الأحد، 15 مارس 2009

من رد قلبي .... ايه الى اتغير ؟؟؟؟



سلام عليكم يا مدونينا الاعزاء
النهارده هانرغي بشان الفيلم الجميل ده
من كام يوم كده صباحا لقيت رضا جايب فيلم رد قلبي
ايوه بتاع انجى وعلي والسهوكه دي
المهم يعنى قعدت اتفرج على بداية الفيلم الى ما شوفتهاش كتير الى هى وعلي وانجي صغيرين وكانت عامله الدور بوسي وهى صغيره .
وبعدين لاقيتنى كملت لحد نص الفيلم كده مش عارفه ليه يعنى
لفت نظري حاجه مهمه اوي قلت اقولكم عليها يمكن انا فهمي تقيل
فاكرين ساعة لما علي راح يتقدم للكليه الحربيه ؟؟
وابوه راح يطلب من باش كاتب البرنس انه يطلبله واسطه من البرنس وباش كاتب البرنس قاله ما اقدرش اعمل كده
لكن هاشوفلك بقى باش كاتب الكليه الحربيه تقريبا كان معاه فى كلية الباش كاتبين
المهم راح علي يعمل كشف هيئه (الى هو كشف الواسطه يعنى ) وقابل هناك زميله
وزميله قاله انت وسطتك مين قاله باش كاتب الكليه
وزميله قاله انا بقى ماليش واسطه خالص وزي ما تيجى
المهم عشان ما تهووش مني
ساعة المقابله عم الحاج علي دخل وكلمه ونص وخرج وبعدين صاحبه دخل قالهم خطبه طويله عريضه كده وجه واحد فيهم يسكته قوم اتدخل واحد تاني كباره قاعد وقالهم سبوه يتكلم
وكان قاعد بقى يقولهم انا جيت من غير واسطه واملي ابقى ظابط جيش وبؤين جامدين كده
المهم يعنى ان علي وصاحبه دخلوا الكليه الحربيه من غير وسايط
سامعه واحد قديم زيي كده من القرون الوسطى حافظ الفيلم بيقول ان انجي كانت موصيه واحد من البشوات عليه
لا ما هو ابوها عرف وطين عشيتها وقال للباشا ده ما يسألش عنه
يعنى الاثنين دخلوا بدون واسطه ... فله ؟؟
واخو علي الى هو حسين دخل كلية شرطه عشان كان بيلعب رياضه باين ولا حاجه كده
وبدون وسايط وابوه جناينى !!!!
طيب ايه ؟؟؟
فين الظلم طيب ؟؟
طيب يعنى الكليه الحربيه كانت بوسايط ؟؟؟
وبياخدوا ولاد البشوات بس ؟؟؟
حد كده يا رجاله يقولي الكليات دي دلوقتي بيدخلوها ازاي ؟؟؟
ياريتها بوسايط بس
ده وسايط وفلوس كتير اوي وغير كده وكده لو كانت وظيفة الاب فى البطاقه حاجه اي كلام ما بيتقبلش
اه والله بجد
طيب ايه ؟؟؟
يعنى البشوات الى كانوا ماسكين الجيش ايامها كانوا بيقبلوا ناس من غير وسايط اهو
اه ماهم عايزين يعملوا جيش . ايوه الجيييييييش مش عايز ناس فافي
هايعملوا ايه بولاد البهوات الهياثم دول
طيب بالنسبه لنا حاليا مين بيدخل كلية الشرطه والحربيه والفنيه العسكريه وما الى ذلك ؟؟
ماهم الفافي برررررررررضه
طيب ايه ؟؟؟
طيب فين العدل الى حققناه بقى
فين المساواه ؟؟
مين يقدر يدخل كلية من دول دلوقتي من غير واسطه ومبلغ مالي مش عارفه وصل كام دلوقتي اخر ما نمى الى علمي كانوا 20 الف الشرطه
وكمان لازم يكون ابوه مش جناينى
طيب ايه الى اتغير ؟؟
وكنا فين وبقينا فين ؟؟
تعرفوا عمي الكبير الله يديه الصحه لما بيحكيلى على مدرسته والى كان فيها وطبعا مدرسته دي كانت من حوالي ستين سنه
حاجه يعنى خيال
وخدوا بالكم انا جدي كان راجل على اده مكافح جدا
كان ترزي محترم اه كان ترزي البهوات بس اهو ترزي
وكان مسؤل منه 7 عيال غير اخواته وما الى ذلك
اه حتى السبع عيال دول ا لى فضلوا من العشرين الى تيته الله يرحمها جابتهم
كلهم ناس متعلمين و مرموقين حاليا ولله الحمد اجتماعيا يعنى ما حدش فيهم من كبار رجال الاعمال ولا حاجه
ههههههههههههههههههههههه
المهم يعنى
عمي بيقولي ان المدارس ما كانتش مجانيه ولا كانت مصاريفها سهله
الا ان جدي كان بيصر انه يدخلهم مدارس وكمان هما كانوا بيجتهدوا عشان ياخدوا منحة تفوق
يعنى كان مش المدارس بفلوس بس
لا كمان الغلابه المتفوقين كانوا بيتعلموا
ومدرسة بابا صلاح عمي الكبير دي لواحدها عايزالها قاعده عشان تعرفوا احنا وصلنا لفين
والى نفسي اعرفه ؟؟
احنا رااااااااااااااااااااايحين على فين ؟؟؟؟؟
وبس كده كفايه عليكم رغي
صدعتوني
هههههههههههههههههههههههههههه

هناك 63 تعليقًا:

أحمد حسن البنا يقول...

