج بيحل كل حاجه

صبرني يارب يقول...

د.ياسر عبد الفتاح

لا لا ما تفهمنيش غلط

مش كل الناس لازم تتعرض للازمه دي بشكل مرعب لان لو هو عايش حياه متوازنه فعلا ومعطي كل حاجه حقها حتى استمتاعه ولهوه هايبقى كل شيء تمام

الرسول عليه الصلاة والسلام كان بيقول
رحوا عن قلوبكم ساعة بعد ساعه فان القلوب لتصدأ

حنين القلب يقول...

يا ربنا
كل ده وحاشيه4ضروس اومال لو سليمه كنتى عملتى ايه؟؟؟

فعلا الازمه ازمه عمر كله
ان الانسان يحس ان عمره بيضيع منى ويحاول يعوض نفسه بحاجات غلط

مش حد عاش فترة من عمرة كامله من غير ما يحس انه ناقصه حاجه يبقى الحل ايه نحاول نكلمها ولا نعيشها من اول وجديد
تبقى مصيبه لو كل الرجاله يعملوا زى اللى انتى قولتى عليهم


وحشتينى يا صبرنى

صبرني يارب يقول...

استاذنا عمرو


ندفع يا باشا ولا يهمك هههههههههههههههههههه

لا يا فندم ماهو انا من وجهة نظري المتواضعه برضه ان برود العلاقه معناه فشلها
والبرود ده مش بيجى نتيجة المشاكل الاخرى بس لا
ده بيجى من ان بتنتهي مرحلة اشباع الحاجه الجنسيه كحاجة للبقاء وتبدأ مرحلة البحث عن الالفه الجنسيه والرضا الجنسي ومن هنا بيجى عدم الرضا عن شكل العلاقه وبالتالي البرود والتملل منها .
واكيد طبعا فى تفاوت وفروق فرديه بين كل ما من يرضى الشخص

زينب نت جحش كانت مسوده عيشة زيد بن حارثه ومطلعه عينه
لكن اتجوزت الرسول مشيت زي الفل الحياه
وزيد كان متجوز غيرها قبلها وبعدها وكان برضه عايش كويس

عادي جدا الفروق دي

الا ان مش بالضروره ان فشل العلاقات الحياتيه بين الزوجين هى السبب فى فشل العلاقه الجنسيه

لكن عموما اساسا عمرهم ما يوصلوا للرضا الجنسي والالفه الجنسيه الا لو كانوا فعلا على مستوى من التقارب ما يخليش فى بينهم مشاكل اصلا .
هى كلها دايره مرتبطه ببعضها لا يمكن تفكها ولا تقول مين قبل مين

انما ممكن تناقش كل خط فينها على حده

نورتنا يا استاذنا

صبرني يارب يقول...

حنعيش يعنى حنعيش

والله يا دكتور صوتي راح اقول ما حدش بيسمع برضه

نسأله العون

نووووورت يا فندم

صبرني يارب يقول...

بيبرس

انت مش هاتجيبها البر شكلك والله مش هاشيل عنك بقى

صبرني يارب يقول...

ِشمس النهار

شموسه يا حياتي تمام كلام بالظبط

بس كمان انا باستغلط اوي الى لمجرد رفض الشريك للمحاوله يياس

لانه ده طبيعى خصوصا من الست فى مجتمعنا ده

لانها اساسا بتبقى محرجه تعبر عن حبها لو كان فى حب
بتكتمه وجايز تموته كمان

ومن الطبيعى يحصل الرفض ده من الشريك عموما
لانه ما ينفعش يجى فجأه يعمل كده يا اما بالتدريج عشان يقدر يدوب جبل الجليد الى اتكلمت عليه قبل كده انا

يا اما يقولها بكل وضوح وصراحه انه عايز يغير حياته ويفتح لها قلبه ويتفقوا على التغيير سوا
وده بيكون اقصر طريق

تحياتي يا شموسه ونورتي

صبرني يارب يقول...

حنين

والله يا جميل هما كلهم عمايلهم سودا زي ما انتى شايفه
هههههههههههههههههههههههه

نورتي يا قمر

جنّي يقول...