صباح اللوك لوك يارغاية هانم

طول عمر الواسطة موجوده فى مصر وفاماكن كتير طول مافى شغله مضمونة او مركز عالى هتلاقى الناس بتتسابق عليه ولان الدنيا زمان كانت كارت الباشا والبيه كانت هى دى تاشيرة دخول الاماكن الهامة فى اى مكان مش الجيش بس لكن ده مايمنعش ان كان فيه ناس بتحب مصر وبتختار ولاد الفلاحين وعامة الشعب اللى برضو محترمين ومافيش عليهم شبهه والجيش زمان زى ماكان فيه رجال السرايا والملك والباشا برضو كان فيه نواية حركة الضباط الاحرار اللى كانوا فى لجان الاختيار ومن حقهم اختيار مين يوافقوا عليه برضو وصاحب على كان بيعمل كشف هيئه مع واحد من الرجالات دول اللى قال سيبوه يتكلم ودى فى الدراما معناها كبير جدا والمؤلف قصد ان الجيش رغم الوسايط والفساد كان فيه قيادات مؤمنة بكلام شاب زى صاحب على ودى جمله كانت رمز للحركة القادمة من الضباط الاحرار
اما واسطة الزمان ده اللى احنا فيه اتغيرت بعد عزل البشوات ودخول الانفتاح الاقتصادى وبقت كروت رجال الاعمال والشرطة والرقاصات لامؤاخزة هى الواسطة اللى ماشية فى البلد وبرضو هتلاقى عنصر محترم ومؤمن بالشعب رغم كل كروت الوسايط اما بالنسبه للفلوس اللى بتدفع دى كانت رشاوى فى الاول بياخدها رموز معروفه لتسهيل الامور لكن الدوله شافت ان مافيش مانع تاخد هى الفلوس دى تحت اسم تبرعات وحقوق رعاية ومعيشه لطالب الشرطة والجيش احيانا خصوصا لانهم لقوا اقبال رهيب من الكل على الكليات دى لان الشغل فيها مضمون والرواتب حلوة وبالمره يضمنوا ان اللى يبقى فى الكليه ناس غنية عشان لما يمسكوا سلطة يبعدوا عن الرشاوى والانحراف وده مش عيب ابدا لان الضابط و غنى مايتخفش من زمته لو خصم فى قضيه عرض عليه رشوة عشان يماين معاه ضد الطرف الاخر لكن طبعا ده مش معناه ان الفقرا مايدخلوش المناصب دى لان البلد مش حكر على الاغنيا وبس لان عامة الشعب بيفطر ويتغدى طوب والحكاية مش هتنتهى يالوك لوك بكره يطلع علينا زمن تانى والواسطة يتغير مفهومها ويجى يوم تلاقى الواسطة كارت من ناس عمرنا ماكنا نتخيل ان يبقى ليهم وضع فى المجتمع ولان مجتمعنا فى تغير دائما للاسوا هتلاقى الكروت بتنحدر جيل بعد جيل لحد ماتلاقى كروت اهل الفساد هى اللى بتحجز الاماكن دى رغم ان اللى بيطلب الواسطة محترم ويستحق المكانه ويمكن يكون اهل لها لكن جريه ورا الواسطة هيبقى اساسيات حياة وشرط لتحقيق حلمه تحت مبدا لو لاقيت البلد اهلها ماشيين عرايا اوعى تلبس هدوم ليقولوا عليك خولل هههههههههه وعمار يامصر ههههههه ويجعله عامر يا لوك لوك
واضح ان مافيش فايده فى البلد دى اتغيرت حكومات كتير ولسه زى ماحنا رايحيين للاسوء تفتكرى نغير ايه تانى عشان ينصلح حالنا ؟؟؟ نغير الشعب باه هو ده اللى لسه ماتغيرش نجيب تقاوى شعب من الصين او اليابان عشان حالنا ينصلح

صباح الرغى ياست الكل
احمد البنا

ستيته حسب الله الحمش يقول...

يعني انا اصحى ع الصبح الاقيكي بتقلبي علي المواجع والبطاطس

الموضوع وما فيه كان حكمنا ملك ماركة هيء وميء وشخاليل
بس اهو كان ابن عز وشبعان

شيلنا افندينا وجيبنا الحافين
والحافين مش شبعانين
سرقونا وفقرونا وركبوا على قفا اللي جابونا

كان لازمن ولابد يطلعوا عيلة محمد علي اوغاد اوباش وهم الحمل الوديع اللي جاي "يطهرنا" علشان نعرف نصلي صح

بعد سنين "وده جمال التاريخ" كله انكشفن وبان وطلع الموقف شيلنا ألضو جبنا شاهين .. المصريين مش عايشين

الكليات دي مش فلوس وواسطة بس ياماما

دول بيطلبوا ممتلكات أهل العيل في الملف
يعني لو مكانش مقرش صح بعد اللي سبق ذكره
يروح يلعب في الطين

بلا شرطة بلا جيش قطيعة تقطعهم
مهيات زفت وفتنة الرشوة
يعني واحد بيشتري لأبنه النار بإيده لو دخل شرطة
وبيطلع بظابيظ أمه لو دخل جيش صفية حلمي ماركة "عيني منه أه يالهوي .. عيني منه يا خرابي"

بس خلاص

farida يقول...

صباح الرغي اللي بخبط في السياسة

يا ستي انتي عاوزاهم بعد ما دخلوا أبناء الشعب الجيش و الأبناء دول عملوا ثورة على البشوات و النظام الحاكم

عايزاهم لما مسكوا الحكم يغلطوا الغلطة دي؟؟
إزاي

لازم الجيش يكون كله من بعضه و كله مستفيد من بعضه و بشوات الزمان ده هما بس اللي يكون لهم حق الواسطه لبعض

علشان متدخلش أي فئة قليلة مندسة من عامة الشعب
و يصور لها خيالها المريض القيام بثورة و لا حاجه

الشعب ده محكوم بالجيش
إزاي توصلي الشعب للحكم؟؟

لما ابن الجنايني دخل الجيش راح أمم خيرات الباشا اللي كان بيشتغل عنده

وده الدرس اللي اتعلمه حكامنا من التاريخ
و من فيلم رد قلبي
:)

شمس النهار يقول...

كله من الاستاذ رضا جوزك اقول فيه ايه
كان لازم يشغل الفيلم يعني
ماعلينا

همس الاحباب يقول...

اللى معاه واسطى باكل بسطا واللى ما مامعهوش يقعد على البسطه
وزيد عليهم حاليا اللى ما معهوش فلوس كمااان ما يلزموش
يعنى كانت بلد شهادات واصبحت بلد وسايط وفلوس
وفين المساواة ؟؟؟؟؟؟
طب تصدقى بالله انا حاسس ان الملكية كانت ارحم من الجمهورية
يلا صباحه رغى

احساس طفلة محبة للرومانسية بس واقعية يقول...