السلام عليكم

ما شاء الله موضوع جميل وزي العادة مدعم بأمثلة .. وبالطبع هذه الحالات موجودة بالفعل ولكن المفروض أن يكون الشخص عكس ذلك تماما فقد بلغ درجة أعلى من الحلم والعقل وأصبح أكثر رشدا وأقرب الى الله تعالى .. لقول الله تعالى :
{وَوَصَّيْنَا الإِنسَانَ بِوَالِدَيْهِ إِحْسَاناً حَمَلَتْهُ أُمُّهُ كُرْهاً وَوَضَعَتْهُ كُرْهاً وَحَمْلُهُ وَفِصَالُهُ ثَلاثُونَ شَهْراً حَتَّى إِذَا بَلَغَ أَشُدَّهُ وَبَلَغَ أَرْبَعِينَ سَنَةً قَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحاً تَرْضَاهُ وَأَصْلِحْ لِي فِي ذُرِّيَّتِي إِنِّي تُبْتُ إِلَيْكَ وَإِنِّي مِنَ الْمُسْلِمِينَ }الأحقاف15

ولكني أظن أن هذه الحالة تظهر أكثر عند المرأة( بدون عصبية للرجل ) وذلك بسبب التغيرات الفسيولوجية التي تحدث عند المرأة بسبب انقطاع الطمث واختفاء هرمونات الاستروجينات ( الاستراديول والاستريول ).. بينما لا تحدث تغيرات فسيولوجية عند الرجل ..

الموضوع مثير للقراءة والبحث ..

اشكرك

صبرني يارب يقول...

جني

لا لا يا فندم الموضوع مالوش علاقه بالطمث خالص ولا الجانب ده

غايته عن الست لما توصل 35 سنه ممكن تروح تخلف مثلا

انما صدقنى الموضوع اشمل من اننا نعلقه على انقطاع الطمث

وعلى فكره الرجل كمان بيطرأ عليه تغيرات فسيولجيه برضه

اقرا يا فندم وابحث وانا تحت امرك نتناقش

ahmed_k يقول...

أنا بتفق تماما مع رأي أ/ رضا
المرحله العمريه دي مرحلة النضج وإكتمال العقل
لقول الله ( حَتَّى إِذَا بَلَغَ أَشُدَّهُ وَبَلَغَ أَرْبَعِينَ سَنَةً قَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحاً تَرْضَاهُ وَأَصْلِحْ لِي فِي ذُرِّيَّتِي إِنِّي تُبْتُ إِلَيْكَ وَإِنِّي مِنَ الْمُسْلِمِينَ )صدق الله العظيم

وهنا نرى أن الله جل في علاه أرسل الوحي للنبي عليه الصلاة والسلام بعد أن بلغ 40 سنه ليكون أقدر على تحمل أعباءها ومسئولياتها
فتلك الأزمه من وجهة نظري لا تحدث إلا لمن لديهم خلل في تنشئتهم من الأساس
فلو الأساس كان سليم تأكدي أن تلك الظواهر مستحيلة الحدوث والنماذج أمامنا كثيره
طبعا كلامي لا يعارض أن ما ذكرتيه موجود بالفعل ولكنه الشاذ عن القاعده
ولأنه أساس التربيه أصبحت كثيره في أيامنا تلك فسنجد أن تلك الظواهر ظهرت على السطح وأستشرت

أما بخصوص مقولة مرحلة الكهوله فتلك المرحله قد لا تبدأ إلا بعد السبعين من العمر
أما الأربعين أو الخمسين أو حتى الستين مش كهوله هي مراحل في الحياه كأي مرحله بعد الأربعين مع أختلاف درجات قربها من الكهوله ولها مميزاتها فهؤلاء الكهول يملكون العقل والتجربه والحكمه التي يكون في امس الحاجة إليها الشباب وإلا أصبحت حياتهم دربا من المعاناه لا يقوون على تحمله

مواضيعك قويه وفيها فكر كعادتك

تقبلي خالص تحياتي

صبرني يارب يقول...