عارفة يا صبرنى انا لفت نظرى اخر سطرين
الوسايط والكلام دا من زمان بس مكنش بنفس الدرجة دى هو بس وزاد شويتين
بس المهم واللى اتغير تماما هو التعليم
كان الناس بتتعلم وعايزة تصلح بلدها
ودا كان امتى فى زمان غريب كان كلة احتلال وسياية وحرب ورغم كدا كان الفساد اقل
هنا فى اليابان او فى اى بلد برة مصر حسب ما اعرف
التعليم مش مجانى وفى منح عشان التعليم و مصاريفة عالية جدا او الشباب بيشتغل ويصرف على نفسة وكل واحد عارفة هو عايز يدخل كلية اية وامكانياتة اية وبعيد عن مجموعة فى ثانوى كمان وبكدا يتخرج شباب ناجح فى مجالة وكل واحد اخد حقة

مقدرش اقولك ؟
احنا ريحين فين بقى ؟
ولا المستوى هينحدر لغااااية فين ؟

تقبلى مرورى

mahasen saber يقول...

بس جرا لتفكيرك كده لماجوزك جابلك فيلم روملنسى

امال لو جاب كوميدى هيحصل ايه

عمتىمساءا يا قمر

mahasen saber يقول...

بئه احنا اليى صدعناكى برضه هههههههههه

صبرنى طمنتينى على مستقبل الواد

بنت الغربة يقول...

حبيبتى ياصبرنى
ايه المواضيع الجامده دى ...؟؟؟؟
انتى بتخبطى فى الحلل ليه ؟؟؟؟
مالك ومال الشرطه والجيش..؟؟؟؟
العيله عندنا فيها الاتنين والحمد لله..
وامن دوله كماااان .....
ده غير مناصب حلوة ياختى كده فى الجيش...تخض شويه ..وماتسأليش دخلوا ازااااى ....بمجهودهم الشخصى اكييييييييييييييد....وشوية كوسه صغننه كده بالباشميل...
بس السؤاال هنا هو ليه الاصرار على دخوول الكليات دى رغم مرتباتها المتواضعه نوعا ما......وسواء دخولها عن طريق الكوسه بالباشميل او بالفلوووس....فالمرتب واااحد مابيتغيرش....
المهم السلطه والسلطه والسلطه....
لأن معظم اللى داخلينها مش فارق قوى موضوع المرتب معاهم ....
المهم ايه اللى هايخدوه من ورا المنصب ده ..
وكفايه بقى كده ليروحوا كلهم فى داهيه ....
انت رغيك يودى فى داهيه ياصبرنى...
تحياتى ليك ياقمر

mony يقول...

ازيك يا صبصب


بصي يا ام مريم انا هقولك علي وجه نظري

انا خالي اكبر مني ب6 سنين متخرج من الكلية الحربية
و اخويا اصغر مني ب4 سنين متخرج من كلية شرطة

و الاتنين دخلوا من غير لا وسايط ولا فلوس يا صبصب و الله


بس الحكمة في الموضوع ده من اللي فهمته ساعة التقديم
ان مطلوب حد ظابط شرطة ولا جيش يكون اهله ناس علي الاقل مستوي اجتماعي متوسط
علشان لو ابوه بواب او سوابق مثلا زي فيلم عمارة يعقوب يان مايتعايرش من مجرم مثلا او من حد من زملائه
لان ممكن مجرم في الحجز يكون عارف اصله و فصله يقوله ابوك كان كذا و كذا
من الاخر مش عايزين ظابط يكون عينه مكسورة

هو ده اللي فهمته اثناء التقديم سواء في الجيش او الشرطة

موناليزا يقول...

انا بقى اللى بيلفت نظرى وعايزة اعرف اجابته
الفلوس اللى بياخدوها دى بتروح فييين؟ ومين بالظبط اللى بيستفيد بيها

Sweet Violet يقول...

مش كل ولاد البهوات فافى ياصبرنى فى بردو منهم لسه شباب كويسه

زمان كانوا بيقدروا التعليم و اللى بيتخرج بيلاقى مكانه فعلا مش زى دلوقتى نسبه البطاله عاليه جدااا و الشباب يقولك هاخد شهادة و فى الاخر ايه ؟؟ علشان كده حتى لو جم يبوسوا الايادى علشان الناس تتعلم بردو مافيش فايده غير طبعا ان منظمة التعليم نفسها خربااااان

اما موضوع الواسطة لانها كانت قليله قووى زمان و طبعا معروف ان الحاجة اللى تكون غير مقبوله فى زمن بتبقى فى الزمن اللى بعده شئ عادى علشان كده تلاقيه دلوقتى بقت هى اللى بتمشى كل حاجة

و كمان ماتسيش ياصبرنى ان الشرطه او الجيش سلطه عاليه فى البلد و طبعا ماينفعش ان الواحد ياخد فى البلد دى سلطه ببلاش علشان كده لازم طبعا اللى عايز يدفع دم قلبه .. اذا كان اللى بيبقى عايز يشتغل فى وظيفه ما بيدفع يبقى اللى عايز يبقى معاه سلطة هيدخلوا ببلاش

كل حاجه دلوقتى بقت ماشيه كده للأسف مش الشرطة و الجيش بس

Ahmed يقول...

الله الله
ياسلاااااااااااااام
يعني ايه يعني؟
نفهم من كده أن انتي مش عجبك ايامنا ديه وعاجبك أيام علي وانجي والسهوكه ديه؟ يعني انتي ضد الثوره؟
هههههههههه

لا لا لااااااااااااااا
انا بقولها هنا اهوه للأخوه اللي مراقبين البلوج ده
أيامنا فل وقشطه وعسل بالموز واللبن كمان

آدي أخرة التعليم المجاني
هههههههههه

بوست عثل

صبرني يارب يقول...