احمد كيه

يا فندم انا لا انكر تاثير التربيه والنشأه على حياة الفرد طول حياته

الا ان برضه مصممه ان الازمه دي قد تحدث لاشخاص محترمين جدا وعلى خلق ودين وكل حاجه لكن عندهم مشاكل اجتماعيه ونفسيه
ومش هاعيد بقى الكلام الى قلته فى الموضوع

اما بالنسبه لموضوع الكهوله فيا فندم انا والله مش باجيب من عندي انا اتعلمت فى علم نفس النمو
ان المراحل العمريه كالآتي
الطفوله(مبكره ومتأخره ) ... المراهقه.. الشباب... الكهوله ...الشيخوخه

ومرحلة الكهوله محل الحديث بتبدأ تقريبا فى ا لاربعين

حضرت تقدر ترجع لاي موقع بيتكلم عن علم ا لنفس وهاتلاقي الكلام ده

هو ليه انتم زعلانين من كلمة كهوله دي ؟؟
هى شتمه ؟؟

انا طول عمري ا قراها كهل فى الاربعين من عمره ايه ده مش عايزين تعترفوا انكم تخطتيتوا مرحلة الشباب ولا ايه

لا هي دي ا لحقيقه
ههههههههههههههههههههههه

mahasen saber يقول...

صبرنى يعنى انا لما ابقى فى انتصاف العمر

هبقى فى ازمه

صبرني يارب يقول...

محاسن

ههههههههههههههههههههههههههه

ما قلنا بقى مش شرط يا محاسن ممكن ما تبقاش ازمه ولا حاجه

نورتي يا قمر

KHALED يقول...

انا لا اعترف بما يسمى بأزمة منتصف العمر .. ولكن أعترف بنضج التفكير لدى الأنسان فى مرحلة معينة فيكتشف أنة لم يحقق أحلامة و أنة غير سعيد و أنة غير راضى عن حياتة فيصبح فى أزمة ..
ودة مابيحصلش مع كل الناس ..

صبرني يارب يقول...

استاذ خالد

والله هى نظريه

بس لو كانت الحكايه مجرد نضج تفكير كانت تواجه المشكله دي بعقل وحكمه اكتر من الحالات الى بنشوفها من رعونه حقيقه فى مواجهة الازمه وتسبب بازمات اخرة حقيقيه له ولمن حوله

تحياتي لحضرتك

فشكووول يقول...

يا امرأه مطحونه
تحياتى
كل الكلام اللى انت قلتيه صحيح .. وبرضه كل الكلام اللى قلتيه مش صحيح

الوعاء اللى بنصب فيه كلنا الوعاء الاسلامى

بمعنى .. انه فيه فعلا ازمة منتصف العمر .. وايضا ما بعد منتصف العمر
بس فيه ناس بتقدر تخلى الازمه دى تعدى بالتوازن مع حاجات كتير
مثلا : اللى يبص على انه عمره فات وعايز يلحق باقى العمر بنزواته وهفواته
وفيه ناس بتحس بالازمه دى لكن بتقدر تعوضها فى حاجات كتير زى الاولاد مثلا
الواحد لما يبص على نزواته ويبص على اولاده واحفاده بيلاقى فيه توازن بين حب النزوات وحب الاولاد والاحفاد
وممكن يطلع كل حبه وكل حياته فى اولاده واحفاده
والغريب ان اصحاب منتصف العمر وما بعده فاهمين وحاسين بالحاجات دى .. ومهما قالوا للناس ان فلانه دى مش كذا ومش كذا لكن بيبقوا عارفين انهم بيواجهوا ازمة منتصف العمر وعارفين نفسهم كويس
فيه اللى بيتغلب عليها .. وفيه اللى بيكون اسير لها
وفيه اللى ما بيحسش بيها خالص
وفيه برضه اللى مظلومين وفعلا بيكون عمرهم ضاع وعايزين يلحقوا يعوضوه
مش العلاقه الجنسيه هى الاساس فى الموضوع ده
هناك برضه الاشباع العاطفى اللى بيبقوا محرومين منه او اتحرموا منه
لكن اللى بيعرف ربنا بيعدى من المرحله دى

ثم ان بعدين يا ستى عوض ربنا حيكون فى الحور العين ... آهوا الواحد يلاقى له امل فى عوض ربنا برضه.