احمد حسن البنا

لا ضباط احرار مين دول جم نتيجة الغلطه الى عملوها انهم قبلوا ابن الجناينى والى زيه
ههههههههههههههههههههه

على راي رضا لما قلتله طيب ما هو البشوات كانوا بيقبلوا من غير وسايط اهو
قالي وهى دي كانت غلطتهم ههههههههههههههههههه

وانا ضد مبدأ ان الغني ايده عفيفه عن الرشاوي يا معلم خالص

لان نضافة الايد مالهاش دعوه بتقل الجيب

ممكن اقولك ان الجعان عنده دافع اقوى للسرقه

انما رشاوي اظن يعنى البحر بيحب الزياده
واكتر ناس بتاخد رشاوي فى البلد هما الناس الى مليانين فلوس

الازمه ازمة اخلاق يا فندم

وانا زي ما قلتلكم انا بافكر اولع فى الشعب ده ونخلص ههههههههههههههههههه

نورت يا فندم بيت اللوك لوك العالمي

صبرني يارب يقول...

ستيته
هههههههههههههههههههههههههههه

على فكره الست دي يا جماعه انا ما اعرفهاش خالص ولا ليا علاقه بها

شالو الدو جابو شاهين

بس المصريين لسه عايشين امال يقلبوا مين يا حلوه

انا عن نفسي ما نفسيش ابنى يطلع ظابط ابدااااااا بتيتا البته

وزي ما انتى قولتي بلا قرف

وطبعا اسرة محمد علي كانوا وحشين وشريرين وما لهومش الا فى الحريم والرقاصات والخمر والسهر والهلس

عشان نسقف ونهلل للثوره الى هاترجع البلد لاصحابها

وادينا سقفنا لما جالنا التهاب فى الاوتار عادي

سقفي يا بت منك لها وزغرتي يا الى ما انتيش غرمانه

ستيته انتى مين ومين الى جابك هنا ؟

صبرني يارب يقول...

شمس

مش كده برضه ؟؟

عموما هوقالي بعد البوست ده انا ولا اعرفك
ههههههههههههههههههههه

وما علينا فعلا

صبرني يارب يقول...

فريده
ههههههههههههههههههههههه

تمام كده هو ده والله الى انا قلته

زي ما قلت للبنا كده فوق

رضا قالي وكانت دي غلتهم يا ستى انهم حقانيين ودخلوا ابن الجناينى وصاحبه

وعشان كده مش هايكرروا الغلطه تاني

تحياتي ليكى ونورتي

ومين قال سياسه

اطلاقا مطلقا دي سينما يااختي

احب السيما يا انا

نورتييييييييييي

صبرني يارب يقول...

همس الاحباب

لا لا لا

انت برضه مين انا ما اعرفش الراجل ده يا جماعه

مين ملكيه دول

انا ما اوعاش عليهم يا اخويا

تحيا جمهورية مصر العربيه

ما لناش غيره ولا شوفنا غيره وشكلنا مش هانشوووووووووووووف

صباح الهنا يا استاذنا

صبرني يارب يقول...

احساس طفله

والله يا بنتى انا قعلا ما قهرني الا التعليم

شوفي انا لازم ان شاء الله احكيلكم الكام حدوته الى عمي بيحكيهم ليا عن الدراسه ايامه

اعتقد انه لو دخل مدرسه ثانوي حاليا ممكن ينهار نفسيا


تحياتي ليكى يا جميل

صبرني يارب يقول...

محاسن صابر

ايوه طبعا انتم الى صدعتوني

ايوه يا محاسن فيلم رومانسي ايه

اساسا هو يادوب شاف معايا مشهدين كده وقام خرج وانا الى كلمت

وبعدين امال عايزاني اعمل ايه يعنى ابربشله بقى وكده

ما باعرفش يااختي ابقي علمينى
ههههههههههههههههههههه

صبرني يارب يقول...

بنت الغربه

طيب ما انا كمان عندي قرايب فى الجيش والشرطه عادي

لا بس هما قدام داخلنها قبل انتشار الكوسه

غير انك عارفه عينتى يا اختي الرجالي بتاعي 3 متر فى 3 متر يعنى امال مين يروح الجيش
ههههههههههههههههههههههه


والناس طبعا عايزين كل حاجه
والسلطه هى فلوس بشكل غير مباشر يا ست الكل

داهيه فين الداهيه دي

فى هناك كابتشينو ؟


نورتي يا قمر

hasona يقول...

السلام عليكم

الاول كان تلك الكليات كانت كذلك بواسطة في فترة الملكية
وبعد الثورة (الضباط الاحرار) أصبحت للجميع تقريبا
وحسب المؤهلات من عامة الشعب وهما اللي حاربوا وكانو رجالة ووقفوا وقفة رجالة

الي أن ارتد الزمان حتي اقترب الي الملكية
وأصبحت الواسطة والرشوة وكل حاجة ممكن تتخيليها

لذلك حريصين ألا نحارب
ــ،،،،،ـــ
وان شاء الله التغير قادم

لتعود مصر عظيمة وتسلك طريقها في القيادة والزعامة الحقيقية وليست شعارات جوفاء


تحياتي

فاتيما يقول...

بصى بقى يا صبرنى
الاول أزيك ...
و بعدين عايزة اقولك إن الفيلم الأسود دا كان احد اسباب وكستى او خيبتى التقيلة قوى ى ى ى ى
أل أنا يا اختى بنوتة لطيفة كدا من و أنا بالفينوكات قاعدة كل شوية اتفرج على رد قلبى لما يتعرض فى التلافزيون و الأجهزة المرمية دى ...
و أعيييييييط
و انفعل على الآخر
و أقول يا سلااااااام
اهو دا الحب اللى بجد
تذويب الفوارق و بلاها قنعرة إكمن حد ربنا فاتح عليه بفلوس و لا طبقة غجتماعية احسن شوية ..يقوم يفترى على قصة الحب الفخيمة دى و يحاول يحطمها ؟!!
لازم كل عصفورين يبحبوا بعض يبقوا لبعض مهما كانت الفروق ...
و أعييييييييط
و أقول لروحى لما اكبر هحب من غير كلاكيع و كلام مجعلص من بتاع المفام و الفولة ام كيال و النظام دا
و أقرى القصص و الروايات و أصمصم على موقفى ...
و أتفرج كل سنة على الفيلم بحماس
و أتعاطشف مع شكرى سرحان
( اللى بالمناسبة بحبه جدا ) ...
مطولش عليكى
روح يا زمان و تعالى يا زمان
و أتحط فى موقف مشابه لأنجى ..
بس منيش بنت باشا و لا يحزنون ...
بس كان فيه فروق طبقية كتير
تفتكرى أسكت و أتكن ؟!!
لااااااااااا
قولت أستمسك بحبى حتى النهاية
و عنه و اللى جرالى ...
برضو بقيت بعييييييييط
مفيش فايدة ..ههههه
و أتارى الفروق و الأختلاف بين طبقة و أخرى كل دا كان كلام صح ...
مش حكاية قنعرة ما كلنا قدام ربنا بنتسأل عن عملنا ...
لكن فى كل التعاملات حاجة
و الجواز حاجة تانية خاااااالص
لازم يبقى نفس التعليم و البيئة و المركز الإجتماعى و إلا فشلت الزيجة بأمتياز أللهم فيما عدا بعض الحالات النادرة ....
طولت عليكى معلش
بس الاستاذ رضا قلب عليا المواجع و الأفلام ...
سلامى ليه و ليكى يا ام القمرين

صبرني يارب يقول...

موني


والله ما فى ناس بتدخل من غير وسايط ماشي

بس كام فى الميه يعنى وظروفهم ايه ؟؟؟

ومش عايزين الظابط يكون عينه مكسوره ؟؟؟

انما طبعا عايزينه يكسر عين الناس ويذلهم ويعذبهم

اعتقد مافيش اي حاجه تخلينا نقول ان اساسا مؤسسة الشرطه عندنا حاجه ناجحه ومحترمه لحد الان

اي نعم فيهم عناصر يمكن محترمين وكويسين

لكن كام فىالميه ؟؟؟

نورتي يا موني

صبرني يارب يقول...

موناليزا

ههههههههههههههههههههههههههههههه

ظريفه موت والله

بيفرقوها على متضرري زلزال 92 ههههههههههههههههههههههههههه

صبرني يارب يقول...

سويت فيوليت

يا حبيبتى اي واحد من ولاد البهوات الى بيدفعوا رشاوي

كفايه انه اساسا قابل مبدأ الرشوه عشان تتاكدي انه غير مؤهل للمكان ده

المختص بتنفيذ العدل او حماية الدوله

وانا على فكره ضد ان اي حد ده يعمل اي حاجه
والمساواه بين الناس والاشتراكيه والبتنجان ده

انما انا اطلب المساواه بين الناس فى الفرص
مش الى الفاسد هو الى يوصل والى ماشي تمام لا

المفروض الكليات دي قبل ما تنقي الاب والام والواسطه وتقبض فلوس

تنقي الشخص نفسه وتقيمه نفسيا قبل جسديا
واخلاقيا قبل علميا

ان كان ينفع للمسؤليه دي ولا لا

تحياتي يا قمر ونورتي

أنا حر يقول...

الواسطة دي موجوده في مصر من ايام الفراعنة
بس مش هو ده المهم المهم التحول اللي حصل من قبل الثورة لحد دلوقتي يعني نوع الواسطة وحجمها
الفرق بين واحد داخل كلية الشرطة علشان يدافع عن وطنه وواحد داخل كلية الشرطة علشان السلطة والقبض على الشعب
هناك فرق في كل شيء
تحياتي

صبرني يارب يقول...

احمد ابو العلا

اااااااااه اهو التعليم المجاني ده الى خلى البت بتاعة الحنتور معاها لينساس اداب
خدته وقعدت تتنحتر بعدها

وبعدين مين قال انها موز بالعسل واللبن
كلا البت

ده مربى يا باشا مسأسأه قشطه
ههههههههههههههههههههههه

عيب عيب عيب

تحيا جمهورية مصر العربيه

واتك على جمهورية دي

ويا بابا ما تودينى الكليه الحربيه عشان اكبر تلاقينى رئيس جمهوريه

هههههههههههههههههههههه

عاشقه وغلبانه يقول...

لما لاقيتك بتتكلمي عن كليات الحربيه والشرطه افتكرتك هاتتكلمي عن اخر موضه واخر مواضيع اليوتيوب
هههههههههههههههههههههه

اسم النبي حاسهم حماه المستقبل
واسطه ايه وفافي ايه ياختي
الموضوع عدي كده بمراااااااااااحل

ده بقي في صراع بين الحربيه والشرطه
والعيال مسكوا في بعض
اللهي يخيبوا
هههههههههههههههههههههههه

http://www.youtube.com/watch?v=IUgCnQEm-B4&feature=related

اتفرجي لو ماكنتيش شوفتي لسه
ههههههههههههههههههههههههه

صبرني يارب يقول...

حسونه

ارتد الزمان ؟؟؟

والله جايز برضه

والتغيير من عنده بقى

مش عارفين هايحصل ازاي بس انا بافكر ارشح نفسي

ايه ايه ايه

ارشح نفسي لرئاسة الحي

هههههههههههههههههه

تحياتي يا فندم ونورت

صبرني يارب يقول...

فاتيما حياتي

ايه ده المدونه منوره يا جميل


اهاااااااااااااااااااااا

انا برضه باقول الافلام دي وربنا بوظت دماغ جيل

لا لا كام جيل

بتاعة الحب ما يعرفش غني وفقير
والحب بيجى زي لطشه البرد
والحب مش بادينا ده برجلينا

وبنت الباشا عادي تتجوز ابن الجناينى


وفى الاخر طلعنا بمجتمع معووج لا حصل عنب الشاب ولا بلح اليمن

لا منه اذاب الفوارق
ولا منه سابها


عيطي يا اختي عيطي

الحب وسنيه يااختي
هههههههههههههههههههههه

صبرني يارب يقول...

عاشقه وغلبانه

لا ما شوفتش يا اختي

امااروح اشوف واجي


يخيبوا يا اختي يخيبوا

صبرني يارب يقول...

انا حر

والله طبعا فى فرق

احنا دلوقتي دوله ديموووووووقراطيه

ايييييييييييه انكروا بقى

زي القطط انتم بتاكلوا وتنكروا

نوووووووورت

صبرني يارب يقول...

عاشقه وغلبانه

انااتفرجت بس ما فهمتش حاجه على فكره

والنبى ابقى احكيلى الحدوته دي كلها

بس الى فهمته ان المواكيس بتوع الحربيه كسروا قسم الشرطه وضربوا المأمور

ليه وعشان ايه وحصل ايه


ابقىقوليلى انتى بقى

عمرو يقول...