ما هو لو ما فيش امل فى عوض ربنا تبقى الموضوع مش مستاهل وعوضنا عليك يا رب

تحياتى

صبرني يارب يقول...

استاذنا الغالي فشكول

ههههههههههههههههههههه

الحور العين اه

ايوه كده اتعشموا فى الى هناك احسن
ههههههههههههههههههه

بس لعلمك هانيجى وراكم هناك
ههههههههههههههههههههه

انا ما قلتش ابدا ان السبب الاساسي هى العلاقه الجنسيه

لا يا فندم انا باقول احنا عقولنا الى بتربط بين الشباب والفحوله او القدره الجنسيه ربط مباشر متوازي كمان


وطبعا فى حد ممكن يواجه الازمه دي بكبتها او التفريغ فى اي حاجه تانيه

وممكن كمان نصلح حياتنا وده بديل فى رايي صحيح وصحي جدا

تحياتي لحضرتك ونورت

ahmed_k يقول...

الله وأنا مالي انا
انا بتكلم في العموم
بتدخليني في كهولة الأربعين ليه
كده ححملك وزر وقف حالي هههه

mostafa rayan يقول...

كلام معقول وحلو وزين بس الحل ايه ؟
ايه دة هوانا ايه اللي جابني هنا وبقرأ المضوع دة ليه اصلا واحد 27 سنة ماله بأزمة منتصف العمر
لما نتجوز واحدة ونقضي معاها سنة نبقي نفكر هيحصل ايه بعد15
اقولك اناهروح عند حبيبتي اللي دايما بستستقبلني احلى استقبال
طابخين ايه النهاردة
سلاموز كتير قوي ليكي

mostafa rayan يقول...

ملحوظة مش خارج السياق
الرجل يعتقد بداخله انه اصغر من سنه
الفعلي وانا بالفعل قرأت ان في دراسةاجريت واتضح فيها ان الراجل يشعرانه اصغر منسنه الحقيقي بحوالي 13 سنة
عكس المراة التي تشعر دائما انها اكبر من سنها
كلما في الامران الرجل لا يخجل من ان يقول سنه الحقيقي بينما يعتبر هذا السؤال ازمة الازمات عند المراة
تحياتي تاني ليكي

mostafa rayan يقول...

ربنا يعفو عنك ويشفيلك ضرسك

صبرني يارب يقول...

احمد كيه

اه ما لكش دعوه صحيح

هو انت فاضل كام سنه يا عم الشباب
ههههههههههههههههههههههههه

صبرني يارب يقول...

مصطفى ريان


طيب ما انت لازم برضه تاخد بالك يا معلم الايام بتفوت تجري


وبعدين مين قال ان الستات الى عندهم ازمه فى السن بس
والله والرجاله اكتر

انا عن نفسي كاتبه تاريخ ميلادي على لعمود الىقدام بيتنا
هههههههههههههههههههههههه

ولا بيهمنى

احساس طفلة محبة للرومانسية بس واقعية يقول...

صبرنى ليك تاج عندى
ياريت تيجى تخدية
:)

MaNoOoSh يقول...

ازيك يا عثل
انا مكسوفة على تقصيرى فى زيارتك

---

عجبنى تحليلك للموضوع جدا وهى فعلا ازمة عمر بحالة
والمصيبة لو الزوج والزوجة بيمروا بيها فى نفس الوقت..
دول كدة يجيبوا شحار للعيال
طب نصيحتك ايه بقى للعيال فى الحالة دى؟

صبرني يارب يقول...

مانوش

يا قلبي تنوري دايما يارب


وبالنسبه للعيال افتكر انهم يحجروا على امهم وابوهم فى الحاله دي ويطردوهم من البيت
هههههههههههههههههههههههههههههه

صبرني يارب يقول...

احساس طفله

عينى يا جميل روحت وخدته