أييييييييه دنيا !!
فكرتينى بأيام كلية الشرطه لما أتقبلت فيها و طفشت منها على كلية الآداب و أبويا الله يرحمه كان حيموت من الحسره
زمايل دفعتى دلوقتى وصلوا لرتبة عقيد و منهم بقى عميد و بأقابلهم أحيانا و هم واقفين فى الشارع بينظموا المرور :))
أقول لك الصراحه يا أم خالد ؟؟
الواسطه موجوده منذ عصور الأسرات الفرعونيه و يبدو اٍنها مخلوقه فى جينات المصريين و لا أظن أن فيه أمل فى اٍختفاءها اٍلا باٍختفاء المصريين نفسهم :))
بس سيبك أنتى أنا لو كنت كملت فى الشرطه كنت حأبقى ظابط فاشل أوى أصل أنا عارف نفسى :))

بـِصَمتـِـ أميرة ــــى يقول...

عجبنى البوست اوى
ولمعلوماتك بسبب الواسطة دة انا محرومة من الشغل فى الاذاعة رغم ان السبب الظاهر انهم عايزنى اقلع الحجاب ده اللى بيقولوه
انما انا عارفه من مصادرى اللاسلكية جوه الاذاعة المصرية انى محتاجه ضهر
عندك ضهر؟؟؟
عمة انا معتمدة على ربنا ومتوكله عليه وهيجى يوم وهشتغل فيها رغما عن انف اى ضهر
يسلمووو عالموضوع
تقبلى مرورى
ملكة بحجابى

reem يقول...

صبرنى ازيك ياقمر
وانتى ياصبرنى سايبه الفيلم الرومانسي دا وقاعدة تفكرى في الواسطة ؟
ما احنا خلاص اتعودنا على كدا ودا العادى ان كل حاجة ماشية بالواسطة
عارفه انا لفت نظرى ايه في الفيلم ان ايام زمان مهما كان في اختلافات بين الناس كانت الناس بردو عندها اخلاق
يعنى الباشا بابا انجي لما عرف ان انجى وصت واحد على علي حبيبها عشان يدخل الحربية كل اللى الباشا عمله انه قال للراجل ما يخدمش علي . لكن علي دخل الحربية بردو لكن تعالي بئا لو القصة دى في ايامنا وعلي دا موجود هو وانجي الايام دى كان علي عمره ماشاف الحربية ولا عدى من سورها حتى دا اذا كان علي لسا بيعرف يمشي اصلا يعنى كان الباشا دمره تدميرا . بردو ايام زمان كانت فيها اخلاق
وحشانى ياصبرنى ومش تقلقي هاقولك انا مين بس مش عارفه الاقيكى لوحدك عشان اقولك اصل دا سر مش عاوزه الناس تعرفه هههههههههههه
لا بجد هو انتى مش تعرفينى معرفه شخصية بس يعنى تعرفي اسمى على الاقل قبل ما تدخلى مدونة عين حماتى فيها عود
يلا حلى الفزورة دى ههههههههههههههه

صبرني يارب يقول...

عمرو

هههههههههههههه ليه بس تبقى ظابط فاشل

مش يمكن كنت صلحت الشرطه كلها يا باشا
وكنت تبقى باشا يا باشا

والاهالي اصلهم بقى عندهم معتقدات عجيبه الكليات وتصنيف الكليات الى كليات ذات مركز اجتماعي وكليات لا

مع ان فى كل دول العالم التعليم الجامعي عموما تعليم محترم والمتخرجين منه كلهم بيعتبروا من تصنيف واحد


والواسطه موجوده فى العالم كله بس احنا ما بقاتش واسطه بس دي بقت مواويل كتير اوي من القرف

تحياتي يا فندم ونورت

صبرني يارب يقول...

ملكه بحجابي

يا حبيبتى والله ما عنديش ضهور انا هههههههههههههههه

او قولي بينى وبينك انا ما بادورش على ضهور يعنى

ما باحبش موضوع الوسايط ده ما بابلعوش

وخليكى بحجابك وخليكى على موقفك وان شاء الله هاتشتغلي فى المكان الى انتى عايزاه رغما عنهم

نورتي يا جميل وعاااااااشت نون النسوه والاصرار على الموقف الصحيح

انضمي للجمعيه يا بنتى هانحتاجك
هههههههههههههههه

صبرني يارب يقول...

ريم

عروستي
ههههههههههههههههههههههههه

طيب ماهو ده طبيعى كان فى اخلاق

طب اتفرجي كده على الافلام القديمه اوي موت
الى هى من ايام حسين صدقي ويوسف بك وهبي
وشوفي حتى لما بيجيبوا واحد ومراته بيتخانقوا بيتخانقوا ازاي
هههههههههههههههه

عالم كانت مؤدبه يا شيخه

وبعدين انا يوما ما هاقفشك واعرف انى مين وكمان يهمنى انك تعرفينى اصلا يا جميل ونورتي

فشكووول يقول...

العزيزه صبرنى
شفت يا صبرنى المواضيع وصلت لحد فين
الباشوات اللى فى الشرطه كلهم فافى
عشان كدا البلطجه زادت وما حدش قادر يحوش عن الناس والامن انعدم فى الشوارع
والباشوات اللى فى الجيش كلهم برضه فافى
عشان كدا اسرائيل بتعمل فينا اللى هى عايزاه
وكمان الباشوات ولاد الباشوات اللى فى النيابه ... برضه ولاد باشوات .. عشان كدا العداله زى ما انتم شايفينها والمشاكل اللى عاملينها مع بعضهم ومع الوزير .. اصلهم باشوات ولاد بشوات واحنا ولاد كلب
ولا البشوات اللى فى التليفزيون بتاع الحكومه .. تلاقى كل المذيعين ولاد المزيعين والموضوع بقه سلطه وسلصه كمان وعشان كدا ما عدش حد بيشوف تليفزيون الحكومه
لو اتكلمت على البشوات ولاد البشوات اللى ماسكين الحتت المهمه فى البلد مش حاخلص النهارده
سلام بقى اصل الموضوع حيجيب خل

صبرني يارب يقول...

استاذ فشكول

تعرف حضرتك عند ماما فى الشغل تقولي احنا ما عنداش عارفين نشغل الشباب الصغيرين
ليه لان كلهم ولاد رؤساء القطاعات او قرايبهم وطبعا كل عيل فيهم مسنود على باباه ولا مامته ولا قريبه وراكب عربيه بمهيته الى هايقبشها عشر سنين قدام
وبيصرف على نفسه فى الشهر اكتر من الى بيقبضه

هايشغلوه ازاي طيب ؟؟؟

وهكذا بقى خد عندك كل حاجه فى الدنيا


تحياتي لحضرتك ونورت

حبيبه سى السيد يقول...

ازيك عاملة والله واحشانى كتير

بصى انا اعصابى تعبت من العيشة والبلد والواسطة قرفت

انتى عارفة انا بطلت اسمع واشوف لما بقيت عاملة زى النعامة علطول دافنة راسها فى التراب من كتر الارف اللى الواحد بيشوفه

عارفة امبارح كنت عند صحبتى بيتها عند موقف اتوبيس فقلت يا بت مدام الاتوبيس من الموقف يعنى هيبقى فاضى اركبية

اصل لو غير كدة مستحيل اركبة اصل الناس بيبقوا مسحولين فوق بعض

المهم الاتوبيس اتملى لو تعرفى فى كام ست كبيرة واقفة وكام شحط قاعد

وطبعا كان صعب انى اقوم لانى لو قمت هتسحل مع الناس ورجالة بقى تلزق فيكى فمكنش ينفع

تقوليلى واسطة المشكلة مشكلة اخلاق مش اى حاجة فى الدنيا

الاخلاق الاخلاق الاخلاق

لو تبقى موجودة كل حاجة هتتحل

فبما ان مفيش اخلاق

قولى على الدنيا السلام وانسى اى حاجة لانك هتلاقى كل حاجة مباحة

تحياتى وعايز اشوف ابدعاتك تانى:)

KHALED يقول...

غلطان كل من يملك واسطة ولا يستغلها فى هذا البلد القائم على المحسوبية و الوسايط
و العوم ضد التيار متعب ...
و على رأى إللى قال مافيش فايدة
الأسد العجوز مش راضى يسيبها دمها يتجدد حتى ولو بالدم
فاهمة حاجة ... !!!!
ههههههه

تحياتى

صيدلانيه طالعه نازله يقول...

ياريت كليات العسكريه بس اللى بوسايط

ده كل حاجه فى حياتنا بقت كده و

العيشه بقت خنقه و المجد لانصاف و عديمى

المواهب و اصحاب السلطه و الملايييين

جنّي يقول...

السلام عليكم

برافو عليكي ان فطنتي لهذه الملاحظة .. حتى رؤسائنا السابقون اللي كلهم من العسكر كيف دخلوا الكلية الحربية عبد الناصر ابوه كان بوسطجي ولكنه تعلم ودخل الكلية الحربية ايام الملكية وكذلك انور السادات حتى حسني مبارك فلاحين من كفر المصيلحة التابعة لمركز شبين الكوم منوفية لا هم بشوات ولا يحزنون ..

انا انظر للفيلم من جهة اخرى خاصة باخلاقيات الضباط واللي منهم من الاحرار ( انت من الاحرار يا علي ) واللي صورهم الفيلم على انهم مجموعة من مرتادي الصالات في شارع عماد الدين زمان واقامة علاقات مشبوهة مع الراقصات ..

يعني الفيلم ما كنش واقعي لدرجة كبيرة وقد يكون عمنا احسان قد تأثر بالثورة وكلامهم عن ما قبل الثورة ..

اما اليوم فما لا تعريفنه اسوأ بكثير مما ذكرتيه عن المحسوبية والرشوة والواسطة .. والله لقد رأيت ضباط شرطة في المطار وحديثي التخرج اظنهم مصابين بانيميا حادة وقزامة ولا يصلحون ضباطا ابدا من حيث البنية الجسدية ولا الشكل العام ..

اما التعليم المجاني فغدا لن نجد مكان لابنائنا لا في المدارس ولا الجامعات والايام بيننا وان وجد سيكون اسوأ مما هو عليه الآن ..

كفاية كدا ..
افتحي انتي لنا مواضيع وخلينا نتكلم ونتورط .. انا ما قلتش حاجة يا ختي

سلام

صبرني يارب يقول...

زوجه عنيده

يا حبيبتى طبعا ازمة اخلاق من الكبيييييييييير للصغير فى البلد دي صدقينى

وابدعات ايه بقى دى كانت حاجه قديمه كاثبات يعنى لطرف النقاش الاخر وجهة نظري وما كررتهاش تاني
هههههههههههه

خلي الطابق مستور

صبرني يارب يقول...

صيدلانيه

عندك حق فعلا هى بقت كده للاسف

صبرني يارب يقول...

خالد

لا ياعم انا فهمي تقييييييييل اوي

اسد مين ؟؟ بشار الاسد ؟؟ ده حبيبنا وهانمشي على دربه ودرب ابوه ههههههههههههههههههههههه

وما زلت ضد مبدأ ما كله بيقول يا واسطه اشمعن انا

وان غلطت الدنيا كلها يفضل الغلط غلط والصح صح

الرشوه والواسطه الى تدينى حق مش حقي او تحرم حد تاني من حقه وفرصته تبقى حرام طبعا وربنا ما يكتبها علينا ابدا

تحياتي لك ونورت

صبرني يارب يقول...

جني

نفس الملاحظه دي انا قلتها على فكره مع الاشاره الى انهم حولوا فتاة الليل الى شخصيه مضحيه وذات مشاعر راقيه وحتى العلاقه المشينه الى كانت بينهم كانت كمان حب وبتنجان وكده يعنى

وعموما هو يمكن جمل جزء من الحقيقه ذكره

وبعدين ماله العلام بتاعنا ولمؤاخذه حاجه ميت فل وخماشر يا استاذنا والعيال طالعه من المدارس الحكومي عبااااااااقره

ايه ده حد قال حاجه

انتو مين يا رجاله وايه الكلام ده
هههههههههههههههههههههههههه

حنين القلب يقول...

ايه يا عم الحج الكلام الكبير ده

بصى يا ستى
اولا مش فيه عدل ولا حاجه اتغيرت من زمن سى على والزمن اللى احنا فيه ده

لالالالا استغفر الله العظيم
حاجه واحده بس اللى اتغيرت

زمان يا صبرنى مش كنت بسمع عن حاجه اسمها رشوة او ادفع وعدى او شهيصنى وانا اظبطك
مستغربه ليه ؟؟
فعلا دلوقتى بقى كله بالفلوس ومش مهم كمان الوسطه

المهم اللى لفت نظرى فى البوست كله ان الست مرات عمك خلفت 20 مرة
ازااااااااااى
مش كان فيه تحديد نسل ؟؟
هههههههههههههههههههههههههه
الله اكبر على عمك يا ستى انا مش بقر انا بحسد
هههههههههههههههههههههه

بت يا صبرنى
وحشتينى مووووت وعايزة اكلمك

صبرني يارب يقول...

حنين

يا قلبي وحشاني موووووووووت

معلش والله الايام دي محتاسه انا على الاخر

ما باقعدش خمس دقايق على بعضهم خايفه ارنلك وكالعاده اقوم ويبقى شكلي وحش يعنى


وبعدين يا بت ركزي تيته الله يرحمها هى جابت عشرين بطن بس الى فضل منهم 7

امال هى اتفقدت وهى فى الخمسين ليه يعنى خلصوا عليها يا اختي

بس خلاص ... يقول...

السلام عليكم
بجد والله كلامك صح انا فعلا كنت باقول الكلام ده ان الدنيا زمان والناس زمان كانوا احسن من دلوقتى بكتيير
حتى بشاوات زمان كان فيهم كتير وطنيين وبيحبوا البلد
لكن دلوقتى البشاوات ماشيين على مبدأ خد الفلوس واجرى ... على فكرة الهياثم جمع هيثم وهو ابن الاسد تفتكرى الهياثم بتوع اليومين دول كده

المعلم محمد صاحب المطعم - طعمية سخنة يقول...

لوووووووووووووووووووووول
كل جيل يقولك الفلوس مفيهاش بركة
و انتم جيل مهبب و جيل ما يعلم بيه الا ربنا
ههههههههههههه ده اول بوست في مدونتي
لكن التغيير واضح جدا جدا جدا
و هو ان الثورة قامت هيييييييييييييه
و اقل عملة بقت الشلن
و بالتالي الاسعار رخصت جدا جدا جدا
و دي لا باظت ولا خربت ولا جابت جاز لامؤاخذة لحد اخر الاغنية

صبرني يارب يقول...

بس خلاص

انا عارفه والله يا جميل ان هيثم يعني اسد
بس تقولي ايه فى التعبيرات العاميه المتقعه
هههههههههههههههه

نورتي وفينك يا جميل

صبرني يارب يقول...

طعميه سخنه

طيب اهلا بك فى عالم التدوين وهانيجى ناكل طعميه ان شاء الله

وهى فعلا كده

لا باظت ولا خربت ولا جاااااااابت جاز

انا برضه باحب الاغنيه دي وشايفاها معبره
نورتنا

Shimaa Esmail يقول...

الاستاذة صاحبة مدونة/ رغي إمرأة غير مطحونة.
" تحية طيبة" وبعد..
اعتذر عن الخروج من موضوع التدوينة، ولكنني ليس لدي أي وسيلة لمراسلتك فلم تشر لبريدكم الإلكتروني عبر المدونة، أرجو من سيادتك مراسلتي عبر بريدي الإلكتروني shimoo_771@yahoo.com توضحي فيها بريدك الإلكتروني واسم المدونة حتى يمكنني مراسلتك ذلك لأنه وقع الاختيار على مدونتكم كأحد مفردات العينة المختارة من مجتمع المدونات المصرية والتي أسعى لجمع بيانات ومعلومات عنها واللازمة لرسالتي المسجلة بقسم المكتبات والمعلومات والوثائق، كلية الآداب، جامعة القاهرة تحت عنوان "المدونات المصرية على الشبكة العنكبوتية العالمية مصدراُ للمعلومات: دراسة تحليلية " من إعدادي "شيماء إسماعيل عباس" وتحت إشراف الأستاذة الدكتورة "يسرية عبد الحليم زايد" أستاذ المكتبات والمعلومات بالقسم.
أرجو الاهتمام والرد سريعا ومراسلتي لمعرفة مدي موافقتك أم لا على الإجابة عن استمارة استقصاء البيانات – استبيان- عن المدونات المصرية.
تحياتي وتقديري
شيماء إسماعيل
باحثة بالماجستير- كلية الآداب جامعة القاهرة.

صبرني يارب يقول...

اوك يا شيماء

تم الرد عليكى يا قمر ابقى شوفي اميلك

بس اوعي يكون الاستبيان ده بيوجع
ههههههههههههههه

Shimaa Esmail يقول...

الاستاذة صاحبة مدونة/ رغي إمرأة غير مطحونة.
" تحية طيبة" وبعد..
اعتذر عن الخروج من موضوع التدوينة،أشكرك جدا على الرد الجميل والتعليق.بارك الله فيكِ وجزاك كل الخير، ولقد أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية.
أرجو الاهتمام والرد سريعا بالموافقة أو الرفض.
على فكرة مش بيوجع خالص ربنا يحميكي ويحفظك ويكرمك.
تحياتي وتقديري.
شيماء إسماعيل عباس.
باحثة بالماجستير- كلية الآداب جامعة القاهرة.

من غير عنـــوان يقول...

...........هي دي مصر يا عبله

صبرني يارب يقول...

اه والله للاسف هي دي مصر

mahasen saber يقول...

ههههههههههههه اعلمك ايه
ههههههههههههههه

بربشلى فى الظلام

صبرنى تعيش دور المراه المستوجعه على الرجل

سيبك انتى وحشتينى جدا جدا

وكل عيد ام وانتى بالف خير يا قمر

وولادك ماليين حياتك وانتى وزجك فى كامل السعاده والحب يا قمر

صبرني يارب يقول...

محاسن

ههههههههههههه


لا يا اختي بس انا ما باعرفش افور يعنى

الى في قلبي على لساني كده خبط لزق ههههههههههههه


وكل سنه وانتى بالف خير يا جميل وبيرو جابلك ايه ؟